رضا قاسم پور

🚦شكايتيم وار پُليس‌دن...

1) شكايتيم وار پُليس‌دن/ سالدی منی دای نفسدن/ نه بير خلاف ، نه بيمه م وار/ ميليون ياريم جريمه م وار /
قديم كی بير تنبل شاگيرد/ يوز- يوز جريمه‌نی يازير/ كاغاذی يان- يانا دوزور/ روح و روانيمی جيزير

2) بوگون‌لر بايرام آخشامی/ پوسته بيری مين تومن دی/ فشيديراغين چال افندی/ حُؤكم ائیله ديم ياريم آسدی/ ايلهام لارا قولاق آسدی/ اوغورلوق يوخ، اختیلاسدی/ باخ گؤر نه بير باسا-باسدی!

3) چيراق ساری- چيراق قيرميز/ عقل ايشله‌مير، سيرینسيب/ سويوقدان ديش ديشه دئيب/ قورد‌لار قوزو دونو گئيب/ اوميد ائوی تاختالانيب/ قلبيمده قان لاختالانيب/ آرزيلاريم چيپچالانيب/ يازديم سؤزو پرده-پرده/ عشقيم سوبای، عقليم ارده/ اوجا حاصار، دمير نرده/ ساليب منی يامان درده!

4) سوفراميزدا نفت قوخوسو بوغورمنی/ گاه تورم، گاه باهاليق ، ساغير منی/ جريمه‌نی يازاندا ، بير ، چاغير منی/ تورّومون يئری گؤينور/ گؤزلريمين سويو قئينير/ ساققيز كيمی منی چئينير/ كروانی كؤرپودن كئچه‌ن سنی نئينير؟ منی نئينير؟!

5) اورك ياغی پيريم - پيريم/ كيپريكلريمنن آسلانيب/ دوداقلاريم يئر سوپورور/ مجازی عشقه آللانيب/
آغاج كيمی اويولسامدا / منگنه يه قویولسامدا / ديری - ديری سويولسامدا/ آزادليغا وار هوسيم/ روحوما داردير قفسيم/ ظاليمی دارتار نفسيم

6) هاوا قورشون ، هاوا آغير/ دوربين گينه كيمی ساغير/ بوشَهَردن نيفرت ياغير/ گؤيو آلچاق، كوچه‌لر دار/ حقيقته گؤزون يومار/ قات - قات جهالته جومار/ دان سؤكولوب، گلمه‌دی يار/ سن ده خومار، من ده خومار...

7) فلسفی بير باخيش گره‌ك/ تام حياتی قانماق ايچون/ مريّخه توللانماق ايچون/ زوهره‌ده ايسلانماق ايچون/ قاناد آچير سوتول خيال/ تانری دان آسلانماق ايچون/ جهنمه كؤتوك آتير/ شعله چكيب يانماق ايچون/ آند اولا يوخ وجدانيما/ هئچ دينه قائل دئييلم/ بهشته ساللانماق ايچون !

8) سئوگی دالينجا مَله ديم/ بير يئنی احساس داشيديم/ كهكشانی پيلله‌له ديم/ توپراغی روحدان قاشیديم/ كايناتی سيلكه‌له ديم/ عشقی ياوان دورمه‌له‌ديم/ اؤز كؤلگه‌می گول له له دیم/ پياله‌لر يان- يانادير/ جومعه بازار مئيخانادير
چيراق ساری ، چيراق قيرميز / عقلی بوراخ، عشقی اوتوز/ من تويوغام ، سن ده خوروز/ تاققالا وور روحومو جيز ...

☘🌱☘______

#رضا_قاسمپور ( #یاشار_زنگانلی )
#اسفند_1392

173 views03:18