Міколу Статкевіча перавялі ў «больш прасторную» камеру — яна на 7 сантыметраў шырэй, чым папярэдняя

Пра гэта палітвязень напісаў у лісце жонцы

«Галоўная навіна — перавялі ў камеру паверхам вышэй. Яна на сантыметраў 7 шырэй і гэтага хапіла, каб "прасунуцца паўз тумбачку да сценкі, супрацьлеглай дзвярам. У выніку цяпер, хоць і "зігзагам", але можна прайсці па камеры пяць крокаў. Што зрабіла мае "прагулкі" больш "інтэнсіўнымі".

...Паступова павялічваю нагрузкі падчас заняткаў фізкультурай. Днём у мяне тры "прагулкі" па камеры па 30-40 хвілін і адна вечарам на 20-30 хвілін. Падчас дзённых "прагулак" раблю фізічныя практыкаванні. З-за памераў камеры прыйшлося ўводзіць практыкаванні з "гантэляй", у якасці якой скарыстоўваю ПЭТ-бутэльку 1,5 л. Праўда, з-за невялікай вагі мушу цягаць гэтую "гантэлю" па разоў 800 за дзень».

💌Падтрымаць палітвязня: ПК № 13, 211791, Глыбокае, Савецкая, 205, Статкевічу Мікалаю Віктаравічу
💻 Напісаць анлайн 👉 bit.ly/3PIOcjz

Арыштавалі кватэру Сяргея і Святланы Ціханоўскіх

Пра гэта Святлана паведаміла ў сваім тэлеграм-канале.

«Нашу з Сяргеем Ціханоўскім мінскую кватэру арыштавалі. У ёй апісалі ўсё – аж да акварэльных фарбаў дзяцей – каб прадаць і сабраць грошай у казну. І такіх людзей, як Сяргей, у Беларусі тысячы».

Нагадаем, 14 снежня 2021 года Сяргея Ціханоўскага асудзілі да 18 гадоў зняволення ў калоніі ўзмоцненага рэжыму. У папраўчай калоніі Ціханоўскі знаходзіўся толькі адзін месяц, а потым яму змянілі рэжым на турэмны.

Часовая павераная ў справах ЕС у Беларусі Эвеліна Шульц была затрыманая пасля суда над Марфай Рабковай, Андрэем Чапюком і яшчэ 8 палітвязнямі

Пра здарэнне піша @radioasvaboda са спасылкай на BPN.

Яе каля дзвюх гадзін трымалі ў міліцыі.

Кіраўнік прадстаўніцтва ЕС у Мінску Дзірк Шубель (у сярэдзіне 2021 году пакінуў краіну і працуе з-за мяжы) і кіраўніцтва ЕС у Бруселі ўжо ведаюць пра затрыманне сваёй дыпламаткі. Пэўна, Шульц мае дыпламатычны імунітэт.

❗️«Такое прадстаўленне не вартае нават пухавіцкага палаца культуры», — Акіхіра Гаеўскі-Ханада ў апошнім слове

Моцнае апошняе слова палітвязня, якога ўчора асудзілі да 16 гадоў калоніі. Акіхіра ўжо больш за два гады знаходзіцца за кратамі, пасля затрымання яго білі і катавалі.

«Я шчыра шкадую толькі пра тое, што не прыклаў усе высілкі супраць фашысцкай банды, якая сфармавала краіну, дзе "часам не да законаў". Быць цяпер супраць іх — значыць быць антыфашыстам. Быць супраць такіх дзяржаў — значыць быць анархістам. Перафразоўваючы Генры Тора, адзінае месца, якое падыходзіць сумленнаму грамадзяніну ў той дзяржаве, у якой узаконьваецца і падтрымліваецца бяспраўе, ёсць турма

Чалавечы дзякуй адвакатам, якія не баяцца і не апускаюць рукі. Лепшыя часы яшчэ наперадзе!

No pasaran! Жыве Беларусь і Слава Украіне!».

Апошняе слова цалкам

💳94 гады зняволення на ўсіх — падтрымайце зняволеных на BySol

У міліцыю да затрыманых пасля ўчорашняга суда прыязджаў Азаронак — больш за ўсё «дасталася» часовай паверанай у справах ЕС у Беларусі Эвеліне Шульц

Праваабаронцам сталі вядомыя падрабязнасці ўчорашняга «хапуна» пасля суда над Марфай Рабковай, Андрэем Чапюком і яшчэ 8 палітвязнямі. Вядома, што затрыманага Данілу Крашэўскага сёння будуць судзіць за рэпосты ў сацсетках.

Да затрыманых у Фрунзенскі РУУС прыязджаў прапагандыст Рыгор Азаронак. Ён хадзіў з мікрафон і настойліва патрабаваў ад затрыманых даць каментар. Найбольш «дасталася» ад яго часовай паверанай у справах ЕС у Беларусі Эвеліне Шульц — Азаронак «насядаў» на яе з пытаннямі больш за ўсіх.

Нагадаем, Шульц, якая пэўна мае дыпламатычны імунітэт, правяла ў міліцыі каля дзвюх гадзін.

Доступ да сайту незалежнай газеты «Вечаровы Бабруйск» заблакаваны

Пра гэта паведамляе @euroradio са спасылкай на чытачоў.

Сайт ужо некалькі дзён не адчыняецца ў Беларусі. З-за мяжы адкрываецца праз раз. Само выданне на сайце і ў сацсетках пра блакаванне не паведамляе.

💔Палітвязень Мікіта Слепянок у апошнім слове: «Хачу называцца беларусам, жыць у гэтай краіне і сапраўды нешта рабіць для яе»

Учора ў Гомельскім абласным судзе асудзілі адміністратара культурна-гістарычнага Telegram-канала Rezystans палітзняволенага Мікіту Слепянка да трох гадоў калоніі. Юнака абвінавцілі ў стварэнні экстрэмісцкага фарміравання і кіраванні ім (ч. 1 арт. 361-1 КК).

На судзе Мікіта выступіў з моцным апошнім словам:

«Я за кратамі ўпершыню. Даводзіцца бачыць у гэтай клетцы маладых людзей: мне 22 гады, а ім па 20, па 18. Іх лічаць тэрарыстамі, экстрэмістамі, дэструктыўнымі элементамі. Я не ведаю, чаму такія людзі апыняюцца тут, чым яны кіруюцца і ці ставіць хаця б нехта сябе на нашае месца.

Як чалавек, які знаходзіцца тут, я магу сказаць, што мы такія ж беларусы, як і тыя, хто па той бок кратаў – маладое пакаленне, каму жыць у гэтай краіне і будаваць яе, рабіць нешта для яе, ствараць свае семʼі, захоўваць сваю незалежнасць – сапраўдную і нефармальную, захоўваць сваю мову, культуру, гісторыю. Для гэтага нам даводзіцца сядзець тут, бо мы проста выказалі сваё меркаванне. Мы – людзі, якім тут так ці інакш жыць і так ці інакш нешта казаць. Выказваем кожны па-свойму, каб людзі ў краіне сапраўды ведалі што думае сучасная моладзь.

Я хацеў бы сказаць, што ёсць і іншая моладзь – прагрэсіўная, шчаслівая, якая абсалютна не бачыць ніякіх праблем. Але, пры гэтым, ведаючы большасць сваіх знаёмых і назіраючы тут, у турме – я так разумею, што большасць людзей не мае асаблівых планаў і не ведаюць, чаго хочуць ад гэтага жыцця. Але калі размова пра мяне – то я дакладна ведаю, чаго хачу ад жыцця: я хачу называцца беларусам, жыць у гэтай краіне і сапраўды нешта рабіць для яе. Не толькі для самога сябе, але і для сваёй краіны, якую я сапраўды люблю і зʼяўляюся патрыётам. Ці будзе ў мяне такая магчымасць – гэтага я ведаць не магу. Хацелася б верыць, што так. І хацелася б верыць, што калі я выйду адсюль – Беларусь будзе заставацца Беларуссю. Не гледзячы ні на што».

Да разгляду апеляцыйнай скаргі вы можаце падтрымаць палітвязня грашовымі пераводамі, пасылкамі або бандэролькамі з рознымі смачняшкамі і прыемнымі дробязямі.

💌Адрас для падтрымкі: СІЗА-3. 246003, г. Гомель, вул. Кніжная, 1А, Мікіта Антонавіч Слепянок
💻Напісаць анлайн

Чатырох адвакатаў з Гомельшчыны пазбавілі ліцэнзій. Раней яны абаранялі палітзняволеных

6 верасня кваліфікацыйная камісія па пытаннях адвакацкай дзейнасці ў Беларусі правяла пазачарговую атэстацыю адвакатаў, у тым ліку чацвярых – з Гомельскай абласной калегіі адвакатаў. Гэта Генадзь Уласенка (Мазыр), Таццяна Саўчанка і Павел Кулажанка (Рэчыца), а таксама Ганна Паўлюк (Гомель).

Такое рашэнне прынятае нягледзячы на тое, што адвакат Ганна Паўлюк, напрыклад, мае больш за 10 гадоў стажу работы па спецыяльнасці, з'яўляецца магістрам юрыдычных навук і выкладчыкам у ГДУ і ГГМУ. А адвакат Таццяна Саўчанка мае больш за 36 гадоў стажу працы па спецыяльнасці.

Крыніца: Гомельская Вясна

✊Андрэй Чапюк у апошнім слове: «Праўда, аб'ектыўнасць і справядлівасць мацнейшыя за бандыцкія метады МУС і КДБ»

Праваабаронцам перадалі прамову 26-гадовага валанцёра «Вясны», якога ўчора асудзілі да 6 гадоў калоніі.

«Я ведаю, што кожны ў хуткім часе адкажа за свае дзеянні, за свае рашэнні перад грамадствам. Не трэба гэта расцэньваць як пагрозу. Рэальнасць паказвае, што праўда, аб'ектыўнасць і справядлівасць мацнейшыя за бандыцкія метады МУС і КДБ. Людзі не палохаюцца ўстаць на шлях барацьбы за правы! Бо законы, працэсуальныя нормы можна трактаваць у сабе зручны бок. А можна і зусім на іх не звяртаць увагі, бо «высокі суд» сам дае ацэнку чаму-небудзь.

Я хачу, падсумаваўшы, сказаць дзякуй усім беларусам! І асобнае дзякуй тым, хто аказваў дапамогу людзям, якія апынуліся ў бядзе, у гэты неспакойны час. Беларусь будзе вольнай!».

Апошняе слова цалкам

💳94 гады зняволення на ўсіх — падтрымайце зняволеных на BySol

Грамадскае аб'яднанне «Wspólnota Polaków» ліквідуюць праз суд

Паседжанне аб ліквідацыі пройдзе ў Вярхоўным Судзе. Пазоўнік — Міністэрства юстыцыі Рэспублікі Беларусь. Суддзя — Ганна Сакалоўская.

«Wspólnota Polaków» з'явілася ў 2019 годзе. Яе ўзначаліў Мечыслаў Яскевіч, які раней быў старшынём непрызнанага ўладамі Саюза палякаў. Калі на пасадзе яго змяніла Анжаліка Борыс, Яскевіч вырашыў стварыць уласную арганізацыю.

Крыніца: @nebovkletku

3,5 гады «хатняй хіміі» — паводле «народнага» артыкула

6 верасня ў судзе Фрунзенскага раёна Мінска агучаны вырак 38-гадовай Алене Мяхціевай. Яе прызналі вінаватай паводле ч. 1 арт. 342 Крымінальнага кодэкса («Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх») і асудзілі да 3,5 гадоў абмежавання волі без накіравання ў ПУАТ — «хатняй хіміі». Прысуд вынесла Ала Скуратовіч.

Вядома, што Алену затрымлівалі ў чэрвені, але адпусцілі пад заклад, да суда яна знаходзілася на волі.

Новы прысуд па «справе Зельцэра» для чарговага палітвязня: 2 гады калоніі за каментар пра супрацоўніка КДБ

Праваабаронцам сталі вядомыя вынікі судовага разбіральніцтва па справе палітвязня Яўгена Ракевіча, якога абвінавачвалі ў абразе прадстаўніка ўлады (арт.369 КК) і распальванні расавай, нацыянальнай, рэлігійнай альбо іншай сацыяльнай варожасці або варажнечы (ч. 1 арт. 130 КК). Справу разглядала суддзя Цяплова.

У верасні 2021 у адным з Telegram-чатаў Яўген пакінуў каментар пра супрацоўніка КДБ, які загінуў разам з айцішнікам Зельцэрам падчас перастрэлкі ў кватэры апошняга. Як сцвярджае бок абвінавачвання, у каментары Ракевіч абразіў супрацоўніка КДБ і ў цэлым негатыўна выказаўся пра супрацоўнікаў праваахоўнага блоку.

Падчас судовага пасяджэння абвінавачаны прызнаў сваю віну часткова, патлумачыўшы, што каментары напісаў, паддаўшыся эмоцыям.

24 жніўня Магілёўскі абласны суд прысудзіў Ракевічу 2 гады папраўчай калоніі з адбыццём пакарання ва ўмовах агульнага рэжыму і штраф у памеры 100 базавых велічынь.

«158 тамоў кажуць не пра нашу вінаватасць, а пра палітычную матываванасць працэсу», — Аляксандр Казлянка ў апошнім слове

Узгадваем апошняе слова палітвязня, асуджанага да 6 гадоў калоніі.

«Усё, што апошнія гады адбываецца ў нас у краіне ў галіне права, можна ахарактарызаваць двума ёмістымі словамі — прававы дэфолт. Ён адбыўся не на роўным месцы. Гэтая дзяржаўная сістэма ўсе гады свайго існавання падрыхтоўвала глебу, каб сілавыя структуры і чынавенскі апарат былі гатовыя безумоўна выконваць любыя каманды зверху

Падзеі з канца траўня 2021 года паказалі, наколькі далёка можна зайсці ў адносінах да ўласнага народа, падпарадкоўваючыся загадам людзей, чыё меркаванне для іх з'яўляецца аўтарытэтным. Хоць я думаю, аднаго загаду замала. У дадатак уключаецца псіхалагічная абарона і адбываецца пошук самаапраўдання, чаму так варта рабіць».

Апошняе слова цалкам

💳94 гады зняволення на ўсіх — падтрымайце зняволеных на BySol

🎉Павіншуйце палітвязняў з Днём народзінаў!

🔺Алеся Буневіч
🔺Сяргей Глебка
🔺Андрэй Сцепаненка 
🔺Дзяніс Дзікун
🔺Арцём Салавей
🔺Аляксандр Гаўрылік
🔺Руслан Міхайлаў
🔺Данііл Скіпальскі
🔺Яўген Маранец
🔺Ігар Мінц
🔺Марыя Несцерава
🔺Дзмітрый Падлобнікаў
🔺Дзмітрый Сушчык
🔺Аляксандр Дзям'янцаў
🔺Вольга Скрашчук
🔺Павел Белаголаў
🔺Дзяніс Коршун
 
💌Самы просты спосаб павіншаваць палітзняволеных — адправіць паштоўку. Гэта можна зрабіць праз Майстэрню паштовак салідарнасці, ініцыятыву “Вклеточку” і письмо.бел.

📲Таксама прапануем дасылаць палітвязням тэлеграмы. Гэта можна зрабіць на пошце або па нумару тэлефона 166 (толькі з гарадскога) і надыктаваць тэкст. Не забывайце падпісвацца, каб яны ведалі ад каго дайшла вестка.

🇫🇮Беларускія праваабаронцы сустрэліся з міністрам замежных спраў Фінляндыі

Праваабаронцы распавялі фінскаму палітыку і іншым прадстаўнікам дэлегацыі пра актуальную сітуацыю з правамі чалавека ў Беларусі, стан грамадства, адносіны да вайны ва Украіне.

Яны адзначылі, што ўзровень рэпрэсій і катаванняў, якія ўжываюцца ўладамі да мірных грамадзянаў, не змяншаецца, колькасць палітвязняў бесперапынна павялічваецца, а за кратамі дагэтуль застаюцца сем сябраў «Вясны», у тым ліку кіраўнік арганізацыі Алесь Бяляцкі. Асобную ўвагу прысутныя звярнулі на жорсткі прысуд каардынатарцы Валанцёрскай службы «Вясны» Марфе Рабковай і валанцёру Андрэю Чапюку.

Чытаць па спасылцы

За «нацысцкую» татуіроўку быў затрыманы мінчук Максім Галавінскі

На «пакаяльным відэа» 36-гадовы мужчына кажа, што ў маладосці зрабіў «нацысцкую» татуіроўку. У канцы відэа Максім паказвае, што замаляваў татуіроўку.

🔹Аператыўна паведаміць пра затрыманне, вобшук, выклік «на гутарку» можна ў нашым тэлеграм-боце 👉 @viasna_bot

🔹Паведаміць пра затрыманне і атрымаць бясплатнае юрыдычнае кансультаванне 👉 @ViasnaSOS, @SosViasna

Да трох гадоў калоніі і вялікага штрафу за «абразлівыя» каментары асудзілі жыхара Салігорска

У судзе Цэнтральнага раёна Менска за каментары ў інтэрнэце да трох гадоў зняволення і 200 базавых велічыняў штрафу асудзілі 41-гадовага жыхара Салігорска Аляксандра Адзярыху. Яго абвінавацілі ў абразе Лукашэнкі (ч. 1 арт. 368 КК), старшыні КДБ Івана Церцеля, старшыні ЦВК Людмілы Ярмошынай, дэпутатаў, міністраў замежных спраў і па надзвычайных сітуацыях, а таксама пракурора (арт. 369 КК). Прысуд вынес суддзя Дзмітрый Карсюк.

Паводле версіі абвінавачвання, Аляксандр з траўня па лістапад 2021 года «размяшчаў на розных рэсурсах у сетцы інтэрнэт абразлівыя каментары ў адрас Лукашэнкі».

У судовым пасяджэнні мужчына сваю віну прызнаў цалкам. Не адмаўляў, што паказаныя каментары размешчаныя ім і носяць абразлівы характар.

Чытаць па спасылцы

🎧Голас Марфы ў падкасце «Вясна прыйдзе» — выпуск прысвечаны праваабаронцы «Вясны»

Нагадаем, учора каардынатарцы Валанцёрскай службы «Вясны» прысудзілі 15 гадоў калоніі — 17 верасня будзе роўна два гады, як Рабкова знаходзіцца за кратамі.

На волі Марфу чакаюць яе муж Вадзім Жаромскі, валанцёры, а таксама многія беларускі і беларусы. Чакаюць яе і каты — праваабаронца сама была валанцёркай у каціным прытулку, а праз краты вокнаў у СІЗА яна здолела разгледзець бяздомных катоў — і нават паспрабавала дапамагчы ім.

Узгадваем 16-ы выпуск падкаста «Вясна прыйдзе», апублікаваны ў 2020 годзе. У якім можна пачуць Марфы — з тых інтэрв'ю, якія яна паспела даць да свайго зняволення. Гэта дапаможа нам пазнаёміцца бліжэй з тым, чым яна займалася ў рамках сваёй праваабарончай дзейнасці.

Soundcloud | YouTube Apple Podcasts | Google podcasts | Castbox | Spotify

Сайт і сацсеткі «Беларускай Рады культуры» прызнаныя экстрэмісцкімі матэрыяламі і ўнесеныя ў Рэспубліканскі спіс – такое рашэнне 31 жніўня прыняў Партызанскі суд Мінска

У чэрвені МУС прызнала праект «Беларуская Рада культуры» «экстрэмісцкім фармаваннем».

Крыніца: @by_culture