#កម្រងរូបភាព៖ ក្រុម​យុវជន​ចលនា​មាតា​ធម្មជាតិ​ចំនួន ៣​នាក់ រួម​នឹង​យុវជន​សកម្ម​ប្រមាណ ២០​នាក់ ធ្វើ​យុទ្ធនាការ​ដើរ​ជា​ក្បួន​ដាក់​ញត្តិ​ទៅ​ក្រសួង​យុត្តិធម៌ នៅ​រសៀល​ថ្ងៃទី៦ តុលា។ យុវជន​ទាំង​៣​រូប​បាន​ដាក់​ច្រវ៉ាក់​ចាក់​សោរ​ជើង និង​ដៃ​របស់​ខ្លួន ដង្ហែ​ញត្តិ​ទៅ​ក្រសួង​យុត្តិធម៌ ដើម្បី​សុំ​អន្តរាគមន៍​ពី​រដ្ឋមន្ត្រី​ក្រសួង​នេះ ករណី​ព្រះរាជអាជ្ញា​សាលាដំបូង​រាជធានី​ភ្នំពេញ បដិសេធ​សំណើ​ពួកគេ​ចេញ​ទៅ​ក្រៅ​ស៊ុយអែត (Sweden) ដើម្បី​ចូលរួម​ទទួល​ពាន​រង្វាន់​អន្តរជាតិ​ពី​អង្គការ រ៉ៃត៍ ឡាយលីហូដ (Right Livelihood) ដោយ​ផ្ទាល់។
នៅ​រសៀល​ថ្ងៃ​នេះ មេឃ​បាន​បង្អុរ​ភ្លៀង​យ៉ាង​ខ្លាំង ប៉ុន្តែ​ពុំ​បាន​បង្អាក់​ដំណើរ​ពួកគេ​ទៅ​កាន់​ក្រសួង​យុត្តិធម៌​នោះ​ឡើយ។ មន្ត្រី​ក្រសួង​នេះ​ បាន​ព្រម​ទទួល​ញត្តិ​សុំ​អន្តរាគមន៍​របស់​ពួកគេ​ទាំង​តានតឹង ដោយ​ដំបូង​ឡើយ មន្ត្រី​បាន​បដិសេធ​ញត្តិ​នេះ ក្រោម​ហេតុផល​ថា ខ្លឹម​សារ​ញត្តិ​សរសេរ​ពុំ​ត្រូវ​តាម​គោរមងារ។
---
#RFAKhmer #Cambodia #HunManet #ThonRatha #LongKunthea #PhuonKeoRaksmey #BradAdams #ClimateRightsInternational #MotherNatureCambodia #Awards #RightLivelihood #Sweden

#កម្រងរូបភាព៖ អាជ្ញាធរខណ្ឌដូនពេញប្រើអំពើហិង្សាលើ អតីតគរុសិស្ស នៃវិទ្យាស្ថានជាតិអប់រំកាយជាលើកទីពីរ
---
អាជ្ញាធរ​ខណ្ឌដូនពេញ​ក្នុង​ឯកសណ្ឋាន​ស៊ីវិល នៅ​រសៀល​ថ្ងៃទី​៩ ខែតុលា បាន​ចាប់ទាញ រុញច្រាន​អតីត​គរុ​សិស្ស នៃ​វិទ្យាស្ថាន​ជាតិ​អប់រំ​កាយ និង​កីឡា លោក កែវ សុវណ្ណ​ឫទ្ធិ បញ្ចូល​ទៅក្នុង​រថយន្ត ក្នុងពេល​លោក​កំពុង​ឈរ​ស្រែក​តវ៉ា​នៅ​ពីមុខ​ក្រសួង​អប់រំ យុវជន និង​កីឡា លើ​មហាវិថី​ព្រះ​នរោត្តម ដើម្បីឱ្យ​រដ្ឋមន្ត្រីក្រសួង​អប់រំ លោក ហង់ ជួនណា​រ៉ុ​ន ទទួលយក​រូបលោក និង​គរុ​សិស្ស​១១​នាក់​ទៀត ដែល​ត្រូវបាន​វិទ្យាស្ថាន​ជាតិ​អប់រំ​កាយ និង​កីឡា លុបឈ្មោះ​ចេញពី​ក្របខ័ណ្ឌ​ដោយ​អយុត្តិធម៌​។​

​ក្រោយ​រង​អំពើហិង្សា លោក កែវ សុវណ្ណ​ឫទ្ធិ បាន​ប្រាប់​វិទ្យុ​អាស៊ីសេរី​ថា ​អាជ្ញាធរ​ខណ្ឌដូនពេញ​បាន​វាយដំលោក និង​អ្នក​ថតរូប​លោក រហូត​ធ្វើឱ្យ​លោក​រងរបួស និងរ​ហែក​អាវ​។ លោក កែវ សុវណ្ណ​ឫទ្ធិ ខកចិត្ត​លើ​ការប្រើ​អំពើហិង្សា​ពី​សំណាក់​អាជ្ញាធរ​មកលើ​ពលរដ្ឋ​ខ្លួនឯង​ទាំង​គ្មាន​កំហុស​បែបនេះ​។