كاظم اسماعيل الگاطع - عبرنا الليل 🏴

على جناح الفخاتي الطايحه من اشجار محترگه
قرينه أخبار حلوتنه
وشربنه دموعها الزرگه
أخذنه الليل ويانه
گعدنه أعله الجرف
نكتب عمرنه بدفتر الفرگه
بچينه هواي وضحكنه
ولگينه أخبار عامل طاح
بس مامات گلبه
ولا گدر كل الرصاص الحار
يزرف بدلته الزرگه
وعلى أجناح الفخاتي
الطايحه أعله أكواخ محروگه
لگينه هدوم حلوتنه
جرايد سعف محروگه
عبرنه الليل والشرجي
لگينه الماي يابس والنخل عايش على أعروگه
بچينه هواي
أبو البستان دلانه
على البواگ والبوگه
وعلى ادموع الچفافي الطايحه من ادموع حلوتنه
لگينه أگلوب مكسوره
مثل گصبات قريتنه
عبرنه الليل والشرجي
شگينه صدر مشحوفنه الذابل
لگينه الريه خلصانه
بچينه هواي وضحكنه
لگينه الشاطي المحنه بجرح فلاح
غاسل بالرمل والماي وجدانه
وعلى وجه التراب الجاي من اخدود بدويه
مشينه اعله الجزيره اجيوش
لا گتنه عواصف مهر رمليه
خذتنه لوين ماندري
خذتنه ابعيد وبچينه
بچينه هواي وضحكنه
عرفنه المهره عرفتنه
وعرفناها عراقيه

عريان سيد خلف - عراريس وگمر 🏴

شمت چفوفي لگت نفسي جديدة
وگلبت وجهي لگت صبري نهر

جاست جروحي لگت دمي قصيده
وخضرت روحي عراريس وكمر

توسدت همي نشغ بيها فرحها
وشرعبت خيطين والدنية بخت

ضحكت بوجهي لگت عيني چفنها
وعانگت نوم الصبح وتحلمت

رادت تلمني لگتني بلا شريعة
أستخطرت ظلهة وعلى چفوفي انچفت

وهات هات الليل يالمالك شغل بالليل هات
وهات هات الكاس يالما تعتنك بالكاس هات
الدنيا لو ما بيتتها لغيرك تلولي وتبات

دللتني أكبر وشم بچفوف أيديها
وضوگتني اسمي وعرگ ركبه وخجل
وچانت لروحي سفر بأول محطة
الما صحه چفنه وغفه وفاته السفر

چانت ايدي دروبها وفيها وشمسها
تفز لون چفي بخواصرها عثر

گالت الگطعه على عشرتها بعطشها
توچ فرح لو حست بگطرة مطر

چنت گبلك سچة ماشافت چدم
وتلگيت ابروحي الجديده

وماعرف من ياكتر للروح اطب
وخفت من سنين عمري،،،يلبسن وجوه الغرب
وعالگرب،،،حدر ابهمك عالگرب
عالگرب يضوي النهر كلما يصب

وهات هات الليل
يل مالك شغل بالليل هات
وهات هات الاه يل مالك شغل بالاه هات
الدنيا لو ما بيتتها ..لغيرك تلولي وتبات

كاظم الركابي - نوارس ماي 🏴

بعد تنشاف بيه ارسوم
من اشتاگ

وبعدني ألبس وجه ملگاك
واعطش ماي ما ضايگ
حلاة الراگ

وبعد بيه ملامح من بشر ينخاك
متحزم عتب گيعان
وايدور خضار انباگ

من شح الصدگ بالناس
دورتك عشگ سبعين
بي نية نوارس ماي
زفوها اعله بخت الطين

وسولفتك حمل متعوب
ما شايف متن مرتاح

يل اموالف وجه مگفاي
اضم الشوفتك ذله
واكشخلك جرح مندوم
زفو للغرب خله

تعال وخاطري امتانيك
ما حس ابطعم وي ناس يم العين
بس انت البعيد بكلشي احسن بيك

شلت عمرين حتى الگاك
وتناوشت الضحك بشفاف
يبسن من ثگل طرواك
يبو اعتاب الثگيل ابخاطر النسمات
يجنازة نده امن تفوت
فوگ اخدود ذبلانات

اخاف امن العمر يزهگ
واخاف الليل يلبس ناس
واثياب الصبح تعتگ

يوينك ماتوالمني
ذراني العتب واللوم
وازياگ الهوه اتلمني

وين الگاك
دنيه وكل حجيها افراگ
وادم ماتعرف اتموت من تشتاگ
وينه اليشبه ارسومك
واصوغ ابشفته احچايه

حيره وكل وكتنه عيون
ينطي الوين وجهه العاشگ امرايه
اليخطف عالجفن وينام ينزع روح
فشله اعله الهوة ممن ايفوت مايغفه ابحضن رايه

ومو ذنب السمه امن اتطيح
النهر نيشان .. لكن باگها ابمايه ..

جواد زغير - ضاله بگلبي 🏴

ضالة بگلبي ....
مثل كل الخلگ احظى بنصيبي
وضالة بگلبي...
الهلا وچلمة تعال ويا حبيبي
بيش يتلگة السفينة اليلگه روحه بلايه ماي ..؟!
من عشگتك مدري ليش الريح هدت سيفهه بمنحر ضواي
..قسمة هاي ؟
چان شباچ الولاية البيهه انته يريدني من اتعنه نسمه
وجان شوف ولايتك يقراني نجمه
صادفتني وعيني صلتلك صلاة الخايفين
ليش گتلي انا قبلتك ..؟!
ليش يا اول حبيب لا صرتلي ولا صرتلك ..؟!
ليش تمشي براي سچه وانت تدري مشابگ اليهوه فرض ..؟!
چملت دخاني نار ...
شلون أهيد بحجة الماعندي حظ ..؟!
ياچذبتي السولفت بيهه اويه روحي امعاتبك ماله نهايه
شما كبر يبچي قصيده ...
تزيد من ناري اذا ما شگگتها
هذا عمري ...
ملتهي اكتبلك و أشگگ ...
بيش تنفعني القصيدة الما تجيبك ..؟!
ويا فشلتي .. منين ما اندار وجهك
لا انته المبعد واضيعك وارضى باعذار الدروب
و لا انته مسكتني بيك
انته يمي....
والمسافه البينه مو مال ريل ولا محطه
المسافه البينه شمرة شلونك
لا گلتهه ....
ولا انه گلت لروحي هيدي وهودت
ليش بس قصة عشگنه بموعد فراگ أبتدت
يا شتاي
شگد شبابيچ اعله صدري متانيه امغازل هواك
شگد گلتلك ضلمه روحي بيا كتر نايم ضواك ..؟!
شگد دمع فاض اعله خدي
والاحبك بين چلمه وچلمه تعثر
سما الوادم عشگ تمطر
وانته مدري شعطلاك ..؟!
شعطلاك.....؟؟
السنبل اصفر...
وانه خايف لايمر منجل غريب وتنكتبله
حيل خايف لا أتيهك و أگضي عمري بلايه قبله

سعود الخفاجي - هوﻯ الهاب 🏴

تنشدني اعله حالي شلونه بجفاك
وانا الكظيتهــــــــــــــــــ ـــــه بطرگ الملامات

عليك اسال امس وبحركه غنيت
وبچيت وگمت اغنيلك سلامـــــــــــــــــــــ ات

نسيت وچنت اغنيلك سلامــات
ومع النجمات اوديلك سلامات
الجرح لوصادفك مره سلامات

الجرح يلتم واكول اعله الجـــــــــــــــــــرح طـاب
وانا الماعاشرت غير الحرامـــات

وحرامــــــــــــــــــــ ــــــاتك باصبعي وخضرن ناب
اسولف وي صورك وابچــــي مرات

واطش اعلـــه الصـــــــــــــــــــورد معــات العتاب
ومـــن گدما بچيت البارحــــــه اعليك

وحچيت اويـــــه الصـــور عـــــــــــن ظيم الغياب
اصورك كيفــــــــن حسبالهـــــــن جاي

وحـــــــــــــــــــــده مــــن الصــور فتحتلك الباب
وفتحت الخاطـــــــرك شبــــاچ العيون

وعواذل عــالدرب غنــــولي چـــــــــــــــــذاب
وكلت باچــــر تجيني وسولفت بيك

وبنيت اعلـــــــــــــه الـــــدرب للجيـــه محــراب
وزرعت بكـــل كتر تانيتكم عـــــــود

ويبس عـــــــــــــود انتظــــارك ياهــــــوه الهاب

عطش تموز روحي ياهـــوه الهاب
اليسلهه وغيرك انت ياهـوه الهاب
دليلي وگمت اغني ياهـــوه الهاب
وهـــوه الهاب التهه ومامر عليه

مظفر النواب - جذاب 🏴

چــــــــــــذاب
ردتك ولو چذاب
ردتك
تطش بعمري صم عتــاب
ردتك
ولو شباچ
يملي حياتي تراب
ردتك
ولو صبيره حمره
تفي وجهي
من حچي الغياب
چذاب
چذاب يا ثعلب عنبنه الترف
ونعزك ،
ولو چذاب
دگيت بابي
وعشيت بابي فرح
والخشب عطب
ذاب
خدي اشتعل
والروح شبت ورد فلفل
والتراچي ،
ذابن بتيزاب
وأصهلت
مرجحت الكصايب
ياحبيبي ، ياحبيبي ياحبيبي
ومتت مثل الباب
چم دوب
مو گلنه الگلب بطل
ومنك تاب
چذاب ياگلبي
يثعلب
من گبل چذاب

ميثم فالح - خالي مكانك 🏴

أحسد عيون اصحابك الشافتك
اتمنى ابوس رموشهم والجفن
دمعة عيوني التوكَع بغيبتك
دورها تلگة شجم حلم مندفن
مالحگت واحجيلك اشـ بالگلب
وضميتلك باقي السوالف وأنْ
ادري برجعتك ماتصح بحلم
لابيك رجعة ولا عمر ينضمن
الشجرة العليها اسماءنا تعلكَت
علكَت بيها اشجم علكَـ ع الكَصب
تانيت شوفت عينك اشجم عمر
مثل الصحاري اللي تتاني السفُنْ
شيجيبهن رمل المفاركَـ عطش
ومجروحة اغاني الشوكَـ بيها اللحن
يوفقك الله ادعيلك بكل نفس
واتخيل انت بخير حتى اطمأن
من اشتاكَـلك تنعصر روحي عصر
ومدري شطلع صوت لمن أون
علمني ياشباج مابي الـك
دمعة ودعاء وعصرة ايّد وحزن
علمني اشوفك حتى ابطل العمى
علمني انام وماتجيني بحضن
دربك كَزاز وحافي ماكو وجع
شو غيرك اتوجع ودربه كَطن
محتنيّ كلش شلون اخلص اذا
في كل شبر من روحي باني حصن
كلما ابطل ارجع لرحلتك
ارسب بحبك ثم ارد امتحن
بلكَت بعالم ثاني من ننخلق
اختار غير بس اظن ما اظن

مجيد البهادلي - مر بيه حلم 🏴

مر بيه حلم موت بجايا الروح
حلاة الموت اذا صرت انت جتالي
احرك روحي المن شمس لو تنور
هم احرك واضوي ومحد بحالي
هو الكبر حفرة شما تعمر بي
واذا ارد للصدك بس هو يحلالي
والمن طين بيته يعرف ثكل الغيم
بيت فراكه طين وزخ مطر عالي
السنابل من تجف تطلع بمزنة ماي
وانا اعليك دوم يفور شلالي
اشتهيتك حته لو حنظل بريجي تفوت
هيه مرورتك كهوة اتراوالي
دريت عيوني من تحكني تبجي اعزاز
شتوه وكمت احس بالصيف يدنالي
ولسان النهر معكود بالناعور
اذا جف النهر ناعوره ظل خالي
موكل طيحه طيحه الندى يكحل اورود
واذا طايح الليل يكوم وبجالي
بعد بيه الغصن من ينعوج مرغوب
امد روحي اعله طولي وكوه كفالي
واطلع بالوزن عبالي بيتي اصغير
اكولن خاف ماكفاله دلالي
اذا توكف الساعة الرقم زعل ميل
يمته تردلي يالمتخوصر ابالي

مظفر النواب - گالولي 🏴

روحي ولا تكَلها : شبيج
وانت الماي
مكَطوعة مثل خيط السمج روحي
حلاوة ليل محروكَة حرك روحي
حمرية كَصب مهزومة بالفالة ولك روحي
وعتبها هواي ....
لا مرّيت ... لانشديت .... لا حنيت
وكَالولي عليك هواي
وعودان العمر كلهن كَضن ويّاك
يا ثلج الي ماوجيت
تعال بحلم ... أحسبها إلك جيّه واكَولن جيت
يلي شوفتك شبّاج للقاسم ... ودخول السنة من الكَاك
يا فيّ النبع واطعم .... عطش صبّير ولا فركاك
يلرهميت ... يا مفتاح فضة ولا رهم غيرك عليّ مفتاح
أجرت لك مخدتي وانطر الشبّاج اليجيبك
وانت عرس الليل والقدّاح
يا هلبت تجي وترتاح ؟؟
طركَــ المسج والنوم ...... طركَــ المسج والنوم
عمر واتعده التلاثين ... لا يفلان
عمر واتعدّه واتعديت
ولا نوبة عذر ودّيت
وانه والمسج والنوم ... واغمّض عود اجيسك يا ترف تاخذني زخة لوم
واكَلك : ليش وازيت العمر يفلان
يفلان العمر ... يشكَر ولك يفلان
وهجرك دم ... كل ليلة اشوفك بالحلم عريس
اكَول اليوم يجيبه .... خلص كَلبي واكَول اليوم
ولا التفتيت ... ولا وعديت ... ولا استخطيت
ولا طارش جذب ودّيت
ولا مرّة شلت عينك تعرف البيت
وكَالولي عليك هواي .... ورحت ابراي وجيت ابراي
حسبالي سنة وسنتين وتلاثة
واشوفك ذاك البكَلبي .... واضوكَــ الماي .. واضوكَك ماي
حسبالي اشوفك ابن اوادم .... يا شكَلك ... موش اشوفك هاي
ولا حسّيت ....... ولا استخطيت
ولا جيت اعله ماي
تبيع بيّه وتشتري بالسوكَــ
لا ما جيت
وكَالولي عليك هواي ....... كَالولي ......
كَالولي

ضياء كريم - لاگيني 🏴

لاگيني على گد گمره
وصاحبني لحدما يخلص الشوف
البعين الـ بوم
عثرني على شباجك حرز عشاگ
ودورني بتوالي الشيب تلگاني
جرح ملجوم
عاشرني لـ ضوه الغبشه نداوة ليل
واعثر ضلمه وي اول فجر ملگه
فتح بيبان اله بـ روحي
اريد اجهب مجان الـ آه
ورجني على لجمه اتلوگ لجروحي
دليني غشيمه النيه ماتندل سوادة
كيف التعلمني علهجرانك
ماعندي لهوه الله اشراع
حتى انخاه بـ فزعة ريح
التباعدني اوي بيبانك
يماخذ عافيه بمگفاك
سلمني اوي شمس اغروبك
حجاية دعه وايـه
سولفني علگد الضحكو بظهري
من ماشيت وجهك وي گفه امرايه
ومن فريت جدم اوداع
افترت بيـه دنيا وگاع
من اخر سمارك ذاك اجيت بوجه
مابيه واهس لـ ملگاي
من اول حجي اعيونك قريت
بصفنتك فرگه ودريت البال مو وياي
واتيقنت راح اتروح وبذيالك
تجــر الروح
من هايه وگلت اي راح
من هايه وعرفت العشگ للمرتاح
من هايه وعرفتك يادنيز العنز
هم تنلاح
من نهرك عكسها اوياي وغرگ
بوشالت السبــاح
يـ عايفني علمود انسان يحلم
يوگف بـ ضلي
حاسبني عبرة وكت وانا
الحاسبك خلـــي ..

عبدالسادة علي - حلم نبته 🏴

على أشفافي ..
بيادر مستحه ..
وعتاب وسواليف ..
غيّبها الخريف ابغابة الملگه
وعلى اعيوني ..
سِفر مكتوب ..
تعجز ماتحلّه أمواج للشهگه
اشما أعجن زماني ابچف صبر مكسور ..
يجرحني السكوت ..
اووحشة الفرگه
يا كلني الفراغ ..
او مغزل الصفنات ..
مهرة ريح ..
يطوي اخيوط للحرگه
اغيّم بالمكابر ..
وامطر الوجنات ..
قوافل من دموع العين تتلگه
اتفتت رمل .. والموت بجفوني ..
ترس خيط العمر مغزول
التعب بيه التعب ..
يكبر شمس .. شمسين ..
وظنوني .. حلم نبته ..
ابدرب عن كل سفر معزول
اشما هزني الحنين ..
او روجة الاحلام ..
اظل مثل الهوه ما ارتوي ابكل ماي ..
مثل الغيم .. بدروبه العطش مسلول
تظل غربة مساراتي ..
اعله خطوات العمر ..
تتناسل اولايات
جذع شجرة ..
يظل باب الصبح مغلوگ ..
وظنوني حلم وتراب بيها امطرّزه الحسبات
يا منهل حياتي ..
الكل جرح بالطين ..
ما خضّر على اضفافه ..
ولا جيسة عطش بهداي ..
مدّت چف عليها او فات
حرثه اتگوطر ابطاريچ .. كل نگلة فرح ..
لو ورّدت بالروح ..
وتعشّب على الخطوات
يا مرجوحة احلامي ..
التهزهه الروح بالشهگات ....
الچ بيه ..
مسافات او سفر واجدام ..
خطوتها اعله سچة ريح
الچ نهران شوگ ..
أتشگ بوادي الروح ..
وتفيض اعله غابات الحلم وتسيح
الچ شجرة نهاراتي ..
چبيره اشگد ..
چبيره ابكل كتر مني ..
اذا تلها الظلام اسنين ..
ما تهجر مدارات الشمس واتطيح
اشما التم ..
وطوف ابسورة النسيان ..
يزرعني الكلام .. واعطش الطرواچ ..
صبّيره اعله چف صيهود
اغيب ابشبچة اطيوفچ ..
طبع رحمه ابكلب صايود
يلي أمعاشره اضفافي .. طبع مشحوف
كل نظراتچ ابروحي ..
مثل ماي الحياة .. ابكل مسامة ايطوف
يل مزروعه بعيوني .. مشاتل شوف
يا منجل صبر ..
بجفوفي اطاول بيه ..
شتلات العذاب .. او سنبل الوحشه ..
او حصاد اللوم
دنيه اسرار روحي البيچ ..
كل نجمات عمري .. الهن سمه ..
ابدرب الوكت مرسوم
يا معضد حجينه ..
الطوّگيت اسنين .. بي معصم سكوتي ..
او فاض بيه الصوت
طين او ماي ..
ما ينطش عطش بينا .. لمن يفرع شتال الموت
ولا يطرش جدم للگيظ ..
ولا ايگوطر گحط بسكوت
حيل انتِ اليظل عمرين ..
بي تگعد محطات العمر وتگوم
يا بحر الخيال البيه .. مبحر دانگ احلامي ..
على روجة جرح .. ترس الكلب .. ملچوم
تمر ايامنا وتجزي .. او تخضر ايام
وانتِ ابنظرة اعيوني . خضار اليوم
بعيوني اشوفنچ .. خضار اليوم

عطا السعيدي - السنين العاصيات 🏴

يعيني الله اعله العواصي من السنين
شكثر بيّـــه عناد ويـــه العاصيات
وزه يوازني و أوآكح ما ألين
وأرجي ضلعي على الرماح المُشرعات
آخ ما آكولن وهذا المـــايصير
ولا أطمعهن وأبينلهن شكات
هي روحي ووطنتها على اللهيب
وميــزة الفـولاذ يصكَـل بالشوات
طبعي كَهوه اشماتعظني النار حيل
أكسب من النار محمود الصفات
روحي أبوهه الضيم وأمها المستحيل
وهي وسنين الكَحط ولدن خوات
أنا مغرم بالثكَــــال من الحمول
وصلب عودي وهالجتاف معركات
شكثر منهن حملت بس ما لعيت
ودفتي من الجلد طلعت والعبات
وحدر هدمي وكَامتي يتكسرن
والنصال على النصال مخالفات
واعتنيهن لو عليّ ما سيرّن
خاف ينكَال انكسر بالعاتيات
ولو أدريهن ضواري ولا أهاب
وكمت أواسدهن وألف راسي وأبات
الحكمه انك تعتنيهن للمكـــان
لا اتانيـــهن يجنك صايلات
أنثر غبارك على وجه السنين
كلهه تفنى وهنَ ذن الباقيات
والله اليطخ كَامته يسموه ذليل
وانه ما أرضى تصفني بهالصفات
مر علي كل شي وضكَت حد ما رويت
خاف أكَــــدر خاطرك بالتسميات
العسر والجوع والهــــم والدموع
وكَصره اليد والهدوم الباليات
آنه فضله ضيم فرتني الرحي
ودولبتهه ومللت طاكَـ الرحات
وبخضم هذا الصراع تريد أنام
ياغشيم ينام ويلذ بالسبات
خل أشد وزار وأتلكه الصعاب
كبل لا يسطن علي موزرات
ولو طاح الريش ولحيمي ارد اطير
واشتل ضلوعي ابدال السبكَات
لا تكدر خاطري لو ردت أجيك
وتشتكيلي من المضن والآتيات
انه عاندت الوكت وبمشتهاي
وصرت حتى من أرد اموت بمشتهات
وصرت ممن لأن عاري من الثياب
وهو ياسلاب اللي يسلب عراة
برغم كل الصار وبرغم اليصير
ما تزل أجدامنا المن ثابتات
أنه ما مجبور أصدك ما يقال
ولا أردد ما سمعته من الرواة
أنه مصدرهن إذا زل الحديث
وانه بهلول اليفصل الراهيات
آنا بارم خيط وكتي بهالجفوف
وبإيدي سديت الغزل للمسعدات
شلون أجفل عكَب ما صار الطراد
وجنت أتانيهن وهن محددات
كبت التكبل الأهدان المستكين
البوم ماجفل الصيد من الفلاة
ولحيه الماتنحشم يوم الصياح
لا تعدهه من اللحايا الغانمات
عيش ذيب الدنيا مو دنيا خِراف
الموت للخرفان.. تحيا الضاريات
هم شفتلك ذيب جتفوه للكــصاص
وداعتك بس الشياه مجتفـــات
وهي غابة وذيب يتسطه على ذيب
ويتعشى بصاحبه كــبل الغدات
يا دواليب الوكت فريــني حيل
أنا أدور راحتي بالموزمات
بيه سوله السهل ما والم هواي
الا أمد ايدي وألوح العاليات
ولا أدور طوش من حدر النخيل
كود أعت روس العثوق المثكَــلات
الماي من يركد فسد ما أشتهيه
ومن خباط الماي أطلع الصافيات
وحصتي من الخيل تعجبني الجموح
شنهو نفعه الما يروض الجامحــات
وأعتني النزرات كل ما أبعدن
وقيمه المنظوم جمع الشــاردات
وهيه لذه الصيد أصلا بالطراد
وخيبه الكَانوص جمع الطايحات

محمد الكريزي - المراجل 🏴

اشمر البرحي على عناد الخَضار
استغفر الله ومو عِفت عافه النظيف
طبعي أبذر بالبذر طشيته طيش
صاحب الصاحب وله مصاحبلي كيف
صعدت سوكَـ الخبز وانطيته صيت
أنا طلعت اللقب سموه رغِيف
أنا شكَـ منشارها ولاكَتلي فيّت
أنا الجلمة المالحة بحلكَـ المضيف
شايل الدنيا على جتافي ومشيت
ما مصعد ع الجتف واحد خفيف
عطش كَدامي نهر شربته أخوي
الـ بالشتاء ويحتاجني يلكَاني صيف
تغزر بوجهي الهلا واحسبه دين
مقدس الحفضت شرفها عالرصيف
مصوّر بحضرة علي صورة وبجيت
امنيتي مخلوق بكَبل لو حتى سيف
بخاطري يظل كلمن يحطني بكَفاه
عنودي كَدام امي اصير شكَد ضعيف
تعبتهم نمل ويطارد غزال
هواي باعوني وخذوا دور الشريف
الماينظف كَلبه شعليّ بالحرير
لو تغسله بمي ورد هم مو نظيف
ما منزل رآسي بس كَبال ابوي
وما فتر برآسي بس ذاك الحلم
بالمراجل خافت من أسمي السُباع
وبالمزامط ماشلت رآية سلم
هواي غالبكم وطحتوا بلايه صوت
شما اتقدم خطوة سمكم ينثلم
عود مو سيد وأحس روحي بخيت
بطيبة أطشر والوراي يرد يلم
الزين يحجي بوجهي لا يحجي بكَفاي
وبوكتها اعتبرة زلمة من الزلم

مظفر النواب - على گد البريسم 🏴


" على گد البريسم "
خلي الشبكه بعمر الورده
وشبكه النوبه
وشبكه النوبه
وحد ما نذبل حدر الغتره
وسجّة كحلك دﮔهه بعيني
يموت حسابي
وتطفه العبره
وكل شهـﮔه التشهـﮔهه بصدري
تدﮔ لك عشره
يالساكت والتحجي طيوفك
وأتدّافع آنه وكل ﮔلبي نريد نشوفك
واشبع منك؟
كون الطير يشوف الماي
ويشبع منه
كون الترفه
تحل ﮔذلتهه
وما تفتك بيبان الجنه
وكون أتمنه
وكون اتمنه وما مش حدر ﮔليبي عريضي
شجرن ﮔمرات الصبحية
وعطّ الجول بنفحة عنبر
وآنه الما نيمني عيوني
كل ليله ولنك ﮔالبني
وكاسر ماي الظنه بروحي
وما تنزل وتبور ظنوني
ونزلت للشط كل مكحله
تفرّ الجرفين بطرتهه
وشبعانه سوالف ومشابك
ليش انه بعشـﮔك سياحه
وكلهن طابـﮔ
موش حلفنه وكلنه نموت
وما نتفارﮔ
جا ليش بساع تفارﮔنه
جذاب امشينه مزعلينك
جا دلحـﮔنه
نفك لك كل بيبان الجنه
وفوك الجنه وفوك الفوك
الفوك الجنه
مو بتوهدن، وياك هواي توهدنه
لو رديت أعلـﮔ دايرنه
وجياتك أفرش بيديهن
ضحجه وحنه
وافرش لك بالعتبه شليلي
وثوبي الأسود
يفتك حزنه ويفرح نيلي
وتخضّر الرزه من دموعي
وضحجة وبجيه تطﮔ بعيني
لو رديت انته وذاك انته
وكسريتك فوك تفييلي
اتبلل واتفتفت بيدك
وبتالي زبونك المطرّز
امسح ضحجاتي وبشليلك
موش مصدكه وموش مجذبه
وموش اﮔدر، أﮔدر احجيلك
بسّج بسج يا روحي
وهمانه وما مش من رده
تظلين حبيبه عل السده
تظلّين تـﮔلبين عيونج
بالعبّاره وباليتعده
وقداحج يتناثر منج
والليلة طويلة ومطّاره
هونج هونج
كلش هونج
للشامت يضحك مشواره
وللمامش يضحك مشواره

حسن وصفي - غث بيه 🏴

غث بيه
اريد اعرف طريج الشوگ..
توبني تره ما توب
هم بيه بعد نيه
اريد اندم لحد ما سيرة ال يا حيف...تصعد بذني ترجيه....
بعد بيه بجي شويه....
دير بمنجلك بهداي..
كطعني شتايل دم....
خليني بجفاك احلم..
سواجي كلوب لا مامش سواجي كلوب..
فهمني السواجي طيوف..
علمني اليحب چذاب...
شوفني العشك سرداب.
مر بيه جفن وكبور...
اريد اشتاك للكافور...
عيشني بشهر عاشور..
اي مو كتلك تغثني دغث بيه
والجمني اريد ال اخ تندهني...
دير بكيفك بجرحي ولا تهتم..
صدكني اريد اندم....
كرهني بطواري الشوگ..
حط بيه عشگ مبيوگ
واعدني بشمس تموز كد ما رايد اوعدني..
وأهملني ولا جنك..
صعبه اعليك ما ضنك
وازرع فاتحه بروحي
بعد ما كامله جروحي...
جم دوب الخضار البيه اطشنه لصحارييك..
جم دوب اختل افييك...
شبساع الدموع اطيح لو جابو طوارييك
عليك اجم نبي تغثني
احلفك بل رسم وجهك... فلا تشتاك..
خليني اريد اعرف نوايه جفاك...
مو ذنبك ولا ذنبي
صوج الدنيه ما بيهه ملامح ناس..
اريد اندم مثل ما يندم المنجل
لون كاطعله ورگه ياس..
بلكي الله ولعني ارتاح..
والكالي لهذيج البوب جم مفتاح....
جم رازونه الك بيه ولا تنسد..
جم جربايه متنطره خصر يمتد...
السهر بيه ولا ينعد..
وما اوصيك..كرهني بعد بيه....
توبني تره ما اتوب..
هم بيه بعد نيه....!!!!

احمد الرماحي - يبت الهور 🏴
.
يبت الهور ...
خطابه علی ذاك الطين اجيتج والدليله طيور ...
اجيت بضهري شايل جيل ...
وحايك صايتي من الهيل ...
كالولي ...
ماشافتها تسمع سمع عتبة باب ...
كالو ضهرج يأذيج كدما ساجدة بمحراب ...
كدما ماباجيه علی حسين ...
كالو من يمر عاشور نشتم بالسلف عطاب ...
كالو من تمر نسمة وتحرك زلوف تتحجبين ...
مر برية الغربه ...
تتمكيج عليج هواي كلولي ... بس تتمكيج بتربه ...
يالكردالتج من طين سبحه مزورة بحيدر ...
يالطولج ولا لجحنه المرايات ...
كالو من يمر قرص الوجه تخدر ...
يبت الهيل ...
فاحت ريحة الكهوة وحجي الجمرة ولا يعذر ...
للملاكه الكناطر موش بس للدوس ...
عدها العيد اذا شمت ولف تعبر ...
الربيع شكد حلو بس للشلب تابوت ...
السنابل صفرة خاطف لونها المنجل ...
كلش مو وقار الشيب موتت كاع ...
الليل شكد حلو بس بيه ورد يذبل ...
يبت الماي ...
حجي الغيم يترس واهس العاكول ...
يبنيه النهر بس صيت ...
مايجرم شبر عالراك اذا ماهوس الناعور ...
يحنطه ورايدة مدارة ... بي واهس سلف ناطور ...
كلها دنان ماتترس خلك جوعان ...
وانتي سوالفج مشخاب ...
نسوان السلف تتمكيج بطاريج ... ويشدن علك بالباب ...
يتحنحن لو يطب الغرفتج عصفور ...
امج من تطبلج تلبسين حجاب ...
خدج رايج وبيه يسكر الرمان ...
وتجرح من تبوس جفوفج الوردة ...
وكالولي علی زلفج ماطرب وي ريح ...
ولا بير البكصتج بالحجي تبدة ...
خصرج تارس عيون الكصب حسرات ...
علی شفتج الديرم لكه عويفيته ...
سنبل رمشج يخاوي الفلح والطير ...
ويم جفنج المرود لبس خاجيته ...
يمكن ثامن اعجوبه الكصيبه تصير ...
ودافنشي بكذلتج لو درة يحير ...
عشرة شعرج وي الشال عشرة بردي وي الطين ...
سترج والكصايب هاي ...
حتی ابليس مايندل دربهن وين ...

نائل المظفر - ماكو غابه و لا غرابه 🏴

ماكو غابه
ولا غرابه
والاصناف الي شفتهه حيرتني
شما اگلب بيهه تطلع لو ارانب لو ذيابه
وماكو بالغابه سبع
لا شفت واحد سبع
باوعتله وأبتسملي
ردت اضحك بس بچيت
لن طلع مكسور نابه
ماكو غابه
ولا غرابه
دنيتك اصلاً طلابه
اليفك بابه يطير
ليش واحد للهوه يعرض شبابه
واليسد بابه الف واحد يرصده
عنده حسبه وساد بابه
وكلها اوراق وكتابه
لكن انت تريد تحفظ بابك ومحد يرصده
مسأله كلش بسيطه
لاتفتحه
ولاتسده
ولاتشلعه
ولاترده
شكد خطيه العنده باب
يصير نقمه الباب عنده
لكن الاكثر خطيه
ويستحق نبچي عليه
الباع بابه وخله برده
و موغريبه
كلشي بالدنيه تصادف
رغم فقري
ورغم زغري
وكلشي شايف
وكلهه سهله
ناس ترخص
ناس تغله
ناس تنصه
ناس تعله
شفت جيش بدوله ضاع
وشفت واحد صار دوله
وشفت واحد هو ضاع
وشفت واحد ضيع اهله
وشفت واحد ربه واحد
وشفت واحد ربه ميه
وشفت واحد ربه درهم
وشفت واحد ربه لحيه
وشفت واحد سوه كرسي
وشفت كرسي سوه واحد
وشفت چف زايد اصبع
وشفت چف كلهه زايد
وشفت ميه ابيت كعدوا
وشفت بيت ابحده گاعد
وشفت بيت عيب اكتبه
وشفت بيت ابست قصايد
كلشي شايف
كلشي عايف
مااخاف
لحد يراويني سيفه
ولا يجرده
ولا ينظفه
ولا يصقله
ولا يبرده
لان صدگ من يهده
احسب شچم راس گاطع
ما علي چم مره حده
خلي كل من يحچي قصده
لاتراوغ بالكلام
وياي صير حچايه وحده
انه اعرفهه الي يحبني
ماكو روج تحبه سده
لاتگلي استريح
امبينه كلمة استريح
من تجي ومعناهه طرده
وياك تنغر على واحد
ياجبل لو مهمه تعله
لان بس يصعد عليك
يخلي راسك جوه رجله
وانه گتلك
كل شي شايف
كل شي عايف
مااخاف
انه ابن ذيچ المظايف
انه ابن هاي الصرايف
عمي يا ابن القصور
شبيك ويه اهل الصرايف
يا هضيمه
ويا حسايف
انچفت كل الدلال
وطاحت ضلوع المظايف
عمي كافي لخاطر الله
طفي عودك لا تشعله
احترگت القريه بكبرهه
وانت بالنار اتسله
بس اكلك كلهه سهله
ذلة النمرود
نمله
لو بعوضه
ما علينه
المهم شبعته ذله
المهم شبعته ذله..

مظفر النواب - مامش للرصاص اخبار مشتاگين 🏴


أواكح ..
چنّي . إيد تفوج ..
ومگطوعه أصابعها ..
أشوغ ويه الشمس .. ليفوگ ..
أعاتب گاع ..
مدفون بنباعيها ..
مكتوب ابّلاويها ..
اتحفر بيّه مساحيها ..
وأشمس روحي بالسنبل ..
يجي بروجة شمس ..
يسگي السفن والناس
يسگيها ..
ابوس ايد اللي يسكي الناس ..
ويحمّل تمر ، وسلاح ، ورصاص ..
بشرايعها ..
أبوس إيد اليشيل البرنو الزبنيه ..
بطرگ ثوبه ..
وأبايعها ..
أفه يا گاعنه ؛ الوكحه !! ..
حلاة الليل ، وأهل الليل ..
والنار ..
بمرابعها ..
أفه يا گاعنه ..
السحگتها ..
وانسحگت عليها ..
جيوش يابو جيوش ..
وما بدلت .. طبايعها ..
أفه يا گاع ..
ينبت بيچ للواوي عنب ..
يا طيبه ..
ويعرّس عليچ الذيب !!!..
أمد صبري اعله صبرچ وأحفر سراديب ..
لو صرتي ..
زبل من زود المزبلين ..
لو داروا عليچ سيان طينتهم ..
يحلوه
سنين ..
أگولن گاعي واعرفها ..
أگولن گاعي ..
يتنفّس بريتي ترابها ..
وحبها .. وبصلها .. والشمس .. والطين ..
باعوني عليها ..
وخضّرت عيني بدمعها ..
وماني بايعها ..
وحگ الشطر الأحمر ..
والليالي الغبره ..
يگويعه ..
أموتن وانت حدر العين
تتونسين ..
أفه يا رجال طين عراگنه الطيبين ..
تنسون المراجل !!!
والمراجل بيكم اتسمّت مراجل ..
كلفه يمعودين ..
أگّل للروح تنسيهم ؟؟..
تدنّج راسها
وتسكت ..
حليب البيها ، مانعها ..
كل روح ومراضعها ..
كل إيد وأصابعها …
كل روح وجرحها ،
الجرح ما ينلام ..
يا معودين أهلنه ..
يلحچيكم يالنشامه ..
حزام ..
يا معودين أهلنه ..
الگاع ضيجه من عگبكم ..
ما تسع حچام ..
تنام العين ، چي تعبانه منّي
ومن نفسها
تنام ..
ولك ردّوا …
حنيني ايگعد الميّت ..
وحشتي اتطلّع بليل الشته ..
شمس الربيع ..
أيّام ..
عين الما تشوف أحبابها الحلوين ..
ما هي عين ..
ولا هي تشوف ..
ولا هي بعمه ..
ولا هي تنام ..
( سالوفتنه :
عن فلاح من كل الفلح ..
إخته اسمها ” سعيده ” ..
من هور ” الغموگه ” ..
وبعد سنه اتعرّس ..
والمفارز طوّگت بالليل أخوها ..
وچانوا الحوشيّه والشرطه (1000) ..
والحرّه ما خافت ..
عمرها 17 سنبله ..
صاحت :
يا چبير الهور .. يا ابن الشلب ..
يا حچام .. )..
ردّ الهور :
إسمع يا چبير الشلِب .. يا حچام ..
يا حچام .. يا حچام ..
يا حـ… چـ… ا … م ..
طارت غاگه مكسورة جِنِح بالزور ..
يا حچام .. يا حچام ..
فزّت گبله البرنو ..
لگطها ابساع :
يلوحدچ شريفه ..
وبيّت الضيم بزمرها ..
وخطّن العينين سچة غيظ ..
فوگ الماي ..
دوب الصوت ما ينسمع ..
واتكوفر غضي حچام :
منهو الجاي .. ويّه الماي .. ويّه الشرچي .. يا حچام ؟؟ ..
يمكن عِدو يا حچام ..
يمكن شرطه وتلعب النفس ..
والشرطة لا هي چلاب ..
ولا هي زلام ..
يمكن خاين ايعرف المچامن ..
يعرف العربيد ..
وين ينام ..
ريحة خاين بعرگ الحزب ..
مدفون ،
من اسنين ..
ريحة خاين معودين !! ..
والتاف ..
وشبگ گلبه ..
وزحف حدر الگصب والطين ..
مامش للرصاص أخبار ، مشتاگين ..
يمكن عِدو يا حچام ..
يمكن واوي من واويّة الحِكّام ..
يا حچام .. إسمع گصبه گصبه ..
وبالك تعوف الگصب ..
ليل ” الغموگه ” حزام ..
صاح النوب ، صاح الهور ، كل الهور ، صاح وياه ..
يا هور ” الغموگه ” وگام ..
– يا حچام .. يا حچام .. يا حچام ..
والتاف اعله گلبه ..
وشاوره بحسّه الخشن :
يا گلبي رصْ ظهري ..
الوحيد العارچ بطوله ..
ايتحده ، ومايعرف الموت ..
ولا ينضام ..
تگلط منّي يا گلبي ..
ونبگ حچام ..
والحاجب نسر فارش جناحينه ..
بوكاحه يطير ..
– منهو اهناك ؟؟..
كبرت عينه .. كبرت ،
لمّت الهور .. الگصب ..
الطيور والعگيد .. والخنزير ..
واستاحش وحشة البير ..
( قصتنه بعدهي بأول القصة ..
وراها گرون وشياطين .. )
يا وحشة الوحده يظل عدل ..
والطينته من الطين ..
يا طينة بلدنه .. يا أصل كل طين ..
بيها نعيش .. وبيها نموت ..
وبيها يخضّر من عيونه البربين ..
واليندفن بأرض أهله : عدل .. حي ..
يسمع الحنطه ..
ويحس عروگها بصدره ..
ونشيش الماي ..
والميّت بگاع الغير .. وحده يموت ..
وحده ، لا دمع ، لا ناس ، لا تابوت ..
وحده يموت ..
غريب ويندفن مثل العرج ، بسكوت ..
وردّ الصوت :
يا ابن أمّي حسافه تموت ..
كبرت عينه ، نار الله الوسيعه ..
ولمّت الثوار والعشّاگ ..
( قصتنه اعله حچّام الحذِر بالهور ويمشي الراگ ) ..
صاحت إخته :
لا ياخوي .. لا يازين ..
لا تمشيش راگ الراگ ..
يا ابن الحرّه ،
ما يستوحش التفّاگ ..
يا ابن الحرّه ،
لابد ما تفرخ الگاع .. هذا عراگ ..
هذا عراگنه الموصوف للعميان .. وللميتين ..
وادوه لكل حزن وفراگ ..
يا ابن الحرّه
حُط عينك ولا تغفل ..
غُفَل گبلك حزب وانباگ ..
جسّ ازنادها الواگف ..
وحطّاها اعله گلبه ..
برهدنه ، وبسكوت ..
– يا ابن الحرّه
هذا عراگ ..
حط خدّه اعله خد البرنو الزرگه ..
البنادق والزلم عشّاگ ..
هذا عراگ ..
وفز غرنوگ ..
وتعايطن بالليل البرانو ..
حِده حادي النوگ ..
– آنه اختك …
– ولچ سعده ..
يسعده اشجابچ لموتي ؟؟..
وشبگها .. وعاتباها ..
وريح التفگ اعله صدره ..
و

لنّه صاح الموت ..
بگرينوف ..
ريحه زفره ، ريحة شرطه ، يا حچام .. دگ الشوف ..
– لا يرتاع گلبچ ..
آنه عد عيناچ ..
يا اخت الحزب والثوار .. والطيبين ..
ساعه والتفگ والليل والحوبات متغاوين ..
– يا حچام أخذ حوبتنه يا حمرين ..
ساعه ..
والمراجل إلها ساعه ..
وزخّت بصدره ..
لگيطه من التفگ .. – ويلاه ..
– يا ويلاه .. يا ابن أمي .. عداك الموت ..
يا واگف وكح طرگ الجلد والطين ..
شگولن للتفگ لو ناشدن عنّك ..
شگلهن ؟؟ شعتذر ؟؟
- سعده ..
وغُمَض عينه اعله صبر سنين ..
إحلفيلي بزمرهن ..
عگبي – جدّام العدو – تشيلين راسچ بيّه وتحلفين ..
– إنت تموت !!
يا ابن أمي :
تظل عيونك مفتحات ..
حته لو خذاك الموت ..
خزرها ..
وگام گومة حزب للكلفات ..
يخسه اللي يگلك عن شعبنه يموت ..
ساعه ..
وتضحك الرايات ..
كل خيمه وراها اثبات ..
كل شيلة علم لابد وراها رجال ..
كل ميّت مثل حچام يشيل جبال ..
( وقصتنه :
بعدهي بأول القصة ..
وگع حچام ..
ومات الصبح ..
والتمّت علينه الشرطة .. والحوشيه ..
و” سعيده “
خذوها اميسّره ..
لسجن ” الرفاعي ” ..
وخيّمت ليلة حزن ..
سنتين ) ..
# # #
أگلّچ :
چنّي أسمع ليل ..
يا أم عشره ..
وزمُر زرگه ..
يصِح ردّوا !! ..
وأكحّل عين المچذبين ..
واتنومس ..
وأفرّگ روحي بالملگه ..
يصِح ردّوا !! ..
وأزامط بيهم الله ..
وشرطة الزرگه .. ؟
يصِح ردّ الچبير النوگف ابّابه ..
چثير الهله يا يابه ..
چثير الهله ..
من غبتو ،
التفگ ملهاش خطّابه ..
وأگلكم روحي عثها الليل ..
واختنگت عگبكم بيها عطّابه ..
مضغبره ..
وأچول من الچول ..
وگامت بيها
وحشة ليل وترابه ..
يبريس :
روحي معيوبه عگب موتك ..
وأگولن : عيب أخت بريس ..
جرحنه ..
يواكح صوابه ..
جرحنه من وگع ” شعلان ” ..
ما يوگف عليه ارماد ..
جرحنه چبير ..
ما لمّته ديرة ناس ..
ولا نامت عليه الگاع ..
يبريس :
روحي خلصانه ثلثترباع ..
وما چلّت ..
وأمل بيها بكُثُر ما خضّر البردي ..
وتظل الگاع ..
أمل بيها ..
وأواكح بيها جوع ضباع ..
جرح البينه ، لو بالله ..
كفر ..
واحنه بعدنه وساع ..
يا مفرّع ،
يا راس الهيبه ،
لا تهتم .. وراك سباع ..
ها .. خوتي :
اعله دم بريس ..
عله الكلفات ..
يا شطبين ..
يتغاوه الزمان مغاوه بيكم ..
وانتو زعلانين ..
لو عاطن ..
أگولن : هلله .. هلله ..
صدگت .. يا فلان ..
وبگد المعاتب ، يا عزيز الروح ..
أهلّيلك ..
وأكولن : جيت ..
لو خرخشة گصبة ليل ..
أفزّن ، يا چبير البيت ..
وأگولن :
إي وحگ الله اصدگت ..
مثل الربيع اعله الزرع ..
ردّيت ..
وأهلّي بكثر ما هلّيت ..
يا معافه ..
إجه الفجر اللي ما يخلص ..
ويظل الماي بيّه ايمد ..
ونشوفك ..
تجينه ويه الحصاد ..
اتشوف أهلنه ..
إشعمّروا من المحبة بيوت ..
ويگولولك إحنه نموت !!! ..
وابنك واگف محزّم على الدنيه ،
چبير التوت ..
ويگولولك احنه نموت !!!
هاي بيوتنه ،
وذولاك أهلنه ..
والچواير گطه ..
ودخّان المعامل واصل إلتالي الشلب ..
والشلب ..
ناهبله گصيبه من الشمس ..
گبل الصبح
بسكوت ..
ويگولولك إحنه نموت !!!
هاي الدنيه ،
ما يبنيها غير أهلك ..
وميتنه أرد أگلك :
من تشيله الناس ..
يدير العين للديره ..
ابمحبه ..
وهوّه بالتابوت ..
ويگولولك ، العفنين ، إحنه نموت !!!!!!!!

ياسر فليح - افضحني 🏴

افضحني بعد خاف اني مامفضوح
كلهم رادني بس اني فشلته
تانيني شوكت مافوت كلهم ذاك
كسرت بخاطره ومن راح ماصحته
حقك تفتخر ذليت واحد جان
ذرات الهوا لبلماي عاشكته
عاف لماي راح يدور بصحراء
يعطش كام يشرب ماي من كصته
شحيت بوكت غيرك مزن فوكاي
ضليت استحيلك راسي ماشلته
صرت لجلك نبع صافي يفحل التوث
من فيك فرش صار الورك حصته
تعصر خاطري قطره عتب مطيح
عزت نفسي تقبل ماعليك انت
الباب ليجي من عنده ريح الغي
بس شميت ريحت راسقي وعفته
بس فهمني وين تريد اروح وياك
اذا حب طرف واحد سهله سالفته
المصيوب مايكضي العمر مصيوب
يقبل بلكبر لو تندفن ونته
وانا اقبل تجي وتكلي يبن الناس
ماحركت ساكن بلحجي الكلته
بس المشكله المضموم مامفهوم
بعيونك قريته ومااستوعبته
من كونك صدق متريدني اهتم بيك
ليش اضوج لو طاري الورد جبته
من تلكاني واكف توكف بمكفاي
تتراهن علي لو راسي مادرته
يتفاوت صدودك بين يوم ويوم
مره تصير انت ومره مو انته
حفضتك وليجي ببالك اكلك بي
بحيث اعرف شلون وبلضبط يمته
هاي سوالفك تركت اثر بلروح
والله انا العشك بيد الله سلمته
ياكاس الندم كاسرتك بعمرين
عمري وعمر ثاني وياك ضيعته
شربتك واعترف بلنشوه والمفروض
ماكلك بطعمك بيش كاسرته
كبل جانت حياتي لعيونك تروح
هسة اني ارد اروح وحبي الك شفتة
شفت بعدك راحتي وفرحة وهناي
وبوجودك صدكني الضيم عاشرتة
كلت الخاطر وعد واعدتك اني بيوم
وكلش مستحي وما وعدي انكرته
لان مو طبعي انكر وعد اخذته بيوم
ولا من الخلق ان اكطع الوردة
روح انت بسلامة والله وياك
وصدك ماني رايد ابد هالردة