«من لم يرض بصحبة نفسه منفردًا، ويأنس بربه ساجدًا وقائمًا ومعتكفًا، فلن يملأ فراغ فؤاده صحبة البشر ولن يزيل وَحشته اجتماعهم»

_د. هبة رءوف عزت.

بسم الله
افتتاح التسجيل في الدفعة الخامسة من برنامج البناء المنهجي

https://forms.gle/CmB3M71H57ya61589

على حِس فرحة الأعراس في وسط أحزان الحروب♥️!

في واحدة من أغاني الدلّوكة الشهيرة في أعراسنا
بنقول فيها

يا "عروسنا" الله أدَّاكِ
تاني ما بتمُرقِي براكِ؛
"عريسك" القيافة معاكِ
عديلة .. عديلة!

كواحدة بتحب فِكرة "القوامة" الغُنيَة دي والبيت ده تحديدًا قاعد جوَّا قلبي كده ده💘..

لطالما خفف عني ثقل الحياة شعور إني في يومٍ ما حا أمشي دروب الحياة دي مع رفيق يهون عليّ خطاي رغم المشقّة
زول يكون مسؤول عني وقيِّم عليّ

ما أكون خايفة في يوم أطلع براي وأجي راجعة براي وأشيل تقيل براي
ما أشيل هم المضايقات أو هم المصاريف أو أي هموم تانية كانت ح تزول تمامًا في وجود "رَجُل"

وزي ما قالت آلاء وجيه:
"أحبُّ معنى اللجوء، الاحتماء، الاستتار، التلحُّف بأحدهم، أن أسير في حِماهُ راغبة مُختارة، غير مقهورةٍ ولا مجبورة، وُجداني مُطمئن أنني أُعوِّل على سند إن مالت الدنيا لا يميل لأنه موثوق.. وإن مَلَّت الدُنيا لا يَمَل لأنه مسؤول، وأنا مسؤوليته.. أحبُّ فكرة أنني مسؤولية أحدهم".

فكرة القوامة ح تظل دومًا وأبدًا فكرة آسرة بالنسبة لَي وشعور أتمناهُ لنفسي ولكل عزيزة عليّ
فيا رب،
ترزقنا بمن يُرضي شعورنا، ويقوم بشؤوننا، ويكرمنا ويكرم أهلنا، ويكون قيّم علينا بكل ما تحمله القوامة من معنى

وأن يُقَال لنا قريبًا ..
يا "عروسنا" الله أدَّاكِ
تاني ما بتمُرقِي براكِ؛
"عريسك" القيافة معاكِ😂♥️

#صفية_مصطفى

لا وقتَ للانهيار
اغرس فسيلتك وأنتَ تبكي🤣💘

العرض خاص لأي زول يجي من البوست ده
تخفيض لأكتر من 50% على كورس
LinkedIn Basics program🔥
أي شي بخص تطبيق لينكدن من لحظة تحميلو على جهازك ولغاية ما تخُش السوق بي رجلك اليمين
ح يتم شرحو في الكورس ده بإذن الله
والجميل والحصري للناس الشبكتهم تعبانة😂
الحلقات حتكون مسجلة ومتوفرة على منصة تلغرام تقدرو ترجعو ليها مرة واتنين وأكتر🥳

الكورس ح يكون بـ 5 بدلًا عن 12🥳

رابط التسجيل: https://bit.ly/3Sfxegl

الواحد كان مخطط إنو حدث زي ده يقعُد ويكتب ليو بي روَاق لكن قدر الله

قبل حوالي تلاتة سنوات كده
حياتي اتغيرت من زولة عندها بلاي لست في التلفون اسمها "غسيل العدة" كلها عبارة عن أغاني
لي واحدة بتنتَظر متين تقيف في حوض العدة عشان تفتح بلاي لست جديد تمامًا اسمو "تسجيلات شيخ أحمد السيد" ..وللهِ الحمد♥️
تسجيل ورا التاني
وسلسلة ورا التانية

الإنسان وجد في تغيير نفسو، وإنشراح في صدرو، وبلاغة في كَلِماتو، واِنتِقَاء عالي على مستوى العلاقات ابتداءً من "بتتابع منو وتقرا لي منو" وانتهاءً بالأصحاب

واسأل أي زول دخل في برنامج #البناء_المنهجي
لو حضر دروس بالعدد منو وما كمَّل دراستو
ح يقول ليك التغيير الملحوظ اللي حسَّا بيهو هو في نفسو

أنا أي زول لقيتو ثابت في عز المِحَن المارّين بيها دي
اكتشفت إنو يا إما علاقتو بالقرآن اتحسَّنت، يا إما داخل في واحد من برامج شيخ أحمد السيد المعرفِيَّة دي وأشهرها البناء المنهجي

زمان قرّونا في المدرسة "طلبُ العِلمِ فريضة على كل مسلم"
وخصوصاً في زمننا ده
لو ما اتعلَّمتا عشان تنفع نفسك وغيرك
فحسبُك بس إنك تتعلم عشان ترفع الجهل عن نفسك وعشان الخَم والسُّواقة الزمن ده بقو يلاقوك في أي ملف!

لو باقي ليك في عُمرَك ساعة بَس
سجّل فيها في البناء المنهجي وما حا تندم

وبالمناسبة
التسجيل بقفل بكرة

وختامًا..
لا وقتَ للانهيار
اغرس فسيلتك وأنتَ تبكي😁♥️ ..

نتلاقى في البناء يا شباب، الرابط في أول تعليق🥳

#البناء_المنهجي
#تجارب_البناء_المنهجي_السودان
#صفية_مصطفى

لَيس شَيئٌ أقرُّ لعِينِ المُؤمِن مِن أنْ يَرىٰ

زَوجَتهُ وَأولادَه مُطِيعينَ لله عزَّ وَجلّ !

_ الإمَام القُرطبِي •|🫀

تقدرو تاخدو خطوة شُجاعة وتعرِّسو بدون ما تعملو عِرس؟!
نحنا عملنا كده♥️!

أكتر من شهر عدَّا وما قادرة اعبِّر أو اكتب عن محطة من أهم محطات حياتي ولحظة اتمنيت ليالي طويلة إنها تجي وربنا يجبر فيها بي خاطري وينوّلني مرادي ويجمعنا على خير!

قبل سنة لما لاقيت محمد، كانت من أول الحاجات اللي اتفقنا عليها إننا عايزين نعرّس بس بدون ما نعمل عرس🤣🔥

لأسباب كتيرة من أهمها إننا كنا طالبين البركة من ربنا في حياتنا ومن أول عتبات البركة دي هي تقليل المهر لأجل تكثير البركة مصداقًا لقول النبي ﷺ "أقلُّهُنَّ مهرًا أكثرُهُنَّ بَرَكة"
"والمهر ما هو بس اللي بتكتب في القسيمة
وإنما كل الترتيبات اللي تسبق الزواج داخلة فيهو" فما كنتَ راغبة فيها
أو في الحقيقة ربّيت نفسي تربية عديل وجاهدتَ شديد عشان أقدر اوصل مرحلة أكون فعلًا لمن أقول إني ما عايزة أعمل عرس أكون مقتنعة بي كده!

زي كل بت كان نفسي اعمل خطوبة وألبس دبلة ويشاركوني الفرح كل البحبّهم
زي كل بت كان نفسي احجز صالة وألبس زفاف وأشوف روحي أحلى عروس وسط صحباتي

وزي كل بت برضو كنتا اكيد ح افرح لو جابو لَي سَد مال يملا عيني قدام أهلي وهدايا تفرّحني ويغلّفوها لَي في أحسن المحلَّات

لكن لأنه ده ما الهدف من الزواج، ولأنه برضو بسبب الوجاهات المجتمعية دي والعادات والتقاليد الكتيرة وما تدّيك الدرب دي هي المخلّية الشباب يخطبو بالسنين وما يخطو خطوة الزواج لأنها صعبة ومُكلّفة ومحتاجة راس مال من العُمر والقروش وغيرو! ..

وهنا محمد كان مُصِر إصرار شديد إننا نكون خير قدوة لي أصحابنا في المجتمعات الطوعية+مجالس النور باعتبار إنها هي اللي جمعتنا
وإنو بي خطوة زي دي مننا الناس ممكن فعلًا تتشجَّع وتاخدها خطوة جادة في تيسير موضوع الزواج ده

دعيت ربنا كتير إنو ييسر لينا خطوة الزواج المُبَارك اللي يرضي ربنا ويرضينا نحنا من بعد رضاهو!

كنتَ حقيقة متخوفة من ردة فعل أهلنا على القرار ده وبرضو ما أنسى إنو الدعاء هنا كان حاضر بقوّة إنو الكُل يكون سعيد بي اجتماعنا وزواجنا أكتر من كونهم منتقدين لفكرة الاكتفاء بي العقد وإلغاء المناسبة
والحمدلله لقينا قبول تام ودعوات طيبة من الجهتين أهلي وأهل محمد♥️
-واختصارًا لي تفاصيل كتيرة قَد أحكيها بصورة منفصلة إن شاء الله في منشورات تانية بحيث يستفيدو منها البنات تحديدًا في إنهم كيف يفرحو بالبسيط والقليل وتكوني جميلة بي المُتاح-
خلوني أقول إنو زواجنا كان عبارة عن:

(عقد في الجامع بي بلح ومهر=5 ألف)♥️!

ومكالمات من اخواتي واخواني يباركو لينا فيها عشان كل زول فينا بعيد عن التاني، ودعوات كثيرة طيّبة مِن أحبابنا وممن لا نعرف، صُداق مسمى بيننا قيمتهُ 5 ألف،
ومجموعة من كتاب حصن المسلم هديتو لرفيقات المجالس اللَّاقيتهم وملأ السرور قلبي!
وبركة رجوناها من الله بدلًا عن زخم العادات والتقاليد وتعقيدات المجتمع،
وإيثارًا للبركة بدلًا عن صالة الأفراح وفستان الزفاف،
واستبدالًا لكل تفصيلة ماديَّة كانت لتكونَ سببًا في تأخير الزواج في الأيام الصعبة دي لأن نلتقي على خير،

فالحمدلله الذي أتمَّ لنا أمرنا، والحمدلله المُنعِم، والحمدلله اللي ملأ قلوبنا بي فرح أنسانا بيهو كل أيام الفقد والتفرُّق والعناء، والحمدلله اللي رزقنا البركة وطيب الشعور، وملا قلبنا بي الرِّضَا.. اللهمّ بارك لنا وبارك علينا واجمع بيننا أبدًا في خير، ما شاء الله لا قُوَّةَ إلا بالله

وختامًا
يا رب كل اتنين ساعيين لي الحلال يا رب تتِم ليهم أمرهم وتجمعهم من بعد شتات وترزقهم البركة♥️

#صفية_مصطفى

البوست مُوَجَّه لكل خرّيجي جامعة السودان ومن يعرِفهم🥳♥️

أنا: صفِيَّة مُصطفى بالاستعانة بي زميلي في بورتسودان شغالين استخراج شهادات لطلَّاب جامعة السودان للعلوم والتكنولوجيا
كل الكليَّات، جميع الأقسام
بسعر يكاد يكون ماف زول شغَّال بيهو عديل🥳
وهذا تسهيلًا مِنَّا لكل زملائنا في الجامعة خصوصًا في أوضاع زي دي، ربنا ييسر علينا وعليكم🌸

إذا لسه ما طلعت شهادتك، أو بتعرف زول من جامعة السودان بسأل عن استخراج الشهادات من بورتسودان، نحنا حاضرين في الخدمة🫡🔥
اتواصلو معانا واتسب على الرقم: ‎+249 92 753 4666 لمعرفة التفاصيل

مجددًا.. حالة موثوقة وحقيقيّة للأسف 💔

نشيّر في أي مكان.. وح أعمل تحديث لحد ما المبلغ يكتمل إن شاء الله
___
اثنين من معارفي في ضائقة مالية ضخمة.

من غير المستبعد انه الموضوع يصل لدرجة السجن  لأي واحد منهم وكمان خارج السودان، وبعد كدا التبعات قاسية جداً ....

عاوزين نسعى بقد الإمكان نجمع ليهم المبلغ كاملاً

المبلغ كامل (3700 دولار) تقريبا، (منها 1200 دولار)  طارئة جدا جدا.

رقم الحساب: 2318236
باِسم: محمد طارق حمزة

تخصنا جدا ♥️ .. شيِّروا وربنا يتقبل ولكم مثله

"أنا واللهِ ما طالِب مال؛
ويكفيني تزوِيجُهُ بما معَهُ من قُرآن"♥️

المأذون لما سألنا من المهر
أبوي قال ليو أنا واللهِ ما طالِب مال؛ ويكفيني تزوِيجُهُ بما معَهُ من قُرآن♥️!

فكتبنا في القسيمة "5 ألف" ..
وده كان صداقي في زواجنا!

أبوي الله يكرمو بتذكرو في زواج أختي الكبيرة، حلف على أهل العريس وخلَّاهم يرجعو بي بوكسي الشيلة زي ما هو ما نزل منو ولا رطل سُكَّر🤣

ولما ود خالتي اتقدم لي أختي الأصغر
أبوي ساقو من يدو دخل بيو غرفتنا نحنا البنات وقال لي اختي افتحي دولابك، لما فتحتو
قال ليو شايف الدولاب ده فاضي ولا ملان؟؟
العريس قال ليو ملان!
أبوي قال ليهو يبقى بتي دي ما دايرة ليها هدوم ونحنا ما معرّسين ليها عشان شيلة وملابس
لو جايينا راجل تشيلا في راسك وتحترمها ادّيناك ليها تَب!

وقَد كان سبحان الله كل زيجات أهل بيتنا بتمشي بي البركة وَبي البسيط تبارك الله والحمدلله!

لما اتقدَّم لَي محمد، كنا بعدها بي فترة بسيطة راقدين مستشفى بي أبوي وكان وقتها تِعب تَعب شديد -دعواتكم ليو بالعافية-
وقتها شيخ أنس ومحمد زوجي وصاحبو جو زارونا في المستشفى

وباعتبار شيخ أنس صاحب محمد، وكذلك هو معلّمنا في "مجالس النور" أبوي مسك يدو وقال ليهو يا شيخ أنس أنا الحمدلله بقيت أحسن لكن لو ربنا اخد امانتو= محمد ولدي ده، لي صفِيَّة بتّي!

ومن وقتها أبوي كان ساعي إننا نتم زواجنا بأبسط شي بس عشان يشوفنا مع بعض، وبقول لينا أنا واللهِ ببقى كويّس لامن اشوفك في بيتك يا بتي!

ورغم صعوبة الأيام دي وثِقلها علينا كلنا إلا إننا قلعنا فيها الفرح من الدنيا عُنوَةً عشان خاطر أبوي وعشان فرحتو بينا

الناس ياخوانَّا بتتزوَّج عشان الحياة مع بعض بتهون، وعشان الهَم التقيل بكون خفيف لمن يشيلو معانا زول تاني فما بالك لما يكون الزول ده زوجك ومنك وفيك!

الزواج لتقليل الهموم ما زيادتها
والعادات والتقاليد اللي بتصّعب أمر الزواج دي ما هي إلا زيادة هَم فوق الهموم

ياما شفنا اتنين عايزين بعض، كان حاجز العادات والتقاليد واقف قدّام سعادتهم واجتماعهم
ياما بنات خلّو الزواج عشان شايفين اللي قدامهم ده ما قادر يجيب ليهم نجوم السما "قبل زواجهم"

ياخوانَّا صدّقوني
البركة بتجي بعد العرس ما قبلو
والفرح بعدو ما قبلو
والخير الكتير بعدو ما قبلو
"كفاية إنكم أخيرًا سوا بعد أيام طويلة فُرَاق ")

كل الصرف اللي حا تصرفوه في زواجكم
لو اتخلّيتو عنو ورضيتو بالبسيط
ربنا ح يباركو ليكم ويديكم ليهو أضعاف بعد تكونو تحت سقف واحد

باركوها بالبسيط صدّقوني بِتتبارك♥️..

يا رب كل اتنين ساعين لي رِضَاك، يا رب ترضى عنهم وترضيهم وتجبر خاطرهم وتجمعهم على خير وتبارك فيهم وتبارك ليهم..♥️

وختامًا
اتذكرو مقولة سيدنا عمر بن الخطاب رضي الله عنه:
"إنما نتزوَّجُ لِيُخرجَ اللهُ من أصلابِنَا، ذُرِّيَةً تعبُدُه"

اللَهمَّ اجعلنا زوجَين يُعَزُّ بهما الإسلام والمسلمين..آمين!♥️

#صفية_مصطفى

__"احتياج الإنسان لأمِهِ لا ينتهي مهما كبر."

ماذا تريد من رمضان ؟
اعرف هذا جيدا وحدده حتى لا تخسر رمضان.
لا تدخل بطموح عال وأهداف بعيدة المنال فتحبط وتهبط عزيمتك وتترك بالكلية.
* ركز:
- أنت لا تريد 60 ختمة مثل الشافعي.
- ولا القرآن كله في ركعة مثل أبي حنيفة.
- ولا القيام من العشاء إلى الفجر.

اجعل أهدافك بسيطة ومركزة، الأهداف اللي فعلها يسير وثوابها عظيم، وانو خيرا في أمورك كلها.

* تريد:
- أداء ركن من أركان الإسلام وفريضة من فرائض الله وهو الصيام، ناويا بذلك عبادة الله وصابرا على مشقة الصوم وبذلك يتحقق فيك [ من صام رمضان إيمانا واحتسابا غفر له ما تقدم من ذنبه ]

- صلاة التراويح كل ليلة مع إمام صلاته ليست بالطويلة مثلا ناويا بذلك عبادة الله وصابرا على تعب القيام وبذلك يتحقق فيك [ من قام رمضان إيمانا واحتسابا غفر له ما تقدم من ذنبه ]، هذا طبعا بعد إصلاح وجبر القصور والخلل في الفرائض الخمسة

- قيام ليلة القدر وإدراك فضل الدعاء فيها، وذلك يكون بالاجتهاد في كل الليالي العشر الأواخر منه.

- ختمة قرآن على الأقل، لا تنو عشر ختمات ثم عندما يمر اليومان الأوليان تحبط وتفتر وتترك، لا يفوتك جزء يوميا، فإن زدت فهو خير، وإن لم تستطع نلت ثواب ختمة في رمضان.

- الصدقة يوميا، خمسة جنيهات فقط يوميا بنية صالحة من كسب حلال، تنال ثواب المتصدقين المنفقين في سبيل الله، لا تقل سأتصدق بمائة جنيه يوميا، ابدأ بس بالخمسة، وإن زدت فهو خير، وإن لم تستطع نلت ثواب الصدقة.

- الدعاء، يوميا قبل الإفطار خمس دقائق فقط، ادع فيها لنفسك ولأهلك وللمسلمين، لا تقل سأدعو من بعد العصر حتى غروب الشمس، ولكن ابدأ بخمس دقائق فإن زدت فهو خير، وإن لم تستطع نلت ثواب دعوة الصائم وقبولها بإذن الله.

- صلة الرحم، ابدأ بمكالمة هاتفية يوميا لقريب من أقربائك تختاره، لا تقل سأزورهم كلهم وأتصل بهم كلهم فتستثقل وتنشغل وتترك، ولكن ابدأ بواحد.

وهكذا في بقية العبادات
ابدأ بما تطيق ثم تزود قدر الاستطاعة، وربك شكور يجزي على العمل القليل الأجر الكثير سبحانه وتعالى.

بلغنا الله وإياكم رمضان وأعتق رقابنا فيه من النار
وكل سنة وأنتم طيبين

كان مرَّة
سمعتا قصة شيخ كان كلما يتسابق مع طُلَّابو كان يسبقهم ويفوز عليهم رغم كِبَر سِنّو
فالطلاب استغربو كيف يا شيخ عمرك كبير كده وكل مرة بتفوتنا!!
فقال ليهم:
"هذه جوارِحُ
حفظناها للهِ في الصِّغَر، فحفظَها لنا في الكِبَر"♥️!

بتكونو شايفين التايم لاين والاستوريز اللي كلها اخبار وفاة سبحان الله وكل يوم نسمع زول من أصحابنا اتوفَّى ليهو زول عزيز وهكذا!
كم زول ربنا قبض روحه قبل رمضان ونحنا الحمدلله الحمدلله ربنا بلّغنا أول ليلة فيهو!

حرب، وجوع، ونزوح، وأحزان تِطَّاقَش، هموم تقيلة عايزين نرميها على عتبة بابو ونقول ليهو يااااااااااااااا رب تفرّجها علينا خلاص ضاقت
دعوات كتيرة شايلِنّها لي ليالي رمضان
دموع كتيرة كتيرة شديد
عايزين نبكيها في سجدات التروايح
وأمنيات داخرِنَّها لي دعوات رمضان

كل ده
كل ده عايز مننا همة عالية، وروح عالية، ويقين قوي شديد في ربنا إنو يخفف عننا ويجبر خواطرنا ويعيننا على الصيام والقيام وصالح الأعمال

لكن قبل ده ياخوانَّا لازم نتذكر
إنو ده شهر طاعات وبِر، أبدًا وإطلاقًا ياخوانَّا ما شهر مسلسلات ورمضان vibes اللي بنشوفا دي وغيرها من المعاصي الما بتشبه المسلمين ولا بتشبهم في رمضان تحديدًا دون غيرو..
﴿ذلِكَ وَمَن يُعَظِّم شَعائِرَ اللَّهِ فَإِنَّها مِن تَقوَى القُلوبِ﴾

ولو عايزين ربنا يدّينا فلازم نقدّم بينَ يديّ دعواتنا دي كلها خير وأعمال صالحة

الحرب دي شالت مننا كتير شديد ياخوانَّا ومَلَت قلوبنا دي خراب واحزان
خلونا نجهّز قلوبنا دي لي رمضان، ونبكي ونتجرّس في أبواب ربنا ونسأله من حنانو يحِن علينا ومن لطفو يلطف بينا ومن كرمو يكرمنا ومن خيرو يوَسِّع علينا

جهّزو دعواتكم لي رمضان، جهّزو قلوبكم لي الختمة والقرآن والتلاوة والتدبر
قيمو الليل بي خشوع، صلوا بي خشوع وادعوا بي ابتهال شديد
عسى ربنا ينظر لي حالنا ونحنا في طاعة يرفع عن السودان الهم البيهو ده ويرجّع لينا وطنَّا الزين

عايزين كل واحد يتخيل إنو بي ذنبو ربنا حا يحرمنا كلنا وبي طاعتو ربنا حا يفرجها علينا كلنا
ويستشعر كده إنو صلاح حال بلدنا دي ما ببقى إلا بي صلاحو هو أول زول!

شِدّو حيلكم ياخوانَّا واحفظو قلوبكم وجوارحكم من المعاصي يمكن ما نحضر رمضان ده ولا الجايي!

يا رب تسلمنا لي رمضان وتسلّمو لينا وتعينَّا فيو على الطاعة وتتقبل مننا
يا رب يكون آخر رمضان ونحنا بعيدين عن بيوتنا يا رب ينعاد علينا ونحنا تامين لامين والسودان بي خير ونحنا بخير، يا رب نحنا وأخواننا المستضعفين في غـ..زة وسائر بلاد المسلمين آمين آمين آمين

كل عام ونحنا بخير♥️..

#صفية_مصطفى

أمس بالليل كنا قاعدين كده ما عارفين نعمل شنو في العشا
بعد شوية كل واحد فينا بقى يقول مقترح لي حاجة خفيفة وسريعة، وإذا بنا بعد دقايق نملا الصينية ما شاء الله والخير باسِط!

أثناء ما طالعة ونازلة في تايم لاين ملان بي تهاني وتبريكات رمضان
كنتا بشوف منشورات لي جدول فيهو أصناف فطور عشا سحور طيلة شهر رمضان، وناس بتشارك في صينيّة وسُفرة فطورها في رمضان وأصناف أشكال ما ليها أول من آخر ما شاء الله!

اتذكرت اخوانا هناك، عرفتوهم؟؟ اللي تم استدراجهم بي مؤونة جايَّاهم وفجأة حصل الحصل!

اتذكرت اخوانا اللي نزـحو معانا من الخرطوم، لكن ما نزلو في بيوت إيجار ولا مع أهلهم وإنما في معسكرات وخِيَام ومدارس!
يا ربي حالهم كيف؟! ..وبفطرو على شنو؟ ..

ياخوانَّا عايزة منكم حاجتين بَس
الأولى تتذكرو إنو الحال الانتو فيو هسي ده أحسن من حال ألف غيركم، تحمدو ربنا عليو صباح ومسا ..

والتانية،
قبل ما ترفع بوست Ramadan vibes، ارفع صحن لي جارك الما عندو حق الفطور
وارفع بوست تبرّعات ماشة لي ناس منتظرين جنيه وجنيهين مني ومنك
ارفع يدّك بالدعاء للبلد ولي اخوانا المسtضعفين في بلاد المسلمين التي نعلم

قبل ما اقفل البوست ده، حابة أقول إنو تُقى صحبتي شغالة إفطارات في معسكر السرايا دنقلا،
اتصدّقو في حسابها ده:
2228653
بي اسم: تقى عبد الوهاب عباس
واتذكرو إنو رمضان ده شهر خير وصدقاتنا فيو مقبولة بإذن الله فما تحرمو نفسكم الأجر، واتذكرو الآية دي:

﴿ها أَنتُم هؤُلاءِ تُدعَونَ لِتُنفِقوا في سَبيلِ اللَّهِ فَمِنكُم مَن يَبخَلُ وَمَن يَبخَل فَإِنَّما يَبخَلُ عَن نَفسِهِ وَاللَّهُ الغَنِيُّ وَأَنتُمُ الفُقَراءُ وَإِن تَتَوَلَّوا يَستَبدِل قَومًا غَيرَكُم ثُمَّ لا يَكونوا أَمثالَكُم﴾

وإذا ما عندك، احتسب أجر الصدقة بي شير للبوست ده وانتا ماشي♥️") ..

#صفية_مصطفى

دائمًا ما يرافق طالب العلم شهور العطاء، لأنه يدرك مقدار ما يحمل في قلبه!💙

لقاءنا الأول مع أسامة عز الدين ومرام الخيرى أسميناهُ "من بين أنيابِ الحرب"
لنرى هذه الزُمرة التي نهلت من عَذب العلوم وأشرفها ، فتعلمت كيف تنتزع من بين أنياب الحرب فرصاً تبثّ من خلالها إضاءات القرآن، تبصر الثغور حيث هي فتسدها، وتتحسس مواطن النقص من حولها لتجعله اكتماﻻً.
يُحدِّثوننا هنا عن الرِحلة، والسِّقاية، وحُلو الثمار وأطيبها..

اترك العالم حولك، ضع سمّاعتك وانضم إلينا.💙

https://t.me/Almajalistv/1794

#لقاءات_النور 3
#إعلام_مجالس_النور
#مجالس_النور

سئل الحسن البصري: ايختصم المرء مع والديه؟
قال: ولا مع أحذيتهما
♥️

أمبارح واقفة في المطبخ، وعايزة اشتغل في البوتجاز قدر ما حاولتَ اخرش الكبريت ما راضية تولّع لَي عشان نوعا كعب
وأشيل وأحاول وما عندي طريقة إني احرَد العشا واعمل اندومي بي البويلر عشان خلاص القصة بقى فيها زوجي قُرة عيني ولازم نرُص صينية تسكِّت الخَشَّامة🤣

وأنا لسه واقفة في مرحلة الكبريت، العود الأول ما زبط والتاني والتالت والعاشر
فَضّيت الكبريتة دي كلها في المسطبة أظني لغاية ما الحمدلله والشكر لله ولّعت معاي بعد قَوَّمت لَي نَفَسَي وزَهّجتني🤣!!

أها في عز الموقف ده سرحتا بي خيالي في كمية الأعواد الخرشتها دي عشان بَس اولّع لي نار!!

وجا في بالي محاولاتنا في جهاد أنفُسنا عشان نواصل في طريق ربنا!
كم عود كبريت خرشناهو في طريقنا ده !!
محاولاتنا في الحجاب
محاولاتنا عشان نحفظ جزء عم وتبارك
محاولاتنا عشان نطلع من بيوتنا بدون نتعطَّر
ومحاولاتنا في غض البصر

اتذكرتا محاولاتي في إني احفظ القرآن وكيف لسه بجاهِد عشان احفظ الآية والآيتين
أول سنة نزلتا مركز تحفيظ
والسنة البعدها مشيت معسكر مقفول
والسنة التالتة بديت حلقات أون لاين
والسنة الرابعة بقيت احفظ براي لما النت قطع
وهكذا
احفظ يوم واقيف شهرين ولسه ما حفظت!
ولغاية ما أموت حا يكون هدفي وأُمنيتي في الحياة دي إني احفظ القرآن واحفّظو لي أولادي بإذن الله

وهكذا ياخوانَّا ..
كل زول فينا عندو عبادة بجاهد نفسو فيها
العايزة تتحَجّب، والعايزة تغض بصرها، والعايزة تخلّي الأغاني والعايزة تبطّل المصافحة

كم عود كبريت خرشناهو في طريقنا ده ؟!
في النهاية
وزي ما إننا حاولنا كتير عشان العود يولّع معانا وما كسرنا الحنك
هوَ السيرُ في طريق الله
زي أعواد الكبريت
ح نحاول مرة واتنين وألف
نخلّص صندوق كبريت وما نكسر الحنك
نجيب البعدو وما نكسر الحنك

يا وصلنا لي مُبتغانا ونجحنا في جهاد نفسنا
يا مُتنا ونحنا بنحاوِل نولّع عود كبريت♥️!

#صفية_مصطفى

لأول مرة أحس نفسي زاهدة في الدنيا دي قدر كده!!

زمان دايمًا بحس إني نفسي أعيش وانبَسِط باللحظة وأسعى لي إني اشتغل شغل كويس اعِز بيو روحي وناس بيتنا
بعد الح.رب والنز.وح الوضع بقى مختلف

بقيت ما بنقنق زي زمان لو لقيت العيش بايت ما جديد
عشان الحمدلله في عيش وغيرنا ما لاقي

ما زعلتا عشان ما عُسنا آبري
لأنه أهلي في الجزيرة ما عندهم كهربا ليهم شهرين وبشربو موية من الزير
الحمدلله نحنا عندنا عصير!!

ما اتجرَّستا من قطعة الكهربا زي رمضان الفات
عشان نحنا قاعدين في بيت وضُل وغيري قاعد في المعسكرات ومظلات الزنكي والحصير

صاح ن.زحنا وطلعنا من بيوتنا، لكن لسه عندنا خيارات ناكل شنو وما ناكل شنو
عندنا تلاجة وموية باردة وسرير ننوم فيهو وملابس نضيفة وحلوة لابسنَّها

المرة دي نحنا فقدنا كتير
بَس كِسبنا أكتر
كِسبنا الرِّضا واليقين واتعلّمنا نكون شاكرين حامدين ونعاين لي الناس التعبانين أكتر مننا
اتعلمنا نكون رحيمين بي غيرنا، واتعلّمنا ندّي اللقمة لي الجيعان ونمد يدنا لي المحتاج ونقيف مع العيَّان ونشوف ليو علاج
اتعلمنا نرفع يدنا بالدعا ونقول يا رب ليك الحمد نحنا كويسين وأهلنا بخير!

صاح قَد ما نكون تامّين لامّين
لكن كويسين ياخوانَّا وأحسن كتير من غيرنا
نحمد ربنا ونشكرو خيرو باسط ويدّو ملانة وعطاياهو علينا ما ليها حَد

يا رب حامدين وشاكرين، يا رب تديم علينا نعمة الأمن والعافية والستر

ما ننسى ياخوانَّا نرفع يدنا لي ربنا بالحمد والشكر
ونمد يدنا لي غيرنا بالصّدقات

وزي ما قلنا قُبَّال كده
تُقى صحبتي شغالة إفطارات يومية في معسكر نازحات دنقلا (معسكر السرايا)
ما تحرمو نفسكم من الأجر، اتصدّقو في حسابها ده:
2228653
بي اسم: تقى عبد الوهاب عباس
وإذا ما عندك، احتسب أجر الصدقة بي شير للبوست ده وانتا ماشي♥️") ..

#صفية_مصطفى