بتيني حته اترزل يابه مابيه شي طبت لا خلفله الله عليك عندك خوش علاج لمريضك ترزله ويطيب مفعوله قوي
قيصر: اسماء روحي جيبي علاكه مال دوا فوك هاي بدت تهذي وتخربط
يابنت عمي سألتج شنو يوجعج بشنو حاسه جاوبي على كد السؤال حته اعرف شبيج...
خله ايده على كصتي واني فزيت لمسته سحرتني ذوبتني
قربه وترني اني كاعده على الجربايه وهو صاير مقابيلي صوت انفاسه شلت حالي كمت ابلع بريقي كوه ومنا الصخونه بعد ماعندي قوه بلحظه راح اضعف ويبين عليه
اجت اسماء جايبه العده والادويه خله السماعه بأذانه وكام يفحص بيه اول ماخلاهه على كلبي زادت حالتي سوء اعتقد صوت دقات كلبي توصل لعلاهن
رفع راسه عليه واجت عيني بعينه جانت نظرته غريبه ونظره متفاجأ وكأنو يكول شبي كلبج يدك بهالسرعه؟؟ ضل مركز عليه بسرعه نزلت عيني والسماعه بعدهه على كلبي الي فضحني كل انواع الالحان كام يعزف..
ابتعد من يمي وحسيته متفاجأ عبالك اكتشف بيه مرض خطير لاسامح الله
فتح ابره وخبطهه وانطاهه لعمه فضه ضربتني لان تعرف هو معلمهه
مددت على الجربايه واني فاصله عن السوالف الي يمي افكر بنظرته ليش مستغرب وكلساع اخلي ايدي على كصتي واشم ايدي لان جانت لمساته هنا...
حسيت نفسي احسن وبدت حرارتي تنخفض ضلينه نسولف ويه عمه وهي تسألني على امي ليش ماتجي تشوفهه ملتهين بالحديث وانفتح الباب عدلت كعدتي لان جنت مدده
قيصر: ها شلونج صرتي؟؟
شمه: ما اعرف ليش استحيت كوه طلعت كلمه زينه من عندي
ماحجه شي بس كال اجر وعافيه ان شاء الله وطلع
احاول اشتت افكاري حته مايبين عليه ...
باوعت لساعه صارت ب12 تأخر الوقت حيل
شمه: عمه شوفيلنه واحد من الولد يوصلنه لان تاخرنه
فضه: باتوا يمنه اليوم يم البنات
شمه: لا عمه هسه الحجيه ضل بالهه خطيه
فضه: كومي اسماء شوفي اخوانج منو كاعد خلي يوصل البنات
طلعنه بعد ماسلمنه لكينه ضرغام واكف بالباب ومخلي لفاف على ركبته شهد تمشي وتتعثر
نمشي واحنه ساكتين اريدهم يحجون ماكو بس صوت انفاسهم 
سرعت خطواتي وصرت كدامهم كلت بلكي يحجون وهم ماكو شي
راح نوصل قريب على البيت وضرغام حرف واحد ماحجه
صرنه مقابيل بيت خالي الشيخ ما احس غير شهد عافتني وركضت لبيتهم واني اصيح وراهه شهد شهد...
التفتت على ضرغام هاي شبيهه اشو انهزمت
ضرغام: ما ادري يولي عبالك اني ملك الموت كدامهه هي تشوفني والدموع تجمع بعينهه وتنهزم
شمه: شفته شلون يحجي بقهر ويتنهد
لاتهتم ضرغام لازم بيهه شي اني راح اكعد وياهه واحجي واشوف ليش هيج تصرف
ضرغام: لا شمه لاتجيبين اسمي كدامهه عوفهه مثل متريد لو مادنيا ليل ووحدجن والله ما امشي بدربكم وهاي اول مره واخر مره اعتب بهذا الطريق
وصلت للبيت واني مقهوره من تصرف شهد حته ماحجه شي شكو هيج انهزمت وعبالك واحد يركض وراهه
لكيت بيبي تنتظرني والبقيه نايمين خطيه مانايمه الا اطمنت عليه ونومتني بحضنهه يله احس من امي الي تشخر وبسابع نومه هي وجهالهه ولا انتظرت وكالت خلي اشوفهه شلون صارت
مابيه حيل افكر واندب حضي رجعت لعالم قيصر افكر بي واتخيل كل جزء منه لحدما  استسلمت للنوم
شهد...
احنه نمشي ويه ضرغام وكلساع اريد احجي واعتذر واكوله سامحني موبيدي انتظر منه يحجي حته احجيله الي بداخلي بس هو ساكت بس صوت انفاسه عاليه
استجمعت قواي وردت احجي وانتهز الفرصه مدام ماكو احد
تفاجأت بالشي اليمعني وسبب بعدي عن ضرغام
ماكدرت اضل اتمشى وياهم واني اعرف هاي الليله مراح تعدي على خير وراح ادفع ثمنهه غالي....
#يتببببببع

#البارت التاسع
#وحوش بشريه

تعال وياك اخذني وخـــــل نروح ابعيد
ونعيش الفرحه كافي وخل نعوف الهم
تعبنه الوكــــــــــت والقدر بينه يدوس
مجروحين احنه والجرح يلجـــــــــــ م
محد بينه داري وعذبانـــــــه الحــآل
والك هذا الحجي يل وحــــدك التفهم
كل شي يخـون بينه لكن انه ويـــــآك
ابد منخون حبنه وربك اليعلــــــــــ ـــم
شهد....
اني شهد مواليد 1990 ابوي الشيخ سلمان المعروف من عشائر الانبار الكل تهابه وتحترمه لان حقاني ويخاف الله وايده مو اله ويساعد هوايه ناس وخاصه اليتامى والفقراء بس للاسف هاي الصفات كدام الناس بس ويه عائلته انسان ثاني كولشي عنده غلط ومايصير عنده اهم شي يهتم بالناس والعامه واهله اخر مايفكر بيهم عنده الولد الكل بالكل والبنيه عباره عن خدمه..
عنده عيب البنيه تدرس وتطلع من بيت اهلهه وتختلط بالولد كلنه البنات نوصل لصف الثالث متوسط ويبطلونه بس الولد يدرسون ماكو الفه بيناتنه لازم من يدخل الشيخ الكل يلتزم بلاوامر وماكو صوت ولا اكو وحده تناقش وتبدي رأيهه وتحجي مايفرق بيناتنه الكل سواسيه ماعنده وحده مقربه البنات خلقن خطار ابيت اهلهن هاي الحجايه دائما اسمعهه من ابوي الشيخ...
جنت اشوف شمه واحسدهه لان تدرس ومايكدر يبطلهه لان يخاف من عمهه حسين
رغم حياه شمه وماعدهه اهل بس احسدهه على قوتهه وماتسكت ابد واغلب المشاكل الي تواجهه بسبب السانهه
كلما يجي احد علينه الزم كلبي خاف يزوجني وما اكدر ارفض لان الي ترفض معناتهه عدهه حبيب
وام ماعندي توكف بجانبي وتساعدني..
ابوي الشيخ متزوج اثنين سعاد الاولى الي هي ام رافد وامي الثانيه بيوم ولادتي جابتني امي وماتت صار عدهه تسمم من هذا اليوم اني صرت تحت رحمه مرت الاب
شهد عدهم بس للخدمه والشغل واذا واحد عصبي ضايج يفرغ عصبيته بيه من اني طفله وسعاد ابد ماعاملتني حالي حال اخواني دائما تعزلني عن اخواتي وماتخليني اختلط بيهن
حته من نتغده لازم اتغده بعيد عنهم بس اذا ابوي موجود ماتحجي زرعت الحقد والغل بكلب بناتهه وخلتهم يكرهوني على اقل شي اتعاقب وانظرب نوفل ورافد يدافعولي ومايقبلون بس تخليهم يطلعون وتبدي تمارس حقارتهه وضربهه
احنه 5 بنات 3 الكبار متزوجات والجبيره سماح نسخه من امهه ومتزوجه ابن خالهه وقريبه علينه كلساع تجي وبراء واني ما متزوجات...
براء اختي وغلط اسميهه اختي هاي اكبر مني بسنه مستعده اتحمل ضرب واهانه سعاد ولا اتحمل ضربه وحده من براء
هاي بيهه حاله نفسيه لان موحلوه وتختلف عن اخوتهه صاحبه بشره سمره ونوعا ما سمينه وعدهه الفك الاعلى طالع ليكدام مع العلم كلهم حلوين بس يكولون طالعه على خالتهه
براء اسم على غير مسمى ماتحمل اي برائه وداخلهه وسخ وحقوده تكرهني حيل اكبر مني بسنه بس هي لازمه البيت لان اخواتهه متزوجات وامهه منطيتهه كافه الصلاحيه واول صلاحيه تملكهه هي ضرب وعقاب شهد
مرات يجي رافد يلكاني ابجي لان ضربتهه توجع ويرجع يصيح عليهه ويتعارك ولايفيد وكحه بشكل فوق ماتتصورون وابوي مكيف عليهه يكول بنت الشيخ بعد لازم تصير سباعيه وهو مايدري سباعيتهه ماتطلع بس على شهد
شكد ادافع عن نفسي وارد عليهه واتعارك بس تجي امهه معناتهه يصير الحساب حسابين
مره جنت انظف وشكد تعبت ورا ماكملت كالت تعالي عيدي التنظيف مايعجبني اني هنا انفعلت وتعاركت وياهه كتلهه اذا ماعاجبج انتي نظفي ما اشتغل عندج حركي نفسج شويه موبس تنطين اوامر..
هل أنت وحدك؟ العب هذه اللعبة الآن!
هاي الحجايه حركت الشيطاين البداخلهه كامت عليه اول ماجرت شعري ومسحت بيه الكاع وتصيح ماتنظفين مو هسه انظف الكاع بيج
احس شعري تكطع بيدهه وهي ضخمه ومحد بالبيت اتوسل بيهه تعوفني انظف هسه بس مايفيد لازمه شعري بيدهه وتجر بيه احس الا شويه راح ينشلع من جذره ادعي واحد يجي ينقذني لان شكد ماحاولن اضربهه وادافع ماكدرت اضخم مني ومكوشه عليه...
بهاي اللحظه فززنه صوت رافد وهو يصيح عليهه
رافد: براء شيلي ايدج من شهد لا اكسرهه واعلكهه بركبتج
شهد: هدت شعري بسرعه ركضت ورا رافد كتله شوف خصل شعري وكعت وكمت اطلع بيدي واشوفه عضاتهه وضربهه الي كل مره يترك اثر بجسمي
رافد: هاي شمسويه بيهه ولج بنت الجيران عدوتج هي لو اختج مربين وحش بالبيت
براء: الي ماتسمع كلمتي اكسر راسهه وتخدمني غصب عنهه واذا ماعجبهه اخلي ابوي الشيخ يعلكهه من شعرهه
شهد: لاول مره اشوف رافد هيج عصبي وعيونه تجدح نار
هد على براء جرهه من شعرهه وكل راشدي ضربهه صوته يرن كلما تلتفت يجيبهه براشدي ثاني
اول مره هيج ينفعل ويمد ايده على اخته دائما يكول الحرمه ماتنطك الا بالغلط الجبير
واكفه اباوعله جان يصيح بيه صوت كمزني من مكاني وكال فوتي للغرفه...
من خوفي ركضت للغرفه وسديت الباب اسمع صوت براء تتوسل بي ودكله اني اختك بنت امك وابوك تضربني علمود هاي...
فتحت الباب شويه اشوفه اخذهه سحل للطباخ وفتح النار وهي تبجي ودكوله التوبه اتشاقه مو قصدي كل الاخوات يتعاركن....
رافد: وحق الله يابراء اذا عدتي هاي الكلمه مال خدامه ولو اشوفج مره ثانيه لازمه شعر

ه من شهد وحق من انزل القران
اطبع هاي السجين على حلكج تحترمين شهد وحرف واحد ماتحجين وياهه اياج وبالج اسمع منهه شكوه ودكول براء كالتلي هيج واجبج تحترميهه مثل مامحترمتج سمعتي لواعيد..
براء: اي والله ما عليه بيهه اخر مره هاي بس عوفني
شهد: شفته شمرهه بعيد عنه وطلع اني بسرعه سديت الباب وقفلته لاتجي اطلع حركتهه بيه
رغم الكتله الحصلتهه من براء بس شكد فرحت من دافع عني رافد هاي حسيت بفرحه جبيره
لان وياي اخ يسندي ويوكف بوجه الي يأذيني
من هاي اللحظه زاد كره براء عليه ما تحجي وياي وتضربني اذا رافد موجود بس ماقصرت هي وامهه اشكال التهم ذبوهه براسي وابوي الشيخ الي يعاقبني
كمت من اشكي لرافد ويرجع يحاسبهه امه اطلع اشكال تهم وتبرئ بنتهه وتذبهه براسي ودائما الحجي يصير كدام ابوي الشيخ ويرجع عليه يحاسبني
مرات اسمع ابوي يحجي وي رافد يكول بس يجيني واحد على شهد انطيهه تسبب مشاكل ومأذيه براء وتعير باختهه لان احلى منهه ..
جنت اسمع رافد يرد علي ومايقبل بالحجي ودائما يكول محد يقرر مصير شهد غيري ما ازوجهه الا واحد يستاهلهه
مرات ادعي يجي واحد يدك بابنه واتزوج واخلص ومرات اكول لا ياشهد كافحي وناضلي من اجل حبج بس الظروف تحكم وتخلي الواحد يمشي بطريق مايريده وماجان حاسبله حساب
اذا ضليت بهاي الفهاوه والخوف اخسر ضرغام بس اني اعرف من المستحيل ابوي الشيخ ينطيني الهم على الرغم يحب عمي حسين حيل بس يكره محسن وحسن وبينهم عداوه...
دائما اشوف ضرغام ابن حسين يجي على شمه ياخذهه لو يجي على رافد لان هو ويا نفس العمر رغم العداوه بس احنه الاحفاد اكو علاقه والفه بيناتنه
حبيت ضرغام حيل يوميه اروح ورا البيت عدنه اشجار عاليه صايره مقابيل بيت ابو قيصر اضل شكد كاعده انتظر ضرغام يطلع لو يروح للدوام حته اشوفه مرات من نتلاكه صدفه احس عيونه تاكلني اكل بس مايحجي تعلقت بي حيل واخاف احجي لشمه خاف تروح تحجيله وعيبه عليه بنت شيخ وتتودد  للولد
جانت شمه كل ماتجي من عدهم اسحب كلام من عدهه وتحجيلي عن ضرغام شكد شمه وكحه والسانهه متبري منهه بس داخلهه نظيف وبريئه الي بكلبهه على السانهه
صرت يوميه احلم بضرغام يخلصني من ضيم مرت ابوي ومن ارجع للحقيقه واتذكر الكره الي بين العائلتين تنطفئ شمعه من شموع الامل الي عندي
لحدما اجه اليوم الي اجه ضرغام يسأل على شمه وبهاي الحزه اني جنت برا وشافني
بساعتهه ارتبكت حيل من كال اريد احجي وياج
عيوني لمعت بفرح واحس كلبي طاير من الفرح
من كال اريد اخطبج وفكري على راحتج وباجر انتظرج يم شجره التين ردت ارجعله الجواب هسه واكله ما احتاج تفكير انت ضرغامي واملي الوحيد
بس ردت شويه اصير ثكيله وخليت الجواب على باجر رجعت للبيت واني الفرحه ما سايعتني احس نفسي طير ومحلق عيوني وكلبي كلهم فرحانين ما اصدك ضرغام هم يحبني من جنت اشوف نظراته اكول لا اني متوهمه
معقوله اصير مرته وهو مثقف ودارس وحلو وشخصيه شكد يحجن بي بنات القريه من ننجمع بعدما جانن يحجن بقيصر بس من صار دكتور حولن على ضرغام لان صار نسخه من اخو...
افكر باجر من اروح شراح اكله اني احبك؟، لااا
اكله اني موافقه! لا اكله اني هم عندي نفس المشاعر
من فرحتي ما اعرف شلون اجمع الكلمات وشلون اتخيل نفسي واكفه كدامه واني اعلن موافقتي
كلهن هذني جانن امنياتي ووصلت على شعره من تحقيقهن بس المنحوس منحوس لو علكوا براسه فانوس
لحظه ماحاسبتلهه احساب ولا جانت تخطر ابالي وبال احد لحظه تخرب كل فرحتي وتطفئ كل شموع الامل الي بداخلي
مالحكت حته افرح وافرح ضرغام وياي ...
....
شمه: كعدت ثاني يوم زينه والصخونه راحت  مني
لميت شعري واتذكرت نظرات قيصر وهو يفحصني
وليش تفاجأ من  خله السماعه على كلبي...
مجرد ما اذكر اسمه كل معاني الفرح تبين عليه..
طلعت من الغرفه لكيت الكل مجتمع على الريوك وخوالي طالعين لشغلهم صبحت عليهم وكعدت بصف بيبي نوريه مدت ايدهه على كصتي تتحسس حرارتي هاي المره الجبيره الي ماحبلت بيه ولا جابتني كلبهه احن من الكاعده كدامي ولاعبالك اني بتهه كمت اشك خاف اني من غير ام كولشي يصير بهذا الزمن الغريب..
امي عدهه بنيه عمرهه 9 سنوات بالثالث ابتدائي اجت كعدت بصفي وتباوعلي اني ابتسمت بوجهه كالت شنو معنى اسمج؟؟
ضحكت ما اعرف شجاوبهه اجيت اكلهه امي جانت ادلعني بي بس ماكدرت احجيهه
شفت امي تباوع للطفله وتخزر بيهه عود كومي منا البنيه هم خافت بسرعه كامت من يمي ورجعت بصف امهه
هذا الموقف خلاني بارود حته ماسويت شي ولاحجيت ويه البنيه وهاي اول مره تحجي ويايه هاي الطفله ليش هيج عاملتني..
شمه: ليش خزرتيهه وكومتيهه من يمي؟؟
امي: بكيفي ما اريدهه تتطلع مثلج ومثل السانج
شمه: ترى اني تربيتج خاف نسيتي
شنو اني كدامج لهدرجه انتي حاقده ماتخافين ربج مو الله يحاسبج اشفت منج غير الحقد مأذيتج بشي كولي خاف مو بنتج اني ؟؟
ماحسيت غير الراشدي اجه على نهايه خدي واذني سمعت صفير وطنين اذاني
لزمت اذني بوجع ونزلت راسي ما اعرف شأحجي  بعد
الحجيه: سناء اياج وبالج تعيديهه مره ثانيه وتمدين ايد

ج على شمه والله وامانته اكسر ايدج يولي اشو طالعه من طورج هيج الرجل دهور احوالج وتضربيهه كدامي وبصفي والله لو ما بناتج كاعدات جان كسرت العصا على ظهرج
امي: ماشفتيهه شلون تجاوز والسانهه اطول منهه عليمن تطلع غير على علاهن لاتغرج هاي وتشوفين دموعهه هاي نسخه ثانيه من الحيه الجبيره
الحجيه: كومي لابارك الله بيج ولا بشوفت هذا الوجه حرامات بيج التعب كدرتج على هاي المسكينه الي لا عدهه ام بيهه حظ ولا اب مثل الزلم وينعتب علي
ابدال ما تحويهه وتشوفين شبيهه كاعده تهينين بيهه
شمه: سديت اذاني وكمت ما اريد اسمع تهم امي عليه طلعت برا بالبستان دموعي ماتنزل من الصدمه احس شي يجري بأذني بهاي اللحظه كولشي توقف عندي حته ماعندي رد فعل اتجاه الصار
امي الي حملتني 9 اشهر وربتني لحد 9 سنوات امي الي جنت الا انام بصفهه ياما مشطتلي شعري ولبستني ومن تخلص من شعري تبوسني
انعاد شريط طفولتي كدامي واشوف امي تصيح عليه ودكول شمه لاتوكعين انتي ليش وكحه  مو موتيني يا بنيتي اخاف عليج لا تتعورين
اتذكرهه من دكول انتي سباعيه ماينخاف عليج عكس اخواتج اكبر منج بس فقيرات
اتذكر من اتمرض شلون تكعد يم راسي وتسويلي كمادات وتلوم بيه لان اغسل بالمي البارد والعب بالمطر لان احبه
كل هاي الذكريات كانت كافله بتنزيل دموعي الي مثل المطر لاول مره ابجي بحرقه كلب وكأنما خسرت روحي احس نفسي مجرد جسد خاوي
شلون امي فشلتني كدام بنات خالي وبناتهه وبنت رجلهه ونسوان خوالي
ابجي واشهك واكتم انفاسي ما اريد احد يسمعني
شنو ذنبي؟؟ هاي الكلمتين ضليت سنين اردده ليش امي تعاملني بهالقساوه شسويت اني ؟؟
معقوله تكرهني على كره ابوي
زين موهذنيج اخواتي شروق ورونق تحبهن
ليش شمه من دونهن ماعدهه حظ حته بحنان امهه
انهاريت كمت اعظ بايدي حته مايطلع صوتي وابطل ابجي بس نتيجه الكتمان والتصنع بالقوه خلاني انهار
بعدني ابجي بكل حرقه بهاي اللحظه حته قيصر كرهته لان جرحه اكبر من جرح امي اتمنيت بهاي الساعه انمحي من الموجود
حسيت على ايد تمسح على راسي من ورا  بهدوء
ايد خشنه التفتت وعيوني مليانه دموع شفته رافد
رغم ما اريد ارتبط بي بس ما اكرهه بالعكس احبه كأخ وشخص عزيز عليه الوحيد الي يوكف بجانبي ويواسيني
رافد: شبيهه شمتي دموعهه مغركه هالخدود الحلوه؟؟
شمه: ما اكدر احجي بس اشهك اريد اسولفله بس حالتي ماتسمح
رافد: على كيفج يابعد بيتي انتي يولي دموعج تزرف كلبي منو وياج احجيلي كلما اجي والكاج تبجين شجاج ياعيوني ..
شمه: رافد امي ماتحبني  كمت ابجي بصوت اعلى والشهكه لازمتني
ماحسيت غير رافد يلمني بين اديه ويحضني وخله راسي على صدره بهاي اللحظه جنت محتاجه اشكي واحجي الي بداخلي ضليت ابجي واني بحضنه وهو يمسح على راسي
يهمس يم اذني بهدوء لاتبجين حبيبه كلبي اهدئي على كيفج...
اعرف الي سويته غلط شلون اني احب قيصر وشلون بحضن رافد بس جنت محتاجه اخ يحميني ويدافع عني محتاجه اخ يدافع عني حته من اهلي ويكول اني وياج لاتخافين
ابتعدت من عنده ومسحت دموعي خجلانه منه لان صرت بهذا الموقف
كمت احجيله عن امي بالتفصيل اكو اشياء من احجيهه يتفاجئ يكول معقوله عمتي هيج موانتي قطعه منهه...
ارتاحيت حيل من حجيتله واكثر من مره ضحكني تقريبا شويه هدئت وكتله لازم ارجع للبيت هسه بيبي يضل بالهه..
قبل ما اكوم لزم ايدي بحنيه واني احاول اسحبهه من بين ايده
رافد: شمه اعرف ماعندج مشاعر اتجاهي بس وحق الله اني احبج ومن اشوف ادموع الحزن بعيونج اشتعل بنار يجوز تكولين عليه همجي ومو مثقف بس ما اعوفج تروحين من عندي بس خلي يكمل بيتي واخذج غصبا عنج وعن الشيخ سلمان
شمه: وترني كلامه ولزمه ايده ويحرك باصبعه الجبير على ايدي خلاني ما اعرف شحجي بس الي كدرت علي سحبت ايدي وانهزمت منه
رحت اركض واني متعجبه  بنفسي شلون هيج ذبيت نفسي بحضن رافد وشلون هيج حجه وياي وكلامه المعسول...
وهذا قيصر الي مايرضى يفاركني حسيته لعنه وصارت بطريقي
امشي وافكر بالصار عثرت بحجاره بطريقي دنكت شلتهه وشمرتهه بعيد تفاجأت وفتحت عيوني على وسعهن قيصر واكف ومخلي ايده بجيبه وبالضبط مقابيل المكان الي جنت كاعدين بي اني ورافد
نظرته كلش غريبه ومبين شايفنه
ياربي دخيلك ادري حظي مو حلو بس مو لدرجه يشوفني قيصر ويه رافد
شفته تقرب عليه واني اتصنمت بمكاني
كمت افرك بأيدي وكلبي المفضوح كام يعزف
شفت رجليه صارت قريبه عليه رفعت راسي علي
وعبالك اول مره اشوفه نظرته عيونه ملامحه طوله هدوءه شخصيته كلهن سلبن حيلي ماعادت عندي طاقه اوكف كدامه ايده بجيبه ورافع طرف حاجبه الايسر وكال
شمه شعندج ويه رافد ؟؟؟
# يتببببببع

#البارت العاشر
#وحوش بشريه

شمتانية ؟
شابن ارموشچ بالقهر
      العاشگته عاشگ ثانية 💔
• شمتانية ؟
• مو دگات گلبچ تنسمع
• تبچين سكتة بلا دمـع ومتانيـة؟!
شفته تقرب عليه واني اتصنمت بمكاني
كمت افرك بأيدي وكلبي المفضوح كام يعزف
شفت رجليه صارت قريبه عليه رفعت راسي علي
وعبالك اول مره اشوفه نظرته عيونه ملامحه طوله هدوءه شخصيته كلهن سلبن حيلي ماعادت عندي طاقه اوكف كدامه ايده بجيبه ورافع طرف حاجبه الايسر وكال
شمه شعندج ويه رافد  وليش عيونج حمر؟؟
شمه: ما عرفت شحجي ضليت ابلع بريقي وصافنه علي ياربي ليش خليتني بهالموقف اني انتظره يوم يوم وتالي يشوفني بهالوضع
قيصر: شبيج صفنتي يولي مو وياج اسألج شعندج ويه رافد؟؟
شمه: فززني صوته لان حجاهه بصياح
انت شجابك بالبيستان مالتنه؟؟
قيصر: لا ترجعين عليه السؤال اني اجيت على خالج سلمان عندي شغله ويا..
تقرب عليه اكثر صرت اسمع انفاسه ومبين علي عصبي صك على اسنانه ورجع سألني
قيصر: اخر مره اسألج شعندج ويه ابن خالج
شمه:  استجمعت قواي وجاوبته ماعندي شي بس تعاركت ويه امي وهو شافني ابجي وكعد يحجي وياي رافد دائما يوكف بجانبي مثل اخويه
قيصر: هاااا واخوج ماتحلى السوالف ويا الا بالأحظان
شمه: هو كال هيج لو احس سجين وفاتت بكلبي يعني شافني قيصر يعني انتهيت
ضليت ساكته ومدنكه ما اعرف شحجي هذا الساني ووكاحتي كلهه تروح كدامه اتلاشى شوي شوي
قيصر: اسمعي شمه انتي حالج من حال اسماء ومثل ما اقبل على اختي هم ما اقبل عليج اذا تحبين ابن خالج وهو يحبج عندج عمام ويجي يخطبج منهم عيب خاتلين ورا البيت
شمه السويتي اكبر غلط صح ما ادخل اني وموطبعي هذا بس بيج ادخل يريدج يجي يخطبج كدام الناس مو يتمعشك بالختلات
شمه: صدك نرفزني كلامه وكعد يبيع مثاليات براسي وهو يحب صارله 4 سنوات طكت مرارتي وكتله
انت جاي تحاسبني وناسي نفسك اني ما اتمعشك ويه ابن خالي الي ربيت ويا رافد اكثر من اخ بالنسبه الي ودائما من انهار الكا بجانبي مومثلك حاير ابنت بغداد هسه تعلمني وعيب وحرام وانت صار 4 سنوات عندك علاقه ماتمعشكت ما كعدت وسولفت وياهه..
بعدني احجي جان يسحبني من ايدي  حيل ولواهه ليورا ابد ماشايفه قيصر عصبي هاي اول مره اوردته واضحه وصاك ع اسنانه والحواجب معكوده والعيون تخزر متت بدمي بليه على الساني الي راح يذبني بمصيبه
قيصر: اياج تحجين كدامي بهذا الموضوع والله اكسر سنونج بحلكج اشو واكفه كدامي وبطولج وتقارنين نفسج بيه اني رجال وانتي بنت
وبعدين منو كالج طالع وياهه اني وكاعد وملتقي هاي المره حجيتيهه المره الثانيه ماتلومين غير نفسج لاتقللين ادب الظاهر لا خالج ولا ابوي عرفوا يربوج زين..
احترمي نفسج شمه لاتخليني اتعامل وياج بغير اسلوب
شمه: ترك ايدي حيل احسهه راح تنخلع صاح بيه اطب جوا ركضت للبيت وهو ما ادري وين راح
اول ماطبيت للبيت خطيه لكيت الحجيه واكفه بالباب مال المطبخ وهي ماتكدر تمشي الا على العصا منتظرتني وتريد تعرف وين رحت
بوستهه من راسهه وطمنتهه اني مابيه شي...
عفت بيبي ورحت للغرفه بس اريد اوصل للمخده حته اغطي راسي ما باوعت ولاشفت منو كدامي بوجهي ركضت لفراشي كمت ابجي على حظي الاغبر شلون هاني قيصر كل هاي السنين وماشفت لهفتي وشوكي عليك
مبين يحبهه حيل لان ما قبل حته اجيب طاريهه وشفت براكين الغضب هاجت ولو باقيه شوي ارادد بي جان الله يستر
ياربي امتحانك صعب منا امي بالبيت ما اكدر اطلع واشوفهه ولا اكدر اروح لبيت عمي حسين قيصر موجود ضليت حابسه نفسي بالفراش ماطلعت لحد العصر حته ماتغديت وهو اصلا محد ذكرني
للعصر اجه وسام كال اسماء دكول خلي تجي شمه سألته على قيصر كال راح للدوام ماموجود
اني لابسه دشداشه بس خليت شال على راسي ورحت لكيت اسماء وساره بنت خالهه مسويات كيكه وكاعدات هن يسولفن ويضحكن واني سرحانه بعالم ثاني كلساع اتذكر الموقف وينعصر كلبي هسه عباله عدنه علاقه اني ورافد شلون عليج حظ يشمه
نبهني صوت ساره اكول شمه اشو متشاركين بالسوالف..
شمه: شويه راسي يوجعني انتن احجن واني اسمع
ساره: البارحه ضلينه سهرانين اني واسماء احجيلهه عن حبيبه قيصر
شمه: هي كالت هيج واني بسرعه عدلت كعدتي واحس كلمه حبيبته تطعن بكلبي
اشوف اسماء تحاول تسكت ساره بس هاي منطلقه
سألتهه هي شسمهه؟؟ اريد اتاكد من اسمهه مع العلم كالي ضرغام
ساره: اسمهه بلسم على كولت ماما صدوك بلسم على الجرح
شمه: حلوه؟؟
ساره: لج اتجنن بنيه كيوت زغيره ناعمه حته ماما كالت هاي وين تعيش بلانبار وبنص القريه
شمه: انتي وين شفتيهه
تريد تحجي واسماء تغير الموضوع تالي خزرت اسماء لان تعرف اذا لحيت على شي ما اسكت
ساره: شوفي تعالي احجيلج مال البارحه
قيصر مو درس يمنه احنه متعودين علي لان من زمان يجينه والله اخوي الرابع قيصر بيوم الي يرجع للانبار فد نضوج  وماما دكول البيت وحشه من دونه ليل نهار يقره ولا نشوفه الا قليل ويطلع ويه الولد
عدنه وحده جوارينه كل مره وكالت لماما ليش ماتنطونه وحده من البنات دكتور ومايتعوض ماتدري قيصر اعز من اخوتنه

جنه منتبهين علي ابد ما يخابر ولاعنده علاقه وتليفونه دائما مشمور يعني متاكدين من قيصر ماعنده حبيبه ليش ما مره يتشاقه هو وزيد اخويه وكاله روح يالعاشق يادكتور وبوقتهه شكد لحينه نعرف منو وماكال حته كام ضرب زيد
بعدين عرفنه من زيد لان يداوم ويا مرحله ثانيه بان قيصر يحب وحده اسمهه بلسم من عائله راقيه ابوهه مدرس وامهه موظفه بدائره الكهرباء وهي الوحيده لاهلهه وقيصر مفكر بالفروق الي بيناتهم ويدري باهلهه مايوافقون..
المهم ليش ماصارت حفله التخرج مالته وكولناله الا نحظر وماقبل بس بعد ما لحينه وماما كالتله اريد افرح بيك امك ماموجوده يله قبل
ورحنه للحفله جانت الحفله كولش حلوه مرتبه وهم كلهم صاكين وقيصر لبس قاط اسود وقميص ابيض طلع يخبل
من كاعدين بالحفله اجه زيد كال هذيج الي يحبهه قيصر ..
لج شمه سبحان الخالقهه بنوته  ناعمه لابسه لبس رسمي بنطرون وستره للركبه سوده وجواهه قميص ابيض وشال ماروني وشلون لافه الشال عبالك مرسومه رسم وقيصر مانزل عينه لحظه عبالك يحميهه من عيون الناس ومايقبل واحد يباوعلهه
حته ماعرفنه عليهه وتحلفنه بلبيت نتعارك ويا ليش ماسمحنه نتعرف بيهه
من رجعنه للبيت هجمنه علي وكل وحده تحجي شكل وكولنه نعاتبه ليش ما خلانه نحجي وياهه تالي كال والله اني ما حاجي وياهه هوايه قليل وماعدنه علاقه تليفونات بس ويايه بالقاعه وتدري احبهه
ماما: لعد شلون تريد تخطبهخ وشمدريك تحبك هي؟؟
قيصر: اني حجيت وياهه بهذا الموضوع وطلعت تبادلني نفس المشاعر بس ماقبلت نسوي علاقه تليفونات دكول امي صعبه وتخاف
ماما: متاكد اهلهه يقبلون يزوجهه بلانبار
قيصر: شسوي كاعد بلانبار دوامي وشغلي ببغداد ما ارجع هناك واهلهه موافقين بس شرط اكعد ابغداد
بعدين عرفنه من زيد اخويه بان هي جانت مو محجبه ومن حبت قيصر الاخ فارض عليهه تغير ستايلهه ولابسه حجاب وصار لبسهه كوله طويل ومحتشم ومكياج قليل تخلي يعني الاخت ولهانه بقيصر
شمه: ساره تحجي واحس نفسي راح اتخربط اريد اكولهه اسكتي بس ما اكدر تجمعت الدموع بعيني راح افضح نفسي شفت اسماء ضربت ساره على  راسهه كالتلهه اسكتي شكد سولفتي شمه عدهه صداع
ايي يبنت عمي عندي عدهه صداع من اخوج تحاولين تغيرين الموضوع حته ماتنهار شمه من تسمع باسم اخوج
ااخ ياقيصر يا وجع كلبي هلكد تحبهه وتحبك بحيث طاعت كلامك وغيرت لبسهه وتحجبت بسبيل حبك
وانتي ياشمه بعدج متمسكه بطرف خيط امل من قيصر وهو يكول حالج من حال اسماء
انتبهي على نفسج واصحي قيصر مو الج مو الج ...
طلعت من بيت عمي اجر بذيال الخيبه صوت دكات كلبي عاليه وهو يصارع لحظات الالم والانكسار
حاولت قدر الامكان اتماسك واردد عباره قيصر مو الي قيصر مو الي
امشي بخطوات بطيئه رفعت راسي على السما
الغيوم متجمعه بشكل كثيف حاجبه حمار الشمس لذلك مخلوط اللون الازرق مع الاحمر اشوف كتل الغيوم وهي تسابق بالحركه ماكدرت اكمل طريقي للبيت كعدت على حافه النهر واني ما اعرف شريد وشنو اسوي
بعدني كاعده واشوف انعكاس صورتي بالمي اشوف كدامي انسانه محطمه ملامح الحزن مسيطره عليه
اسمع صوت من بعيد ركزت على الصوت واشوفه منين
سمعت صوت واحد يغني بس بصوت شجي اريد اركز على كلمات الاغنيه ومنو هذا محد يفوت للبستان غير بس ولد عمي
كمت امشي على الصوت وصلت قريب على بيت علاهن اكو جذع نخله بين علاهن وبيت عمي حسين اشوف ضرغام كاعد يعزف بالعود ويغني
استندت على جذع شجره الرمان وغمضت عيوني احس صوته يوصل لاعماق كلبي جان يعني باغنيه  كلامك يالمحب يجرح
كلامك يالمحب يجرح كلامك
يبجيني من اريد افرح كلامك
يضيف هموم لهمومي واخلص بالحزن يومي
تهت بين الغلط والصح كلامك يالمحب يجرح
كلامك نار في صدري
غفه بحضن الجمر عمري
تراني تعبت من صبري
وادور على الفرح ما صح كلامك يالمحب يجرح
كلامك زيد اضنوني
تغير حالي وي لوني
يبات التعب بعيوني
عرفت وياي ماتنصح كلامك يالمحب يجرح
يبجيني من اريد افرح
طول ما اسمع صوت ضرغام دموعي تنزل على خدي صدك كلامك ياقيصر جرحني واذاني
انتبه عليه ضرغام عاف العود واجه عليه متفاجئ بوجودي
ضرغام: شمه من شوكت انتي هنا وليش تبجين؟
شمه: صوتك حلو والاغنيه حلوه
ضرغام: وجرحج بعد احلى
شمه: بجيت بسرعه ما تحملت كمت احجي بدون وعي ضرغام قيصر يكول انتي حالج من خال اسماء وعباله اني احب رافد لان شافني كاعده ويا ولك ضرغام قيصر مايقبل اجيب طاري حبيبته هاني ورزلني بس ذكرتهه
واني صار سنين متعلقه بي اريد انسى ساعدني ضرغام ما اريد احب قيصر الله عليك ساعدني ما اريد احبه
ضرغام: على كيفج لا احد يسمعج يولي تعالي كعدي واهدئي على كيفج
شمه: ابجي بحرقه واحس النفس ضاق الحب من طرف واحد قاتل مايرحم يا ابن عمي
ضرغام: اعرف والله ومابيدي شي شمامه الحلوه مايلوكلج الحزن هاي اني كدامج احب شهد وباليوم اموت الف موته ويوميه اكعد من الصبح لازم كلبي خاف جايهه خطابه وينطوهه ارحمي نفسج شمه محد يفيدج بعدج زغيره والعمر كدامج لاتهلكين نفسج على شي مابي نهايه
باوعيلي شمه انتي قويه وما تضعفين بسهوله قيصر مايستاه

ل دمعه وحده من عندج انتي قويه وسباعيه وراخ تبقين شمه المرحه الحلوه الي محد يكدر يهزهه
شمه: مسحت دموعي وباوعت على ضرغام اشوفه شلون تعبان ولحيته عاليه يواسيني وهو مجروح ويجوز حالته اصعب من عندي لان هن شاف الحب بعيون شهد وفجأه رفضت
ضليت ساكته واني اخذ النفس بصعوبه كثره الصدمات والجروح ماخلت عندي حيل
ساد الصمت بيني وبين ضرغام مجروح يواسي مجروح طمنته اني مابيه شي ورجعت لبيتنه
وصلت للغرفه لكيت شهد منتظرتني تسأل عليه اول ماشافتني شهكت من شافت عيوني مورمات من البجي ...
....
شهد...
من رجعت من ضرغام الدنيا ماسايعتني والفرحه شكبرهه حته تخيلت نفسي عروس وبالبدله البيضه
اول ماطبيت للبيت ماحسيت غير على جره من ايدي باوعت لكيتهه براء تجر بيه للمخزن الخارجي
عبالك شيطان كبالي تفاجأت شبيهه
شهد: شبيج يولي شيلي ايدج عني
براء : اسمعي ولج وحق ربج ادفنج هنا بالبيستان وما اخلي مخلوق يدري اذا مابعدتي عن ضرغام اعرفج يوميه ناطه بطريقه تريدي يحبج اسمعي ولج اني احب ضرغام وصار سنين انتظره مو عبالج انطيجيا بسهوله اذا شفتج صوب ضرغام اذبحج
شهد: شتحجين انتي ضرغام يحبني وراح يخطبني من ابوي الشيخ لا تكعدين تهددين بيه والله اخبر رافد وتعرفين شيسوي بيج
براء: اسمعي ولج اخر كلام اكوله اذا شفتج صوب ضرغام انهيج بايدي احجي شجنتي تحجين ويا؟؟
شهد: كال احبج واريدج وراح اجي اخطبج ها ارتاحيتي لا تتاملين على الخالي بلاش
براء: شوفي باجر تروحين دكليله ما احبك وما اريدك واذا ماكلتي راح اكوا لابوي الشيخ عندج علاقه بي وتعرفي شلون يصدكني ويزوجج من الصبح
شهد: عفتهه وطلعت اركض هاي مخبله من شفتهه كلساع اكول راح تخنكني الله لاينطيهه حته خربت فرحتي
التهيت اسوي عشا واشتغل وجان رافد موجود ماتكدر تحاجيني ورا العشا كمت اسوي جاي لابوي الشيخ ورافد وكاعدين يشوفون اخبار
واني بالمطبخ ما احس على صوت ابوي يصيح ولج شهد من سمعت باسمي رجليه مايساعدني كامن يرجفن ركضت للصاله كتله ها بويه تامر بشي؟؟
سلمان: صدك هذا الحجي يبنت الشيخ تتواعدين من ورا ضهرنه ويه ابن حسين
شهد: كمت ارجف وما اعرف شسوي اباوع لبراء كاعده تضحك ومشمته بيه
كتله لا بويه اجه يسأل عن شمه واني جنت  رايحه لبيت الحجيه
سلمان: ولج شهد تحجين الصدك لا اكوم اكسر ضلوعج
شهد: والله يابويه ماعندي شي كل مره يجي ياخذ شمه وويسألني عليهه
سلمان: اختج براء شايفتكم راح اتاكد من السالفه واذا طلع صدك احسبي احسابج ازوجج لاول واحد يجي
رافد: شنو هالحجي يابه حته اذا حجت وي ضرغام مو غريب وكلنه نعرف شنو اخلاقهم وانتي براء شفتيهه واكفه ويا شلون اتهميهه ودكولين تتواعد تبقين عوجه وماتنعدلين
سلمان: رافد لا تكبر راسهه وادافع عنهه لو ماشابفتهه براء ما حجت ماراح اضلمج بس اذا تاكدت من السالفه الله كتبهه عليج وما اريد اشوفج تعتبين الباب منا وهيج امشي ولي من كدامي
شهد: الله لاينطيج ولا يسعدج يابراء ياعكربه ركضت للغرفه وكلبي راح يوكف من الخوف شلون هيج سوت وباجر شحجي لضرغام وشكول الله لايهنيج
ضليت الليل كله مانايمه وابجي شلون راح احاجي ضرغام ماراح يسألني شكول شحجي
ثاني يوم رحت لضرغام واني دموعي كوه حابستهه من شفته واكف وينتظرني والفرحه مبينه بعيونه واني اجيت قضيت على فرحته بسبب اختي الي ماتخاف الله وحده حقوده مريضه
مرت ايام واني فكري وعقلي كله يم ضرغام يوم عن يوم ابدال ما انسى احبه اكثر واكثر خاصه بعد ماشفته مشه بدربنه
اني اعرف شمه تحب قيصر ابن عمهه بس ماكالتلي بس اني اشوفهه شلون مهتمه بي ومن تحجي عيونهه تلمع وعلامات الحب تبين عليهه
كلت خلي اروح اشوفهه لان شفت قيصر اجه على ابوي الشيخ مدري شعنده
اول ماطبيت شفت حذاء ابوي بالمضيف يعني موجود طبيت من المطبخ شفت شمه واكفه يم باب المضيف وتسمع على الحجي تقربت عليهه شهكت دموعهه مغركه وجهه والعيون مورمه وما اعرف شنو السمعته ضليت اتسمع وياهه وهي حاطه ايدهه على حلكهه وتشهك من البجي
فتحت عيوني على وسعهن واني اسمع كلام ابوي باوعت لشمه اريد اشوف رده فعلهه شنو شفتهه مثل الشمعه الي وصلت لنهايتهه من الذوبان
#يتبببببع

#البارت الحادي عشر
#وحوش بشريه

شطـين
ياخذنـه " الندم"
ونضل عطاشـه #_أبابـكم
جبنه الـفرات بـهيبته
وماطفـه حر #_صـوابـكم
جا ليش خاويـتو الجـفه؟
وأگلـوبنه مـحـمله وفـه
لافض جرحـنه ، ولا شـفه
ولا بخت عدنـه #_وجابـكم
واكفين يم الباب وسمعنه ابوي الشيخ يحجي ويه عمي نعمان ويكول
سلمان: نعمان باجر اني رايح لبغداد نخطب لقيصر وعينك على البستان لايستغلون طلعتنه ويسطون علينه
نعمان: هابيهه الخير منين خطب الدكتور قيصر
سلمان: وحده من بغداد حابهه وخطبهه فرخ البط عوام طلع على ابو حسين
نعمان: شعجب حسين وافق يخطبله من بغداد ومو على عرفه
سلمان: ياخوي هاي السالفه صارلهه اشهر مل حسين وجزع منه وكال لو هي لو ما اتزوج والولد رايدهه بعد عليمن هالعارض
نعمان: توكل يخوي ولا يضل بالك اني هنا بمكانك
سلمان : كفو منك ابو سامر
شهد: سحبت شمه من الباب واخذتهه للغرفه كاتمه انفاسهه ودموعهه تنزل على كف ايدهه وتشهك ما عرفت بهاي اللحظه شلون اهديهه وشلون اواسيهه
كعدت يمهه واهز بيهه واحجي
شمه لاتسوين بنفسج هيج قيصر مايناسبج ومن زمان ندري بي يتزوج ببغداد ترى الحب مو بالكيف راح تموتين نفسج
اريدهه تحجي ماكو بس دموعهه تنزل وصافنه الله يساعد كلبج ياشمه شكد تحبي لعد
لازم اخذهه منا لاتجي بيبي وتسويلنه تحقيق
كومتهه كوه وصعدنه على السطح خلي تبجي براحتهه محد يشوفهه
كعدت بالكاع وكرفصت نفسهه ولمت رجليهه ضليت واكفه اباوعلهه اشوفهه كلساع يهتز جسمهه من البجي
نزلت ليجوه جبتلهه مي لكيت امهه عمتي واكفه بالمطبخ سألتني شعندج على السطح كتلهه كاعدين نسولف اني وشمه
اشايله بمكان كلبج احجاره ياعمه المفروض هسه انتي تحويهه وتحضنيهه ودكليلهه الف واحد يتمناج الله يساعدج ياشمه ياقهر تحملين..
رجعت عليهه لكيتهه على نفس وضعهه اتوسلهه دكوم تغسل ماتقبل كمت احجي عليهه واهز بيهه
انتي مخبله مسويه بنفسج هيج وعبالك الولد مواعدج بشي يولي حته نظره ماشفتي منه عليمن هيج موتي نفسج اصحي شمه قيصر مو من مستواج لا تعبين نفسج
هاي الكلمات خلتهه تنفعل رجعت تتعارك وياي وعبالك اني الي خطبتله
شمه: اسكتي انتي لا اكوم اشمرج من السطح مايحبني قيصر بس اني احبه اموت علي ولج احبه تعرفين شنو من فتحت عيني على الدنيا وقيصر كبالي يوم بعد يوم اتعلق بي اكثر
ليش ماحبني حته نظره وحده ما انطاني
تدرين ليش؟؟
لان اني فاشله ابوي واحد زاني مهزوم وامي تخلت عن ضناهه ورجعت لعشيقهه واني وحده فاشله مادرست وبطلت وضليت افتر بالبيوت تعرفين ليش قيصر ما حبني ولافكر بيه بيوم؟
يريد وحده يفتخر بيهه بين الناس وترفع راسه مو اني الفاشله الي بس لسانهه وماتحترم احد
رجعت ليورا وخليت راسي على الحايط عوفيني شهد خسرت قيصر للابد ومراح اسامح نفسي لان اني صغرت نفسي كدامه دمرت نفسي بكذبه عشتهه ويه نفسي ويوميه اتأمل يحبني
شهد: كمت ابجي على حالهه يبجي الكافر عجز الكلام عن مواساتهه الي كدرت علي بس الله يصبر كلبج
ضليت كاعده يمهه مشوار شوي تحسنت ومسحت دموعهه ونزلنه احس هاي الكدامي مجرد هيكل فارغ كل روح مابيهه
ما ادري الومج مدري اكول الله يساعدج يا شمه
بهذا اليوم ضليت يمهه ماكدرت اعوفهه وهي حابسه نفسهه حته ما اكلت اي شي كلساع تجي الحجيه تطمن عليهه عبالهه مريضه وزعلانه على امهه ماتدري مرضهه بكلبهه ومن دكتورهه
ثاني يوم الزلم راحو لبغداد وضلت بس النسوان ومنين ما نندار نسمع بموضوع قيصر وخطبته شضل بكلبج ياشمه وانتي حته حيطان البيت تحجي بخطبته
كلساع ادعي بكلبي ما اشوف هذا اليوم ويه ضرغام كون يومي قبل خطبته
شمه: انتهيت تحطمت انكسرت كل كلمه اكولهه ماتعبر عن ذره من الي اشعر بي الوم نفسي شلون حبيته وارجع الومه لا هو ما اله ذنب الذنب ذنبي رخصت نفسي وكرامتي كمت اضرب بصدري حيل احس كلبي نار ومشتعله اريد اطلعه وادوس علي هو الورطني بحب قيصر احس خلايا دماغي تنزف احس كل عضو بداخلي حزين ومتأذي
بهذني اليومين ماطلعت من الغرفه ولا رحت لبيت عمي رجعت استحسفت طيبه كلبي وسخافتي يوميه يمهم وقبل ساعات اني يم اسماء ومحد كال باجر خطبته ضرغام واسماء ما الومهم لان مايردوني انقهر بس عمه فضه اشوفهه فرحانه بس ماكالت
اكو غصه ابلعومي لا اكدر اطلعهه ولا اكدر ابلعهه برد كلبي يارب ساعدني يا الهي ...
ورا يوم بعد ما راحوا ثاني يوم الصبح الساعه ب11 نسمع صوت الطلق كلهه كامت تباوع وتشوف الفرحه صوت الهلاهل يوصل لبيتنه واني ضليت كاعده على كعدتي
هلاهلهم تزرف بكلبي وتركص على جروحي
ياريت هاي طلقاتكم بيه
ابد ماتوقعت هلكد احب قيصر كلت يجوز ابجي علي واسكت ولاجان كلبي يصدك بيوم يخطب
اجتني شهد تركض تريد تشوفني شلون حالتي ماضال حال بعد هاي الصدمه
شهد: شمه ابوس ايدج لاتسوين هيج كمت احجي وابجي تخيلت يجي يوم واشوف ضرغام متزوج ولج شمه كسرتي كلبي اني حالي من حالج هم يجي يوم اشوف ضرغام يتزوج ولج كومي الله عليج ماتلوكلج هاي الكعده وهذا الحزن
كومي شمه الراح بعد مايرجع وقيصر انتهى وانتبهي على نفسج يابعد كلبي لزمت وجهه وابوس

بيهه اروح فدوه هالوجه الحلو كومي ورجعي شمه الي اعرفهه..
شمه: شفت شهد منهاره اكثر مني ومن اعترفت بحبهه لضرغام رغم حزني بس فرحت بداخلي مسحت دموعي وكمت
شهد راح اروح اسبح ومن اطلع اروح لبيت عمي اريد كلبي يشوف فرحه قيصر حته مايفكر بي بعد واريد ابارك لحبيبي
كمت سبحت وبدلت لبستان فستان مشجر طويل وبي حزام من الوسط لفيت الشال
باوعت على نفسي بالمرايه اشوف الجوه عيوني هالك من السواد وقله النوم خليت شويه باودر حته يتوحد اللون
شهد واكفه وصافنه عليه عبالهه تخبلت بس مابيدي شي ما اريد اشوف الشفقه بعين واحد
شهد راح اروح وشويه وارجع
طلعت وكلبي ينزف شلون راح اشوفه واباركله بس لازم ادوس على نفسي واصير قويه هو بعد خطب الى متى اضل مهزومه منه
وصلت لبيتهم الباب مفتوح وصوت هوسه جوه ومبين البيت بي فرحه اول ماطبيت تلكتني اسماء صافنه بوجهي وتتفحص عيوني ماحجيت بس هزيت راسي وغمضت عيوني حضنتني وطبطبت على ظهري اخذتني للصاله
اسماء: تعالي هنا خالاتي وخوالي كلهم
شمه: طبيت كلت السلام عليكم
ردو السلام بس شنو بنات بغداد بعد اللبس شلون والاناقه والشياكه واني العوبه اريد قيصر يباوعلي ويحبني باركت لعمه فضه واشوفهه شكد فرحانه
ضليت كاعده وصافنه بالوجوه احس نفسي بدوامه الكل فرحان ويغني واني مخيم عليه الحزن
شويه واجت علاهن تهلهل ادري بيهه من خوفهه من قيصر اجت تبارك والله هي تموت من فضه
ماحبيت الاجواء والصراحه ما الي مكان بنصهم هم فرحانين واني حزنانه
شكد تمنيت هاي الفرحه الي والناس تباركلي
طلعت من الباب الورا لان اكو زلم بالباب بعدني هستوني وصلت الباب تلكاني قيصر وضرغام
اااااااخ ياكلبي لاتفشلني اترجاك قيصر ياحبيبي شلون طول وهيبه ولابس بنطرون اسود وقميص سمائي ولاول مره اشوفه ضاحك من كلبه الفرحه مرسومه رسم على وجهه جنه هلال العيد
نبهني صوته هااا شمه وين رايحه؟؟
شمه: مبروك قيصر ..
ماجاوبني بس ضل صافن بعيوني مشوار حته مارمش اني ارتبكت ودنكت
قيصر: الله يبارك بيج بس شو مو على بعضج شبيهن عيونج
شمه: مابيه شي موكتلك متعاركه ويه امي وضايجه
قيصر: وين رايحه ضلي يم البنات مدامجن متعاركه
شمه: استنزفت كل طاقتي بعد ما عندي حيل اجاوبه نقذني ضرغام بصوته
ضرغام: روح قيصر فشله من الناس برا واكفه وانتي شمه تعالي وياي اوصلج
شمه: عفنه قيصر ومشينه وهو بعده واكف ومتفاجأ مدري شبي معقوله حس عليه وشاف شي بعيوني..
ضرغام: يولي شمه هاي عمله تسويهه شمسويه بنفسج الي خلق قيصر ماخلق غيرهه ولج اصحي الف مره كتلج مو الج
شمه: ضرغام اسكت كلبي جاي يتكطع من الالم تعبت صار 3
ايام تمنيت الموت
ضرغام: ماراح اواسيج لان حبج من اساسه غلط كومي يابنت عمي اصحي على نفسج وصيري سباعيه ماتنكسرين من ورا حب وهم انتي رسمتي وتخيلتي
شمامه الحلوه راح اساعدج اطلعين من هاي القوقعه مال قيصر وتتحررين من حبه بس ما اريد اني اسعى وحدي اريد تساعديني
شمه: ضرغام الله يفرح كلبك ويسعدك يا اغلى اخ
ضرغام: رجعي لبيتكم واتصرفي طبيعي وصيري سباعيه يله علاهن الزغيره
شمه: من كال هيج ضحكت
ضرغام: ايي هالصرتي حلوه جنتي معبسه حته تخوفين
شمه: تشكرت من ضرغام لان كدر يضحكني واني باتعس حاله هذا الانسان عجيب يداوي الناس وهو عليل
...
رجعت للبيت شويه حالتي اهدء واحسن لكيت خالتي ام فيصل هي وبناتهه وامي واخواتي شروق ورونق موجودات يعني البيت هوسه وبس عياط الجهال
رحت بدلت فستاني الي باركت بي لقيصر بالعافيه علي من شفت الفرحه بعينه تمنيتله السعاده بكل خطوه يمشيهه
من هاي اللحظه قررت ابدي حياه جديده بعيده عن معاناه الحب واحاول انسى قيصر وارجع لحياتي العاديه بس ما اعرف راح اكدر لو راح يضل حب قيصر عثره بطريقي
بليل اجتمعنه ورا العشا وكلهه تضحك وتسولف واني ما الي واهس اضحك ولاحته اسولف كمت اتفحص الموجودين واحد واحد 2
شفت امي كاعده تفتح بضفاير بتهه ومن كملت باستهه من خدهه خلصت وحده واجه الدور للثانيه ونفس الحركه سوت اخر واحد جان ابنهه عمره 5 سنوات غيرت ملابسه وباسته من خده اجت كلمه حبيب امك بأذني غمضت عيني واخذت نفس
عيوني احسهه مجروحه ماعادت بيهه الحيل تنزل دمعه وحده ماعندي اي ردة فعل
شفت خالي سلمان يحجي على فلان وفلتان وهو عود الشيخ وماتطلع الكلمه الموحلوه منه وخالي نعمان يأيده على كلامه ويسب ويلعن بالناس
درت بوجهي على الحجيه شفت السبحه بيدهه تسبح وتحجي وي خالتي ام فيصل على علاهن وخالتي دكولهه مابينه حيل نشيل ذنوبهه ليش هو انتي شخليتي ياذنوب ماشلتيهه بهاي الكعده
اندارت عيني على بنت خالي نعمان عبير شفتهه شلون صافنه على نوفل وهو يحجي مبينه الاخت مثل حظي هم تحب ابن عمهه بس كلهه ماتصير مثل قيصر
اجه الدور لاخواتي المثقفات وهن يحجن بالموديل واللبس وكلام من المدينه حته ماكلفن نفسهن وباوعن بوجهي واذا اجت عينهن بعيني يستهزءن ويسون حركه بحلكهن مال استهزاء
ضليت كاعده واشوف هاي المسرحيه شوكت تنتهي تابعتهه بكل شغف واني منمدجه وي كل بطل يمثل
شنو هاي الوحوش الكدامي شنو هال

تناقض ش
الام بسهوله تتخلى عن ابنهه او بنتهه بسبيل حبيب قديم الاخوات يستهزءن ويقلدن على اختهن الصغيره الفاقده حنان الام والاب
الحجيه الجبيره بركه البيت تذم بسلفتهه وتحجي حجي يوكف شعر الراس
تعبت واني اشوف هاي التمثيله ومنتظره شوكت تتساقط الاقنعه وكل واحد يرجع لحقيقته
يرجع خالي سلمان يحجي بالحق والحلال والحرام وترجع نوريه تفرش سجادتهه وتبدي تصلي وتستغفر والسبحه ماتوكع من ايدهه
مهلكه هاي التمثيليه خلال ربع ساعه شفت وحوش بشريه كل واحد يمثل دور الانسان الفقير الي يخاف الله ومايقبل بالغلط وهم بعيدين كل البعد عن مخافه رب العالمين
سحبت نفسي بكل هدوء وكمت لفراشي ما اريد اشوف هاي الوجوه المهلكه ...
ليش تجيني لحظه اشوف هاي الوجه قبيحه وكل واحد ورا ذنب جبير كل واحد منهم احسه راح يكون سبب خراب حياتي
شعور غريب ينتابني بين كل فتره واني اركز على ملامح خالي سلمان وامي ويتخيلي تتحطم حياتي بسببهم
عفت المسرحيه مستمره وابطالهه مندمجين بالتمثيل عمضت عيوني واستسلمت للنوم
...
مرت الايام بطيئه حيل امي وبناتهه راحن صار البيت هدوء طلعه ما اطلع بيت عمي حسين يحضرون على عرس قيصر الوحيده الي راده عليه هي شهد تجي يمي نسولف وتحاول اطلعني من هاي الكابه الي بيهه اني
من حجتلي شهد عن ضرغام وشسوت براء اشتعلت نار وابدي اروح اهد على براء واربطه بكرون الثور الي هد عليه بس خلي شوي اصير زينه وارجع لحياتي الطبيعيه واني اعلمهه بلاء
اذا ما اركصهه على تك رجل هاي ام اسنون هي منا شلون تحبني دخل توكفلي هاي الحيه
...
جانت عصريه طلعت اشتم هوا لان اختنكت من البيت كعدت على طابوكه جبيره ومسدي الثيل عليهه صايره مكان استراحه جميل كاعده اشتم هواء نقي صوت زقزقه العصافير بلاشجار
اكو فراشات بالحديقه كلساع تجي وحده تحط على اكتافي شعور مريح احس خيوط اشعه الشمس بدت تسلل بجدران قلبي
بعدني كاعده شفت رافد طلع من بيت اهله لابس دشداشه نيلي ولاف شماغ على راسه لان الجو بي بروده شفته اجه يمشي باتجاهي عيني تباوعله صاير حلو رافد كل ماينزل محلو زايد وشخصيته حلوه صاحب بنيه ضخمه واسمر قريب على حنطاوي
وصل قريب عليه واني بعدني على نفس كعدتي
رافد: ها يحلوه شعندك كاعده وحدج؟؟
شمه: هلا رافد شلونك شوكت اجيت؟؟
رافد: الحمدلله زين اليوم اجيت الصبح ومريت عليكم وسلمت على الحجيه بس انتي ماشفتج
شمه: هاا ما ادري بيك يجوز بالغرفه
رافد: كومي اتمشي وياي راح اروح للمزرعه
شمه: بس خلي انطي علم للحجيه يظل بالهه عليه
رافد: امشي ما نتاخر شويه ونرجع
شمه: مشيت بصفه ووادحك علي شكد طويل عطره يخبل كل هذا الجمال والهيبه ماشافك كلبي وراح على قيصر الي مايوم شفت نظره حلوه منه
رافد: اي شمه احجيلي شبيج مو ع بعضج وهوايه متغيره ضعفانه ودائما حزينه والسانج ماكو مفتقده...
شمه: رافد اني على شنو عايشه اشو لاعندي اهل مثل البنات لا اخت لا اخ لا اطلع لا امشي شنو حياتي تدري من اني عمري 13 رحت مره لسوك وبعد مارحت حته ملابس مو على ذوقي عمه فضه تشتريلي لو مرت خالي نعمان
رافد اني تعبت حياتي ماحبهه متنقله بين نوريه وعلاهن اسبوع ما اروح لعلاهن لازم اترزل واذا تاخرت يم علاهن نوريه تهد عليه الله عليك منو عايش مثل وضعي
رافد: شمامتي هلكد كلبج شايل حزن واني وبعيد عنج
التفت عليه صارت عينه بعيني الشمس ضاربه على عيونه رغم ضوء الشمس بس لون عيونه اسود قاتم اشوف نفسي بالبؤبؤ مالته
اشوف الحب واللهفه بيهه ماكدرت اركز بي بعد بسرعه دنكت
رافد: شمه اسمعي احنه هنا مثل مايسمونه قرى وارياف ولحدالان عقولهم متحجره ومتمسكين بالعادات والتقاليد اهم شي عدنه هنا الديوان والمضيف وشيخ فلان
اغلبهم لا والله كلهم هنا يعاملون المراءه عباره عن اله للخدمه والمنام وبس ما الهه حق تشكي ولا تشعر ولا تناقش وعبالك من حديد
اطلعي من هاي القريه وشوفي الناس شلون عايشه والعالم وين وصلوا تليفونات وانترنيت واحنه لحدالان حابسين بناتنه وامهاتنه بهذا القبو مال العادات
اعرف شتريدين واحس بيج تريدين تعيشين حالج حال كل بنيه الهه كيانهه وتكدر تناقش وتسولف بحريه وماتخاف من احد وخاف اتعاقب وخاف هيج
يجوز انتي احسن وحده بالنسبه لغيرج من بنات هاي المنطقه اشوفج تعرفين تحجين وادافعين عن حقج شحال بقيه البنات ومن ضمنهم اخواتي ابوي واكف سيف على ركبتهن ويتمنى اليوم قبل باجر يزوجهن واني مابيدي شي ادحك بعيوني واسكت بحجه ابوي شيخ ومايصير نكسر كلامه
كل البنات والنساء الي هنا مظلومات بسبب اهلهن والعادات الباليه
شمه بنيتي تريدين تغيرين نفسج نحو الاحسن اني وياج اساعدج بس كولشي ضمن المعقول ما اريد اشوف هالعيون الحلوه حزينه ادفع نص عمري بسبيل اشوف هالضحكه على شفايفج
شمه: استحيت من كلامه لا اسم الله على عمرك سالم ان شاء الله
رافد: شكد شفت بنات واكو منهن يذبن نفسهن ذب بحكم عملي وضابط اشكال شفت بس كلبي مادك ولا رف غير بس لشمه ام لسان شكد حاولت ابعد نفسي عنج لان اعرف ماتبادليني المشاعر وصعبه عليه احب من طرف واحد

اكدر اتزوجج غصب عنج ومن باجر بس ما اريد اذيج بيوم واصير سبب دمعه وحده تنزل من عيونج
شمه: رافد وين طلعت رونك سايد جبتني نتمشى لو تحجيلي عن مشاعرك
رافد: انعل يومج ادري انتي شنو من السان عندج وين الانوثه مالتج المفروض هسه تخجلين تحمر خدودج
شمه: دسكت رافد قابل اول مره اسمع هذا الحجي
رافد: امشي خلي نرجع مايفيد وياج الحجي العتب اني صار ساعه اصفط بالسوالف ومنفعل
شمه: ضحكت على سوالفه واني اشوفه شلون يتذمر وابتسامه بعينه
...
رجعت للبيت الحال كما هو يوم حاله حال الايام البقيه بليل كاعدين نشوف مسلسل عراقي مندمجين كلنه بالمسلسل اجه ابن خالي نعمان الزغير كال اجه عمي الشيخ
طب خالي سلمان بعد ماسلم على الحجيه كمت اريد اسويله جاي
سلمان: تعالي بويه شمه عندي حجي وياج اكعدي هنا واسمعي
شمه: ان شاء الله خير
سلمان: صار اسبوع عمج حسين يوميه يجي عليه يريد يرجعج للمدرسه واني كتله ماعندي بنات يدرسن بطلتهه حالهه من حال اخواتهه بس عمج اصر هو وابنه ضرغام
الحجيه: يمه خليهه ترد تدرس اشو كعدتهه ما منهه فايده واذا اجاهه ابن الحلال هو يقرر يخليهه يبطلهه
سلمان: والله يا يمه اني ما احب البنيه جنطتهه بظهرهه ورايحه للمدرسه وبعدين منو يتكفل بيهه اذا صار شي
اني هذا الحجي كله حجيته لعمج وضرغام كال اني اتكفل بيهه
الحجيه: عجل يا يمه خلي ترد تدرس مدام ابن عمهه كافلهه
سلمان: والله يايمه الوضع ماعجبني ولااكدر احجي لان هم عمامهه اولى بيهه ويقررون لوما شمه متعوده علينه جان رجعتهه لعلاهن
الحجيه: على بختك ياشيخ هاي اني ربيتهه وتريد تحرمني منهه مو هذيج اسماء بنت حسين تدرس بعد شمه شناقصهه وانت بلسانك تشهد سباعيه وما ينخاف عليهه
سلمان: هاهيه يمه رافد من جهه يصيح خلي ترد واني اتكفلهه وابن عمهه من جهه خلي ترد وتخلصني وانتي يابويه عينج بالكاع ما اريد سالفه تطلع على بنت اخت الشيخ سلمان
شمه: جانت هاي اول فرحه بعد سالفه قيصر الدنيا ما وسعتني ركضت بوست الحجيه وبست ايد خالي سلمان
لو يمي ضرغام يجوز ابوسه فدوه للسبع واخيرا راح اطلع من هاي القوقعه مثل ماكال
اخذت عهد على نفسي اصير شاطره واخلي الكل يحمد بيه وباخلاقي كولشي بي صالح وخطوبه قيصر هي الرجعتني لدراستي
بهاي الليله ماكدرت انام من الفرحه ضليت بفراشي ومشاعري وافكاري متضاربه ساعه يجي قيصر على بالي واتعوذ من الشيطان وابعده ما اريده راح يتزوج بعد شكم يوم
وساعه افكر برافد وكلامه وشخصيته الحلوه
وشكله شلون صاير حته انتبهت علي احلى من قيصر بس مستحيل احبه ولا راح احب بعد على هاي اللوعه الي شفتهه...
بهاي الليله جان هوا عالي بدايه الشهر الثالث واحنه بنص البستان واشجار عاليه ونخل صوت الهوا يخوف وياخذ الروح
حسيت اكو هوه يفوت من الشباك كمت اريد اسده
فتحت البرده على كيف لاتكعد الحجيه مديت ايدي على الشباك اسده شفت ضوه ضعيف يتحرك يعني شلون الواحد شايل بيده لايت ويمشي
سديت الشباك على كيف ورجعت البرده لزمتهه من الجانب ودحكت واني مقربه نفسي من الجامه
انصدمت من هول المنظر احس رجليه صارت خيوط ياربي شنو هاي ؟؟
بسرعه رجعت البرده وكعدت بالكاع كلبي يدك سريع احسه راح يطلع من صدري ورجليه صارن ثلج المنظر بين عيوني صار
#يتببببببع

#البارت الثاني عشر
#وحوش بشريه

شيصير الگــلـب
.....مـن يهــجر الغــاليـن
يضـــل مثل......
الحــمام المنـكسر جنحــه
لايــگـدر يطير ويلحك العافو
ولايگدر يضل يتحمل الذبحــة
بسرعه رجعت البرده وكعدت بالكاع كلبي يدك سريع احسه راح يطلع من صدري ورجليه صارن ثلج المنظر بين عيوني صار 9
ركضت على فراشي لفيت نفسي باللحاف المنظر مرعب فوكاهه صوت الرعيد والمطر قوي وهوا عالي حسيت نفسي بفلم رعب
شفت الضوه خفيف بس من تقربت على الشباك
شفت اثنين اشخاص ما اعرف زلم مدري نسوان دايحفرون بس ماشفت اشكالهم مدري يتخيلي مدري صدك شفت اكو شي بصفهم مثل الواحد النايم  اخذني الرعب بالليل حته ماكدرت انام كام يتخيلي كومه شغلات غطيت راسي وضليت اقره ايات قرانيه ..
ابد مانمت لحد اذان الفجر كعدت الحجيه ورحت وياهه اتوضيت لان اخاف اكوم وحدي المنظر مافارق خيالي عبالك كابوس
صار الصبح واني عيوني ماشافن النوم ياربي شنو صاير هاي القريه بيهه شي ليش دائما اتخيلهه مشتعله نار وانوبه هذوله منو وشجاي يحفرون ؟؟
قررت اكمل شغلي واروح لنفس المكان اشوف شكو هناك...
صارت ب10 الصبح بدت تطلع الشمس بس اكو غيوم بعد
لبست شالي ونعالي الي مايطول عندي شهر من كدما افتر بي اسمي سيارتي
ويه طلعتي من الباب صار بوجهي رافد صبحت علي
رافد: وين رايحه بهالطين لا يمنعج مطر لا برد
شمه: تعال وياي رافد عندي موضوع مهم
رافد: خير ان شاء الله مواضيعج ماتخلص
شمه: نمشي وبديت اسولفله على الي شفته بلاول مندمج وياي ويسمع اشو بعدين طكهه ضحكه
رافد: شمه متاكده جنتي متغطيه يولي متأثره بلأفلام الي تشوفيهه بنتي منو يفوت بالبستان مالتنه وفوكاهه قريب على البيت شنو يحفرون شنو يدفنون عقلج ضارب
يله  عجل همزين سولفتيلي خلي اعيد النظر بحبج اخذلي وحده خبله شسوي بيهه
شمه: خلي نوصل وشوف والله شفتهم بعيني
رافد: هاي هالوصلنه وينه شوماكو ؟؟
شمه: مابين اي شي الكاع من كثر المطر متساوي التراب وصاير طين وكفت على نفس المكان الشفته بس ماكو اي اثر يدل على وجود شي البارحه معقوله تخيلي ؟؟ لا اني شفته بعيني وشفت 2 اشخاص
رافد يضرب بالكاع ويصيح اطلع يالميت مدري الجني مال شمه فوكاهه جابتني وياهه واني مصدك ام نص عقل
مره ثانيه تغطي زين ولفي روحج باللحاف لاتروحين تذبينه بورطه
شمه: يستهزء بيه ويضحك واني من الخوف حته مانمت بحركه لا اراديه مني ضربته على صدره بقبضه ايدي بصوره خفيفه
ويه ضربتي جان يلزمني من معصمي ومركز بعيوني  سحبني علي طخيت بصدره
لازم ايدي وعينه بعيني ارتبكت حيل جانت نظرته ابد مو بريئه جريت ايدي من عنده بس جان لازمهه قوي
عوف ايدي شبيك لا يجي احد ويشوفنه
رافد: لاترفعين ايديج مره ثانيه لا اكسرهه الج
شمه: جان يحجي بهمس وقريب على اذني تملكني شعور غريب كتله اي والله ما اسويهه بعد بس عوفني رافد
عبالك  صنم واكف كدامي ولا اهتم لكلامي بس عيونه تتفحص ملامح وجهي
قرب راسه بهدوء انفاسه تلفح بخدودي توترت حيل ما اعرف شناوي هذا
رافد: شمه احبج كافي يولي كلبي ماعاد يصبر اكثر من هذا
شمه: دخيلك ربي مو كلمه عبالك اعصار مدري كهرباء اختل توزاني
شعور غريب جدا ما ادري ليش على الرغم اعرف بي يحبني وكالهه قبل ليش هسه توترت يجوز لان قريب عليه وحجاهه بهمس
سحبت ايدي من عنده ورجعت ركض للبيت اسمعه يضحك وراي حته ما التفتت علي
امشي سريع وعبالك واحد لاحكني من الثول مالتي ماشفت طريقي عثرت وجلبت رجلي بالطين
وكعت على وجهي شالي صار بي طين ورجلي بعدهه لازكه عبالك صمغ الامير واديه اثنينهم كدامي متروسات طين ومي
شنو من حظ عندي اتلفتت منا  ومنا لا واحد يشوفني بس همزين هذا المكان بي اشجار عاليه محد يشوف
كوه سحبت رجلي واريد اكوم بس كلما اسحبهه تزحلك مره ثانيه شلون السلحفاه وتكربست
شلون اليوم اضل نايمه بهالطيانه ...
ماحسيت على غير صوت خربان ضحك عليه  اتمنيت الكاع تبلعني من الفشله كاعده ورجلي مكربسه والنعال ملوي على رجلي
وشالي مطين وطافر على وجهي والدشداشه من كل مكان مدمره
رافد: يولي انطيني ايدج خلي اكومج لا يجي احد ويشوف مرتي نايمه بالطينه
شمه: شو مصدك نفسك حضره الظابط يامرتك وينهه ما اشوفهه
رافد: دكومي لا اخليج نايمه بهالوحل هذا حته وانتي باتعس حاله السانج يمطر ماتشوفين كل عين شكبرهه المن تريديهم بس سلبن حال رافد
شمه: كله من وراك لو ما انت ماركضت ووكعت وفوكاهه تتمسخر عليه
رافد : وشسويت اني هاي كلهه لان كتلج احبج ما ادري بمحيسن يحس ويخجل اروح فدوه للخجلان..
شمه: رافد لاتقلد لا والله ازعل عليك لاتشبهني بمحيسن الخبل
كام يضحك ومد ايده وسحبني حالتي يرثى لها شكد فشله ايدي بيهه طين لا اكدر الزم شالي ولا امسح وجهي حاطتهن كدام وجهي واكلب بيهن الا شويه بجيت من الفشله..
رافد استغل الموقف وطلع كلينس من جيبه بده يتقرب عليه واني ارجع ليورا  كل واحد مركز بعين الثاني..
لحدما طخيت بجذع الشجره وهو كدامي مد ايده مسح خدي وحرك اصبعه على نهايه خدي قريب من حلكي ..
شفايفي

رجفت والشعور اجتاحني مثل الاعصار غمضت عيوني ما اكدر اباوعله ولساني انعكد
ماكدرت احجي مرت ثواني لو دقايق ما ادري بس اريد اتخلص من الموقف اليوم رافد ناوي عليه نبهني صوته
رافد: شمه ارحمي حالي يولي والله كلبي ور منج
ما اتحمل اشوفج واباوع على طولج خليني اخطبج والتريدي يجرالج
شمه: انتبهت على وضعي وكلامه بسرعه اجه قيصر ابالي والصدمه مال ابن عمي لسه ابالي..
ما اريد احب ولا ارتبط ولا اتزوج
رافد: بس انتي اولهه وتاليتهه تزوجين ما اخلي جنس مخلوق يخطبج كل الي يجي اطرده واني كايل لابوي شمه الي لو اعرف تصير كاتل ومكتول
شمه: رافد عليك الله خليني ارجع للبيت هوايه عليه اليوم لو ادري ماطالعه
رافد: انتي ليش جبانه شسويتلج قابل وكمتي ترجفين ترى بعد ماعندي صبر لاتجبريني اتزوجج غصب بس ما اريد اوصل لهاي المرحله وتظلين تعانين...
يله ارجعي للبيت لا تتمرضين واني باجر التحق مو اجي الكاج مسويتلج مصيبه ترى اعرفج ماتكعدين راحه
شمه: رجعت للبيت واني ارجف مدري من البرد مدري من قرب رافد نظرته وانفاسه هدت حيلي خرب حظج شمه كلما يتقرب وقيصر يجي ابالي اتمنى احب رافد واعيش ويا حياه حلوه بس ابن فضه مستحوذ عليه
همزين محد شافني بوجهي للحمام غسلت وبدلت وطلعت يم الحجيه بس بالي مشغول بكلام رافد اخلص من واحد يطلعلي الثاني ...
العصر دزو عليه بيت عمي حسين ما اعرف شيريدون بس اجه وسام كال امي تريدج بلأول ماردت اروح بس بيبي كالت فشله من فضه خوش مره
رحت عليهم شفت سياره قيصر بالباب معناتهه موجود
ما ادري ليش ماعندي ردة فعل وما اهتميت وعبالك مثل كل مره من اروحلهم
طبيت ليجوه تلكتني عمه فضه بوستني وكالت اريدج يمنه هنا خطيبه قيصر وامهه وعمج حسين يمه خطار وهاي اسماء تشلع كلبي
ماهونت بيج يبنيتي بس الوحيده شغلج يعجبني
هستوني اكول ما اهتميت بس كلبي غدار بسرعه رجف دحكت على ملابسي مومال استقبل بيهه خطيبه قيصر لابسه دشداشه وسيارتي قديمه
شمه: عمه خلي اروح ابدل عيب بهاي ملابسي وعدكم خطار...
فضه: يله روحي وتعالي
شمه: ركضت على السريع بدلت اني البس كله فساتين لان البنطرون عدنه ممنوع من خالي سلمان
رجعت تلكتني اسماء بوستهه وخطيه ادحك بوجهي تشوفني خاف ضايجه دحكت لعمه فضه ضايجه ما اعرف شبيهه هسه جانت فرحانه
طبيت ويه اسماء للصاله  سلمت عليهم لكيت الكل كاعد بالصاله
علاهن وفوزيه ومرت عمي محسن والبنيه وامهه بس شنو عبالك جايه من كوكب زحل
لابسه هم فستان طويل ولافه الشال وقراصه جبيره ومكياج خفيف عبالك مرسومه رسم حيل حلوه كل ملامحهه زغار وعدهه خدود وناعمه
امهه جنهه ريا الي تطلع بالتليفزيون مال ريا وسكينه مخليه حمره حمره وتباوع بطرف عينهه وكلساع تتأفأف وتباوع على البيت
مع العلم بيت عمي حسين حيل حلو طابقين ونظيف ومرتب وبالصاله تخم والمطبخ يخبل يعني حاله حال بيوت بغداد الوحيد الي بالقريه بيتهم هيج البقيه تصميم ارياف كل غرفه بجهه بس هاي ريا ليش ماعاجبهه الوضع
صاحتني عمه فضه اشتغلت وياهه حته اسماء ماكعدت يمهن دكول ما ارتاحيتلهه سألت على ساره كالت رجعت لبغداد
بعدنه نشتغل اني جنت املح بالسمج ولان اشتغل بي ايدي وسخه كل وحده عدهه شغله ملتهيه بيهه حته بنات عمي حسن هم يشتغلن
مندمجين بالشغل ماحسينه شلون فاتت المحروسه كالت باجي اساعدكم بشي؟؟ بس تجر بحلكهه جر
فضه: لاحبيبتي تسلمين ماعدنه شي اكعدي ارتاحي البنات مايقصرن
بلسم: شكرا باجي ماعرفتيني على البنوتات
فضه:هذني كلهن بنات عم قيصر بس هاي الحلوه ام خدود شمه بنتي الثانيه وصديقه اسومه المقربه
تعرفي على البنات اني اروح يم امج ماكعدت يمهه فشله
مدام اجت شمه اسلمهه المطبخ واني مرتاحه
بلسم: حلو اسمج شمه عاشت الاسامي ...
شمه: شكرا واني ملتهيه بالسمجه ما اريد ادحك عليهه واقارن نفسي بيهه واتعب ..
بلسم: اااوووي شمه مو هيج اسمج؟؟ شلون تلزمين السمكه هيج لعبتيهه لنفسي
شمه: ليش ماشايفه سمكه بحياتج لوتجيكم من الشط مشويه
بلسم: غير السماك هو ينظفهه ويدزهه شلون تكدرين تسوين هيج
شمه: يااا مو ماكتلج اني السماك هنا اروح اصيد وانظفهه  واجي اشويهه
بلسم: تحجين صدوك انتي لوتشاقين ؟؟
شمه: ليش اتشاقه سويتيهه قصه هي سمكه على كولتج بس ملحتهه وهاي راح اشويهه
بلسم: لا لا ما اتحمل هذا القرف اووي شلون راح اعيش هنا اااف ياقيصر
شمه: جانت تحجي بصوت ناصي بس متعمده تسمعنه
كلامهه ضوجني اخذته بشقه بس كلبي يغلي عليهه اريد اكومهه احطهه بالتنور الطين واشويهه واقدمهه لقيصر
ست بلسم شنو المقرف بالموضوع ماعاجبج المنظر لادحكين علي
بلسم: هههههه شنو هاي الكلمه ادحكين
انتي والله تضحكين طبعا من اول ما دخلتي توقعتج عربيه وكلشي متعرفين مبينه من ملابسج الرثه
شمه: اسمعي بلسم مدري شامبو ايبك احترمي المكان الكاعده بي لا والله اشوفج شي مايعجبج مو جاي تبيعين ثقافه براسي والله لو ماعيب من عمه فضه جان علمتج ام الملابس الرثه شنو ويله روحي كعدي يم امج لان المطبخ صار مقرف
كامت من مكانهه وطلعت واني احس نفسي اش

تعلت نار باوعت على ملابسي والله مابيهه شي حالي حال فستانهه هي مشجر اني ساده اسماء واكفه صافنه هي وبنات عمي حته ماعرفن شيحجن رادت تعتذرلي اسماء وسكتتهه هي شعليهه اختيار قيصر افندي الخاطئ
كملت شغلي واريد ارجع لان ما اتحمل هاي البومه الجوه بعدني واكفه يم السنك اجه ضرغام يسأل كمل الغده اول ماشافني ضحك لان شافني مبدله وطبيعيه
ضرغام: ولكم شمه هنا اكول ريحه الاكل واصله لعلاهن
شمه: لاتكعد تصبغ بيه اعرف ليش هيج تحجي بس اطمئن مثل ماكتلي
ضرغام: عفيه سباعيه ادري بيج ماتخيبين ضني الاسبوع الجاي ابدي اشتغل بتقديمج لان هاي المدرسه تقبل اعداد محدده والبقيه ينقلوهم للمدينه
شمه: ضرغام ما اعرف شلون اشكرك
ضرغام: اشكريني بنجاحج ترى موبسهوله قنعت ابوب وخالج لحد الان خالج سلمان يكول انت تتحمل مسوؤليتهه شمه املص اذاناتج اذا سببتي مشكله لو رسبتي
شمه: لا ما اسبب مشاكل بس اكتل المديره والمعاونه والفراشه لان جاسوسه الهن وام الرياضيات ست حمديه
ضرغام: انعل ابليسج والله من صدك اموتج اذا سويتي شي غلط ترى حتى ابوي كال مسوؤليتك
شمه: لاتخاف من هسه شاده حيلي اكل الكتب اكل
تقرب عليه وحجه على كيف
ضرغام: شلونهه شهد
شمه: زينه بس ماتطلع هوايه امهه ماتقبل
جر نفس عالي واتنهد وطلع
الله يساعد كلبك ياضرغام حالك اتعس من حالتي
ضلينه اني واسماء نسولف شفتهه ضايجه هي وامهه سألتهه شبيج كالبه وجهج
اسماء: شمه هاي بلسم من اجت لحد هسه تقلد على بنات عمي وقبل ماتجين دكول غيروا برداتكم للعرس وضرغام يكول والله بردات اهلهه نفسهن بس غير لون بس لازم تضوجنه
حته مدري شمسمعه امي وضايجه
شمه: ماشفتيهه شلون حجت وياي والله لو ما اخاف من قيصر جان طيحت حظهه عود شايفه نفسهه اني دكتوره ومن بغداد
اسماء: لاشمه اكو غايه بداخلهن هي وامهه اجيت اريد اخذ مواعين وسمعت امهه دكولهه لازم تخلي يغير رأيه ويخليلج بيت ببغداد ومن شافني سكتن
شمه: ليش هو مو من الاساس يكعد ابغداد
اسماء: اشو هو وحده غير رأيه وحته من خطب ضرغام يكول بالمشيه وكال لابوي اذا طلبوا بيت ببغداد كلهم قيصر مايقبل واحنه متفقين نتزوج بلأنبار
شمه: والله يا اسماء ما ادري خطيه عمه فضه ضايجه حته مافرحانه الي يشوفهه مسكينه
بعدنه اني واسماء نسولف اجه قيصر للمطبخ سلمت علي رد السلام...
اشو هذا تقرب عليه وصاك اسنانه ويخزر بيه
وكال شعندج ويه بلسم؟؟
شمه: ماعندي شي...
قيصر: شمه اعرف السانج من يكوم يمطر شمحاجيتهه؟؟
شمه: كوه حابسه دموعي فوك الاهانه الي اكلتهه فوك ماجاي يدافع عنهه اااخ ياكلبي شتتحمل بعد...
والله ماعندي شي هي تقلد علينه وعلى لبسي واني رديتهه..
اسماء: قيصر بلسم مااحترمت شمع وسمعتهه كلام موحلو وكامت تحجيله اسماء على الصار  وحته اذا ماتصدك اسأل بنات عمي حسن واكفات جانن ...
قيصر: هاي هي كالت هيج لشمه ؟؟
شمه: قيصر راح اروح لبيتنه  والله لوادري ماجيت بس عمه فضه دزت عليه ولبسي مابي شي وترى هذا الفستان ثاني مره البسه حته جديد صح كاعده بقريه بس مو رثه اني وصحيح اني مادارسه مثلهه بس اعرف اسولف خنكتني العبره كوه حابسه دموعي...
قيصر: اششششش لاتحجين هيج وما اطلعين ضلي هنا
شمه: لا اريد اروح خطيبتك يصيبهه قرف من عندي
قيصر: شمه كتلج ما طلعين اصعدي فوك بغرفه اسماء هسه اجي  وانتي اسماء روحي صيحيلي امي
شمه: عافنه وطلع واسماء كالت لاتعاندين لاتصير مشكله وامي يرتفع ضغطهه
صعدت فوك وضليت انتظر قيصر شوكت يجي وشيريد دحكت على ملابسي حلوات وخاصه هذا الفستان احلى واحد عندي لونه زيتوني وبي دكم ناعمه من ورا لحد الخصر وبي كسرات ناعمه من الصدر وجسمي رشيق وطالع حلو عليه
ليش تقلد عليه رجعت على شكلي بدون مكياج وحلو وبيضه هم حظي دزج عليه فوك ما اخذتي قيصر مني فوك ماجايه تستهزئين بيه...
لازمه دموعي كوه حته ما ابجي خاصه من كالت هيج
شويه وانفتح الباب قيصر
دخل وسد الباب ورا وتقرب عليه
دخيلك ياكلبي لاتفشلني كامت كل اعظائي تلحن وتعزف وتركص اردد بداخلي لاتضعفين صيري قويه ...
قيصر: شمه؟؟
شمه: هاااا قيصر
قيصر: دحكي بعيوني
شمه: هو كال هيج واني ردت اخرب شدحك انفضح ياقيصر ضليت مدنكه وافرك بأيدي
قيصر: مو وياج شمه رفعي راسج
شمه: ابد ماكدرت اصد بعيونه ضليت منزله راسي وكلبي ينبض سريع حسيته تقرب اكثر وانفاسه عاليه هذا شبي اليوم تخبل لوما خطيبته جوه..
قيصر: على راحتج لا ترفعين راسج ردت اعرف شي وعرفته هسه
اسمعيني شمه ما اقبل كان من يكون يقلل من شأنج لو موخطيبتي اعرف متماديه وياج ويه امي  ومن سألتج ردت اتأكد لان الي سمعته انتي متجاوزه عليهه...
شمه: لا قيصر شلون اتجاوز على خطيبتك وبيتكم مو اخلاقي هاي يله ماصار شي خلي اروح اني هسه بيبي ظل بالهه لان كلتلهه ما اتأخر..
قيصر: لا تعالي وياي وبعدين روحي
شمه: طلعت ورا هو نزل قبلي واني نزلت جوا صاحتني اسماء لغرفه امهه لكيت بلسم وعمه واسماء كاعدات
شويه واجه قيصر بدون مقدمات وجه كلامه بصيغه امر على بلسم وكالهه كومي اعتذري بسرعه وهاي كدام الكل ايا

ج تعيدين الي حجيتي ويه امي لو ويه شمه
بلسم: شبيك قيصر شحجيت جنت اتشاقه وهي بنت عمك تهجمت عليه
قيصر: ماتشاقين امي الهه احترامهه وكيانهه بهذا البيت موحضرتج تشاقين بشقه ماصخ بدون معنى
وشمه نفر من العائله هم ممنوع تحاجيهه احترامهم من احترامي...
بلسم: اوك حبيبي ما احجي
قيصر: اعتذري يابلسم لاتخليني اتعامل وياج بغير اسلوب بعدج اول يوم هنا وهيج سويتي شتفقت وياج من الاساس
فضه: يمه هي هم بنيتنه تتعلم شويه شويه علينه ماصار شي ارجع انت للخطار وهدي نفسك
قيصر: لاتخليني اعيد الكلام مره ثانيه دكومين لولا
شمه: حجاهه بتهديد ومبينه العصبيه علي وخزرهه
مبينه بلسم افندي تخاف بسرعه كامت باست راس عمه فضه واعتذرتلي وطلعت ضايجه
فضه: ليش يمه حرجتهه جان خليتهه بعدهه ماتعرف طبعنه فشلتهه كدامنه
قيصر: لا تعرف كلش زين ونبهت اكثر من مره بس ماخذتجن بالعين الزغيره اسمعي يمه لادافعين الهه خليني اعرف اتصرف وياهه هذا الصار هنا مايطلع برا ديربالجن
شمه: عجبني تصرف قيصر ورغم هي خطار بس خلاهه تعتذر غصب عنهه لان تجاوزت حدودهه باول ساعه ...
الي عرفته هي مسمعه عمه فضه كلام مو حلو
وفوك كل هذا رايحه شاكيه لقيصر عود امك ترزلني مبينه صاحبه مشاكل هاي  بس السوا قيصر رد اعتباري عيونهه نطت بكصتهه
وقيصر عنده تحترك العشيره ولا امه
رغم ما مختلط بينه هوايه بس شخصيته تخبل وكلمته وحده فوك كل هذا المايدري يلومني بحبه
ماضليت للغدا لان البيه كافيني واني امشي ضل بالي ليش كالي رفعي راسج ودحكي بعيوني وشنو قصده من كال ردت اعرف شي وعرفته هسه
زين شو تصرفه وياهه مو مال واحد يحب 4 سنوات لو واحد غيره جان رجع علينه يتعارك شنو سبب بروده قيصر ويه خطيبته
ااااوف ياقيصر كلما اكول راح انساك تطلع بطريقي شلون تاليتهه ويه حبك ....
بطريقي للرجعه للبيت شفت ناس هوايه متجمعه يم بيتنه اخذني الخوف شكو ياربي كمت كلما اتقرب اسمع صوت عياط وصياح نسوان...
لا اكدر اكمل طريقي زلم هواي ولا اكدر اعرف شكو بعدني واكفه وشفت ضرغام وقيصر طلعوا يركضون ووراهم عمي حسين ...
ماادري ليش اجه رافد بين عيوني...
ياربي دخيلك ...
#يتبببع

#البارت الثالث عشر
#وحوش بشريه

ماريدك وريدك حرت وحتاريت
العفتني والبقيت ثنينهن بلوه
من اشوفك عمري يخلص يوم يوم يضيع
وبنفس الوكت جن منولد توه
صدفه الجابتك مو موعد ونضرات
وصدفه الحب يجي مايجي بلكوه
.ويجي دور الصبح واعتذر من فيروز
وابدي اسمع بصوتك شعر مو غنوه
طبعك مو حلو بس اني قانع بيك
ولكن مالت الله سوالفك حلوه
صدلي بربع عينك وشتريك بروح
المو  ادم صدك مايفتهم حوه ......
شفت ضرغام وقيصر وعمي حسين كلهم يركضون وصوت الصياح مال النسوان عالي رافد استحوذ على عقلي وبس اردد يارب احمي...
اخذتني رجليه اريد اشوف شنو الصاير  الخوف اخذني يارب استر كولشي ولا رافد اسمع صوت نسوان يصيحن بعدك شباب ماشفت شي بس الصوت وحده مرعب ياخذ الروح
اقتربت من ورا الشجرات ضليت ادحك من بعيد
نفس المكان الي شفتهم يحفرون بي متجمعين يمه ومن لمه الزلم ماشفت شي بس اسمع اصوات ناس دكول غطوا وناس دكول لا اله الا الله شنو ذنبه والي يكول هاي جريمه قتل...
شفت خالي سلمان يفرفح ويصيح يا ناس منو داس كاعي شجاب هذا الرجال بكاعي حاله خالي يرثى لها
يدافع عن نفسه وعن كاعه بكل مايملك من قوه بس منو راح يصدكه...
بلحظه تملكني الخوف كمت ارجف اديه ورجليه الي شفته مو خيال ولا حلم الي شفته حقيقه
منو هنا بقريتنه عنده هيج قدره يكتل انسان ويدفنه واكيد راح توكع براس خوالي  لان بكاعهم
زين شنو ذنبه وهو شاب حته هذا عنده عداوه؟؟؟
خفت لا واحد يشوفني بنص هاي الزلم رجعت لبيت عمي حسين بس ماطبيت جوا ضليت بلحديقه البرا افتر مثل المخبله ...
شويه واجه قيصر يمشي بدون وعي ركضت ع قيصر كمت احجي وما ادري بنفسي من اثر الخوف ومنفعله ما اعرف شحجيت كوه طلعت الكلام...
شمه: قيصر اني شفتهم من دفنوا
من كلت هيج قيصر فتح عينه على وسعهن متفاجئ
قيصر: شمه شنو شفتي تعالي وياي لاتحجين شي
شمه: امشي ويه قيصر مثل المنومه مغناطيسيا اديه ورجليه يرجفن ودموعي تنزل من الخوف ابجي على حال خوالي شلون تهمه اجتهم ومنظر خالي سلمان يفرفح ويبرئ نفسه
وصلنه لمكان معزول ورا بيت علاهن التفت عليه قيصر وهو متفاجئ بحالتي
قيصر: احجي شمه شنو شفتي؟؟؟
شمه: كمت احجيله بالتفصيل وشلون رافد ضحك عليه وبيومهه جانت مطر وماشفنه شي ..
قيصر: دحكي عليه الي شفتي انسي ديري بالج تحجين حرف واحد ووصي رافد هم ترى هاي جريمه قتل وفعله فاعل ومتعمد يذب خوالج بتهمه وماعنده مانع يكتلج هم
شمه: خالي سلمان يروح بيهه شنو ذنبه ؟؟
قيصر: لاتخافين على خوالج خافي على نفسج رافد نقيب وعنده معارف ويكدر يطلع ابو
شمه انتي بعدج بنيه لاتخسرين نفسج ترى قريتنه تحب الدم وكلنه نعرف هاي جريمه قتل لاتحجين حرف واحد وادخلين نفسج بمتاهات ...
شمه: اي ما راح احجي اي شي بس وصلني للبيت اخاف افوت
قيصر: امشي يله وامسحي دموعج
شمه: وصلني للبيت ورجع لكيت بيبي مسويه عزا وادوك وتنوح وسعاد وبناتهه  من جهه حقهم الشغله جبيره
البيت مكلوب والناس  رايحه جايه زلم عشيرتنه متجمعه باب خالي سلمان
اجت الشرطه واخذوا خوالي كلهم وضلت بس النسوان بالبيت زاد الامر سوء وبيبي نوريه كلساع تتخربط
جان هذاك اليوم صعب حيل صار الليل وبس الجهال والنسوان والبستان فارغ صح ارجال خالي منتشرين بس الي شفته جان كافي يعيشني برعب
بليل اجه وسام عليه وكال ابوي يكول خلي تبات يمنه بلاول ماردت اروح بس بيبي كالت مابينه حيل المشاكل رحت ويا بس ماجنت ادري بلاسم افندي موجوده بعدهه اول مادخلت تفاجأت بيهه كاعده ومخليه رجل على رجل وتكرز حب
وامهه تسولف ويه عمه فضه وتحجي بالموديلات والسفر مبينين ابد مو راحه
بسلم ماحجت وياي ولا اني اسماء صارت بين نارين لاتكدر تجي تسولف وياي ولا تكدر تعوفهه وحدهه عفتهن ورحت للغرفه  افكر بالي شفته والصار
بعدني كاعده جان يجي ضرغام يدور على اسماء
ضرغام: هاي انتي هنا لعد وين اسماء؟
شمه: يم مكيف كاعده
ضرغام: شنو مكيف بهالبرد
شمه: اقصد بلسم خطيبه الدكتور
ضرغام: هههه يمه الغيره مبينه عليج بسرعه لقبتيهه
شمه: اسكت ضرغام منين اغار من هاي جنهه سحليه
ضرغام: بلله عليج امهه ما ارتاحيتلهه...
شمه: شعدهن بايتات مايولن لبغداد
ضرغام: مو باجر يعقدون محكمه وماكملت الفحوصات اليوم
شمه: يله يوم الالك ونفرح بيك
ضرغام: لصمي حلكج لاتهيجين جروحي ترى بليل يوميه يفزن واضل سهران وياهن
شمه: الله يعين كلبك ياضرغام ماكتلي شتريد من اسماء؟؟
ضرغام: اريدهه تكوي قميصي باجر اريد اروح لبغداد
شمه: هسه اصيحهه حته دكوم من يم بلسم
رحت صحت اسماء وكتلهه ضرغام يريدج
اسماء: همزين صحتيني متت من لواكتهه والله عبالك زعطوطه ولا دكتوره وجبيره
شمه: غير اختيار اخوج ؟؟
اسماء: اوووف ياقيصر معقوله انعجب بيهه على شنو ما ادري ماتنحمل ابد
شمه: هسه ماعلينه كومي اكوي قميص ضرغام واني راح انام والله عليج لاتجيبين هاي تنام يمنه
اسماء: ماشي نامي لاتهتمين
شمه: تعبانه من احداث اليوم بسرعه غفيت ماحسيت بنفسي حته مافكرت فزيت الساعه ب1 عطشانه اريد اشرب مي كمت من مكاني بس اتذكرت الموقف

وخفت كعدت اسماء وياي حته ننزل جوا اشرب مي
نزلت اشحط باسماء لان نعسانه بعدني على الدرج وسمعت صوت همس من المطبخ اشرت لاسماء تسكت ونزلنه على كيف نتسمع
اجانه صوت بلسم وقيصر سمعناهه تتوسله وتعتذر
بلسم: قيصر لا تاخذ عليه هيج نظره اني مو من هذا النوع والله حبيت اتشاقه ويه بنت عمك بس هي اخذتهه بغير شي
قيصر: بلسم تصرفج مو حلو ابد من شمع لأمي شنو تشاقين وانتي خطار مو عيب دكتوره ودارسه ومثقفه وماتعرفين تحجين
بلسم: حبيبي قيصر اسفه ما الي علاقه بعد بعدني ما اعرف طبعكم
قيصر: لا تعرفين طبعهم مثل طبعي وصراحه يابلسم اني مصدوم بتصرفاتج يوم عن يوم اكتشف شي جديد مايعجبني
بلسم: لا تلومني بصعوبه راح اتكيف وياكم خليلي بيت ببغداد وتشوف بلسم طبيعيه
قيصر: للمره الثانيه راح اعيدهه بيت ببغداد ماكو اني اكعد ويه اهلي ماجبرتج ولا ضربتج على ايدج كتلج اني ما اعوف الانبار ووافقتي وكلتي لو باخر الدنيا اكعد وياك
بلسم: بعدني عند كلمتي  شعندي غيرك بس ياقيصر والله البيئه تختلف واني غريبه هنا حته امك احسهه ماطايقتني
قيصر: بلسم لاتخليني اتجاوز عليج امي لاتجيبين طاريهه ولادكولين امك كولي عمه لو خاله راح اطلعيني عن طوري وهذيج الساعه اشوفج شي ماحاسبته
شمه: ضلينه اني واسماء وحده تباوع لثانيه شلون يهين بيهه وهي لازكه ماتروحين على شباب بغداد مالكيتي غير قيصر
كمنه نسمع صوت اقرب للهمس وبس حبيبي اخذني الفضول اباوع تقربت على باب المطبخ صايرين مو بجهه الباب مايشوفوني
ادحك على كيف شفتهه حاضنه قيصر من ركبته وتبوي بي وهو اي رد فعل ماعنده حته مابادلهه وهي تتدلع وتتغنج علي
ما اتحملت المنظر بسرعه اخذت اسماء وصعدت من هاي اللحظه علنت لكلبي قيصر مو الي تألمت حيل بس ما انهاريت ضليت متماسكه
ما ادري شلون خلصت هاي الليله  كلساع نسمع صوت طلقات معناتهه الحراس احنه كاعدين اتذكر نمت ساعه وحده وفزيت على صوت الطلقات عيني على البرده من الخوف ومن اسمع صوت برا تاخذني الرجفه...
ثاني يوم الصبح رجعت لخوالي
كامت الناس تجي والي اجه يسأل عن خوالي
واكو لا بس يشمون اخبار وياخذون تفاصيل
الي سمعته الميت واحد من غير قريه وبعده شاب عمره 27 سنه وضاربي على راسه ودافني ويكولون حباب وماعنده اذيه ابد وخالي الشيخ يعرفهم حته ماعنده عداوه وياهم
بس منو سوه هيج وشنو مصلحته محد يدري وليش الا بكاع خالي سلمان ووين جانو الحراس
جانت هاي الاسئله الي الكل يسألهه ليش وشلون؟؟؟
صارت الساعه ب2 الظهر سمعنه صوت رمي وهوسه زلم اجت الجهال تركض كالو رد الشيخ سلمان
فرحنه حيل برجعتهم المضيف انملى ناس
رافد مسويلهم واسطه ومطلعهم علما يشوفون الاجراءات ولان ناس تعرف شيخ سلمان واخلاقه زينه ويه العالم كلهه مدحت بي ووكفت بجانبه
خطيه خوالي حالتهم تقهر يكولون دوسه كاعنه جبيره وفوكاهه ميت بيهه منو الي هيج يضدنه وسوه هالمصيبه..
مرن يومين على السالفه والناس ماسكتت كل واحد يحجي شكل الا خالي الشيخ كال الي اسمعه يحجي بالموضوع الله مايخلصه  يله شويه هدء الوضع وبطلت الناس نفاق وجذب...
باليوم الثالث البيت مخيم علي الحزن حته مايقبلون نطلع يريدون يشوفون وين توصل تاليتهه...
بيومهه جنت انظف بالحديقه واجت شهد
وضعهه مو تمام وعيونهه وارمه
ملامحهه ادل متعاركه وباجيه اخذتهه وصعدنه للسطح بس سألتهه شبيج كامت تبجي
شمه: عليمن تبجين يولي منو وياج؟؟
شهد: شمه تعبت لو ما اخاف من الله والله انتحر ولج يوميه سعاد تكتلني ومن احجي لابوي الشيخ تلفهه عليه وبدل الكتله احصل اثنين ويرجع ابوي يعاقبني بس يروح رافد تستغل الوضع ويعاملني بابشع طريقه هي وبتهه براء صار يومين طلعن قهرن بيه حته بطني ماشبعانه اكل لان مسويات عليه حصار
شنو من عيشه عايشتهه اني لو اموت احسن ..
شمه: انتي ليش غبيه ليش ماتخلين ضرغام يخطبج وتخلصين من كل هذا الظيم وشكو سامحه لسعاد وبتهه هيج يسون بيج انتي انطيتيهن مجال وخليتيهن يتمادن مثل ما يتهمنج هم سولفي لا ابوج ولو هو خالي الله يسلمه سماع حجي لسعوده..
شهد: ابوي مايقبل بضرغام مستحيل من ورا علاهن كل عقلج ينطيني الهم صح يحبهم ويمدح بيهم ودائما يكول حرامات ياخذون غربه بس مدام علاهن مايقبل وهاي براء اخاف منهه والله تتهمني وتخلي يذبحني اني مو مثلهن ما اعرف اجذب واحلف بالقران واذب تهمه على غيري
شمه: قصدج بلاء والله اريد اهد عليهه وانعل ابو سعاد ضلي هنا جبانه ومخليه هاي السعلوه شايخه عليج اليوم اذا ما امسح بيهه الكاع
شهد: عزا بعينج شمي اوكفي لو ادري ماحاجيه الج شورطني مو اعرفج خبله وماتلزمين
اركض وراهه اريد اوكفهه مابيه حيل مشاكل لان اكيد ترجع عليه سعاد
شمه: حطيت سيارتي برجلي( نعالي) ورحت لبيت خالي اريد اوكفهه عد حدهه هاي الفصمه مادكيت الباب كبل دفعته وطبيت لكيتهه تباوع لروحهه بالمرايه الي بالمطبخ وترفع بشعرهه وتنزله تجرب تسريحات ام الوسخ..
براء: هاي منو هنا خاف متيهه الطريق شمه افندي..
شمه: لا  مامتيهه براء افندي ولج هييي اسمعي زين وحق الله وكتبه ورسله اذا مابعدتي

عن شهد امسح بيج الكاع مو شايفه نفسج وتسوسين وتجذبين والشيخ مصدكج  خاف عبالج شهد محد بظهرهه والله يابلاء اطيح حظج وعود هم ذبيلج تهمه عليه وشوفي...
براء:  جايه هاده عليه وفوكاهه تغلطين ام البساتين امشي برا ام الزلم  البايره لو بيج خير ماعافتج امج وابوج الزاني بنت علاهن هم الج عين وتحجين..
شمه: من كالت هيج عرفتهه تقصد اخوهه رافد
اني البايره ياعانس ولج عبالج ما اعرف بسوالفج لا ومصدكه نفسج وتحبين تاج راسج ضرغام تحلمين بيوم اطولين اظفره وهاي علاهن الي تعيريني بيهه تكفي صكارة القريه واكبر زلمه ادوس على راسه
براء: امشي اطلعي برا لا اجي انعل والديج شمه الدايحه الساقطه
شمه : هي كالت هيج واني كل الشيطاين تربعت براسي اني الدايحه والساقطه بنت سعوده اليوم احرك عشيرتج
هديت عليهه جريتهه من شعرهه وهي هم لزمتني من شعري تعاركنه ووحده تجر بشعر الثانيه  والصياح شعلوه بيتهم فارغ امهه واخوتهه طالعين
كوه فلتت منهه ماتنلام بيهه شهد من دكول وكحه
ثارت عليه جنهه الثور المجنح بس كلت هي عركه عركه خلي اهد عليهه مره ثانيه هاي فرصه ماتتعوض
اسنونهه متر وضخمه عبالك وحده عدهه 5 جهال بس صدرهه يجوز 4 كيلوات لحم
جنهه مدرعه مدري دبابه كل الوصف قليل بحقهه
رجعت عليهه اضرب بيهه شلون العصفور من ينصدم بحاجز كونكريتي اضرب بيهه يله اوصل نص جسمهه وهي مسيطره سيطره تامه وفارضه احتلالهه على جسدي الممشوق
ولاعبالك اضرب بيهه مرعدتني تمرعد بس كل هذا وما استسلمت حاولت ادافع بكل قوتي ولا اطلع خساره وتسجل عليه بالتاريخ براء كتلت شمه ..
بعدهه المناورات مستمره مابقه شي بيه ما حصل نصيب من سنون بلاء اخر ماتبقه مني شالته بعضه
عضتني من ركبتي قريب على كتفي  خلتني اكمز
اريد افلت بروحي العزيزه مااكدر يمعوده يا ام الغيره بطلت بس عوفيني دخيلك ربي
يامنجي يونس من بطن الحوت نجيني من اسنون براء  ...
بهاي الاثناء وبعدهه المعركه داميه والمسحول شمه جان يطب رافد اول ماصاح بيهه انهزمت وطلعت برا تركض من كون طلعت روحهه على هاي الدكه...
شمه: الحكلي رافد حاطيلكم جلب مسعور هنا ماظل شي بيه صاحي
رافد: شو تعالي عليمن تعاركتي وشجابج وحدج ووين امي؟؟
شمه: اجيت احجي عليهه لان كاتله شهد اشو هاي ثارت عليه جنهه مدفع يمعوده خلي نتفاهم مايفيد
رافد: ههههه كومي غسلي شوفي وجهج شلون صاير واني اعلمهه هاي البلوه الف مره كايل ماتمد ايدهه على شهد وانوبه عليج والله الا اطيح حظهه
شمه: رحت غسلت واباوع لوجهي مخرمش وشعري مكفوش جني عصفور مهلس لزمت ركبتي عضتهه توجع اثار سنونهه نابته بركبتي ..
بعدني واكفه انشف بوجهي اجه رافد يدور عليهه الاخت انهزمت مدري وين راحت
اني نازعه الشال وركبتي حمره من العضه لاحظت نظراته موجهه على ركبتي خليت الخاولي على راسي وحاولت بسرعه البس شالي وافلت بروحي هاي العائله خطيره هسه انسحلت من بلاء وانوبه رافد
شمه: دير وجهك لادحك هيج ماتشوفني مامستره
رافد: ماتخليني املي عيني بيج الله اكبر شوكت افطر ما ادري
شمه: دحكت على طوله شفته بملابسه العسكريه اول مادخل ما انتبهت زين
النجمات على اكتافه والشوارب خفيفه والشعر خفيف صدك طالع حلو
انتبهت على نفسي كصيته كص عيني تصعد وتنزل على طوله شلون نظرات الواحد السرسري
نزلت عيني وحاولت اطلع من يمه...
تقرب عليه واني ارجع ليورا صرت بين ايديه وبين المغسله كلبي يدك سريع نظراته اكلت كل شبر بيه الشال على راسي بس مالحكت الفه
بلحظه ما اعرف شسميهه ضعف مني لو منه لو الشيطان وسوسلنه اثنينه...
نزل راسه بهدوء وخمطني ببوسه من عظم ركبتي حسيت بقشعريره سرت بكل جسمي غمضت عيوني ما اكدر اسيطر على نفسي ولاعندي قوه ادفعه
ما اعرف شلون اوصفهه ..ذوبان انصهار تكثيف تبخير كل العمليات الكيمائيه مريت بيهه واني بين ادين رافد
اريد ادفعه لزمته من قمصتله العسكريه
حسيته تعمق اكثر بالبوسه ولحيته الخفيفه وشواربه ادغدغني وهو على نفس المكان يبوس وانفاسه تلهب بركبتي
بسرعه دفعته ويه دفعتي صارت سعاد امه بوجهي ...
#يتتتتبع

#البارت الرابع عشر
#وحوش بشريه

شعاتب والعمر ورگه بخريفك طاح
تهز عمري وتطيح سنين من عندي
ظلمه وخيط اسود وابره عد عميان
وعفتني بنصهم انزف زرفو چبدي
ياسگف البنيته من الشمس لشتاي
بحر تموز اجيتك شفتك مندي
وشگلك من شفت ظعنك مشه لبغداد
المسيح من انصلب ماصرخ بگدي
انأ شايل جنازه من ابجي عذري وياي
بجيت ارثي الشباب الراح من عندي
وهذن دمعاتي سالن وي بياض العين
حسبالك نوارس حطن بخدي
اريد ادفعه لزمته من قمصتله العسكريه
حسيته تعمق اكثر بالبوسه ولحيته الخفيفه وشواربه ادغدغني وهو على نفس المكان يبوس وانفاسه تلهب بركبتي...
بسرعه دفعته ويه دفعتي صارت سعاد امه بوجهي ...
شهكت على اثر صوتي التفت رافد..
الموقف محرج رافد نزل راسه ويمسح بشعره..
سعاد: ها بنت سناء مختليه بالرجال وتبوسين بي ياعيبه العيبه ابيت الشيخ وتمارسين الفاحشه
رافد: يمه شنو هالحجي
سعاد: يا ابن الشيخ يا الضابط شسميهه هاي يارافد ابن بطني شكول للشيخ ابنك وبنت اختك يمارسون الفاحشه يافضيحتج يا سعاد
رافد: شلزكتي بالفاحشه نصي صوتج وشمه اني احبهه وتدرين كلش زين مو اليوم باجر هي على ذمتي لا تصيحين ولاتعبين نفسج وهذا الموضوع ماينفتح سمعتي يمه ..
التفت عليه كال روحي لبيتكم شاف حالتي من الفشله ما اعرف  شحجي خدودي حمر ومفعول البوسه بعده بجسمي  ...
عفته وطلعت اركض شكد الجو بارد بس اريد اذب نفسي بالشط حته ابرد هم حصلت كتله من براء وهم رافد وبوسته الي جسمي احسه خدران وهم سالفه سعاد ياربي دخيلك بسلا تحجي لخالي ويصلخ جلدي
امشي وحالتي موطبيعيه كل اعظائي ترعش من اثر لمسه رافد من ارتباكي وسرعتي انظربت بالباب وما ادري
رجعت لكيت شهد تنتظرني تسالني شسويت وشبيج صافنه
واني بعالم ثاني شحجي رحت هداده على براء تالي انكتلت وتخزيت  لو اكلج مارست الفاحشه على كولت سعاد ...
خطيه شهد من شافت ما مني فائده عافتني وراحت
ركضت على المرايه اباوع لشكلي رغم السحله الس انسحلتهه بس شكلي صار حلو  خدودي حمره اتلمست مكان البوسه شكد حلوه
بس خفت من سعاد خاف تحجي لخالي وتصير كتلتي عمل شعبي ما ادري شلون اجه قيصر ابالي شلون سويت هيج وسمحت لرافد يتقرب من عندي
جنت بحاله فوضى عارمه ونزاع بين قلبي وعقلي
عقلي يريد رافد ويكول قيصر مو الي ومايفيدني وكلبي ينادي بأسم قيصر وبعده عايش بعالم الاوهام
ضليت كل ما يندك الباب افز اكول هسه يجي خالي سلمان ويعرف بالصار
صار الليل وكولشي ماكو هدوء ياشمه ياغبره شوكعتي نفسج بمصيبه فوكاهه شهد راحت وما اعرف شصار وياهه خاف براء اطلع حيفهه بشهد وهاي المسكينه توكع بيهه
تذكرت بوسه رافد جسمي كزبر سطرتني سطر انعل حظج ياغمه كلبج يدك لقيصر وعقلج يريد رافد ادري انقسم نصين
صار الليل  وجنه كاعدين وسمعت صوت خالي سلمان بالباب لو متت احتاجيت الحمام بلحظه يمه اكيد سعوده حجتله وراح يطيح حظي اريد انهزم من كدامهم بس خالي مايقبل واحد يكوم وهو جاي
دخل خالي ورافد بس جان طبيعي خالي حته سلم عليه ولاكأنما صاير شي حاله حال الايام البقيه
انتبهت على رافد غمزلي وابتسم يمكن شاف حالتي من الخوف والهلع هذا شبي رافد اليوم صاعده عنده المشاعر فول
طول ماكاعدين يسولفون واني عيني على رافد
اتفحصته شبر شبر...
لابس دشداشه كريمي وكاعد بالكاع وطابك المخده ومرتجي عليهه ملامحه تخبل كلساع تجي عيني بعينه واخجل تصرفاتي كلهه خارجه عن المعقول شجاني اليوم تخبلت مدري براء ضربتني على راسي وخلتني افقد خيط
انتبهت على نفسي امداج شمه هم تريدين تحبين وتنصدمين مو كلتي راح ادرس وانجح اشو من اول بوسه وكعتي...
كمت من يمهم لان راح افضح نفسي رغم هذا اليوم مملي بالمغامرات بس فرحانه بي كلما اتذكر نظره رافد وبوسته ابتسم واخجل...
حسيت على نفسي بهاي الايام افكر برافد هوايه واشتاقله من يروح عيني على الباب شوكت يرجع ..
وما ابطل سؤال عنه رغم هو ملتهي حته من يجي مااشوفه هوايه
شغله الولد المات تقريبا انسدت رافد عنده معارف واعتبروهه عداوه بس اهلهه ماسكتوا واخذوا فصل من خالي سلمان ومحد عرف منو السوه هيج بس خالي هواي شغل حراس على البيت والبستان...
مرت الايام طبيعيه مشاعري مخربطه بين قيصر وبين رافد بس اكثر وقتي افكر برافد والي خلاني انشغل بي اكثر كلام شهد
كالت اله كلمته بالبيت والكل تهابه حته امه ماتكدر تحجي ويا ومحاسب براء على الصار بهذاك اليوم وامه ابد ماجابت سيره للموضوع بس من تشوفني تخزرني بس ماتحجي تأكدت بوقتهه صدك رافد هيبه وشخصيه...
بيت عمي حسين ما اروحلهم هوايه لان اسماء تمتحن سادس علمي وضرغام يشتغل ببغداد بشركه واتجنب قيصر حته ما اشوفه ولا اعرف اخبارهم
خطيه ضرغام عاف القريه وسكن بغداد ويجي صدفه يشوف امه من اسأله يكول  شهد خانكتني كل يوم احبهه اكثر بس مابيدي شي ابتعد احسن ما اتعذب الف مره باليوم واني اشتم انفاسهه ويه الهوه
...
صادف شهر السادس وظهريه الجو حار وسمعنه طلقات من بيت عمي حسين بدت تركض الزلم ويصيحون شكو واحنه فزينه والكل لازم كلبه
بس سمع

نه صوت هلاهل وهوسه معناتهه اكو فرحه
شويه وكالو اسماء بنت حسين ناجحه بمعدل 95
وهاي ابوهه حرك الجو اول ابنيه من القريه اطلع هيج معدل موبس قريتنه كل القرى المجاورتنه اسماء طلعت الاولى على المدرسه
شكد فرحتلهه بهذاك اليوم واشكد استحسفت نفسي شلون اسماء درست ونجحت وشلون اني مشيت بدرب عاثر من ورا حب قيصر تالي ماحصلت غير شلعان الكلب
ثاني يوم عمي سوه غدا جبير فرحان بيهه يكول رفعت راسي اكثر من قيصر لان هذاك ولد بس هاي بنت والكل جان يلومني ليش اخليهه تدرس ونفسهم الي لاموني هسه اجو باركولي ويكولون قره عينك........
فرحه عمي حسين بحد ذاتهه سعاده كلساع يجي يبوسهه ويكولهه ماضاع تعبي بيج وخليتي الكل تحمد بتربيتي ..
ادحك على اسماء الفرحه مرسومه رسم على وجهه
واخوتهه فرحانين بيهه وكلساع واحد يجي يبوسهه ويشاقيهه...
من هاي اللحظه قررت اعوض مافاتني وابدي اجد واجتهد حته اشوف هاي الفرحه والكل تباركلي بس ما اعتقد راح تصيريلي هيج فرحه لان اسماء عدهه ام واب واخوان وهيج فرحولهه شمه منو تفرحلهه علاهن لو امي...
بدت اسماء تحظر بنفسهه حته تنتقل لحياه ثانيه وهي الكليه طلع قبولهه صيدله جامعه الانبار واني بديت اداوم بصف الخامس مثل ماكال ضرغام صيري عاقله ابد ما الي علاقه باحد حته ماعندي صديقات مجرد سوالف ارجع من دوامي ابدي اقره الي تكفل بيه ضرغام هو المسؤؤل عن دوامي مرات هو ياخذني ومرات يدزلي السايق مالتهم
بس الفلوس والملابس هاي على رافد ابد ماخلاني احتاج شي شكد ارجعهن وما اخذ ويهددني يبطلني واخذ منه  دائما يكول من تتعينين اخذهن منج
شويه بدت حياتي تستقر حته كمت احب حياتي وعندي طموح وهدف لازم احققه
مرت هاي السنه حيل هادئه لاشفت امي ولا اخواتي لان امي كل سنه تجيب طفل وبالمناسبات دائما تصادف جايبه
رافد يبني بيت بصف اهله وتقريبا راح يكمله ودائما من يشوفني يكول ماظل شي بس يكمل البيت نتزوج
اما قيصر خطوبته طولت واسمع من اسماء دكول بلسم يوميه تخابر على امي دكولهه قيصر مايقبل نتزوج يكولهه بعد ما اعرف شبي قيصر وشنو يفكر
صرت صف سادس علمي ودراستي زينه بيهه اكثر واحد وكف بجانبي هو ضرغام ورافد لو ابقى طول عمري ما ارجع قطره من تعبهم عليه
...
سنه 2009 الشهر الثاني جنت كاعده بليل اقره سمعت صوت خالي سلمان بس ما طلعت لان عندي امتحان
شويه واجت شهد كالت ابوي الشيخ يناديج
شمه: طلعت سلمت لكيت الكل مجتمع اول ما اجت عيني على رافد ابتسم بوجهي ما عرفت هاي الجمعه على شنو؟؟
سلمان: بنيتي شمه انتي كبرتي ومايهون علينه خيرنه يروح للغريب واليوم اني بنفسي جاي اخطبج لرافد
شمه: ضليت متفاجئه ومرتبكه اتذكرت كلامه من كال ما اناسب علاهن وعدهه ولد عم ومرجعهه الهم ردت احجي بس اتذكرت تعب رافد عليه مايستاهل افشله كدام اهله ومبينه سعاد جايبيهه كوه
سلمان: ها بنيتي شكلتي ليش سكتي
شمه: موافقه خالي بس اضل على دراستي ماضل على امتحاناتي شي
من كلت هيج سعاد كامت تنفخ جنهه تنين وخالي سلمان ماعجبه الحجي بس مبينين يخافون من رافد
سلمان: بعد القرار لرافد مو النه
يمه دزي خبر لامهه الجمعه االخطبه خلي تفرح ببنيتهه
شمه: من كال امي ضجت ما اريد اشوفهه اصلا نسيتهه التفتت على رافد شفته ملتهي يحجي ويه خالي نعمان
رحت للغرفه واني ما اعرف السويته صح لو غلط ما انكر بعده حب قيصر معشعش بداخلي بس ياترى اكدر اسعد رافد واكون بس اله؟؟
دزو خبر لعمامي وبوقتهه صارت يوم القيامه علينه علاهن كالت اطلع بالسلاح اطشر بيت سلمان بنتي ما انطيهه الهم لو تنكلب الدنيا شكد ادخلت ناس ومافاد راح تجي الجمعه واحنه على هذا الوضع خالي
عمي حسين ادخل وكال اتوكلوا وعقدو باقرب وقت ترى امي ادور مشاكل بس كلبي ما مرتاح وخايفه علاهن ماتسكت وما اعرف شنو العداوه البناتهم
رافد التحق وكال الجمعه الصبح انزل حته نعقد العصر جنت متردده كلساع اريد ابطل واخاف احس استعجلت بهاي الخطوه بعدني احمل مشاعر لقيصر وخاف اضلم رافد وياي...
صليت ودعيت وسلمت امري لله هو حسبي وكفيلي الي بي صالح يقدمه دعيت اتخلص من حب قيصر ويطلع من بالي بعد ماجنت ادعي يصير من نصيبي
شكد تمنيت بهاي الايام امي لو اختي ويايه اشكيلهه حالي واسولفلهه بشنو افكر وتساعدني صعبه حيل ابنيه تتخذ قرار بدون نصيحه امهه
ادحك بالوجوه اريد وحده احجيلهه وتنطيني رايهه وتنصحني حايره المن احجي شهد نفس عمري واكيد تنحاز لاخوهه اسماء من يومهه وساعدتهه دكول قيصر مايفيدج
ردت انسانه جبيره ام اخت خاله عمه تنصحني واطمني بس مالكيت احد يفهمني غير سجادتي
ضليت يوميه اصلي وادعي الله يدليني الطريق الزين ...
بعد يومين عن خطوبتي صادف ثلاثاء اجه خالي سلمان صاير نار ويحجي على عمامي وحملني اللوم جان صوته عالي واسمعه صدك انقهرت بوقتهه اتمنيت رافد موجود حته يدافعلي...
سلمان: والله يايمه اني هالزواجه ماريدهه خطبت اجباري علمود وليدي والا اني من الاساس لا اريد شمه ولا اهلهه
الحجيه: حسك ياسلمان واتقي الله البنيه مايوم طلعت منهه عيبه تحملهه ذنب ابو