كثر التشره والعتب يوجع الراس
ومن لايجوز لك لاتعتني له وتوده

وانكان مالك في حياتك مقياس
لاترتجي من الوقت شيً ترده

بلاوي الوقت مالها أنذار وزر حساس
كل شجاعً في بلاويها تنصاه وتحده

وختام الهرج خاطري بلاه الياس
وأنعزالي عن العالم اظن بهده .

ㅤㅤㅤㅤㅤ

الوقت ياصاحبي ف اخوك ماقصر
عطاني من دروس الي ملت راسي

لكن زمان الشقا ومصادمه بكر
ونا احسب معه ماينثني باسي

ياما تحملت لكنه علي كثر
اكتم على ما جرى لين امتلى كاسي

دقيت رقم الصبر لكنه مسكر
حاولت حاولت لين اصبح متواسي

جوي من الوقت والايام متعكر
وان قلت محتاس عز الله محتاسي

دنيا عسى الله يعّدي يومها الاقشر
من ظن فيها الغني يبشّر بالافلاسي

يشرب عناها الشقى ويقوم ماشكر
واليا أقبل الليل دك الراس هوجاسي

نجامل الناس وبعض الناس مافكر
ماحد عليه من احد ياوقتنا القاسي

حتى رفيقك ليا من جيت له كشر
للبعد يا رفقة مانتي على ساسي

لا وحلالاه يا اللي عقله مهكر
سالم من الناس ولايشره على الناسي .

ㅤㅤㅤㅤㅤ

‏صار السهر عاده وانا راعي محل
‏لاقبل ظلامه قلتله العهد قريب .

ㅤㅤㅤㅤㅤ

لاتكدّر من حياتك وتاكلك الحسوف
‏لو يضيق بعينك الارض ويضيق الفضى

‏كافح الايام بالعزم والشدّة تطوف
‏وفكّر بمستبقلك واترك اللي قد مضى

‏صادم الدنيا ولا تطرحك بعض الظروف
‏لو تاطى دون شفّك على جمر الغضى

‏والله ياشهب المقادير ماتعرف تروف
‏ماشيه على البنادم زعل والا رضى .

ㅤㅤㅤㅤㅤ

تبين الخفايا لاحصل مــوقفٍ حساس
مثل ما تبين الشمس من عقب غيبتها

حــداني زماني لين جربت بعض الناس
هل السمعة اللـي مـا تمثل حقيقتها

بـروقٍ تلـــوح ولا لقاء سيلها العساس
لـو رعـودها تثّر عـــلى السـمع لجتها

مظاهر تلامع مثل مـا يلمع الالماس
واذا كبرت الدعوى تجـي دون لمعتها .

ㅤㅤㅤㅤㅤ

‏تحمّلت واجد مير ماني سفينة نوح
‏من يعز نفسه لا يحثرب مشاربها

‏ماعاد الخطا وارد ولا فيه أحد مسموح
‏تراني على أدنى شي صاير أخربها .

ㅤㅤㅤㅤㅤ

شاكي الفقد لو تدري بما بي بكيت
بعض الاشياء الخفيه منت تدري بها

غايتي وامنيات القلب واللي هويت
كل ما جيت أبسلىٰ ذكروني , بها

يحسبون اني من اللي حصل نسيت
مادروا ان عاد دمع العين تصخي بها

من غياب اللي غيابه وفقده مميت
عقبه ضلوع صدري عاويٍ ذيبها .