علي رشم - عتاب 🏴

الهـوه يلتـم علـيه منـين مـاذكـروك
وادگ رجــلي واظـل بـعـازة الـخـنگه
وأغــص بــريحتــك ماگمت اغص بالزاد
المــفارك النــسمة العــابرة تــغرگه
مـوبـس الصـواب النــفس هم كــتالـ
سـهم يـمشي الخــريف برية الورگه
نـيتك صـافيه وتـــعرف شلـون تـــروح
وتــندل ياحــلم من لــيلك تشــگه
صـحـره بـعـين بــدوي اتـمنى روحي تصير
على حــرورة رملــهه يطــگ عشب خلگه
مـن اشـوفك حسـبت حضـنك يصير گماط
وتـدك روحـك صليــب بضلعي بالـشبگه
واشـد من غيـبتـك ماصـخ طلع ملـگاك
اجيـت وثكـل جـدمي ودمـعتي تسبگه
انـه مـالح واغــزر من ادوس الگاع
شنـي ماغـزرت ويـاك بـالمـلگه
رايـدلـي خلــگ يعــبر صــهيل اللـيل
علـي گامت طيـوفك من تـجي مدنگه
شـزغـر بيه وعفــتني وكـبرت فـرگاك
دمـعتي وصورتـك فـوك الجـفن رفـگه
عليـك من انـسأل تصفن بـروحـي سنـين
ومـاميـز بيــن اللــچمه والـــدگه
الــعلي سألوك هم سألوني واحـتاريت
سـويتــك نبــي وكلت نجــبر حگه
وانــاشغ والــبچي يـوصل لـسابع لـيل
وفـشلتـي بدمــعه تبـدي وتنــتهي بصـفگه
طـش بـديـرتي حتى التــفت والگاك
اخــتنگ صـدري ومـتت بمدافـع السـحگه
گبل ماجـر نفس الا الهـوه المـر بيـك
چنت بكـيف روحـي من الهوه استنگه
الـيحط عيــنه بگفاي يشـوف الملاگيـه
مبـين شكو بـروحــي شعافت الحـرگه
الجـنت كبـالهم طــولي اعلى گد الشوف
زغرت بــعينهم من كبــرت الفـــرگه
بعــيده ولايــتك والصدفــه فكــت بـاب
واجيت ومن لگيتك وجهك مســرگه
مـن عــدهه وعــرفـت بنــشغة المـكتول
وشـــتعوف الرصاصـة حـرورة بالتــفگه
من امـــوت بــرودتـك خليهه عـالتـابوت
وبــيدك كون نــعش جنـازتــي تطــبگه
وخــليلــي دمعـــتك عالــگبر نيـشـان
خــاف بـجفــن گبري دمـوع ما تلگه
وخـاف يمــر وكــت وتــزورني من بــعيد
تــدليك بمــكاني حرورة الــشهــگه

كرار عبد السادة - عايشني 🏴

عايشني ولو لحضة موادع گيظ
خاطر من اجيلك محترگ شبگه
وانتظرك زرع ماقد قميص الماي
وابچيلك سوالف تشتهي الملگه
جبت عمري ظلام اتنطرك فانوس
بالك لاتسير شمعة محترگة
اريدنك تجيني بدمعة محترگة
تلاعب بالحرف لو تبچي لو تشتاگ
تلاعب هچي بين الفرگة والرفگة
ثق لمن ترد ارد انه افزن بيك
فزة طير لمن يسمع الصفگة
ماردتكً دلو كل همي اشوفك بير
الفوگً الماي واگف ماعرف غمگة
حفظ سرّة الزرع ما اطهً لزمة عليه
اكتله وسرّة نايم بالجذر تلگه
تره الأسود شعر مو شرط تلگا شاب
عجوز الخيمة بس لشيبهه مزوگه
ولا الابيض شعر شايب ومابي حيل
النورس گضه عمره بروحه حس خفگة
لحچي الناعور يفتك كل حلگ بي ماي
لصيت النار يذبل كل غصن ورگة
الروجة البالنهر ونه نهر تنگال
وشوف شگد ونين بروجة الملگه

محمد حافظ الخيكاني- عثرة الشاعر قصيدة 🏴

ونسة_الصيد_الطريده !!! ... ‏وعثرة_الشاعر_قصيده !!!
----------------------------
ها صدك ماكتلك نسيت ..!!
الفرحه كبرت كثر ما ضدي دعيت
يله وصلوله الخبر الظحكه ردت
وانه كايل ..
حسبة شكم جرح ضلن وشويه وياهن قهر
وانفظ الهم اللفاني الجان يفرشلي سهر
وترجع الظحكه الجبيره وترسم بوجهي كمر
ماعبرت النهر ذله كلت خل امشي شهر
وهاصدك ماكتلك نسيت ..!!
سهمك الشج بكفاي لاتضن منه حنيت
ويله وصلوله الخبر الهم هجرته
وراح اكول..
البلابل لو ما لسنهه تعيش حره وأنه للسجان اسولف عالنحر
الهيل ما ينشم اذا ما ينعصر هيج طبع الجرح بيه شما كبر
فرزنت جلمةاسم الله بناس متروسه ضميريوم ما جدمي عثر
ما اذم ملحة العشره هيه لاما بيهه صوج الصوج برياك البشر
وها صدك ماكتلك نسيت
ردت ارهملك عذر بس مالكيت..!!
إهو الفرَّع هلاهل وكت الغروب شتضن يتوب ؟
الينصب بروحه هبل ترجاه يقل ذنوب ؟
الميت بروحه بخت يفهم حجي المتعوب ؟
الشمعه هم يرجع ضواههه من تذوب ؟
ويله كولوله على هاي
ميَّزت صوت الهجاني من وراي..!!
الحط لي يم جرحي كصب لايرجى أصيرن ناي
زارع بكلبي ورد مايهوى غير الماي
الفشله تكبر من تحس شامتهه جاي
الگصه تشهد من تتيه الذمه راي
ويله كولوله على هاي
الجنت رايدهه بقت نجمه بسماي..!!
تراوِفت جلمه اعله جلمه تريد تتناوش دواي
توشلت گطره اعله گطره حين ماشدني ضماي
تگاوِدت نسمه اعله نسمه من ضنك بيه هواي
وراح اكفكف لك كلامي واستمع من عندي هاي
..
..
وسفه على الوكت طول جناحاك
وصرت بالزور تتهمني جنا _حاك
يشامت ذني ابياتي جنا حاك ( جني حاك )
يوصلهن خبر للغدر بيه
علها_تصل

لطيف العامري - الجوع كافر 🏴


"" آنه
أبو ذر الغفاري كلّي سلبّ
وآنه أكفلك عد امير المؤمنين
الجوع مايعرف الشك من اليقين
الجوع كافر
وآنه اريد اذبح الجوع
ولو ذبحني الكافر اتسمه شهيد
جا شريد ؟؟ ""
"لو شهيد ..لو مسلبجي خطير
حل وسط ماكو ابلدنه
الكل تصيح
في سبيل الله موتو
وآنه وحدي الارد اعيش
في سبيل الله خلوني اعيش
الله رب العايشين
الله لو رب موته
جا صارت قيامه
وهاي من شاعر قصيده مو علامه""
"واحنه هسه بزمن
بي كلشي علامه
الدنيا من تمطر .. علامه
(.....) اليعطس .. علامه
آنه هم يمكن .. علامه -
مهدي مايحتاج من يطلع علامه
المهدي بن حيدر علي رب اليتامى
المهدي من يطلع فقير
وبطرف جفيته يمسح دمعة عيون اليتيم
المهدي مايقصدني آنه
الراتبي معيشني كوّه
يمكن اكسر خاطره
ويكلي نام
المهدي يسأل عن سعر هاي العمارات الجبيره
اللي اشتروها تحت اسم حق الامام !!
ياأمام ؟؟
اليرضى باسمه يصير دين الله وسيله
( القضيه ) تصير عضبه على الظلم
وعلى الحقوق تصير
من تمتد طويله
المهدي من يطلع سراط
وماكو حيله -

عادل العضاض - انه الغلطان 🏴


أنه الغلطان من خليتك أنت بدفتر الوجدان
وانه الغلطان
من گتلك اريدك
من گلب ولسان
يا.... گصر النظر
من گمت أهتم بيك
حسبَّالي يظل ميزانك
الميزان
ويا عثرة درب
ذبت اجدامي اهناك
والسچه طويله اتعاند التعبان
تجرحني اعله طولي
وما گلتلك ليش
وادنگ عيني منك مستحه وخجلان
اجيك ابخلگ ما دشنته طول اليوم
و...ارد ابخطوه وحشه وبهذلاها اللوم
واعض اشفافي عض ندمان
انه الغلطان
يا... رحلة عمر نفضت أكتاره اسنين
أعد أيامها وأشخط على الحيطان
و...أرد الذكرياتي البعثراها الغيظ
ارتبهِّن ... و.. ارد كلشي مثل ماچان
وترِّد انت تبعثرهِّن
وارد آنه
وترد انت
وصيّح ابزحمة السكته
مو كافي ولك يفلان ...؟
جرحني الحچي الما رتبنَّه احروف
وشهگ ويه روحي الجتفاها الخوف
وطيح وبيه الف نيشان
يا ... طبعي شگول اعليك
تركض عالسراب
وشايلك طوفان؟
رِّد معذور ماطول الوكت بعده
رِّد ابأول المُدَّه
و...لو سدَّوا
ابوجهك باب
صدگني أگلك تنفتح بيبان

عريان سيد خلف _ لا تتمنى 🏴

ﻻ‌ ﺗﺘﻤﻨﻰ ﻳﺎﻛﻠﺒﻲ ﻻ‌ ﺗﺘﻤﻨﻰ
ﻣﺎﻃﻮﻝ ﺟﺎﻓﺎﻧﺎ ﺍﻟﻬﻮﻯ ﻭﺑﻄﻠﻨﺎ
ﻻ‌ﻋﻴﻦ ﻇﻠﺖ ﺧﺎﻟﻴﻪ ﻭﻻ‌ ﻇﻞ ﻭﻟﻒ ﻳﺘﻌﻨﻰ
ﻻ‌ﺗﺪﻙ ﻳﺎﻟﺪﻛﻚ ﻗﻬﺮ ﻣﻘﻔﻮﻝ ﺑﺎﺏ ﺍﻟﺠﻨﻪ
ﻭﻫﻴﻨﻮﺏ ﻣﺎ ﻣﺶ ﺿﻨﻪ
ﺁﺁﺁﺁﺁﺁﺁﺁﻩ ﻳﺎﻭﻛﺘﻨﻪ ﺍﻟﻤﺎﺻﻔﺖ ﻧﻴﺘﻪ ﻭﺯﺭﻙ ﻋﻴﻨﻨﻪ النه
ﻭﻃﺤﻨﺎ ﺑﻮﺳﻂ ﺳﻠﻮﻩ ﻫﻔﺎ ﻭﻛﻞ ﺫﻳﺐ ﻳﺒﺮﺩ ﺳﻨﻪ
ﺭﺩﻧﻪ ﻧﻜﻒ ﻭﻧﻬﻮﺵ ﻧﺤﻤﻲ ﺍﻟﺮﻭﺡ ﻣﺎ ﺍﻣﻜﻨﺎ
ﻭﺍﻧﺖ ﺑﺠﻼ‌ﺩﺓ ﻋﻴﻦ ﺻﺤﺖ ﺍﻛﻠﻨﻪ
ﻭﻣﺎﻃﻮﻝ ﺭﺍﺿﻲ ﺑﻤﻮﺗﻨﻪ ﺳﺘﺎﻃﻨﻪ
ﺁﻩ ﻳﺎﺧﺴﺎﺭﺓ ﻧﻮﺣﻨﻪ ﻭﻳﺎﺭﺧﺺ ﺫﻳﺞ ﺍﻟﻮﻧﻪ
ﺭﺩﻓﻦ ﻋﻠﻴﻨﻪ ﺳﻬﺎﻣﻜﻢ ﻭﻋﻠﻰ ﺍﻟﺼﺒﺮ ﺩﺍﻣﻨﻪ
ﻻ‌ ﺍﺣﻨﻪ ﻟﻠﺪﻧﻴﺎ ﺻﻔﻴﻨﺎ ﻭﻻ‌ ﻫﻮﻯ ﺍﻟﺪﻧﻴﺎ ﺍﻟﻨﻪ
ﻣﺘﺒﺪﻝ ﺑﻄﺒﻌﻪ ﺍﻟﻮﻛﺖ ﻟﻮ ﺍﺣﻨﻪ ﺍﻟﻠﻲ ﺗﺒﺪﻟﻨﻪ
ﺁﻩ ﻳﺎﻫﻮﺍﻫﻢ ﺑﺄﻭﻝ ﺍﻳﺎﻣﻪ ﺷﻜﺜﺮ ﺩﻟﻠﻨﻪ
ﻭﻣﻦ ﻭﺻﻞ ﻃﻴﻨﺘﻬﺎ ﺍﻟﻈﻬﺮ ﻛﻠﻬﺎ ﺗﺒﺮﺕ ﻣﻨﻪ !
! ﻻ‌ ﺳﺎﻟﻔﺔ ﺑﺸﻔﺔ ﻣﺤﺐ ﻭﻻ‌ ﻋﺎﺫﻝ ﺍﻟﻴﻌﺬﻟﻨﻪ
ﻭﺣﺸﺖ ﺩﻧﻴﺎﻧﺎ ﻭﺻﻔﺖ ﺟﻨﻬﺔ ﺍﺑﺪ ﻣﻮﺵ ﺍﻟﻨﻪ ﻣﺘﺒﺪﻝ ﺑﻄﺒﻌﻪ
ﺍﻟﻮﻛﺖ ﻟــــــــــــــﻮ ﺍﺣﻨﻪ ﺍﻟﻠﻲ ﺗﺒﺪﻟﻨﻪ

عقيل العامري - عشگ مفضوح 🏴


يبت ذاك السلف مليت خل باجر هوانه يطش
ونتلكه النوارس ماي وبحضن السلف نفرش
وفرفحلج رفيف زنود بطيوفي
وتسرسح عله عثوگچ ونوش البرحي بجفوفي
يبت ذاك السلف مليت خنتصالح وي بليس
عشگ العفه گلتي يفيد چاما فاد ليله وقيس
خنوزع عشگ للعگدو اگذلهم
ونتمرجح غجر وي ليل وانه وطولچ اولهم
وگودنچ للمگير وروح وياچ ماودعچ
خاف ارجع سوالف ليل وكسر خاطر صورج
حدر فيِ العنب لو نام ماسلطن بعد للعود
وتشلبه بوكاحة عين وتناوش ضوه العنگود
كافي نعيش مضمومين وانه وياچ ثلمة روح
خل تدري بعشكنه الناس شمحلاته العشـگ مفـضوح
خنطر السلف وكحين عود الناس خلهه تشوف
ملينه المغامز بوگ ومشامر رسايل خوف
اريدن ماي من ثغرچ اريد ارجع صدگ مخمور
الغصن لو طاح يكسر خاطر العصفور
ويجبر خاطر التنور
وانه وطولج وحجي ابليس هم انطيح غاد متانيتنه گبور
يورديه العشك موهيج نتواكح بسد اليل ونصبح عشك مستور
يورديه العشك موعيب الكصب يغفه علطاري الهور
يورديه علشاطي الماي خن نضفر كصيبتنه
يورديه السلف يرتاح من يدري بفضيحتنه
لبديج علطولي عثوگ وذبحهه علجبلتنه
يورديه الستر مودوم اليعشك دوم مايقنع
وانه بروحي عشك ممذور يكتلني اليجي مرصع.
يورديه تره اليتناوش العنگود مايشبع
يبت ذاك السلف والطير مايرتاح اذا موعش
يبت ذاك السلف مليت خل باجر هوانه يطش

ادهم عادل - الموت عادة 🏴

الدمعه رب لكل فقير..
(واليموت بلايه بيت..)
ما يشرفه اتشيعه چفوف الامير..
ابد ما اسمي رسول..
الما ينام إعلى الرصيف..
ابد ما اسمي امام..
الما يموت إعلى الرصيف..
ابد ما اسمي رسول..
الما يشيع بيده جثمان الشهيد..
العمامه النامت بفي المكاتب
والمظلل هاي من ملة يزيد..
المخبل حيل احبه..
هواي احبه..
صاحب اكبر ثوره في هاي الحياة..
ضد ملايين الطغاة..
من يمر يمه وزير..
(بقاط يلمع)
يشگگ هدومه..
احتاج..
ونصره لدموع اليتيم ..
اليبدي من الضيم يومه..
البنيه العرّه ضيم الله شعرها..
وفرشت العذريه عل الشارع جريده..
هاي اشرف من دساتير الحكومه..
وهذا آنه .. هذا آنه..
بيه الآف اليتامه ..
الجوه صدري..
تصرخ بكل لحظه بيكم كافي موت..
كافي موت..
وابد متسكتون صوتي..
عندي ويه الدمعه صوت..
عندي ويه الشجره صوت..
عندي ويه الطفله صوت..
عندي ويه الموت صوت..
عندي صوت بكل زمان..
بكل مكان..
بكل اوان..
ما يموت الصوت.
للعنده إراده..
وشرد اموت ..
وآنه عندي الموت عاده..
وآنه ميت منذ الآف السنين..
لكن اليعشگ بغيره..
بكل شرف ذيج الصرايف..
يخرمش وجوه المگابر..
لو عصف بيه الحنين..
وهذا آنه..
اشگ گبري واطلع اركض..
الم دمعي من الشوارع..
وارد عمري..
الضيعته چفوف المواضع..
وارد چفي العفته وي
چف المجادي بكل تقاطع..
ارجع بهيئة انسان..
وامشي لدروب الحبيبه
بكل خجل وبكل تواضع...

احمد عاشور - دورني 🏴

بس ارد افتهم... وجهك بيا نجمه؟؟
تره مليت ادورك... والسمه مغيمه...
واذا تعبان... بس حاول تشك الغيم...
ودورني تره البي شوك... بي همه
دورني... تره بروحي سوالف ضام...
معصوبات... كلمه اتدفع بكلمه...
دورني... واذا مابيك... ظل هناك...
تلكه هواي مثلك رفسوا النعمه...
تلكه هواي مثلك... مثلي تلكه منين؟
بشر من يختنك تشتاكله النسمه...
بشر فحطان ملكه... شكثر ماشي فراك...
واضحك... بس چذب... بيناتنه اللچمه!
تره اليضحك هواي... جروح كبله هواي...
الملح من يلبس ابيض.... هيچ للحشمه...
مرات اشتهي غيرك... واظل محتار...
افرفح.... وبركبتي اتچلب الذمه...
وأحسبهه عدل... والكاني ما معذور...
امد ايدي لزلف تفكيري مو يمه؟؟...!
صفنتي البيك تطلع... من كلب وعيون...
يالمخرب صلاتي... من الله مو زحمه؟؟
انا مطَشر... بكد ما ظاملك خطوات...
بس مو دوم... لازم ظيمنه انقسمه...!
اباوع عالمرايه خدود... چف فلاح...!!
تره العاشك يمل... يتعثر بجدمه...
دورني... واذا مابيك لا تنعاف...
الضوه اليكشخ بذله يشككه اليعمه...
المطر مابي نقص.. من يمشي ينكط خير
الكاع الما تضوكه... اتعاتب القسمه !!!

ايهاب المالكي - حكايتنا 🏴

حكايتنا القدر بيها لعب دور
التقينا وبيها شمل كلوبنا التم
جفينة اعيونة بنظرات الاحساس
وتغازلنة بگلب مايعرف الهم
على عناد الزعل نتراضة مرات
ولملمنة الجروح الصعبة تلم
ندهتنا البلابل للمواعيد
وشردنة من النعاس البابة محكم
وتماشينة رغم درب السهر خيط
من يفلت الليل بليل نلزم
الشمس سلمت النة بوكت الغروب
ومن مر الكمر فوگانة سلم
كتبت ذكرى بينه اعواد الاغصان
وحلف بينه الورد وبشوكنة اقسم
بحيث اتحاججت ويانة الاشجار
البهاي الحدايق ياهو الاقدم
تفاركنة وجرة بنهر ارواحنة الموت
وبياض كلوبنة اعلى الروح غيم
اتفقنا انموت لكن وحنة عدلين
نضحك بس اكو بخاطرنة مأتم
الهوة يلاگينة لكن ما مبينين
مختنكين بس انكول نشتم
فتركنة بليل ونايمة الناس
خفنة من النهار الناس تعلم
تركنة ارواحنة المايرضن انروح
بالدمعة العزيزة نريد نسلم
الشماتة تحولو بفراكنة حجار
الطريق البي كبل نوگف تلعثم
رجعنة منين ما جابتنة الايام
المطر من ينزل من الغيم مرغم
كسرنة الحجي البعيونة بماي
حتى اليقرة يلكة المعنى مبهم
جمعنا همومنا بنصين الفراك
ولكينة بذاكرة عشرتنة منجم
اصعب موقف بلحظات الاوداع
من اشوف الجنت تبني تهدم
من تقوي كلبك وانته مجروح
ما مهتم تبين وانته مهتم
من تبتسم بس بداخلك نوح
الدموع اباب عينك سكتة تلتم
تضطر تمشي لكن وانته مكسور
عزت نفسك تبررلك الهم
وراها تعيش لكن گلبك يموت
وحساسك الطيب يبدي يفهم
ماتحلم بعد بل عنك يروح
وما مسموحلك يومية تندم
كل جروحنة وكل المعانات
منما من وره الناس البيها نحلم

رائد ابو فتيان - احن الگلبك الما حن 🏴

احن لكلبك الما حن .....
واتلذذ بهجرك والوصل وياك
واذكرك وابتسم وانوب ارد احزن
حلاة الذكرى من وياها دمعة تطيح
شفتك تبتسم ركعة بصلاة الون
سلام لكبك الما حن ....
وسلام لدمك البارد
يل ما كتلي اجيك شمالي افشل الروح
ليش اكشخ وانطرك جني متواعد
أذا محتاجني اتعنه
حركـ شوككـ االراكد
واذا ماشيت غيرك ناس
واذا بأحضانهم كاعد
انه بس حاولت
ليش انحسب خوان ما دام الله يدري بكلبي بس واحد
وصنت زرعك وانه بروحي مواسم جوع
ومن سنبل ودادك كرصة ما حاصد
انه غراني فيك من جنت حطاب
والمهيوب امددها
لمن جنت اخلي بكل جذع نيشان
اختاريتكـ الشجرة لاكعد بسدها
يل ماخذني دولاب وهوه
اترجاك بوجهي الدنيه لتسدها
هاي الروح طفله وددلتها بيوت
وادم خبزة ما عدها
لا اتيها ولك تكسر هواي كلوب من يضيع معضدها
والي يمك كلب من تبتعد رجعه
ولك بيه حنيني ماضي طيوره يفزن بسرعه
دنطيني مجال اتفاهم ويه الناس
كل ما اريد اسولف تنزل الدمعه
اتعودتك هوه معلم ما ينشم
اذا ميطوف برديه
او لا ضيجت خلكي وياك
تطلب واني اكول الدنيه مكضيه
اضمك وين ما بيه
انت بروحي وي يشوفوك
دكه بوجه عربيه
تنزعل ينخطف لوني
ويمدد جرف بعيوني
بسرعة يبين شبيه
الزلف لمن يبوسة الشيب
عليٌ زعلانه ترجية

حسن التميمي - جنك ناسي 🏴

جنك ناسي شكلي تريد اذكرك بي؟؟
من تغفى جنت بأول حلم تلكا

اجن وجه بوجه.. كول الوجه ناسيه
اجن حضن بحضن.. جا حضني هم تنسا

يالمتيّه العرف .. دليني ارد منين؟
انا متيّه الدرب بس وجهك اندلا

عفتني وانا ماسامع بأسم لفراك..
واقشمر روحي اكولن حلوة لمتانا

شبيك براسي تفتر؟؟ شي مضيّع كول..
مو بالراس تفتر يمي كون هنا

كلبك شالني وكل ساعة يعثر جان
وهسة هواي شايل شو عدل ممشا

تغيرت ريحتك من كثر ما حضنوك!!
انا الحباني بعدك عطري ما شمّا

مكبرك بيدي ومزغرني بين الناس
تجي كل ساعة ناس تكول صاحبنا

اوديلك صديقي يجربك.. وتخون!
ورد وكلي خانك.. كتله لا حاشا

وضل هو اليجي كل يوم اجربه يكول..
ودزه يجربك وتخونني انته ويا..!!

اليدري بحالي يبقى يشك باليوافون
اليسمع قصتي يرجع يترك الحبا

يصلي على النبي ليشوف طولي جان..
هسة يشوفني يكول الحمد لله

كد ما روحي طلعت ضايقت لطيور
علية تنادسن.. هذا العشك جوا

الجنت تكرهة هسة تريد يمه تعيش؟؟
ماتكر حجينه شكثر سبينا..

شلون اتقبل الواقع..؟ تريد انساك؟
وطيفك كاض جفني لهسة ما هدا

ماتعرفني..؟! مو شارعنة دينك جان!!
طبع جفك ابّابي بكثر ما دكّا..!

الخذاك ابينكم حطيتو شبكة وليل
بيني وبينك اذكر الله حطينا

حجينه الـــبالأشارة انظمه لا ينشاف
عني وعنك اذكر سرنة ظمينا

البديته عليّ ضل سرك ايبديه
ونا ذاك العلى اهله خاطرك بدا..

جفي وخصرك يرجفن لو ان امشيت..
الدرب هز خصرك وجفي القلق هزّا

يدعيلك الساني بنعمه.. ادري انسيت
اجتلك نعمة النسيان من دعوا...

واخيرا بس طلب.. سلملي عل وياك
بس بشرني.. عندك غيره صارو...؟ لا..؟

سيف الحلفي - سر الخلود 🏴

اشتهيت اشرب صبح راح احفر الليل ...
بيه نكهة مذلة الماي بالبير

واطش بجروحي حنطه وازع اغصان ...
حتئ تخيط اجروح العصافير

ولو كل دمعه ادم تنزل اركاض ...
من اشم تفاح خدك بالتصاوير

ابدال رموشي نابت بالجفن ريش ...
بحيث من اغمض نومتي تطير

طشيتك حقائق بارض الاوهام ...
وسكيتك لاوعي وثمرلي تفكير

وعفت بيه جرح متعاند يطيب ...
بحجم سر الخلود الابالساطير

ونقيضه ارواحنا في عالم الذر ...
وتنافر بينهن والفارق جبير

اكو خشبة طرب بجفوف كاسور ...
واكو خشبه يحجبوها ومنبر تصير

ابدل دمي لازم حتى انساك ...
واجتث اسمك الاباورده يدير

جنت وياك ادنك راسي للغيم ...
وجنت من دونك ارفع راسي للبير

ويوكف شعر ظلي وارجف بشوك ...
مثل رجفت قلم وليم شكسبير

عسى شجرة نسبكم كلها للنار ...
وتموت وحوبتي بذريتك تصير

نصحوني ودريت بشهوة الغيم ...
براس الينخدع تمطر سواطير

وانا السديت اذني بخشبه عل الناس ...
واجت ناس بحجيها تطك بسامير

جحا ياخذ مهرتي وانا لقمان ...
ياكبوة غرامي وفرصة الغير

التجي مطيحه السرج والدم بالعنان ...
بيا عين اليكع خيالها تغير

انا محمل حيايه وجتفي مزمار ...
اون وحملي يركص عل المزامير

رسول الله اذا احجيله عل الصار ...
اظن ميكول رفقا بالقوارير

انا لوما حكمتي وحبي لــ الله ...
افرق بيك كل غيض الشواجير

واندلك واصيدك لو طرت فوك .
كما الاضواء تصطاد المشاهير

وتعرفني من اشد عصابتي بغيض ...
من اخوزر عل السماء تطيح العصافير

بس قررت اعوفك بيد الايام ...
وسامحني اذا ما اذكرك بخير

وانسى الي سمعته بهاي الابيات ...
ولاتضن شاعر يبجي القوارير

وانا بتك جنح بس الله موجود ...
بجناح القصايد باجر نطير

علي رشم - بس اصبري 🏴

بس اصبري
مرورة الفرگه اعلى صدري اتطيح نجمه
واعثر بصوتج ضوّه واتبده ظلمه
يوكف بصدري هوّى يكفيله دنيه وخلكي نسمه
توها بردت وانتي مريتي رصاصه
خايف اتروحين واذبل والعطش يترس مكاني
وخايف اشرب روحتج واخذلي ليل وما اتاني
هاي اليه اسنين بارد محد بملكاه جواني
اشلون ما طكّت عشب بيّه الثواني
ويخلص الليل ويخضر ليل ثاني
بيه واهس كافر وربج هداني
الليل شبعني سفر واني بمكاني
والتسافر عينه بترابج حرام...
شوفي منج وين اغضه
يامسافه البيها جدمج ماتوضه
ويا طريق المامشيته وماعبر ظهري وتشظه
وياندى المنطيج عمره اشكبره حظه
فكي شباج الوجع وانطيني روح..
يا لمشيتي الغير ديره
السمه ازغيره اعلى عيني وروحي اسيره
المايشبهونج..شكلهم هي حيره
كل بعيد ابعيني يزغر وانتي بعيوني جبيره
جنها حالي الغيمه تلهث بالجزيره
الوحشه ناس ابغيبتج ما عدها غيره
اشلون اسده يالفراغج وين حده
ابيا عطش تلكين سده
ابكل جزر تلكين وجهي بلايه مده
وانه خاطر لهفتي بكل طيف اشده
وكل جرح يندارلي ويلكاني عنده
ابكل مكان العوز وابن ادم غريب
وغربة العاشك طويله بلايه رده
حاصرتني..الفشله سكرانه اعلى وجهي اتريد تلكالج عذر
كون يعرفني الحطب جا صار ماي
ولايورث بيه كل حيله الجمر
جا ولابغصان خلكي اغيابج يمرها بكسر
جاندهت الروح من نومة ضواها وما نشف بيها الصبر
جا اندليت الخساره بيا كتر
وجا عرفت اشلون ما يطفا العمر
لو تجيبين الزعل كله وتجين..جالكيتيني نذر
بروحي لميت الندى وشبعته ليل
وانتي ما مريتي بعيوني فجـر
هذا عمري..وذاك يوم...وشوكي يلهث جنه جمره
ياهو ما مشتاك خل ينطيني ليل
ومني خل ياخذ صبح بعيونه صحره
وين ماروح التفت والكاج يمي
بالوجوه الماتعرفج عفتي ذكره
بيه يوميه الجرح ياخذله سفره
ياهو مثلي وجهه فارغ من حنينه وتارس الدخان صدره
وانتي أنتي..الغيم بعيون العطش محفوظ كدره
وانتي ماكو..اشلونه حالي وهو جان الملكه نار
ينزل اشراعي حلم والماي يوكف
والنوارس ما تحط لو حظها طار
الصخره حظ العاثرين وانتي حظج توه صار
لــو تجيــن...جالكيتيني ملح بي حوبة أمي
جالكيتني خضار
اشويه تاني مروة العاشك نهار
بارده اعيوني عليج وكلبي حار
منين اجيب الحيل والحك
وانتي تمشين بجدم مطلوب ثار
حتى ميشــوف الموادع
كـون من يوصل محطه ايغمض اعيونه القطار

طالب عبدالله الكناني - مفضوحين 🏴

مفضوحين ..
مثل اسوالف العرسان ..محد شافهم بس كلهه تدري شصار..
واحنه ازغار..
بس لتشوف من نشتاك ..نحضن حضنه مال اكبار
من اتروح خلك العين ادزه وياك..
زحمه تضوج من تندار
زحمه تكول ما كمل طريقه وياي
وآنه بخطوه الف مشوار..
لا تندار..
جرف وماي..
انه وياك مخلوقين من تندار اتبده
انه وياك ..
امشي بكيفك ومرتاح ميوكفنه حته امكابل السده
تعال هنا تره من اتروح صعبه تصير..
شوف الناس مكروه الجزر عدهه..
جي يندار عنهه وراح ..
لوما تقترب ما حبو المده
امشي وياك ايد بأيد..
احس بجدمي خضر نوح
ينكلني بسفينه بشاطي بس حيتان
بس مرتاح من عنده
انه ارتاح من ترتاح..
راحة جف يكض اصفاح..
راحة ورده عد فلاح..
لو مرهه بجدم تعبان تمشي تعارك النخله..
متعودين هيج نعيش
تحبني وما أسألك ليش
بس صوج المنعنه وما عرف ممنوع ..
يحرم طيره من الريش

احمد عاشور - ارد احط لـ ٲحلامي حنه 🏴

جنت راســــــــــــــــم صوتك بحيطان اذاني ..
شما يجيني الليل اسمعك...واطلع وتدخل دمعتي تدور بحلك السوالف
بلكي تلكالي احبك خاتله..وما لكيت..؟؟.......
شكد سمعتك..؟؟ جنت اغنيلك مشيتك لو مشيت...
تمشي والخطوه نهار..عيوني ليل..جنت اشم عطر الترافه من القصيده التنكتبلك...
أتــرف من المــاي صوتــك...أترف من الصوت شفتك..اتندمت بالطيف بستك
شلون ابوسك وانه اخاف من الهوه يجرح بشرتك؟؟؟؟؟؟؟؟؟؟؟؟؟
شلون ابوسك وانه شفتي ويه الجكاره بينهم عشره قديمه وشفتي ماتعرف تخون....
اختصر كلشي بغيابك ..واقتصد بالشوف بعدك جنت اضمه لجيتك....
جنت اموت شما ذكرتك وانه ماناسيك أصلا يعني اصلا ماعشت......
وليش اعوفك..؟؟
ليش اعوفك وانه صوتي المن يجيك ومايسمعك ينتحر يم باب شفتك....
شكـــد عشكتك....
أرد اشوفك لو أقل من لحظه ، صدفه ،هيجي لو فتره قليله بكد ضحكتي...
ارد اشوفك حتى لو نسمة هوه تمر بصفنتي....
و آ خ لو مرت صفنتي..شكد طويله بطول خلكي..
وترتفع نار اشتياقي وجنت اكلهه كلشي احركي..
أبيض من احلامي خدك..جان يتغطه بكذلتك من تمر نسمة.. ضوه..
منين اجيبك وانه سري بطف غيابك سالفه بحلك الهوه...
أحله مابيك السكوت ..وجنت اموت شما سمعتك ساكت بدفتر خيالي..
جنت حافظ صوت جدمك من تمر تمشي اعله بالي..
امنيتي احط عينك بعيني ,,,أرد احط لاحلامي حنه...
العنده مثلك....يدخلك بروحه ويطب ويقفل الباب اعله روحه ويكتب اعله الباب جنـــــــه..

جبار رشيد - كون تشوف 🏴

جبت كلشي وعفت كلشي
ومدري شلون اجيت امشي

اجيتك ردت اكَلكَ شوف
ردنا نعوف كلشي وماكَدرنا نعوف

وكون تشوف حالي شكد الك ملهوف

جبت كلشي اليسولف بيك
خيالي وصحوتي وطيوف

جبت دكَات كَلبي الكَطعن
كَلبي بجفاك سيوف

جبت صفنات روحي السودنت روحي
مثل جن بمسيرة وعلى اليتيم يحوف

وكون تشوف
بشفافي الحزن ماخله بسمة تعيش
كلمن كَمت ابوسه بخده اطبع اووف

وكون تشوف
دموع الجدم مايدري وين يروح
والخطوات عمية وتايهه بلاشوف

كون تشوف
خلصت الوجوه وشفت كل الناس
كلها وجوه غربة ولاوجه معروف

وين الكَاكَ
يالموصوف اليه وانا الك موصوف
يالفركَاكَ غربة وكلشي مامألوف

انا بلياك مدري شبيه مابيه
زلف وبلايه ترجيه
درب مابيه كل جيه
نهر فاض وتبع ميه
ورجع بس مالكَاله جروف

كون تشوف
روحي شخله بيها الخوف
مطلوبة نذر وتخاف
ماتوصل حضرتك من بعيد تطوف

وكون تشوف
روحي شخله بيها الخوف
مثل دمع العروس الجايه على اجناب
ويصبر عليها اوجابها الزافوف

وشوف شخله بيه الخوف
مثل حلة مدارس روحي احسها اطفال
حلت وتركتني وباقي بس صفوف

وياوحشة صفوفي ومن يجيني الليل
ويالون الوجه بعدك الضل مخطوف

كون الكَاكَ واشكيلك على جروحي
الكَيت الغشمة بيها تروف

وكون الكَاكَ وابجيلك
وسوي خدودي صبورة ودمعتي حروف

وكون الكَاك واشكيلك
بكتاب السنين انحذفكلشي الجان
بس اسمك لكَيته الباقي مامحذوف

كون تشوف
عيوني مضيف تصير وكت النوم
وهلبت بالحلم لنك تجيني ضيوف

كون تشوف حالي شكد الك ملهوف

مظفر النواب - زرازير البراري 🏴

حن وأنا حن

و انحبس ونة ونمتحن
مرخوص بس كت الدمع
شرط الدمع حد الجفن


جفنك جنح فراشة غض
و احجاره جفني و ما غمض
يال التمشي بيا ويا النبض
روحي على روحك تنسحن

حن بويه حن
حن عمي حن ...


عيونك زرازير البراري
بكل فرحها بكل نشاط
جناحها بعالي السحر
و الروح مني عوسجة بر
ما وصل ليها الندى
و لا جاسها بقطرة المطر
وصفولي عنك يالنباعي تفيض
و تعليت ليلة ويا القمر
وصفولي عنك كل مسامة تفيض منك عطر
يالحسنك نهر..
تنزل بصدري ويا النفس
و بدمي غصبن تنعجن
و أشهق و اصعدك للسما
بحسرات و بعنة حزن

حن.. حن بويه حن

شفافك ولا كولن ورد .....
عنابه معكودة عكد
تمتلي بكد ما تنمرد
لا هي دفو ولا هي برد
أنا بوصفها راح اجن

حن بوي حن


سكتاتك تشكل خواطر بالقلب ...
مالي عرف بيهم كبل
مبروم برم الخياط يا ريان
و الخوصر خصر لف العقل
كل كلمة منك ...
نبعة البردين .. بالدلال ...
ما تحمل ثكل
وصفولي عنك
وردة من قداح ريش جناح
زاهي بالسحر
وصفولي عنك
شال منك غيظ بستان الورد
والنرجس الرايج سكر
حنو طواريز ولحن ...
و حنة حمامات السجن
حنة إلي ...
و حنة إلك ...
واللي يعجبه خلي يحن

حن بويه حن

آنه من أشوفك
يمتلي الماضي الجدب
زهرات بيض من الوفه
وروحي سواجي من الحنين تصير
وأتنبه وكت بيها غفه
يا محجل إن مريت بيه ردود
أرد أردود بالعشرين ....
من عمر الجفه
وأنصف عمر منك
فما أنصفت إلا بالهجر ...
والهجر منك ما كفه
حتى الهجر يا روحي
منك ما كفه
وكلبي عله هجرك دوم يحن

حن ...
وآنه حن
وأنحبس ونه ...
ونمتحن
مجبور أرخصك على الدمع
شرط الدمع حد الجفن

ايهاب عيال الظالمي - جزن 🏴

جزن والگلبه ابيض يستحي من الشيب
اليـرجف ايد الزلـم لو انتَ ! لو فـنجان
وعلي لو حنطة هم مو هيچ چا طحنوك
علمـود النار .. يبقه ابلا عشه الـدخان
تـهتز ع الـرمح حد ما صـرت كاروك
جدايل ماي و اظنونك حلم عطشان
اليمـوت عليك عگبة ايعيش من تموت
انگطع نحر الضوة اوجه اصفر القرآن
يطـيب بخرجة جرح المو عزيز عليك
على ريج البير سچة شوف للقمصان
النفس ما يصعد بصدر التصعده الخيل
تنـدل ! مـن تـطـگ عـكازة العـمـيان
المشية اگماط و اتبده استكان الشيب
و الشيـطان طَـب گبـل الله للديـوان
مسـية الـ ...شوگ تدري العافية انداس
تعب ومن الدمع ما نشف ريج اردان
تمـوت و يـجي يبچي عليك المبچيك
الگبـر ما يـوم رجـع باقـي للـدفان !
الدم اخـضر عله سنون المناجل بات
مـو فانـوس تمـسح راسـك الـجدران
الندى يجدي و يسلم من بعيد الغيم
و يدّفه اعلى اگلبه المـوگد البردان
اليجي بلايه نحر يگعد بلايه سيوف
التدفنه الخيل ما متوازي ع الدفان
ولا تتعب تريد تصير شاعر ؟ موت
بكل غيمة "منين" تطيح "هذا فلان"
مرات .. القصيدة الما تحبهه تعيش
هيَ الدنيا منة سـرگي ع البـيبان
لو زلمة السهم چا ترس عين القوس
حچت وجهين چا ما طاحت الحيطان
لهسه الليـل بالعركة ينادي الشوگ !
ولهسه احلامنه اتچمل المطر گيعان
شكثـر گلبـوك ! بـس امبيـن الشـراي
مكاتيب الشمس ما تسگي فيّ للـ چان

علاء المغشغش - كافي اسأل 🏴

كافي اسأل عليه اشبيه
تره غيرك عطر اشتمه يلّه اجنيه
النارك حرملت روحي
وثگل وجهك لسن خرسان
وما مطعون ليش امرافگ الحيطان
امن الاگيك بدرب جا ليش خوفة نثية من سكران
اشوفك تشتمر عني ..
وانه لجيتك شبج تدريني كلي عيون
ما عگبك امباوگ شوف
يالـجيدك بطن فنجان ما مفتره بي گهوه
يالزعل السمه بخصرك اهلال اطا الظهر لهلال
مصوفرني شحم رمان
يـ ابيض يا بحت معدان
دنزلني اعله شفتك ثلجة اگلاصات بارد بس اﭼـلب بيك
وكاتلني الهدوء البيك ..يبين بيك صوت الميل
شمالك ما تعرف تعيل ..
تره الـ من صدگ طيف يروح لـ اسماعيل
البقى بصبري عطيت اخباث
وحفنة خايف من العوز
اريدك عشگ بير وماي
اشما ينزل البير الماي يصعدله
وارضى تحطني يم الباب ..
يم الباب ﭼـم دله ..
ومره اسأل علية اشبيك ..
وترى المشنوق مو بطران لمن يلعب برجليه..