مصطفى الخزآعي


اعذرني
حزن روحي يفيّضني وافز غرگان!
حزن يتكسّر بعيني
حزن ماغاسله النسيان
حزن يندار بظنوني
حزن مشتول عالبيبان
الدمع الاسود وره غيابك يردني انسان
أعذرني العشگ نيشان

يالماشايف دموعي
الك بيّه بواچي الوان

كونك تسمع ليا صوب
صوتي يفزّع الدنيه حزن غرگان
ليليه احرگ بروحي
ويشب وجهك وره الدخان

عجب ذاك التراب اليروه بدموعي ولاخضّر على رموشك غصن للشوف؟
عجب يالنومتك طالت
ولاجاسك سراب طيوف
وعجب يم دورة عيونك
ولاتنگال سورة خوف
ولانجمه تسامر وحشة الحيطان
وتعبر لهفتي المصلوبه عالشباچ وتندهك صلاة چفوف

واصابيعي سجن وجهي    وتصاويرك بعيني تطوف

اعذرني السنين سيوف

تذبحني الغباشي المرّن بلياك
شتله وغاب من عدهه الضوه والمي

العمر مبيوع سفره من الشمس للفيّ

العمر يلتم وره غيابك
وينطش نذر للملگه
أنه كلبي نذر لليشتري الخفگه
وذرعاني نذر لليشتهي الشبگه
هذا انه هويت الناس لعيونك يبعد الناس
ياتالي النفس ياصوغة الشهگه
ماظنيت مثل الغبشه ناوي تروح
وحدر عينك بگايه احلام محترگه

وماظنيت  
وماظنيت
يشباچ الظنون تفتحك السكته
ويموّال الحنين تبوگك السكته
واغطي الـ اه بالضحكه  
واكولن ماتموت انته

تطفه اعله الرمل گطره
وتطگ فوگ الرمل نبته
واگول انته
شما يلمع ضوه بظهر الضباب المر بالولايه  
اگول انته

مصطفى الزبيدي

حزن والأخ تسبكني خفك جنحان...
لاميت والم روحي بتوالي الكاع..
ولاعايش..
ولابيه الحزن يكضي..

سكته الخوف جاساني وعبر بيه ..
مهر يركَض على الدنيا بعشب فضي...
مهر والعمر مايكَضي..
مهر والحزن مايكَضي..

وشفت وجهك..
خيال ايشوبح اعلى الباب..
يشرب من سما عيوني
شمسها ولونها الجذاب..
والصفنه...
ونثيث الروح والحركَه الجزت دمي..
بعد ذاك العتب والباب...
خفكَ جنحان..
وانا ادري العمر سكته ؟؟
خاف يطول مايكَضي!!

وانا ادري العتب والباب..
جويه او اوف..؟؟
غيمة بلاسما ولاكاع روحي اطوف!!!

ذنب...
والموت مو ذنبي..
لكن ياذنب يرهم اذا مات الورد بالخوف؟؟

يادنيا التلم حزني..
وانه غيضة نهر بيه بـ يباس الكَاع...
انه المذبوح والذباح
والدم البهت لونه برجيف الماي
بس ماضاع...

انه المابين كاع وكاع...عشت منفي
مشاويري جنايز والدروب اهواي..
وبروحي حركَ غابه..
ومكَابل وجوه وكل ضحك جذاب..
وانه وروحي اعلى بختك حيل جذابه..
بيها من الحركَ غابه..
وبيها من التعب لصفة كَمر مذبوح..
حدر ظله ينام الليل بثيابه..

وشفت وجهك..
دفو بيه...
دنية مكَلبه ومابيها بس انت..
وجه صد اعلى وجهي وضاعت الدنيه
وكَلتلك وين يالبيه...

حزني اهواي...
وعيونك عتب شباج بالجيه..
حزني اهواي...
وانا ادري الحزن شاره...
واكَلك لاتعذبني...
انه كَلبي جنح نورس..
ليش اتلومني امن ابجي يمن دنياك بحاره...
وليش اتلومني امن ابجي...
ومرات الدمع موقف...
اذا فز الوجه مبيوكَ ويدور على اعذاره...

من ساومني جف الموت غنيتك...!!
ومن كطعو مشاويرك وصحت هناك...
ريح المستحه الشباج زتيتك...
او من اخطوط البجفي...
رسمت اسمك وضميتك...
رسم ماضاع بجفوفي...
رسم من كل كتر بيه..
يفز عيون فختايه بكبر خوفي...
واجيس اسمك...

رغبة من الفرح لــ الله بركَص صوفي...

واجيس اسمك على اجفوفي
نداوه ومستحة ثلاثين..
نداوه وحدر في التوت..
ابوسك واعطش الملكَاك..
انه بجفوفي كلشي الكَاك..
انه بين الصحو والموت...
رجفه من الصحو والموت
هم الكَاك...
غيمه التمت بروحي ومطرها انت...!!
وخفت لاضيعك بكاع العطش وانضيع انا وياك...

وكتلك لاتعاندني...؟؟
شنو معنى العطش بالكاع؟؟؟
سواجي الماي جذابه..
وشنو معنى الحرك بالروح...
اذا ماطفته احبابه...

بعد كلبي يشب بيدك...
نحر كطره اعلى لبلابه.
نجم زاعل كمر بليل.
واتعنى اعلى شباجك..
يفض خلكَه..
ويسولف حركَة اعتابه..
نجم والروح مشتعله حركَ غابه...

ولايكَضي..
سكته الخوف جاساني وعبر بيه ...
مهر يركض على الدنيا بعشب فضي..
خيالك والحزن والباب..
رشكَة من الدفو والخوف...
والتم اعلى صدرك وانا متشظي..

عبآس الغآلبي



وهدنت روحي وگلت بيه گصب
كلهه صارت هور ومربيه الشلب !

وشجرة الغار
التوجدني اعله طولي
اتفرهدت مني بحچي ولاية حطب.

چان ظني ..
الليل فصليه لحسبتي ؟

دوم اشوف احلامي طفله بعمري تلعب
ومادريت
الطين مكروه اعله زغره
ومن يشب تنور ينحب.

بينك وبيني
سجن هيل ودلال
وركضت اه تسبح لرب الصحاري الكاتلتني

الحلوه بيك اتريدني اتعافه بجفاك
الحلوه بيك اتريدني اتحاسب عليك

كون طيفك
ينحسب لمت شته
بتنور گلبي ليش اخاوي الليل بيدي

كون تدري بعيني
سفرة شارع مگابل مشيتك
ليش ماتحسبني عثره
ليش كل ميت عشگ يلگاني گبره

انه شمسوي لصلاتك
حتى شيطان المواعيد الخذتني يكفر بكلشي نسيم

فراگ وجهك مايفض بالله كريم

يابو وجه العافيه بسولة قطار تلولح بروحي دليل
السجه ماهي

وانته ماكو حته طعم الخمره فاهي

شنهو عود الدنيه مابيهه مچانك
وشنهو عود .. الناس
من اطلع گبلهه تگلي هنيالك يگمره

انت سامع بالنفس جتاله حسره

وانت سامع بالشمس
ما الهه صاحب
لو حجاهه غروب باهت
تحترگ وتبات حمره

كلشي بينه يعثر الدنيه الگبلنه
والله لو ماكو عشگ جا عشنه كفره

يل دفنت جفوفي بسنينك شتال
ياهَضم عني حصادك ياخصر

وياهو شاف الدنيه
كلهه بلا صلاة
وما عرف وجهك قدر

فرهدت گلبي وطلبتي
حتى لو دگت مهر

المسچ لو عاش بس اسمه مسچ تاليته يتعب.
وآنه يحييني الحرگ.

حزني مو غبشة آذان وحته يتسمه وزه.

النار ألهه اليضحكلهه

عزيز عسكر

( هذا انه)
مدري المن حذوني شراع يل خصرك تعدى الشيب..
بين الروج والغافين شمس الله ويه وجهي تغيب..
غاد من العمر تابوت صوته يجيسني من ارتاح
ماتدري المناير بيك من كل كمره اشوفك جاي..
لكيت الدم رسايل غافيه بكل بيت وانت
ويه الكلايد ذيج شفتك ماي..
ياسجه التبات وياي بيها انت..
ياغيمه اعله وجه الكاع تتبدى حزنها انت..
افز من ياتعب والكاك ماخذني العباة الخوف صوت يريد..
دلني الفخاتي وياك وندليت حزني منين
بس ماوجدت شيريد..
اليشرب من رفيض الناس يتكسر بعينه الماي
انه بيا ضوى متانيك حسبة حيل..
بثيابك عبر ياغيم وانت بصف سمار الروح عديت الكناطر بيض هاك الطيف والباكو سواجيه التهو باليل..
ركضت منين ما بالدنيا يفتك باب

بس ماجستك ورديت يم روحي شكثر تعباااان
وجهي شلون مايندار يلكه لحزنك مرايااات
ﻻكي الدفو موادع ريح واطلع من كفاه بردان
ولصابيعك بخلكي شموع لوسافر ضواك وياي تشربني صبر سفان
شفتني وياك مزنه تناطر بنادم ورى ضنوني
وطحت كاع بسماك بغير ماتدري لحد مافززك لوني
هذا انه
وهذاك انته شتلت حجايتي بعمرك
وﻻكضيت بس ياااحيف
اشم طول السنابل سالفه بروحي
وارد منك غريب وياي واكسر خاطر عيوني

وين ادري الجدايل لوعرض بعيونها النسيان تضحك للعطش شلال

يلي منين ماغنوك اصابيعي تفز خيال
يا اخر سالفه بعين الفلح للكاع باكو من خيالي سنين
من تاهو طريج الله انه الرديتهم للطين
وهذااا انه

بعدني انسان
جواز لكل غريب يريد بيه يسافر لروحه
وهذا انه
شمس وفياي للما سولف جروحه

محمد الوسمي

چم دوب
اغلط وأشتاگ
واخزر گلبي بجيوبي

أذكر مره
الك حنيت
ولزمني ببابكم ثوبي

اعتنيتك
والشبر صوبين
وباخر نظرة ع الشباچ
بالخطوة اعثرت مرتين

يما تدري
اعز چفيتك اعله العين

وامسح دمعي برداني

اذا گلبك گبل وازاك
بعدك گلبي وازاني

أذا تشتاگلي وأشتاگ
ياهو العايف الثاني؟

لجلك طلگت دنيا
ورفضت من الگمر نوره

وكتبت بگلبي گبر ابليس
خاطر محد ايزوره

تدري الثلج صفنة ماي ..
چا ما تومي بحروره؟

اغار من النهر بالليل
ياخذ للگمر صوره

واسهر ليلي ما انامه
اخافن بالحلم لا اهيم

ادگك بيا وتد للروح
اشد اجدامي بجدامه

تخيل نايم ومشدود
عينن نوم البلامه

واعاين ع المرايا تراب
وانفخ روحي ما ادري
عفتني تراب

بعدك عيشة الفانوس
يذبحني النسيم الهاب

احس روحي صليب اموات
امس نام اعله متني غراب

تنيت الموعد البلطيف
شمدريني الحلم چذاب؟

وغصبا عني ع الأيام
خلگي ايطول

من يفقد اعصابه
شيكسر المشلول

دمر بالروح وسولف
كل الاعرفهن

اكو چذبات بس
محتاج اصدگهن

شلت روحي
هوه من المي
ونزعت هواي احبنهم

احترام لگلبي وهمومه
مثل المحترگ مجبور
لمن ينزع اهدومه

ألا انتَ عشت بالبال
رغم ما گلبي ما همك

شو صاير بخور السوگ
ياهو يعامل ايشمك

موعود قاسم الرشيدي


بطلوع الشمس ذكّرني
و اذِكرك لمن اتغرب
على گبري كتبتك اسمك
حزنك هاكثر بيه ... حنين مچلب اتچلب
اصيحك بيش ؟
طايح بالدرب حلگي
اصيحك بيش ؟
انا بدلت يوز اشفايفي بسرگي ...
امدخن و التتن بالروح ...
امدخن و الجمر يطفى و ينفخه النوح
قريت اسمك على گبري
اگعدت و اقريت فاتحتي ...
تلمست التراب و عاتبت روحي
ولچ متّي ؟
الحزن من يشتهي ابن آدم يتبعه اذلال
الدمعه ... افيش ماتنگال
انا حسبالي كل الناس تشبهني
گد ما رافگيت اشكال
كلهم غمسو بيه السهر و الضحچ ... و الأهمال
تاليتي علگ بذيال شيله
اندفنت بكنتور ...
تاليتي بطرگ روحي گبر بس بعده ما محفور
انا مهجور ...
من اهد ما چلبت بعباية الديره
و خذتني وضعت بالغربه
انا مهجور
ورقت الوجوه و مالگيت البسمه التلمني
شيگومني ...
طحت بحلوگهم هسه شيگومني ...
گالو ماكو منك ... من چنت نجمه
طحت ...
و الگيت لا صورة
و لا ريحت ذچر مني ...
بطلوع الشمس
اذكرني ...
.

وحدة وحدة بهيدة وشل مايهن
وانفض كحلهن وحدة وحدة
فراگك وديرة عيونك مو حملهن

وحدة وحدة
ديرني من آخر سما
ولا بالچذب يندار وجهك
ديرني المتبدي منك
مآ صبر من ضاگ حسنك

آنه مو شغلة اريد اكسر قرارك
آنه ذاك الشال غيض اعلى الورد
من طخ سمارك
آنه المسبگ واصيح افيييش نارك
الوادم تفييلي واستاحش خيالك
آنه ذاك الـ لم بواچي الناس بسكوت وبچالك
يا حنين اليجي ببالك
آنه چنت اوياك احن
عيوني لوما عاشگاتك ما عمن

صير اوياي
حزنك لايگ لحزني
ليش شما اريد اقراك اشوفك كاعد تچزني
صير اوياي...
چا هو شفزع للطين غير الماي
وليش ابن ادم يسمّوك
وانت اول بزر لچلاي
ادم ما موشل الكاس
انت ابني يبعد الماي
انت اول صدك يتربع بعمري
وچا يمته گذلتك تفرش بصدري
يخي عونك على عيونك
وعلى كلشي انقرا بلونك
يرب ضحكاتي الگليلات
مامش عافية بدونك
احضني لحد ما اتييه بحضنك
تراها سوالف المشتاگ ما تنفض بالشلونك

اشتهيتك يا سبب نذري
وصليتك قصيدة بكاع كل محراب
ولگيتك انت رب شعري
خطية الما يشبهونك
يالماخذني من الناس اثاري العافية عيونك

وطن مصيوغ برگبتك
وشفتي جدام الغريب
من غميج الروح احبك مدري ليش
وآنه امس من اشتريتك
هاك گتلك گبل لا اكلك بيش
السالفة الما تبدي منك ما تعيش

گوة ميزت الصبح من لون خدك
ليش چا تارسني بيك وباقي وحدك
بكثر ما شفتك بروحي خفت لا اكفر واعبدك
خاب گمت اكفر واعبدك
مرايتك .. طولك .. ضحكتك
والضريح الجوة قمصانك
رگبتك
هنه ذني الما يخلني استراح

الغربة من تدوور بناسك عرف
الكاع حد صوابها بكد النزف

الغربة من تدوور بناسك اثر
لوجوه ناسك
وانت واحد شايل بچفك
رسالة و ليش و دموع
وشليل من النشد
الغربة عند العاشگ اهله تبتدي براس العگد

موت...
جنازك الصوت ونسمتك كافور لحدك
واخذ دخان الجكارة يسولف اويا تراب خدك
موت...
حتى تعيش وحدك
واخذ كل الطين شاهد
العطر للقمصان ثورة
الليل للمشتاگ ثورة
وحتى مفتاح الضوى محتاج ثورة

ومدري ليش ..
الناس عدهم وكفة الشباچ عورة
سافر بتذكرة عمرك
واخطف عيون المحطات بقطارك
يا غريب اليوم جنسيتك سمارك

وصاحب عيونك اذا ما صح رفيج
وغازل من الليل گمرة
وصير انت الرب اذا لاگيت فقره
صير ثورة
حتى لا تنفهم عدهم وگفة الشباچ عورة
لا تدورهم وخل حزنك رسايل
الناس حتى للضوى تانيله عثرة

الليل من تكبر حسرته يفيض نجمه
وسولف البيك اويا روحك
حتى مو گدام خدك دمعك من يطيح علمه
غيب لتدوور بناسك ناس تنشد
محد اليفگد عيونك
ابعد شما بيك تبعد
غيب لا من ريتك يبوكون نسمة
گبل لا جرحك يلچمك
سافر ومشط ضحكتك باول مرايات حلمك
انسى كل وجوه ناسك عمرك المتبدي لمه
انسى والنسيان نعمة

عيش وحدك
حتى لا تبقى هذاك الـ من وكت مبيوگ عمره
وظل غريب الناس عن النار شمرة

كافي اخاف اليوم اريد احجيها
شامتك عد يا سما مسويها
نعمة الله نبوسها لمن تطيح
فدوة گطرة شفتك بديها
و ديرلي عيونك ترة عيونك ثواب
الكاع لذتها بمتن راعيها
الصبح شيعودلك طالع عليك
الغيمة شمضيعة وتدورك بيها
وهذا شعرك طاح ساكت لو الليل
چفوفك الله بيا ضوى مغطيها
الله شاهد من اريد اصفن عليك
(الفاتحة و يس) احس قاريها

المشكلة ( مرة گتلي شلونك )
ولسه اني زين...
وجهك انت العافية ومابيها
انه المحيرني والشادهني بيك
يا دلال لخصرك يماشيها
وحگ شلال الضوه الجوة القميص
رمشة عيونك اخاف اعليها
صوتك يحشم النوارس عالنشيد
فوگ وجهك چم شمس ناسيها
الوطن خدران برگبتك مو الناس
عاشكك والمستحى مخليني اموت
ولشوكت راح اسكت وتاليها

اي احبك واستلذ بس بهواك
اليوم وياك الكرامة انهيها
اتدنى خل يتبدى من حضني عليك
هي هاي الساعة المتانيها
الظلمة تبدي وماتمض بينا الـ افيش
وبيك اطلع حرگة الباچيها

#لـ  مصطفى الشمري

حسن الحسآني


سفر للبرزخ بروحين
وحيّ ذنوبي درب متعوب
ومطر غنّه … 
شكو بروحي الـ تراب البوب

سفر وعيوني معصوبات للمدري
وباهلت التراب الباسني وبسته
وعلگته حدر صدري  ..

اخذو عيوني اريد ارتاح
البچي معيبر الـ  ذاك الصوب
     
سفر للبرزخ بروحين
جسد يشتم ملامح غربتي ودمعي
ويتمرگص بفي الطين

اريد ارتاح
وجسد يتثاوب من الـ اخ
هجرة من الجسد لأخر سما من الخوف
وارد ملهوف
وارد مرعوب
ارد مرعوب من كلبي
وأسولفله

ياكلبي ... غريب انت 
وحيد ومحد يحبك
غريب انت
اسافر وين ياعمري خطية انت

الٓه الشوگ شمتاني ( اخذ عبدك )
اسجدلك
هلال وعيد وغنّة وضحكة عرايس ماي

عليمن جاي
( اله الشوگ ) حلم من ضىّ يراودني
موكتلي  تفارگنه عليمن جاي يبچيلي
وحيّ ذنوبي يناغيلي

اقرأ …
كل حزن سافر من ضلوعك على عيونك
اثارينا رسالة ورب
وقريت اسمي وهويتي وكل جنوبيتي
ونسيت احجي
ولك نوبات
حزني يبوسني ويبچي؟

يرب الماي
ماشربك لون گيظي يبس حلگه ؟
وانه العطشان لرسومي
انه العطشان
دليني بعطر منك ملينه حجي القمصان
مكاتيب التتن دخان
هذا انه بطرك روحي  ومواعيدي
لحاچي مظفر بحلمي واسولفله
يمظفر غربتك حيل تشبهني
ويمظفر حزنك يوجع ضلوعي
وحق عيني

شمدريني
الشمس عاهر تشم حلمي وتفرهدني
يمظفر غربتك حيل تشبهني
وارد لأول جسد وامسح تراب البوب
على ياتابوت تنشدني وارد مذلول
لكيت الله ؟
ومواعيدك چذب منسي
بس ما اتوب

ذياب كزار


بيه بيه ..
شتدري بيه ..؟
بيه يالشحيت سولة ..
لو برد جرحي وانا المالوم اشگ جرحي اعله طوله
بيه سولة وسولة المالوم سولة ..
تدري لووهبيت نسمة؟
انا اهب وياك ريح ..
تدري لو حنيت چلمة ..
انا اموتن شوگ سكتة وعيب أصيح ..
مرّة وبمستحى گول أنت حياتي ..
ولك مالوم وحياتك يا حياتي ..
وبيه سولة ..
لو برد جرحي اشگ جرحي اعلى طوله ..
گطرة گطرة تذوب روحي ..
وشوگي شوگ الطير للبر ..
ودمعة دمعة تطفى عيني
وياك عيني ..
وطيفك اعلى رموشي خنجر
مرة وبمستحى گول انت حياتي
ولك مالوم وحياتك حياتي ..
وبيه سولة لو برد جرحي اشگ جرحي اعلى طوله ..

سجآد عبآس الوآئلي



حچي عيونك
جرايد خوف
و بـ روحي الحرف معصوم
ياهو ايكض نبي الوجدان ؟
خل يطشر گبالي
واصليلك شمس خدرانه وكت غروب

واشمّن درب الولايات
هلبت باقي اثر عطرك
واطش حنه بگصيبة ليل
وادعي لذنب روحي ايتوب
واسير نبع يم شفتك
واسولفلك كحل متعوب
واشيل فياي من ضلي واحط فوگگ  اخاف حرورة الدنيا تغث لونك !
وما خليك تمشي بگاع
لا مشيك عله جفوني !

شوكت چا تنقره الضحكة علة سنوني
يثاريني شريعة ماي
وچفوفك عذب غرفن
بس لـچفوف غيري چفوفك يعرفن
شسوي لگلبك وانحب
جبت عمري خرز ما شابگه الفضه

إنهدر عمري
وانه الما عابر العشرين
رد ليه بعذر باهت
دمع عيني يريد يطيح
بس يدري الرمش شامت
و انه غنوة بحلگ سكران
ما واحد فهم روحي
ولا ناعور گابلني وعرف نوحي

يما تدري
چا هوَ الضحك شباچ لليبچون
يما تدري ؟
بكل طگة قفل يوگع گلب مسجون
ما ماخذ عيونك لون
لاچن ماخذك مضمون
الرسايل تحمل شگد خوف
من تنكتب للبي ماي
الضوا تتفرهد اغنيته
اذا مر اعلة ديرة فياي

اعاتبمن ؟
اذا هوَ الگمر خدران
نايم ع النهر بليل
والروجات ساترته !
اذا هيَ الشمس تنباگ بيد الليل بس سكتة
وانه ادري العتب مريود ..
من يگصر حچي الفلاح يصعد بس حچي العنگود

احضني
واشبلك من سراديب الغرب بالروح
چم ولايه ع الفطره
سايرني
واغني غيوم ديرتنه لضمه الصحره
انه المبيوگ من عينك !
ولا مر فوگي فيّ رمشك
واجيسك ليل واطشر سِرب نجمات
اريد انشاف بعيوني
وتمر بيه گفه مرايات

طشرني اعله بيبانك
اصابع تايهه و رزه
تدري مشابگك بـ الطيف من يگرب
تضل رموشي تتهدد عله الفزه
سحنت الـ ااخ بجروحي
ودفت للحنه چم اصبع
ولا خليت حيطانك بعازت چف
وكاسرتك اغاني وليل
وصغت چفينك گبالي حرز للدف
انه مگنطرلك مرايات
مرني وخلي افگ ريجي بغبشتك شوف ..
يــ الموصي السراب يجيسني بعيني
و عله رياجي يضل يطوف ..
وانته ولا يزل جدمك

دربنه استاحشك خطوات
وانه اضفرله من الحيل چم موعد !
چا شيصير من انحب ؟
يــ  باجي الروح سرفن للـملاگه جفون
خل عينك براحتهه شكو تلبد ...

هضيمه الماي
من يعطش يدوّر ريج
كل طاسه اعله راس الحِب
يـ الگشايتك للغير
چم غركان بيه ومامش تچلب
اثاريه التعب بيبان تشتم چف المضيعين
اثاريه الدرب جناز المتيهين

شمدريني الضوا چذاب من يغرگ !
شمدريني النهر بالصيف
لو يعرگ بخار يصير
يصعد للسمة غيمة
وانه تگودني الهيمة
ولا مرسال بللني بسواليفك !
آنه العايش بكيفك

عبد الكريم القصاب


............. الباب ..............
كَالولي تجي وفزيت ،
وبجّاني الفرح ،
صار آشحلاته البيت ،
وآمتدت أديه ،شلون ....؟
ما ادري !
وآنرسمت الشبكَه بغير ما ادري .....
ورحت للباب .
كَالولي تجي آووصّيت بيك الباب .
كَتله الجاي ، بيْه نيشان بوسه ،
ودمعه من تيزاب ،
كَتله الجاي ،حافظ
كل سوالفنه على كَلبه ،
وحافظ كل غنه الغيّاب .
كَتله الجاي رايح
ينحني كَبالك يشبعك بوس ،
ويشاور العتبه بشفّه من عطاب ،
آووصيته ، كَبل ما تنحني له .....
يضحك بوجهك ،
ياخذ بوستي منك ،
يفك روحه ......
ويكَول افيش اجوني آحباب .
بيبان العشك مفتاحهن بوسه ....
وهمس خلاب .
كَالولي تجي .
وحطّت عصافير المحله آمتانيه الخطار ،
وآغصان الشجر.....
نفضن ورك حنه وصواني آزغار ،
وعودان البخور اشتهن طعم النار ،
وحرك روحه الشمع ،.....
من سمع بيك وذاب .
وآنا لخاطرك .....
رشيت ماي الورد عالعتبه ،
و غشّيت برفيف الكَلب شبّاجي ،......
كَلت يمكن يجيك تراب .
وبلهفة عطش تانيت ،
تانيتك تجي لكَلبي ،
تجي لعيني ،
مثل جيْة الحلم من غير دكَة باب .
وبلهفة عطش تانيت ،
وآستعجل نبض كَلبي عليك .....
آووكَفت الساعه ،
ومدري شلون ،
غبْت آويا الشمس وتجرّح اللبلاب .
وبلحظة صحو تذكرت وين آنا ،
وعرفت الكَال لي جذاب ،
وجذب نيسان حرك اعصاب .
عرفت الكَال لي جذاب ،
وعرفتك ماتجيني ،
وآنكسر كَلبي ،.......
وكسرت الباب

منتظر سعد

بيك من الصفات اتجمعن ضدين
حلا من العسل و مرورة الحنظل
وانه العاشگ اليعشگ كلشي منك جاي
تذوبني الحلاا وبمرك اتغزل
ليل بلا گمر فوگ اعله متنك نام
گلي شلون متنك منه ما يهدل
على خدك صبح بي بلبل وفيروز
بي نهران تجري وناس تتأمل
جداول فوگ عينك ما رون عطشان
اذا مرن بغصني يورد ويعدل
ارسمك بالخيال ويزلف التفكير
واسترك من اشوفك جايني امهدل
انه عكس الطيور استلذ بالصياد
متذيرني چيلة .وبالامان اجفل
مثل فكرة الثار الما لگت فجار
بيك الراس كلما ينشغل يثگل
جربه ومن عشگتك خذت دور الماي
وادري بروحي منك لازم اتوشل
انه شفايلتي تزعل مني لو تغتاض
واحاجج عاذلي ،بس اليحب يزعل
اجيتك والعمر بين الصبح والليل
شمسك من تمرني اچم فجر تشعل
اجيتك فوگ خدي مخضر القداح
بي عطر العشگ .خاف العشگ يذبل
اخاف الشوگ يبهت والگلب يرتاب
اذا گلبك عليه بشوگه يتعطل
بسوگ العاطفه الدمعه ابرخص تنباع
بچيت وغاليات ادموع المدلل
يمحتلني ارد اسئلك لمن احتليت
شني جيتك الي تحرير لو محتل ؟

علي عمآد



الموقف يختلف
هو الدمع هم ماي
الرماد الساكت شكد جان بيه صياح

ياهو الكالك
مو صدگ وعله اعزاز
ليش المثلة صارت دمعة التمساح

ذمينه الصدى
ونعرف الفزعه البيه
خلص عمره يفزع وره الصوت الصاح

هو الليل
طلع للكمر تاريخ
بس ظل الكمر لابس الليل وشاح

الياخذ عل الشكل
يظلم هواي كلوب
خذولني الردتهم من اطير جناح

يشمون الورد
وعيونهم عل الشوچ
تحچي بيا عطر لليكره القداح

شكثر ذموا الليل
وظل لباچر ليل
لاگوني وگلت كل الجروح اطياح

مثل ما عودت
صدري على اليحضنون
هم عندي ظهر متعود على ارماح

رايد خيرهم
مو غيرهم  .. بس ناس
صاير طبع بيها على الهجر ترتاح

وجذبت على روحي
الحلم بالنيات
وكتلها الصبر حتى الكمر ينلاح

خليج ام هلا
هو الحزن هم ضيف
من ضحكه فجر ليل من امس ينزاح

يعزب بالعطر
كل ورد من ينضاف
للشم والگطع نسم بعمره وفاح

حبه حلوه روحي
من الاسم تنضاگ
يجفوني الصرت لعروگهم سباح

شحوا بالهلا
وكت الملاكه الظال
وعليهم وانا انازع بالنفس ما شاح

شما تاه الجرف
درب السفينه الماي
گالوا تيهت  .. وانا المطر لو طاح

الكروب الخاص بالقناة .. 💜

https://t.me/sha3ir_100

عبآس الغآلبي


تدوهن خلكَي من فزيت وياك
شكو مرورة وحلا اتلاكَن وياي

عباية مستحة
وشباج والريح ..
تهدك والسوالف خيرهن جاي

ابو ملوحة ليراوس لون باللون
اهيسك مثل لوني تعيش بهداي

يـ عنكَود المحنة المال بالشوف
عتكَ ملحي وحويتك سالفة وماي

عثرت ليل
ومحابب حلك تنور
هيضت السواد أعليك
واصادف وشلة العشرين ..
مرهونة لتعب طاريك

يخذف صوتي بسم الماي ..
جي لنة الهوى مبديك

وينك ياعشكَ مملوح ؟
كلشي اعليك ينشد
وانه احشم بيك ..

شكَل لجفوفي لمبينات
بيهن نشد فز وهب ؟

شكَل لعيوني لمسنحات
حدر الطين وازاهة الحلم مترب ؟

شكَل لمچانك البردان ؟
شكَل للحجو .. للخرسان ؟

كلشي عليك ينشد
وانة رجفت باب كَاداهة الهوى السكران

فكَهت ابلاية عرفة وياك
وانه بعيني سفر شاهين ماحط اعلة رية باب

كلشي ولااشوفك فوك تتعلى وية ذنب حساب

د هد عمري
الي حصة ترى بروحي
ولو صوتك اذان  وياي  رايح جاي

انة المشموس من ابعيد
اصيحلك تعال فياي
واتلكَاك ملكَة عتاب ..
نفسُ طعنة وهواي كَراب
زحمة هوى بوجه لباب

شموازيك تلبس لبست الدخان ؟
طارش عمر ثوبك والغزلِ جذاب

رافكَتك خلك ناعور
بس بوجه جوري ابيض
ورافكَتك سهر مشلول
بس بوجه صبرة نفض

اعلة ساعة يطيح شوفي
المنتجي اعلة الدوم
ماملجوم منك و ولاملجوم منك بس اشم فراكَ وي كل غبشة بية يحوم 

استاذ الشعر الشعبي
غانم الفياض

(حلم تعبان)

نجمه اتطيح
تفلت من سمه عيوني
تخدر
تنتجي اعله الكاع
تلكـــــاني..
شجره اعله الرصيف اواكـف ابكــلبين
واحد ينتجي من الضيم
ع الثاني
تلكــــــاني..
حلم تعبان
ومتاني المسيح ايفوت
وبجفي صليب
وبيه ست اطفال ماتو ليله الميلاد
رسموا فوك خد الموت ست الوان
للحب.والخبز.والماي.والدم.والوطن .والناس
واحد طاح
والخمسه اصابع باقيه ابجــفي
ومتاني المسيح ايفوت
امتاني المشو بلكن يجون وبيدهم عنوان
غركت كل سفن ربعي وكلاها الليل
مدري شلون عمري انباك
والتم اعله بالي وخيم النسيان
يتمدد على عيوني الندم
فد يوم..
جاني النخل كله ابلهفه العطشان
ومحمل تراجي ابلون عمري الفات
امتدت اديِِهّ وضاع بيهه الشوف
جابت تمره وحده وعافت البستان
بيني وبين وجه امي
عمر يمتد مسافه خوف
وبيني وبين اول بيت بالدنيه
ظلام
وموت يعبر والطريق سيوف
وبيني وبين وجهك ليل
طش ثوبه.......وخنك صبحه
روحي امرايه المجتول
وسنين العمر حلمين
وعيون التغمض بالفشل وكحه
وادري العود من يحله
الجفوف الزرعته
اتذبحه
سد الباب
غم صدر اليشيل الضيم ما يكدر
يكــّسر وحــّــده البيبان
ما خليك تقراني
وتعرف كل مساماتي
وتدك ابحافرك فوك الجرح نيشان
ما دليك بجروحي.
وعناوين الطيور الغافيه ابروحي
وبصمات النخل
والكاع
والنهران
ما غمض جفن والليل شايل سيف
ما اخلي الخريف ايفوت
واوراق الشجر
ذمه
او ... وصيه ابركبه الانسان
شضيني علكيفك
طشني بيدي الموت
ماتشطب هويتي
وصوتي بيه الموت
اصير بكل شضيه
السان .. صوت
وكل شضيه تهد عليك
تريد ثاري انسان

،


ستتعب الموتى بأنينك ..

الشاعر الكبير موفق محمد في ذمة الله ..

مسلم الخنفري

نام و ارزق عينك شويه ظلام النور وحشة
و غيّر اشويه اعتقادك و اكفر بتاريخ فكرك
تلگه هاي الناس چذبة
و تلگه هذا الغيم چذبة
و حتى هذا الصبح چذبة
و تلگه بين الچذب روحك سفر ما بين الملامح
وين ما يلتفت فكرك يلگه حل بلا سؤال

و انت تمشي
چن متاهة و ضايع بنفسك خريطة
تريد تحچي
تضيع بين اللسن چلمة
تريد تصرخ
تلگه صوتك طفل اخرس
يخمط من الفوضى حلمة

وين رايح خلصت عمرك مسافر
خلصتهن ذكرياتك سفرة سفرة
خلصت صفنات وجهك ذكرى ذكرى
النور حريةْ تطرّف
الشمس للظلمة قناع
و الحقيقة خيوط هاجس
ضاعن بصفنات شاعر

إفتح اعيونك و عاين
وين ماتعاين تناقض
وين ما تنولد فكرة تموت عاجر
إلإباحية حقيقة
و لبسوها الليل ساتر
و السكوت شگد مقدس
و الحچي طغيان كافر

و انت تمشي
تشوف وادم من حزن
ناس ما يضحك ثغرها
تريد ضحكة من الجفن
اتريد خيط من الشمس ياخذها لله
و طعم موت
و باب جنة
و قفل مفتاحه ذهب
الجنة حريةْ سجن
ناس ما شبعانه موت
لأن ما شافت حياة
و الحلم ما شاف عمره
الليل من يطلگ حلم ذباحه فجره
الصبح مأذنةْ المگبرة
هذا يعني الموت فكرة
و الحياة اعلى الحياة تصير ثورة
و الوكت ثورةْ ملامح 
و انقلاب اعلى الشغف
و احتلال بلون أبيض
تنگط اسنونه نفاق

كلشي بالدنيا منافق لونه أبيض
كل ضوه يتعده جفنك هذا حلمك
غمض اعيونك و عاين
تلگه للظلمة وجهْ
و تلگه هذا الغيم ياخذ من جمال الورد رشة
و تلگه ناس بلا دغش
و الصبح لو يغفه بالليل يتغشه
نام و ارزق عينك شويه ظلام النور وحشة

غازي ثجيل

(ضيعوني)

سلمت روحي وياچ ياشمس الغروب
والما تشوفه العين تسلاه الــگــلـوب

وانه ذاك العاشت عيونه بصورهم
وبمكاتيب العشگ ينضح صبرهم
ياسحرهم .. ليش من بعدوا نسوني
ضيعوني .. وضاعت بشوگي الدروب

ضيعوني وانه لسه گليبي يسگيهم حنينه
عيــــــني هم شــلون واحد ينــسه عـينه
عمــــــري هم وكـــبرت بفــيهم ســنينه
وحتى شـــوگــي يطـگ ورد ومأملينه
واحنــه يــــاشـــوگ شـــبـدينـه
السكته تاخذنه وطواريهم تجينه

ضيعوني.. وضاعت ايامي على دروب البريد
وانشد النسمه التسافر غيــر شوفتهم شريد
ولو نسيت وردت احبن، هم احبكم من جديد
أي يا گــلبــي من الــعـشــگ والشوگ زيد
وتــدري شوفتهم مــحبـــة وفـــرح عيد