في مرة كانت الداتا بتاعتي شغاله  يومياً بتنزل فيها 500 ميقابايت وغالباً ما بكمّل ال500 في اليوم.
و كان عندي  مسلسل بحضر فيهو.
أثناء ما الداتا شغالة جاني رصيد في شريحتي التانية حوالي 200 جنية.
لمّا جاني الرصيد الكتير دا، كنتا ببدأ أنزّل المسلسل بي الداتا ولما تنتهي طوالي بفعّل شريحة الرصيد وبقعد أنزّل وتنتهي، وتاااني أفعّل وأنزّل وهكذا والحكاية ماشه.
تقريباً نُص الرصيد العندي خلص وأنا بنزّل في المسلسل.
و كنتا بقعد اليوم الكلو بحضر فيها وبخلي باقي حاجاتي كُلّها و واجباتي وإلتزاماتي.
طبعاً عندي تبريرات ببررا لي نفسي بقول بتعلّم إنجليزي عشان ما أحس بالذنب 😂
المهم قبل موضوع المسلسل دا بي كم يوم كان مرت علي آية الرزق في سورة الشورى  (( وَلَوْ بَسَطَ اللَّهُ الرِّزْقَ لِعِبَادِهِ لَبَغَوْا فِي الْأَرْضِ وَلَٰكِن يُنَزِّلُ بِقَدَرٍ مَّا يَشَاءُ ۚ إِنَّهُ بِعِبَادِهِ خَبِيرٌ بَصِيرٌ))
فكّرتا فيها كم يوم ورا بعض
وبقيت بسأل نفسي بقول :  ما كان ممكن اللَّه عز وجل ينزّل لينا الرزق كتير، لي يعني بقدرٍ معلوم؟
حسيت إني عايزه أفهم الآية أكتر وأتيّقن بيها أكتر.
فلمّا حصل موضوع المسلسل دا إتذكرتا الآية طوالي.
وربطّا بين تصرفي وبين الآية💙
أنا عندي شريحة الداتا اللي هي بتنزل لي فيها الميقابايت بي قدر معلوم وكل يوم كُنتا بنزّل حلقة وبحضر، وباقي اليوم بعمل باقي واجباتي.
أما لمّا بقى عندي الداتا والرصيد الكتير اللي هو رزق كتير بقيت بنفس ما قالت الآية "لَبَغَوْا فِي الْأَرْضِ"
باغية على نفسي،
ما خاته حساب لي زمني أو إلتزاماتي،
ولا لي الرصيد، ولا لي أي شي.
حسيت الآية وقعت لي شديد اللحظة ديك💙
بس لسه كان في سؤال في بالي..
طيب برضو كان  ربّنا سبحانهُ وتعالى ينّزّل لينا رزق كتير مرّه وحده بدل التعب؟
لقيت روحي بجاوب ليها وبقول : لو حصل كده معناها الدنيا حتبقى جنّه.
إذا كل شخص فينا أخد رزق من غير إنقطاع وسعي وتعب معناها فعلاً دي الجنة.
غير إنو لو نزل ليك رزقك كامل مرة وحده  غالباً حيكمل قبل ما نموت ذاتو 😂بي سبب إنو الإنسان كائن إستهلاكي شرِه .
فهي الدُنيا كده دار إبتلاء للفقير والغني.
لي البلقى رزق اليوم ولي البشحد ولي الموظّف حتى الملياردير اللي إحنا بنشوفو أحسن مننا تعبان في الدُنيا عشان يزيد قروشو أو أقلّاها يحافظ عليها ما تنقص.
فيبقى إحنا في دار الإختبار  وبي نفوسنا الضعيفة دي لو الرزق دا بقى ماشي لينا كده.
حنبغي في الأرض، حنظلم أنفسنا قبل الحولنا، حنركلس وحنتكِل على الدُنيا.
أما لمّا الرزق يكون معلوم وربّنا بنزّلو بقدر وبي حكمة وشوية شوية حنتعلّم نصبّر لمّا نفقد ونشكر لمّا يجينا.
والإتنين الصبر والشكر بتمشي بيهم الحياة 💙
فسبحانهُ الحكيمُ الخبير🌸☁️
اللهم أرزقنا دوماً الفهم لآياتك واليقين في حكمتِك💙🌸
#إيلاف_بدرالدين

في دوّامةِ المصاعِب التى أمرُّ بها على المستوى الشخصي وعلى مستوى البلاد..
أكثر ما يُهمّني أن أنظُرَ إلى قلبي آخِر اليوم فأجدَ النور فيه رغم الظلام الدامِس حولي.. والرغبة في الحياةِ على توفُّرِ أسباب الموتِ روحاً وجسداً
أن تبقى المرونةُ رفيقتي والإبتسامة محيا وجهي..
أن أظلَّ مُشبعةً بالإطمئنان رغم الخوف حولي.. مانحةً للحُبِّ لا ينضبُ عندي..
يكفيني أن لا تسقُط روحي وسط الرُكام.. ولا تضيع نفسي بين الزِحام.. ولا يغرق أمَلي في بحرِ اليأس.
وأن تبقى رغبتي في الحياة والسعي لتحقيقِ الأحلامِ مُتّقدةً💖🌸
وهذا كلّهُ لا يُمنحُ إلّا مِنك يا الله.. فلك الحمدُ على ما تمنحنا إيّاهُ مِن صمودٍ في غمرةِ الإبتلائات💗
#إيلاف_بدرالدين

مع فقدك للكثيرين في حياتك موتًا أو سفرًا أو رحولًا بلا استئذان أو استئذانًا بلا وداع!
تغدو أكثر تيقُّنا وإيمانًا بأنّ الدنيا لا يدوم لك فيها حبيبٌ ولا رفيقٌ ولا صديقٌ ولا أهل .. وأكثرَ ثباتًا لتقِف أمام البابِ تلوِّح لهم حتى وإن لم يلتفتو لك ..
ذلك أنّنا في دارٍ أهلُها مرتحلون دومًا، إن لم يكُن في معاشِ الدنيا فإلى ربهم يذهبون.
المكانُ الوحيدُ الذي قد تضمن بقائهم بجانبك فيه هو مقعدُك في الجنّة حيثُ الآخرةُ دارُ القرار ..
اللّهم اجتماعًا في الجنّة مع أحبتنا أجمعين❤️🌸
#إيلاف_بدرالدين

كتير ما بسمع بنات حوليني بقولو "ما بقدر ألبس عباية أو ما بقدر ألبس طرحه كبيرة السخانة او
اللبس الزي دا ما عملي وصعب وغيرها من الجمل اللي تدور حول نفس النقطة"

فجايه أقول ليهم إنه كلامهم صحيح!

للأمانة الحجاب بي نظرة عامة قد يبدو صعب مع الحياة الإحنا عايشنها

طالعين نازلين وراكبين مواصلات، تفاصيل العالم المتمدّن اللي الحريم فيهو جاريات ورا لقمة عيشهم أو إنجازتهم أو قرايتهم، كلها واقعيًا وبي القياسات المادية أنسب ليها البنطلون والبلوزة

لكن ربنا سبحانه وتعالى العالم بكل شي، فرض عليك كمرأة في كل الأزمان والأحوال ترتدي الحجاب الشرعي وتطبّقيهو بشروطه اللي برتضيها الله عز وجل.

كونه الخروج من البيت أصبح فرض على المرأة دا ما معناها تسقط الحجاب الشرعي مقابل ملابس عملية أكتر!

لأنه لو بالمبدأ دا فيبقى الصلاة ما عملية وما جايه ما الحياة الكلّها درش دي لأنها ممكن تقطع لينا شغل أو قراية مستغرقين فيها!


أنا كإيلاف - على الجانب العملي وليس التزكوي- اتعودتا على لبس العبايات في الجامعة، قبل الجامعة ولغاية بداياتا كنتا بلبس عادي بناطلين

بس بعد الجامعة حبيت العبايات واتعودتا عليها بل وصلتا مرحلة حرفنه عديل
أضرب ليكم مثال؟
قبل كم يوم بتاع ركشة كان حيرجع فيني
والحته كانت ضيقة شديد لي إنّي أعدّي
ولابسه عباية الأم جناحات ديك "هي ما عباية درِش ومواصلات لكن أنا اتعودتا"

المهم أنا عملتا حركة كده بسرعة ورفعتا العباية وعديت بي المكان الضيق دا بكل سهولة بدون ما عبايتي تمسك ف الركشة أو أعفصا ولا كده!

وقبل فترة اشتريت إدناءة لأول مرة، ولما لبستها أول يوم ومع شنطة الضهر، لقيتا صعبة وما عملية للدرِش بي سبب أطرافا الواسعة شديد فركنتها شوية كده

لكن لأنّها عاجباني رجعتا لبستها كم مرة وأول أمس أدركتا إنٌها بقت مريحة وعادية وما مضايقاني زي الأول
لكن الحصل شنو!
ياها نفس الإدناءة الواسعة والعباية الواسعة الطويلةلكن الفكرة في التعوّد

يعني غالبًا الجمل اللي ذكرناها أول البوست دي كلها حجج واهية عشان ما تلبسي الحجاب سواء من نفسك الأمّارة بالسوء أو من الشيطان

إضافة لإنه البت في فترة طفولتا ومراهقتا قد تكون ما هُيّأت على إنها تلبس الحجاب ولا أهلها اتكلمو معاها على اعتبار كده كده حتلبسو.. ثم فجأة لما تلقاهو وجب عليها تشوفه صعب!

يعني نستنتج شنو!

"الحجاب سهل لكن إنتي مصعباهو بي حُججك"

مصيرك تتعودي على اللبس الطويل والواسع لو قررتي تطبّقيهو لأنه دا طبع الإنسان بيقدر يتأقلم عادي

سنين طويلة كان الحجاب ثابت وراسخ بل حتى في الغرب كان استايلهم الفساتين الطويلة المنفوشة اللي ممكن يركبو بيها فوق ظهر حصان عادي جدًا

والقصة في النهاية قصّة قلوب..
كلّما اقترب القلب من اللّه صارت الطاعة سهلةً يسيرة، وما إن يبتعد! سيُفتحُ أمامه ألفُ طريقٍ لها ويقول "لا أستطيع"
اللهم أرشدنا لِما ترتضيه❤️
#إيلاف_بدرالدين