#قصص_الأنبياء(٢)
#السيرة_النبوية
#الحلقة_الخامسة_والسبعون
#حماية_المسلمين_لرسول_الله_في_أحد

اتكلمنا المرة إللي فاتت عن هزيمة المسلمين وتعرض رسول الله ﷺ للأذى الشديد وحتى قيل إنه مات وكان السبب في الهزيمة هو عصيان الرماة لأمر رسول الله ﷺ،
أكيد في ناس بتسأل :
هو ليه رسول الله ﷺ والمسلمين إللي معاه يتحملوا نتيجة خطأ مجموعة منهم، يعني هل من العدل إن السبعمائة إلا قليل يتحملوا نتيجة خطأ أربعين شخص😓
يعني كان ربنا ينصر رسول الله ﷺ والمسلمين وبعدين يبقى يعاقب الرماة على عصيانهم 🤷‍♀️

يجاوبنا على السؤال ده حديث رسول الله ﷺ :
"مثل المؤمنين في توَادّهم وتراحُمهم وتعاطفهم مثل الجسد إذا اشتكى منه عُضو تداعى له سائر الجسد بالسهر والحمى"

المسلمين كلهم زي الجسم، هو لو الإنسان ضرسه وجعه ولا إيده وجعته بيقدر ينام؟
طبعا مبيقدرش، هل العين تقول طب أنا ذنبي إيه إني لا أنام عشان في ألم في الضرس ولا في اليد، ولا بتسهر وبتتألم هي كمان؟
في الإسلام مفيش حاجة اسمها أهم حاجة نفسي وبس، في الإسلام الفرد ممكن يضحي بمصلحته الشخصية عشان مصلحة الجميع،
فلما واحد من المسلمين يعمل خطأ يتحمل نتيجته كووول المسلمين👌
وهنا ييجي ضرورة الأمر بالمعروف والنهي عن المنكر👌
تعالوا كده نشوف حديث السفينة، رسول الله ﷺ يقول :
"مَثَلُ القَائِمِ في حُدودِ اللَّه، والْوَاقِعِ فِيهَا كَمَثَلِ قَومٍ اسْتَهَمُوا عَلَى سفينةٍ،
فصارَ بعضُهم أعلاهَا، وبعضُهم أسفلَها، وكانَ الذينَ في أَسْفَلِهَا إِذَا اسْتَقَوْا مِنَ الماءِ مَرُّوا عَلَى مَنْ فَوْقَهُمْ،
فَقَالُوا: لَوْ أَنَّا خَرَقْنَا في نَصيبِنا خَرْقًا وَلَمْ نُؤْذِ مَنْ فَوْقَنَا.
فَإِنْ تَرَكُوهُمْ وَمَا أَرادُوا هَلكُوا جَمِيعًا، وإِنْ أَخَذُوا عَلَى أَيْدِيهِم نَجَوْا ونَجَوْا جَمِيعًا "
يعني مَثل الشخص إللي بيراعي حدود ربنا وبينفذ أوامره ويتجنب نواهيه والشخص إللي واقع في المنكرات والخطأ زي ناس ركبوا سفينة🛳 فعملوا قرعة عشان يشوفوا مين هيقعد على ظهر السفينة ومين هيقعد أسفل السفينة،
فناس قعدوا على ظهر السفينة وناس قعدت أسفل السفينة،
وكان الناس إللي أسفل السفينة كل ما يكونوا عايزين مية لازم يعدوا على الناس إللي على ظهر السفينة ،
فقالوا:
احنا نعمل خرق في السفينة نخرمها يعني وناخد المية إللي احنا عايزينها وبكده مش هنؤذي الناس إللي فوقنا🤔
فلو هم تركوهم يعملوا خرق في السفينة كل الناس إللي في السفينة فوق وتحت هيهلكوا جميعا😶
ولو منعوهم من خرق السفينة كل الناس في السفينة هتنجو،
فاللي بيعمل معصية وخطأ وبيجاهر بها وسط الناس والناس مأنكرتش عليه وسابته يعمل إللي هو عايزه بحجة كل واحد حر واحنا ملناش دعوة🤷‍♀️
العقاب هينزل على الجميع، وكل المسلمين إللي حوالين الشخص ده هيتحملوا نتيجة خطأه،
لأن المعصية طول ماهي في السر لن تضر إلا صاحبها، لكن أول ما الناس تجهر بها هتضر كل المجتمع،
شوفوا ربنا بيقول إيه:
" وَاتَّقُوا فِتْنَةً لا تُصِيبَنَّ الَّذِينَ ظَلَمُوا مِنْكُمْ خَاصَّةً "
وراجعوا قصة أصحاب السبت إللي قلناها في قصص الأنبياء👌
وربنا قال للمسلمين إنه أعطاهم النصر إللي وعدهم به في البداية، لكن أول ما حصل النزاع بين الرماة وقائدهم عبد الله بن جبير وعصوا أمر رسول الله ﷺ ونظروا إلى الدنيا حصلت الهزيمة👌
"وَلَقَدْ صَدَقَكُمُ اللَّهُ وَعْدَهُ إِذْ تَحُسُّونَهُم بِإِذْنِهِ ۖ حَتَّىٰ إِذَا فَشِلْتُمْ وَتَنَازَعْتُمْ فِي الْأَمْرِ وَعَصَيْتُم مِّن بَعْدِ مَا أَرَاكُم مَّا تُحِبُّونَ ۚ مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ ۚ "

"وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ "

فربنا بيقول لنا بطريقة عملية : مفيش مُحابَاة لأحد، حتى رسول الله ﷺ إللي هو أحب الخلق إلى الله،
في سنن كونية هتمشي على الكل، أطعتم الله ورسوله وتركتم النزاع والفرقة هيبقى في نصر،
هتعصوا أوامر ربنا ورسوله وهتتخانقوا على الدنيا وكله عايز ياخد حتة من التورتة هتشوفوا هزيمة وخذلان مكنتوش تتخيلوها👌
"ذَٰلِكَ بِأَنَّ اللَّهَ لَمْ يَكُ مُغَيِّرًا نِّعْمَةً أَنْعَمَهَا عَلَىٰ قَوْمٍ حَتَّىٰ يُغَيِّرُوا مَا بِأَنفُسِهِمْ"
يعني بالبلدي كده طول ما الناس ماشية عالصراط المستقيم ربنا هيحفظ لهم النعم إللي عندهم،
أول ما يغيروا حالهم من الطاعة إلى المعصية ربنا هيسلب منهم نعمه، ومن النعم دي النصر على الأعداء،

☆ممكن حد يسأل طب والناس إللي في النص دي ذنبها إيه،
يعني الناس إللي ماتت بسبب《 خطأ الرماة》 ذنبهم إيه😓

يجاوبنا على السؤال ده ربنا عز وجل😊
"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ "
مش إنتم كنت بتقولوا احنا نفسنا في الشهادة احنا نفسنا نموت في سبيل الله ، أهه الشهادة جت لكم أهه،
ومع ربنا مفيش خسارة يا جماعة😁
"وَلَقَدْ كُنتُمْ تَمَنَّوْنَ ال

#قصص_الأنبياء(٢)
#السيرة_النبوية
#الحلقة_الخامسة_والثمانون
#أحداث_السنة_الرابعة_من_الهجرة
#حادثة_بئر_معونة

اتكلمنا المرة إللي فاتت عن حادثة ماء الرجيع إللي مات فيها عشرة من أصحاب رسول الله ﷺ، وكانت الحادثة دي في شهر صفر من السنة الرابعة من الهجرة،
في نفس شهر صفر جاء لرسول الله ﷺ في المدينة رجل من الناس المشهورين في العرب وهو أبو البراء عامر بن مالك العامري،
كان بيُضرب به المثل في الشجاعة وكان يُلقب بمُلاعِب الأَسِنّة، وهو عم الشاعر الجاهلي المعروف إللي أسلم بعدين لبيد بن ربيعة صاحب المُعَلّقة،
وكان لما يركب على الفرس رجله تصل للأرض فتخيلوا الرجل ده كان ضخم أد إيه😅
المهم الرجل ده جاء لرسول الله ﷺ في المدينة وعرض رسول الله ﷺ عليه الإسلام فلم يُسلم عامر بن مالك وفي نفس الوقت مرفضش الإسلام وقال لرسول الله ﷺ:
أرسل معي مجموعة من أصحابك يدعوا قومي فلو أسلم قومي أسلمت معهم👌
وكان عامر بن مالك من أهل نجد،
فقال له رسول الله ﷺ: إني أخاف عليهم من فُجّار أهل نَجْد ليقتلوهم!
يعني رسول الله ﷺ خايف على أصحابه من إن ناس من قطاع الطرق الفَجرة يجتمعوا على أصحابه فيقتلوهم،
فقال له عامر بن مالك:
أنا أُجيرُهم، فأرسلهم لأهل نجد يدعوهم للإسلام👌
يعني هم هيكونوا في جواري، يعني في حمايتي،
واحنا اتكلمنا قبل كده عن معنى الجوار وأهميته ومكانته عند العرب وإزاي إنهم كانوا بيحترموا قانون الإجارة ده،
فلأن رسول الله ﷺ عارف احترام العرب لقانون الإِجارة وخصوصا لو كانت الإجارة جاية من واحد زي مُلاعب الأسنة الشجاع المشهور،
وافق إنه يرسل معاه مجموعة من الصحابة معظمهم من القُرّاء، وكان المجموعة دي عددهم سبعين رجل من الصحابة والقراء يعني حفظة القرآن إللي كانوا عارفين أسباب النزول وكانوا من خيار المسلمين،

☆ومعنى حفظة القرآن يعني كانوا حافظين كل القرآن إللي نزل ساعتها مش القرآن إللي هو الثلاثين جزء ، لأن مش كل القرآن كان نزل في الوقت ده👌

كان في السبعين دول المُنذر بن عمرو إللي شهد بيعة العقبة الثانية وحضر غزوة بدر وأُحد مع رسول الله ﷺ،
وكان فيهم حرام بن مِلحان أخو أم سُليم صاحبة أغلى مهر في الإسلام إللي اتكلمنا عنها في الجزء الخامس والستين،
وكان فيهم عامر بن فُهيرة مولى أبي بكر الصديق إللي كان له دور في يوم هجرة رسول الله ﷺ،
كان بيأخذ أغنام أبي بكر يمشي بها كأنه خارج لرعيها،
فيمشي بها على أثار أقدام عبد الله بن أبي بكر إللي كان بيروح لرسول الله ﷺ وأبو بكر الصديق في الغار وينقل لهم أخبار أهل مكة لو تفتكروا😅
وكان من السبعين دول الحارث بن الصُّمَّة إللي كان من الناس إللي ثبتت مع رسول الله ﷺ في غزوة أحد بعد ما الناس انكشفوا عنه وكان بيدافع عنه،
وكان من السبعين كذلك عمرو بن أمية الضمري إللي أسلم بعد غزوة أحد وكان خروجه مع مجموعة الصحابة دول هو أول مشهد يَشهده بعد إسلامه👌

خرج السبعون صحابي بكتاب من رسول الله ﷺ متوجهين لديار نجد عشان يدعوهم للإسلام،
وكان حامل رسالة رسول الله ﷺ هو الصحابي حرام بن مِلْحان رضي الله عنه،
وصلوا لمكان اسمه بئر مَعُونة، سمع بيهم واحد اسمه عامر بن الطُّفَيْل، وعامر بن الطفيل ده يبقى ابن أخ عامر بن مالك مُلاعب الأسنة إللي راح لرسول الله ﷺ وطلب منه إرسال الصحابة لقبيلته،
لكن عامر بن الطفيل كان من الفَجرة الفُسّاق الذين لا يُراعون قوانين ولا أعراف، فاستعدى على المسلمين قومه بني عامر بن صَعْصَعة، يعني طلب منهم وحمسهم إنهم يساعدوه في الهجوم على المسلمين وقتلهم،
لكنهم رفضوا طبعا لأن عامر بن مالك مُلاعب الأسنة سيدهم أعطى للمسلمين الجوار، فهم احترموا قرار سيدهم،
وحتى عامر بن مالك خرج لابن أخيه عامر الطفيل وقال له:
وفد المسلمين ده في جواري ملكش دعوة بيهم🤚
فعامر بن الطفيل قال لعمه عامر بن مالك :
ملكش عندنا جوار😤
يعني مش هحترم جوارك وجوارك وحمايتك دي ملهاش أي قيمة عندي،
فلما لقى عامر بن الطفيل قومه رافضين يساعدوه استعان بقبائل تانية من نَجد هم رَعْل وذَكْوَان وعُصِيّة فاستجابوا له وخرجوا معاه عشان يقتلوا المسلمين،
وصلوا للصحابة عند بئر مَعُونة وحاصروهم وبدأوا يقتلوهم😞
هم دافعوا عن نفسهم لكن سبعين في مقابل قبائل كثيرة هيعملوا إيه،
حرام بن ملحان حامل رسالة رسول الله ﷺ حاول إنه يكلمهم عن رسول الله ﷺ ويدعوهم للإسلام ويعطيهم رسالة رسول الله ﷺ لكن عامر بن الطفيل حتى لم يفتح الرسالة وأشار لواحد من إللي معاه إنه يقتل حرام بن ملحان من الخلف،
مع إن حرام بن ملحان رسول ومعروف عند كل الناس سواء العرب أو غيرهم إن الرسل لا تُقتَل،
يعني مينفعش واحد بيوصل لك رسالة إنك تقتله، هو فقط حامل رسالة فملوش ذنب، ودي كانت كبيرة جدا عند العرب زمان،
لكن عامر بن الطفيل أصلا مش بيعترف بالقوانين وكان فاجر وطاغية😑
قام الرجل وجاء من وراء حرام بن ملحان وطعنه في ظهره من الخلف بالرمح وخرج الرمح من بطنه😶
بكل تلقائية أخذ حرام بن ملحان بيده الدم إللي اتفجر من جسمه وم

#قصص_الأنبياء(٢)
#السيرة_النبوية
#الحلقة_الخامسة_والتسعون
#أحداث_السنة_الخامسة_من_الهجرة
#واهتز_لموته_عرش_الرحمن
#ضمة_القبر

اتكلمنا المرة إللي فاتت عن حكم سعد بن معاذ في بني قريظة وإللي وافق فيه حكم الله تعالى، بعد مقتل بني قريظة وعودة المسلمين إلى المدينة بكم يوم استجاب الله لدعوة سعد بن معاذ،
سعد كان دعا إن ربنا لا يقبض روحه لو كان لسه في قتال تاني لرسول الله ﷺ ضد قريش،
لكن لو مفيش قتال تاني يجعل موته بسبب جرحه فيكون في منازل الشهداء ولكن بعد ما يرتاح إنه انتقم من بني قريظة إللي خانوا العهد،
انفجر جرحه والجرح قعد ينزف لحد ما مات سعد بن معاذ شهيدا رضي الله عنه،
جاء جبريل عليه السلام لرسول الله ﷺ بعد موت سعد وقال له :
من هذا العبد الصالح الذي مات ؛ فُتحت له أبواب السماء ، وتحرك له العرش ؟
فخرج رسول الله ﷺ عشان يشوف مين إللي مات فعرف إنه سعد بن معاذ، ووصل لبيته لقى أمه بتبكيه فقال رسول الله ﷺ: كلُّ نائحةٍ تكذبُ إلا أمَّ سعد👌
يعني كل امرأة لما يموت لها ميت وتقعد تتكلم عنه بتقول كلام غير صحيح يعني بتقعد توصفه بصفات كويسة مكنتش فيه بسبب تأثرها بموته، إلا أم سعد فكل صفة بتذكرها عن سعد بن معاذ صفة حقيقية فيه،
خرج به رسول الله ﷺ مع الصحابه يحملوه، فلقى الصحابة إن جنازته خفيفة مع إن سعد كان رجل طويل وضخم،
وحتى المنافقين قالوا باستهزاء: ما أخف جنازته😏
عشان يعني حكم في بني قريظة بالذبح فده بقى عقابه،
فقال لهم رسول الله ﷺ : حملته معكم الملائكة، ونزل يُشيعه سبعون ألف مَلك منزلوش إلى الأرض قبل كده، واهتز لموته عرش الرحمن 👌
أخذوا سعد بن معاذ رضي الله عنه للبقيع عشان يدفنوه، وبعد ما دفنوه قال رسول الله ﷺ:
إن للقبر ضغطة يعني ضمة إذا نجا منها أحد كان نجا منها سعد بن معاذ👌

◇عندنا هنا نقطتين محتاجين توضيح، الأولى يعني إيه اهتز عرش الرحمن لموت سعد بن معاذ ، والثانية موضوع ضمة القبر،

☆النقطة الأولى: اهتزاز العرش :
العرش اهتز فرحا وشوقا للقاء سعد بن معاذ، فالعرش خَلق من خلق الله لو عايز يهتز هيهتز بمشيئة الله،
وربنا جعل فيه شعور لحب سعد ، زي ما جعل في جبل أُحد شعور الحب لرسول الله ﷺ، وقال عنه رسول الله ﷺ: أُحدٌ جبل يحبنا ونحبه،
وكمان زي ما ربنا جعل الجبال تسبح مع داوود زي ما شرحنا في قصص الأنبياءقبل كده، وده كان أحد أقوال العلماء،
القول الثاني : إن الاهتزاز كان من فرح الله نفسه ومحبته لقدوم روح سعد رضي الله عنه،
وفي الحديث أن مَن أحبّ لقاء الله أحبّ الله لقائه.

☆النقطة الثانية : ضمة القبر:
كل بشر هيدخل القبر سواء كبير أو صغير مسلم أو كافر صالح أو فاسق فالقبر هيضمه ضمة،
وهي أول حاجة بتحصل للميت في قبره حتى قبل سؤال الملكين، لكن الضمة دي بتختلف من شخص للتاني وللعلماء فيها قولين:
◇الأول :
لو كان الميت مؤمن صالح فالقبر يضمه ويشتد عليه لكن الضمة دي لا تطول، بتخلص بسرعة ولايطول عليه العذاب وهي من كفارات الذنوب،
أما الكافر والفاسق فالضمة بتكون شديدة جدا عليه وبيبقى وقتها أطول بحسب ذنوبه ومعاصيه،
وسبب الضغط ده إنه مفيش أي إنسان إلا وعمل ذنب فهتحصل له الضغطة جزاء للذنب ثم تدركه رحمة الله.

◇القول الثاني :
إن القبر يضم المؤمن الصالح ولكنها ضمة رفق وحنان مفيهاش أي ألم أو أذى،
أما المسلم العاصي إللي مات من غير توبة أو الكافر فبتشتد عليه الضمة وتكون ضمة فيها سخط بحسب كثرة ذنوبهم وسوء أعمالهم،
زي الأم إللي ابنها بيكون غايب عنها ورجع وهي راضية عنه فتضمه بقوة لكن بحب ورفق، بعكس الأم إللي بتكون ساخطة على ابنها فبتضمه بقوة وغضب،

والراجح هو القول الأول لأن ظاهر السنة بيدل على كده، وإن مفيش حد من المؤمنين هينجو من الضمة دي، وهي لها ألم لكن ألمها يتفاوت بين الناس كل واحد بحسب عمله وحاله،
وشيخ الإسلام ابن تيمية رحمه الله قال إن إللي بيحصل في القبر من ضمة القبر والفتنة بسؤال الملكين والخوف من الأمور إللي بتكفر الذنوب،
فنسأل الله تعالى أن يهون علينا ضغطة القبر 😓

طبعا الكلام هنا عن ضمة القبر هيوصلنا لسؤالين مهمين 👌
هل ضمة القبر تشمل الأنبياء، وهل الأطفال الغير بالغين تشملهم ضمة القبر وسؤال الملكين ولا لأ🤔

☆أولا: هل ضمة القبر تشمل الأنبياء🤔
مفيش أي نص ثابت من القرآن أو السنة يدل على إن الأنبياء بيحصل لهم ضمة القبر للأنبياء أو لأ،
لكن كثير من العلماء على حسب اجتهادهم بيقولوا الأنبياء مش بيحصل لهم ضمة القبر لأن ضمة القبر بتتفاوت شدتها على الميت بحسب ذنوبه،
والأنبياء معصومين من كبائر الذنوب ومعصومين من الإقرار على الصغائر زي ما شفنا في قصة يونس وآدم عليهما السلام فالبالتالي ملهمش ذنوب فلا يحصل لهم ضمة القبر ولا حتى سؤال الملكين.

☆ثانيا : هل الأطفال غير البالغين تشملهم ضمة القبر🤔
الأطفال كمان تشملهم ضمة القبر، والدليل في قول رسول الله ﷺ عن صبي صغير مات:
"لَوْ أَفْلَتَ أَحَدٌ مِنْ ضَمَّةِ القَبْرِ لأَفْلَتَ هَذَا الصَبِيُّ"
لكن زي ما قلنا الضغطة ب

#قصص_الأنبياء
#الحلقة_الخامسة
#بين_آدم_ونوح
#شِيث_عليه_السلام

اتكلمنا المرة إللي فاتت عن مقتل هابيل، وشوفنا إزاي إن الحسد ممكن يوصل الإنسان للقتل👌
بعد بقى ما قتل قابيل أخيه هابيل حزن آدم لموت ابنه الصالح هابيل واستمر يعلّم ذريته تعاليم الدين وخصوصا ابنه شِيث إللي بذل معاه مجهود أكبر عشان هيَعهد له بالنبوة يعني هيسلمه النبوة من بعده،
فآدم عليه السلام هو أول نبي لكنه مش رسول👌
سُئل رسول الله ﷺ عن آدم أنبي هو؟
قال: "نعم، نبيٌ مُكلم"

☆والفرق بين النبي والرسول :
إن النبي بيجيله الوحي لكن غير مأمور أو مُلزم بتبليغ الوحي ده...يعني يجيله الوحي إنه يصلي ويصوم يفعل الخيرات ويجتنب المحرمات ويتحلى بمكارم الأخلاق وهكذا،
لكن الرسول يأتيه الوحي إنه يعمل الصالحات وكمان يجب عليه إنه يأمر الناس إنهم يعملوا الخيرات،
فكل رسول نبي ومش كل نبي رسول👌
فالأنبياء أكتر من الرسل😊

☆طيب بالمناسبة دي ياترى كم عدد الأنبياء والرسل؟
الموضوع على خلاف بين العلماء،
في علماء قالوا إن مفيش حديث يوضح عدد الأنبياء بالضبط همّ كم، وعلماء تانيين صححوا بعض الأحاديث وقالوا إن عدد كل الأنبياء:
مائة ‏ألف، وأربعة وعشرون ألفا ، والرسل من ذلك: ثلاثمائة وخمسة عشر.
يعني الرسل والأنبياء عددهم كووولهم : ١٢٤٠٠٠
منهم《 ٣١٥ 》 رسول ....ربنا أخبرنا في القرآن عن《 ٢٥ 》
وفي السنة رسول الله ﷺ قالنا عن اثنين هما شيث بن آدم ويوشع بن نون.
عامة احنا مطلوب مننا نؤمن بكل الأنبياء والرسل بغض النظر همّ عددهم كم، فده إللي يهمنا👌

آدم عليه السلام نبي مطيع لربه بوحي يُوحى إليه..
وبيعلم أولاده الدين عشان تستمر عبادة ربنا في ذريته ومن بعدهم، لأن الأبناء تبع للأب في الغالب،
فآدم عليه السلام كان مُهتم ومركّز على تعليم ابنه شيث عشان يقود ذرية آدم من بعده،
عاش آدم عليه السلام ألف سنة وفي هنا قصة حصلت مع آدم بمناسبة عمره، وهي :
إن ربنا لما خلق آدم عليه السلام ومسح على ظهره ونزلت ذريته وشافهم ...كان بين عين كل واحد بريق من نور، يعني بين عين كل البشر ضوء بيبرق،
فلفت نظر آدم عليه السلام إن كان في واحد من أبناؤه البريق بتاعه قوي فسأل آدم عليه السلام ربنا :
مَن هذا؟
ربنا قاله : هذا داوُد
فقال آدم عمره هيبقى كم سنة؟
فقال الله: ستين سنة.
فقال آدم : يارب زوّده من عمري أربعين سنة.
فلما خلص عمر آدم عليه السلام إلا أربعين سنة وجاله ملك الموت عشان يقبض روحه فآدم قاله إن عمره لسه فيه أربعين سنة،
فملك الموت قاله مش انت أعطيتها لابنك داوُد؟
فجحد آدم جحود النسيان لأن داوُد كان في عالم الذر فنسي آدم الموضوع لما شاف ملك الموت😅
والقصة دي ممكن ناس تستغربها لكنها ثابتة في حديث صحيح👆😊

بعد ما مات آدم عليه السلام ورث العلم والنبوة من بعده ابنه شيث...وكان يدعو الناس للخير ويعلمهم الدين ...زي ما كان آدم عليه السلام بيعمل،
المفسرون بيقولوا إن كان في قسمين أو فرعين من أبناء آدم كانوا موجودين حسب موطن السكن:
جزء سكنوا الجبل⛰ وهو شيث وإللي معاه وكانوا صالحين مُتبعين لشريعة شيث وآدم عليهما السلام،
وكان الرجال فيهم شكلهم حلو والنساء شكلهم مش حلو...فيهم قُبح
وجزء تاني سكنوا السهل🏞 وكانت النساء فيهم جميلات والرجال لأ.
جاء إبليس لرجل من أهل السهل وكان معروف عنهم بإنهم يميلوا للباطل، جالهم في صورة غلام عشان يشتغل عنده ويخدمه 👌
فإبليس عمل لنفسه حاجة كده زي إللي الرعاة بيستعملوه زي مزمار يعني فأخرج منه صوت الناس مسمعتش زيه أبدا 😮
صوت المزمار يعني،
فبدأ الناس ييجوا للغلام إللي هو إبليس عشان يسمعوا الصوت ده كل شوية،
وكانوا عاملين عيد ...كل سنة يجتمع فيه الرجال والنساء، النساء تتبرج للرجال... يعني يتزينوا بأجمل ماعندهم ويخرجوا في أجمل منظر،
والرجال تتزين للنساء... وطبعا مع انتشار الصوت وصل الصوت لقوم شيث عليه السلام وكان محرم عليهم إنهم يختلطوا باللي عايشين في السهول ويُقال إنهم قوم قابيل،

في مرة تجرأ رجل من أهل الجبل وقرب منهم وهم في العيد فشاف النساء وجمالهن وتبرجهن وزينتهن ،
فرجع لأصحابه وحكى لهم على إللي شافه وأغراهم يروحوا معاه يشوفوا اللي شافه ،فسابوا عيشتهم في الجبل ونزلوا لأهل السهل،
طبعا الرجال افتتنوا بالنساء الجميلات والنساء افتتنوا بالرجال إللي كان في خلقتهم جمال😑
ووقعت خطيئة الزنا والعياذ بالله، وكان ده أول زنا يقع في تاريخ البشرية، وانتشرت الفاحشة بينهم، وده تفسير ابن عباس لقوله تعالى :
" وَلَا تَبَرَّجْنَ تَبَرُّجَ الْجَاهِلِيَّةِ الْأُولَى"

◇وكل ده كان نتيجة لإطلاق البصر عند مواطن الفتن، والتبرج بالزينة وترك الحياء، وعدم ستر العورات، واتباع خطوات الشيطان😓

خلال الفترة دي كان مات شيث عليه السلام ومات ابنه ومكنش في أنبياء في الفترة دي لحد ما أكرم الله تعالى إدريس عليه السلام بالنبوة ،فكان أول نبي بعد شيث وآدم عليهما السلام.
"وَاذْكُرْ فِي الْكِتَابِ إِدْرِيسَ إِنَّهُ كَانَ صِدِّيقًا نَبِيًّا "
كان إدريس عل

#قصص_الأنبياء
#الحلقة_الخامسة_عشرة
#قصة_إبرهيم(٥)
#لوط_وقومه

كنا واقفين عند إبراهيم عليه السلام لما كان بيجادل الملائكة في قوم لوط ،والملائكة قالت إن خلاص ربنا أمر بإهلاكهم، وفعلا خرجت الملائكة متجهة إلى قرية لوط عليه السلام.

مين همّ قوم لوط أصلا🤔

خلونا نرجع بالزمن شوية ...
فاكرين لما إبراهيم عليه السلام ربنا نجّاه من النار وبعدين لوط عليه السلام آمن بيه وخرجوا مهاجرين من بلدهم؟
( ولوط عليه السلام هو ابن أخ إبراهيم عليه السلام،)
وفاكرين بعدها لما إبراهيم عليه السلام سكن الشام مع سارة،
أهه في الوقت ده لوط عليه السلام سكن في مدينة اسمها سَدُوم،
عند مكان اسمه "البحر الميت" في زماننا دلوقتي،
وأهل سدوم اسمهم "المُؤْتَفِكة"،
والمؤتفكة في اللغة العربية معناها: كل ما هو مصروف عن وجههِ وحاله إللي المفروض إنه يكون عليه..
ومعناها في القرآن: هُم قومُ لوط المُنقلبة قُراهُم عليهم عاليها سافلها
المهم..
كانت المدينة دي يتبعها قُرَى حواليها،
أهل المدينة دول كانوا كفار.. ومش بس كده،
لأ دول كمان كانوا بيعملوا حاجة بشعة محدش عملها قبل كده😶
وهي إن الرجال كانوا يأتون الرجال...يعني الرجل يُعاشر الرجل...ودي حاجة ضد الفطرة، عكس الوجه والحال اللي ربنا خلق البشر بيه وإللي المفروض يكونوا عليه.
يعني ربنا خلق الرجل والمرأة مناسبين لبعض عشان يتزوجوا ويجيبوا أطفال ويستمر النسل👨‍👩‍👧‍👦
لكن لما الرجل يتزوج الرجل النسل هينقطع والأمراض هتنتشر،
والمشكلة إن مش واحد ولا إتنين إللي شَذُّوا عن الفطرة اللي ربنا فطر الناس عليها..لأ ... دي القرية كلها كده والعياذ بالله😓
وكانوا بيعملوا الفاحشة دي قصاد بعض عادي في النوادي
وكانوا يخرجون الريح علانية أمام بعض ويتضاحكون على كده، ومكانوش بيستحوا من أي شيء من أفعالهم الخبيثة القذرة دي،
وكانوا كمان قُطّاع طرق، يقطعوا الطريق على المسافرين ويفعلوا بهم الفاحشة،
"أَئِنَّكُمْ لَتَأْتُونَ الرِّجَالَ وَتَقْطَعُونَ السَّبِيلَ وَتَأْتُونَ فِي نَادِيكُمُ الْمُنْكَرَ "
يعني كانوا أخبث الخلق فعلا،
ويُقال والله أعلم إن إللي خلّاهم يعملوا الفاحشة مع الرجال إن كان عندهم بساتين وثمار موجودة على الطريق وحصل لهم قحط وجوع فقالوا لبعض لو منعنا الثمار إللي على الطريق دي عن المسافرين وأبناء السبيل هنقدر نعيش،
فقالوا ونمنعها إزاي🤔
فقالوا نخلي من عاداتنا إن أي رجل غريب ييجي البلد نسرقه ونفعل به الفاحشة وبكده محدش هييجي البلد 😈
وفعلا عملوا كده واعتادوا على الموضوع لحد ما بقى في طبعهم،
فربنا أرسل لهم لوط عليه السلام، بالهداية عشان يخرجهم من الظلمات دي إلى النور.

بدأ لوط عليه السلام أول حاجة خالص زي أي نبي مُرسل يَدعوهم لعبادة الله وحده،
يعني بدأ معاهم بالأَوْلى والأهم، فأهم حاجة دلوقتي إنهم يؤمنوا بالله ويعبدوه،
عشان لما ده يتحقق هيبقى سهل يستسلموا لأوامره ويتقوه ويطيعوه بدون عناد ومكابرة .
"إذْ قَالَ لَهُمْ أَخُوهُمْ لُوطٌ أَلا تَتَّقُونَ۩ إِنِّي لَكُمْ رَسُولٌ أَمِيْنٌ۩ فَاتَّقُوا اللهَ وَأَطِيْعُون"

☆وهنا في فائدة وهي إن لازم يكون عند الدعاة إللي بيدعوا الناس وبينصحوهم حاجة اسمها فِقه الأولويات،
يعني نعرف نبدأ بإيه معاهم الأول قبل أي حاجة تانية، حسب ترتيب الشرع للأولويات الشرعية..
يعني مثلا زي بالضبط لما تيجي أخت تنصح بنت مش بتصلي ومش لابسة حجاب هتكلمها في إيه الأول؟
هتكلمها في الصلاة الأول لأنها الأصل ورسول الله ﷺ قال:
"العهد الذي بيننا وبينهم الصلاة فمن تركها فقد كفر"
طيب هل معنى كده إن الحجاب الشرعي مش مهم🤨
لأ هو مهم بس الصلاة أهم دلوقتي👌
وهو ده فقه الأولويات الشرعية.

المهم،
لوط عليه السلام لما بدأ دعوته لقومه بإنهم يعبدوا الله وحده ولا يشركوا به شيئا، وقالهم إنه مش عايز منهم مقابل لدعوته ولا أجر،
هو بينصحهم عشان مصلحتهم هم فقط في الدنيا والآخرة
"وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ العَالَمِيْنَ"

وحذرهم إن ربنا هينزل فيهم العذاب لو استكبروا ورفضوا الهدى،
وطبعا ناس زي دول، تتوقعوا هيكون رد فعلهم إيه😑
"قَالُوا لَئِنْ لَّمْ تَنْتَهِ يَا لُوطُ لَتَكُونَنَّ مِنَ المُخْرَجِيْنَ"
يعني قالوا للوط عليه السلام لو مابطلتش كلامك ده هنطردك برة البلد😡
لكن لوط عليه السلام استمر يدعوهم ويأمرهم بالمعروف وينهاهم عن المنكر سنين، ويعيد ويزيد ويقول:
"أَتَأْتُونَ الذُّكْرَانَ مِنَ العَالَمِين ۩ وَتَذَرُونَ مَا خَلَقَ لَكُمْ ربُّكُمْ مِّنْ أَزْوَاجِكُمْ بَلْ أَنْتُمْ قَومٌ عَادُونَ"

لما كان بيبقى في ناس معدية على الطريق من المسافرين كان لوط بيخبيهم عنده ويمشيهم في الليل في الخفاء بعيد عن أعين قومه أهل الفواحش، عشان لو شافوا الرجال دول هياخدوهم ويغصبوهم على فعل الفاحشة معهم،

واستمر الوضع على كده...قوم لوط عليه السلام يعملوا الفواحش ومستمرين في الكفر والظلم والتعدي عل

#قصص_الأنبياء
#الحلقة_الخامسة_والعشرون
#قصة_ذا_الكفل_أصحاب_الرس_يونس

معانا النهاردة إن شاء الله ثلاث قصص قصيرة هم:
《قصة ذو الكفل وأصحاب الرّس، ويونس》

♡نبدأ بأول قصة وهي قصة ذو الكفل.

من الأنبياء إللي ربنا ذكرهم لينا ذو الكفل عليه السلام،
في علماء قالوا إنه كان فقط رجل صالح مش نبي، لكن ظاهر القرآن بيقول إنه كان نبي،
وفي علماء قالوا إنه كان ابن أيوب عليه السلام بس مفيش دليل على الكلام ده،
هو مفيش عنه أخبار كتير، بس ربنا قال عنه إنه كان من الصابرين وذكره مع أيوب وإسماعيل عليهما السلام،
"وَإِسْمَاعِيلَ وَإِدْرِيسَ وَذَا الْكِفْلِ كُلٌّ مِنَ الصَّابِرِينَ"

والكفل معناه الحِمْل، و ذا يعني "صاحب" فيبقى "ذا الكفل" معناه صاحب الحِمل أو واحد بيشيل حِمل.

◇طيب ليه اتسمى بالإسم ده 🤔
علماء التفسير قالوا لأنه تحمّل –أو حمّل نفسه- إنه يصوم النهار ويقوم الليل ولا يغضب أبدا.
وطبعا الموضوع صعب 😅
مين إللي يستحمل يصوم النهار كل يوم ويقوم الليل كل ليلة ولا يغضب أبدا😶

☆لو لاحظتم ...في قصة إسماعيل وأيوب ويوسف كان ربنا بيذكّرنا بالصبر على البلاء إللي بيحصل للإنسان غصب عنه،
زي بلاء المرض ودخول السجن والذبح،
لكن في نوعين تانيين من الصبر وناس كتير أوي تلاقيها مبتقدرش تكمل في النوعين دول👌
◇النوع الأول هو:
الصبر على الطاعة، زي الصبر على الصلاة والوضوء في شدة البرد، والصبر على قيام الليل والصبر على صيام النهار والصبر على لبس النقاب في عز الحر،
والصبر على قراءة القرآن والصبر على اتباع أوامر ربنا...ده كله من الصبر.
◇النوع التاني إللي هو: الصبر عن المعصية.
يعني واحد مثلا بيموووت في سماع الأغاني، بيموووت في الأفلام والمسلسلات ومع ذلك بيصبر إنه لا يسمع أغاني ولا يتفرج على المسلسلات،
واحدة بتموووت في لبس الموضة وإنها تبين جمالها للناس عشان الناس تقولها انتِ جميلة، لكن بتصبر عن المعصية دي وتجاهد نفسها إنها تبعد عنها👌
فكلنا بلا استثناء حالنا هو إما صبر على طاعة أو صبر عن معصية أو طبعا النوع التالت إللي كلنا عارفينه زي ماقلنا، إللي هو الصبر على البلاء 😊
عشان كده ربنا ذكر اسم ذا الكفل عليه السلام مع أيوب وإسماعيل عليهما السلام،
لإنه تحمّل صبر على طاعات شديدة وصبر عن معصية صعبة جدا،
وإليكم المفاجأة 🙊
الصبر على الطاعة والصبر عن المعصية أعلى منزلة من الصبر على البلاء😁✌️
إزاي😳
ببساطة لأن البلاء أو المصيبة قدر من ربنا نافذ لا محالة، فالإنسان غصب عنه مفيش قدّامه إلا إنه يصبر سواء صبر جميل أو لأ، كده كده معندوش اختيارات إنه يقبل بالوضع أو ميقبلش🤷‍♂️
يعني سواء صَبَر صَبْر جميل أو اشتكى منه ليل نهار فالبلاء كده كده موجود غصب عنه ما يقدرش يرفعه بنفسه،
والصبر على البلاء كمان ممكن بيقدر عليه الكفار فمهواش خاص بالمؤمنين فقط يعني،
كم مرة شوفنا واحد غير مسلم حصل له ابتلاءات كتير ومع ذلك صابر وبيضحك والدنيا عنده عادي وبيصبّر نفسه بإيمانه بإلهه المزعوم؟
كتييير 😅
لكن الصبر إللي له علاقة بالتكليف سواء صبر على طاعة أو الصبر عن المعصية، فده صبر أتْباع الرسل، لإنه حاجة اختيارية بنختارها بإرادتنا،
الإنسان بيختار بنفسه إنه يتبع هواه ويسيب الطاعات... يسمع أغاني يغتاب، يسرق، يكذب، ينقّي من الدين إللي على هواه، أو ممكن يختار بنفسه عكس ده كله💁‍♂️
يعني ذِكر قصة ذي الكفل وكُون اسمه لافت للنظر وله معنى عميق كده ده يؤكد لنا إن ربنا لما بيذكر لنا قصة نبي بيكون وراها فايدة أكيد، وإللي يسكت عنه يبقى ما يهمناش أو مالوش فايدة،
لإن القرآن مش كتاب تاريخ عشان يقول لنا تفاصيل الأحداث الدقيقة، زي مثلا قميص يوسف كان لونه إيه، امرأة العزيز كان عندها كام سنة وهكذا😅
الحاجات دي متقالتش في قصة يوسف عليه السلام،
اتقال لنا فقط إللي يهمنا من موضوع القميص،
وكذلك لما ربنا قال لنا عن قصة ذي الكفل في القرآن قالنا على يهمنا بس فيها، وهو إنه كان من الصابرين الصالحين👌
"وَاذْكُرْ إِسْمَاعِيلَ وَالْيَسَعَ وَذَا الْكِفْلِ وَكُلٌّ مِنَ الْأَخْيَارِ "
وبكده خلصت قصة ذي الكفل عليه السلام😊

♡القصة التانية هي: قصة أصاحب الرس.
"كَذَّبَتْ قَبْلَهُمْ قَوْمُ نُوحٍ وَأَصْحَابُ الرَّسِّ وَثَمُودُ "

علماء التفسير قالوا فيها كلام كتير أوي بصراحة😶
فأنا هقول لكم أكثر قصة لقيتها منطقية ومُقنعة نوعا ما 😅
وإللي عايز يعرف الأقوال التانية هيلاقيها في تفسير بن كثير 😁
الرّس معناها البئر، وكان أصحاب الرس عندهم بئر بيشربوا منه، وكان بيحكمهم ملك عادل وكانوا بيحبوه جدا، فلما مات زعلوا عليه جدا...
وبعد كام يوم الشيطان تمثّل في صورته وقال لهم : أنا مامُتّش، لكن أنا غيبت عنكم شوية كده عشان أشوفكم هتعملوا إيه 😏
ففرحوا جدا وأمرهم إنهم يعملوا بينهم وبينه حجاب،
☆ حاجة كده زي الكَرَفان إللي بيكون مخرم ده عارفينه🤔

المهم،
أكتر الناس صدّقته فعلا وافتَتَنوا بيه وبدأوا يعبدوه😶
فربنا أرسل لهم نبي وقال لهم إن الحاكم ده شيطان

#قصص_الأنبياء
#الحلقة_الخامسة_والثلاثون
#يوشع_بن_نون

وقفنا المرة إللي فاتت عند موت موسى عليه السلام، وكان موته قبل نهاية فترة التيه بحوالي ثلاث سنوات،
موسى عليه السلام كان يعلم يقينًا إنه هيموت في يوم من الأيام، فكان لازم يشوف حد يقود بني إسرائيل من بعده،
وطبعا الشخص ده لازم يكون له صفات معينة عشان يقدر يتحمّل بني إسرائيل وإللي بيعملوه😑
فكان في فتى ظاهر عليه دلائل النباهة والصبر والطاعة لله، فاهتم بيه موسى وهارون عليهما السلام، وكان بيصاحب موسى عليه السلام على طول عشان يتعلم منه.

☆ودي هي التربية بالقدوة هو ممكن يعلمه تعليم نظري لكن لازم يتعلم إزاي يطبّق...وهيطبق إزاي من غير ما يكون شايف حد قصاده بيطبق الكلام إللي بيتعلمه وبيتابع تطبيقه للكلام النظري🤷‍♂️
يعني مثلا موسى عليه السلام بيعلمه الصبر... فالدرس العملي بتاعه إنه يشوف صبر موسى على بني إسرائيل،
فالتربية بالقدوة هي أصل التربية، وهي دي الطريقة إللي رسول الله ﷺ ربّى بيها الصحابة،
عايزين تربوا عيالكم على حب القرآن وحفظه وقراءته، يبقى لازم يشوفوا ده فيكم انتم الأول👌
عايزين تربوهم على احترام المواعيد والوعد، وعلى التقوى وحب الله والصدق وعدم الكذب... لازم يشوفوا ده فيكم الأول برده......
الأبناء كاميرا مُسَجِّلة ، بتسجل كووول حاجة بيشوفوها من الكبار، والأباء والأمهات بالذات وعلى الأساس ده بيتصرفوا.

فكان الفتى أو الشاب ده بيتبع موسى عليه السلام وكان موسى بيثق فيه لدرجة إنه لما راح قابل الخِضر أخده معاه،
والفتى ده كان اسمه يوشع بن نون وهو من ذرية يعقوب عليه السلام،
فبعد ما موسى عليه السلام مات هو إللي تولّى أعباء النبوة،
فبقى هو إللي بيوجّه بني إسرائيل وبيعلمهم، واستمر يبلّغ شريعة موسى عليه السلام بكل حرص وإخلاص،
بعد ما عدت الأربعين سنة كان الجيل خلاص اتغير.. فالجيل إللي قال قبل كده لموسى عليه السلام "اذهب أنت وربك فقاتلا إنا هاهنا قاعدون" اختفى أثره نوعًا ما،
فمنهم إللي مات ومنهم إللي خلاص كِبِر في السن، ده غير إن منهم إللي اتغيرت واتأثرت عقلياتهم بشكل إيجابي بكلام موسى بسبب الأحداث إللي شافوها خلال السنين إللي فاتت بالفعل،
فدلوقتي بقى فيه جيل جديد موجود غير الجيل الأول،
هو أه الجيل ده نتاج تربية الجيل القديم لكن على الأقل مش زيهم😅
يعني مشافوش الذل والقهر والاستعباد واتعوّدوا عليه زي الأجيال السابقة،
فكان يوشع عليه السلام بيعلم الجيل الجديد ده القتال وبيعلمهم طاعة الله،
عشان لما ينتهي زمن التيه يروح يقاتل الجبّارين إللي في بيت المقدس ويسترجعوا الأرض منهم.
فبعد ما انتهى زمن التيه... أمر بني إسرائيل إنهم يخرجوا معاه للجهاد،
لكن يوشع عليه السلام حط شروط للناس إللي هيخرجوا معاه للجهاد،

◇أول شرط:
مش عايز في الجيش واحد عَقَد على امرأة عقد نكاح ولم يبنِ بها بعد.. يعني مش عاوز من ضمن الجنود إللي هتروح حد يكون كاتب كتابه فقط بدون إتمام زواجه بزوجته لسه.
◇ثاني شرط:
مش عايز واحد بنى بيت ولسه مكملش بناء السقف.
◇ الشرط الثالث:
مش عايز واحد اشترى غنم وهو مستني الغنم ده يولد.

☆طيب ليه الشروط دي🤔
ما ياخدهم معاه كلهم وخلاص هو لاقي حد يروح بطيب نفس أصلا عشان يجازف بتقليل العدد أكتر🤨
طبعا ده تفكيرنا المنطقي، يعني الواحد في الوقت ده بيكون محتاج أي حد معاه🤷‍♂️

بس التفكير ده غلط.. لإن الجيش إللي مفروض يكون جيش النصر، مش الممفروض يكون فيه 《أي حد》 و نكَتّر العدد وخلاص،
لأن بكل بساطة المؤمنين على مر العصور مش بينتصروا بعدد أبدا لكن بينتصروا بالإيمان وبطاعة الله وتقواه👌
أيوة بياخدوا بالأسباب العددية الدنيوية طاعةً لله ، لكن النصر كده كده من عند ربنا،
يعني مثلا الرجل العاقد على المرأة ده هيبقى قلبه متعلّق بيها،
هيبقى عايز يرجع لها بسرعة عشان يكمل إجراءات الزواج ويروح بيته بقى ويخلف ويعيش حياته،
فنتخيل لو مكنش قال الشرط ده وبقى في الجيش آلاف من الشباب دي إيه إللي هيحصل؟
كان أول ما هيشوف السيف وإنه خلاص ممكن يموت هتلاقيه انسحب فورا أو على الأقل اشتغل في تثبيط إخوانه ونشر روح الهزيمة،
فلو انسحب الآلاف دول إللي القائد عامل حسابه عليهم كقوة مهمة من ضمن قوات الجيش بتاعه من باب الأخذ بالأسباب، إيه إللي ممكن يحصل؟
هيحصل خلل رهيب في الجيش😬
نضيف عليهم بقى الصنف التاني والثالث،
الناس إللي بنوا بيت ولسه مكملوهوش، و إللي اشترى أغنام ومستني إنها تولد،
كل دول أول ما هيشوفوا هول المعركة هينسحبوا غالبا ويسيبوا الجيش هزيل المنظر قليل العدد يواجه الجبارين دول لوحدهم😐
ومش كده وبس ده ممكن الجيش الرئيسي يتأثر بالانسحاب ده وينسحب معاهم المؤمنين 😑

☆زي مثلا في الواقع بتاعنا لما تيجي تنصح واحد ويقول لك ماالناس كلهم كده🙄
هو همته ومقاومته وثباته وعزيمته ضعفوا لما لقى من إللي حواليه ناس تراجعوا عن الحق وتركوه،
فده بيبقى زي العدوى إللي بتنتقل للباقيين وتأثر عليهم.. عشان كده ديننا شرع الحدود مثلا، عشان اللي عا

#قصص_الأنبياء
#الحلقة_الخامسة_والأربعون
#ذو_القرنين

وقفنا المرة إللي فاتت عند سؤال : مين هو ذو القرنين😁

قلنا قبل كده إن في أربعة حكموا الأرض، أولهم كان النمرود.. والثاني هو ذو القرنين.
ذو القرنين كان عبد صالح مسلم موحد لله، يُقال إنه أسلم مع إبراهيم عليه السلام وطاف بالكعبة مع إبراهيم وإسماعيل، لكن مفيش دليل على كده، ده اجتهاد لبعض المفسرين، وبالتالي احنا مانعرفش زمنه إيه بالتحديد، إللي يهمنا من قصته العبرة 👌
كان سبب ذكر قصة ذو القرنين في القرآن إن مُشركي مكة كانوا عايزين يتأكدوا إن محمد ﷺ رسول من عند ربنا فعلا ولّا لأ، فقالوا: خلونا نسأل اليهود ..
فراحوا لليهود في المدينة وسألوهم: نعرف إزاي إذا كان محمد صادق ولا كاذب🤔
فاليهود قالوا لهم: اسألوه عن تلات حاجات:
وكان من ضمن الأسئلة التلاتة: إنهم يسألوه عن مين هو الملك إللي طاف الأرض..
فراح المشركين يسألوا رسول الله ﷺ ، فقال لهم رسول الله ﷺ إنه هيقول لهم الإجابة بكرة، ونسي يقول إن شاء الله زي ما قبل سليمان عليه السلام نسي يقولها، قبل كده،
فاكرين😁
وكل يوم يقول لهم هقول لكم بكرة وينسى، ورسول الله ﷺ لا ينطق عن الهوى، يعني ماينفعش يقول لهم عن قصة ذي القرنين أي كلام من عنده كده وخلاص😅
لحد ما عدى ١٥ يوم -وفي رواية تانية شهر- ونزل القرآن يوضح مين هو الملك ده في سورة الكهف..
ونزلت الآية تعاتب النبي ﷺ على نسيانه قول إن شاء الله: "وَلَا تَقُولَنَّ لِشَيْءٍ إِنِّي فَاعِلٌ ذَٰلِكَ غَدًا *إِلَّا أَن يَشَاءَ اللَّهُ"

وطبعا واحد طاف الأرض كلها يعني قابل ناس كتير وحصل معاه أحداث كتير، فعشان ربنا يحكي لنا عنه كل حاجة هنحتاج لأجزاء كتيرة ومجلدات 😅
فربنا قالنا بس جزء من رحلته باللي يفيدنا وناخد منه العبرة 👌
"وَيَسْأَلُونَكَ عَنْ ذِي الْقَرْنَيْنِ قُلْ سَأَتْلُو عَلَيْكُمْ مِنْهُ ذِكْرًا"
طيب هو ذو القرنين اسمه الحقيقي إيه؟
واشمعنى يعني لقبه كان ذو القرنين بالذات؟
طيب وبلده الأصلي كان إيه؟...واتولد سنة كام...و...و...و؟
كل الحاجات دي اختلف فيها العلماء وزي ما قلنا مش هتفيدنا في حاجة... هي من باب : علمٌ لا ينفع وجهلٌ لا يَضر🤷‍♂️
☆ودي من ضمن العبر إللي في قصته:
إننا نتعلم مانسألش ولا ندوّر إلا عن الحاجة إللي هتفيدنا في ديننا وحياتنا..
عود نفسك في حياتك قبل ما تسأل عن حاجة في أمور الدنيا أو أمور الدين المسكوت عنها، تسأل نفسك سؤال:
هستفيد إيه لو عرفت🤔
وده هيمنع عنك شر كتير جدا وهيمنع عنك تضييع أوقات وطاقات انت محتاج لها أكتر👌
ولعل أهم فايدة هنستفيدها، إننا نجنب نفسنا إننا نتكلم فيما لا يعنينا، وهنكون وصلنا لمحاسن الإسلام وكمال الإيمان؛ لأن من حسن إسلام المرء تركه ما لايعنيه💁‍♂️

فاللي يهمنا نعرفه إن ذا القرنين كان ملك مسلم طائع لله،
ربنا مَكِّن لذي القرنين في الأرض وأعطى له مُلك عظيم ووهبه من كل شيء من كل شيء علم،
يعني وهبَه من كل علم وسيلة وطريقة يقدر يحقق بيها إللي هو عايزه،
"إِنَّا مَكَّنَّا لَهُ فِي الْأَرْضِ وَآتَيْنَاهُ مِنْ كُلِّ شَيْءٍ سَبَبًا "
يعني مثلا كان عنده ناس مترجمين بيتكلموا بلغات متعددة لأهل الأرض، لما يروح أي بلد يدعوا أهله للإسلام كان بيدعو الناس عن طريق المترجمين دول،
فذو القرنين كان هدفه المحدد هو نشر دين الله في الأرض وإقامة العدل بين الناس،
وبالرغم بقى من إن ربنا أعطى له علم عن كل حاجة فهو موقفش...منمش في الخط يعني😅
ربنا إداله بداية العلم وهو يطور ويتعمق أكثر لحد ما يُتقن العلم ده، وهو ده معنى:
"فَأَتْبَعَ سَبَبًا"
عارفين زي إيه في حياتنا دلوقتي؟
زي الإلتزام بالدين😊
ربنا ميسر لنا أسباب إننا نتعلم ديننا الصحيح واحنا على سريرنا في أوضة نومنا في التكييف وأكل وشرب رايح جاي، سواء عن طريق مقالات أو كتب إسلامية موجودة عالنت أو محاضرات عاليوتيوب أو...أو...أو ..
وهو ده السبب إللي ربنا أعطاه لنا زي ما أعطى ذا القرنين،
احنا بقى بنعمل إيه إلا من رحم الله😶
تلاقي مثلا إللي يقولك أصل الكلام كتير وانا مبحبش أقرأ الكلام الكتير، مع إنه تلاقيه عند الروايات الطويلة منشار قراية عادي جدا😀
تلاقي حد تاني يقولك أصل مفيش وقت، وهو بيضيع معظم يومه على فيسبوك وغيره😑
تلاقي حد تالت يقول لك أصل انا مبحبش أقعد كده وأقعد أسمع وبس...بحب الحوار والتفاعل كده،
لازم حد يتكلم معايا وجها لوجه عشان المعلومة تدخل... وحد رابع... وخامس....
وندّي بقى ضهرنا للوسائل إللي ربنا يسرهالنا للخير، ونقعد نشتكي ونسأل احنا ليه متأخرين كده وليه فاشلين وليه حاسين بالإحباط والهزيمة وكده
أهه هو ده الفرق بينا وبين ذو القرنين ..هو انتهز الفرص والنعم إللي ربنا أعطاها له وإحنا لأ👌
فلما ربنا يعطيك فرصة وسبب ووسيلة ميُسرة إوعى تفرط فيها...إوعى تتلكع..
لقيت ربنا فتح عليك سبب وباب إنك تتعلم دينك، أتبِع سَبَبًا... ادخل كمان واتعمق فيه لحد ما توصل لفوايده وكنوزه إللي تنفعك في حياتك وآخرتك..
لقيت سبب وباب إنك توجع أ

#قصص_الأنبياء
#الحلقة_الخامسة_والخمسون
#مريم_زكريا_الجزء_الخامس
#عيسى_الجزء_الأول

اتكلمنا عن مريم عليها السلام وإنها كانت منقطعة للعبادة عشان كده اسمها مريم البتول،
وعلى فكرة كلمة "القِدّيسة مريم" دي من وصف النصارى لمريم رضي الله عنها،
والكلمة دي من الغُلُو في وصف مريم،
فاحنا كمسلمين منقولش الكلمة دي.. ربنا وصفها بالصِّدِّيقة ، وليها أوصاف تانية في الإسلام ، لكن وصف《 قِدّيسة》 ده مش تبعنا خالص، يعني كإن في إيحاء كده إنها مقدسة، والقُدسِية لله وحده عز وجل👌
وقلنا إنها حملت بعيسى عليه السلام بدون أب وإنها انعزلت بحملها عن الناس،
وقلنا إن حمل عيسى عليه السلام كان تسعة أشهر على أرجح أقوال العلماء،
بعد ما خلصت مدة الحمل وجاء وقت الولادة ،
ألم الولادة اضطر مريم عليها السلام إنها تلجأ لجذع نخلة تسند عليه وتولد عنده بعيد عن عيون الناس،
"فَأَجَاءَهَا الْمَخَاضُ إِلَى جِذْعِ النَّخْلَةِ"

☆ عايزاكم تتخيلوا معايا شابة صغيرة عفيفة في موقف زي ده، بتولد لوحدها من غير ما يكون أي حد معاها لا أم ولا أب ولا أخ...ومش بس كده الطفل إللي بتولده ملهوش أب😶
الواحدة لما بتكون بتولد بتبقى تعبانة وخايفة وقلقانة و...و...
مع إن أهلها حواليها وزوجها معاها ومطمنة إن بعد الولادة كل الأمور متجهزة للمولود الجديد،
مريم عليها السلام اجتمع عليها تعب الولادة والألم النفسي بتاع الوحدة ومفيش حد يراعيها ولا يعطيها أكل ولا ماء،
وكمان الخوف من مواجهة الناس بالمولود ده😞
فكل المشاعر دي متجمعة جواها فتعبتها نفسيا جدا وخلتها تتمنى الموت،
وقالت ياريتني كنت مت قبل ما يحصل لي كده ، وكانت الناس نسيتني ونسيِت كل حاجة عني😔
"قَالَتْ يَا لَيْتَنِي مِتُّ قَبْلَ هَذَا وَكُنتُ نَسْيًا مَّنسِيًّ"

◇إيه ده ثواني كده😳
هو مش تمنّي الموت منهِي عنه؟ وكده يبقى جَزع وعدم رضا بقضاء الله😯

أيوة، بس في وضع مريم هنا الأمر مختلف.. لإن مريم لما تمنت الموت كان لسببين ✌
◇الأول:
إنها خافت إن الناس يظنوا بها الشر في عفّتها وتقواها ، فيعايروها بتهمة تمس الشرف فده يخليها تُفتن في دينها ،
ويجوز للإنسان إنه يتمنى الموت لو خاف على نفسه فتنة في دينه،
حتى رسول الله ﷺ قال إن في حاجتين الإنسان بيكرههما :
الموت، والموت أفضل للمؤمن من 《الفتنة》 والحاجة التانية قلة المال، وقلة المال أقل في الحساب ،
لكن مينفعش الإنسان يتمنى الموت لو أصابه ضرر أو أذى أو ابتلاء بشكل عام زي مرض مثلا أو فقر أو غيره👌

◇الثاني:
إنها خافت على قومها إنهم يقعوا في البهتان وقذف محصنة عفيفة، ويكون ده بسببها...يعني تكون سبب إن قومها يقعوا في معاصي،
زي مثلا لما تكرهي إن تحصل مشكلة أو فتنة بين الناس بسببك.. أكيد محدش بيتمنى لحظة زي دي😅
فمريم مكنتش عايزة قومها يقعوا في الغلط بسببها، فتمنت الموت.

☆وفي هنا فايدة لنا وهي إننا لا نتمنى الموت عشان حصل لنا ابتلاء ...مش يمكن البلاء ده يكون هو سبب تغير حياتنا💁‍♂️
هي مريم اتمنت الموت بسبب ابتلاء وفي ظنها إن ده أسوأ وضع ممكن تتعرض له واحدة في حياتها، لكن كان نتيجته إيه؟
بقت أم لرسول من أولي العزم ، وكمان هيُنسب ليها هي، وهتفضل سمعتها مُبرأة زي ما هي،
لأ وكمان هتبقى أيقونة في العفة لكل العالمين، بعد ما كانت من الأخفياء في زمن بني إسرائيل فقط👌
فبلاش نتمنى الموت بسبب أي بلاء يحصل لنا أيا كان نوعه، لكن نصبر الصبر الجميل بيقين ميتهزش، يقين في إن رب الخَير لا يأتي إلا بالخَير 😊

لما مريم عليها السلام تمنت الموت كان التمني ده لمجرد لحظات، فهي لما قالت يا ريتني كنت مت، ناداها جبريل عليه السلام من أسفل الوادي يطمئنها،
وكان المكان ده في بيت لحم وكانت ولادة عيسى عليه السلام على أرجح الأقوال في الصيف،
واستدل العلماء إن الولادة كانت في الصيف بالكلام الموجود في الروايات التاريخية بأن الرعاة كانوا بيمشوا في الليل بأغنامهم في زمن ولادة عيسى،
وفي الشتاء، البرد بيكون شديد وأحيانا بيكون في ثلج في بلاد الشام وبالتالي مفيش أحد بيتحرك في الليل🤷‍♂️
يعني احتفال النصارى بمولد عيسى عليه السلام سواء في شهر ديسمبر أو شهر يناير ملوش أصل تاريخي صحيح 👌

فناداها جبريل وقال لها متزعليش ربنا جعل تحتك نهر صغير تشربي منه،
"فَنَادَاهَا مِن تَحْتِهَا أَلاَّ تَحْزَنِي قَدْ جَعَلَ رَبُّكِ تَحْتَكِ سَرِيًّا"
◇ويُقال إن إللي ناداها كان عيسى ولكن الراجح هو جبريل،

فجبريل ناداها وطمنها، وقال لها ماتزعليش ومتخافيش، بصي ِلِمعِية ربنا إللي بتحاوطك واطمني،
ربنا جعل تحت منك نهر صغير تشربي منه، وهزي النخلة إللي وراكي بإيدك كده بس هتنزل عليكِ رُطَب ..
"وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا"
فكلي واشربي وكوني مطمئنة البال وأبشري، ربنا معاكِ ومش هيضيعك وهيدفع عنك الأذى..
"فَكُلِي وَاشْرَبِي وَقَرِّي عَيْنًا"
رحمة عظيمة من ربنا لمريم في توقيت مهم جدا بالنسبة لها،
يعني هي إزاي هتقدر تاكل وتشرب في

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الخامسة
#المرحلة_الثانية_القبر
#ضمة_القبر_وسؤال_الملكين

قلنا إن الروح نوعين، روح مؤمنة، أو روح كافرة، وشوفنا إن كل روح منهم بتتعامل معاملة مختلفة عن التانية من لحظة خروجها من الجسد،
بعد ما الروح تخلّص رحلتها للسماء؛ هترجع تاني للأرض زي ما ربنا أمر👌
في الوقت إللي روحك في طريقها للسماء مع الملائكة؛ كانوا أهلك غسلوك وكفنوك وفي طريقهم للمقابر عشان يدفنوا جسدك،
وهم ماشيين وشايلين جسدك؛ روحك لو كانت مؤمنة هتقول للناس إللي ماشيين في الجنازة وشايلين جسدك:
قدموني...قدموني.
يعني بتطلب منهم إنهم يسارعوا بالدفن عشان فرحانة بالنعيم إللي مستنيها،
قال رسول الله ﷺ:
إذَا وُضِعَتِ الجِنَازَةُ، فَاحْتَمَلَهَا الرِّجَالُ علَى أعْنَاقِهِمْ، فإنْ كَانَتْ صَالِحَةً قالَتْ: قَدِّمُونِي، قَدِّمُونِي...."
《صحيح البخاري》

أما لو كانت روحك كافرة أو فاجرة والعياذ بالله فهتقول:
يا ويْلَهَا، أيْنَ يَذْهَبُونَ بهَا؟
يعني من كتر ما روحك خايفة من العذاب والخزي إللي شافته؛ مش عايزاهم يدفنوا جسدك؛ لأنها عارفة إن إللي جاي أشد وأعظم😞
لكن محدش من إللي ماشيين في جنازتك وشايلين جسدك بيسمع كلامك ولا هينفعك بشيء👌
قال رسول الله ﷺ:
"....وإنْ كَانَتْ غيرَ صَالِحَةٍ قالَتْ: يا ويْلَهَا، أيْنَ يَذْهَبُونَ بهَا؟
يَسْمَعُ صَوْتَهَا كُلُّ شيءٍ إلَّا الإنْسَانَ، ولو سَمِعَهَا الإنْسَانُ لَصَعِقَ."

وهيتبعك في الجنازة ثلاثة: أهلك ومالك وعملك، هيرجع منهم أهلك ومالك؛ ومش هيدخل معاك في قبرك غير عملك،
قال رسول الله ﷺ:
"يَتْبَعُ المَيِّتَ ثَلاَثَةٌ ، فَيَرْجِعُ اثْنَانِ وَيَبْقَى مَعَهُ وَاحِدٌ : يَتْبَعُهُ أَهْلُهُ وَمَالُهُ وَعَمَلُهُ ، فَيَرْجِعُ أَهْلُهُ وَمَالُهُ وَيَبْقَى عَمَلُهُ"
《رواه البخاري ومسلم》
وبعد كده هتدخل القبر أول منازل الآخرة؛
هيتحفر لك حفرة في وسَط القبر على أدك،
وهيتبنى جانبين الحفرة بالطوب اللَّبِن وهيحطوك فيها على جنبك الأيمن مُستقبلاً القبلة،
وبعد كده هيتعمل لك زي سقف للحفرة دي بأحجار أو غيرها، بحيث إنها تبقى مرفوعة عنك ولا تمسك، وبعدين يضعوا التراب فوقك.

أو بيتحفر لك حفرة كبيرة، وفي جدار الحفرة الأقرب إلى القبلة هيتم حفر فيه مكان على أدك وتوضع فيه على جنبك الأيمن مستقبل القبلة،
يعني وجهك هيكون للداخل، ثم تُسد الحفرة دي بالطوب اللِّبن خلف ظهرك، ثم يوضع عليك التراب ويتم ردم القبر.

وبعدها هيتركوك ويمشوا وروحك هتكون رجعت لجسدك مرة تانية، لكن المرة دي رجوع روحك لجسدك هيكون مختلف عن الحياة الدنيا؛ فاحنا هنا في عالم البرزخ عالم الغيب،
بعد ما روحك تتصل بجسدك مرة ثانية هتسمع أصوات أقدامهم وهم سايبينك وماشيين، وهنا هتبدأ تواجه مصيرك😞

في اللحظة دي محدش هيكون معاك أبدا غير الله جل جلاله، فعلى قدر ما كنت عايش معاه في الدنيا هيكون معاك في اللحظة دي،
إذا كنت من إللي تعرّفوا إلى الله في الرخاء فسيتعرف الله إليك في الشدة إللي هتواجهها دلوقتي👌

أول حاجة هتواجهها بعد ما تدخل القبر هي:
◇ضمة القبر:
يعني جانبين القبر هيضغطوا عليك وانت في القبر، زي لما يكون حد بيحضنك، والضمة دي محدش بينجوا منها سواء كنت صغير أو كبير أو كنت مسلم أو كافر،
حتى سعد بن معاذ رضي الله عنه إللي اهتز لموته عرش الرحمن لم ينجُ من ضمة أو ضغطة القبر،
قال رسول الله ﷺ:
"إنَّ للقبرِ ضَغْطَةً لو كان أحدٌ ناجٍ منْهَا لَنَجَا منْهَا سَعْدُ بْنُ معاذٍ"
《رواه الألباني في السلسلة الصحيحة》

حتى لو لم تُدفن وحصل إن جسدك تمزق لو كنت مت بقنبلة مثلا، أو مت محروقا وجسدك بقى رماد، أو حتى لو أكلتك الحيوانات المفترسة،
في كل الحالات هتحس بضمة القبر ولن تنجُ منها والله قادر على كل شيء👌
لكن ضمة القبر دي بتختلف بين المسلم والكافر،
فلو كنت من عباد الله المؤمنين هتكون ضغطة القبر عليك زي حضن الأم إللي كان ابنها غايب عنها ورجع لها فاحتضنته بقوة حضن المشتاق الراضي عنه،
فهي ضمة رفق وحنان ، ليس فيها أذى ولا ألم ولا عذاب وبتكون الضمة لمدة لحظات وبعدها ينفرج القبر،
لكن لو كنت مسلم عاصي فهتشتد عليك الضمة بحسب كثرة ذنوبك وسوء أعمالك.
أما لو كنت كافر أو فاجر فهتشتد عليك الضمة أكثر وأكثر وتستمر الضغطة دي لوقت أطول وطبعا الألم لا يُوصف😞

بعد ما تنتهي ضمة القبر هيأتيك فتَّانا القبر؛ ملكان اسمهم منكر ونكير، وهنا هتتعرض لأعظم فتنة، وهي فتنة تُشبه فتنة التعرّض للمسيح الدجال،
يعني حتى لو لم تعاصر المسيح الدجال وتتعرض لفتنته؛ فانت هتتعرّض لفتنة زي فتنة الدجال في القبر وهي سؤال الملكين👌

هيدخل عليك ملكان أسودان أزرقان، وفي بعض الروايات 《الضعيفة》إن لهم أنياب واصلة للأرض، وبيجروا شعرهم وراهم، وعيونهم زي البرق الخاطف، وأصواتهم زي الرعد القاصف.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الخامسة_عشر
#علامات_الساعة_الصغرى
#الجزء_الأخير_المهدي

عارف نهر الفرات إللي في العراق؟
النهر ده هييجي عليه اليوم إللي هيقل فيه ماؤه، أو المجرى بتاعه هيتغير وهيظهر من داخله جبل من ذهب،
وبسبب ظهور الجبل ده هيحصل قتال عظيم عليه، لدرجة إن من كل مائة رجل هينجو رجل واحد فقط ويموت تسعة وتسعون،
قال رسول الله ﷺ:
"لا تقوم الساعة حتى يُحسَر الفرات عن جبل من ذهب، يقتتل الناس عليه فيُقتل من كل مائة تسعة وتسعون، ويقول كل رجل منهم: لعلي أكون أنا الذي أنجو"
《رواه مسلم》
تخيل إن الناس هتبقى عارفة حديث رسول الله ﷺ ومع ذلك هيروحوا يقتتلوا عليه وهيموت من كل مائة تسعة وتسعون إنسان، وكل واحد بيقول في نفسه لعلي أكون أنا الشخص إللي هينجو من المائة!
العلامة دي من علامات الساعة الصغرى إللي لسه محصلتش،
فخد بالك بقى واعمل بوصية رسول الله ﷺ لو ظهر الجبل ده في زمنك، قال رسول الله ﷺ:
"فمن حضره فلا يأخذ منه شيئاً"
《رواه البخاري ومسلم》

وعشان تبقى عارف وميختلطش عليك الأمر؛
المقصود بالذهب في حديث رسول الله ﷺ هو الذهب الأصفر المعروف؛
لأن في ناس غلطوا وقالوا إن الذهب هنا معناه الذهب الأسود إللي هو البترول، والكلام ده غير صحيح؛
لأن البترول لا يكون جبل فوق الأرض،
البترول بيُستخرج من باطن الأرض، والأصل حمل ألفاظ الشارع على ظاهرها،
يعني لما ييجي الشرع بلفظ معين يبقى هو فعلا ده المعنى المقصود، إلا لو في استثناء، فلما يقول ذهب يبقى هو فعلا الذهب الأصفر👌

انت ممكن تستغرب وتقول: إزاي يعني الناس هتبقى عارفة حديث رسول الله ﷺ وإن الموضوع فيه موت ومع ذلك هتروح عشان تاخد من الذهب؟!!
لكن لو انت لو بصيت حولك؛ هتلاقي إن بالرغم من انتشار فيروس كورونا وتحذير الأطباء للناس؛ والناس فعلا شايفة أقارب لهم أو ناس يعرفوهم بيموتوا بسبب الفيروس ده؛ مش فارق معاهم وعايشين عادي جدا ومش بياخدوا احتياطات السلامة منه،
وكل واحد مفكر إنه بعيد كل البعد عن إنه يتصاب،
فهي عقلية الناس واحدة، كله مفكر إن كل إللي حواليه ممكن يتصابوا لكن هو لأ، هو هيكون الناجي من وسط الناس دي كلها👌

◇في بقى علامتين من علامات الساعة الصغرى لسه برده مظهروش، والعلماء اختلفوا في وقت ظهورهم، في علماء قالوا إن ظهورهم هيكون بعد زمن المهدي وعيسى عليه السلام،
وفي فريق تاني قال إن ظهورهم هيكون قبل المهدي،
لكن مفيش دليل بيؤكد أو بيقول وقت ظهورهم بالضبط،
كلها اجتهادات العلماء،
لكن الأكيد إنهم هيظهروا؛ وده إللي يهمك تعرفه،
فخليني أقول لك عن العلامتين دول قبل ما تعرف قصة المهدي وباقي علامات الساعة الكبرى.

العلامتين هما: ظهور الجَهْجَاه وظهور القحطاني،
◇الأول : ظهور الجَهْجَاه،
قال رسول الله ﷺ:
" لا يذهب الليل والنهار حتى يملك رجل من الموالي يقال له: الجَهْجَاه"《صحيح سنن الترمذي》
والحديث معناه إن في مَلك هيحكُم المسلمين يُقال له الجهجاه،
وكلمة مَوْلى معناها العبد المُحرر أو الحَليف،
فالجهجاه ده إما هو عبد محرر أو من حلفاء المسلمين إللي انضم لهم وبقى عِزُّه من عزهم،
وده إللي نعرفه عنه فقط، رسول الله ﷺ لم يذكر صفاته ولا امتى هيخرج ولا فترة حكمه أد إيه🤷‍♂️

◇الثاني: خروج القحطاني:
قال رسول الله ﷺ:
"لا تقوم الساعة حتى يخرج رجل من قَحْطَان يسوق الناس بعصاه"
《رواه البخاري ومسلم》
والقحطاني ده رجل من الأحرار؛ لأن نَسَبه إلى قحطان الذي تنتهي إليه أنساب أهل اليمن،
وهو رجل مسلم صالح يحكم بالعدل، أما جملة يسوق الناس بعصاه فهي بتدل على قوته وسطوته وإنه يحمل الناس على الدين،
يعني يَغصبهم على الإلتزام بالدين والناس ستنقاد له زي ما راعي الغنم بيقود الغنم بعصاه،
وهو شديد ويقسو على أهل المعصية من الناس👌
والقحطاني غير الجهجاه وهو ده القول الصحيح؛ لأن في علماء بيقولوا إن القحطاني والجهجاه رجل واحد.

كده انت عرفت معظم علامات الساعة الصغرى،
في علامات تانية لكنها جاءت في أحاديث ضعيفة أو أحاديث مُختلف في صحتها،
فاحنا هنا هنكتفي بالعلامات إللي جاءت في الأحاديث الصحيحة
وهنبدأ نتكلم عن علامات الساعة الكبرى،
وعلامات الساعة الكبرى عشر علامات هي:
1◇خروج المسيح الدجال
2◇نزول عيسى بن مريم عليه السلام
3◇خروج يأجوج ومأجوج
4◇طلوع الشمس من مغربها
5◇الدخان
6◇خروج دابة الأرض
7◇ خسف بالمشرق
8◇خسف بالمغرب
9◇خسف بجزيرة العرب
10◇ نار تخرج من اليمن تطرد الناس إلى محشرهم

عن حُذَيْفَةَ بْنِ أَسِيدٍ الْغِفَارِيِّ رضي الله عنه قَالَ :
اطَّلَعَ النَّبِيُّ ﷺ عَلَيْنَا وَنَحْنُ نَتَذَاكَرُ فَقَالَ:
مَا تَذَاكَرُونَ ؟ قَالُوا : نَذْكُرُ السَّاعَةَ ،

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الخامسة_والعشرون
#علامات_الساعة_الكبرى_الجزء_العاشر_والأخير
#الدُّخان_والخسوف_الثلاثة_ونار_تسوق_الناس_لمَحشَرِهم

انت عرفت لحد دلوقتي خمس علامات من علامات الساعة الصغرى، النهاردة إن شاء الله هتعرف الخمس علامات الباقيين، فمعلش استحملني لو حلقة النهاردة طويلة شوية👌

بعد طلوع الشمس من مغربها وخروج الدابة هتأتي العلامة السادسة من علامات الساعة الكبرى وهي: الدخان، ربنا بيقول:
"فَارْتَقِبْ يَوْمَ تَأْتِي السَّمَاءُ بِدُخَانٍ مُبِينٍ۩يَغْشَى النَّاسَ هَذَا عَذَابٌ أَلِيمٌ"《سورة الدخان آية(10-11)》

احنا منعرفش الدخان هيخرج امتى بالضبط؛ لأن مفيش ترتيب واضح بين علامات الساعة الكبرى،
يعني هل الدخان هيكون قبل الدجال، ولّا بعد طلوع الشمس من مغربها وخروج الدابة؟ الله أعلم🤷‍♂️
إللي نعرفه إن الدخان من علامات الساعة الكبرى إللي هتحصل آخر الزمان وهيشهدها المؤمن والكافر، وهو ده القول الراجح؛
لأن في ثلاثة أقوال تانيين مش موضوعنا عشان مندخلش في متاهات.

☆الدخان بصفة عامة هو ما يُطلق على ما يتصاعد عند إيقاد الحطب أو أي حاجة تتحرق.

فهيظهر دخان عظيم جاي من السماء يملأ الأرض كلها بسبب ترك الحق، وكثرة المعاصي، سواء قبل الدجال أو بعده،
فيخاف الناس من الدخان ويصيبهم الهلع والجزع ويفكروه عذاب أليم، فالأرض هتكون عاملة زي بيت مليان دخان،
عارف كده لما حاجة تشيط على البوتاجاز أو تتحرق مثلا وتطلع دخان ويملأ البيت والدخان يخلي الواحد يكح؟!

أهه هيبقى الوضع شبيه بكده لكن أشد بكتير وخصوصا إن مفيش مكان تاني الواحد ممكن يروح فيه عشان يقدر يتنفس هواء نقي،
يعني انت ممكن تفتح شبابيك البيت أو حتى تخرج برة البيت عشان تاخد نَفَسك،
لكن الدخان ده هيكون مالي الأرض كلها، زي الضباب أو الشّبُّورة إللي بتكون موجودة الصبح في أيام الشتاء كده، بتكون مالية الدنيا زي الدخان،
والدخان لن ينجو منه أحد ولا يفر منه مخلوق، يُعذَّب به الكفار أشد العذاب ويبقى ماليهم من جواهم، أما المؤمن فلا يصيبه منه إلا كما تُصيب الزكمةُ الإنسان، يعني كأن عنده زكام، برد يعني،
قال رسول الله ﷺ:
"إن ربكم أنذركم ثلاثاً وذكر منها :الدخان، يأخذ المؤمن كالزَّكمة ويأخذ الكافر فينتفخ حتى يخرج من كل مَسْمعٍ منه"
《قال ابن كثير: "إسناده جيد"》

في الزمن ده؛ المؤمنين هيكونوا قليلين جدا بالنسبة للكفار وهتكون أعمالهم مختلطة، يعني حسنات وسيئات،
ومع انتشار العصيان والكفر في الأرض؛ هتُهدم الكعبة على يد ذو السُّوَيْقَتيْن وهيُرفع القرآن وتخرب المدينة وهيرجع الناس تاني لعبادة الأصنام، قال رسول الله ﷺ:
"لا يذهب الليل والنهار حتى تُعبد اللّات والعُزّى"
《صحيح مسلم》
فالسيدة عائشة قالت لرسول الله ﷺ:
"إن كنت لأظن حين أنزل الله:
{هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ} أن ذلك تاماً"
يعني هي فكرت إن لما ربنا أنزل الآية دي خلاص مش هيحصل عبادة أصنام مرة ثانية،
فقال لها رسول الله ﷺ:
"سيكون من ذلك ما شاء الله ثم يبعث الله ريحا طيبة فيُتوفى كل مَن في قلبه مثقال حبة خردل من إيمان، فيبقى مَن لا خير فيه فيرجعون إلى دين آبائهم"《صحيح مسلم》
يعني فعلا هيكون التوحيد موجود لفترة معينة لحد ما تأتي ريح تقبض أرواح مَن كان في قلبه مثقال حبة من خردل من إيمان، ويتبقّى شرار الخلق فيرجعوا لعبادة الأصنام.

◇والكلام هياخدنا لعلامة من علامات الساعة الصغرى المتداخلة في الكبرى وهي الريح الطيبة إللي تقبض أرواح المؤمنين.
بعد خروج الدابة وختمها للناس وانتهاء الأعمال هتيجي ريح باردة طيبة ليّنة من الشام تقبض أرواح المؤمنين،
إللي هيكونوا اتوجهوا أصلا للشام قبل خروج نار من قعر عدن تسوق الناس لأرض المحشر في الشام، وهتعرف تفاصيل النار دي لما ييجي وقتها،
فالريح دي مش هتسيب إنسان في قلبه مثقال ذرة من خير أو إيمان إلا قبضته، لدرجة إن لو إنسان دخل في عمق الجبل؛ الريح دي هتدخل وراه وتقبض روحه،
قال رسول الله ﷺ:
"...ثُمَّ يُرْسِلُ اللَّهُ رِيحًا بَارِدَةً مِنْ قِبَلِ الشَّامِ فَلَا يَبْقَى عَلَى وَجْهِ الْأَرْضِ أَحَدٌ فِي قَلْبِهِ مِثْقَالُ ذَرَّةٍ مِنْ خَيْرٍ أَوْ إِيمَانٍ إِلَّا قَبَضَتْهُ،
حَتَّى لَوْ أَنَّ أَحَدَكُمْ دَخَلَ فِي كَبِدِ جَبَلٍ لَدَخَلَتْهُ عَلَيْهِ حَتَّى تَقْبِضَهُ..."
《صحيح مسلم》

ويتبقى شرار الخلق، يعني أسوأ ناس على وجه الأرض هيكونوا في سرعتهم للشرور وقضاء الشهوات والفساد زي طيران الطائر في سرعته،
وهيكونوا في العدوان وظلم بعضهم بعض زي السّباع المعتدية،
قال رسول الله ﷺ:
"فَيَبْقَى شِرَارُ النَّاسِ، فِي خِفَّةِ الطَّيْرِ وَأَحْلَامِ السِّبَاعِ، لَا يَعْرِفُونَ مَعْرُوفًا وَلَا يُنْكِرُونَ مُنْكَرًا"《صحيح مسلم》

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الخامسة_والثلاثون
#المرحلة_الثالثة_اليوم_الآخر
#الأحداث_في_أرض_المحشر_الجزء_السابع
#أول_من_يُحاسب_يوم_القيامة

اتكلمنا المرة إللي فاتت عن إللي بياخد كتابه بيمينه أو بشماله وعرفنا الفرق بينهم،
كل واحد بقى هيأتي إلى الله تعالى للحساب ومعه سائق وشهيد،
والسائق هو مَلك يقود العبد للعرض على الله والحساب،
والشهيد هو كمان مَلك لكنه بيشهد على أعمال العبد، وقال بعض العلماء إن الشهيد المقصود بيه هنا هما رقيب وعتيد إللي كانوا بيكتبوا أعمال العبد في الدنيا،
قال تعالى:
"وَجَاءَتْ كُلُّ نَفْسٍ مَعَهَا سَائِقٌ وَشَهِيدٌ"
《سورة ق آية(21)》
فزي كده في الدنيا لما الشرطي يقبض على المجرم ويذهب بيه للقاضي ومعاه الشهود إللي شافوه وهو بيعمل جريمته،
انت هيأخذك ملك ويمشي بيك لربنا عشان يحاسبك، وهيبقى معاك ملك تاني شاهد على كل أعمالك من خير أو شر👌

وأول مَن يُستدعى للحساب من الناس ثلاثة أصناف،
1️⃣الصنف الأول رجل استشهد في سبيل الله،
يعني هو خرج من بيته وترك أهله وماله عشان يجاهد في سبيل الله ودخل معركة وقاتل لحد ما قُتل،
إللي يشوفه من أهل الدنيا هيقول: بااااس ده أكيد من أهل الفردوس👌
فهو دلوقتي جاء عشان يتسأل عن عمله، فالأول ربنا هيعرّفه ويذكّره بنعمه عليه، فيعترف بنعمة ربنا ويتذكرها،
يعني كأنَّه مِنَ الهولِ وشِّدَّةِ الموقف إللي هو فيه نَسيِها وذَهَلَ عنها،
فبعد ما يتذكرها؛
ربنا هيسأله هو عمل إيه يشكر بيه ربنا في مقابل النعم دي، فيقول العبد جاهدت في سبيلك لحد ما استشهدت.
فهنا يظهر الأمر على حقيقته ويقول الله له كذبت!
يعني انت مكنتش مخلص في نيتك، انت قاتلت وجاهدت عشان يتقال عليك شجاع، وفعلا اتقال عنك كده، فخلاص حصل إللي انت عايزه فملكش عندي ثواب،
وهنا يأمر الله عز وجل خَزَنة جهنم إنهم يأخذوه ويرموه في النار، فتسحبه الملائكة على وجهه ويُلقى في النار👌
قال رسول الله ﷺ:
"إِنَّ أَوَّلَ النَّاسِ يُقْضَى يَوْمَ الْقِيَامَةِ عَلَيْهِ، رَجُلٌ اسْتُشْهِدَ، فَأُتِيَ بِهِ فَعَرَّفَهُ نِعَمَهُ فَعَرَفَهَا،
فيقَولَ الله له: فَمَا عَمِلْتَ فِيهَا؟
قَالَ: قَاتَلْتُ فِيكَ حَتَّى اسْتُشْهِدْتُ.
فيقَولَ الله: كَذَبْتَ، وَلَكِنَّكَ قَاتَلْتَ لِأَنْ يُقَالَ: جَرِيءٌ، فَقَدْ قِيلَ، ثُمَّ أُمِرَ بِهِ فَسُحِبَ عَلَى وَجْهِهِ حَتَّى أُلْقِيَ فِي النَّارِ"
《صحيح مسلم》

2️⃣الصنف الثاني إللي هيكونوا من أول الناس إللي هيتسألوا:
واحد تعلم العلم وعلّمه وقرأ وحفظ القرآن،
فهو كمان في الأول ربنا هيعرّفه ويذكّره بنعمه عليه، فيعترف بنعمة ربنا ويتذكرها،
وبعدين ربنا هيسأله هو عمل إيه عشان يشكر بيه ربنا في مقابل النعم دي، فيقول العبد:
أنا تعلمت العلم وعلمته للناس وقرأت القرآن زي ما أمرتني.
فهنا يظهر هو كمان على حقيقته ويقول الله له كذبت، انت مكنتش مخلص في نيتك، انت معملتش كده عشان عايز الأجر مني،
انت اتعلمت العلم عشان يُقال عنك عالم،
وقرأت القرآن عشان يُقال عنك قارئ، وفعلا قيل عنك كده وأخدت إللي انت عايزه من الشهرة ومدح الناس وانت دلوقتي ملكش أجر هنا،
ويأمر الله عز وجل خَزَنة جهنم إنهم يأخذوه ويرموه في النار، فتسحبه الملائكة على وجهه ويُلقى في النار والعياذ بالله😞
قال رسول الله ﷺ:
"وَرَجُلٌ تَعَلَّمَ الْعِلْمَ، وَعَلَّمَهُ وَقَرَأَ الْقُرْآنَ، فَأُتِيَ بِهِ فَعَرَّفَهُ نِعَمَهُ فَعَرَفَهَا، قَالَ الله: فَمَا عَمِلْتَ فِيهَا؟
قَالَ: تَعَلَّمْتُ الْعِلْمَ، وَعَلَّمْتُهُ وَقَرَأْتُ فِيكَ الْقُرْآنَ.
قَالَ الله: كَذَبْتَ، وَلَكِنَّكَ تَعَلَّمْتَ الْعِلْمَ لِيُقَالَ: عَالِمٌ، وَقَرَأْتَ الْقُرْآنَ لِيُقَالَ: هُوَ قَارِئٌ، فَقَدْ قِيلَ، ثُمَّ أُمِرَ بِهِ فَسُحِبَ عَلَى وَجْهِهِ حَتَّى أُلْقِيَ فِي النَّارِ"《صحيح مسلم》

3️⃣الصنف الثالث: واحد ربنا وسّع عليه في رزقه من أصناف المال كله، فالرجل ده كان بيتصدق وينفق من ماله في أي باب خير يقابله، مكنش مقصر يعني،
فيُؤتى به إلى الله عز وجل ويعرّفه الله ويذكّره بنعمه عليه، فيعترف بنعمة ربنا ويتذكرها،
ويسأله الله عز وجل هو عمل إيه عشان يشكر بيه ربنا في مقابل النعم دي، فيقول العبد:
أنا يارب لم أترك أي باب خير إلا وأنفقت فيه مالي عشان عايز منك الأجر والثواب، فهنا يقول الله له:
كذبت، انت معملتش كده عشان عايز الأجر ولا حاجة، انت عملت كده عشان يُقال عنك إنك كريم وتبقى مشهور بين الناس بالكرم،
وفعلا اتقال عنك كده فملكش عندي أي أجر،
ويأمر الله عز وجل خَزَنة جهنم إنهم يأخذوه هو كمان ويرموه في النار، فتسحبه الملائكة على وجهه ويُلقى في النار👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الخامسة_والأربعون
#المرحلة_الثالثة_اليوم_الآخر
#الأحداث_في_أرض_المحشر_الجزء_السادس_عشر
#الميزان_الجزء_الثالث_قصة_صاحب_البطاقة

اتكلنا المرة إللي فاتت عن بعض الأعمال التي تُثقل الميزان، وقلنا منها كلمة التوحيد《لا إله إلا الله》، وعشان يظهر لك فضل كلمة التوحيد تعال شوف القصة دي👌
قال رسول الله ﷺ:
"إنَّ اللَّهَ سيُخَلِّصُ رجلًا من أمَّتي على رؤوسِ الخلائقِ يومَ القيامةِ فينشُرُ علَيهِ تسعةً وتسعينَ سجلًّا، كلُّ سجلٍّ مثلُ مدِّ البصرِ ثمَّ يقولُ: أتنكرُ من هذا شيئًا؟
أظلمَكَ كتبتي الحافِظونَ؟
يقولُ: لا يا ربِّ.
فيقولُ: أفلَكَ عذرٌ ؟
فيقولُ: لا يا ربِّ.
فيقولُ بلَى، إنَّ لَكَ عِندَنا حسنةً، وإنَّهُ لا ظُلمَ عليكَ اليومَ،
فيُخرجُ بطاقةً فيها أشهدُ أن لا إلَهَ إلَّا اللَّهُ، وأشهدُ أنَّ محمَّدًا عبدُهُ ورسولُهُ، فيقولُ: احضُر وزنَكَ،
فيقولُ: يا ربِّ، ما هذِهِ البطاقةُ ما هذِهِ السِّجلَّاتِ ؟
فقالَ: فإنَّكَ لا تُظلَمُ، قالَ: فتوضَعُ السِّجلَّاتُ في كفَّةٍ، والبطاقةُ في كفَّةٍ فطاشتِ السِّجلَّاتُ وثقُلتِ البطاقةُ، ولا يثقلُ معَ اسمِ اللَّهِ شيءٌ"
《صحيح الترمذي》

يعني يوم القيامة ربنا هيختار رجل من أمة الإسلام ويُنادى عليه ليُحاسب، فيُعرض عليه تسعة وتسعين(99) سجل، يعني كتب وصحائف اتكتب فيها أعماله السيئة إللي كان بيعملها في الدنيا،
وكل سجل أو صحيفة طولها وعرضها مد البصر،
يعني شوف كده لما تقف في مكان واسع وفاضي شوف كده عينك هتجيب لحد فين، أهه ده مد البصر،
أقولك مثال لتقريب الصورة،
عارف بَكرة المناديل الورقية الرّول دي👈🧻🤔
تخيل كده إن حد مسك طرف المناديل دي ومشي بيها لبعييييد تخيل كده تقدر تكتب سيئات أد إيه على بكرة مناديل واحدة، طيب لو تسعة وتسعين بكرة هيتكتب عليها أد إيه؟
هو بقى عنده تسعة وتسعين سجل مد البصر يمين وشمال مليانين سيئات هيتنشروا كده أمام الناس في أرض المحشر،
لك أن تتخيل كمية السيئات إللي الراجل ده عملها لدرجة إنه ملأ تسعة وتسعين صحيفة بالحجم ده😶

فلما يتعرض عليه السجلات ربنا يسأله عن المكتوب في الصحائف دي وهل فيها شيء اتكتب عليه وهو لم يفعله، فيرد ويقول لا يارب، يعني هو بيُقر بالسيئات إللي عملها دي،
فربنا يسأله هل مثلا الملائكة ظلمته وكتبت عليه شيء لم يفعله فيقول لا يارب، فيسأله ربنا تاني هل عنده عذر لعمل السيئات دي، يعني مكنتش تعرف مثلا إن ده مُحرّم أو أي عذر، أو هل عندك حسنات تغفر لك بعض السيئات دي،

فيقول العبد لا يارب، يعني بيقول إنه معندوش أي عذر ولا حسنات، يعني هو من شدة الذهول لما شاف التسعة وتسعين سجل نسي كل حاجة، فيقول الله له:
لأ، انت ليك حسَنة لم تَظهَرْ في السِّجلات، واليوم محدش هيُظلم، وكل واحد هياخد حقه مهما كان بسيط👌
فيُخرِج له صحيفة صغيرة زي البطاقة كده أو الكارت إللي بيكون أد الكف كده مكتوب فيها:
《أشهَدُ أنْ لا إلهَ إلَّا اللهُ، وأشهَدُ أنَّ محمَّدًا عبدُه ورسولُه》

فيقال له احضر الميزان إللي هيوزن الأعمال دي، فيتعجب العبد ويقول:
يارب وهي البطاقة دي هتعمل إيه أمام السجلات دي كلها😳
فيقول الله له إنه لن يُظلم، كل الأعمالَ ستُعرَضُ على الميزانِ حتَّى وإن كانت قليلةً فمهما كان العمل صغير فهيتحاسب عليه ويأخذ جزاؤه👌

فتوضع السجلات في كفة السيئات وتوضع البطاقة في كفة الحسنات، وهنا تحصل المفاجأة وتطيش السجلات، يعني تخف كفة السيئات وتثقل كفة الحسنات إللي مفيهاش غير البطاقة إللي فيها شهادة التوحيد👌

طب ليه حصل ده؟
لأن زي ما قال رسول الله ﷺ:
《لا يَثقُلْ مع اسمِ اللهِ شيءٌ》يعني ثِقلَ كلمةِ التَّوحيدِ أكبرُ وأعظمُ من أن يَبلُغَها ويُساوِيَها شيءٌ في الميزانِ،
فلا يَرجُحُ ولا يَغلِبُ "مع اسمِ اللهِ شيءٌ" إذا ثقل في قلب المؤمن إيمانًا وإخلاصًا وتوقيرًا ومحبَّة وتعظيمًا،
ولا يُقاوِمُه شيءٌ من المعاصي، بل يتَرجَّحُ ذِكرُ اللهِ تعالى على جميعِ المعاصي،
فصاحب البطاقة ده كان عمل الذنوب دي وهو عقيدته ضعيفه أو توحيده ضعيف وخلاص اتحسبت السيئات،
وبعدين هو صحح عقيدته وقوّى نفسه إيمانيا، وقبل ما يموت كانت العقيدة عِليِت أوي عنده وتاب ومات على كده ولم يتمكن من العمل إللي يمسح السيئات دي،

فلما جاء يوم القيامة اتحط في الميزان السيئات إللي عملها وهو ضعيف الإيمان وفي المقابل اتحط العقيدة إللي مات عليها فثقلت العقيدة إللي مات عليها،
فواضح كده إن وزن كلمة التوحيد في قلب الراجل ده كان عالي جدا👌

¤وطبعا محتاجين هنا نقف وقفة مهمة👌
ممكن الناس لما تقرأ الحديث ده تقول طيب خلاص احنا نقول لا إله إلا الله ونعمل بقى كل حاجة غلط وندخل الجنة زي الراجل ده😀

#الدار_الآخرة_بالعامية
#الحلقة_الخامسة_والخمسون
#المرحلة_الثالثة_اليوم_الآخر
#الشفاعة_المقبولة_والشفاعة_المردودة_يوم_القيامة_الجزء_الخامس
#رحمة_رب_العالمين

اتكلمنا في الحلقات إللي فاتت عن شفاعة رسول الله ﷺ وشفاعة الأنبياء وشفاعة المؤمنين وشفاعة الملائكة،
بعد ما الكل يشفع يقول الله عز وجل:
"شَفَعَتْ الْمَلَائِكَةُ، وَشَفَعَ النَّبِيُّونَ، وَشَفَعَ الْمُؤْمِنُونَ، وَلَمْ يَبْقَ إِلَّا أَرْحَمُ الرَّاحِمِينَ"《صحيح مسلم》

يعني إيه بقى《أرحم الراحمين》؟
معناها إن مفيش حد في الوجود أرحم من الله عز وجل، ودي فعلا حقيقة هتحس بمعناها لما تعرف مقدار رحمة الله عز وجل👌

رحمة ربنا نوعين✌
1️⃣النوع الأول:
هي صفة من صفات الله الذاتية وهي غير مخلوقة ودي ملهاش أي حدود، فالله عز وجل هو الرحمن الرحيم و هو:
《الْغَفُورُ ذُو الرَّحْمَةِ》وصفة الذات لا تفارق الله عز وجل ولا يُنزّلها👌
يعني مثلا الإنسان له صفة ذات زي الوجه، هل يقدر يترك وجهه في مكان أو يوديه في مكان؟
طبعا لأ🤷
كذلك ولله المثل الأعلى في السماوات والأرض فإن صفات الله الذاتية زي الرحمة والحياة والقوة والكبرياء لا تفارقه سبحانه👌

2️⃣النوع الثاني:
رحمة مخلوقة وهي أثر من أثار صفة رحمة الله الذاتية وهي عبارة عن مائة رحمة، ما بين كل طبقة من الطبقات المائة دي؛ زي كده ما بين السماوات والأرض،
ودي إللي ربنا أنزل منها رحمة واحدة في الدنيا يتراحم بها الخلائق،
يعني كل الخلائق على مر الزمن وحتى نهاية الخلق من إنس وجن وحيوانات وطيور و...و....كل دول بيتراحموا برحمة واحدة فقط من المائة😮
أما باقي المائة إللي هم التسعة وتسعين رحمة فربنا جعلها عنده، ويوم القيامة يُكمل الرحمة لمائة ويرحم بها عباده.
قال رسول الله ﷺ:
"إِنَّ اللَّهَ خَلَقَ الرَّحْمَةَ يَوْمَ خَلَقَهَا مِائَةَ رَحْمَةٍ، فَأَمْسَكَ عِنْدَهُ تِسْعًا وَتِسْعِينَ رَحْمَةً، وَأَرْسَلَ فِي خَلْقِهِ كُلِّهِمْ رَحْمَةً وَاحِدَةً"
《رواه البخاري》
فانت مهما حاولت تتخيل الرحمة المخلوقة المحدودة إللي هي مائة رحمة؛ عقلك مش هيستوعبها أبدا، فما بالك بقى برحمة ربنا نفسه الواسعة إللي ملهاش حدود عاملة إزاي👌

والرحمة المخلوقة دي ينتفع بها المؤمن في الدنيا والآخرة، أما الكافر فينتفع بها《في الدنيا فقط》،
يعني ربنا يعطي الكافر الصحة والمال والولد، ويرسل إليهم الرسل ويُنزّل إليهم الكتب،
أما في الآخرة فإن الله يُكمل الرحمة مائة وينتفع بها المؤمنون فقط، أما الكفار فإن الله يعاملهم بعدله فيُخلّدون في نار جهنم؛
لأن الكافر لما عاند وتمرّد على ربه وخالقه؛ لم يكن مستحق للرحمة👌

واحنا لو قعدنا نتكلم عن مظاهر وأثار وصور رحمة الله في الدنيا والآخرة مش هنقدر نُحصيها وانت بنفسك شوفت صور من رحمة ربنا من خلال الحلقات إللي فاتت،
زي إزاي إن ربنا كان ستر على المؤمن ذنوبه وهو بيعملها في الدنيا وكمان سترها عليه في الآخرة وغفرها له وهو واقف بين إيده وهو بيحاسبه👌
وكمان إزاي إن ربنا يكتب للعبد كل حسناته حتى لو كانت حسنة واحدة بس في بطاقة صغيرة زي ما حصل مع قصة صاحب البطاقة💁

ومن صور رحمة الله في الدنيا؛ موقف رجل على عهد رسول الله ﷺ، جاء في بعض الروايات فيها《ضعف》 إن الرجل ده كان كبير في السن لدرجة إن حواجبه نازلة على عينه، والحديث إللي جاء فيه القصة《 صححه الألباني في سلسلة الأحاديث الصحيحة》الحديث يقول:
جاء رجل لرسول الله ﷺ فقال له:
"أَرَأَيْتَ رَجُلًا عَمِلَ الذُّنُوبَ كُلَّهَا، فَلَمْ يَتْرُكْ مِنْهَا شَيْئًا، وَهُوَ فِي ذَلِكَ لَمْ يَتْرُكْ حَاجَةً وَلَا دَاجَةً إِلَّا أَتَاهَا، فَهَلْ لَهُ مِنْ تَوْبَةٍ؟ "

يعني الرجل بيسأل رسول الله ﷺ عن واحد عمل كل أنواع الذنوب، يعني مخلاش ذنب إلا عمله سواء كبير ولّا صغير، فهل الرجل ده له توبة؟
وهو هنا بيتكلم عن نفسه بس من غير مايصرّح بكده، فرسول الله ﷺ عرف إنه بيتكلم عن نفسه فسأله وقَالَ:
"فَهَلْ أَسْلَمْتَ؟"
فقَالَ الرجل:"أَمَّا أَنَا فَأَشْهَدُ أَنْ لَا إِلَهَ إِلَّا اللهُ، وَحْدَهُ لَا شَرِيكَ لَهُ، وَأَنَّكَ رَسُولُ اللهِ" ☝
فقَالَ له رسول اللهﷺ:
"نَعَمْ، تَفْعَلُ الْخَيْرَاتِ، وَتَتْرُكُ السَّيِّئَاتِ، فَيَجْعَلُهُنَّ اللهُ لَكَ خَيْرَاتٍ كُلَّهُنَّ"

يعني أيوة لك توبة، بس لازم تفعل الخيرات وتترك السيئات، وساعتها ربنا مش بس هيتوب عليك ويغفر لك؛ لأ ده كمان السيئات إللي انت عملتها دي كووولها ربنا هيحولها إلى حسنات👌

فالرجل اتفاجئ من الكلام وقال لرسول الله ﷺ:
وَغَدَرَاتِي وَفَجَرَاتِي؟😳
غدراتي جمع مفرده غُدَرَةُ ومعناها الكثير الغَدر بالناس سواء كان خيانة أو نقض العهد وعدم الوفاء به.
وفجراتي يعني الفُجور وهو ارتكاب المعاصي بدون اهتمام وانغماس في الملذَّات.
فهو كان واحد ضايع على الآخر😬

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الخامسة_والستون
#المرحلة_الثالثة_اليوم_الآخر
#وصف_الجنة_والنار_الجزء_التاسع
#مساكن_أهل_الجنة_ومساكن_أهل_النار

بعد ما شوفت أرض الجنة وزرعها وثمارها وطيورها وحيواناتها وشميت ريحتها وشوفت أنهارها؛
تروح بقى لبيتك إللي في الجنة وتشوف أنواع مساكن الجنة💁

هتمشي في الجنة فهتلاقي غُرف وقصور وبيوت وخيام،
لكن شكل مساكن الجنة دي لا يخطر ببال أحد، والوصف إللي هنقوله لا يَقرُب من الحقيقة إلا مجرد تخيّلات😅
والحاجة لما تسمع عنها وتتخيلها بتكون مختلفة خالص عن لما بتشوفها بعينك،
فمهما سمعت من أوصاف؛ فانت عقلك لا يستطيع أن يُدرك شكل الجنة على الحقيقة، لكن تؤمن بما جاء عن الله ورسوله ﷺ ويكون ده دافع لك للعمل للفوز بجنة عرضها السماوات والأرض👌

المباني في الجنة مش مبنية زي مباني الدنيا طوب أحمر وأسمنت و رمل، لأ 😅
ده البناء في الجنة من الذهب والفضة،
يعني طوبة من الذهب وطوبة من الفضة، أما مِلاطُها فهو المسك شديد الرائحة الطيبة، يعني المُونة أو المادة إللي بتكون بين الطوب عشان تمسكه ببعضه هو المسك الخالص من كل الشوائب👌
قال رسول الله ﷺ عن بناء الجنة:
"لبِنةٌ من فضَّةٍ ولبنةٌ من ذَهَبٍ، وملاطُها المسكُ الأذفرُ"
《صحيح الترمذي》

ومساكن الجنة أنواع زي ما قلنا، فيها غُرف وقصور وبيوت وخيام👌
فأما غرف الجنة فهي القصور الشاهقة العالية، وطبعا دي غير قصور الجنة التانية، يعني الغرف دي هي أفضل قصور الجنة وبتكون عالية مُعلّقة، وهي عبارة عن طبقات بعضها فوق بعض،
تجري الأنهار إللي اتكلمنا عليها المرة إللي فاتت من تحت القصور دي ومن تحت أشجارها، قال الله عز وجل:
"لَكِنِ الَّذِينَ اتَّقَوْا رَبَّهُمْ لَهُمْ غُرَفٌ مِّن فَوْقِهَا غُرَفٌ مَّبْنِيَّةٌ تَجْرِي مِن تَحْتِهَا الْأَنْهَارُ وَعْدَ اللَّهِ لَا يُخْلِفُ اللَّهُ الْمِيعَادَ"
《سورة الزمر آية(20)》

والغرف دي تكون لأصحاب الدرجات العالية👌
قال رسول الله ﷺ:
"إنَّ أهْلَ الجَنَّةِ يَتَرَاءَوْنَ أهْلَ الغُرَفِ مِن فَوْقِهِمْ،
كما يَتَرَاءَوْنَ الكَوْكَبَ الدُّرِّيَّ الغَابِرَ في الأُفُقِ، مِنَ المَشْرِقِ أوِ المَغْرِبِ؛ لِتَفَاضُلِ ما بيْنَهُمْ.
قالوا: يا رَسولَ اللَّهِ، تِلكَ مَنَازِلُ الأنْبِيَاءِ لا يَبْلُغُهَا غَيْرُهُمْ؟
قالَ: بَلَى، والذي نَفْسِي بيَدِهِ، رِجَالٌ آمَنُوا باللَّهِ وصَدَّقُوا المُرْسَلِينَ."
《صحيح البخاري》

يعني إللي درجاتهم في الجنة أقل؛ هيشوفوا أهْلِ الغُرَفِ والدَّرجاتِ العُليا فَوقَهم زي ما بنشوف النجوم البعيدة في السماء كأنها نقطة وممكن يكون النجم ده أكبر من كوكبنا مئات المرات،
يعني المسافة بينهم بعيدة جدا، وده بسبب تفاضل الأعمال بينهم،
فلما الصحابة سمعوا الوصف ده لأصحاب الدرجات العالية؛ سألوا رسول الله ﷺ هل أصحاب الدرجات العالية دول هم الأنبياء والمرسلين فقط محدش يقدر يبلغها غيرهم؟
فأقسم لهم رسول الله ﷺ إن المنازل والدرجات دي مش بس للأنبياء والمرسلين، لكن هي كمان لرِجالٌ آمَنوا باللهِ وصَدَّقوا المرسَلين حَقَّ تَصديقِهم،
يعني جمعوا بين كمال الإخلاص لله، والمتابعة والانقياد للرسول ﷺ👌

وصف الغرف دي بقى من الداخل عجيب سبحان الله😮
هي بتكون شفافة، بحيث إن إللي في الداخل يرى إللي موجود في الخارج، وإللي في الخارج يرى الموجود في الداخل،
زي كده لما يكون بيت مصنوع من زجاج، أو أَلْماسٍ أو دُرٍّ وياقوتٍ،
لكن الغرف دي لا يَعلَمُ حَقيقَتَها إلَّا اللهُ عز وجل👌
وطبعا مش محتاجة أقول إن القصور والغرف دي بتكون مفروشة، يعني فيها السرائر والفُرش والأواني والزينة والطعام والشراب وغيره وهنتعرف عليهم بالتفصيل إن شاء الله لما ييجي وقتها، فانت هتلاقي فيها كل ما تتخيله وما لا تتخيله👌
قال رسول الله ﷺ:
"إِنَّ في الجنةِ غُرَفًا يُرَى ظَاهِرُها من باطِنِها، و باطِنُها من ظَاهِرِها"
《حديث حسن صحيح》

أكيد طبعا تتمنى إن يكون عندك غرفة زي كده😅
طيب تعمل إيه عشان يبقى عندك زيها بما إنك لسه في الدنيا🤔

¤واحد من الصحابة سأل رسول الله ﷺ عن الغرف دي وقال:
لِمَنْ هيَ يا رسولَ اللهِ؟
يعني مين الناس إللي ربنا هيكافئها بالغرف أو القصور دي؟
فقال رسول الله ﷺ:
"لِمَنْ أَطَابَ الكَلامَ، و أَطْعَمَ الطَّعَامَ، و باتَ قائِمًا و الناسُ نِيامٌ"
《حديث حسن صحيح》
وفي رواية تانية:
لِمَنْ أَطَابَ الكَلَامَ، وَأَطْعَمَ الطَّعَامَ، وَأَدَامَ الصِّيَامَ، وَصَلَّى بِاللَّيْلِ وَالنَّاسُ نِيَامٌ"《حسنه الألباني 》

يعني الغرف دي هتكون مكافئة للناس إللي بتتكلم الكلام الطيب وتترك الكلام القبيح البذيء الفاحش،
وإللي بتطعم الجَوْعى من الفُقراءِ والمَساكينِ، وإللي بيحافَظَوا على قِيامِ اللَّيلِ والتَّهجُّدِ للهِ عزَّ وجلَّ والناس في غَفْلةٍ نائِمونَ، حتى لو هتصلي ركعتين بعد العشاء ومعهم ركعة الوتر،
وكمان إللي بيحافظوا على صيام النوافل👌

#الخلفاء_الراشدون_إيمان_شلبي
#سيرة_أبو_بكر_وعمر
#الحلقة_الخامسة
#فضائل_ومكانة_أبي_بكر_وعمر_الجزء_الثاني

اتكلمنا المرة إللي فاتت عن معظم الرؤى إللي جاءت في فضل أبي بكر وعمر رضي الله عنهما،
وقلنا بعدها إن رسول الله ﷺ قال عن أبي بكر رضي الله عنه إنه أرحم الناس بالأمة،
أما عمر فقد قال عنه رسول الله ﷺ:
"أشدُّهم في دينِ اللَّهِ عُمرُ"《الصحيح المسند》
والشدة هنا معناها القوة، والمقصود بالقوة هو الثبات عند المواقف الصعبة إللي محتاجة قرار فاصل، وكذلك الحزم في المواقف والمسارعة في أخذ القرار الحاسم،
فيكون معنى أشدهم في دين الله عمر هو:
أن عمر رضي الله عنه لما كان يرى الحق في شيء؛ كان بيتمسك بيه وبيدافع عنه بكل قوته ويثبت عليه ولا يرضى بالذل ولا المهانة👌

ومش معنى كلامنا ده إن الصحابة رضي الله عنهم مكنوش أشداء في دين الله😅
لأ👌
الصحابة كلهم رضي الله عنهم كانوا بيجمعوا في أخلاقهم كل الصفات الحميدة، لكن رسول الله ﷺ كان يعطي ميزة لكل واحد من الصحابة،
زي مثلا لما قال عن أبي عبيدة بن الجراح أنه أمين الأمة، وقال عن الزبير بن العوام أنه حواري رسول الله ﷺ،
فأحيانا الواحد منهم يمتاز على غيره بصفة معينة يكون متفوق فيها💁

فعمر رضي الله عنه كانت ميزته الشدة والقوة في دين الله، فهو كان قويا بكل ما تحمله الكلمة من معنى، سواء من ناحية القوة النفسية أو القوة البدنية،
والقوة النفسية تكون في التمسك بالدين والعبادة والتقوى، و القوة البدنية هي قوة الجسد من حيث الطول وبناء الجسد وقدرة التحمل وغيره،
ورسول الله ﷺ كان قال:
"الْمُؤْمِنُ القَوِيُّ خَيْرٌ وَأَحَبُّ إلى اللهِ مِنَ المُؤْمِنِ الضَّعِيفِ"
《رواه مسلم》
فالحديث ينطبق على عمر رضي الله عنه من ناحية القوة النفسية والقوة الجسدية👌

وهو كان رضي الله عنه يستخدم الشدة والقوة دي في نصرة دين الله عز وجل ونصرة الضعفاء👌
ويوضح ده قول عبد الله بن مسعود رضي الله عنه لما قال:
"مَا زِلْنَا أعِزَّةً مُنْذُ أسْلَمَ عُمَرُ"
《صحيح البخاري》

ومن مواقفه تظهر قوته ونصرته💁

¤عندنا مثلا موقفه في غزوة أُحد وبعدها،
يعني بعد ما حصلت الهزيمة و فرّ المسلمون من أرض المعركة وتعرض رسول الله ﷺ لإصابة شديدة ووقع في حفرة ومكنش قادر يتحرك؛ كان عمر من أقرب الثابتين حول رسول الله ﷺ ومعه أبو بكر،
وبعد انتهاء المعركة أمر رسول الله ﷺ الصحابة إنهم ينسحبوا من أرض المعركة ويصعدوا جبل أحد قبل ما يتعرضوا كلهم للهلاك،
فلما كان الصحابة بيصعدوا الجبل شافهم خالد بن الوليد وأبو سفيان،
فجمعوا المشركين عشان يمنعوا الصحابة من إنهم يصعدوا الجبل؛ لأنهم لو صعدوا الجبل خلاص مش هيقدروا يوصلوا لهم🤷‍♂️
وهم كانوا عايزين يتأكدوا إن رسول الله ﷺ خلاص قُتل زي ما كان واحد من المشركين قال،
فقال رسول الله ﷺ:
إنهم لا ينبغي لهم أن يعلونا، يعني مينفعش يطلعوا ورانا، لازم نمنعهم👌
فكلّف رسول الله ﷺ مجموعة من أصحابه إنهم يدفعوا المشركين ويمنعوهم من طلوع الجبل وراء المسلمين وكان على رأس المجموعة عمر بن الخطاب رضي الله عنه،
فقاتل المشركين قتالا شديدا لحد ما استطاع هو والصحابة إللي كانوا معاه إنهم يمنعوا المشركين من صعود الجبل واستطاع رسول الله ﷺ وإللي كانوا معاه إنهم يختفوا في الجبل👌

أبو سفيان كان عايز يتأكد إن رسول الله ﷺ فعلا قُتل زي ما قيل في أرض المعركة، فوقف عند الجبل وقال للمسلمين:
أَفِي القَوْمِ مُحَمَّدٌ؟
يعني هل محمد ﷺ لسه عايش؟
فرسول الله ﷺ أشار للصحابة بإنهم ميردوش على أبي سفيان عشان ميتعرفش مكانه ﷺ فسكت الصحابة،
وأعاد أبو سفيان السؤال ثلاث مرات ومحدش من الصحابة بيرد،
وبعدها قال: أَفِي القَوْمِ ابنُ أَبِي قُحَافَةَ؟
سأل ثلاث مرات ورسول الله ﷺ ينهى الصحابة إنهم يردوا عليه،
فسأل أبو سفيان ثلاث مرات كذلك: أَفِي القَوْمِ ابنُ الخَطَّابِ؟
ومحدش من الصحابة بيرد،
فهنا فرح أبو سفيان وقال لأصحابه:
"أَمَّا هَؤُلَاءِ فقَدْ قُتِلُوا"《صحيح البخاري》
يعني خلاص كده الثلاثة دول ماتوا وارتحنا منهم.
وأبو سفيان كان عارف مكانة هؤلاء الثلاثة وأهمية وجودهم، فلو الثلاثة مش موجودين يبقى كده انتهى أمر أمة الإسلام👌

فعمر بن الخطاب رضي الله عنه مقدرش يمسك نفسه😬
يعني قوته النفسية مش مخلياه يترك أبا سفيان يمشي مستريح من أرض المعركة،
هو كان حاسس بغيظ وشماتة من أبي سفيان فمقدرش يسكت، فقام رد عليه وقال له:
"كَذَبْتَ واللَّهِ يا عَدُوَّ اللَّهِ؛ إنَّ الَّذِينَ عَدَدْتَ لَأَحْيَاءٌ كُلُّهُمْ، وقدْ بَقِيَ لكَ ما يَسُوؤُكَ"《صحيح البخاري》
يعني ربنا أبقى على حياة إللي يضايقك ويحرق دمك😅

وفعل عمر مكنش مخالف لأمر رسول الله ﷺ بعدم الرد على أبي سفيان، بدليل إن رسول الله ﷺ سكت ولم يعلق على فعل عمر رضي الله عنه،

#الخلفاء_الراشدون_إيمان_شلبي
#سيرة_أبو_بكر_وعمر
#الحلقة_الخامسة_عشرة
#ردة_العرب_وإنفاذ_بعث_أسامة

اتكلمنا المرة إللي فاتت عن خطبة أبي بكر الصديق رضي الله عنه إللي وضح فيها منهجه إللي هيتبعه خلال فترة حكمه،
خلاص تم دفن رسول الله ﷺ وتولى أبو بكر رضي الله عنه أمور الخلافة،
لكن حصل إن علي بن أبي طالب والزبير بن العوام إللي قلنا إنهم كانوا مشغولين بتجهيز رسول الله ﷺ للغسل والدفن غضبوا من بيعة أبي بكر الصديق رضي الله عنه،
ليه🤔
يجاوبنا على السؤال ده علي والزبير رضي الله عنهما بنفسهم، قالا:
"ما غضِبْنا إلا لأنا أخِّرنا عن المشورةِ وإنا نرى أنَّ أبا بكرٍ أحقَّ الناسِ بها إنه لَصاحبُ الغارِ وإنا لَنعرفُ شرفَه وخبرَه ولقد أمرَه رسولُ اللهِ ﷺ أن يُصلِّيَ بالناسِ وهو حَيٌّ"《إسناده جيد》

يعني هم زعلوا إن التشاور في اختيار الخليفة حصل وهم مش موجودين، وغضبهم ده حاجة طبيعية؛ لأن علي والزبير رضي الله عنهما كانا من أهم الصحابة ومن أصحاب الرأي والمشورة،
فإزاي محدش يقول لهم على أمر مهم زي كده🤷
ومع ذلك هم مش معترضين خالص على تولي أبو بكر للخلافة، بالعكس ده هم شايفين إنه أحق واحد بالخلافة حتى إن رسول الله ﷺ خلاه يصلي بالمسلمين وهو حي👌
لكن زي ما شفنا في الحلقات إللي قبل كده إن أبا بكر وعمر وأبا عبيدة كانوا معذورين في غياب علي والزبير وحتى غياب كل المهاجرين عن التشاور في اختيار الخليفة في السقيفة،
وفي نفس الوقت الفريق المقابل معذور هو كمان💁
يعني احنا شوفنا إزاي إن أبا بكر وعمر كانا في بيت رسول الله ﷺ وقت اجتماع الأنصار في السقيفة وجاء إليهما رجل فأخبرهما بالخبر، فذهبا إلى الأنصار بسرعة قبل ما تحصل حاجة تفرق وحدة المسلمين وتحصل فتنة، وهم في الطريق شافوا أبو عبيدة بن الجراح فأخذاه معهما وذهبوا جميعاً إلى السقيفة، وكل ده بدون اتفاق أو ترتيب،
ولما وصلوا السقيفة تسارعت الأحداث وكان لازم ساعتها اختيار خليفة وإلا كان ممكن يحصل فتنة كبيرة في المدينة ويكثر القيل والقال والخلاف والتفرق،
فكل فريق معاه عذره دلوقتي، ومع ذلك خطب أبو بكر في المهاجرين وقال لهم:
"ما كنتُ حريصًا على الإمارةِ يومًا ولا ليلةً ولا سألتُها في سرٍّ ولا علانيةٍ"《إسناده جيد》
يعني أنا مطلبتش إني أكون حاكم عليكم ولا حتى كنت عايز كده ولا طلبت الحكم في أي حال من الأحوال،
فقبِل المهاجرون وهم عارفين صدق أبي بكر وزهده ومكانته وقدره وإيمانه،
وفي النهاية بايع علي والزبير رضي الله عنهما أبا بكر في اليوم التالي وانتهى الموضوع،
يعني الغضب والزعل ده كان حاجة عابرة انتهت بسرعة وتمت البيعة لأبي بكر رضي الله عنه.

انتشر خبر موت رسول الله ﷺ، فارتدت كل جزيرة العرب ما عدا مكَّة والطائف وقرية هَجَر في شرق الجزيرة العربية وطبعا المدينة👌
والردة دي كانت واحدة من أكبر الأزمات في تاريخ الأمَّة الإسلامية،
متخلين إن كل المسلمين ارتدوا ما عدا ثلاثة مدن فقط😶
يعني لو فكرنا بمنظور الدنيا هنقول إن تعب رسول الله ﷺ ومجهوده مع الصحابة في نشر الإسلام في الجزيرة العربية راح عالفاضي😓
طبعا هو أجره محفوظ في الآخرة وهو عليه البلاغ فقط وليس عليه النتيجة، لكن الموضوع يعتبر مؤلم، تخيلوا مجهود سنين يروح كده في لحظة😞

☆وانتم ممكن تستغربوا وتسألوا ليه حصلت الردة مع إن هرقل ملك الروم نفسه عرف إن من صدق رسالة رسول الله ﷺ إن إللي يدخل في الإسلام لا يرتد عنه في الحوار إللي حصل بينه وبين أبي سفيان وشرحناه في الحلقة 133 من السيرة،
فليه بقى ارتدت كل جزيرة العرب كده🤔

هرقل سأل أبو سفيان وقال له هل في أحد بيرتد من أتباع النبي ﷺ سَخْطَةً لدينه بعد أن يدخل فيه؟ فقال له أبو سفيان: لأ،
فرد عليه هرقل وقال له:
وكذلك الإيمان حين تخالط بشاشته القلوب.
يعني لما القلب يشعر بحلاوة الإيمان بيبقى مش عايز يترك شعور الإطمئنان القلبي والراحة النفسية،
وهو ده مربط الفرس👌
بمعنى إن إللي حصل إن الإيمان لم يستقر في قلوب الناس إللي ارتدت دي من الأساس🤷
فبالتالي كان سهل عليهم يتخلوا عن الإسلام مع أول شبهة أو رغبة في زعامة العرب مثلا،
فالإسلام كان انتشر في العرب من غير ما يتفقهوا في الدين ويتعلموه كويس زي باقي الصحابة إللي كانوا في المدينة مع رسول الله ﷺ،
والسبب في عدم تعلمهم هو قلة عدد الدعاة إللي يقدروا يعلموهم، ده غير المخاطر إللي واجهها الدعاة في الطريق إلى الدعوة زي إللي حصل في حادثة ماء الرجيع وبئر معونة لما قُتل فيهم كل الصحابة إللي كانوا خرجوا لتعليم الناس الدين، فكل ده أدى ردة العرب.

☆طبعا أحداث ماء الرجيع وبئر معونة احنا شارحينها مع بعض في السيرة قبل كده فصعب إني أعيد الكلام هنا تاني😅

#الخلفاء_الراشدون_إيمان_شلبي
#سيرة_أبي_بكر_وعمر
#الحلقة_الخامسة_والعشرون
#حروب_الردة
#معركة_اليمامة

اتكلمنا المرة إللي فاتت عن استعداد جيش خالد وجيش مسيلمة الكذاب للقتال،
اقترب خالد رضي الله عنه من جيش مسيلمة وبدأت معركة اليمامة👌
التقى الجيشان وكان جيش مسيلمة الكذاب في منتهى القوة، فعدد جيشه هو من أربعين إلى مائة ألف مقاتل،
أما جيش المسلمين فهو من اثنا عشر إلى أربعة عشرة ألف مقاتل،
فلو فكرنا بالحسابات الدنيوية هنلاقي إن جيش المسلمين مقارنة بجيش مسيلمة هو جيش ضعيف ومستحيل يقدر يتغلب على جيش مسيلمة🤷
لكن هل فعلا ده إللي حصل؟
خلونا نشوف💁

هجم جيش مسيلمة هجوم شديد جدا على جيش المسلمين واخترقوا جيش المسلمين لدرجة إنهم وصلوا لخيمة خالد إللي كانت في آخر الجيش وكان موجود فيها زوجته ومعاها الأسير المقيّد مُجاعة بن مَرارة،
وفعلا دخل الجنود لخيمة خالد وحرروا مجاعة فهو سيد من ساداتهم وكانوا لسه هيقتلوا زوجة خالد إللي كان تزوجها بعد مقتل زوجها السابق مالك نُويْرة؛
لكن منعهم مجاعة وقال لهم إنه أجارها، يعني هي في حمايته؛ لأنها كانت تستوصي به خيرا وكانت تطعمه وتسقيه في أسره، فحفظ لها الجميل،
فأطلقوا زوجة خالد رضي الله عنه وأخذوا مجاعة، وبدأوا يقاتلوا المسلمين قتالاً شديدًا،
وده كان أول انكسار في جيش المسلمين👌
منقدرش نقول هزيمة لأن المعركة لسه مخلصتش، لكن بنقول انكسار ولخبطة واختراق في صفوف المسلمين،
فلما حصل الانكسار ده بدأ خالد يعيد ترتيب جيش المسلمين فجعل تقسيم الجيش على هيئة قبائل👌
يعني جيش المسلمين في الأول كان كتلة واحدة، فميمنة الجيش مثلا كان فيها خليط من المهاجرين على الأنصار على القبائل العربية وكذلك باقي الجيش،
لكن دلوقتي جعل كل كتيبة مع بعض حسب قبائلهم، فجعل المهاجرين مع بعض وجعل الأنصار مع بعض وأفراد كل قبيلة مع بعض،
وده عشان يزرع في كل قبيلة الحمية ألا يُؤتَى المسلمون من قِبَلِهم، بمعنى إنهم يشتدوا في القتال والدفاع حتى لا يكونوا سبب في هزيمة المسلمين فيكون عار على بني فلان إنهم كانوا في سبب هزيمة المسلمين،
فكان ده زي حافز للمسلمين على الثبات أمام العدو، وده مش حاجة محرمة، يعني العصبية والحميّة القبيلة مادامت لا تُستخدم في شيء يخالف الشرع بل تستخدم للدفاع عن الإسلام فهي شيء ممدوح وليس مذموم👌

وبدأ المسلمون يجمعوا نفسهم وبدأت بطولات المسلمين تظهر، ففي وقت الأزمات تظهر معادن الرجال، وظهرت نماذج في جيش المسلمين لا تكاد تتكرر في التاريخ👌
فزيد بن الخطاب رضي الله عنه يقول للمسلمين:
"أيها الناس عُضوا على أضراسكم، واضربوا في عدوكم، وامضوا قُدمًا، والله لا أتكلم حتى ألقى الله فأكلمه بحجتي"
《البداية والنهاية الجزء السادس》
يعني هو بيشجع المسلمين على القتال ومش بس بكلامه، لأ ده كمان جعل نفسه قدوة لهم فأقسم إنه لن يتكلم حتى ينصره الله على هؤلاء المرتدين أو يُقتل في سبيل الله في هذه المعركة،
وبدأ يقاتل قتالاً شديدًا في جهة اليمين فهو قائد الميمنة مع إللي اتجمعوا حوله من الصحابة،
واستمر زيد بن الخطاب في القتال ودخل في عُمق جيش المرتدين لحد ما قابله رجل يسمى أبو مريم الحنفي من بني حنيفة فتقاتل معه زيد رضي الله عنه،
وجاءت اللحظة إللي كان ينتظرها زيد رضي الله طول حياته وتحققت أمنيته؛ فقد قُتل شهيدا رضي الله عنه على يد أبي مريم الحنفي إللي هيُسلم بعدين وهيحسُن إسلامه،
وكان يقول بعد إسلامه:
"لقد أكرم الله زيدًا بالشهادة على يَدَي، ولم يُهِنِّي على يَديْه"

وأثّر موت زيد بن الخطاب رضي الله عنه في همة المسلمين😢
فهو واحد من قادتهم ومن كبارهم عاشوا معاه سنين طويلة مع رسول الله ﷺ وهم أصلا لسه نفوسهم متأثرة بموت رسول الله ﷺ؛ فمعركة اليمامة تعتبر أول معركة كبيرة فاصلة بين الحق والباطل يخوضها المسلمون بعد موت رسول الله ﷺ،
حتى إن شعارهم في الحرب كان:
"يا مُحمّداه" أو "وا محمداه"
وسبحان الله الشعار ده مناسب جدا في المعركة دي؛ لأنّ الحرب كانت ضد واحد مُدّعي للنبوة، فكان شعارهم ده انتصارا لرسول الله ﷺ،
وكل معركة وحتى الغزوات مع رسول الله ﷺ كان للمسلمين فيها شِعار، يعني كلمة أو اسم بيرددوه خلال المعركة ليعرف بعضهم بعضا، زي مثلا في بعض غزواتهم كانوا يقولوا:
《حَمِ لا يُنصرون》 وفي بعضها《أَمِت أَمِت》
أما هنا فكانوا يقولوا:《يا محمداه》ﷺ 😢

بعد موت زيد وضعف همة المسلمين هجم عليهم المرتدين هجوم شديد واجتاحوا جيش المسلمين للمرة الثانية حتى وصلوا لخيمة خالد بن الوليد للمرة الثانية وحصل الإنكسار الثاني لجيش المسلمين👌
وتظهر نماذج أخرى للبطولة فيقوم ثابت بن قيس الذي كان يحمل راية الأنصار، وينادي على الأنصار: يَا لَلأنصار!