#البارت الثالث
#وحوش بشريه

النذّرتلهم سنينك عيشوك بَلايه واهس والي صرتلّهم بحر ماصارو بجرفك نوارس."💙
سمعت صوت الصياح مال بيبي نوريه ..
وهي ترزل بخالو احسان وتغلط علي 
هاي شوكت تخلص السالفه
فتحت الباب وطلعت شفتهم ملتمين وبيبي لاعبه لعب صح مره جبيره وحجيه بس بيهه حيل مال عشر نسوان..
الحجيه: ولك احسان تبقه طول عمرك اعوج لابارك الله بيك وبهاي الخلقه
دومك مفشلني ومطلعني من طوري شدكول علينه الوادم ولك ابن الشيخ ياخذ فلوس بالفايض ويشتغل بالربا...
اموتك مصرفك لوجهالك ابو النسوان مخلصهه عربده...
احسان: يمه بس انطيني مجال احجي دخلت بمشروع وخسرت وصار الي صار ليش تلوميني...
الحجيه: امشي اطلع برا لا انعل الموتى بكبورهم عبن خلفوا خلفه عايبه مثلك
ياعيب عليك ولك ماتستحي اخوتك يركضون وراك يوميه بايعين من حلالهم علمود مايتفشلون من وراك ..
ولك شيوخ ينحلف براسهم وانت تجيب بالفلوس الي من الفايض
امشي اطلع برا لا اخلي الشيخ سلمان يتبرى منك ليوم الدين
اشرت بيدهه وكالت طلعوا من كدامي وفلس واحد ما ادفعوله خلو يحير بزمانه والي اسمع واحد دافعله دينار ما ارضى علي ...
طلعوا خوالي واني رحت على بيبي شفتهه كوه تاخذ النفس ..
ركضت نوال مره خالي نعمان جابتلهه مي
وضلينه نهدي بيهه وهي تحجي على خالي احسان دومه متعبهه...
رجعت لكتابي اقره عندي امتحان انكليزي الظاهر مامكتوبلي اقره امتحاني..
هالمره صوت خالي الجبير سلمان جان اعلى..
ضليت واكفه بلباب واسمع صوته يحجي بقهر
الشيخ سلمان:  يمه ابنج  السبع دنك راسي بالديوان..
شيخ سلمان ابن الحجي ظاهر كلهه تحلف براسنه تالي ابنج الصكط يخليني بهيج موقف..
الحجيه: ولك يمه والله تعبت شسويله من يومه طايح حظه
سلمان: يمه كاعد بفصل واحجي والزلم تسمعني وجان واحد يطب لديوان يكلي شيخ سلمان اريد فلوسي منك اخوك احسان اخذ مني مبلغ هلكد وكال انطيك علي فوائد وهاي صار 8  اشهر لا الفلوس والفوائد ..
ياشيخ انت الي الناس تقدرك وتحل مشاكلهم اني اريد حكي منك..
يمه مااعرف شحجي ضليت لا اخذ ولا انطي كدام ناس عليهه العتب هذا العار يفشلني
الحجيه: يمه والله ماعاد عندي حيل وبيعنه كل حلالنه ضل بس هالبستان شلون ابيعه وهو ورث عمامك وعماتك هم
انبيع حلالهم حتى نفك فلوس الملعون
طيح الله حظه حرامات التعب بي خلانه علج بحلوك القريه واذا سمعت علاهن ننفضح بعد اكثر...طبيت للغرفه واخذت كتابي وصعدت على السطح اقره لان هاي السالفه مطوله
خالو احسان الصغير ومامتزوج ويجيب بهالفلوس ومدري وين يوديهن وخطيه خوالي يفكون ورا ومايلحكون..
فرشت فراش وكعدت اقره مدنكه وما حسيت غير طابوكه صغيره اجت براسي..
لزمت راسي وصحت ااخ هذا يا ابن الكلب شمرهه..
اخذتهه وكمت خليت شال على راسي منين اجتني احنه بيتنه بنص البستان وماكو داير مدايرنه بيوت..
شمرتهه ورجعت اكتب واحك بمكان الضربه..
دقايق واجتني الطابوكه الثانيه هالمره جانت اقوى..
صحت هذا يانعال يشمرني هم دورت ماكو
ضليت كلساع اقره سطر وارجع اباوع
التهيت احل بالتمارين وهالمره لا موطابوكه
صول مال دعابل هذا الحليبي..
حسيته وصل للمخيخ..
كمت افتر جني خبله وادور على السطح شفت رجلين ورا الباب تقربت شفته ابن خالي نعمان حمودي
سنونه مشلعه وخلص عمره منشول وخشمه يجري عبالك بوري ...
وشعره عكش عمره 10 سنه الله مايشيله يوميه عركه..
لزمته من فانيلته وجريته لسطح نزعتله النعال وكعتله دك على ظهره وهو يدفع بيه ويكلي امشي العميه العورا..
صح عمره صغير بس وكح جرني من شعري ووكعني بالكاع وكام يضرب بيه بوكسيات..
انكلب عليه جون سينا امد ايدي اريد اكفشه من كرافيصه..
وهو مدري منين متعلم فنون القتال..
يكتل بيه ويكلي انتي تضربيني اليوم الا اربيج من جديد..
ولك نعال عوفني..
انجلبت الا اسولف لخالي عليك
وهو يكلي تخوفيني بخالج السطل ..
اليوم انتي وخالج اخبزج خبز ..
كمت اصيح ولكم الحكولي خلصوني من هذا المجلوب يكتل بيه ويصرف بخشمه...
فوكاهه يكول على الشيخ سطل
سمعت صوت صاح بي ولك حمودي راح اجي اشمرك من السطح كوم بسرعه لا اجي ابتلي بيك ..
هو بسرعه كام من يمي ويعدل بهدومه ويكول هاي يحتاجلهه تربيه...
باوعت شفته ابن خالي سلمان الجبير رافد جره من اذنه ويرزل بي وكاله اذا شفتك مديت ايدك على وحده من البنات اكسرهه واعلكهه بركبتك..
نزل يركض على الدرج وسمعت الطبه يمكن وكع حيل بابو زايد..
كمت نفضت ملابسي واخذت كتبي كتله رافد وكعلي دك بالطابوك واني اقره..
رافد:وانتي شصعدج هنا؟؟
شمه:وين اروح اقره والبيت هوسه بيبي عصبيه كلت اصعد هنا..
رافد:نزلي جوا اقري الجو برد وراح تغرب الدنيا..
نزلت ليجوا ضميت كتبي بالجنطه وطلعت للمطبخ بيتنه مايفرغ 24 ساعه تهوش الوادم..هذا بيت جدو  ظاهر الله يرحمه من البيوت الجبيره صاير بوسط البستان وداير مدايره نخل واشجار فواكه وعلى بعد امتار قليله بيت خالو الشيخ سلمان
بيبي مكينه مال تفريخ عدهه 3 ولد و2 ماتو بحرب ايران
وعدهه 6 بنات من يجن نصير معركه غير الجه

ال وبناتهن المتزوجات..
بس هاي اللمه ماالهه مثيل روح الاخوه والتفاهم والحنيه الي بيناتهم تخبل..
عكس عمامي الي علاهن مفرقتهم وزارعه الحقد والغل بكلوبهم
واكفه مرت خالو نعمان تسوي عشا وصاحت بيبي ولج شمه يغمه وين وليتي؟؟
رحت اركض عليهه كتلهه هابيبي...
الحجيه: وعلا وطاك ارحى مو اصيح عندج طرش..
شمه: ماسمعت بيبي هوسه الجهال بالمطبخ..
الحجيه: روحي يمه لبيت خالج سلمان جيبيلي طاسه روبه منهم ..رحت اركض مثل البيبيب ..
خففت شويه كلت هسه اني شكو اركض خلي امشي بهداوه على كولت كاظم الساهر..
كمت امشي واشتم بالهوا العذب وهوا خفيف احسه يتخلل بمسامات وجهي...
وصلت لبيت خالي اخذت الروبه وطلعت واني امشي بهداوه..
ما شفت الي كدامي عثرت ووكعت وطارت طاسه الروبه ..
كمت اتلفت خاف واحد شافني ..
ثول اي والله تنلام بيه بيبي من دكول غمه..
هسه لا اكدر ارجع لبيت خالي فشله شيكولون شكبرهه ووكعت..
واذا رحت لبيبي اطيح حظي ..
بعد مشاورات عميقه وي نفسي كلت خلي ارجع اكل لخاله سعاد وكعت وراحت الروبه..
رجعت واني مستحيه وبيدي  الطاسه فارغه بس اثر الروبه بيهه..
لكيتهه بالمطبخ كتلهه خاله وكعت الروبه من ايدي بس كوه حابسه دموعي من الفشله..
ضحكت يايمه خوما تعورتي تعالي اصبلج غيرهه
صبتلي وصاحت رافد وليدي كوم وصل بنت عمتك شمه...
طلع رافد كال هن خطوتين تخاف شمه السانهه رشاشه محد يلحك بي..
باوعتله صفح كتله لا  منين اخاف ..
رافد: امشي كدامي الله جابج بلوه..
مشيت كدامه وهو يمشي وراي وصلت لنفس المكان الي وكعت بي والروبه مطشره..
رافد: هاي شنو ولج بسلا وكعتي؟؟
فد استحيت.. ماحجيت شي..
رافد: اكول بالعه لسانج ثاري مسويتلج مكسوره.
من كون ثول الي يشوفج بالك عنهه وهي رجليهه ماتندلهن
اخذني للبيت وهو يصنف عليه ويضحك..
رافد جبير خلص سادس اعدادي ومعدله قليل وماقدم كليه
يشتغل وي ابو بس هو حلو ونص بنات القريه يركضن ورا وهو شايف نفسه مرات احس نظراته غريبه بس اغلس وما اهتم
..
الايام تركض ركض مرت سنتين واني على نفس حياتي صرت صف ثالث متوسط وصارت الملامح الانثويه اكثر ووضوح 
بيوم صادفت جمعه واليوم اروح لعلاهن
بدلت ورحت سلمت عليهه ورحت لبيت عمي حسين واكفه اسماء رحت فززتهه خطيه خلت اديهه على كلبه كالت ولج ماتجوزين شكبرج صرتي عابت لهالخلقه
اجت عمه فضه سلمت عليهه ذبيت حجابي وكمت اشتغل ونسولف ونضحك
كل جمعه عمه فضه تكلب البيت تنظيف من فوك ليجوه كل وحده تلزم شغله اني جانت حصتي امسح المعرض
وبي تحفيات زغار يكسرن الظهر ساعه اكعد امسح بيهن
تالي تعبت من الوكفه نزلتهن وكعدت بالكاع امسح بيهن وحده وحده
اني شعري لحد ظهري ومسويته ذيل حصان ماخذه راحتي لان قيصر وضرغام ابغداد يم خوالهم اصلا مايجون صدفه..
كاعده امسح وادندن واغني بغنيه قديمه مال نجوى كرم
خيروني بأبن العم خيروني أبن الخال
مسلطنه وي الاغنيه واني صوتي حلوسمعت صوت حركه وراي بس ما اهتميت مستمره اغني
التفتت انصدمت كمت عدلت ملابسي وادور على حجابي شكد عيب قيصر واكف ويباوعلي
ابد ما اختلط بي ولا احاجي
حجيت بخجل من يمته انت هنا؟؟
قيصر:  من خيروج بابن العم صايرلج السان شمه وكبرانه شبسرعه صرتي هالكبرج  ولج ذاك اليوم عضج الجلب
خجلت من كلامه سويت نفسي مامهتمه
شمه: طبعا اكبر اكو واحد يبقى على حاله مثل ما انت كبرت حضرت الدكتور وصاير عملاق اني هم كبرت
شفته ابتسم بس ياربي ابتسامته تسحر
عافني وطلع ضليت فاهيه علي شلون حلو ابن اللذين مال كرط
لابس تشيرت اسود والشعر اويلي يخبل
مشاعري جياشه بهاي الفتره وخاصه مراهقه ما اعرف شريد بس الشاغل بالي قيصر
كلما اشوفه اكتشف شي جديد بي
صاير اضخم بعد وكبران
من يومه هو هيج اتذكر من كتل محسن عمره 16 وماكدروله 
وهسه يداوم بغداد صاير كيكه ام الفستق
كملت تنظيف وبالي صار بهذا الكيكه شوكت جاي شو ماكالت اسماء اخذت الوصله اريد اغسلههه واشرهه كملت تنظيف
لكيت اسماء واكفه يم السنك ورحت كرصتهه من زندهه صاحت ااخ
شمه: ولج زماله شو ماكلتي قيصر هنا؟؟
اسماء: وليش اكلج شنو مستحيه ست شمه الي يشوفج يخاف على نفسه
شمه: ولج اني اعلمج شكالولج عليه عود هاي انتي بنت عمي شيالت همي وهيج تحجين ما اعتب على علاهن
اسماء: يمه قهرتيني شلون تمسكنتي.. والله لوتسمعج علاهن تعلكج فلقه
شمه: شوفي عشره مثل علاهن ماتكدرلي اني شمه
على سن ورمح( واسوي بعضلاتي وانفخ بيهن)
فززنه صوت ضرغام: اي ست شمه تنلام علاهن من دكول ولكم هاي غمه محد يكدرلهه وين راحت عنج جان كسرت العصا عليج
يمه اني التفتت واشوفلك ضرغام وقيصر واكفين والظاهر سمعوا حديثنه كله
سويت نفسي مامهتمه لوجوده كتله
ماتخوفني علاهن مدامني مامسويه غلط شحدهه توصلي
قيصر: يولي ادري عندج السان لو رشاشه من شفتج لسه ماسكتي شو تعالي كليلي بيا صف صرتي
جر الكرسي وكعد واني واكفه يم السنك
شمه: بالثالث وبعد شهرين واصير بالرابع
قيصر: شمدريج راح تصيرين بالرابع اني الي ادري بي انتي كسلانه شوكت صرتي شاطره
اسماء: لاقيصر بعدهه كسلانه يوميه

ام الاحياء توكفهه قصاص ودكلهه ليش ماتقرين
دكلهه والله ست اني اقره بس وقت الامتحان لان ذكيه
ويوميه الكاهه جامعه البنات ودكلهن ابن عمي دكتور وهو يقريني
الله يطيح حضج يا اسماء فضحتني
لا اكدر اغمزلهه ولا اسكتهه بقيت بالعه لساني وساكتهقيصر: ضحك ..عاد كد كلامهه تنجح بلامتحان لا؟؟
اسماء: منيلهه البارحه انطونه اوراق الرياضيات ماخذه 32 وفوكاهه لكيتهه واكفه يم السبوره ومحتجه تريد تعترض وهي حته السبعه كاتبتهه بالعكس
ها وتدري ذاك اليوم اجت المديره للصف وصاحت باسماء الطالبات الي مستواهن ضعيف وهي اول وحده صاحوا اسمهه واكلت المديره بكشورهه
دكولهه ماما انتي مستواج ضعيف دكولهه شنو ضعيف انتوا شادين ويايه
وتالي المديره طلعت وكالت خلي يجي ولي امرج باجر
شمه: ولج لاتجذبين اني جنت مجاوبه وهي حقيره ورسبتني اشو نهديتي اسماء افندي شنو شفتي اخوج وصرتي سباعيه مخلصه عمرج خاتله وراي
قيصر: ولج شمه شنو هالسان الطويل
منو راح وراج من دزو على ولي امرج
اسماء: محد اجه قشمرت وسام وراح للمديره كالهه الوالد ماموجود
هاي الكدامك بيهه كل البلا عشيره مايكدرولهه
شمه: اسماء افندي نسيتي نفسج وانهديتي شفتي اخوج الدكتور مو
اصبريلي يا اسماء
قيصر: خلي اكوم اطلع وشمه السانج طويل كصري شويه حبابه وصيري شاطره هذا الاسبوع هنا ابقى وراح امر عليجن واشوف درجاتجن
عافنه وطلع واني هديت على اسماء الي خلال ربع ساعه زاعت كل سوالفي كمت اعض بيهه وهي تصيح يمه الحكيلي انهد الجلب مالتنه
ياناس ياعالم وين رحتوا الجلب البوليسي الي عدنه انهد انقذوني
اجت عمه فكتنه تدري بينه كلساع نتعارك لان نفس العمر
ماضليت يمهم بعد الفشله من قيصر شوي ورجعت لبيتنه بيومهه فد ضجت ليش اني هيج كسلانه وهم كلهم شطار
ضليت كاعده واكلب بدفاتري وضايجه
ماحسيت غير على صوت شهد بنت خالي سلمان اكبر مني بسنه ومادارسه لحد الثاني متوسط وبطلوهه
خالي سلمان متزوج سعاد ام رافد والبنات واتزوج عليهه وحده بنت صديقه وخلف منهه بس شهد وبالولاده وماتت وضلت شهد عند سعاد
شهد: شبي الحلو ضايج؟؟
شمه: مابيه شي
شهد: عليه هاي السوالف شو رجعتي من وقت مو كل جمعه تضلين يم بيت عمج
شمه: ولج شهد اليوم قيصر جاي وشلون صرت بمواقف بايخه كدامه واستحيت
شهد: شكو ولج احجيلي؟؟
شمه: سولفتلهه الصار وهي تضحك عليه
ضربتهه بلكتاب على راسهه
شهد: والله ياشمه هذا قيصر محد يشوفه ومن اسمه البنات حابته تدري ذاك اليوم رحت لبيت جدي وبنات خالي يكولن هنيالج تشوفين قيصر
هن مايدرن يمنه وماشايفته
بس تدرين كلهم حلوين خوب هذا ضرغام يمه يموت جاعلته زوجي
شمه: خلي يطير شايف نفسه عود اني طبيب وانتي ولج شنو جاعلته زوجي شو ماتستحينشمه: خلي يطير شايف نفسه عود اني طبيب وانتي ولج شنو جاعلته زوجي شو ماتستحين
شهد: طبعا يشوف نفسه شوفي القريه اعلى واحد بيهه معلم وهو واخو الوحيدين درسوا وكله بغداد 
تلكينه حته يحب وحده بغداديه مثل ابو
كدامه اشكال والوان يجي على قريتنه الي مابيهن وحده دارسه
شمه: من كالت يحب وحده مدري شصار بيه ..
ولج منو تحبه هذا حته ضحكه مايضحك واذا كلش يبتسم
بس هو من زمان هيج من جنه زغار هو طبعه هيج
حته اخاف منه اتذكر جان يكتل اخوانه اذا سوو غلط واني من اشوفه هيج اكول همزين ماعندي اخ
شهد : صدك ذكرتيني باجر يجن شروق ورونق
شمه: هله بيهن
الاء: شبيج مافرحانه بجيه اخواتج
شمه: كمت وكفت على حيلي كتلهه شهد اسكتي رحمه لشيخ ظاهر يا اخوات تحجين عليهن صار سنه ونص ضبط ماشايفتهن حته نسيت اشكالهن اكو وحده منهن كالت خلي اسأل على اختي شلونهه
لو امي الي عافتني واختارت راحتهه وتزوجت وخلفت وكلما تجي اني بالمدرسه حته ماتحاول تنتظرني
لوتريد صدك تشوفني جان انتظرتني
لو ابوي الي من عمري 9 سنين بعد ماشفنه وجهه
منو سائل عليه خلفله على عمي وخالي محتويني
بوقتهه انفعلت حيل عفتهه وطلعت برا للحديقه الي ورا البيت ماحسيت غير دموعي بدت توكع وامسحهن بسرعه ما اريد واحد يشوفني ابجي اتصنع القوه
اخذت طابوكه وكعدت عليهه وخليت راسي بين رجليه سمعت صوت رافد
شسوين هنا شمه؟؟؟
#يتتبع

#البارت الرابع
#وحوش بشريه

وقد تبكي لأسباب أخرى لا علاقة لها بالفقدان أو الخيبات والخذلان؛ تبكي ليس لأن قلبك يوجعك، بل لأن الأفكار في رأسك لا تتوقف؛ لأنك تفكر في كل شئ ولأنك تعبت من التفكير.
....
اخذت طابوكه وكعدت عليهه وخليت راسي بين رجليه سمعت صوت رافد
شسوين هنا شمه؟؟؟
شمه: ما اسوي شي مايصير واحد يكعد ويه نفسه لو الا اكو شي
رافد: ياستار ياربي ادري كلاشنكوف ولج ماتبطلين هذا السان الي يمطر مطر
شمه: رافد عوفني وحدي الله يخليك مابيه حيل اسولف
اجه كعد مسافه قصيره عني
رافد: ما اعوفج اذا ماتحجيلي شبيج وليش باجيه هاي عيونج حمر
شمه: هسه اذا كتلك ليش بجيت شراح تسوي
رافد: ولج احركه حرك الي مجبيج شكم غمه عدنه على كولت الحجيه نوريه
شمه: باجر اريد اجي يمكم ابات
رافد: هلا بيج شو تستأذنين هو انتي كلساع رايحه جايه
شمه: باجر اخواتي يجن واكيد تجي امي وما اريد اشوف احد منهن
رافد: ليش ما مشتاقتلهن صار هواي ما جايات
شمه: هاي انت كلتهه صار هواي ماجايات لا فد يوم سألن عليه ولا حاولن حته يسمعن صوتي وامي عبالك بنت ضرتهه راحت تزوجت وعافتني وابوي الي مدري وين الله اخذه
رافد: لاتحجين هيج شمه من يوم الي تزوجت امج انتي صرتي بنيتنه واحنه اهلج
امج قررت تشوف حياتهه وهذا من حقهه
صح احنه شيوخ وزحمه تطلك بنت الشيخ
بس هم زحمه تبقى وي واحد يوميه عابر على بنات العالم ويزني بيهن اعتقد كبرتي وصرتي تعرفين الحلال من الحرام وصعبه على امج تنذل وابوج ماخله درب حرام مامشه بيه
صدكي شمه لو ما ابن خالهه الي خطبهه جان مازوجوهه ولو رافضه محد يجبرهه بس هي اختارت حياتهه بعد مانكدر نمنعهه حته حرام
وهي مأمنه عليج بيناتنه
شمه: لا ادافعلهه لان عمتك اني ما احبهم كلهم
رافد: كومي ولج زعطوطه هسه تاكدت انتي بس لسان فارغه كومي طبي جوه لا املص هاي اذاناتج
شمه: مو تايهتلك استاذ رافد جرب وشوف الا اخلي.........
بعد مامكمله جملتي لزمني من اذني ولواهه حيل
لزمت ايده كتله لا رافد عوفني توجع شبيك
رافد: السانج كلش طويل والي يوم يطفح الكيل
شمه: دعوفني شلعت اذني
رخه ايده ونزلهه ما باوعتله لان كوه حابسه الدمعه بسرعه ركضت ليجوه بوجهي لغرفتي الدنيا طالعه من عيني
احساسي صعب حيل حالي حال اليتيم لا ام لا اب لا اخوات
مرات احتاج امي تنصحني اشكيلهه وتسمعني
احتاج اخت تشاقه وياي واسولفلهه عن يومي
من اشوف مرت عمي حسين اموت من القهر
موغيره ولا حسد بس ليش امي فرطت بيه وهاي امهم شكد عذبتهه علاهن وضلت متمسكه دكول جهالي يضيعون
هذا اليوم مدري شلون خلص حته ماطلعت ولاشفت رافد بعد
مرات احس نظرات رافد غريبه وشكد يدافعلي هو اكبر مني عمره 20 سنه بس متعوده عليهم وحاسبتهم اخواني الكبار
ثاني يوم كعدت من وقت حته اروح لبيت عمي ما اريد اشوف اخواتي ولا امي
بدلت وطلعت بدون ريوك اول ما وصلت لكيت عمه فضه تسوي ريوك وعمي حسين طالع
شمه:صباح الخير عمه
ام قيصر: صباح النور شمه الحلوه
شعجب اليوم من الصبح اجيتي
شمه: اليوم امي واخواتي يجن وما اريد اشوفهن
ام قيصر: ليش يمه اكو وحده ماتريد امهه
شمه: اي اني ما اريدهه صار سنه ماشايفتهه ولاتسال عليه وذاك اليوم خابرتهه من موبايل مرت خالي نعمان بس كتلهه هلو ماما شلونج
كالت شمه يمي خطار بعدين اخابرج
وهذاك يوم وهذا يوم مادكت ولا كالت شتريد
ام قيصر: يجوز جان عدهه ظرف لا تاخذين موقف على امج بدون ما تسمعين منهه هاي الام جنه ماتتعوض
شمه: عمه خليني اليوم يمكم ما اريد اروح
ام قيصر: البيت بيتج يمه شوكت ماتجين هلا بيج كومي كعدي هذي التنبل خلي تتريك
صعدت فوك وسويت مداهمه على غرفه اسماء اول مادست على رجل اسماء خليتهه تعيط
نزلت جوه لكيت الكل كاعد حته ضرغام بس قيصر ماكو
بدينه نتريك واباوع على لمتهم شكد حلوه الله يحفظهم ياربي لاتجعلني من الحاسدين
شكد اتمنى اكعد بنص عائلتي واضحك واتشاقه
حته البنات بالمدرسه يسألني على امي وما اعرف شجاوبهن
خلصنه وكمنه نعزل بلبيت اني بالمضيف انظف بي واشوف واحد واكف برا يخابر منطيني ظهرهه عرفته قيصر ضليت اتمعن بي
لابس بجامه سوده وبدي اسود ربع ردن
هذا بيمن يخابر بسلا عنده وحده؟؟
صخام الصخمني..
واني شعليه عنده ماعنده هو هذا الجمال كله وماعنده من حلوات بغداد
شفته كمل وطب للبيت
كملت تنظيف المضيف واسمع صوت ضرغام يصيح شمه شمه
طلعت للهول لكيت قيصر كاعد وامه واسماء
كتله هاضرغام صحتني؟؟
ضرغام: امج واخواتج جايات وتلكاني ابن خالج نوفل جاي علينه الحجيه دازته يجي ياخذج
شمه: ما اروح وروح كللهم ماتجي
ضرغام: ليش ولج اخواتج جايات من المدينه
شمه: ما اروح ولا اريد اشوفهم
فززني صوت قيصر من اسمع صوته كلبي يكوم يركض
قيصر: ليش متعاركه وياهن لو عندج سبب ثاني؟؟
شمه: لا ما متعاركه بس ما يعجبني اشوفهن واصلا مامشتاقتلهن
قيصر: لاشمه ميصير امج واخواتج جايات من طريق بعيد وانتي دكولين هيج
بعدني ماحجيت كالت ام قيصر عووفوهه يمه براحتهه
التفتت على اسماء وكالت كومي يمه اخذي شمه واقرن دروسجن
صعدت فوك

واني ما اعرف شريد بالضبط ليش ما اريد اشوف امي يله خليني زعلانه هسه ماتتحمل وتجي هي عليه تشوفني لان صار هوايه ماشايفتني
ضليت اقره ويه اسماء بس فكري كله يم بيت جدي واتخيل اللمه مالتهن كلساع اضعف واريد اروح واكول الي يحبني يجيني
صار الليل ومحد دز عليه ولا اجوني بيومهه كوه نمت وحته ماطلعت من الغرفه
ثاني يوم الصبح كلت خلي اروح اني يجوز امي زعلانه عليه لو مريضه
اخذني ضرغام ورحت اول ماطبيت تلكتني بنت خالي نعمان الزغيره برا كتلهه امي وين؟؟
كالت راحت هي واخواتج من الصبح لان جهالهن عدهم مدارس
حسيت نفسي شكد رخيصه حته ماحاولت تشوفني
كتلهه ماسألت عليه امي؟؟
والله دزو عليج ومن ما اجيتي كالت طبهه طوب عليمن تطلع اكيد على ابوهه ناكر العشره
يمه بوقتهه حسيت سجين ونبت بكلبي لا اكدر احجي ولا اكدر اعبر عن الي بداخلي
التفتت على ضرغام الي بعده واكف ومبين سمع كلشي
كال تعالي وياي نرجع للبيت
شمه: لا روح ضرغام مشكور راح اروح اقره عندي امتحان وباجر امرلكم
باوعتله بنظره حزينه مليانه قهر شلون ام واخوات عندي
زين اني شنو ذنبي محرومه من حنان امي
فوك ماعافتني وشافت حياتهه
طبيت للبيت تلكتني نوريه كلت صباح الخير
نوريه: ولج وين وليتي البارحه وامج واخواتج هنا؟؟
شمه: موبعيده عليهم هاي كدامهن جان اجت شافتني
نوريه: من كون فلك طرج السانج شطوله على علاهن طالعه
شمه: العفو بيبي بس لاتجيبين طاري امي واخواتي كدامي بعد ماعندي ام ولا اخوات
عفتهه ومشيت اجر بذيال الخيبه
اسمع صوتهه وغلط وراي بس مالي طاقه حته التفت واجاوبهه
طبيت لغرفتي واني كل شعور ماعندي فتحت كتبي اقره ما ادري وين راح يشمرني زماني
شنو نهايتي واني لا ام ولا اب يدافع عني
اصعب مايكون هذا الاحساس
امك تتخلى عنك وانت بأمس الحاجه الهه
لو الاكبر من هذا حته ماحاولت تحسسني باهتمامهه لو بالشهر مره تسال عليه
ضليت كاتمه هذا الشعور بداخلي
وماحجيت لاي شخص
الي يشوفني يكول شكد تضحك وتتعارك
بس محد يدري نتيجه حرماني لحنان امي هيج صرت وحشيه
ودائما اردد السؤال الي بالي
ليش امي تضوج مني وتحب اخواتي اكثر مني واني جنت المدلله مالتهه ليش من اتزوجت تغيرت عليه؟؟
كل هاي الاسئله ما لكيتلهه جواب...
كلت خلي انتبه على نفسي ودراستي ومحد يفيدني على الاقل يصير براسي خير ولا اضل انتظر عطف وحنان من احد
داومت وماضل عن الامتحانات شي بديت اقره وذبيت كل جهدي واخاف ارسب وهنا اكو قانون عند خالي الي ترسب تبطل
مرت ايام الامتحانات وبيوم النتائج راح نوفل ابن خالي سلمان جابهه وكال شمه ناجحه خمسينات واسماء طالعه الاولى
نجحت للرابع وعمي حسين اشترالي ملابس جنت حيل فرحانه حسيت نفسي حققت انجاز
بهاي الفتره كمت اطلع هوايه واروح لبيت علاهن بس احس اكو شي مو تمام بالبيت ودائما اشوف نسوان يجن يم علاهن ومرت عمي حسن
مرات علاهن تطردني ودكول روحي لبيت عمج حسين ما اعرف هاي النسوان شسوي هن 2 وحدهه اسمهه ام راضي ووحده اسمهه ام جاسم
صار عمري17 سنه ضبط وبدت الناس تتقدملي جنت اتخبل اذا يكولون زواج خالي سلمان حاول يزوجني بس بيبي نوريه ماتقبل دكله لاتستعجل عليهه الا واحد زين وهي لا ام ولا اب بيهم خير
جنت خايفه حيل خاف يجي يوم يزوجني خالي سلمان لان المعروف عن خالي قاسي ومايحب الدراسه وبناته خطيه حاكمهن حكم عود بنات الشيخ وماتطلع منهن العيبه
.....
قيصر وما ادراك ماقيصر الكل تحجي بي هم يطلع ويه ابو بالكعدات والفصول وهم دكتور تخرج وصار طبيب مقيم عمره 27 سنه فرق بيناتنه 10 سنوات
رافد قدم على كليه ضباط وبالواسطات انقبل لان هو مخلص سادس اعدادي
حياتنه مثل ماهي تمشي حالنه حال كل عائله عراقيه مانعرف شمضموم النه بالمستقبل وشراح نشوف بعدين
لو كل انسان يشوفوا لحظه من حياته وبلأخص معاناتي جان ماتمنى ينولد ويجي لهاي الدنيا
شعور الحرمان عندي مهلك اريد احس بالحنان من المقابل ماكو
كلمن ملتهي بهمه وكل واحد عنده عائلته ومتمسك بيهه الا اني صرت ضحيه طلاق
ضحيه اب فاشل يركض ورا نزواته وام مااتحملت الوحده وتركت طفله وراهه
شكد اتمنيت امي تنصحني وترشدني بس للاسف امي ملتهيه بعائله ثانيه وما تدري
عافت طفله وراهه متنقله من ايد لأيد ثانيه
ضل حنان امي وعطف ابوي حسره بكلبي لهذا اليوم
بهاي الفتره كمت اشوف قيصر هوايه لان يجي كل اسبوع
بين يوم وليله حسيت نفسي متعلقه بي
اروح لبيت عمي حته اشوفه
ومن يروح للدوام اروح انظف غرفته واتمعن بصورته الي مخليهه على الميز
مرات انتبه على نفسي شجاي اسوي اني مو من مستوى قيصر ومامكن يباوعلي بيوم
حاسبني مثل اخته اسماء
مرات افكر خاف عنده وحده ويحبهه
اجاوب نفسي واكول لا ماعنده لو عنده جان سمعت من اسماء لو من امه
زين شلون احسسه بحبي واخاف عيب وياخذ عليه غير نظره
جانت هاي الافكار محاوطتني ليل نهار يوميه اغفى على صوره قيصر وادعي يحبني مثل ما احبه
ما اعرف شنو اسمي الي امر بي
حب لو اعجاب لو مراهقه وتتغير مشاعري بعدين
مرات احس قيصر يبادلني نفس النظرات ومرات اكول

لا يتخيلي
احس نفسي ضايعه اروح لبيت خالي اشوف نظرات رافد غريبه وصاير بعد احلى لان ضابط وشخصيه
كلبي وعقلي يطلب ود قيصر
مااعرف شنو اريد واخاف من مراهقتي خاف اوكع بالخطأ
امي ماشفتهه بعد ولا اخواتي ولا فديوم سمعت صوتهه بس اسمع عنهه زينه وعدهه 3 جهال صارو
..
مرت فتره والحال كما هو
بهاي الايام صادف عيد الاضحى والناس مجتمعه يم خالي وهوسه كعدت من الصبح بدلت لبست فستان وشديت الشال باوعت على نفسي شكد حلوه طالعه
اني بشرتي حنطاويه وجسمي ابيض حيل عكس وجهي عيوني عسليات عندي شفايف مبرومه
بيبي نوريه تصيحلي ام براطم
وجهي دائري وعندي خدود عاليه
ما ادري ليش اباوع لنفسي وقيصر ابالي ياترى يشوفني حلوه لولا؟؟
صارت ب10 كلت لبيبي راح اروح لبيت علاهن اعايدهه
طلعت اتمشى بالبستان والجو حلو والاجواء حلوه لان عيد والجهال فرحانه رحت لبيت علاهن
لان كلهه تجتمع يمهه بهذا اليوم
تلكوني الجهال شكثرهه معناهه عماتي موجودات
طبيت سلمت عليهم وعايدت علاهن واني من اشوف هاي المره ما اعرف ليش ينتابني شعور غريب واحس من تلزمني نتلات كهربائيه وتسري بجسمي
لكيت اسماء وضلينه ندك سوالف
سمعت صوت عمي حسين كلت كمت اسلم علي
طلعنه للحديقه الي يم المطبخ لكيت عمامي مجتمعين سلمت عليهم وعايدتهم
عيوني ادور على قيصر وينه شفت ضرغام هم عايدته وهذا مايرتاح اذا مايقلد عليه
ضرغام: هاي شلابسه ولج صايره ذواقه وتلبسين فساتين
شمه: شكالولك عليه لعد ولك اني شمه
ضرغام: لادكولين ولك لا اطيح حظج شمه غمه سليمه هم عاجبتج نفسج
شمه: شوف ضرغام تروح منا لا احجي لعمه فضه عليك واخليهم هسه يسولك زفه
ضرغام: شتحجين ولج قابل شعندي
شو تعالي شو تهددين شكو؟
شمه: خليهه بعدين تعرف شقصد
يله من رخصتك العاشق الولهان
عفته ومشيت واني ادور على قيصر سألت اسماء كالت لسه ما اجه من بغداد عنده خفارات اليوم يجي
ضليت طول اليوم عيني شابحه على الباب اترقب بي شوكت يجي احس نفسي محتاجه شوفته وكلبي ينبض سريع معناتهه اني واكعه بحب قيصر واضحك على نفسي
صار العصر وهو ماكو مابين
رجعت لبيتنه لان مابيه حيل نوريه تضل ترزل بيه
اول ما وصلت تلكتني شهد بنت خالي كالت امج واخواتج هنا وين جنتي
بهاي اللحظه كل شعور ماعندي ولا اهتميت عبالك غريبات
دخلت للصاله لكيتهه كله موجوده سلمت على امي واخواتي
بس كوه لازمه نفسي جان سلامهن بارد وعبالك البارحه شايفاتني
حته ماحضنتني ولاكالت مشتاقتلج حاولت ابين على نفسي قويه وما اضعف
اخواتي ولا عبالك يعرفني شروق انطتني خدهه وحته بوستهه صفح ومتكبرات وعبالك اني غريبه عنهن
ما اتحملت الموقف بسرعه كمت للغرفه اباوع على نفسي وجهي مطعون طعن كمت اكرص بيدي حيل ما اريد ابجي ولا اريد انهار واهتم
صار 3 سنوات تقريبا او اكثر ما شايفتهن وهيج قابلني
عضيت ايدي من الساعد حته ما ابجي جانت هاي الحاله بيه اكرص نفسي لو اعض ايدي حته ما ابجي واضعف
بدلت ونزلت وسويت نفسي مامهتمه
بنات خالي مجتمعات وخالاتي والتهيت بالهوسه
بس عيني على امي شلون تركض ورا بتهه الي من رجلهه وكلساع تطلع تشوفهم
واخواتي يحجن بالعالي عود عايشات بالمدينه
صاحتني بيبي اجي اكعد يمهن
رحت كعدت بس اسمع حته ماشاركت بالحديث
شروق: شلون راح نبات هنا مامتعوده على جو القريه؟؟
امي: يله هو يوم ونرجع اني الجهال هم مامتعودين والبيت ضل فارغ وحوراء( بنت رجلهه)
ضلت وحدهه بالبيت وبالي عليهه
الحجيه: ولج شمه لاكعدتي يم امج لا شفتيهه صار سنين ماشايفتهه ادري عليمن كلبج اسود
امي: عوفيهه يمه هاي تربات علاهن عليمن تطلع غير على ابوهه
شمه: هم الج عين وتحجين فد يوم سألتي عليه لو خابرتي وكلتي شلونج تدرين بيه بيا صف هسه اني
لا ماتدرين لان ملتهيه وي رجلج وبنت رجلج
حرامات اسميج امي بس محسوبه عليه ام
حملتيني ذنب ابوي وعبالك اني كتله يروح يدور وراج
بعدني مامكمله كلامي ماحسيت غير ايدهه انمدت على شعري وسحبتني تريد تضربني
بس بيبي منعتهه
كمت وكفت على حيلي كتلهه حسبي الله ونعم الوكيل بيج بعتي بنتج علمود الرجال ماتحملتي تبقين بلا زواج وياريتج عدلتي بيني وبين اولادج بس لا عتب عليج العتب على هذاك الي انهزم مثل النسوان
طلعت بوجهي للبستان والدنيا مغرب ما اعرف وين اروح اسمع صوت شهد وامهه يصيحون وراي بس ما التفتت
اخذتني رجليه لبيت عمي حسين بعدني ما واصله ودموعي تجري عشره عشره
امشي مدنكه وابجي ماحسيت غير انصدمت بواحد
رفعت راسي شفته قيصر
شمه شبيج؟؟؟؟
#يتببببع

#البارت الخامس
#وحوش بشريه

ياريتك تشوف البيـــــــــــــه ياريت
وتفهم من نظرتي شتعني اليه!!
تحس معنى كلامي كبل مااكول
وتعرف بالضبط شيصير بيـــــــــه....
تعرف من أشوفك ليش انهــــــــــار؟؟
وليش الرجفــــــــــة تاخذ مني أديــــــــــــه؟؟
وليش اصفن عليــــــــك من احجي وياك..؟
وانســــــــه الدنيا من نوكف سويه.....؟؟
وليش ارضه بجروحــــــــــك واني ممنون...؟؟
برأيك ليش متحمل الاذيــــــــــــــه..!!
وليش اتمنى اشوفك أسعد انســــــــــان,,,
حياتك بس سعاده وهاي هيه......
واذا فـــــــــــد يوم شفت بعينك دموع..
أدعي من الله تاخذني المنيـــــــــه...
هسه فهمت حجيي وشقصــــــــدت بي....؟؟
أحبك يعني..........ما مبين عليـــــــــــه..؟؟
رفعت راسي شفته قيصر
شمه شبيج؟؟؟؟
شمه: مااكدر اجاوبه بس اشهك وابجي
قيصر: يولي عليمن هاي الدموع منو مزعلج؟؟
شمه: اني من ابجي اكوم اشهك بعد الكلمه ماتطلع مني
قيصر: تعالي وياي للبيت خلي افتهم منو وياج
رحت امشي ويا ومبين هسه جاي  لان بعده بملابسه وشايل جنطته بيده
دخلنه جوا بالمطبخ وصاح يمه وينج؟؟ اسماء؟؟
شمه: ماموجودين يم بيت بيبي علاهن كوه طلعت الحجايه
قيصر: تعالي احجيلي منو وياج كولشي ولا شمه ام السان احرك عشيرته الي يزعلج
شمه: ابتسمت كتله يعني انت هم تحترك وياهم
قيصر: مو اكلج ام السان
احجي يله منو  منزل هاي الدموع؟؟
شمه: كمت اسولفله عن امي واخواتي والعبره خانكتني ابجي بكل قوتي احس جبل على كلبي
الحسره شكبرهه بداخلي وكلام امي وضربتهه تحز بكلبي
قيصر: شمه اسمعي الي راح احجي وفكري زين
ماالج حق تحاسبين امج على زواجهه اكو وحده تكدر تتحمل الوحده بعد طلاقهه واكو لا
امج اختارت حياتهه ورادت تكون اسره جديده واطمئنت عليج انتي بأيدي امينه محد يضربج ولا اكو واحد يأذيج لذلك ما الج حق بكد الشعره تحاسبيهه على زواجهه
اني وياج صح ماحسيتي بحنانهه وانتي طفله وكبرتي وصرتي مراهقه وتحتاجين امج بجانبج
بس ما نكدر نمنعهه عن الزواج حتى حرام
وامج صغيره بعدهه وحلوه واصلا جان زواجهه غصب من ابوج لان ماتحبهه
وازيدج معلومه امج جانت تحب ابن خالهه نفسه الي اتزوجته هسه بس ابوهه ماقبل ينطيهه الا لابن عمهه
امج تحبج وتحب عائلتهه بس هي هم ماخذه على خاطرهه لان انتي ماتسألين عليهه والسانج طويل واجاوزتي عليهه واني اكثر من مره منبهج على لسانج
ابويه انتي مايصير على اصغر شي ونرفع صوتنه ومانحترم الجبير ومهما يكون وشما يصير تبقه امج
المفروض هسه تحضنيهه وتكعدين تحجيلهه عن حياتج مو السانج يمطر مطر
شمه: باوعتله وما اعرف شجاوبه ياربي هو يحجس واني سرحانه بشكله وشلون كلبي يرفرف علي شلون يحجي وطريقه كلامه مو مثلنه طبعا كلهم يحجون نفس امهم لهجه بغداديه قليل يكولون كلمات انباريه حته اني تعودت احجي مثلهم لان عشت وياهم وتعلمت من اسماء
انتبهت من صفنتي وجاوبته
قيصر كلكم تذبون الصوج بيه بس محد كال هاي طفله محتاجه امهه الي راحت لغير عائله وابوي الي انهزم
قيصر: اني وياج بس مو معناتهه نتهجم على الاكبر منه بسبيل افرغ غضبي وارتاح
شمه: سكتت ما الي خلك اناقش لان محد يفهمني كلهم ماخذين عليه نظره اني وكحه ولساني طويل
قيصر : كومي خلي نروح لعلاهن ماشفت اهلي لحد هسه..
شمه: رحنه اني ويا وصلنه للبيت علاهن هو راح للمضيف واني طبيت يم البنات شافتني اسماء
وضلت تسأل شبيج؟ وليش رجعتي اكلت راسي اكل
ورا العشا اجه نوفل ابن خالي يريد ياخذني اكيد نوريه دزته عليه
سلمت على علاهن وطلعت اول ماوصلت للبيت ماسلمت حته كبل رحت لغرفه بيبي لان اني انام يمهه
خليت راسي على المخده وتجمعت الدموع بعيني اسمع صوت الضحك والسوالف امي واخواتي واني حته ماكلفن نفسهن يصيحني
حاولت قدر المستطاع ماابجي ولا انهار
ضليت حابسه الدمعه بعيني ماحسيت غير نفسي بسابع نومه
ثاني يوم كعدت سمعت صوت امي دكول لاخواتي يله حضرن نفسجن راح يجي السايق
ماتحركت  من فراشي ضليت نايمه كلساع عيني على الباب اكول هسه تجي امي تشوفني
هسه تجي اختي تكعدني
لحدما سمعت اصواتهن والسلام وتوديع معناتهه راحن
جانت هاي اللحظه قاسيه حيل حسيت نفسي منبوذه لا اهل ولا اخت ولا ام حته خوالي فلسين مايشتروني واكبر دليل محد يسأل عليه وين تروحين ووين تجين
كمت من فراشي لميت شعري وطلعت خالاتي موجودات بس امي راحت لان بيتهه بعيد
محد حاجتني وعبالك محد يشوفني
بس من يريدن شي يدزني جيبي هيج وسوي هيج
..
خلصت ايام العيد واني روحي طالعه حته لبيت عمي حسين مارحت لان ادري بقيصر هناك وفوك همي انوب حب قيصر
عيوني اطارده بكل مكان وهو ولا على عبالي معتبرني مثل اسماء
ورا العيد رجعنه للدوام وبدت ايام المدرسه
اني على نفس مستواي ضعيف واسماء شاطره حيل
بيوم منهن بالمدرسه وزعولنه اوراق الرياضيات
واني جنت راسبه وبنت المديره ناجحه وهي كلشي ماكاتبه من شفت ورقتهه تخبلت
هاي الرعونيه الي عندي شوكت ابطلهه هديت على البنيه وكلتلهه نجحتي لان امج مديره وانتي كلشي ماكاتبه
صارت هوس

ه وام الرياضيات كامت تغلط عليه كالتلي ادبسزز
اني ماسكتت كتلهه انتي مدرسه وتربين اجيال والفاظج سوقيه بس من تكعدن تنصحنه تصيرين ملائكه مقدسه وانتن السانجن والغلط وماتخافن الله تنجحن كله بالواسطات
صح اعترف جان كلامي غلط ويه مدرسه شكبرهه ماحسيت غير تقدمت لرحلتي وضربتني راشدي فرتني فر
وكامت تصيح وتغلط وانتي مامؤدبه منيلج تربيه اذا امج مطلقه وابوج ابو النسوان
جانت تعرف بسالفه امي وطلاكهه لان من القريه هي بوقتهه حسيت الدم يغلي بجسمي دفعتهه حيل  جرتني من ايدي وطلعت بوجهه اخذتني  لاداره اريد اطلع من المدرسه ما اريد اضل بيهه
التمن عليه المدرسات والمديره تغلط وتصيح  ام الرياضيات كالتلهه تهجمت عليه ودفعتني وغلطت عليه
صرت لا اخذ ولا انطي حته ما اعرف ادافع عن نفسي والمدرسات كلهن يشهدن اني وكحه والساني طويل
المديره مخليه يمهه عوده مرات تحاسبنه على الزي اخذت العوده ووكعتلي دك على اديه وضربتني على رجليه
تالي وحده من المدرسات ادخلت وسحبتني كالتلهه ست ترى خالهه الشيخ سلمان مابينه حيل مشاكل وتعرفين جدتهه الشيخه علاهن ترى ماتعوفنه بحالنه
صاحت بيه طلعي برا وروحي لصفج خلي اسمع صوتج وشوفي شسوي بيج
جان الدرس الاخير بسرعه دك الجرس وبوجهي للبيت ماعرفت وين اروح بس اسماء اخذتني وياهه للبيتهم واني ابجي
لاول مره احس بالذل رغم وكاحتي انهانيت بسبب امي وعيروني بيهم
صح كرهتهه لان عيروني بزواجهه بس احتاجيتهه بهاي اللحظه اشكيلهه وتروح ادافعلي كدام البنات
اول ماطبينه للبيت لكينه عمه فضه تسوي غده شافتني ابجي وافرك بيدي لان العوده توجع
سولفتلهه اسماء على الصار
جرتني بحضنهه
فضه: ياعمه سوده عليه انكسرت ايدهه ان شاء الله شلون هيج تضربج
اسماء: ماما خطيه حتى على رجليهه ضربتهه وكدام المدرسات والطالبات يضحكن عليهه
شمه: لاتبجين هسه اخلي قيصر ياخذ حقج
روحي اسماء صيحي اخوج بغرفته
من سمعت بطاري قيصر رجف كلبي ما اريد يشوفني واني بهاي الحاله
شوي ونزل قيصر باوعلي واني كاعده على الكرسي وافرك بيدي
فضه: يمه قيصر هاي المديره ضاربه شمه على اديهه ورجليهه وغالطه عليه
قيصر: ليش شمه شسويتي وضربتج
شمه: احجي واشهك لان كلت لام الرياضيات ليش منجحه بنت المديره وهي ماكاتبه وكالتلي ادبسزز واني كتلهه الفاظج سوقيه
قيصر: يابنيتي هي مدرسه شلون تجاوزين عليهه جان عفتيهه واحنه ناخذ حقج
شمه: شنو تغلط عليه كدام البنات ودكولي امج مطلقه وابوج ابو النسوان
قيصر: كافي لاتبجين باجر اروح وياج واني اعلمهن شلون يبجن شمه ام السان
كومي غسلي وتعالي
شمه: لا راح اروح لبيت خالي هسه يضل بالهم عليه
قيصر: كومي بدلي والعصر روحي هسه ادز وسام يكلهم شمه يمنه حتى ميضل بالهم عليج
رحت يم اسماء بدلت عندي شكم قطعه يمهم
غسلت ونزلت ليجوه لكيتهم كاعدين على السفره وعمي حسين موجود سلمت علي ومسولفتله عمه على الصار
ضل يتوعد ويحجي واني اعلمهه هاي العرجه شلون هيج تضربج بس اني مستحيه من قيصر لان موقفي موحلو كدامه
كملنه غده وكمت بالمطبخ ويه اسماء وهاي الثانيه دائما تلوم  بيه ودكول السانج متبري منج
حسيت على صوت قيصر كال تعالي شمه خلي اشوف وجهج
يمه رجليه ماتتحرك اريد اوصل يمه مااكدر
قيصر: شبيج ولج ماتجين وجهج مخرمش
شمه: لا كولشي مابي
قيصر: انتي شكد عنيده تجين لو اكوملج؟؟
شمه: تقربت عليه صرت كباله وهو كاعد على الكرسي سحبلي كرسي وكعدت لزمني من فكي ويكلب بوجهي
اني هنا منتهيه بين الخجل وبين شعوري بأدين قيصر ما اكدر اباوع بوجه اخاف عيوني تفضحني
معاملته جانت عن حسن نيه بحكم عمله وهو ابن عمي الجبير بس اني كلبي ما اخذهه بحسن نيه كعد يفسر كلامه ولمساته
جان اثر اصابع المديره طابع على خدي ومخرمش الخد الايسر حته طالع دم صاح على اسماء تجيب معقم
قيصر: شو فتحي ايدج خلي اشوفهم
شمه: فتحت ايدي وجانن حمر دم لان ضربتهه قويه واكثر من وحده
قيصر: كسر بايدهه شلون مأذيتج والله باجر اروح الا انعل والديهه تايهه بنات العالم هيج تضربهن لوبتهه سوت بيهه هيج
جان يحجي وعمه ام قيصر ترد علي لان صايره مقابيلنه
اي والله باجر روح طيح حظهه هالمتخاف ربهه هاي المديره حتلو تجاوزت خابري علينه واحنه نتصرف
اجت اسماء جايبه كطن ومعقم راد يقعملي الجرح بس ماخليته اخذته من ايده واني سويته
حاولت ابتعد عن المكان الي كاعد بي لان صدك من اشوفه يتخربط كياني رحت لغرفه اسماء واني اباوع لخدودي حمر مدري من الراشدي مدري من الخجل
بهذا اليوم ضليت لليل اني يم بيت عمي حسين وورا العشا اجه رافد عليه ورجعني
بالطريق سولفتله على المديره وكالعاده ذب اللوم عليه وانتي وكحه والسانج طويل
جنت اشوف اكو لمعه بعين رافد من يحجي وياي مامووجوده بقيصر
احاول اغالط نفسي واكول حاسبني مثل اخته بس العكس لا
ثاني يوم ماداومت بس الي عرفته قيصر رايح للمدرسه ومتعارك ويه المديره وكايلهه الا اشتكي عليج بالتربيه شلون هيج تضربيهه 
وورا ما راجع قيصر رايح رافد وهم نفس الشي متعارك وياهه وبحكم شغل رافد ولان ضابط ا

لظاهر المديره خايفه ومعتذره منهم وكايلتلهم خلي تشد حيلهه لان سعياتهه موزينه واحنخ نحاسبهه لمصلحتهه وبتكم دائما تسبب مشاكل
من سمع خالي سلمان كام يحجي عليه وكال بس اترسبين ابطلج واني افكر ازوجج فديري بالج اطلعين بدرس
حاولت قدر المستطاع وبكل جهدي انجح وارفع سعياتي تحسنت درجاتي زين ورا نصف السنه
...
بيوم منهن مجتمعين بالليل والجو بي بروده جان نهايه بدايه شهر الثالث ويمنه خالتي ام فيصل وبنات خالي سلمان والولد يشوفون لعبه الكل مجتمع وضحك وسوالف
سمعنه صوت خالي سلمان اجه بس ما ادري ليش كلبي لعب وما ارتاحيت
سلمان: السلام عليكم يالربع
الكل : وعليكم السلام هلا بالشيخ
سلمان: يمه شلونج بهالبرد
الحجيه: والله يايمه اعظام الجبير مثل الطفل مابيهن لحم ويدفيهن
سلمان: يمه هو الجو بارد واحنه بساتين منطقه مفتوحه من كل جهه يجينه الهوه
شلونج بويه شمه
شمه: هلا خالي زينه
سلمان: مدامكم كلكم مجتمعين عندي موضوع اريد احجي كدامكم
الحجيه: خير يمه عسا ما شر
سلمان: لا يمه خير خير
صار اسبوع اكو ناس يرحون ويجون عليه طالبين شمه من عندي وسألت على الولد واهله خوش ناس
الحجيه: وين شايفهه ومن ياعمام
سلمان: يمه خالته مدرسه عليهه وشايفهه من بيت سعود حمدان من ذاك الصوب
هم يحجون واني بدت ملامح الغضب والعصبيه عليه هاي الحاله الموحلوه بيه بسرعه اتعصب
ساكته ومنتظره ينطوني مجال حته احجي
سلمان: ها خالي شكلتي اني ما عندي مانع وما اعتقد عندج مانع حته نتوكل بسرعه
شمه: ليش ماعندي مانع؟
وليش تتوكل بسرعه شنو هيج كعدتي يمكم مضوجتكم
الحجيه: ولج لسانج لا تجاوبين الشيخ هيج
شمه: شيخنا اني ما موافقه وما افكر ازوج هسه واريد اكمل دراستي
سلمان: اشو انتي ماعندج احترام رعنه وصلفه على علاهن صوجي اني جاي اخذ رايج تقبلين وايديج فوك راسج لا وحق من انزل القران اكطع الحزام عليج
شمه: كمت وكفت واجتني حاله العصبيه الي انعمي من عدهه
ليش تكطع الحزام عليه حقي هذا ومن حقي ارفض الزواج اذا الولد خوش وماتريد تخسره انطي وحده من بناتك مو اني؟؟
شفت خالي سلمان كام يهد عليه ونزع العكال من راسه والغضب باين عليه ويتوعد ويغلط ونوريه تسكت بي
شفته صار قريب عليه لا اكدر انهزم ولا اكدر اوكف انتظر عقابي كل هذا لان دافعت عن نفسي
ماحسيت غير رافد سحبني من ايدي وخلاني ورا وصار بوجه ابو
سلمان: رافد توكف بوجهي وتحمي هاي الرعنه واني شيخ وماعرفت اربيهه تجاوز وصوتهه شعلاته
رافد: العفو يابه مو قصدي اوكف بوجهك بس الهه الحق بالرفض ماتريد تتزوج
سلمان: ماكو ترفض اني انطيت كلمه للوادم شدكول علينه رجع بكلمته الشيخ سلمان
رافد: اي روح كلهم ابني رافد يريدهه ما اكدر انطيهه الكم
من كال رافد هيج الكل تصنم ونظرات التعجب اتجهت على رافد اولهم اني ما اعرف هذا على شنو يحجي
كل عقله راد يحميني تالي صخمهه
مايدري عقلي وروحي وين كله يم قيصر احلامي
سلمان: انت شتحجي يابويه اذا تريدهه ماحجيت من يوم من اثنين هسه من انطيت كلمه للناس
رافد: هاي حجيتلك ماجنت مقرر اتزوج هسه لان بعدهه صغيره بس مدام وصلت تجبرهه على الزواج اني اكلك اريدهه واخطبهه منك
اشرتلي نوريه اروح للغرفه رحت بسرعه وسديت الباب وضليت اتسمع على الحجي
بس طبيت اسمع سعاد ام رافد تصيح انت عقلك تحجي مالكيت غير من نسل علاهن تتزوج
ورافد يدافع ويكلهم شبيكم حسستوني خاطب وحده غريبه ولاعبالك بنت عمتي الي رباهه ابوي اشو مدري شلونكم شنو علاهن
اني رايد بنت عمتي الي ربت بيناتنه شجاب علاهن بالنص
اني احب شمه ومن زمان مقرر اخطبهه بس منتظرهه تكبر شويه يله افتح الموضوع وياكم
بس هسه جبرتوني احجي
من خلال دفاع رافد مبين يحبني ومتمسك بيه شراح يطلعني من هاي المصيبه اسمع الاصوات صارت اعلى وناس تهدي بالموضوت وناس تشعل
فززني صوت خالي سلمان وكلامه الي وكف عقلي ماجنت متوقعه اني عايشه بغابه وحوش
سلمان: اسمع رافد هاي السالفه كطنه وشيلهه من اذانك غلطنه مره وزوجنه سناء لابن علاهن مانعيد الصار ونغلط نفس الغلط وناخذ بتهم
ما اريد اناسبهم ولا انطيهم ولا اخذ منهم
عدهه ولد عم ومرجعهه الهم يريدوهه ياخذوهه مايريدوهه اشوفلهه واحد وازوجهه
رافد: والله ياشيخ ما توقعتهه منك شمه بنتك الي ربيتهه بيدك ودائما انت بلسانك دكول شمه ماينخاف عليهه وسباعيه
هسه صارت ماتناسبكم ولان حفيدة علاهن
اسمعوني زين لا اريد اكسر كلمتك يابه ولا اقلل من احترامك
بس شمه اني اريدهه وما اعوفهه لو تنطبك السما على الارض
جنت اسمع ومصدومه من كلام رافد وماحاسه بحبه ومن كلام خالي  سلمان نزل صاعقه على راسي ليش حاسبيني عار ومحمليني ذنب ابوي وعلاهن وشنو الي مسويته علاهن وهلكد نافرين منهه
كعدت على سرير نوريه واحس نفسي بدوامه
شنو هالمصيبه الي وكعت على راسي وفوك كل هذا منبوذه من الطرفين
علاهن تصيح طالعه على نوريه
ونوريه تصيح جنج علاهن وما اعرف اني عليمن وبت منو ومنو اهلي؟؟
ما انكر زينين وياي ومحد اذاني بس شنو الفايده هذا الموقف بينهم على حقيقتهم وانكشفت

معادنهم
ادخلوا خوالي وسكتوا رافد وحاولوا يهدون الوضع
انسد الموضوع والكل راح لبيته
ضليت للصبح افكر بمصيري ووين راح يشمرني زماني
جنت ناويه اكعد من الصبح واروح لبيت عمي حسين احجي لعمه فضه الوحيده الي تحبني وتنصحني
ثاني يوم كعدت صادفت جمعه اوضاع البيت هادئه ومحد فتح الموضوع اكيد الشيخ كالهم سدو حته نوريه ماحجت ولا بينت رأيهه ولاعبالك البارحه اكو عركه بس الوجوه مكلوبه
كملت شغلي ورحت لبيت عمي حسين ماكو احد الولد ببغداد وحسام ووسام يطلعون دائما بالمضيف
كعدت احجي لعمه فضه والعبره خانكتني كوه مسيطره على نفسي وهي تهون عليه وتنصح بيه
ما انحس غير صوت رجنه رج
علاهن: هاي منو الي يعيريج بأبوج ويكولون طالعه على علاهن
#يتبببع

#البارت السادس
#وحوش بشريه

ماميت كبل بس شايف التابوت
لان كل ما انام اتحلم بنعشي
انه مبلل رموشي بدمعه المعتاز
انه دموع الفرح ماوصلت الرمشي
وكت الخير عشته وماشفت بي خير
صاحولي ملك بس ماشفت عرشي
عندي عيون بس محسوب عل عميان
انه مفتح ولكن ماشفت كلشي
احلم بلفرح واترس الضلمه احجار
ضل هواي ليش نكول ماضل شيء
علاهن: هاي منو الي يعيريج بأبوج ويكولون طالعه على علاهن؟؟؟
ضلينه لاناخذ ولا ننطي اني وعمه فضه حاولت عمه تلم الموضوع كالتلهه
يكولون على شمه طالعه على الشيخه علاهن لان قويه وادافع وماتسكت عن الحق
علاهن: سمعتهه دكول يعيروني باابوي منو يعيرج ولج احجي
فضه: ياعمه ماتعرفين شمه ماتسكت ومتعاركه ويه بنت المديره وكايلتلهه ماعندج ابو يجي وراج للمدرسه ويسأل عليج
والله يسلمهه شمه نسخه منج كلبهه حار وماتقبل على الغلط وهاده على البنيه وكاتلتلهه وخطيه اجت تسولفلي بطولاتهه
علاهن: اي مو اكول عبالي واحد من بيت سلمان مكدر خلك شمه حته انعل ساسه من راسه
دحكي يبنت خاف واحد يزعلج لو يكدر خلكج تعالي علميني منو ازوعه حليب امه
شمه: لا شيخه بيت خالي زينين وياي بس اني دائما اتعارك بالمدرسه ومن ياخذوني للاداره بس اكلهم الا اكول لبيبي علاهن
كون تشوفين المديره شلون وجهه يصير اصفر
ودكوم تخربط بالحجي
واسمعهه دكول للمعاونه ولج كلشي ولا الحجيه علاهن هاي دوله لحالهه
علاهن: يولي شعبالج لعد اني علاهن بنت الشيخ مزاحم من جنت بكدج ابن امه الي يعبر على البستان السلاح بيدي واكبر زلمه اطيحه
مره من المرات سطوا عله حلالنه وابوي الشيخ جان عنده فصل وسمعت صوت الفشك واخوتي كل واحد من صوب
ركضت على السلاح وكمت اضرب من السطح ومن هذا اليوم الكل تخاف مني
عفت علاهن تحجي بطولاتهه وكامت تحمي شويه وعمه فضه تسمعهه واني مدري اضحك على الموقف مدري ابجي على حظي
انسحبت من يمهن وصعدت فوك اريد اروح لاسماء بعدهه نايمه بس مدري شلون اخذتني رجليه لغرفه قيصر اعرف بي ما موجود
فتحت الباب وسديته وراي اشتم عطره بكل الغرفه ضليت اباوع على كل شبر بيهه
بيهه كنتتور 4 بيبيان وجربايه نفرين وميز مخلي علي عطور وساعه
بالجانب الثاني ميز مال مكتب وكرسي وورا مكتبه بركن الحايط بالطول متروسه كتب
رحت كعدت على الجربايه وعبالك اول مره افوت بغرفته عطره ملئ رئاتي
بعد الجوله على الميز والجربايه وصلت للكنتور فتحته اشوف ملابسه معلكه ومرتبه
فتحت الكنتور الثاني جان عباره عن رفوف بيهه كتب وتقارير وسماعه وادوات طبيه
وصلت للكنتور الثالث جان بي البوم مال صور وشغلات ماعرفتهه شنو مثل القاصه ومقفوله
سحبت البوم الصور وبديت اكلب بي
اتمعن بحبيبي الي مايعرف شي عن مشاعري
وشلون كلبي يدك الف من يشوفه
كل صوره اكلبهه اضل مركزه بيهه شوي يله اشوف الثانيه
اثناء ما اكلب بالصور جانت اكو ورده حمرا جوريه مبينه قديمه ذابله حيل وماباقيه غير شكم ورقه مخليهه بوسط الالبوم وجانت الصوره الي بالوسط هو وبنيه
كاعدين بحديقه والبنيه مبتسمه وجميله حيل سبحان الخالقهه وحته قيصر مبتسم وكاعدين واحد بصف الثاني كلش قريبين
احس كلبي كام ينغزني وكأنما جاي يكول شفتي الي اني شفته
معقوله هاي حبيبته وقيصر يحب؟
شنو هاي الورده وليش بذات بهاي الصوره مخليهه؟؟
يجوز زميلته..
لا مو زميلته كل صوره جماعيه بس هاي الصوره وحده
بسرعه سديت الالبوم وطلعت من الغرفه لان ما اعرف شصار بيه ضليت واكفه بالباب وما اعرف وين اروح ياربي احس كلبي طكت بي عبوه
املي الوحيد بهاي الحياه هو قيصر شنو موقفي اذا طلع يحب وعنده انسانه ثانيه
صح ماشفت منه شي ولا حته نظره بس موبيدي احبه ومستعده انتظره العمر كله
بيومهه فاصله عن العالم الخارجي منا سالفه رافد ومنا قيصر حته جان عندي امتحان وماقريت شكد حاولت اسماء نقره واني بس لازمه الكتاب واضرب صفنات ما اعرف بشنو افكر وهاي المشاعر الي عندي مال مراهقه لو حقيقيه
..
مرت الايام والحال كما هو موضوع رافد ما انفتح وماشفته بعد لان التحق والصراحه اني اتجنب اطلع حته لا اشوفه لان ما اعرف موقفي شنو؟؟
صديقتي الي شويه راده عليه هي شهد بنت خالي سلمان حبابه حيل تضحك وتشاقه بس احس داخلهه غير شي مرات احسهه تريد تحجيلي وما ادري شنو يمنعهه لذلك تبطل ودكولي بعدين تعرفين كولشي
مره سألتهه على رافد كالت ما اعرف شي بوقتهه تعارك من رجع من يمكم وثاني يوم التحق وهو يداوم بكركوك ويتأخر يله ينزل
...
بيوم منهن اني يم بيت عمي وما ادري قيصر هنا جانت عمه فضه مسويه حمله تنظيف جان عدهم غراض زايده بدينه نصعد بيهه اني واسماء ليفوك عدهم مخزن على السطح
من صعدنه نسمع صوت اغاني بدينه نتقرب شويه شويه عرفنه الصوت من غرفه قيصر
اخذنه الفضول اثنيناتنه وتقربنه نسمع جانت اغنيه عبدالله رويشد لحد الان حافظتهه واتذكرهه تطرب بمسامعي
اسمهه لمني بشوك واحضني
لمني بشوك واحضني
بعادك عني بعثرني
صلبني في صقيع الموت
ورداني بهجير الشوك ذوبني
تعال تعال طفي النار الي تسعر
جانت هاي كلمات الاغنيه

لحد الان تهز بذاكرتي معناتهه قيصر عنده حبيبه
رجليه جمدت وماعادت تتحرك اسماء صافنه عليه ومن نظراتهه احسهه ملاحظه شي
ما ادري شلون كملت الشغل واني بالي وفكري يم كلمات الاغنيه ليش يسمع هيج
بعدين كلت شكو مكبره السالفه يجوز اغنيه عاجبته بس اتذكرت مره ضرغام كال قيصر يكول ما اسمع اغنيه اذا ماتعبر عن حالتي
واتذكرت الصوره والورده كمت اربط وحده بوحده واخر ماتوصلت اله قيصر يحب وحده ثانيه
بيومهه ماشفته ابد بس خلصت شغل رجعت للبيت
هملت دراستي هوايه اسماء انتبهت عليه وحاولت شكد تعرف شبيه بس شحجي اكولهه احب اخوج واني مراهقه وهو دكتور واكبر مني ب10 سنوات
اجه اليوم الي لازم اعترف بي لان اريد واحد يسمعني ما اتحمل بعد
بوقتهه جان درس شاغر ونتمشى اني واسماء بالساحه اني ماعندي صديقات غير بس اسماء والباقيات بس سوالف وشقه ماعندي وحده مقربه ابد
جان مبين على اسماء عدهه حجي بس متردده تحجي مبين تنتظر اشاره من عندي
كتلهه شبيج اكو شي عندج وماتحجي؟
اسماء: شمه اني وياج اخوات خلي نسولف
شمه: سولفي منو لازمج
اسماء: انتي تحبين قيصر؟؟
شمه: ابد ما راوغت بلأجابه بسرعه جاوبتهه
اي احبه
اسماء: شمه ترى بعدنه صغار على الحب انتبهي لدراستج احسن والله ميفيد لان قيصر اكبر منج
شمه: اسماء لاتلفين ولا ادورين تعالي من الاخير واحجيلي اني اعرف بأخوج مايحبني ولا فديوم شفته باوعلي بس موبيدي حبيته وما انتبهت على نفسي
اسماء: شوفي قيصر اذا يفكر يزوج مستحيل يعيش هنا ودائما اسمعه يكول اتزوج ابغداد وكولش زين تعرفين طبع قيصر شنو حته ماترهمون سوه
قيصر كلمته هي الماشيه ويضوج من العنيده والصوتهه عالي وانتي ماشاء الله جرس انذار
شمه: هسه انتي جايه تنصحيني لو ترزليني لو شنو مافهمت حددي موقفج
اسماء: اني اخاف عليج اخاف تتعلقين بقيصر وبعدين تنصدمين واعرفج انتي شكد رعنه بس بداخلج انسانه رقيقه وما اريد بيوم اشوف شمه ضعيفه
شمه: انتي تعرفين اخوج يحب وحده مو؟؟
اسماء: لا والله ما اعرف جان كتلج تتوقعين قيصر سهل ويسمح ندخل بحياته ونعرف يحب منو ويكره منو
يجوز ماتعرفين اخويه بس قيصر ماتلوكله مهنه الطب انطي شيخ وكعده وديوان متمسك بعادتتنه وتقاليدنه ودائما يكول الدراسه اسقاط فرض بالنسبه الي
لذلك اني اكلج قيصر مايرهملج واخاف عليج والله مايفيدج اخويه واعرفه وحته اذا حبج تشوفين الويل منه
مستعد يحميج ويحارب لاجلج لان انتي عرضه بس مايرتبط بيج تدرين ليش؟؟
لان قيصر يريد يتزوج ببغداد ويريد يتزوج من مستوى لاتزعلين مني بس حته ماتنصدمين بعدين
شمه: ولج اسماء تسكتين لو احط راسج هنا بالطينه اخوج احبه وما احب اغيره وانتظره العمر كله وكولي عني مخبله وصلفه ورعنه شتريدين كولي بس مال اشيله من بالي انسيهه
اسماء: دروحي اني شعليه تحبي تكرهي عود نصحتج هو انتي شكول نصيحه السانج متبري منج بس والله دواج بس قيصر خزره وحده منه شايفه روحج شلون تصيرين
المهم ماعلينه اني راح اروح اراجع فيزياء الدرس الورا عدنه
عافتني ومشت واني افكر بكلامهه شتقصد؟؟
اعرف الي اسوي غلط واحب انسان مايصيرلي بيوم حتلو ابن عمي بس كلبي رافض فكره يميز الغلط من الصح مصمم على قيصر وخلاص
حته ما انطيت مجال لعقلي يفكر بكلام اسماء
مستعده احارب الدنيا كلهه بسبيل احصل قيصر
بهاي الفتره بدت امتحاناتنه واني اقره بس خايفه ارسب بالذات برياضيات لان شدت وياي المدرسه من ورا الساني جنت كل الامتحانات زينه بيهه اضل للفجر اقره حته بالرياضيات جاوبت
خلصت الامتحانات وبيوم النتائج راح نوفل يجيبهن وكال اسماء ناجحه للسادس وشمه راسبه برياضيات
بوقتهه كرهت نفسي وشكد استحقرتهه شلون هملت دراستي وهاي اسماء نجحت واني رسبت خاف عندي امل واحد بالميه بقيصر هسه تحت الصفر
سمع خالي سلمان اني راسبه وكال تبطلين شكد توسلت وتمردت ودخلت عمي حسين واسطه ومافاد كال كسلانه ويوميه عركه تبطل وتكعد
وعمي حسين من سمع بيه كسلانه هم كال بطلي وصار ويه سلمان
بوقتهه حته رافد حاجي ويه ابو وماكو نتيجه
جان الكل يكول خلي تبطل مافالحه بدراسه بس بالمشاكل
اول وحده فرحت هي علاهن وكالت بطلي وخلي ادورلج رجال يسترج وعلى اساس اني عار ويسترني
نظرتهم للمراءه ماراح تتغير يحسبوهه عبده عدهم بس للمنام والخدمه وبالذات عمامي وخالي سلمان جان يكول المره ما الهه غير بيت رجلهه
حياتي بائسه افتر وحدي من بيت لبيت انهزم من بيت خالي سلمان من ورا الصياح والعرايك اجي هنا اسماء بالدوام حته استحي من نفسي
لان اشوف نفسي فاشله ومادبرت الدراسه
امي ماشفتهه من اليوم الي تعاركت بي صادف العيد
كمت اساعد مرت خالي نعمان بالشغل تعلمت هوايه شغلات وطبخات صار كل سري بالمطبخ اتفنن بلاكل
يجن يمنه بنات خالي سلمان هن 5 اثنين متزوجات
اكثر وحده صديقتي هي شهد وجانت براء اكبر من شهد بسنه وحده مكروهه اموت منهه احسهه شيطان
بيه طبيعيه الانسان الي ما ارتاحله يطلع ورا شي
رافد قليل اشوفه والي عرفته خالي كايله اتبره منك واطلعك من العشيره وما اخطبلك من بيت علاهن
عجي

ب امرهم هم الي ربوني وبعدهم ينسبوني لعلاهن وعبالك اني بتهه
....
بيوم منهن اجه ضرغام يصيح عليه من الباب
طبعا بيت عمي حسين مايجونه ولا خوالي يرحون لان اكو خلاف بين نوريه وعلاهن
بس الولد عادي بيناتهم صداقه بس مايطبون للبيت يصيحوني من برا بالبستان
والنسوان ممنوع يختلطون بسبب العداوه القديمه الي لحد الان ماعرفتهه شنو
وبس خالي سلمان وعمي حسين عدهم علاقه والباقي ناس ضد ناس
سمعت صوت ضرغام برا خليت شال على راسي وطلعت
شمه: ها ضرغام
ضرغام: ها شمه شلونج
شمه: زينه الحمدلله
ضرغام: دكول امي خلي تجي تساعدنه اليوم عدنه عزيمه ابوي مسوي غدا للمعلمين الي وياا
شمه: اي هسه اجي وراك
ضرغام: لا انتظرج بالباب كملي وتعالي
رحت بدلت على السريع وانطيت خبر للحجيه وطلعت لكيته واكف برا ويدخن من شافني نزل الجكاره
ضرغام الولد الثاني لعمي حسين بعد قيصر يدرس ابغداد يم خواله مرحله رابعه اداره واقتصاد
طويل كلهم على خوالهم اجسامهم ضخمه ويتميزون بالطول عيونه صفر عكس قيصر الي عيونه سود
ضرغام اكو خيط شكار بشعره حته لحيته موسوده جانو يكولون ضرغام احلى واحد بولد حسين واتذكره من يكلوله حلو يكوم يهد عليهم ويتعارك رغم صغر سنه يكول الرجال مايصير يكولون علي حلو
صرنه نمشي سوه واحس اكو كلام عند ضرغام بس مايعرف شلون يحجي امشي وافكر شعنده ضرغام وكلما يشوفني يريد يحجي ويبطل
فززني صوته كال اكول شمه انتي من النوع تضمين السر لو تخلين القريه تسولف بي
شمه: ضحكت .. جربني وشوف لو يموتوني مااحجي
ضرغام: تعالي شمه قبل لا نروح للبيت اريد احجي وياج بس توعديني الكلام الي اكوله مايطلع..
شمه: لا مايطلع بس طلعهه هالدره موفتيت كلبي
كعدنه على جذع مال نخله ورا بيت علاهن ومتردد يحجي
شمه: يابه جايه اخطبك شبيك ماتحجي
ضرغام: انعل حضج ولج هذا السانج شوكت تبطلي ما ادري شلون راح احجيلج واعرفج انتي مصخمه تفضحيني
شمه: شنو هاي ضرغام والله جرب وشوف انت اخوي الماجبته امي واذا لاسامح الله اوكع بمصيبه اول واحد اجي اركض عليك
ضرغام: شمه اني احب بنت خالج سلمان شهد والله شاهد مفكر اخطبهه بس اخاف من المشاكل وخاصه العداوه الي بين علاهن ونوريه بس اريد اتاكد من مشاعرهه واضل انتظرهه منا لمن يوافقون
شمه: طبعا ما تفاجأت لان اعرف بي يحبهه اكثر من مره اشوفه شلون يباوعلهه من يجي عليه لو مرات اشوفه واكف بالبستان ينتظرهه تطلع ويشوفهه
بس شهد ما اعرف بمشاعرهه ولا حاجيتلي شي
الصراحه ياضرغام ما اعرف شجاوبك بس ما اعرف بمشاعر شهد لان ابد ماحجتلي عليك ولاشفت شي يدل على انو تحبك
بس راح احاجيهه واشوفهه
ضرغام: عجل انتظر منج خبر وهذا الموضوع يبقه سر بيناتنه حته اسماء لاتحجيلهه ترى ازعل عليج والله
شمه: شبيك ضرغام تشوفني زعطوطه اطمئن ما احجي حرف واحد
ضرغام: يله كومي عجل حلتلج الكعده خاف
رحنه للبيت لكيت عمه فضه مهوسه المطبخ والظاهر العزيمه جبيره
بديت اشتغل وياهن واسماء مو كولش بالطبخ مثلي بس اني اكثر شي اشتغل
جنت اباوع لعمه فضه ضايجه بس ماعرفت ليش
كلت خلي اسألهه شبيهه
شمه: عمه شو ضايجه اليوم شبيج؟
فضه: يابعد عمتج كلبي طاك من هاي الولد الي كل واحد شوره من راسه
شمه: ليش شبيهم؟؟
فضه: ليش ماحجتلج اسماء قيصر البارحه تعارك ويانه وراح لبغداد طلع يحبله وحده مناك وحته بدون حجاب ولا من ثوبنه وهذا راسه يابس الي يريده يسوي وتعارك ويه ابو ورجع لبغداد
شمه: هي تحجي واني احس توقف كولشي عندي فصلت عنهه بس ذبذبات صوتهه اسمعهه
اباوع على اسماء ملامحهه تغيرت ومبينه مارادتني اعرف
جنت لازمه بيدي كلاص مال مي وكع من ايدي
فضه: يا يمه خوما تعورتي فدوه طار الشر
شمه: ماكدرت اجاوبهه الغصه ابلعومي ما اكدر احجي ابلع بريقي بس اريد اسيطر على نفسي لا انفضح
سويت نفسي الم بالكزاز واسماء غيرت الموضوع وخلت امهه تسكت
طلعت من المطبخ ورحت للمغسله سويت نفسي اغسل واحس الهوه شح عليه وهوه العالم كله مايملي صدري اختنكت ماتوقعت نفسي هلكد احب قيصر احس الضربه قسمت كلبي نصين
حسيت على ايد اسماء اطبطب على ظهري
اسماء: تعالي بغرفتي لاتشوفج امي
شمه: صعدت وياهه واني كل حيل مابيه احس حيلي انهد تأثرت حيل بالخبر
حسيت نفسي خسرت كلشي لا ام لا اب لا اخوان لا حبيب
رجعت الوم بنفسي لان حبيت قيصر واني مو من مستوى طلع ابن عمي يحب وحده ثانيه ومتعارك علمودهه واني افكر بي وما انام اذا ما اتخيل ملامحه وشكله وهيبته
مقهوره وضايجه من نفسي شلون حبيت بهذا العمر وتخليت عن دراستي شلون سمحت لنفسي احب شخص معتبرني اخته ومايوم باوعلي بغير نظره
ما انطيت مجال لاسماء تحجي لان تعرف بيه بس تحجي شي انهار حاولت اتماسك واصير قويه علما تخلص العزيمه حته محد يحس بيه
ما ادري شلون خلص هذا اليوم وشلون اشتغلت وشلون تصرفت ما اتذكر اي شي بس الي اذكره شمرت نفسي على جربايتي وانطيت الموافقه لدموعي بالانطلاق
جان مخدتي شاهده على كل لحظه امل عشته وكل لحظه نمت افكر بقيصر بحب وادعي يصير من نصيبي
وهسه راح تشهد على كل الالمي و

مواجعي وشلون راح اتحمل اشوف قيصر وي وحده ثانيه
شعور مؤلم حب من طرف واحد عشته
لا يدري بيه احبه ولايباوعلي بنظره حب
حاسبني مثل اسماء وفارق العمر والمستوى اكيد مراح يخلي يفكر بيه
مر اسبوع واني حته اكلي قليل وما اطلع من البيت كولشي بيه منهار مجرد ما اتذكر كلام امه والصوره الي شفتهه والورده والاغنيه يتحطم اخر جزء يحمل امل بداخلي
مشت الايام وصار عمري 18 سنه
وياريتني ضليت طفله ماتعرف شي غير بس الوكاحه
ياريت الزمن توقف ومامرت هاي السنين وشفته كل هذا المن احمل المي وعذابي لأمي لو ابوي لو قيصر لو كلبي وعقلي الي خلوني امشي بطريق الوهم
#يتببببع

#البارت السابع
#وحوش بشريه

ياغنوة عشَك حافظها جوه الروح
ياسيف وجرح بضلوعي من أيحد
يا أجمل حلم تـاه واجانـي أبليل
حسبالي الصبح الكَاه مـن اكَعـد
تعـرف بالعقل ما يرضـى بالتقسيم
وإذا مـرة انقسم يعنـي الجنون أيرد
مـرات اعتنيلك وانسه روحـي وياك
ومـرة الكَاها روحـي وياك ضد الضد
يمعود تعــــال ولا تـروح أبعيـد
بلابـل بيتنـة بس بأسمـك أتغــرد
شيماء او مثل مايدلعوني شمه ماشافت شي من طفولتهه غير طفله مشرده بين خوالهه وعمامهه الاب ينعم بالراحه وي زوجته والام عدهه عائلتهه وزوجهه ومكونه اسره واني خارج قوس
بهاي الفتره حيل تأثرت بسالفه قيصر ما اتوقعت هلكد احبه وهو ولا على باله
فوك كل هذا اشوف رافد تغير عليه حته مايباوع بوجهي
معقوله اني بيه شي حملوني ذنب مو ذنبي
اكيد رافد سمع كلام اهله وغير نظرته اذا صدك جان معجب بيه
احس نفسي بدوامه من التفكير وكاعده بالبيت لاشغله ولا عمله يله اتعارك ويه الرايح ويه الجاي
ضليت شهر كامل اني مارايحه لبيت عمي حسين اشتاقيت لاسماء بس ما اكدر اروح واشوف قيصر
يوم حاله حال الايام العاديه كعدت من الصبح انظف واشتغل بملل بس اريد الهي نفسي حته شهد صار هوايه ماتجينه ولا شفتهه
طلعت للحديقه انظف بيهه سمعت صوت وسام ابن عمي يحجي ويه نوفل
وسام صغير بالمتوسطه طلعت شفته شيريد كال امي دزتني عليج دكول خلي تجي اسماء مريضه
من سمعت باسماء مريضه احس كلبي فرفح عليهه هاي موبس بنت عمي وصديقتي اختي واكثر من اخت
ركضت بسرعه بدلت ورحت اركض ورا
اول ماطبيت للبيت سمعت ضحكه عمه فضه
فضه: ولج ملعونه شمه لاكلتي بيت عمي اشوفهم داده انهزمتي وماشفناج بعد لوندري مادازين عليج بالعزيمه
شمه: لاعمه والله اشتاقيتلكم بس ملتهيه بالشغل وادري بيكم ماتكدرون تجونه
فضه: تعالي ابوسج ولج بنيتي الج وحشه
شمه: بوست عمه وركضت لغرفه اسماء لكيتهه مدده وبيدهه كانيوله حضنتهه وبجيت ما اعرف يمكن بيهه ريحه قيصر
اسماء: يولي خنكتيني هاي انتي شمه لوغيرج من اجتج هالحنيه
شمه: ولي عابتلج فوك ما مشتاقتلج
اسماء : اني اكثر والله يوميه اتوسل لضرغام يروح يصيحلج ويكلي لويصير طريقهم ذهب ما اروح
شمه: من كالت ضرغام اتذكرت سالفته ونسيت احاجي شهد واني اصلا ماشايفتهه
التهيت بهمي وقيصر ونسيته خطيه
ضلينه نسولف اني وياهه وتسولفلي على المدرسه والمديره العوبه مالتنه
انتبهت عليه ضايجه ومو مثل قبل مرحه
اسماء: شمه بعدج ضايجه ومقهوره؟
شمه: يجوز دكولين شمه تبالغ وشبسرعه حبته وتعلقت بي بس والله احسه يصعد ويه النفس اعترف غلطت بحبي واختياري غير موفق وما راعيت الفروق الي بيناتنه بس موبيدي اسماء حبيته وتعلقت بي
من اني طفله جان يعجبني بس اصفن علي وكبرت واشوفه كدامي وهو الله يستر علي كلما جاله ويحلى اكثر وشخصيته تخبل تجبرني احبه واتعلق بي
اسماء: ياعيني ياشمه حته مانكدر ندخل تعرفين كلمته ماشيه على الكل من يوم الي تعارك وي ابويه وهو مايحجي بالبيت وخطيه ابوي شكد مقهور يكول البنيه مو من ثوبنه وحته ضل يحجي علي كاله هاي انت العاقل الي نكول عليك ماتطلع منك العيبه وابن شيوخ تالي تعشك وحده ماترهمنه
شمه: سألتهه بنبره حزينه هي حلوه وشسمهه؟؟
اسماء اي حلوه بس مو احلى منج اسمهه بلسم
شمه: ضحكتيني اني احلى منهه هههه
فوكاهه اسمهه بلسم تلكيهه بلسم على جروح قيصر
اسماء: الله يعوضج بلأحسن وانتبهي لنفسج
شمه: الله كريم
ضلينه نسولف بسرعه مر الوقت سمعت صوت ضرغام اجه هذا اخويه وصديقي ركضت اشوفه
لكيته لازم وسام ويجر بأذنه وهذاك يدافع بكل قوه
وسام: عوفني شنو تمد ايدك والله اكسرهه الك
ضرغام: ولك بكد الفصمه وتعلي صوتك على امك لابارك الله بيك
شمه: دعوفه ياضرغام صاير ولد بار
ضرغام: هد وسام ياهلا بشمه منين طلعت الشمس
اليوم الله مايخلصج ولج الله اخذج صار شهر لاكلتي ابن عمي خطيه
بس الصوج موبيج الصوج بلي يعتمد عليج
شمه: على كيفك شبيك انطلقت الظاهر ضايج وتريد اطلع حركتك بيه
ضرغام : تعالي ورا البيت حته انسولف
شمه: رحت ورا رغم ما ضرغام اكبر مني ب5 سنوات بس اني ويا اكثر من اصدقاء
كعدنه على حافه( الساكيه) نزلت رجليه بالمي وداير مدايرنه اشجار رمان وزيتون
اشوف انعكاس صورنه بالمي
وكل واحد بينه يحمل هم شكل وبداخله حب من طرف واحد
ضرغام: احجيلي شبيج مو على بعضج ومتغيره هوايه وليش ماتجينه
شمه: مابيه شي وملتهيه بالشغل
ضرغام: شمه اعرف شبيج بس صدكي انتي اكثر من اختي وما احب اشوفج تتأذين
نهايه حبج لقيصر عذاب وياخذج للهاويه
مدام من طرف واحد واكو فوارق بيناتكم راح تشوفين ايام تخليج تلعنين الساعه الي حبيتي قيصر بيهه
شمه: دنكت .. انت شمدريك احبه؟؟
ضرغام: اني ملاحظج من زمان لمعه عيونج من تشوفينه اكبر دليل هذا
وشوفي يابنت عمي اني الي مو يمي السالفه وانتبهت عليج وعرفت تحبي وهو ما انتبه ولا لاحظ نظره وحده منج لان عقله وكلبه عند انسانه ثانيه صح كلامي مؤذي وصعبه تسمعي بس هذا الواقع مستحيل قيصر يتنازل عن البنيه الي يحبهه
اخويه واعرفه صار 4 سنوات يح

بون بعض ماراح يتخله عنهه بسهوله
ما ننكر تختلف عنه وحته جانت مو محجبه ولبس قصير وتفاجأت ياشمه من شفت البنيه لابسه حجاب ولبسهه طويل ومستور الي عرفته قيصر ملبسهه الحجاب
شوفي حبهم لأي درجه واصل بحيث تسمع كلامه واطبعت بعاداتنه وتقاليدنه يعني مو بسهوله قيصر راح يعوفهه ولا هي تتخلى عنه
شمه: كلام ضرغام احسه سجاجين وتطعن بصدري حاولت اغير الموضوع لان ما اكدر اسمع اكثر وبلأحرى ما اريد اعترف قيصر يحب وحده ثانيه
اي ضرغام عوفنه من قيصر احجيلي عنك تدري نسيت شغلتك وشهد ما اجتنه ابد ما ادري ليش
ضرغام: تنهد وكال ياشمه مااعرف شكول صار ساعه انصح بيج وما اعرف انصح نفسي اني مثلج هم عايش حب من طرف واحد
شمه: شمدريك حاجيتهه غير تفتهم يجوز تحبك؟؟
ضرغام: لا ماتحبني من شفتج ماكو وماتجينه ما اتحملت رحت اريد اسأل عليج وتلكتني جايه الكم وكلت خلي اني احاجيهه
اول ماسلمت عليهه وكتلهه عندي موضوع وياج
شفتهه ارتبكت حيل وضلت تباوع منا ومنا خاف واحد يشوفنه
بدون مقدمات كتلهه اني احبج واريد اخطبج واذا موافقه حته ادز اهلي ماحجت شي بس عيونهه لمعت بفرح ماخليتهه تحجي كتلهه انتظرج منا لباجر هيج وقت رجعيلي خبر
تلكيني بالبستان يم شجره التين الي تفصلنه عنكم
ضليت انتظرهه وعيني على الدرب وكلساع اكول اجت طولت هوايه يله اجت مبينه خايفه تمشي وتباوع وراهه خاف احد يشوفهه
رف كلبي اول ماشفتهه معناتهه موافقه
تفاجأت ياشمه بشكلهه ضايجه ومكدره حته ماباوعت بوجهي وبس تفرك بأيدهه ولا عبالك هاي شهد نفسهه البارحه الي شفت الفرحه بعينهه
اباوع لحلكهه شوكت تحجي وتريح كلبي
احجي يابنت الناس قابله ادز اهلي
شهد: ضرغام هذا الموضوع سده ما الك قسمه يمي روح دور على غيري اني ما افيدك
ضرغام: فاجأني كلامهه ليش ما تفيديني اني اختاريتج واحبج وصار سنتين عيني على دربكم
شهد: ضرغام انسه هاي السالفه اذا تحبني صدك لاتجي بعد ولاتقرب يمنه
لا تأذيني الله عليك سد الموضوع وبعد لاتجي
ضرغام: حته ما انطتني مجال احجي بسرعه راحت تركض وعيونهه حمر مبينه باجيه ياشمه ما اعرف احد ضغط عليهه لو صدك ماتريدني
وليش كالت لاتأذيني؟؟
اذا جيتي بيهه اذيه الهه قررت ما اوصل لدربهم وحته كمت اطلع من الباب الخلفي حته لاتصير كبالي
شمه: ضرغام يحجي واني صافنه شنو الجاي يصير شهد ماحجتلي وما اشوفهه ولاتجينه وهي جانت يوميه يمنه
اباوع على ضرغام اشوف حالي بي شلون يرسم بالعوده على الكاع وهمه اكبر من همي
ردت اهون علي بس ماكو كلام يجبر خاطر المحب والمشتاك
لاتهتم ضرغام اني راح اروح استفسر واشوف شكو
ضرغام: لاسدي الموضوع مثل ماطلبت هي واني اضل انتظرهه منا لمن تفرج
شمه: ابتسمتله وكمت رجعت لاسماء
بيومهه للعصر ردت ارجع بس اتذكرت علاهن كلت خلي امر عليهه اشوفهه شيخلصني من السانهه
اجيت امشي وعبرت العبره بين علاهن وبيت عمي حسين اريد اروح لعلاهن هسه اكيد ترزلني لان صار شهر ماجايتهه
شباك غرفه علاهن طالع على الحديقه الخلفيه ومحد يمر مناك بس مدري شلون رجلي اخذتني ومشيت بهذا الدرب
صرت قريبه على الشباك اخذني الفضول لا اكثر ولا ابالي شي ردت اشوف علاهن برا لو بلغرفه
اول ماتقربت على الشباك سمعت صوت همس ونسوان ما اميز الكلام شنو بس مبين اكو احد بالغرفه وجاي يسولفن
ابتعدت وصرت بحافه الشباك وقربت اذني حيل البرده مرجعه ما اشوف شي بس سمعت كلمتين لا اكثر
علاهن تحاجي بوحده دكلهه اذا سمعتج حجيتي بحرف اساويج وي التراب مثل ام شتال
وكولي علاهن ماكالت
من سمعت هذا الحجي ارتعدت ورجعت ليورا دخيلك ربي شنو صاير وهاي بيمن تهدد ؟؟
بسرعه ركضت من الباب الثاني وسويت نفسي هستوني جايه اريد اشوف منو هاي الي يم علاهن وتهدد بيهه
كعدت يم مرت عمي حسن ومحسن
هن اخوات بس مرت محسن ابد مومثل مرت حسن
احسهه شيطانه وبداخلهه شي وليل نهار لازكه بعلاهن
بنت عمي حسن مخطوبه كعدت اسولف وياهه
وعيني على باب غرفه علاهن
سألت فوزيه عليهه
شمه: اكول عمه وين بيبيتي الشيخه؟
فوزيه: ماتدرين بالشيخه حلالة مشاكل المنطقه
هاي ام جاسم صديقتهه تجي يمهه ويكعدن يسولفن وام جاسم تستقبل شكاوي القريه ومشاكل النسوان وتوصلهن للشيخه تحلهن
شمه: هااا ايي الشيخه من يوم يومهه تخاف الله وتساعد الناس
فوزيه: اي الله يطول بعمرهه
احجي وبالي رايح بغير وادي شنو شغلهه ويه ام جاسم
وليش تهدده وهي اكثر وحده صديقه الهه
ام جاسم مرت فلاح عدنه بالبستان ومنطي بيت صغير وكاعد هو وعائلته
زين شبيهه مرت شتال اني الي ادري بيهه مرت
شتال ماتت بس شتقصد اساويج وي الكاع؟؟
قابل علاهن كتلتهه ؟؟
يايمه ياستار شنو علاهن ندري وكحه بس موتكتل ناس
جانت هاي الاسئله تفتر براسي انتظرت ام جاسم طلعت ورحت سلمت على علاهن
اخذت المقسوم من الرزاله بس ابالي الي سمعته وعلاهن طبيعيه ونفس كعدتهه وشيختهه
مابينت على نفسي بس ماكدرت اضل كاعده يمهن اترخصت منهه ورجعت للبيت وطول الطريق افكر واحلل قررت اراقب علاهن وافتهم شكو؟؟
وصلت قريب على بيت خالي سلمان كلت خلي اروح لشهد ولو اني م

ن يوم سالفه رافد وحجايه خالتي وسعاد ماطبيت بيتهم بس ضل بالي على شهد وخاصه بعد كلام ضرغام
هم بيتهم مقابيل بيتنه باب اباب احنه وياهم مايفصلنه غير سياج بس...
لكيت بابهم مفتوح طبيت اتمشى بالحديقه هستوني وصلت باب المطبخ صار بوجهي رافد سلمت علي جان سلامه جاف حيل وحته ماباوع بوجهي
والله يالله هم محسوب على الزلم وخبص نفسه اني اريدهه وانت صوت من ابوك سكتت
ما اهتميت كتله اريد اشوف شهد
رافد: فوتي جوه وشوفيهه
شمه: لا ما افوت لان اني من نسل علاهن واخاف الوثلكم البيت
رافد: شنو هذا الحجي شمه بعده براسج كلام ابوي
شمه: ليش انسى صوت امك وابوك الشيخ وهو ينتفض لان كتله اريدهه
استعجلت حيل انت جان اخذت رأي يله تحجي من سابع المستحيلات اقبل اتزوجك
رافد: لاتخربطين بالحجي واني على كلمتي لسه وجاي اقنع بأبوي حته يوافق
يجوز تشوفيني مو مثل قبل ما اريد اسببلج مشاكل بس قسما بالله ما اتنازل عنج ابد اكدر هسه اخذج والي يصير يصير بس ما اريد تصيرين الضحيه ويحملوج ذنب فوك ذنب ابوج
شمه: لاتعب نفسك وتقلل من شأن ابوك الشيخ لان علاهن ماتقبل بيكم ولا اني اقبل شيل هاي الفكره من راسك موعبالك من اتشاقه وياك معناتهه احبك لا متوهم انت وغلطان هوايه
واني راح اروح وعود كول لشهد خلي تجيني بيبي تريدهه
عفته وطلعت فرغت الي بكلبي وخاف عباله اني هم اريده ابن سعيده وصلت للبيت اسمع هوسه جهال عبالي وحده من خالاتي هنا
اول ماطبيت شفت امي كاعده والنسوان داير مدايرهه وتسولف وتضحك
كلت السلام عليكم الموجودين ردو السلام وامي وحرامات اسميهه ام دارت وجهه عني ولاعبرتني
اني هم مابينت على نفسي طبيت للغرفه منعت دموعي تنزل ما اريد اضعف وانقهر ماتريدني خلاص اني هم ما اريدهه ضليت كاعده وصافنه ليش حياتي هيج
خسرت دراستي لان كسلانه
قيصر يحب ومحارب اهلهه لاجل حبيبته
امي واخواتي مايريدني
زين اني السويته شنو؟؟ ليش هيج ماعندي حظ فززني من صفنتي صوت شهد ...
شهد: وين صافنه شمه افندي
شمه: ياهلا يولي وين جنتي هالمده وبالي عليج
شهد: عدنه شغل بالبيت وما الحك اجي
شمه: شهد لاتكذبين اني اعرفج ومن عيونج بيج شي وبعدين تعالي شو ماكلتيلي ضرغام محاجيج ويريد يخطبج ابوس بيهه واحجي
شهد: شبيج انطيني مجال خلي اخذ نفس تلكيتيني
شمه: يله ست شهد اكعدي واحجيلي كولشي ترى والله اموتج شلون ترفضين ضرغام ولج جان خلصج من سعاد وبناتهه
شهد: دنكت والدموع تجمعت بعيني ضرغام حبي الوحيد وتخليت عنه ماتعرفين ياشمه شنو المضموم وشنو الي خلاني اسوي هيج؟؟
شمه: شبيج بلعتي لسانج ماتحجين ليش رفضتي ضرغام وغيرج الف وحده تتمنى وكلنه ندري ولد عمي حسين الوحيدين بالقريه دارسين وحلوين وشخصيتهم تخبل وفوك كل هذا ملتزمين بعاداتهم وتقاليدهم فهميني شبيج ساكته الي مثل ضرغام ينرفض شتريدين حضرتج
شهد: شمه الله عليج عوفيني بحالي ابن عمج كلتي الف وحده تتمنى اني مو من هذني الف لا اتمنى ولا اريده خلي يشوف غيري وهو حباب ومثقف ودارس خلي يشوف وحده من مستوى اني ما افيده
شمه: ليش هيج تحجين واذا مادارسه انتي مو من حقج تحبين وتنحبين ضرغام يحبج ياشهد ومستعد ينتظرج بس اخاف انتي ابالج غير شي وبالذات ضرغام مايستاهل يتأذى
شهد: شمه على ساعه يجيني واحد زين بنظر ابوي الشيخ ويزوجني خلي يشوف حياته ولاينتظرني
امانه شمه حملي هاي الرساله وكليله دكول شهد
لا يفوت بدربنه بعد ولا يمر بنفس الطريق الي كل مره يجي منه
خلي ينساني ما اريد اشوفه اني ما افيده ولايحاول يحاجيني بعد
شمه: ماكدرت تكمل كلامهه بجت بسرعه وعافتني وطلعت ضليت صافنه هاي شبيهه عيونهه وكلشي بيهه يكول اني احب ضرغام بس السانهه يحجي العكس معقوله صاير شي وما تريد تحجي؟؟
ياربي بيمن افكر بروحي بقيصر بضرغام وشهد لو امي الي برا
تعوذت من الشيطان وطلعت صارت بوجهي بيبي نوريه
الحجيه: غمه ليش ماسلمتي على امج منين شايله كل هالغل والحقد بكلبج
شمه: موسلمت وماردت السلام شسوي بعد؟؟
امي: وحضرتج تستنكفين ادنكين عليه وتبوسيني ولج اني امج لونسيتي
شمه: اي نسيت انتي امي لان امي من اطلكت لهذا اليوم شفتهه مرتين لا اكثر ماكلفتي نفسج بيوم وسألتيني شمحتاجه عندج ملابس لا؟ بنفسج شي ومستحيه تحجين؟
شوفي الامهات شلون صبرن وكعدن على جهالهن وانتي ماصدكتي بس طلعت العده انخطبتي
وعفتي وراج طفله ماتعرف شي ومحد علمني ورشدني خلف الله على عمتي فضه
وهسه جايه ودكولين اني امج
اني ماعندي ام ولا اب ولا اخوات سمعتي لو اعيدهه لو اتقرب عليج تجرين شعري خاف ضوجج كلامي
عفتهه وطلعت واسمع وراي السب والغلط حته كامت تفشر عليه
والله يا الله العتب يسموهم شيوخ والناس تحلف براسهم وهم مايدرون شنو من نوعيه بشر
هواي اكو مثل عمامي وخوالي من يكعدون كدام الناس الكل تمدح باخلاقهم وعفتهم وكرمهم وهم مايدرون كل احترام ماعدهم ويعلمون الصغير على الغلط والسب مع العلم جدي ظاهر وجدي حبيب الكل يحمد بيهم وماطلعت منهم العيبه...
ضليت حايره وين اروح خوما اضل افتر بالبيوت ولا اكدر اطب البيت

والجو بعده مشحون
عدنه ورا البيت اشجار مال رمان ونارنج رحت اتمشى صايرات مقابيل بيت عمي حسين
كاعده وعيني على دربهم اباوع على البستان والاشجار الكثيفه شكد بي خيرات هالمكان ما اعرف ليش ينتابني شعور غريب
وكأنما كاعده بسينما واباوع كدامي فلم بلحظه اكوم ما اشوف الي كدامي اشوف هاي القريه عباره عن رماد والنار مشتعله بيهه
الاشجار والنخل وشجره الزيتون الي احبهه مشتعله بيهم النار وتبلع الاخضر واليابس
اتعوذ من الشيطان وارجع لطبيعتي وصوت زقزقه العصافير عالي وعيني بعدهه على درب بيت عمي
شفت سياره قيصر طبكت بالباب
بس شفتهه كلبي خفق كمت وكفت واني اتأمل طوله ومشيته الابتسامه انرسمت على وجهي ونسيت قيصر مو الي
بلحظه انعصر كلبي واني اشوف بنيه تنزل من السياره لابسه بنطرون وعلي قميص للركبه ما اشوف شكلهه من بعيد بس شفتهم طبوا سوه للبيت
عزا بعينج شمه بسلا قيصر تزوج وجاب مرته ويا
ياربي صعب هالامتحان شعور الحب من طرف واحد قاتل قاتل
#يتبببببع

#البارت الثامن
#وحوش بشريه

مدري شبيه من اشتآگ ؟!
                 عطرك يوگف بـ #عيني
و اروح 'اركض'
   ركض عميآن عـ 'الشبآچ'
      و ارد مآكو و الِم فشلة #روآزيني
#الَهي ،،
    ارويحتي بـ يآ رآي ؟
                     من تلتم #حيآطيني
لحظه شفت قيصر وتمشي بصفه هاي البنيه كل براكين العالم هاجت بداخلي صرت مثل المخبله اروح وارجع بمكاني اريد اروح لبيتهم واوكف اخاف يبين عليه وانهار
اريد ارجع للبيت وتذكرت امي بالبيت واكيد تسمعني حجي واني منا متخبله
ياربي شسوي اذا طلع قيصر متزوج
لاشمه شجاج مايسويهه قيصر نسيتي قيصر شنو ما تطلع منه العيبه وعمي حسين يعتمد علي بكولشي والكل تعرفه صاحب اخلاق ويحضر بالكعدات والفصول
جنت اقنع نفسي ساعه اكول متزوج وساعه لا
ياربي هذا موحب هذا عذاب
ما اتحملت كلت خلي اروح والي يصير يصير لان اذا ضليت انفجر
رحت امشي سريع وكل خطوه اسويهه 4 خطوات وصلت لبيتهم والباب مسدود
اشو ماكو هوسه ولاعياط عمه فضه شنو معقوله كلهه تدري بي متزوج؟؟
اني ما ادك الباب افتح واطب وصلت للباب المطبخ شفت اسماء واكفه يم السنك ركضت عليهه لزمتهه من زندهه واعت بيهه
شمه: يولي دحكي عليه اذا كلتي هاي مرت قيصر ادفنج بحوض السنك
اسماء: يولي ايدي انخلعت عوفي ايدي هاي بنت خالي  احمد من ببغداد شبيج تخبلتي
شمه: تركت ايدهه واخذت نفس احس نار وتطلع من  اذاني وخشمي
كعدت على الكرسي واسماء جابتلي مي
اسماء: هسه اني شحاجيج شوفي روحج شلون صرتي والله كلبي يتكطع عليج ولج شمه قيصر مايفيدج لاتفكرين بي والله اخويه مايفيدج لاتسوين بنفسج هيج اعبري النهر مدامه ضيك
شمه: اسماء سدي حلكج ترى واصله حدهه
اسماء: اشربي مي وارتاحي على كيفج لاتجي امي وتحقق وياج وبعدين نحجي ولو انتي الحجي وياج مامنه فايده
شمه: حاولت اهدء لا انفضح وتشوفني عمه فضه وفشله منهه شأريد اكول احب ابنج عمه وخو مايحبني
عمه بعينج شمه لا فكرتي بالفوارق شلون سمحتي لكلبج يهوى واحد حاسبج مثل اختج 
بعدني كاعده  وااجت بنيه اكبر من عدنه لابسه بنطرون قماش اسود وفوكا قميص مخصر على جسمهه فد حلوه حيل حته تنطي شبه لعمه فضه
ادري هذوله مصنع مال كيك سلمت عليه وعرفتنه اسماء على بعض
اسماء: شمه هاي ساره بنت خالي احمد
شمه: اهلا وسهلا
اسماء: ساره هاي اختي وصديقتي الي احجيلكم عنهه شمه بنت عمي
ساره: اهلا وسهلا دائما اسماء تحجيلي عنج وشلون ادافعين عنهه بالمدرسه شكد عاجبتني شخصيتج
شمه: شكرا حبي شعندي غير اسماء احبل اجيب
ضلت تسولف ويانه الي عرفته جايه زياره وجايبهه قيصر مخلصه معهد معلمات
ضليت صافنه عليهه شكد حلوه وقيصر ما باوعلهه ولاحبهه وراح حب وحده ثانيه وتريدين يحبج ياشمه
كميه اليأس الي بداخلي ماتنوصف احس احلامي تتحطم شي ورا شي
استأذنت ورجعت لبيتنه خاف تحجي عليه الحجيه
امشي بخطوات يائسه وضحكت على نفسي شلون فرفح كلب من شفت قيصر وعبالي مرته ونسيت قيصر مو مثل ابوي وينهزم ابنت العالم يختلف عن عمامه جذريا والناس ابدال ماتجي لشيخ حسن اول مايجون يدكون الباب على قيصر يوم عن يوم احبه اكثر واتعلق بي
مع العلم رافد ماقاصر وهم جمال وشخصيه بس ليش كلبي حب قيصر الي اكبر مني بهوايه
كولشي غريب بقيصر طبيعته تختلف هادئ حيل على الرغم شكد يختلط وي شيوخ وناس كبار بس طبيعته هيج
بعدني امشي والدنيا بدت تغرب وخيط الحمار مال الشمس صار واضح عدنه بالجهه الثانيه مال البستان حلال واشجار كثيفه
عجبني امشي من هذيج الجهه يعني تصير فره يله اوصل للبيت
امشي واستنشق الهواء العذب وريحه الاشجار تفوح من كل مكان صوت زقزقه العصافير والحمام الطاير الي راجع لعشه
بالي سارح بهذا المنظر الحلو وما احس غير صوت الثور شعلوه
التفتت وجان اشوف الثور ما مربوط زين والحبل راح ينفتح اني بهاي اللحظه وكع كلبي كمت امشي على سريع اريد اوصل للبيت شجابني منا كمت اسمع صوت رجلين الثور معناتهه انفتح التفتت واشوفه مفتوح ويمشي وراي بس ما يركض ويفر بحلكه معناتهه ياكل
اني هنا نزعت نعالي وشلته بيدي وركضت واركض والثور من شافني اركض هم ركض وراي
بهاي اللحظه قطره دم ماضلت عندي
اتخيل الثور يشيلني بكرونه ويشمرني ليفوك لو يدوس ببطني
ماحسيت غير على واحد يجرني وخلاني ورا
باوعتله هذا رافد..
رافد: حجي سلطان ليش هيج عايف الثور مفتوح
سلطان : والله يا شيخ ما ادري الحبل ما مشدود زين
رافد: واليرحم والديك حجي اخذه منا ورجعه لمكانه
التفت عليه منظري يفشل نعالاتي شايلتهن بيدي والخوف مسيطر عليه
رافد: بس اريد افتهم انتي شنو من طينه يولي مو شليتي حالي يوميه الكاج مسويه مصيبه
شمه: نزلت النعال لبسته واحجي
شبيك رافد هو ما رابطي زين وجاي تحاسبني يمكن اني الي كتله تعال اركض وراي
رافد: وانتي شجابج من هين مو هذاك طريق البيت
شمه: ردت اشتم هوا مايصير لو لازم ناخذ اذن منك ياحضره الضابط
بعدني احجي وماحسيت غير الكرصه اجتني من شفايفي عطت اااخ
شبيك شنو هالميانه العندك لا وفوكاهه شيخ وابن شيخ بس الظاهر نسيتوا نفسك

م شويه شويه وما كمتو ماتميزون العيبه
رافد: والله ياشمه اذا ماسكتي اكص السانج هذا الي مايعرف يوازن الحجي يولي وريتي كلبي ور
وتالي وياج ليش تخليني اجبرج واتزوجج غصبا عليج 
شمه: على كيفك سيدي يتزوجني
ليش ماتخاف من ابوك يتبره منك
والله يالله اسمع رافد انسه هاي السالفه ولاتخلي ابوك الشيخ يغضب عليك
عفته ورحت  اركض اخاف منه بس اسمع يسب ويلعن ويصيح اني اعلمج
وصلت للبيت امي موجوده بس كالعاده مامعبرتني ولا عبالك تشوفني اكو رغبه بداخلي اروح اعاتبهه افرغ الي بكلبي واكولهه ليش ما طايقتني شمسويه الج
مجرد ما افكر بأمي واشوفهه شلون مامهتمه الي احس داخلي يغلي
اروح اغسل وامسح ركبتي بمي بارد واني بعدني عصبيه المشكله من اعصب انفعل واكوم اخربط بالحجي
تعشينه واللمه حلوه وضحك وسوالف بس اني احس ما الي وجود بيناتهم اباوع لامي شلون حاطه جهالهه وتوكل بيهم وماتخليهم يكومون الا يشبعون
الغصه توكف ابلعومي تمنعني حته اكمل اكلي
بعدما الكل كمل عشا وكفت اغسل هالمواعين الغضب بس من العصر اني عصبيه واريد افرغ عصبيتي بواحد
كملت مواعين واخذت ملابس وبوجهي للحمام الجو بي بروده غسلت بمي بارد ثلج من يوكع على جسمي احس اسناني اطخ واحد بثاني يبرد جسمي وكلبي مايبرد
ااخ ياكلبي شحامل قهر وانت بعدك ماوصلت العشرين ..
طلعت نشفت شعري ولفيت نفسي بالبطانيه ونمت ما اريد اسمع الاصوات الي برا وارجع الوم بنفسي
فزيت من النوم واحس نفسي قطعه مال نار جسمي مشتعل نار كوه فتحت عيوني وباوعت لساعه شفتهه ب11 وبعدهه الاصوات برا والضحك والسوالف
كوه كمت من مكاني وطلعت برا صارت شهد بوجهي اشرتلهه تجي
اجت تركض خطيه شافتني حاره جمر
شهد: يولي شمه مصخنه وحرارتج مرتفعه
شمه: اون وكوه احجي وعيوني احس يطلع منهن جمر
شهد: ركضت على ابوي الشيخ
يابه شمه مصخنه وحرارتهه مرتفعه وحته تهذي
سلمان: خير بويه شبيهه العصر شفتهه شحلاتهه
اجت بيبي نوريه وخالي سلمان والكل متجمع فوك راسي افتح بعيوني اريد اشوف امي ادورهه بين الوجوه ماكو
ليش يمه هيج اني رخيصه عندج
شنو الذنب السويته وهيج معاقبتني
كلبج ما يأذيج وضناج مريض والله حرامات اسميج امي
اسمع خالي سلمان يكول قيصر هنا خلي نوديهه اله كومي بويه شهد حضريهه وروحي وياهه احنه مانطب كاع علاهن
اريد احجي واكول لا ما اريد اشوفه بس اشوفه اتخربط بالزايد مايدرون اغلب قهري من حبي لقيصر
لبستني شهد عبايه اسلاميه وشال على راسي وطلعت اسحل بنفسي سحل طلع ويانه خالي نعمان ونوفل ووصلونه وانتظروني نطب يله راحو وكالوا خلي عمج حسين يوصلج
شهد: ادك بالباب هاي اول مره اطب بيت اهل  ضرغام وكلبي ينبض سريع ما اريد اشوفه
ما ردت اجي بس بعد كال ابوي الشيخ وما اكدر اكول لا
شمه: ولج افتحي من جوا وفوتي واكفه ادكين سنه مايطلعون ..
شهد: يولي عيب شلون انفوت بدون استأذان غير يطلعون هم
بعدني احجي وجان ينفتح الباب اخر
ماردت اشوف بهاي اللحظه  ضرغام بس الحظ دائما اعوج شفت نظراته متفاجئه وعينه عليه ونسه شمه الي ذابه نفسهه كوه ساندتهه
طولت نظراته اشوف بعين ضرغام حب ولهفه وعتاب 
عين ضرغام تحجي كل معاني الحب والاشتياق
ضليت ادحك بعينه واحجي بكلبي حقك ما الومك ماتدري الي بيه شنو ياحبيب الروح
لوتدري جان عذرتني ...
شمه: ضرغام مو هسه ادحك حيل ماعندي بعدين اصفن
ضرغام: هاااا تفضلوا بس تفاجأت منو جابكم بهالليل اشو وحدجن
شهد: شمه مصخنه ومريضه وعمي نعمان جابنه وكال خلي يشوفهه قيصر
ضرغام: تعالو تفضلوا
اسماء؟؟ يمه وينج تعالي هاي شمه مريضه
اجت عمه فضه سندتني احس طاقتي خلصت واريد اتقيء ركضت للمغسله وكوه اخذ النفس
اسماء وشهد واكفات يمي واني حالتي حاله كله من ورا الوكاحه مالتي وسبحت بمي بارد
فضه: ياداده شبيج مو جنتي العصر تخبلين روحي يمه سومه اخذبهه للغرفه بين ما اصيح قيصر
اخذتني اسماء لغرفه عمه فضه كعدت على الجربايه وعيني على شهد اشوفهه تلوب لان شافت ضرغام نظرتهه مال عاشق ولهان بس ليش رفضته ما اعرف
اكو اسرار خفيه ولازم اكشفهه بس خلي اصير زينه
فوك كل هذا واني افكر شلون راح اشوف قيصر وصار شكد ما ملتقيه بي كلبي ينبض سريع ورجليه تهتز بيه عاده من اتوتر وانفعل اكوم اهز برجليه بحركه لا اراديه
دائما قيصر بالدوام ما اشوفه هواي وحته من يجي صدفه اشوفه ولو يحجي كلمتين لو ماكو من يجي يخلصهه طلعات ويه ابو وصيد وفصول واذا التقيت بي ماطول دقايق
وكل هذا وبعدني متعلقه بي حته...
راحت عمه فضه صاحته يجي يشوفني واسماء وشهد كاعدات يمي بس اني بعالم ثاني اهيئ بنفسي شلون راح اشوفه اهدي بكلبي لا تفضحني دكاته
واني بوسط تفكيري وتضارب دقات كلبي
غمضت عيوني اخذت نفس طويل اشتميت عطره ومليت صدري بي نبهني صوته وهو يسلم
قيصر: هاشمه شبيج سلامات شنو يوجعج؟
شمه:مو دكتور انت غير تعرف شبيه لعد اني اشرحلك
قيصر: اني طبيب مو كشاف حته اعرف شبيج ادري هذا السانج اكصه شلون يولي عيب عيب كبرتي السانج الزمي صاحيه مريضه تمطرين مطر...
شمه: شكول عليج شهد ج