⚡️"Выходзіў з мяшком на галаве і з ёгуртам у руцэ". Мінчука арыштавалі на 30 сутак за непадпарадкаванне

8 ліпеня падчас масавых затрыманняў па ўсёй Беларусі прыйшлі і да 31-гадовага Дзяніса Ілюковіча. У дзверы мінчука пагрукаліся супрацоўнікі Кастрычніцкага РУУСа а 8 раніцы, а калі той адчыніў дзверы, то адразу заявілі, што ён затрыманы за непадпарадкаванне супрацоўнікам міліцыі😳

Падставай для затрымання стала інфармацыя, што Дзяніс з'яўляецца ўдзельнікам экстрэмісцкіх каналаў.

У РУУСе на мужчыну склалі пратаколы па арт. 24.3 КаАП за непадпарадкаванне і па арт. 19.1 КаАП за дробнае хуліганства. Але, па словах відавочцаў затрымання, Дзяніс выходзіў з дому дабраахвотна, але з мяшком на галаве і з ёгуртам у руцэ.

⚖Суд над Ілюковічам праходзіў ужо на наступны дзень – 9 ліпеня. Справу разглядала суддзя Вольга Няборская. Яна палічыла мінчука вінаватым па двух пратаколах і арыштавала яго на 30 сутак.

⚡️«Расстраляў бы ўсіх бэчэбэшнікаў». Мінчук распавёў, як «даседжваў суткі» за Марш у кастрычніку

У кастрычніку Сяргея (імя зменена ў мэтах бяспекі) затрымалі на адной з мірных акцый пратэсту і адвезлі ў Цэнтральны РУУС. Ва ўпраўленні, па яго словах, над затрыманымі здзекаваліся: рабілі «ластаўку» і трымалі іх так на працягу трох гадзін на падлозе. Потым затрыманых адвезлі на Акрэсціна, дзе на наступны дзень над імі прайшоў суд . Суддзя Цэнтральнага раёна арыштаваў мужчыну на 15 сутак па арт. 23.34 КаАП за ўдзел у несанкцыянаваных масавых мерапрыемствах. Але пасля суда Сяргею стала дрэнна, таму з Акрэсціна яго забралі на хуткай з-за сардэчнай арытміі, а ў ізалятар з бальніцы ўжо не вярнуўся. У выніку, у мінчука засталіся неадседжаных 14 сутак, якія яму трэба было адседзець на працягу года.

30 чэрвеня Сяргею патэлефанавалі з Цэнтральнага РУУСа і прапанавалі прыехаць на «прафілактычную гутарку наконт БЧБ і распісацца». Сяргей дамовіўся з міліцыянтамі, што прыедзе ў РУУС 1 ліпеня адразу пасля працы. На наступны дзень супрацоўнік РУУСа, які прапанаваў гутарку, нагадаў Сяргею, што той не адбыў увесь тэрмін свайго арышту, таму яго зараз затрымліваюць зноў. З РУУСа праз пару хвілін мінчука ўжо выводзілі ў кайданках, «ластаўкай» і «тварам уніз». Па дарозе на Акрэсціна канваір сказаў Сяргею, што «расстраляў бы ўсіх бэчэбэшнікаў»🤡

У ІЧУ пасля дагляду Сяргея накіравалі ў чатырохмесную камеру, у якой былі адразу (!!!) 21 чалавек. Ні матрацаў, ні бялізны, а спалі ўсе «штабелямі на падлозе». На прагулкі «палітычных» не выводзяць. У душ нават падчас такой спякоты нікога не пускаюць. «Шмон» супрацоўнікі Акрэсціна праводзяць пяць разоў на дзень: тройчы за дзень і двойчы ноччу. За 14 сутак Сяргей паспеў пабываць у трох камерах, у кожнай з каторых таксама было каля 20 чалавек. Акрамя гэтага, у камеры да палітычных працягваюць саджаць бяздомных людзей.

Мужчына мяркуе, што перахварэў за кратамі на COVID-19, бо некалькі дзён была высокая тэмпература, кашаль і знікаў пах на некаторы час. У камерах кожную раніцу арыштантам выдавалі градуснік і таблеткі ад кашлю.

Перадачы «палітычным» не перадаюць наогул. Сяргей кажа, што на выхадзе яму аддалі перадачу, але ў ёй не хапала і паловы таго, што перадавала жонка. Лісты, вядома, таксама не даходзяць да затрыманых.

⚡️Затрымалі на памінках за тое, што два месяцы таму слухаў у машыне песню Цоя «Перемен»

🔺Сяргей распавёў «Вясне назірае» пра бяздомнага на Акрэсціна, які спражняўся пасярод камеры «палітычных», сукамерніка, які нібыта разбіў акно памочніцы пракурора і пра суддзю, якая строіла здагадкі, каб даказаць віну Сяргея.

⚡️«Супрацоўнікі адбіраюць грошы, а потым прыходзяць з чэкамі». Відавочца распавяла пра тое, што адбываецца ў ЦІПе на Акрэсціна

«З некаторых часоў у ЦІПе на Акрэсціна супрацоўнікі адбіраюць з асабістых рэчаў арыштаваных наяўныя беларускія грошы без дазволу іх уладальнікаў. Праз пару дзён у камеру прыходзіць супрацоўнік з чэкамі на тую суму, якую яны канфіскавалі, і кажа, што «гэта за харчаванне». Пры вызваленні чалавеку выдаюць рахунак на аплату за харчаванне ўжо за вылікам канфіскаванай сумы. Але згодна з заканадаўствам, арыштаваны ў праве ў добраахвотным парадку аплаціць харчаванне на працягу месяца».

🔹Чытаць цалкам: https://telegra.ph/vernite-dengi-07-22

⚡️"Чаплялася за адзенне супрацоўніка". Мінчанку арыштавалі за непадпарадкаванне ў момант, калі яе рукі былі за спіной у кайданках

23 ліпеня ў судзе Цэнтральнага раёна разглядзелі справу 57-гадовай Марыны Петражыцкай. Яе справу вёў суддзя Дзмітрый Карсюк.

Па пратаколу Марыну затрымалі 22 ліпеня ў 21:05 на тэрыторыі Цэнтральнага РУУСа. Яе абвінавацілі ў непадпарадкаванні супрацоўнікам міліцыі, бо нібыта яна ўпіралася нагамі і чаплялася за адзенне супрацоўніка. Жанчына з пратаколам не пагадзілася, бо яна сцвярджае, што ў 21:15 яна была яшчэ ў будынку КДБ на вул. Казлова, 6, куды яе прывезлі пасля ператрусу дома. Яна звяртае ўвагу суда, што наогул не магла аказваць непадпарадкаванне, бо ўвесь час яе рукі былі за спіной у кайданках.

На допыце сведка-міліцыянт заявіў, што "ім паступіла інфармацыя аб магчымам удзеле Марыны ў несанкцыянаваным масавым мерапрыемстве". Ён сцвярджае, што пры затрыманні прадставіўся і назваў жанчыне прычыну.

Пытанне адвакаткі наконт даты і часу "магчымага ўдзелу ў мерапрыемстве" суддзя Дзмітрый Карсюк зняў.

Дыялог суддзі са сведкай:
– Ва што была апранутая Петражыцкая?
– Як і зараз: у блузку ў кветачкі і ў штаны чорнага колеру.

🤡Падчас працэсу сведка-міліцыянт апрануў балаклаву і кепку. Перад адказам на пытанне адвакаткі было чуваць, як сведку нехта (!!!) падказваў:
– Петражыцкая была ў кайданках?
– (выразна чуваць "пасля") Гэта было пасля таго, як яна аказала непадпарадкаванне.

Па словах самой Марыны, да службовай машыны, на якой яе адвезлі ў РУУС, яе суправаджаў маёр КДБ, а кайданкі знялі толькі ў будынку РУУСа. Сведка ж гэта адмаўляе, бо ён не бачыў на месцы затрымання супрацоўніка КДБ і не памятае, што па тым адрасе знаходзіцца будынак КДБ.

⚖Адвакатка падчас працэсу заявіла адвод суддзі, бо ён прама ці ўскосна зацікаўлены ў выніку справы. Але суддзя Карсюк, вядома, адхіліў яго. У выніку, суддзя пакараў Марыну Петражыцкую 15-сутачным арыштам.

❗️"Усім было зразумела хто і навошта вывесіў фашысцкі, на маю думку, сцяг". Мінчука арыштавалі за сцяг на ўваходзе ў кладоўку

51-гадовага Дзмітрыя Асеева затрымалі на працы 23 ліпеня. Амаль праз пару гадзін яго справу ўжо разглядаў суддзя Цэнтральнага раёна Дзмітрый Карсюк.

Мужчыну абвінавацілі паводле арт. 24.23 КаАП у тым, што ён вывесіў БЧБ-сцяг на ўваходзе ў кладоўку. Пры гэтым, Дзмітрый працуе на станцыі тэхнічнага абслугоўвання, а кладоўка наогул знаходзіцца на другім паверсе. Згодна з рапартам, на сцяг паскардзіўся ў міліцыю "неабыякавы грамадзянін", чыё імя на судзе агучыў суддзя. Сваю віну Дзмітрый адмаўляе, бо не лічыць гэта правапарушэннем. Па словах мужчыны, сцяг нікому не бачны, таму гэта нельга расцэньваць, як пікетаванне.

🤡На суддзе дапыталі і міліцыянта "Аляксандровіча". З паказанняў сведкі:

– Нам паведамілі, што на СТА размешчаны – я нават сцягам гэта не магу назваць – бел-чырвона-белае. Мы адразу зразумелі каму гэта належыць. У Асеева на руцэ быў БЧБ-бранзалет з надпісам "Жыве Беларусь". Усім было зразумела хто і навошта вывесіў фашысцкі, на маю думку, сцяг.

⚖Суддзі Карсюку паказанняў сведкі было дастаткова, таму ён арыштаваў Дзмітрыя на 15 сутак.

‼️Сям'ю затрымалі супрацоўнікі КДБ, а асудзілі за непадпарадкаванне супрацоўнікам РУУСа

22 ліпеня супрацоўнікі КДБ затрымалі амаль усю сям'ю: 66-гадовую Таццяну Шчасную, 64-гадовага Сяргея Анановіча і 29-гадовага Яна Анановіча. Быў праведзены ператрус у іх кватэры і на лецішчы. Пасля допыту ў КДБ усіх адвезлі ў Савецкае РУУС, дзе склалі пратаколы па арт. 24.3 КаАП. Згодна з пратаколам, яны аказалі непадпарадкаванне супрацоўнікам міліцыі на тэрыторыі РУУСа: упіраліся нагамі і рукамі, адмаўляліся выходзіць з аўтамабіля.

Справы ўсіх членаў сям'і 23 ліпеня разглядзелі суддзі Савецкага раёна Сяргей Шаціла і Аляксандр Волк.

⚖️Яна Анановіча, па яго словах, наогул адразу не затрымлівалі. Супрацоўнікі КДБ прапанавалі прыехаць хлопцу дадому да бацькоў, каб аддаць ім ключы ад кватэры, у якой павінен быў адбыцца ператрус. Пасля ператрусу Яна разам з бацькамі адвезлі ў КДБ, дзе дапыталі ў якасці сведкі, а затым перавезлі ў Савецкае РУУС. Там, па словах сведкі-міліцыянта, ён і "здзейсніў правапарушэнне". Міліцыянт на судзе пацвердзіў непадпарадкаванне. Суддзя Шаціла прызнаў Яна вінаватым і арыштаваў яго на 10 сутак.

⚖️Сяргея Анановіча судзіў таксама суддзя Шаціла. Сваю віну мужчына не прызнаў, бо сцвярджае, што выйшаў са службовай машыны па першаму патрабаванню. У сваіх паказаннях ён пацвердзіў усе словы сына. Сяргей даглядае сваю 86-гадовую маці, якая знаходзіцца ў цяжкім стане з-за кавіда, таму суддзя аштрафаваў Сяргея на 2900 рублёў (100 базавых велічыняў).

⚖️Найбольш жорсткае пакаранне вынеслі Таццяне Шчаснай, справу якой разглядзеў суддзя Аляксандр Волк. Жанчына на судзе заявіла, што гэта ўсё няпраўда і суддзя гэта павінень разумець. Са словаў Таццяны, яна дабраахвотна выйшла са службовай машыны і прайшла ў РУУС. Сведка "Любімаў" на судзе сцвярджаў, што жанчыну затрымалі для "высвятлення асобы", а ва дворыку адмовілася прайсці за ім. Відэакамеры ў двары РУУСа, вядома, не працавалі. У выніку, разглядзеўшы справу за 15 хвілін, суддзя Волк арыштаваў Шчасную на 15 сутак.

❗️Ад 13 да 28 сутак. Чатырох мінчукоў пакаралі за белыя аркушы паперы на вокнах

Учора ў судзе Фрунзенскага раёна прайшлі суды над мінчукамі, якіх затрымалі 25 ліпеня.

Справы 42-гадовай Маі Шатохінай і 26-гадовага Юрыя Клімашэўскага разглядзела суддзя Юлія Чыж. Мінчукоў абвінавацілі ў "выражэнні сваіх палітычных інтарэсаў шляхам размяшчэння на акне аднаго белага аркуша паперы". За гэта правапарушэнне Маю і Юрыя затрымалі дома. Пры гэтым, у хлопца падчас перетрусу канфіскавалі два тэлефоны і два ноўтбукі.

На судзе яны пацвердзілі, што вывешвалі аркушы на акно, але з іншай мэтай. Па словах Шатохінай, аркуш паперы яна зняла адразу пасля таго, як патэлефанавалі з міліцыі, і нават зрабіла відэа, на якім бачна, што на паперы ёсць пісьмовыя заўвагі. У Юрыя, з яго словаў, таксама на паперы былі запісы.

⚖️У выніку, суддзя Чыж пакарала Маю і Юрыя 15-сутачнымі арыштамі па арт. 24.23 КаАП.

34-гадовага Дзяніса Кулікова і 31-гадовага Андрэя Мураўёва затрымалі таксама дома. На наступны дзень іх справы разглядзела суддзя Фрунзенскага раёна Марыя Ярохіна.

Згодна з пратаколам, на акне ў Дзяніса віселі два аркушы паперы, а ў Андрэя – чатыры. Суддзю Ярохіну цікавіла "сэнсавая нагрузка" паперы на акне. Але мужчыны сцвярджалі, што вывешвалі іх не з-за палітычных поглядаў.

⚖️Суддзя палічыла віну мужчын па арт. 24.23 КаАП цалкам даказанай і арыштавала Дзяніса на 13 сутак, а Андрэя – на 28 сутак.

⚡️«Усю камеру вывелі начаваць на вуліцу, дзе яны правялі каля 17 гадзін». Мінчук распавёў пра ўмовы ўтрымання на Акрэсціна ў ліпені

Іван (імя змененае ў мэтах бяспекі) быў затрыманы ў сярэдзіне ліпеня. На яго склалі пратакол па арт. 24.3 КаАП (непадпарадкаванне супрацоўнікам міліцыі), а потым пакаралі «суткамі». Свой арышт хлопец адбываў у ЦІПе на Акрэсціна. Іван распавёў «Вясне назірае» пра аплату «на месцы» за харчаванне, у рацыёне якога быў хлеб з цвіллю, пра песні Цімы Беларускіх замест будзільніка, забароны для «палітычных» і холад у камеры.

Песні Цімы Беларускіх дагэтуль гучаць у ізалятары

«У ІЧУ бялізну, ручнікі і матрацы ў нашай камеры нікому не выдалі, неглядзячы на тое, што тры чалавекі былі не па «палітычных» артыкулах. Ваду таксама не давалі, а ў душ і на шпацыр не вадзілі. Першую ноч было выключанае святло, дзве наступныя — наадварот. У камеры нават не працаваў зліў унітаза. У ізалятары ўвесь час працавала радыё «Севастопаль», а песні Цімы Беларускіх былі замест будзільніка. Яго песні цяпер там кожны дзень ўключаюць», — распавядае Іван.

Харчаванне ў ЦІПе: хлеб з цвіллю, вада з крана, а аплата за гэта грашыма з асабістых рэчаў затрыманых

У ЦІПе ўмовы не змяняліся: ні матрацаў, ні бялізны, у душ і на шпацыр затрыманых не выводзілі ні разу. Ваду ўсе вымушаныя піць з крана. Таксама арыштанты не маюць магчымасці афіцыйна адмовіцца ад харчавання, каб за яго не плаціць. Адна з прычын — «няма паперы і ручкі». Акрамя гэтага, за кратамі аказваецца шмат вегетарыянцаў, якім не падыходзіць «мясцовы» рацыён, таму без перадачак яны вымушаны галадаць. Пры гэтым, аплату за харчаванне забіраюць нават за тыя дні, у якія зняволеныя наогул не прымаюць ежу. Напрыклад, калі іх вывозяць на суд:

«Нас было 18 чалавек у чатырохмеснай камеры. Посуд давалі на кожнага, але пасля супу талерку трэба было мыць вадой з крана, потым яе складалі і туды ўжо накладвалі "другое", гэта значыць, што ты еў ужо з чужой талеркі, чысціня якой выклікала пытанні. Некалькі разоў давалі хлеб ад "Мінскхлебпрам" з чорнай і жоўтай цвіллю. За некалькі дзён да майго вызвалення мне прынеслі чэк аб аплаце харчавання грашыма, якія былі ў асабістых рэчах. Да гэтага часу ў ЦІПе я нічога не еў. Мы спрабавалі аддаць раніцай маю ежу раздатчыцы, але яна кінула яе на падлогу. У адзін з дзён пасля сняданку нас адвезлі з ІЧУ ў РУУС для суда, а назад прывезлі позна ўвечары. Адпаведна, абеду і вячэры ў нас не было, але ў кошт гэта ўключылі».

«Пры афармленні ў ЦІП лекар дае падпісаць дакумент, дзе трэба паставіць вельмі шмат подпісаў. І вось там сярод усяго ёсць пункт аб згодзе на тое, каб за харчаванне была праведзена аплата з грошай, якія былі з сабою. Але на гэта мала хто звяртае ўвагу», — растлумачыў Іван.

Арыштанты правялі 17 гадзін ў двары ЦІПа

Акрамя таго, што ўжо некалькі месяцаў арыштаваным па «народных артыкулах» не перадаюць лісты, перадачы і не даюць паперу і пісьмовыя прылады, з камер, па словах хлопца, супрацоўнікі ЦІПа забіраюць і фігуркі з хлеба. Гэтыя фігуркі зняволеныя выкарыстоўваюць для настольных гульняў, таму іх прыходзіцца рабіць кожны раз новыя. Таксама Іван кажа, што ў ЦІПе, калі тэмпература на вуліцы знізілася, стала холадна. Пры гэтым, многія сукамернікі былі ў шортах і без шкарпэтак, таму з-за пастаяннага скразняку ўсе сталі хварэць.

Сукамернікі Івана распавялі, што незадоўга да яго ў камеры пры невыноснай спякоце, многія гублялі прытомнасць, таму затрыманых пачалі выводзіць на прагулкі. У адзін з дзён, са словаў сукамернікаў, усю камеру вывелі начаваць на вуліцу ў двор ЦІПа, дзе яны правялі каля 17 гадзін. Але хлопец не ведае, ці было гэта зроблена ў якасці пакарання.

Іван звяртае ўвагу, што нават калі перадачу зняволеным не аддаюць адразу, то забіраць яе пасля вызвалення — гэта велізарная падтрымка. Бо на выхадзе з ЦІПа «палітычным», якім перадачы не перадавалі, супрацоўнікі Акрэсціна казалі: «Бачыш, ты нікому не патрэбны, і на зону табе х*р хто што перадасць».

❗️Чарговыя «суткі» за белы аркуш паперы на акне. На думку міліцыянтаў, гэта «незаконны бюлетэнь, які заклікае да пратэстных мерапрыемстваў»

Каля 22:00 27 ліпеня быў затрыманы 44-гадовы Андрэй Грынчык. Супрацоўнікі Фрунзенскага РУУСа адвезлі мужчыну ва ўпраўленне, дзе склалі пратакол па арт. 24.23 КаАП. Падставай для затрымання стаў белы аркуш паперы на акне, які міліцыянты расцанілі як пікетаванне.

Сёння ў судзе Фрунзенскага раёна справу Андрэя разглядзела суддзя Марыя Ярохіна. Грынчык растлумачыў суду, што вывесіў аркуш у знак пртэсту супраць гвалту, але не ведаў, што міліцыянты ўспрымуць гэта як «знак пратэсту, накіраваны на дэстабілізацыю дзеючага рэжыму».

😳У пратаколе агляду, які склалі міліцыянты, заяўлена, што «выяўлены аркуш паперы з’яўляецца незаконным бюлетэнем, які заклікае да пратэстных мерапрыемстваў, які з'яўляецца адзіночным пікетам».

⚖️За адзін белы аркуш суддзя Ярохіна пакарала бацьку двух непаўнагадовых дзяцей 25-сутачным арыштам.

Фота: Наша Ніва

⚡️На 2900 рублёў аштрафавалі дзяўчыну за тое, што сушыла на балконе цішотку

26 ліпеня ў судзе Фрунзенскага раёна разглядзелі справу 31-гадовай Алесі Яначкінай, якую затрымалі напярэдадні дома. У Фрунзенскім РУУСе на дзяўчыну склалі пратакол па арт. 24.23 КаАП за несанкцыянаванае пікетаванне. Згодна з пратаколам, Алеся вывесіла на балконе белую цішотку з чырвонай паласой пасярэдзіне, якая, на думку міліцыянтаў, формаўтварала БЧБ-сцяг.

Па словах Алесі, цішотка сохла на балконе некалькі дзён, а зняла яна яе адразу пасля заўвагі ўчастковага. Праз пару дзён за дзяўчынай прыйшоў міліцыянт і прапанаваў прайсці з імі на прафілактычную гутарку, пасля чаго яе затрымалі да наступнага дня. У Алесі ёсць непаўнагадовае дзіця, таму яе павінны былі вызваліць праз тры гадзіны. Сведка-міліцыянт на судзе нават забыўся, што менавіта ён затрымліваў дзяўчыну і складаў пратакол.

⚖️Судзя Марыя Ярохіна прызнала Алесю вінаватай у пікетаванні і пакарала яе штрафам у памеры 2900 рублёў (100 базавых велічыняў).

⚡️Карэспандэнта "Вячэрні Магілёў" арыштавалі на 6 сутак за пікет супраць гвалтоўнай вакцынацыі

Егудзі Ігаэля затрымалі 27 ліпеня ў Мінску на праспекце Незалежнасці. Супрацоўнікам АМАПу не спадабалася цішотка Егудзі з надпісам "Против насильственной вакцинации", таму ў Ленінскім РУУСе на мужчыну склалі пратакол па арт. 24.23 КаАП за несанкцыянаванае пікетаванне.

30 ліпеня над мужчынам прайшоў суд, а яго справу разглядзела суддзя Ленінскага раёна Таццяна Шоцік.

У самым пачатку паседжання Егудзі заявіў, што "супрацоўнікі Акрэсціна яму гаварылі, што ў яго няма ніякіх правоў, яго не азнаёмілі з матэрыяламі справы і не дазволілі патэлефанаваць адвакату". Таму мужчына запатрабаваў "выканання правоў у месцах пазбаўлення волі".

Адвакат хадайнічаў аб далучэнні да справы ліста ад працадаўцы, у якім гаворыцца, што Егудзі працуе ў фондзе "Адкрытыя сэрцы", з'яўляецца пазаштатным карэспандэнтам газеты "Вячэрні Магілёў" і робіць усё для падтрымкі дзеючага канстытуцыйнага ладу.

На судзе мужчына не разумеў, чаму яго судзяць і некалькі разоў заяўляў аб парушэнні яго правоў. Таксама дадаў, што ён вядомы тым, што падтрымлівае Лукашэнку.

⚖Суддзя Шоцік, у выніку, палічыла віну Егудзі цалкам даказанай, таму пакарала яго 6-сутачным арыштам.