#قصص_الأنبياء(٢)
#السيرة_النبوية
#الحلقة_السادسة_والثلاثون
#رحلة_الإسراء_والمعراج
#المعراج_الجزء_الخامس
#نهاية_المعراج

اتكلمنا المرة إللي فاتت عن رسول الله ﷺ لما طلب من ربنا التخفيف في الصلاة زي ما موسى عليه السلام قال له،
وربنا فعلا خفف الصلاة من خمسين صلاة لخمس صلوات في اليوم والليلة،
وقلنا كم سؤال محتاجين نجاوب عليهم😁

◇السؤال الأول :
هل كان المسلمون قبل فرض الصلوات الخمس بيصلوا ولا لأ🤔
خلاصة القول في الموضوع ده إن الصلاة كانت مفروضة من أول بعثة رسول الله ﷺ،
وكانت صلاة قيام الليل مفروضة على رسول الله ﷺ وعلى المسلمين في أول سنة من البعثة،
وبعدين نُسخت وبقت الصلاة المفروضة ركعتين في أول النهار وركعتين في أخره، زي ما قلنا قبل كده😉
وجبريل عليه السلام كان علم رسول الله ﷺ كيفية الوضوء وكيفية الصلاة منذ البداية ،
وبعدين علمه أوقات الصلاة إللي احنا دلوقتي،
أما بالنسبة للأذان فلسه لم يُشرع دلوقتي، قصادنا كم سنة كده على ما يُشرع الأذان وله قصة هنقولها في وقتها إن شاء الله 😁
والخمس صلوات إللي ربنا فرضهم دول هيكونوا ركعتين فقط، وبعدين لما رسول الله ﷺ يهاجر ،
هتزيد ...الظهر والعصر والعشاء هيكونوا أربعة والمغرب ثلاثة،ولما يكون المسلمون على سفر هيقصروا الصلاة الرباعية فقط👌

◇السؤال الثاني:
ليه ربنا فرض في الأول خمسين صلاة مادام هو هيخففها لخمس صلوات بعدين، يعني كان فرض الخمس صلوات من البداية وخلاص🤔
احنا عارفين إن ربنا لا يكلف نفسا إلا وسعها 💁‍♀️
ومعنى إن ربنا يفرض علينا خمسين صلاة في اليوم والليلة فده معناه إننا نقدر نصلي الخمسين صلاة دي 👌
هو أه هنقعد طول اليوم كله نصلي😅
بس مفيش مشكلة، أصلا ربنا خلقنا للعبادة فطبيعي إننا نقضي اليوم كله في الصلاة 🤷‍♀️
فعشان ربنا يُرِي الناس رحمته بهم قدّر إنهم يكونوا خمسين وبعدين يتخففوا لخمس صلوات في اليوم والليلة،
ومش بس كده ده أعطانا أجر الخمسين كامل👌
فتخيلوا بقى الناس إللي بتفرط ومقصرة في الخمس صلوات مع إنهم يقدروا يصلوا خمسين صلاة ده وضعهم هيبقى إيه عند ربنا😶
وطبعا ده يشجعنا إننا مش بس نحافظ على الخمس صلوات، لا ده احنا كمان نحافظ على السنن الإثنا عشرة ركعة😉
☆وبما إننا بنتكلم على الصلاة والسنن ففي معلومة مهمة محتاجين نعرفها😁
وهي إن أول ما يحاسب عليه العبد يوم القيامة الصلاة...إذا صَلُحَتْ فَقَدْ أَفْلَحَ وَأَنْجَحَ،
وَإِنْ فَسَدَتْ فَقَدْ خَابَ وَخَسِرَ
يعني لازم نجيب في امتحان الصلاة عشرة من عشرة💁‍♀️
طيب إزاي هنجيب عشرة من عشرة وفي شيطان إسمه خنزب وظيفته بس إنه يُلهي الإنسان عن الخشوع في الصلاة ويسرق منها ويخلينا نسرح ونفكر في حاجات برة الصلاة 😑
حتى شوفوا حديث رسول الله ﷺ :
إنه ليس للعبد من صلاته إلا ما عَقل منها،
إن العبد يقوم في الصلاة لا يُكتب له منها إلا نصفها.. إلا ثلثها.. إلا ربعها.. إلا خمسها، حتى قال: إلا عشرها.
كده هيبقى مستحيل إنا ننجح في إمتحان الصلاة ،و هنلاقي إننا طالعين خسرانين وممكن صلاتنا كده تضيع 😱
طب إيه الحل😳
هنا بقى تيجي رحمة ربنا 😊
الحل في قول ربنا في الحديث القدسي للملائكة :
" انْظُرُوا هَلْ لِعَبْدِي مِنْ تَطَوُّعٍ ؟ فَإِنْ كَانَ لَهُ تَطَوُّعٌ ،
قَالَ: أَتِمُّوا لِعَبْدِي فَرِيضَتَهُ مِنْ تَطَوُّعِهِ"
يعني ربنا هيقول للملائكة يوم القيامة شوفوا عبدي لو عنده أي تطوع كملوا به النقص في الصلاة،
يعني السنن الرواتب يُكَمّل بها ما نَقص من الفريضة👌
فلو الإنسان كان بيصلي سنن يبقى هو عنده مخزون يقدر يكمل منه،
طيب لو مكنش بيصلي السنن ، أنا مش هقول إنتم تصوروا الموقف إللي ممكن يكون فيه ساعتها😶
فمش معقول بعد كل رحمة ربنا دي نقصر في الصلاة، وخصوصا إننا أصلا نقدر نصلي الخمسين صلاة👌
يعني لو أحد من البشر عمل فينا معروف بنبقى ممتنين جدا له، فما بالكم بربنا إللي خلق لنا الجنة وأنزل علينا من رحماته😊

◇ندخل في السؤال الثالث 😁
اشمعنا ربنا اختار الصلاة بالذات عشان يفرضها من فوق سبع سماوات؟
احنا قلنا إن الصلاة مهمة وهي الشريعة الوحيدة إللي ربنا أمر بها فوق سبع سماوات في مكان خاص جدا 👌
ليه بقى الخصوصية والأهمية دي🤔
ربنا أراد إنه يعطي المسلمين حاجة تَصِلهم به تُشبه ولو من بعيد إللي حصل مع رسول الله ﷺ 😊
خلونا نوضح أكثر، تعالوا نستعيد كده رحلة الإسراء والمعراج من البداية😉
جبريل عليه السلام غسل قلب وجوف رسول الله ﷺ قبل ما يبتدي رحلة لقاء ربنا،
مش احنا برده قبل ما نقابل ربنا في الصلاة بنتوضأ والوضوء ده بيغسل السيئات بتاعتنا قبل ما ندخل في الصلاة 💁‍♀️
وبعدين رسول الله وهو رايح للقاء الله عدّى على الجنة،
مش احنا برده بعد ما نتوضأ بنقول:
" اللهم اجعلني من التوابين واجعلني من المتطهرين ، أشهد ألا إله إلا الله وحده لا شريك له وأشهد أن محمدا عبده ورسوله " وهنا أبواب الجنة بتتفتح لنا 😉
رسول الله ﷺ طلع لوحده لمقابلة ربنا وتكلم معاه، واحنا برد

#قصص_الأنبياء(٢)
#السيرة_النبوية
#الحلقة_السادسة_والأربعون
#بداية_هجرة_رسول_الله

اتكلمنا عن بيعة العقبة الثانية وإزاي الأنصار بدأوا يُهيؤوا يثرب لاستقبال رسول الله ﷺ و المسلمين إللي هيهاجروا، وشوفنا فعلا أعداد من الصحابة هاجروا ليثرب ، وكان لما المسلمين بيوصلوا ليثرب كان بيستقبلهم الأنصار ويضيفوهم ويراعوهم ،
كل واحد ياخد إللي يقدر عليه من المسلمين المهاجرين من مكة، إللي ياخد له رجل وإللي ياخد له اثنين، كل واحد وإللي يقدر عليه😊

كل يوم قريش تصحى الصبح يلاقوا واحد منهم اختفى، يلاقوا عيلة كاملة اختفت، الناس دي بتروح فين😳
هم كانوا عارفين من موسم الحج إن أهل يثرب لهم علاقة بالموضوع، لكنهم مش متأكدين أوي ومش فاهمين إيه إللي بيحصل بالضبط😕
فبدأت تأتي لهم أخبار من يثرب من معارف لهم هناك إن المسلمين بيهاجروا إلى يثرب،
فالموضوع ده عمل لهم قلق، المسلمين بدأ يكون لهم مكان هيستقروا ويتجمعوا فيه،
وده إللي قريش مش عايزاه نهائي لأن الموضوع ده له مخاطر كبيرة بالنسبة لهم🙊
خلونا نشوف إيه هي المخاطر من وجهة نظر قريش:
◇أولا:
لو دعوة الإسلام انتشرت في الجزيرة العربية احتمال كبير جدا إن قريش تفقد مكانتها وتجارتها،
لأنهم كانوا بيكسبوا كثير جدا من بيع الأصنام، فمين إللي هيشتري أصنام لما الناس تدخل الإسلام🙃

◇ثانيا:
كفار مكة عارفين كويس أوي إن المسلمين مش مهاجرين ليثرب عشان يقضوا فترة راح ويغيروا جو😅
دول عارفين إن المسلمين أصحاب قضية، عايزين يقيموا دولة إسلامية وهيرجعوا في يوم من الأيام عشان يحكموا مكة،
ما هو رسول الله ﷺ بقاله ثلاثة عشرة سنة بيقول لهم إن الحكم لله فقط،
فأكيد المسلمين هيرجعوا في يوم من الأيام عشان يقيموا حكم الله في مكة🤷‍♀️

◇ثالثا:
هجرة المسلمين ليثرب بالذات كان مشكلة بالنسبة لهم لأن يثرب فيها مميزات مش موجودة في أي مكان تاني وده مش في مصلحة قريش نهائي، ومن المميزات دي:

♡إن سكان يثرب إللي هم الأوس والخزرج من أعز قبائل العرب وأقواهم في الحرب،
ولولا إنهم كانوا مشغولين في الحرب إللي كانت بينهم كان زمانهم بقوا قوة كبيرة مشهورة في الجزيرة العربية تهدد باقي القبائل👌
فتخيلوا القوة دي لما تنضم لرسول الله ﷺ بعد ما يتوحدوا هتبقى عاملة إزاي🙊

♡موقع يثرب الجغرافي بيهدد قوافل قريش، لأنها تقع على طريق قوافل قريش من وإلى الشام،
فيثرب تقدر تعمل حصار على مكة وتجارتها في أي وقت، وده هيسبب لهم خسارة كبيرة جدا لأن عيشتهم كلها على التجارة 😕
ده غير إن يثرب مدينة حصينة، يعني محمية حماية طبيعية محدش يقدر يهجم عليها بسهولة👌
فحتى لو فكروا إنهم يحاربوا أهل يثرب فهتكون حرب صعبة جدا عليهم😬

♡يثرب بيسكنها اليهود، وهم أهل سلاح وأموال وأعداد كبيرة، وهم أهل كتاب وأتباع الانبياء، وكانوا عارفين إن ده زمن خروج آخر الأنبياء،
والمتوقع إنهم هيدخلوا في الإسلام ويتبعوا رسول الله ﷺ،
وده مصيبة كبيرة جدا لأهل مكة😶

بالإضافة لكل إللي فات ده، الناس إللي هاجرت دي من أهل مكة أصلا، يعني كل واحد من زعماء مكة إما فقد ابن أو أخ أو ابنة، وفي ناحيتهم حب فطري،
ولولا محمد ﷺ والدين إللي جاء به ده مكنش كل ده حصل،
فهم في ضغط نفسي رهيب ومتغاظين جدا من الحال إللي وصلت له الأمور ومحتاجين يشوفوا حل😑
والحل الأساسي إنهم ميسمحوش لمحمد ﷺ إنه يهاجر ليثرب، لأن محدش من المسلمين ولا الأوس والخزرج هيقدر يعمل أي حاجة إلا لما يكون محمد ﷺ بينهم،
يبقى لازم يسيطروا على محمد ﷺ ويمنعوه من الهجرة بأي طريقة👌
لكن إزاي هيسيطروا عليه وهو من قبيلة بني هاشم القوية، وصعب إنهم يدخلوا معاها في صراع😕

عشان كده اجتمعوا في دار الندوة ، ودي زي قاعة اجتماعات كده، محدش بياخد قرارات مهمة إلا في دار الندوة دي،
فكل رؤوس المشركين من قريش من القبائل المختلفة ماعدا بني هاشم طبعا، اجتمعت في دار الندوة عشان يشوفوا حل للأزمة بتاعتهم دي👌

☆وبمناسبة اجتماع المشركين، قصة إن إبليس تمثل في صورة شيخ من نجد وحضر معاهم اجتماع دار الندوة غير صحيحة🙅‍♀️❌
أصلا بالعقل محدش بيدخل دار الندوة دي وبيحضر اجتماعاتها غير سادة قريش، فإزاي هيدخلوا رجل غريب وسطهم في اجتماع مهم زي ده🙄

المهم هم اجتمعوا وبدأ كل واحد فيهم يقول الحل إللي عنده للمشكلة دي، كان عندنا فريقين:
فريق معتدل كان شايف إن حبس رسول الله ﷺ في مكة كفاية عشان يحل المشكلة🤷‍♀️

الفريق التاني كان زي ما بنقول عليه دلوقتي وبنسميه اليمين المتطرف😅
ده كان رأيه إن رسول الله ﷺ لازم يُقتل عشان المشكلة تتحل من جذورها،
والفكرة دي كانت عاجبة الجميع لكن مين إللي هيضحي بنفسه ويواجه قبيلة بني هاشم😶
ماهو أي قبيلة قوية يُقتل حد من أشرافها مش بيسبوا دمه يروح هدر 😅
فراح أبو جهل طالع لهم بفكرة شيطانية قال لهم:
احنا هنختار من كل قبيلة شاب قوي ونخليهم يحاصروا بيت محمد، وأول ما يطلع من بيته يقوموا كلهم ضاربينه بالسيوف ضربة رجل واحد وبكده دمه يتفرق بين القبائل،
وبني هاشم مش هيبقى ق

#قصص_الأنبياء(٢)
#السيرة_النبوية
#الحلقة_السادسة_والخمسون
#تغيير_القبلة_وفرض_القتال

كنا واقفين المرة إللي فاتت عند الحادثة إللي حصلت وعملت قلق كبير وخلت اليهود والمشركين يشمتوا في المسلمين،
إيه إللي حصل 🤔

في شهر شعبان بعد سرية نخلة إللي حصلت آخر يوم رجب واتكلمنا عليها المرة إللي فاتت، نزلت الآيات بتغيير القبلة🙊

☆قبل ما نكمل في علماء قالوا إن تغيير القبلة كان في نصف شهر رجب، يعني حتى قبل سرية نخلة😉

نرجع لموضوعنا 😁
احنا كنا عارفين إن رسول الله ﷺ طول فترة مكة كان بيصلي ناحية بيت المقدس أو المسجد الأقصى،
واستمر بعد الهجرة يصلي ناحيته لمدة سنة وسبعة أشهر في المدينة،
وكان رسول الله ﷺ طول فترة مكة بيجعل الكعبة بينه وبين بيت المقدس بحيث إنه يصلي في اتجاه الإثنين،
لكن لما هاجر للمدينة المكان مختلف فكان لازم يتجه ناحية بيت المقدس وكانت الكعبة في ظهر النبي ﷺ،
فكان رسول الله ﷺ يتمنى إن ربنا يُغير له القبلة ويجعلها ناحية الكعبة،
هو مكنش بيدعي لكن كانت مجرد رغبة، كان كل شوية ينظر للسماء منتظر جبريل ييجي يقول له إن خلاص غير القبلة،
وده إللي حصل فعلا👌
جاء جبريل عليه السلام بكلام الله:
"قَدْ نَرَىٰ تَقَلُّبَ وَجْهِكَ فِي السَّمَاءِ ۖ فَلَنُوَلِّيَنَّكَ قِبْلَةً تَرْضَاهَا ۚ فَوَلِّ وَجْهَكَ شَطْرَ الْمَسْجِدِ الْحَرَامِ ۚ"
وكان ده أول نَسْخ يحصل في الإسلام،
والنسخ معناه ببساطة إن ربنا يأمر بأمر وبعدين يغيريه لأمر تاني، فالأمر الجديد بينسخ أو بيمسح الأمر القديم،
زي موضوع تغيير القبلة كده😉
ومش معنى إن ربنا استجاب لرغبة رسول الله ﷺ إن مفيش حكمة من الموضوع، ربنا لا يفعل شيء إلا لحكمة سواء احنا عرفناها وفهمناها أو لأ👌
"ذَٰلِكُمْ حُكْمُ اللَّهِ ۖ يَحْكُمُ بَيْنَكُمْ ۚ وَاللَّهُ عَلِيمٌ حَكِيمٌ "

☆ممكن حد يقول طيب ليه ربنا غيّر القبلة ولسه الدولة الإسلامية في بداية نشأتها يعني كان يستنى شوية وخصوصا إن اليهود كانوا مستنيين أي حاجة تحصل عشان يطعنوا في الإسلام🤔

الفترة إللي حصل فيها تغيير القبلة كانت أنسب وقت، عشان كل واحد يبان على حقيقته،
عشان يبان الصادق في إيمانه وإللي هيقدر يبني دولة الإسلام ويقف قصاد الفتن والشبهات مع رسول الله ﷺ،
من الناس إللي لسه الإيمان مش مستقر في قلوبها وممكن تسيب الإسلام بسبب شبهة ولا اثنين يقولها أعداء الإسلام👌
" وَمَا جَعَلْنَا الْقِبْلَةَ الَّتِي كُنتَ عَلَيْهَا إِلَّا لِنَعْلَمَ مَن يَتَّبِعُ الرَّسُولَ مِمَّن يَنقَلِبُ عَلَىٰ عَقِبَيْهِ ۚ "

نزلت الآية وحصل بسببها فتنة كبيرة، تعالوا نشوف ردود أفعال الناس على تغيير القبلة😉
اليهود إللي في المدينة كانوا من الأول فرحانين إن رسول الله ﷺ بيصلي ناحية بيت المقدس لأنها قبلتهم،
فكانوا مفكرين إن رسول الله ﷺ هيتبعهم في دينهم بعد فترة،
فلما اتحولت القبلة جالهم زي إحباط كده و بدأوا يشككوا المسلمين في دينهم،
وقعدوا يقولوا محمد خالف قبلة الأنبياء قبله، ولو كان نبي كان استمر يصلي ناحية قبلة الأنبياء😏
"سَيَقُولُ السُّفَهَاءُ مِنَ النَّاسِ مَا وَلَّاهُمْ عَن قِبْلَتِهِمُ الَّتِي كَانُوا عَلَيْهَا ۚ "
وكلام اليهود أثّر على ضعاف الإيمان إللي عندهم شك والإسلام مش مستقر في قلوبهم وبدأوا يسألوا :
طب ومصير الناس إللي ماتت قبل تغيير القبلة إيه، وهل ربنا هيقبل صلاتهم ولا لأ،
وهل هياخدوا أجر على صلاتهم إللي فاتت دي ولا لأ،
طيب ماهو لو كانت القبلة الأولى حق يبق هو ترك الحق للباطل،
ولو كان القبلة الجديدة هي إللي حق يبقى هو كان على باطل😕
وكأن يعني الصلاة لبيت المقدس كانت اجتهاد من رسول الله ﷺ مش وحي من عند ربنا فمش هياخدوا أجر على صلاتهم 🙄
ومع ذلك ربنا رد عليهم عشان يطمئن المؤمنين
"وَمَا كَانَ اللَّهُ لِيُضِيعَ إِيمَانَكُمْ"
وشوفوا الفرق بينهم وبين المسلمين الصادقين الثابتين على الإيمان👌
المسلمين أول ما رسول الله ﷺ قال لهم القبلة اتغيرت وصلى بهم العصر محدش اتكلم كله صلى خلف رسول الله ﷺ وخلاص وانتهى الموضوع،
لا وشوفوا الأعجب🙊
واحد من الصحابة صلى مع رسول الله ﷺ، وبعدين وصل لمسجد قباء لقى المسلمين بيصلوا وكانوا راكعين قال لهم:
أشهد إني صليت مع رسول الله ﷺ ناحية الكعبة🤚
راح الصحابة وهم راكعين مدوّرين نفسهم وهم في الصلاة واتجهوا ناحية القبلة الجديدة😮
وأنا عايزاكم تتخيلوا ناس راكعة بتصلي غيروا اتجاههم مائة وثمانين درجة، لأن القبلة زي ما قلنا إللي يقف وهو متجه ناحية المسجد الأقصى يبقى الكعبة في ظهره، فهم غيروا اتجاههم تماما،
وده طبعا خلاهم يتحركوا كثير في الصلاة، ومحدش فيهم فكر إنه يستنى يتأكد من الكلام ويعرف القصة بالكامل،
ولا حد قال طيب خلاص أكمل الصلاة دي وخلاص، ومن الصلاة الجاية أصلي للقبلة الجديدة،
كلهم بلا استثناء رجال ونساء تحولوا في نفس اللحظة،
طاعة مُطلقة لرسول الله ﷺ👌
وربنا قال إن ده اختبار كبير مش هينجح فيه غير المؤمنين،
"وَإِن كَانَتْ لَكَبِيرَةً إِلَّا عَلَى ال

#قصص_الأنبياء(٢)
#السيرة_النبوية
#الحلقة_السادسة_والستون
#حياة_رسول_الله_مع_الصحابة(١)
#قصة_قاتل_المائة_نفس

اتكلمنا الأجزاء الأخيرة إللي فاتت عن الغزوات والسرايا إللي رسول الله ﷺ عملها وشوفنا تصرفاته خارج المدينة أو بمعنى أوضح مواقفه مع غير المسلمين،
عايزين نعرف بقى حياة رسول الله ﷺ كانت عاملة إزاي مع الصحابة، هل كان طول اليوم بيخطط للغزوات، ولا كان بيقعد يخطب في الصحابة طول اليوم وحياته كلها جد ومفيش فيها أي مزاح مع أصحابه خالص ولا كانت حياته اليومية عاملة إزاي🤔
إن شاء الله خلال الجزء ده هنشوف جانب من حياة رسول الله ﷺ بعيد عن الغزوات والحرب،
طبعا مش هقدر أجيب كل المواقف والأحداث بالتفصيل،
لأنها كثيرة جدا😅
فكل كم حلقة كده إن شاء الله نتكلم عن حياة رسول الله ﷺ اليومية مع أصحابه بصفة عامة 😊

رسول الله ﷺ مع إنه رسول الله ومطلوب يَعظ الناس ويذكرهم الآخرة لكن مكنش طول اليوم بيقول لهم مواعظ،
الصحابة بيقولوا إن رسول الله ﷺ كان يتخولنا بالموعظة مخافة السآمة علينا، يعني كل كم يوم مثلا يقول لهم موعظة يذكرهم فيها بالله عشان نفوسهم لا تمل،
وعبد الله بن مسعود الصحابي إللي قتل أبو جهل كان بيقول اتكلموا وانصحوا الناس لما تلاقوهم مقبلين عليكم عايزين يسمعوا منكم، لكن لو لقيتوهم مش حابين أو كارهين بلاش تكلموهم،
فده كان منهج رسول الله ﷺ والصحابة في الموعظة، كل كم يوم موعظة، ومكنتش الموعظة نمط واحد،
يعني مش هو هو نفس الكلام بيكرره بنفس الطريقة،
لأ كان بينوع ﷺ ، مش بس بيقول كلام الصحابة بيسمعوه كان كمان بيستخدم حاسة البصر عشان يكون الكلام له تأثير أوقع في قلوبهم
◇مثال :
مرة رسول الله ﷺ كان قاعد مع الصحابة، فراح راسم لهم في الأرض خط طويل وحول الخط ده رسم خطوط صغيرة ¡ ¡ ¡ | ¡ ¡ ¡ وبعدين قال لهم : الخط الطويل ده هو صراط الله المستقيم،
والخطوط الصغيرة دي هي سُبل الشيطان إللي بيزينها للإنسان عشان يمشي فيها، وعلى كل طريق من الطرق دي في شيطان بيزين الطريق ده للناس،
فاللي هيمشي في طريق ربنا المستقيم هيوصل له، وإللي هيتبع سبل الشيطان المتزينة دي هيضل😶
طريق ربنا هو القرآن والسنة بفهم الصحابة والتابعين وتابعي التابعين، أي حد يقول أو يعمل عكس إللي هم عملوه يبقى هو كده دخل في سبيل من سُبل الشيطان👌
"وَأَنَّ هَٰذَا صِرَاطِي مُسْتَقِيمًا فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ"

ومرة تانية كان يخليهم يشغلوا خيالهم ويربط الخيال بأمور الدين ويقول لهم الموعظة على هيئة سؤال،
◇مثال :
سأل رسول الله ﷺ الصحابة في مرة، لو واحد عنده نهر عند باب بيته بيغتسل منه خمس مرات في اليوم هل هيبقى على جسمه أي وَسَخ؟
قالوا : لأ يا رسول الله😕
فقال لهم رسول الله ﷺ: والصلاة برده نفس الموضوع، ربنا بيمحو الخطايا بالصلاة،
وده عن طريق إن ربنا بيضع سيئات الإنسان على ظهره وهو بيصلي فكل ما ركع أو سجد تتساقط سيئاته.

ومرة ثالثة كان يعظهم بإنه يحكي لهم قصة من قصص الأمم السابقة زي قصة قاتل المائة نفس،
◇قال رسول الله ﷺ للصحابة :
كان في رجل في الأمم السابقة قتل تسعة وتسعين نفس،
وفي يوم من الأيام لقى نفسه عايز يتوب، فسأل الناس عن أعلم أهل الأرض،
فالناس دلّوه على راهب، والراهب ده هو الشخص المنقطع عن الناس لعبادة الله، فهم ظنوا إن مادام الرجل ده ظاهر عليه العبادة يبقى أكيد عنده علم،
☆وده يدل إن القصة حصلت بعد رفع عيسى عليه السلام، لأن الرهبانية لم توجد إلا بعد رفع عيسى، ربنا بيقول :
"وَرَهْبَانِيَّةً ابْتَدَعُوهَا"

فراح له وكلمه وقال له:
أنا قتلت تسعة وتسعين نفس، فهل لي من توبة😥
فالراهب العابد إللي ميعرفش يعني إيه معصية ناهيكم عن قتل نفس واحدة، فلما واحد يقول له أنا قتلت تسعة وتسعين نفس هيبقى مصدوم إزاي😅
زي مثلا لما بنت تكون عفيفة عمرها ما اتكلمت مع شاب وتيجي واحدة تقول لها أنا زنيت تسعة وتسعين مرة، تخيلوا صدمتها هتكون إزاي😮

فكانت صدمة الراهب شديدة فقال له بكل تلقائية :
لأ ملكش توبة، توبة إيه بعد ما قتلت تسعة وتسعين نفس😳
فالرجل اتغاظ واتضايق راح قاتل الراهب ومكمّل به المائة🙊

☆لو ركزتم في حياتكم هتلاقوا إن الموقف ده بيتكرر معانا كتييير من غير ما ناخد بالنا،
واحدة ولا واحد يبقى نفسه يتوب وفعلا ياخد خطوة على الطريق ويبدأ يدوّر على الطريق الصحيح عشان يتوب ،
فربنا يضع في طريقه ابتلاء عشان يختبر صدقه، فتحصل له مصيبة أو كارثة، يضع في طريقه واحد مُنفر معندوش علم زي الراهب ده كده يصده عن سبيل الله،
فلو هو صادق هتلاقيه مكمل طريقه بغض النظر عن الناس المنفرة دي أو المشاكل إللي بتحصل له،
لكن لو مكنش صادق في توبته هتلاقيه قعد يتحجج ويقول أنا أول ما قلت هبقى كويس، لقيت المصايب نازلة على دماغي، خلاص خليني في إللي أنا فيه،
أو يقول ده الناس كرهتني في الدين فبعدت عنه😤
والمسكين مش فاهم إن ده اختبار من ربنا له وهو كده سقط فيه😓
"أَحَسِبَ النَّاسُ أَنْ ي

#قصص_الأنبياء(٢)
#السيرة_النبوية
#الحلقة_السادسة_والسبعون
#هل_فعلا_انتصر_المشركون_في_غزوة_أحد

وقفنا المرة إللي فاتت عند أبو سفيان لما أخذ جيش المشركين بعد انتصارهم في غزوة أحد على المسلمين واتجهوا راجعين لمكة،
السؤال هنا، هل فعلا جيش المشركين انتصر على جيش المسلمين في معركة أحد🤔
تعالوا كده نشوف:
◇قريش لم تأخذ أسيرا واحدا من المسلمين في غزوة أحد،
في حين إن المسلمين أسروا في غزوة بدر من قريش سبعين أسير💁‍♀️
◇قريش لم تأخذ غنائم من المسلمين، في حين إن المسلمين أخذوا غنائم كثيرة من المشركين في غزوة بدر👌

◇قريش لم تدخل المدينة المنورة مع إنها كانت قريبة جدا منها ومكنش في المدينة جيش يحميها، وكمان لم تسيطر على مكان المعركة، ده حتى مقعدوش في مكان المعركة عشان يعلنوا للناس إنهم انتصروا😏
فاكرين لما في بدر قالوا إننا هنقعد في بدر لحد ما كل العرب يسمعوا بنا، أهه المفروض كانوا عملوا كده في المعركة دي على أساس انهم انتصروا🤷‍♀️
لكن دول ما صدقوا، أول ما المعركة خلصت وقتلوا بعض المسلمين راحوا ماشيين على طول🙄
في حين إن رسول الله ﷺ زي ما شفنا أكثر من مرة إنه لما كان بيخرج في غزوة كان بيقعد في مكانها بعد نهايتها ثلاثة أيام على الأقل عشان الخبر يوصل للناس ويعرفوا قوة المسلمين👌
◇المشركين لم يقتلوا قائد الجيش إللي هو رسول الله ﷺ ولا الوزيرين بتوعه، يعني دولة الإسلام زي ما هي🤓

فين بقى هزيمة المسلمين وانتصار المشركين عليهم🤔

غزوة أحد مكنتش هزيمة، لكن كانت زي ما سماها القرآن : قَرْح، يعني جراح شديدة، مقتل أكثر من سبعين رجل من المسلمين👌
"إِن يَمْسَسْكُمْ قَرْحٌ"

☆طيب هو مش مقتل المسلمين في سبيل الله ده حاجة كويسة، ليه بقى ربنا قال إنها جراح، وفي آية تانية سماها مصيبة 🤔
"أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا ۖ قُلْ هُوَ مِنْ عِندِ أَنفُسِكُمْ ۗ إِنَّ اللَّهَ عَلَىٰ كُلِّ شَيْءٍ قَدِيرٌ"
مقتل المسلمين في سبيل الله حاجة جميلة جدا وهي اصطفاء من الله عز وجل ونعمة زي ما قال:
"وَيَتَّخِذَ مِنكُمْ شُهَدَاءَ"
لكن المصيبة إنهم قُتلوا بسبب خطأ بعض المسلمين، إللي كان سببه حب الدنيا إللي دخل في قلوب بعضهم وهم الرماة وأدّى إنهم يخالفوا أمر رسول الله ﷺ،
لكن لو كانوا قُتلوا وهم بيعملوا إللي عليهم وبيحاربوا زي ما كانوا بيحاربوا في بدر وأخذوا بكل أسباب النصر ومع ذلك ماتوا شهداء فهنا مفيش مشكلة،
فالقرآن كان بيتكلم عن عن مصيبة حب الدنيا إللي دخلت في قلوب بعضهم وأدت لمقتل السبعين من المسلمين👌
وربنا قال:
"مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ ۚ"
عبد الله بن مسعود فاكرينه🤔
إللي طلع فوق صدر أبو جهل وقتله، لما نزلت آية :
"مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ ۚ"
قال : والله متخيلتش إن في حد فينا يريد الدنيا لحد ما نزلت هذه الآية 😓
كان مفكر إن الناس كلها زيه همها الآخرة،
ودي من الحكم العظيمة إللي استفادها المسلمون بعد مصيبة أحد، إنهم يعرفوا خطورة حب الدنيا 👌
احنا دلوقتي مع رسول الله ﷺ بقالنا حوالي سبعة عشرة سنة، ثلاثة عشر سنة في مكة وثلاثة في المدينة،
خلال السنين دي كلها كان رسول الله ﷺ بيحذر الصحابة من الدنيا،
وكان يقول لهم:
" إنَّ الدُّنْيا حُلْوَةٌ خضِرَةٌ، وإنَّ اللَّهَ مُسْتَخْلِفُكُمْ فِيهَا. فينْظُر كَيْفَ تَعْمَلُونَ. فَاتَّقوا الدُّنْيَا"
يعني الدنيا جميلة وحلوة وربنا هيجعلكم خلفاء فيها يعني هيمكّن لكم في الأرض ويشوف هتعملوا إيه بعد التمكين ده،
فخافوا من الدنيا وابعدوا عنها👌
وحتى القرآن نفسه قليل جدا لو عدى منه صفحة أو صفحتين ومنشفش فيه تحذير من الدنيا،
فلما تحصل مصيبة زي مصيبة أُحد كده والقرآن يتكلم عنها وكل ما يقرأوا القرآن يتذكروا إللي حصل في أحد،
تعتقدوا إنهم ممكن ينسوا في يوم من الأيام إن حب الدنيا كان سبب في مقتل أصحابهم وسبب في الآلام إللي حصلت لرسول الله ﷺ إللي كانوا بيحبوه أكثر من أي حاجة في حياتهم💁‍♀️
فكل ما كان الأمر شديد على النفس ومؤلم لها كان الدرس إللي الإنسان بيتعلمه منها أكبر وميتنساش أبدا👌
ولو نظرنا لحياتنا هنلاقي إن كل ما كانت المشاكل إللي بنمُر بيها شديدة على نفوسنا كل ما كان أثرها أكبر في حياتنا،
طبعا للي يفهم المعنى ويأخذ العبرة👌
لأن في ناس عايشين في كوارث ومش عارفين السبب وبيرموا اللوم على ربنا وخلاص، والمشكلة من عندهم أصلا🤓

بعد ما انتهت معركة أحد كان المسلمون إللي فروا من أرض المعركة في البداية بعد إشاعة مقتل رسول الله ﷺ وصلوا المدينة وأخبروا أهل المدينة باللي حصل لجيش المسلمين وإن رسول الله ﷺ قُتل،
فالنساء قعدت تبكي وتصرخ واتقلبت المدينة، مكنش لسه اتحرم الصراخ على الموتى ساعتها😅
فاطمة بنت رسول الله ﷺ لما وصل لها الخبر، خرجت مع مجموعة من النساء واتجهوا لموقع المعركة،
عشان يساعدوا المسلمين المصابين ويتأكدوا من الخب

#قصص_الأنبياء(٢)
#السيرة_النبوية
#الحلقة_السادسة_والثمانون
#أحداث_السنة_الرابعة_من_الهجرة
#غزوة_بني_النُّضَيْر

وقفنا المرة إللي فاتت عند رسول الله ﷺ لما أرسل رسالة لبني النُّضير وأمرهم إنهم يخرجوا من المدينة بسبب نقضهم العهد إللي بينهم وبين رسول الله ﷺ،
لكن قبل ما نعرف هل استجاب بني النُّضَيْر لأمر رسول الله ﷺ ولا لأ عايزة أكمل قصة عامر بن الطفيل إللي اتكلمنا عنه المرة إللي فاتت،
هو أنا كنت محتارة أكمل قصته دلوقتي ولا استنى لحد ما ييجي وقتها في عام الوُفُود،
بس على ما ييجي وقتها هتكونوا نسيتم مين هو عامر بن الطفيل أصلا فخليني أكملها لكم دلوقتي أحسن😅

عامر بن الطفيل قلنا عنه إنه كان من فجرة وفُسّاق العرب وكان من بني عامر القبيلة القوية إللي رسول الله ﷺ عرض عليهم الإسلام وهو في مكة قبل الهجرة خالص لو تفتكروا🤔
وزعيمهم ساعتها قال لرسول الله ﷺ إنهم هينصروه بس المُلك بعد كده يكون لهم ورسول الله ﷺ رفض كلامه وبعدين محصلش الاتفاق وقابل رسول الله ﷺ الأنصار بعدها زي ما حكينا،
فعامر بن الطفيل كان من القبيلة القوية دي،
ولعله والله أعلم سمع من الزعيم بتاعهم عن اللقاء إللي حصل بين قومه وبين رسول الله ﷺ فبقى عنده حقد على رسول الله ﷺ وعلى المسلمين وانتهز فرصة مَجِيء وفد المسلمين لأرض بني عامر عشان ينتقم منهم،
حقده ده استمر سنين مع انتصارات المسلمين وتوسع دولة الإسلام لحد ما جاء عام الوفود بعد فتح مكة سنة تسعة هجريا،
العام إللي القبائل كانت بترسل لرسول الله ﷺ وفد من عندها عشان تُعلن إسلامها أو يعملوا معاه عهد صلح أو يأتوا ليعرفوا عن الإسلام،
قومه قالوا له الناس أسلمت فأسلم انت كمان،
فقال لهم :
يعني أنا كنت ببذل جهد عشان العرب تتبعني، فأنا أبقى تابع لفتى من قريش😏
فهو لما لقى الوضع بقى بالمنظر ده قرر إنه يغتال رسول الله ﷺ👌
فكان له صاحبين على نفس درجة فِسقه وفجوره كده وكانوا شاركوا معاه في قتل السبعين صحابي في بئر معونة واحد اسمه أَرْبَد بن مَقِيس والثاني اسمه جُبَار بن سُلْمى وهو إللي قتل الصحابي حرام بن ملحان وأسلم بعدين واتكلمنا عنه المرة إللي فاتت،
قال عامر بن الطفيل لصاحبه أربد :
احنا نروح لمحمد زينا زي باقي الناس ، وأنا هشغله بالكلام فانت تيجي من وراه وتقتله بالسيف😈
فكان ده الاتفاق بينهم، راحوا المدينة عند رسول الله ﷺ وبدأ رسول الله ﷺ يعرض عليهم الإسلام وقال لعامر بن الطفيل: أسلم يا عامر!

☆مع إن عامر قتل سبعين من الصحابة غدرا بس رسول الله ﷺ عنده استعداد إنه يتغاضى عن كل شيء في مقابل إسلامه،
يعني هو همه إنقاذ الناس من النار أكثر من الانتقام منهم👌

فعامر بن الطفيل قال له: هسلم بشرط إني يكون لي الأمر من بعدك😤
يعني عايز إنه يكون الخليفة والحاكم للمسلمين بعد موت رسول الله ﷺ،
طبعا رسول الله ﷺ رفض كلامه، فقال له عامر بن الطفيل :
خَالِني يا محمد!
يعني تعال نتكلم أنا وانت لوحدنا من غير ما يكون حد معانا،
رسول الله ﷺ قال له:
لأ، حتى تؤمن بالله وحده لا شريك له🤚
يعني أنا مش هقعد معاك لوحدنا إلا لما تدخل في الإسلام الأول،
وعامر عمال يتحايل على رسول الله ﷺ ويشغله ويبص لصاحبه عشان يتحرك ويقتل رسول الله ﷺ زي ما كانوا متفقين وصاحبه واقف مبيتحركش🤨
كرر الموضوع كذا مرة ويبص لصحابه يعني يلا اخلص واقتله وصاحبه واقف،
فقال عامر بن الطفيل لرسول الله ﷺ وهو بيهدده:
والله لأَمْلأَنّها عليك خيلا ورجالا👌
يعني أنا هجيب لك جيش كبير جدا يقضي عليك،
وأخذ عامر بن الطفيل صاحبه أربد وخرجوا من عند رسول الله ﷺ،
فدعا عليه رسول الله ﷺ:
اللهم اكفني عامر بن الطفيل🤲

بعد ما خرجوا وبِعدوا عن رسول الله ﷺ عامر بن الطفيل مسك أربد وقعد يقول له:
معملتش إللي اتفقنا عليه ليه 😡
بقى أنا إللي كنت بعمل لك حساب لدرجة إني كنت بخاف على نفسي منك، والله ما هخاف منك بعد النهاردة😤
فقال له أَربد :
اصبر بس متستعجلش واعرف إللي حصل😑
أنا كنت كل ما أحاول أقتله بالسيف ألاقيك جيت وقفت بيني وبينه، كنت أضربك يعني بالسيف وأقتلك😒
فدي معجزة حفظ الله بها رسوله ﷺ من القتل👌

في طريق رجوع عامر وأربد لبلادهم ربنا سلط على عامر بن الطفيل الطاعون في رقبته،
الطاعون ده زي السرطان في عصرنا كده ربنا يعافينا ويعافي المسلمين،
واشتد به المرض فجاء الليل فاستضافته امرأة من بني سلول، فهانت عليه نفسه إزاي يموت زي ما البعير بيموت بالغدة في رقبته وكمان يموت في بيت امرأة من بني سلول،
وبني سلول كانوا من أذل وأجبن قبائل العرب،
يعني بالنسبة له الموتة دي موتة ذل وهو سيد من سادات العرب وكان يخافه العرب وكمان كان بيناظر كسرى ملك الفرس،وكان الناس بيهابوه ويخافوه،
فمتوقعش إنه يموت الموتة الذليلة دي، فكان يقول:
أغُدة كغدة البعير وفي بيت سلولية😑
فركب على فرسه عشان يوصل لقومه لكنه مات في الطريق على الكفر👌

شوفتم نهاية الكِبر والإعراض عن اتباع الحق وصلته لإيه😓
المفروض يعني إن صاحبه أربد يتعظ بقى ويرجع يستسمح رسول الله

#قصص_الأنبياء(٢)
#السيرة_النبوية
#الحلقة_السادسة_والتسعون
#أحداث_السنة_الخامسة_من_الهجرة
#مقتل_أبو_رفع_اليهودي

شوفنا في الأجزاء الأخيرة إللي حصل مع الأحزاب ومع بني قريظة، وقَتل حُيي بن أخطب إللي كان حزب الأحزاب ضد رسول الله ﷺ،
مينفعش رسول الله ﷺ يسيب القبائل إللي اشتركت في الهجوم على المدينة كده من غير ما يكون له رد فعل عشان القبائل تعرف إن انتهاك حرمات الأمة الإسلامية مش هيعدي بدون عقاب👌
فبدأ رسول الله ﷺ يبعت السرايا المختلفة لتأديب القبائل دي عشان يعرفهم قوة المسلمين،
وكانت حملات عسكرية مكثفة بمعدل حملة عسكرية كل عشرين يوم تقريبا😮

☆ممكن حد يسأل ويقول مش المفروض المسلمين يريحوا شوية بعد التعب إللي شافوه في الكم شهر إللي فاتوا
أو على الأقل ميقلّبُوش الناس عليهم😑

شوفوا يا جماعة، الأمة التي لا تجاهد تُصاب بالذل👌
وده كلام رسول الله ﷺ، فضعف وذل المسلمين مش بس هيؤدي للتهديد المستمر على دولة الإسلام من أعدائها،
ده هيؤدي لفقد الثقة في الدين الإسلامي نفسه،
الناس هتقول:
لو كان الدين ده حق كان أصحابه كافحوا ودافعوا عنه😒
لو الدين ده عظيم كان فرض نفسه على الآخرين وانتشر😤

بسبب الوضع الصعب للمسلمين وتفريط أكثرهم في الدين، غير المسلمين هينفروا من الإسلام لعدم ثقتهم في المسلمين،
وده إللي رسول الله ﷺ طبعا مش عايزه يحصل،
هو عايز تكون صورة الأمة الإسلامية مَهِيبة وسط الجزيرة العربية ولها مكانتها الخاصة👌
وده إللي الصحابة نفسهم كانوا فاهمينه ومنهم الأنصار:
الأَوْس والخَزْرج،
احنا عارفين إن كان في حروب كثيرة بين الأَوْس والخزرج قبل الإسلام، أما بعد الإسلام فهم استغلوا الحمَيّة إللي كانت بينهم دي لنصرة الله ورسوله،
فكانوا دايما بيتفاخروا في مجالسهم بمميزاتهم وبمين له ميزة أكثر من التاني،
فكان الأَوس يقولون :
منّا غِسّيل الملائكة حنظلة بن الراهب، ومنّا من اهتز له عرش الرحمن يوم مات، سعد بن معاذ،
ومنا إللي الدبابير حمت جسده وهو عاصم بن ثابت ومنا من شهادته بشهادة رجلين وهو خُزيْمة بن ثابت😎
《هقول لكم قصته بعد شوية》

فكان الخزرج يردون عليهم ويقولوا:
احنا بقى منا أربعة لم يجمع القرآن أحد غيرهم:
زيد بن ثابت، وأبو زيد وأُبَيّ بن كعب ومعاذ بن جبل💁‍♂️
فكان ده حالهم على طول 😅
فلما الأوس تقربت إلى الله ورسوله بقتل كعب بن الأشرف لو تفتكروا قصته في الجزء الخامس والستين،
إللي رسول الله ﷺ قال عنه : من لكعب بن الأشرف فإنه آذى الله ورسوله فتطوع مجموعة من الأوس وقتلوه،
هنا الخزرج قالوا :
هم الأوس مفكرين إنهم هيسبقونا بالفضل😡
فقعدوا يشوفوا مين ألَدّ أعداء النبي ﷺ 🤔
فملقوش غير أبو رافع سلاّم بن أبِي الحُقَيق التاجر الشهير فاحش الثراء،
إللي كان من زعماء بني النّضير ومن أثرياء اليهود، وكان من الذين حزبوا الأحزاب ضد رسول الله ﷺ مع حُيي بن أخطب إللي قُتل مع يهود بني قريظة،
أبو رافع بعد نهاية الأحزاب رجع لقلعته إللي كانت على أطراف الحجاز داخل حصون خيبر،
والصحابة عارفين إن أذيته للمسلمين وعدائه للإسلام مش هيقف وهيشوف أي فرصة ويستغلها عشان يحارب الإسلام مرة ثانية😑
فراحت مجموعة من الخزرج لرسول الله ﷺ واستأذنوه إنهم يقتلوا أبو رافع اليهودي،
فأذن لهم رسول الله ﷺ وجعل قائد السرية دي عبد الله بن عَتِيك ،ووصّاهم رسول الله ﷺ وقال:
" لا تقتلوا وَليدًا ولا امرأة "
ودي كانت أول سرية بعد غزوة الأحزاب،
خرج عبد الله بن عَتيك مع ثلاثة أو أربعة من الصحابة وتوجهوا لقلعة أبو رافع،
وصلوا للقلعة بعد غروب الشمس وكان في الوقت ده عمال القلعة راجعين بسَرْحهم، يعني كانوا بيسرحوا بالمواشي طول اليوم فرجعوا بالمواشي للقلعة بعد غروب الشمس،

في اللحظة دي عبد الله بن عتيك قال لأصحابه:
خليكم هنا متتحركوش، أنا هحاول أعمل اي خدعة وأدخل الحصن🤫

☆سبب ذهاب عبد الله بن عتيك بالذات ومش أي واحد تاني إنه كان له أم من الرضاع في خيبر وكان بيعرف يتكلم اليهودية،
فلو حصل وحد مسكه هيعرف يلاقي حجة ينجي بيها نفسه👌

ذهب عبد الله بن عتيك بالقرب من بوابة القلعة وتقنّع بثوبه، يعني غطى وشه ومبقاش باين غير عينه والدنيا خلاص كانت داخلة على الليل وجلس كأنه بيتبول بجانب البوابة،
فحارس البوابة لما شاف هيئته ظنه واحد من العمال إللي لسه جايين فقال له :
إنت ياللي هناك، لو كنت هتدخل فادخل دلوقتي عشان أنا عايز أقفل الباب😕
فراح عبد الله بن عَتِيك داخل للقلعة واستخبى في جنب،
فبعد ما حارس البوابة البوابة أغلق البوابة علّق المفاتيح على وَتد، خشبة كده بيتعلق عليها المفاتيح،
في الوقت ده كان عند أبو رافع جماعة سهرانين بياكلوا ويشربوا الخمر، ما هو زعيم الحصن بقى😅

بعد شوية لما الحركة هديت والضيوف إللي عند أبو رافع مشيوا ومبقاش في صوت مسموع، تسلّل عبد الله بن عَتيك وأخذ المفاتيح،
أغلق على البوّاب باب غرفته من الخارج، وأغلق كل الأبواب إللي كانت تقابله من الخارج،
عشان محدش يخرج من أي غرفة، أما الباب إللي كا

#قصص_الأنبياء
#الحلقة_السادسة
#قصة_نوح_عليه_السلام
#الجزء_الأول_الدعوة_إلى_الله

وقفنا المرة إللي فاتت عند موت إدريس عليه السلام وإنه كان بيدعو الناس لعبادة ربنا ويذكرهم دايما بالله وإنه أول من جاهد في سبيل الله،
بعد موت إدريس عليه السلام كل البشر كانوا على التوحيد، يعني كانوا عارفين إن ربنا هو الإله الخالق الرازق ملوش أي شريك وإن مفيش إله يعبدوه غيره وإن في جنة وفي نار👌

كان عندهم معاصي منتشرة بينهم وظهر الفساد وابتعدوا عن الشرع ...لكن مكنش في شرك بالله في الأرض نهائي،

في وسط المعاصي والفساد ده كان في بعض الصالحين،
وكان الناس بيحبوهم بس مش بيقلدوهم،
يعني زي بعض الناس إللي في زمانا دلوقتي يقولولك إحنا بنحب الدين والمشايخ والعلماء بس من بعيد من غير يعملوا زي ما بيقولوا لهم، من غير ما يطبقوا كلامهم يعني😅

المهم الصالحين دول كانوا بيأمروا الناس بالمعروف وينهوهم عن المنكر وكان ليهم أماكن معينة بيدعوا الناس فيها ،
زي تقريبا كده مجالس العلم عندنا،

فلما مات الصالحون الشيطان وسوس للناس إنهم يعملوا في الأماكن دي زي نُصُب تذكاري =خلينا نقول تماثيل =
ويسموا التماثيل بأسماء الصالحين دول،
قال يعني عشان كل ما يعدّوا من أمام التماثيل دي يفتكروا
الصالحين وأيامهم فيتشجعوا للعبادة كأنهم موجودين معاهم،

وفعلا صنعوا التماثيل دي....ومفيش واحد من الجيل ده عَبد التماثيل دي خالص... كلهم كانوا عارفين قصة هؤلاء الصالحين،
لما مات الجيل إللي كان عايش مع الصالحين وعارفين قصتهم؛ الشيطان وسوس للجيل إللي بعدهم إن آباؤهم كانوا بيعبدوا التماثيل دي وكان المطر بينزل بسبب عبادتهم للتماثيل، فعبدوا التماثيل دي فعلا😶
وهنا نلاحظ إن الشيطان نفسه طويييييل أوي👌
هو مكنش مستعجل أهم حاجة يحقق هدفه،
زرع بذرة في جيل وحصد الثمرة في الجيل إللي بعده،
عشان كده ربنا قالنا :
"لَا تَتَّبِعُوا خُطُوَاتِ الشَّيْطَانِ ۚ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنكَرِ"

لو اتبعنا خطوات الشيطان إللي هي ساعات ممكن تكون حاجات مُباحة أصلا هيوصل بينا الحال إننا نقع في الغلط😞
يعني مثلا بنت تتساهل في الاختلاط مع الرجال،
وشوية شوية تبدأ تكلمهم خاص،
وشوية شوية تبدأ تتلكك عشان تبعتله أي سؤال، وشوية شوية تبدأ تشتكيله أحزانها وتستشيره في حياتها...... لحد ما نوصل لآخر مشهد إللي كلكم أكيد حافظينه خلاص من كتر ما هو متكرر في واقعنا للأسف،
ساعتها هي بتستعيد شريط القصة من أوله بتلاقي إن أول خطوة كانت السبب الأول في النتيجة دي،
ولو كانت من البداية عاملة حدود ومنتبهة لموضع خطواتها خطوة خطوة ورا الشيطان، مكنش التساهل المتدرج ده حصل👌
والشيطان ما جالهاش في أول خطوة دي قال لها مباشرة "صاحبي فلان".. لا ده أخذها عالهادي خالص بالتدريج.

مثال كمان:
شاب بيقعد مع شباب بيشربوا سجاير، وبيقول مش هشرب.. مرة عالتانية طب هجرب عشان أخد فكرة بس..... لحد المشهد الأخير إللي كلكم برده عارفينه وإللي في أحيان كتير بيوصل لإدمان المخدرات كمان.
والشيطان في أول خطوة دي ما جالوش قاله اشرب مخدرات.. لأ اخده برده عالهادي خالص بالتدريج
وقيسوا على كده...
افتكروا كده موقف كنا مفكرين إن بدايته عادية وفي الآخر وقعنا في الغلط واحنا عمرنا ما تخيلنا أبدا إن الحال يوصل بينا لكده...فخدوا بالكم من خطوات الشيطان اقطعوا الطريق عليه من الأول👌

المهم نرجع لقصتنا😁
الناس عبدوا الأصنام وكان أول مرة تُعبد الأصنام على وجه الأرض، فربنا بعث أول نبي مُرسل وهو نوح عليه السلام،
وكان بين بعثته وبين موت آدم عشرة قرون يعني ألف سنة،
قال رجل : يا رسول الله: أَنبيٌّ كان آدم؟
قال: نعم مُكَلّم.
قال: فكم كان بينه وبين نوح؟
قال: عشرة قرون.

وربنا بعث نوح لقومه يعني هو رسول لقومه هو بس،
وكانت رسالته واضحة:
يا جماعة اعبدوا ربنا إللي خلقنا كلنا ومفيش إله غيره..اعملوا إللي يرضيه وابعدوا عن إللي يغضبه 👌
" لَقَدْ أَرْسَلْنَا نُوحًا إِلَى قَوْمِهِ فَقَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
ولو تركتم عبادة التماثيل دي واستغفرتم... ربنا هيغفرلكم إللي فات،
"أَنِ اعْبُدُوا اللَّهَ وَاتَّقُوهُ وَأَطِيعُونِ * يَغْفِرْ لَكُمْ مِنْ ذُنُوبِكُمْ"

ويرضى عنكم ويبارك لكم في ذريتكم ويرزقكم الأموال وينزل عليكم الأمطار وهتعيشوا في سعادة وفي الآخر هتدخلوا الجنة:
"فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُمْ مِدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا"

الكلام واضح ومنطقي أهه مفيش فيه أي مشكلة💁‍♂️

كان إيه بقى رد فعل قومه، وخصوصا الناس الأكابر أصحاب الأموال والنفوذ في البلد😬

قالوا إيه الضلال إللي إنت فيه ده😒
بقى كلنا غلط وانت إللي صح 🙄
"قَالَ الْمَلَأُ مِنْ قَوْمِهِ إِنَّا لَنَرَاكَ فِي ضَلَالٍ مُبِ

#قصص_الأنبياء
#الحلقة_السادسة_عشرة
#قصة_إبراهيم(٦)
#قصة_الكعبة_على_مر_الزمن

بعد ما جاءت البشرى لإبراهيم عليه السلام بولادة ابنه إسحاق، عدت فترة من الزمن وبعدين ربنا أمر إبراهيم عليه السلام بأمر جديد،
ذهب إبراهيم عليه السلام عشان يزور إسماعيل عليه السلام فلما راح له مكة لقاه كان قاعد عند شجرة في محيط البيت الحرام، وكان قاعد بيبري نَبْل...
عارفينه🤔
زي خشبة كده عمال بيبريها بسكين زي ما بنبري القلم الرصاص كده.
فلما شافه إسماعيل عليه السلام قام له..
وإنتم عارفين لما الأب ولاّ الإبن بيشوفوا بعض بعد زمن بيعملوا إيه، وخصوصا لو كانت علاقتهم زي علاقة إبراهيم وإسماعيل عليهما السلام😊

بعد ما سلموا على بعض، إبراهيم عليه السلام قال لإسماعيل إن ربنا أمره بأمر معين، فإسماعيل عليه السلام قال له: طبعا نفذ إللي ربنا يؤمرك بيه يا أبي،
يعني كأنه بيقول له لو في ذبح تاني أنا معنديش مانع خالص عليه السلام😅
فإبراهيم عليه السلام قاله طيب هتساعدني؟
قاله طبعا أساعدك💪🏻
فقاله ربنا أمرني إني أبني في المكان ده بيت 👈 وشاور على منطقة مرتفعة عن الأرض مغطياها الرمال،
وكان ربنا هو إللي عرف إبراهيم المكان إللي هيبني فيه بالضبط، يُقال عن طريق ريح ربنا أرسلها فكنست المكان المقصود من الرمل ،ويُقال عن طريق سحابة وقفت في مكان البيت وظللت مساحة معينة كانت هي دي المساحة بتاعة الكعبة،
"وَإِذْ ((بَوَّأْنَا)) لِإِبْرَاهِيمَ ((مَكَانَ)) الْبَيْتِ أَنْ لَا تُشْرِكْ بِي شَيْئًا وَطَهِّرْ بَيْتِيَ لِلطَّائِفِينَ وَالْقَائِمِينَ وَالرُّكَّعِ السُّجُودِ"
وفوق الكعبة بالظبط البيت المعمور، وهو كعبة أهل السماء وموجود في السماء السابعة ، يدخله كل يوم سبعون ألف ملك يطوفون حوله لا يرجعون للطواف مرة تانية إلى يوم القيامة👌
بدأ إبراهيم عليه السلام يبني البيت،
فكان إسماعيل عليه السلام يأتي بالحجارة وإبراهيم عليه السلام هو إللي يبني،
فقال إبراهيم عليه السلام لإسماعيل هات لي حجر أحطه في زاوية بحيث يكون علامة للناس يبدأوا من عنده الطواف،
فجاء إليه جبريل عليه السلام بالحجر الأسود، وهو حجر من الجنة، وكان أول ما نزل الأرض..
و كان أشد بياضا من الثلج، ثم سوّدته خطايا بني آدم

☆يعني سودته خطايا بني آدم وطاعات الموحدين لم تبيضه؟🤔
أيوة، لأن العادة إن الأسود هو إللي بيصبغ الأبيض وليس العكس، ولإن الذنوب عددها كبير جدا للأسف أكبر بكتير من الطاعات،
"وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ" "ويعرفون نعمة الله ثم ينكرونها وأكثرهم الكافرون"
"ولكن أكثرهم للحق كارهون"
"وأكثرهم فاسقون"👌
وكمان فيه عبرة ...يعني الخطايا أثرت في الحجر الجامد الصلب فما بالنا بتأثير الذنوب في القلوب😞

استمر بناء الكعبة لحد ما ارتفع البنيان وبعدين إسماعيل جاب حجر عشان يقف عليه إبراهيم عليه السلام عشان يكمل البناء،
وهم بيبنوا كانوا بيدعوا ربنا وبيقولوا :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ "
☆وده يعلمنا إننا لما نعمل أي طاعة لله ندعي ربنا وإحنا بنعملها إنه يتقبلها مننا😊

وكانت الكعبة هي أول بيت لله في الأرض.
استمر بناء الكعبة لحد ما ارتفع البنيان وبعدين إسماعيل جاب حجر عشان يقف عليه إبراهيم عليه السلام عشان يكمل البناء، وهم بيبنوا كانوا بيدعوا ربنا وبيقولوا :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ "

☆وده يعلمنا إننا لما نعمل أي طاعة لله ندعي ربنا وإحنا بنعملها إنه يتقبلها منها😊

وكانت الكعبة هي أول بيت لله في الأرض وبعد بنائها بأربعين سنة تم بناء المسجد الأقصى على يد يعقوب عليه السلام،
"إِنَّ أَوَّلَ بَيْتٍ وُضِعَ لِلنَّاسِ لَلَّذِي بِبَكَّةَ مُبَارَكًا وَهُدًى لِلْعَالَمِينَ "

في خلاف بين العلماء على مين إللي بنى البيت الحرام 🤔
في علماء قالوا إنهم الملائكة ...
وفي فريق قال إن إللي بناها إبراهيم وإسماعيل ومعاهم أدلتهم،
وفريق ثالث قال لأ ...ده القواعد -الأساس يعني- بتاع البيت الحرام موجود من أيام آدم عليه السلام، وإبراهيم وإسماعيل حفروا لحد ما وصلوا للقواعد وبنوا عليها وبردو معاهم أدلتهم،
أنا شخصيا مقتنعة بالرأي التالت الأخير ده، لإن إبراهيم عليه السلام قال:
"رَّبَّنَا إِنِّي أَسْكَنتُ مِن ذُرِّيَّتِي بِوَادٍ غَيْرِ ذِي زَرْعٍ عِندَ بَيْتِكَ الْمُحَرَّمِ"
والبيت مكنش لسه اتبنى🤷‍♂️
وكمان ربنا قال :
"وَإِذْ يَرْفَعُ إِبْرَاهِيمُ الْقَوَاعِدَ مِنَ الْبَيْتِ وَإِسْمَاعِيلُ"
يعني القواعد كانت موجودة من الأول وإبراهيم وإسماعيل عليهما السلام كملوا البناء عليها،

☆في التعليقات هتلاقوا الرابط بتاع الأقوال والأدلة بتاعتهم لو حد عايز يعرف أكتر👇

¤في هنا سؤال منطقي

#قصص_الأنبياء
#الحلقة_السادسة_والعشرون
#قصة_موسى_الجزء_الأول
#المولد_والنشأة

قصتنا النهاردة عن نبي من أُولِي العَزْم من الرسل،
وأُولي العزم معناها:
الأنبياء إللي تعرضوا لأذى شديد من قومهم واتعرضوا لابتلاءات كثيرة في حياتهم، ثم واجهوا الأذى والبلاء ده بالصبر،
وأولي العزم من الرسل هم أفضل الأنبياء والمرسلين على الإطلاق، وهم خمسة : نوح وإبراهيم وموسى وعيسى ومحمد صلى الله عليه أجمعين.
واحنا اتكلمنا عن نوح وإبراهيم عليهما السلام، و النهاردة هنتكلم عن موسى عليه السلام 😁
اسمه موسى بن عمران من ذرية يعقوب عليه السلام،
هو أكثر نبي مذكور في القرآن لأن قصته مع بني إسرائيل مليانة عِبر، ولأن أحداث أُمِّته متشابهة كتير مع أحداث أمة محمد ﷺ،
وموسى عليه السلام له علينا فضل كبير جدا احنا المسلمين ،
لأن في رحلة المعراج لما ربنا فرض على رسول الله ﷺ الصلاة وكانت خمسين،
قابل رسول الله ﷺ موسى في السماء السادسة، وسأله موسى عن إللي ربنا فرضه عليه ،
فقال له رسول الله ﷺ إن ربنا فرض عليه خمسين صلاة،
فموسى عليه السلام قال له أُمّتك مش هتستحمل،
فاطلب من ربك التخفيف، فالنبي ﷺ استغرب، وبص لجبريل باستغراب وسأل:
هو أنا ينفع أرجع لربنا وأسأله التخفيف؟ فجبريل عليه السلام قال له: نعم،
ففعلا بسبب كلام موسى عليه السلام، استمر رسول الله ﷺ يسأل ربنا التخفيف لحد ما وصلت لخمس صلوات بدل خمسين،
وطبعا انتم عارفين إن كتير من الناس بتصلي الخمس صلوات بالعافية فما بالنا لو كانت خمسين😶
طبعا كله بتقدير من ربنا ومكتوب في اللوح المحفوظ، لكن موسى عليه السلام كان سبب بس،
وربنا هو إللي جعله سبب في ده، وهتلاقوا في السيرة شرح الموضوع بالتفصيل😊

نرجع بقى بالزمن شوية كده😁
اتكلمنا قبل كده عن قصة يوسف عليه السلام وإنه قال لإخواته إنهم يجيبوله كل أهلهم من البَادية في فلسطين عشان يسكنوا مصر،
وفعلا يعقوب عليه السلام جه هو وأبنائه ال11 وأم يوسف، وسكنوا كلهم مصر،
وكان الناس بيكرّموهم ويعاملوهم بإحسان إكراما ليوسف عليه السلام.
وكان الملك إللي بيحكم مصر في عهد يوسف عليه السلام من الهكسوس، وكان الهكسوس محتلين مصر ساعتها،
فلما قام أحمس الأول بثورة وخرّج الهكسوس من مصر وبدأ عصر الفراعنة،
بدأ الفراعنة يستعبدوا بني إسرائيل على أساس إنهم كانوا مُوالين ومتعاونين مع الهكسوس، وقعدوا في الظلم والقهر والاستعباد ده حوالي ٣٠٠ سنة،
وقلنا قبل كده إن إسرائيل هو يعقوب عليه السلام، وإن كلمة إيل في اللغة السريانية معناها الله، وكلمة إسرا معناها عبد فتكون إسرائيل بمعنى عبد الله،
وبني إسرائيل هم ذرية يعقوب عليه السلام 😊
فكان الفراعنة إللي بيحكموا مصر مخليين بني إسرائيل عبيد وبيخلوهم يشتغلوا في المِهن الحقيرة الوضيعة عندهم، يعني كانوا عايشين في منتهى الذل والهوان والقهر😶
في يوم من الأيام واحد من الفراعنة شاف رؤيا ويُقال إن الفرعون ده رمسيس الثاني والله أعلم،
شاف إن في نار بتخرج من بيت المقدس وتنتشر في مصر ، وبتُصيب كل بيوت أهل مصر،
ماعدا بيوت بني إسرائيل مش بتيجي ناحيتهم،
فقام من النوم خايف😳
وجمع السحرة والكهنة والوزراء وبدأ يسألهم فقالوا له ده معناه إن في طفل هيتولد من بني إسرائيل وهيكون زوال ملكك على إيده👌
فطبعا خاف وأمر إن أي طفل يتولد لبني إسرائيل يُقتل على طول😤
الفرعون ده كان أشد الفراعنة قوة وبطش وظلم ...كان مفتري يعني😑
"إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا"
والفراعنة بصفة عامة كانوا بيقولوا إن دمهم فيه دم إلهي، يعني نَسَبْهُم مُتصل بالإله،
الفرعون ده بقى عَدَّاهُم كلهم...قال إنه هو ذات نفسه إله ورب😶
فاكرين لما قلنا قبل كده إن معظم الناس كانوا مؤمنين بتوحيد الربوبية يعني إن الكون ده له رب هو الخالق والرازق والمدبر والمالك، بس همّ بيشركوا معاه آلهة تانية في العبادة والقصد والتعظيم🤔
أهه الفرعون ده بقى مش بس بيزعم إنه إله متفرد بتوحيد الألوهية وتعظيم الناس له، لأ ده كمان بيزعم إنه متفرد بتوحيد الربوبية،
"أَنَا رَبّكُمْ الْأَعْلَى "
بيقول إن هو الرب، يعني هو الخالق والرازق والمدبر ومالك الملك...حاجة كده آخر جنون يعني 😅

المهم،
بدأ جنود فرعون يمشوا في الشوارع وأول ما يلاقوا طفل ذَكَر مولود ياخدوه كده ويدبحوه أو يقتلوه، ويبحثوا عن غيره😶
طبعا حاجة بشعة...احنا لما بنشوف طفل ميت عادي قلبنا بيتقطع عليه، ولّا لو أم ابنها مات بعد ما تولده بتبقى روحها هتطلع😞
دول بقى كانوا بياخدوا الطفل الرضيع إللي لسه مولود ويذبحوه قصاد أمه وأبوه وأهله ويسيبوه ويمشوا،
وأهله مش قادرين يعملوا لهم حاجة.

☆وطبعا المذابح إللي حصلت للأطفال بسوريا مش بعيد عننا، أكيد شفتم الأطفال الصغيرين ومنظرهم وهم مدبوحين😔
فده كان بلاء واقع على بني إسرائيل...ذبح وقتل في الأطفال، وياخدوا الرجال يشتغلوهم بالسُّخْرة والعبودية..وياخدوا النساء يشتغلوا في قصور الأغنياء...حياة كلها ذل وقهر.
"يَسْتَضْعِفُ طَائِفَة

#قصص_الأنبياء
#الحلقة_السادسة_والثلاثون
#حزقيل_إلياس_اليسع

وقفنا المرة إللي فاتت عند موت يوشع عليه السلام، بعد ما عاش في بيت المقدس فترة من الزمن مع بني إسرائيل يحكم فيهم بالتوراة،
بنو إسرائيل من كثرة فسادهم وعصيانهم لله، كان ربنا بيبعث فيهم الأنبياء ..واحد ورا الثاني ورا الثالث؛ عشان يستقيموا على الدين وميبعدوش عنه،
فبعد موت يوشع عليه السلام، انتقلت النبوة لنبي من بني إسرائيل اسمه《كَالِب بن يُوفَنا》...احنا منعرفش عنه حاجة تقريبا، لكن كباقي الأنبياء استمر يحكم في بني إسرائيل بحكم الله وشريعته لحد ما مات،
وجه بعده نبي تاني اسمه حِزقِيل بن بُوذَى --ويقال إنها بُوذِي-- وبرده معندناش عنه أخبار كثيرة،
لكنه كان نبي من أنبياء بني إسرائيل ، نعرف عنه قصة واحدة فقط، هي في قوله تعالى:
"أَلَمْ تَرَ إِلَى الَّذِينَ خَرَجُوا مِن دِيَارِهِمْ وَهُمْ أُلُوفٌ حَذَرَ الْمَوْتِ فَقَالَ لَهُمُ اللَّهُ مُوتُوا ثُمَّ أَحْيَاهُمْ "
إللي هي قصتنا النهاردة..
بعد يوشع عليه السلام انقسمت النبوة والملك، يعني قبل كده كان النبي هو الملك أو الحاكم إللي بيحكم بني إسرائيل،
لكن بعد موت يوشع عليه السلام بقى في مَلِك أو حاكم يحكم بني إسرائيل، وفيه نبي تأتيه النبوة والرسالة والشريعة من ربنا،
فكان فيه ملك معين من حُكام بني إسرائيل، أمرهم إنهم يقاتلوا عدو ليهم، منعرفش مين هو العدو ده🤔
لكن بني إسرائيل خافوا من القتال والموت بما إنهم طول عمرهم أحرص الناس على حياة،
فاتحججوا و قالوا للحاكم بتاعهم إن القرية إللي انت عايز تودينا ليها دي فيها طاعون فمش هندخلها😤
فربنا أنزل عليهم الطاعون في مكانهم ، فبدأوا يهربوا من قريتهم عشان ميموتوش،
فالحاكم دعا ربنا إنه يُوريهم آية إنهم مهما هربوا فمحدش فيهم هيقدر يهرب من الموت لو كان خلاص جاء أجله،
فربنا استجاب لطلب الحاكم وقال لبني إسرائيل موتوا.. فماتوا قبل آجالهم النهائية المكتوبة..
يعني لو مثلا كان المفروض إنهم يموتوا وهمّ عندهم ١٠٠ سنة، ربنا أماتهم بدري وهمّ عندهم ٦٠، يعني لسه فاضل لهم ٤٠ سنة، وبقول ده كمثال لتقريب المعنى 😅
فقعدوا ميتين بالمنظر ده 8 أيام، لحد ما بطونهم اتنفخت، وريحتهم بدأت تطلع...
فحاول باقي القرية إنهم يدفنوهم معرفوش لإنهم كانوا بالآلاف..! فسابوهم..
فمرّ عليهم نبي الله حِزقِيل فتعجب من منظرهم، فربنا قال له : أُرِيك آية؟
قال حزقيل: نعم، فأحياهم ربنا كلهم من تاني، ورجعوا لقومهم وعاشوا معاهم لحد ما استكملوا آجالهم المكتوبة.

☆طبعا القصة دي من كلام المفسرين، لأن القرآن والسنة متعرضوش للتفصيل ده،
واحنا عارفين إن القرآن مش كتاب تاريخ عشان يحكي لنا القصة بالتفصيل، لكن ربنا بيقول لنا القصة من الزاوية إللي فيها العبرة المُستفادة منها👌
والرسالة أو العبرة إللي ربنا بيعلمهالنا من القصة دي هي إننا نتوكل عليه عز وجل، ومنحاولش نهرب من مُسببات الموت بترك الأمور الواجبة إللي ربنا أمرنا بيها وإللي ممكن لو عملناها نتعرض للموت،
يعني مينفعش نقوم سايبين طاعة ربنا عشان خايفين من الموت، فربنا بيعلمنا إن ده حرام وغلط كبير وسوء تفكير وضعف إيمان👌
يعني همّ عصوا أمر ربنا بالجهاد عشان خايفين من الموت
والهلاك إللي هو أصلا بيد الله،
ونسيوا إن لو ربنا شاء هياخد أرواحهم حالا حتى لو كانوا بس قاعدين على سرايرهم بدون أي قتال أو مرض أو سبب ظاهر للموت،
فربنا بيعلمنا بقصتهم إن محدش يملك لك ضر ولا نفع إلا إذا ربنا أَذن👌
لكن مش معنى كده إن الإنسان لا يحتاط ويقوم رايح يرمي نفسه في المهالك🤓
لأ طبعا.. ناخد بالأسباب إللي ندفع بيها سبب الهلاك أو الموت عشان ربنا أمرنا بده لإن حفظ النفس من الضرورات الخمس في مقاصد الشريعة،
لاااااكن من غير ما يتسبب أخدنا للأسباب في معصيتنا لله وتركنا لطاعة من طاعاته عز وجل 👌
لأن حفظ الدين مُقَدَّم على باقي الضرورات الخمس👌

☆الضرورات الخمس كلها هي:
حفظ الدين، ثم حفظ النفس، ثم حفظ العِرض/النسل، ثم حفظ العقل، ثم حفظ المال.
فلو تعارض حفظ الدين مع حفظ النفس يتم تقديم حفظ الدين مباشرةً؛ لإن هو ده إللي عشانه اتخلقنا وبالتالي في سبيله يهون كل شيء وربنا قال:
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ ".
فلما يحصل موقف يكون الإختيار فيه بين مصلحة نفسي واتباع ديني...يبقى لازم اتبع ديني ولو على حساب مصلحتي، وربنا قادر إنه يعوضني بعدين لأن هو بإيده الملك كله والرزق كله👌
وهو ده المغزى من إن ربنا يقول لنا قصة الناس إللي عصوا أمر الله بالجهاد عشان يحافظوا على حياتهم من الموت😊

بعد موت حِزقيل عليه السلام، انتشر الفساد وانحرف الناس عن أوامر ربنا ، لدرجة إنهم عبدوا الأصنام😶
فربنا أرسل لهم نبي تاني اسمه إِلياس بن ياسين، من نسل هارون عليه السلام،
"وَإِنَّ إِلْيَاسَ لَمِنَ الْمُرْسَلِينَ.."
ويُعرف في كتب الإسرائيلين باسم إيلِيا...لكن عندنا في القرآن إلياس،
وكان الأنبياء في بني إسرائيل من بعد موسى عليه السلام بيج

#قصص_الأنبياء
#الحلقة_السادسة_والأربعون
#يأجوج_ومأجوج

وقفنا المرة إللي فاتت عند الناس إللي مكنوش عارفين ولا لغة غير لغتهم ولكن صمموا إنهم يوصلوا رسالتهم لذي القرنين،
كانت إيه رسالتهم بقى 😁
قالوا:
يا ذا القرنين إن يأجوج ومأجوج قوم مفسدون في الأرض ...بيقتلوا ويظلموا ويخرّبوا كل حاجة يشوفوها😑
فاحنا عايزين منك خدمة، وهي إنك تجعل بينا وبينهم سد عشان ميخرجوش علينا ويفسدوا علينا معيشتنا...ومتخفش إحنا هنديك أجر كبير مقابل مساعدتك لنا😅
"قَالُوا يَا ذَا الْقَرْنَيْنِ إِنَّ يَأْجُوجَ وَمَأْجُوجَ مُفْسِدُونَ فِي الْأَرْضِ فَهَلْ نَجْعَلُ لَكَ خَرْجًا عَلَى أَنْ تَجْعَلَ بَيْنَنَا وَبَيْنَهُمْ سَدًّا "

☆السؤال هنا ..إيه إللي خلى الناس دي تطلب من ذي القرنين طلب زي ده أول ما قابلوه وهم ميعرفهوش...مش ممكن يكون ملك ظالم جاي يقتلهم وخصوصا إنه داخل عليهم بجيشه الجرار ومعاه معداته وآلاته🤔

السبب في كده هو نفس السبب إللي خلّى أصحاب يوسف عليه السلام في السجن يحكوا له عن رؤيتهم...
سّمْت الصلاح الظاهر عليه هو السبب👌
ماهو الناس الصالحين بيبان عليهم.. بيبان على شكلهم وعلى تصرفاتهم😊
مش ساعات تشوف واحد ولّا واحدة تحس إنه صالح وإنه شخص قريب من ربنا؟
مع إن دي حاجة قلبية غيبية منعرفهاش ولا يعلمها يقينا إلا الله، بس شكله بيقول كده سبحان الله... تصرفاته وكلامه بيقولوا كده👌
عارفين في حديث لرسول الله ﷺ بيقول:
"أَلا أُخْبِركم بِخيَارِكم ؟ الصحابة قالوا : بلى يا رسول الله.
قال: الذين إذا رُؤُوا ذُكرَ الله"

◇هل لما النساء بيشوفوا لبسك كمسلمة، بيذكروا الله ويتمنوا يلبسوا زيك؟... ولّا بيسألوكِ عن لبسك وشياكته وألوانه وجبتيه منين وبكام عشان يقلدوكِ؟
◇هل لما الناس بيشوفوا تصرفاتكم ويسمعوا كلامكم، بيذكروا ربنا وبيتمنوا إنهم يكونوا في أخلاقكم ودينكم؟
◇هل لما بيدخلوا على صفحاتكم الشخصية في الفيسبوك مثلا أو يقرأوا كتاب من تأليفكم، بيذكروا ربنا وبيبدأوا يسألوا في الدين وإزاي نقرب من ربنا،
ولّا بيذكروا المسلسل الفلاني ولا الفيلم العلاني ويسألوكم عن قصة شعركم دي بتاعة أنهي فنان أو أنهي لاعب كورة؟
أهو ده السّمت إللي بنتكلم عليه...
إن ظاهرك إللي يدل على تقوى وحياء وحسن خلق يخلي الناس يفتكروا ربنا👌

¤ملحوظة بقى قبل ما كلامي يتفهم غلط😶
كلامنا هنا عن الغالب الأعم، لكن طبعا دي مش قاعدة إن كل حد ظاهره الصلاح بيكون صالح بالفعل..
فيه ناس بتعرف تتلون وتستعمل وسائل للنصب على الناس باسم الدين..
وفيه نساء لابسة إسود في إسود ولا يفقهوا في الدين شيء مثلا...
في بنات مش محجبة ومتعمقين جدا في الدين ويمكن يكونوا حافظين للقرآن..
وممكن المنتقبة إسود في إسود دي ربنا يختم لها بخاتمة سيئة، وحصلت بالفعل وكانت داعية كمان للأسف ربنا يرحمها😞
وفي بنت أو شاب ممكن يكونوا ضايعين خالص وفي آخر لحظة في حياتهم ربنا يختم لهم بخاتمة حسنة..
أيوة برده بيحصل👌
لكن مش ده إللي بتكلم فيه نهائي😅
دي حالات شاذة ما اقدرش أحطها عشان أطلع منها قاعدة عامة أقيسها على البشر كلهم😊
لإننا بكل بساطة: مالناش غير الظاهر.. أحكم على الظاهر الواضح، لحد ما يتبين لي من سريرة الشخص ده إللي لسه مش واضحة، عكس الظاهر الواضح بتاعه ده👌
ومش أنا إللي بقول كده ده رسول الله ﷺ إللي بيقول😁
قال رسول الله ﷺ :
"لا تُصاحب إلا مؤمنا ولا يأكل طعامك إلا تقي"
إزاي هعرف إن اللي قصادي ده مؤمن ولّا تقي ودي حاجة قلبية لا يعلمها إلا الله🤔
بكلامه وتصرفاته، يعني من الظاهر 💁‍♂️
ثم ده الغالب زي ما بنقول لإن رسول الله ﷺ قال :
"ألا إن في الجسد مُضغة إذا صَلُحَت صَلُح الجسد كله وإذا فسدت فسد الجسد كله ألا وهي القلب"،
ويوم القيامة العبرة بالقلوب :
" يَوْمَ لَا يَنْفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ "
فلو القلب في الدنيا سليم، الطبيعي إنه يظهر أثر سلامته دي من الأمراض والشرك على الجوارح، وهيبان في الشكل والتصرفات👌

☆ممكن واحدة تقول طيب ماهو ناس بيكون ظاهرها كويس ولما تعاشريها يتبين لك إنها مثلا نقاب على الفاضي ولا لحية على الفاضي أو مظهر متدين عالفاضي وبيعملوا الغلط🙄

طيب إيه رأيكم بقى إن ده مش ذنبهم😊
المشكلة مش في الملتحي ولا في المنتقبة ولا أي حد عليه مظهر من مظاهر الإلتزام... المشكلة فينا إحنا😑
احنا متصورين إن الناس دي ملايكة بقى ومبيغلطوش،
فلما يعمل حاجة نقول أاااه شوف الملتحي😡
شوف المنتقبة😠
احنا اللي ربطنا اللحية والنقاب بالإلتزام 《الملائكي》 ودي مجرد شريعة زي باقي شرائع الإسلام🤷‍♂️
واحد ولّا واحدة فيهم كل العِبر بس قدروا ينفذوا حاجة في الدين هياخدوا عليها حسنات فاحنا نقول:
لأ احلق لحيتك،
وانتِ اقلعي نقابك وخمارك.. يعني زوّدوا كمان معصية لمعاصيكم أو قللوا الحسنات بتاعتكم😶
الحسابات عند ربنا غير حسابتنا خاالص😅
لو الإنسان عمل حسنة وزنها زي وزن حبة الخردل ربنا هيجازيه عليها👌
"إِنَّهَا إِن تَكُ

#قصص_الأنبياء
#الحلقة_السادسة_والخمسون
#مريم_زكريا_الجزء_السادس
#عيسى_الجزء_الثاني

اتكلمنا المرة إللي فاتت عن مريم عليها السلام لما وضعت عيسى عليه السلام وراحت بيه لقومها وشوفنا إزاي اتهموها في عرضها،
وهي كانت صايمة عن الكلام وأشارت لعيسى عليه السلام وهي ماتعرفش إيه إللي هيحصل،
والكل مستني ومستغرب، وفجأة لقوا صوت طالع من بين إيديها وبيكلمهم، عيسى بن مريم عليه السلام نطق 🙊
أنطقه الله وهو لسه رضيع مكملش كام يوم في اللفة 😮
ربنا أنطق الطفل الرضيع في المهد عشان يدافع عن أمه،
هي تعرفت لله في الرخاء وكان عابدة وكان عندها رصيد،
فلما جاء الاختبار والابتلاء ربنا أكرمها بمعجزة👌
وشوفوا بقى أول حاجة قالها الطفل الرضيع كانت إيه:
"قَالَ إِنِّي عَبْدُ اللَّهِ "👌
يعني أنا مش إله ولا ابن إله ولا أي حاجة من دي خالص، أنا مجرد عبد لله،
"إِنِّي عَبْدُ اللَّه..ِ آتَانِيَ الْكِتَابَ.. وَجَعَلَنِي نَبِيًّا"

أعطاني الله الإنجيل، يعني ربنا آتاه الإنجيل والنبوة من زمان أوي من وقت ما قضى القضاء قبل أن يُخلق الخلق مش إن الإنجيل والنبوة معاه حالا،
لأ ده هيكون في المستقبل لما يكبر بس هو بيحكي عن حاجة هتحصل👌
فأعطاني الإنجيل، وجعلني نبي ليكم ، يعني محدش يطعن فيّ ويقول إني ابن زنا وانتم عارفين إن مستحيل الأنبياء يكونوا مولودين من زنا💁‍♂️
يعني كإن عيسى عليه السلام بيقول لهم أنا نبي.. وعبد لله... اتولدت بمعجزة، مش من الزنا.. وأمي مش زانية زي ما اتهمتوها مع إنكم عارفين أصلها وشرفها 😑
بل إنتم يا بني إسرائيل عارفين إن الأنبياء بيبعثوا في نَسَبِ قومِهِم، يعني بيكونوا من أشراف قومهم المعروف عنهم النزاهة وكل الأخلاق الطيبة عشان محدش يطعن في عِرضهم وشرفهم سواء ست أو راجل..
وبالفعل علو المقام والشرف والأخلاق ده كله كان اعترف بيه بنو إسرائيل وهم بيكلموها في الأول لما قالوا لها :
"يا أخت هارون ما كان أبوكِ امرءَ سَوءٍ وما كانت أمك بَغِيًّا"👌

عيسى عليه السلام كَمّل تعريف بنفسه وتعريف بوصايا ربنا له، والناس واقفة مذهولة😳
قال:
"وَجَعَلَنِي مُبَارَكًا أَيْنَ مَا كُنتُ وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
"وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
يعني ربنا جعلني مبارك ومُعلم الخير للناس وداعيا إليه عز وجل ومُحَبِّبِ الناس في طاعة الله👌
ووصاني بالصلاة والزكاة طول ما أنا حي 👌

☆ممكن حد يسأل دلوقتي ويقول ..يعني عيسى عليه السلام دلوقتي بيصلي ويزكي🤨
يعني احنا كمسلمين عقيدتنا بتقول إن عيسى عليه السلام لم يمت وإنه هينزل في آخر الزمان..يبقى هو كده بيصلي ويزكي؟
وكمان ليه مذكرش الصيام..مش ربنا قال إن الصيام كان مفروض على الناس إللي قبلنا 🤔
شوفوا،
♡أولا: عيسى عليه السلام ربنا قال على لسانه:
"فَلَمَّا تَوَفَّيْتَنِي كُنتَ أَنتَ الرَّقِيبَ عَلَيْهِمْ"
الوفاة هنا معناها النوم..لو في واحد نايم بنقول عليه حي ولا ميت😁
بنقول عليه حي مع إن ربنا بيقول:
"اللَّهُ يَتَوَفَّى الْأَنفُسَ حِينَ مَوْتِهَا وَالَّتِي لَمْ تَمُتْ فِي مَنَامِهَا"

فعيسى عليه السلام دلوقتي نايم وبيصحى بأمر الله.. لما ربنا يشاء يعني،
ومن الأوقات إللي صِحي فيها كانت في رحلة الإسراء والمعراج ، لما رسول الله ﷺ صلى بالأنبياء جميعا في المسجد الأقصى،
ولما رآه رسول الله في السماء الثانية مع يحيى عليه السلام في رحلة المعراج وهنعرف الموضوع بالتفصيل واحنا بنتكلم في السيرة النبوية،
فهو بيصحى وقت ما ربنا يريد وينام وقت ما ربنا يريد، فحكُم عيسى عليه السلام كحكم النائم ،وإنتم عارفين إن الصلاة تسقط عن النائم 😊
وطبعا الزكاة نفس الموضوع، واحد نايم هيجيب فلوس منين عشان تبلغ النصاب ويخرجها🤷‍♂️

♡ثانيا:
بالنسبة للصيام ..عيسى عليه السلام مقلش الصيام وده معناه إن ربنا تكفّل ببقاء جسده بغير طعام ولا شراب👌
فهو لو قال إن ربنا أوصاني بالصيام يبقى ده يدل إنه بياكل،
وعشان الإنسان ياكل لازم يكون صاحي مش هياكل وهو نايم يعني😅
فالكلام ده معناه إنه نام وربنا هو إللي تكفّل ببقاء جسده من غير لا أكل ولا مية،
عارفين زي إيه؟
فاكرين قصة أصحاب الكهف إللي قلناها، وإنهم ناموا أكثر من ثلاثمائة سنة بدون أكل أو شرب وحتى شكلهم متغيرش💁‍♂️
وكمان ربنا تكفّل بهم إنهم لا يمرضوا وإنهم لا يصيبهم العمى وتكفّل بحاجات كتير أوي لهم.

◇خدوا بالكم إن اليهود والنصارى بيؤمنوا بقصة أصحاب الكهف😀
فإيه المشكلة في إن ربنا يتكفل بجسد عيسى عليه السلام خلال السنين دي كلها زي أصحاب الكهف لحد ما ينزل للأرض في آخر الزمان🤷‍♂️
فاللي يخلينا نقبل بمعجزة أصحاب الكهف نقبل بمعجزة عيسى عليه السلام،
وخصوصا إن عيسى عليه السلام خارج نطاق الزمن أصلا؛
لأن ربنا لما هيرفعه هيكون عمره ثلاثة وثلاثين سنة،
ولما ينزل في آخر الزمن هيكون عمره برده ثلاثة وثلاثين سنة👌
يعني الإنسان بيكبر في العمر بسبب إيه😕
مش بسبب تعاقب الليل والنهار؟ والسبب في تعاق

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة
#المرحلة_الثانية_القبر
#عذاب_القبر_لِمَن

إياك👌

إياك أن تكون من إللي بيترك حفظ القرآن والعمل بيه، وإللي بينام متعمد ويضيع صلاة من صلوات الفرائض.
إياك أن تكون من الكذابين ومن الذين ينشرون الكذب.
إياك أن تكون من الزناة.
إياك أن تكون من الذين يأكلون الربا.
إياك أن تكون من الذين لا يَستبرِؤُون من البول.
إياك أن تكون ممن يغتابون الناس ويتكلمون في أعراضهم
ويمشون بينهم بالنميمة.
إياك أن تصلي صلاة بغير وضوء.

ليه بقولك إياك؟

لأن الحاجات دي لو عملتها ومُت 《من غير ما تتوب》منها هتتعذب بسببها في قبرك👌

فلو كنت من إللي ترك حفظ القرآن《بالكلية》فلم تعد تحفظ القرآن ولا تراجعه وتركت العمل بيه،
وكنت من إللي بينام متعمد ويضيع صلاة من صلوات الفرائض؛
هتبقى نايم على ظهرك في قبرك وهيجيلك رجل ، والرجل ده هيقف عند رأسك وهو ماسك صخرة في إيده،

وهيقوم رامي الصخرة دي على رأسك، فهتتكسر رأسك وتتساوى بالأرض😞
فالصخرة هتتدحرج وتروح بعيد عنك، فهيروح الرجل يجيب الصخرة إللي ادحرجت دي، وعلى ما يجيبها هتكون راسك رجعت تاني لحالتها الطبيعية،
فيأتي الرجل ويرمي الصخرة على راسك مرة تانية فتتحطم راسك وتتساوى بالأرض مرة تانية.
قال رسول الله ﷺ في حديث الرؤيا:
"وَإِنَّا أَتَيْنَا عَلَى رَجُلٍ مُضْطَجِعٍ وَإِذَا آخَرُ قَائِمٌ عَلَيْهِ بِصَخْرَةٍ وَإِذَا هُوَ يَهْوِي بِالصَّخْرَةِ لِرَأْسِهِ فَيَثْلَغُ رَأْسَهُ فَيَتَهَدْهَدُ الْحَجَرُ هَا هُنَا فَيَتْبَعُ الْحَجَرَ فَيَأْخُذُهُ فَلَا يَرْجِعُ إِلَيْهِ حَتَّى يَصِحَّ رَأْسُهُ كَمَا كَانَ ثُمَّ يَعُودُ عَلَيْهِ فَيَفْعَلُ بِهِ مِثْلَ مَا فَعَلَ الْمَرَّةَ الْأُولَى....."
《صحيح البخاري》

انت لما بتتخبط في حيطة أو حد يحدفك بطوبة في راسك شوف بتبقى بتتوجع إزاي من الألم؟
هنا بقى انت راسك هتتبطط وتتساوى بالأرض!
والعذاب بينزل على رأسك بالذات لأن النوم مكانه في الرأس فكانت العقوبة في مكان الإثم،
أنا مش هقولك ساعتها صراخك وألمك هيبقى عامل إزاي، أنا هسيب الموضوع لخيالك انت👌
وهيستمر الوضع ده إلى قيام الساعة أو لحد ما تخلص الذنوب إللي عليك👌
عرفت بقى ليه بقولك إياك تكون من إللي ترك حفظ القرآن والعمل بيه، أو من إللي بينام متعمد ويضيع صلاة من صلوات الفرائض🙂
هل انت تقدر تستحمل العذاب ده؟!
اوعى تقولي ماهو ربنا غفور رحيم، لأ كمل، زي ما ربنا قال عن نفسه إنه غفور رحيم فهو قال برده إنه شديد العقاب،
وكمان حذرك من نفسه سبحانه وقال لك في القرآن إللي انت كنت مشغول عن قراءته وتدبره في الدنيا:
"وَيُحَذِّرُكُمُ اللَّهُ نَفْسَهُ"《آل عمران آية (30)》
فمتخليش الشيطان يضحك عليك ويضيعك معاه👌
"يَعِدُهُمْ وَيُمَنِّيهِمْ ۖ وَمَا يَعِدُهُمُ الشَّيْطَانُ إِلَّا غُرُورًا"
《النساء آية(120)》

ويا سلام بقى لو كنت كمان من الناس إللي بتكذب وتنشر الكذب وكذبتك تنتشر في كل مكان،
وانت أكيد عارف تأثير مواقع التواصل الاجتماعي وإزاي الواحد ممكن بس يقول كلمتين والناس تشتغل مشاركات هنا وهنا وسيادتك قاعد عمال تشيل في سيئات آاااد كده وانت مش داريان،
عارف لو كنت بتعمل كده ومت من غير توبة هيحصل فيك إيه في القبر😶
هتبقى نايم في القبر على ظهرك وفي رجل واقف عند وجهك وفي إيده كَلُّوب من حديد، والكَلُّوب ده حديدة معووجة كده عاملة زي الخطاف،
فالرجل القائم إللي معاه الكَلّوب ده هيجيلك من ناحية وجهك اليمين ويشَرشَر فمك إلى قفاك،
يعني يشق فمك ويقطعه من أول الطرف لحد ما يوصل لرقبتك من ورا، ويشرشر أنفك لحد قفاك، ويشرشر عينك لحد قفاه،
ولما يخلص الناحية اليمين ينتقل للناحية الشمال ويعمل فيها نفس إللي عمله في الناحية اليمين،
وعلى ما يخلص الناحية الشمال؛ هتكون الناحية اليمين رجعت صحيحة زي ما هي، ويفضل يعيد نفس الفعل في كل ناحية،
وطبعا مش محتاجين نقول كمية الألم إللي انت بتحسها ساعتها😶

انت لما بس بتتجرح جرح شديد شوية بتبقى مش قادر تستحمل، فانت هنا كأنك بيتعمل لك عمليات في وشك بدون بنج😬
وخد بالك ده مش كلامي، ده كلام رسول الله ﷺ إللي شاف الحاجات بعينه،
ورسول الله ﷺ كان شايف إللي بيحصل ده وكان مندهش جدا، والحديث إللي بيشرح فيه الكلام ده موجود في صحيح البخاري👌

وعارف بقى إن أشد أنواع الكذب ومن كبائر الذنوب هو الكذب في المنام😶
يعني تروح تقول لواحد صاحبك أنا شوفت رؤيا كذا وكذا، وانت مشفتش حاجة وبتكذب، عشان كده في تقطيع من عند العين،
وده لأن الكذب في الرؤيا هي كذب على الله؛ لأن الرُّؤْيَا الصَّالِحَةُ زي ما رسول الله ﷺ قال هي :

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة_عشر
#علامات_الساعة_الكبرى_الجزء_الأول
#الملحمة_الكبرى_وحقيقة_هَرْمَجدُّون

كلمتك المرة إللي فاتت عن القتال إللي حصل بين المسلمين والروم في أكبر معركة بين المسلمين والروم النصارى على مر التاريخ،
والمعركة دي أول معركة يقابل فيها المسلمون جيش من النصارى قريب من المليون،
وقلتلك إن قائد المسلمين ساعتها على حسب شرح العلماء للأحاديث هو المهدي إللي قلت لك عليه المرة إللي فات.

☆ملحوظة:
في ناس اسمهم الشيعة الرافض، ودي فرقة من الفرق الضالة، هم عندهم مهدي اسمه محمد العسكري،
بيقولوا إنه دخل في السرداب من زمان وعايش فيه بقاله سنين طويلة وهيخرج في آخر الزمان من مدينة سامراء وكلام كتير كده ده كله كذب وافتراء ملناش دعوة بيه🙄
فمتخلطش بين المهدي المزعوم إللي الشيعة بيقولوا عليه، و بين المهدي الحقيقي إللي أخبر عنه رسول الله ﷺ في الأحاديث الصحيحة👌

تعال بقى نرجع للمعركة ونشوف حصل إيه،
مبدئيا كده مقر جيش المسلمين هيكون في مدينة اسمها الغُوطة إلى جانب مدينة دمشق في مكان البساتين.

☆ومدينة الغوطة معروفة في سوريا في زماننا دلوقتي وحصل فيها مجازر على يد قوات بشار الأسد ربنا ينتقم منهم جميعا 😞

قال رسول الله ﷺ:
"إنَّ فُسطاطَ المسلمين ، يومَ الملحمةِ ، بالغُوطةِ إلى جانبِ مدينةٍ يُقالُ لها : دمشقُ ، من خيرِ مدائنِ الشَّامِ"
《صحيح أبي داود》
أما مكان المعركة هيكون بقرب مدينة حلب في منطقة مرج دابق إللي قلت لك عليها المرة إللي فاتت.

أول ما يبدأ القتال بين النصارى والمسلمين؛ هينهزم ثلث الجيش المسلم، قال عنهم رسول الله ﷺ:
"فَيَنْهَزِمُ ثُلُثٌ لا يَتُوبُ اللَّهُ عليهم أبَدًا"
《صحيح مسلم》
الثلث إللي انهزم ده ثلث عاصي؛ عمل كبيرة من الكبائر وهي الفرار من الزحف، والثلث ده لن يُقدّر الله لهم توبة ولن يوفّقهم للتوبة.

أما ثلث الجيش المسلم الثاني فيهقتلهم الروم ويموتوا شهداء في سبيل الله، والثلث الثاني إللي هيُقتل ده هم أفضل الشهداء عند الله،
قال عنهم رسول الله ﷺ:
" ويُقْتَلُ ثُلُثُهُمْ، أفْضَلُ الشُّهَداءِ عِنْدَ اللهِ"
《صحيح مسلم》
كده هيتبقى ثلث الجيش المسلم الأخير، قال عنهم رسول الله ﷺ:
"ويَفْتَتِحُ الثُّلُثُ، لا يُفْتَنُونَ أبَدًا"
《صحيح مسلم》
يعني الثلث ده هو إللي هينتصر ولن يُفتنوا في دينهم ولن يتركوا دينهم لحد ما يموتوا.

هيبدأ القتال بين الثلث الباقي ده من جيش المسلمين وبين جيش الروم، قال عبد الله بن مسعود رضي الله عنه:
"فَيَشْتَرِطُ المُسْلِمُونَ شُرْطَةً لِلْمَوْتِ لا تَرْجِعُ إلَّا غَالِبَةً، فَيَقْتَتِلُونَ حتَّى يَحْجُزَ بيْنَهُمُ اللَّيْلُ،فَيَفِيءُ هَؤُلَاءِ وَهَؤُلَاءِ، كُلٌّ غَيْرُ غَالِبٍ، وَتَفْنَى الشُّرْطَةُ"《صحيح مسلم》

يعني مجموعة من المسلمين هيقولوا لبعض تعالوا نهجم على جيش الروم نقاتلهم، فإما نرجع بعد ما نغلبهم يا إما نموت،
فيقتتل جيش المسلمين مع جيش الروم لحد ما ييجي الليل فيرجع كل جيش للمعسكر بتاعه من غير ما يكون في طرف منتصر،
وفي نفس الوقت شرطة الموت هتكون هجمت لكنها هتُقتل جميعا وتفنى في سبيل الله وميتبقاش منهم ولا واحد.

"ثُمَّ يَشْتَرِطُ المُسْلِمُونَ شُرْطَةً لِلْمَوْتِ، لا تَرْجِعُ إلَّا غَالِبَةً، فَيَقْتَتِلُونَ حتَّى يَحْجُزَ بيْنَهُمُ اللَّيْلُ، فَيَفِيءُ هَؤُلَاءِ وَهَؤُلَاءِ، كُلٌّ غَيْرُ غَالِبٍ، وَتَفْنَى الشُّرْطَةُ"《صحيح مسلم》
يعني تاني يوم هيشترط المسلمون شرطة للموت مرة ثانية ويهجم الجيش المسلم على جيش الروم ومعاهم شرطة الموت فيقتتلون،
والنتيجة هتكون مقتل شرطة الموت كلها، وبرده هيرجع الجيشان عند الليل من غير ما يكون في طرف منتصر على الثاني😕

اليوم الثالث هيحصل نفس الموضوع، يشترط المسلمون شرطة للموت لا ترجع إلا غالبة، فيقتتلون لحد المساء فيرجع الجيشين كل واحد للمعسكر بتاعه من غير ما يكون في طرف غالب وتفنى شرطة الموت،
"فَإِذَا كانَ يَوْمُ الرَّابِعِ، نَهَدَ إليهِم بَقِيَّةُ أَهْلِ الإسْلَامِ، فَيَجْعَلُ اللَّهُ الدَّبْرَةَ عليهم،
فَيَقْتُلُونَ مَقْتَلَةً، إمَّا قالَ لا يُرَى مِثْلُهَا، وإمَّا قالَ لَمْ يُرَ مِثْلُهَا، حتَّى إنَّ الطَّائِرَ لَيَمُرُّ بجَنَبَاتِهِمْ، فَما يُخَلِّفُهُمْ حتَّى يَخِرَّ مَيْتًا"
《صحيح مسلم》
يعني أخبار القتال بين جيش الروم وجيش المسلمين هتكون انتشرت في كل مكان،
ففي اليوم الرابع هيقوم بقية أهل الإسلام ويلتحقوا بالجيش المسلم لقتال جيش الروم،
وهتحصل مقتلة كبيرة جدا في جيش الروم النصارى لدرجة إن الجثث هتبقى مالية الأرض والجثث هتبقى مُنتنة،
وهتخلي ريحة الهواء في الجو مُنتن لدرجة إن لو طائر عدّى من المكان هيقع ميت من الرائحة المنتنة الموجودة بسبب فساد الهواء إللي فوق الجثث الميتة.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة_والعشرون
#المرحلة_الثالثة_اليوم_الآخر
#اختلال_نظام_الكون

بعد ما نفخ صاحب القرن النفخة الأولى في النَّاقور إللي هو البوق
وإللي سماها الله عز وجل في القرآن بالرَّاجفة؛ بدأ اليوم الآخر، واليوم الآخر هو يوم القيامة،
واسمه《اليوم الآخر》لأنه يأتي بعد هذه الدنيا، ويُسمَّى يوم القيامة لقيام الناس فيه لربِّ العالمين.

¤فالمقصود باليوم الآخر حاجتين✌
🔹️الأول: فناء هذه العوالم كلها وانتهاء هذه الحياة بكاملها.
🔹️الثاني: إقبال الحياة الآخرة وابتداؤها.
فلفظ《اليوم الآخر》بيدل على آخر يوم من أيام هذه الحياة وفي نفس الوقت بيدل على اليوم الأول والأخير من الحياة الثانية،
يعني في الآخرة مفيش يوم أول ويوم ثاني وأسبوع أول وثاني وكده،
لأ، هو يوم واحد لا ثاني له فيها أبدا🙅‍♂️

بعد نفخة الصعق مات البشر إللي كانوا عايشين على الأرض وماتت كل الخلائق في الكون حتى الملائكة حتى ملك الموت حتى إسرافيل نفسه صاحب القرن هيموت بعد النفخة،
فقد قال الله تعالى:
"كُلُّ شَيْءٍ هَالِكٌ إِلَّا وَجْهَهُ"《القصص آية(88)》

لكن في استثناء للخلق إللي مش هيموتوا وهم أهل الجنة من الحور العين والولدان المخلدون؛ فإن الجنة ليس فيها موت👌
قال تعالى:
"وَنُفِخَ فِي الصُّورِ فَصَعِقَ مَنْ فِي السَّمَاوَاتِ وَمَنْ فِي الْأَرْضِ إِلَّا مَنْ شَاءَ اللَّهُ"《الزمر آية(68)》

بعد النفخة الأولى وقبل النفخة الثانية في الصُّور هيبقى في فترة زمنية معينة؛ الفترة دي مدتها《أربعين》، احنا منعرفش هي أربعين يوم ولّا أربعين شهر ولّا أربعين سنة، هي فقط أربعين👌
قال رسول الله ﷺ:"ما بين النفختين أربعون"
《رواه البخاري ومسلم》

من أول النفخة الأولى ولحد ما يدخل أهل الجنة للجنة وأهل النار للنار؛ هتحصل تغييرات في الكون،
مع بداية النفخة الأولى هيحصل انقلاب كوني عام في جميع أوضاعه وأشكاله،
والانقلاب ده يشمل الأرض والنجوم والكواكب وجميع الأفلاك، النفخة دي تهتز لها السماوات والأرض وتبدأ تحصل فيها التغييرات👌

فالأرض هتهتز وترتج وتتزلزل وتتهدم كل حاجة عليها وتتكسر وتبقى الأرض عاملة زي الرمل،
فالجبال الرواسي القوية والثقيلة إللي بنشوفها دي؛ ربنا هيزيلها ويقلعها من مكانها فتكون《كَالْعِهْنِ الْمَنفُوش》يعني زي الصوف الملون المنتشر في كل مكان،
فهتبقى خفيفة هشة كالصوف إللي اتنَفَش وبقت شعراته متفرقة عن بعضها البعض لحد ما وصل لمرحلة إنه يطير مع أضعف ريح،
فالجبال هتتضعف وتتفتت وتُنسَف من على الأرض وتُخلُط بالأرض، وساعتها تصبح الأرض منبسطة مستوية ملساء مفيش فيها أي نبات ولا بناء ولا فيها حتة مرتفعة ولا حتة منخفضة، كلها مستقيمة 👌
قال تعالى:
"وَيَسْأَلُونَكَ عَنِ الْجِبَالِ فَقُلْ يَنسِفُهَا رَبّي نَسْفاً۩فَيَذَرُهَا قَاعاً صَفْصَفاً ۩لاّ تَرَىَ فِيهَا عِوَجاً وَلا أَمْتاً" 《طه آية(105-107)》

أما البحار إللي كانت تأتي بالهواء والرطوبة ويستمتع الناس بها؛
فستكون مُسَجَّرة يعني بتشتعل نارا، وتتفجر كلها في بعض وتبقى كلها عبارة عن بحر واحد يختلط فيه الماء المالح بالماء العذب.

أما السماء القوية إللي هي مسيرة خمسمائة سنة، هذه السبع الشداد، ذات البنيان المُحكم التي بناها رب العالمين متينة لا صَدْع فيها ولا فطور؛ ستنفطر يعني ستبدأ بالانشقاق يعني التشقق، فالانفطار هو أول الانشقاق،
شوف كده لما بتقول أنا قلبي انفطر من الحزن؟!
انت تقصد إن قلبك اتعرض لضغط عالي جدا أو اتعرض لصدمة قوية لحد ما انفطر القلب من الحزن،
فكذلك السماء اتعرضت لضغط شديد جدا لحد ما بدأت تتشقق، والضغط ده كان بسبب نفخة واحدة من مخلوق من مخلوقات الله عز وجل،
وبعدين تنشق السماء وتذوب زي ذوبان الفضة وزي المعادن المنصهرة، وتبقى ضعيفة وتتلون كما تتلون الأصباغ التي يُدهن بها ، فتكون أحيانا حمراء وصفراء وزرقاء وخضراء ، وذلك من شدة الأمر وهول يوم القيامة العظيم،
قال تعالى:
"فَإِذَا انشَقَّتِ السَّمَاءُ فَكَانَتْ وَرْدَةً كَالدِّهَانِ"《الرحمن آية (37)》
يعني: حمراء كلون الورد.

وبعدين تنتثر الكواكب، يعني تسقط متفرقة ويتغير شكلها وتتوقف عن الحركة والدوران،
"وَإِذَا الْكَوَاكِبُ انْتَثَرَتْ"《الانفطار آية(2)》
خلاص مبقاش في حاجة ماشية في النظام بتاعها إللي كانت ماشية عليه قبل كده،
والنجوم إللي كنت بتشوفها بتلمع في الليل دي تُطْمَس؛ يعني ينطفئ نورها وتتغير.

كل حاجة اتغيرت واتبدلت👌
قال تعالى:
"يَومَ تُبَدَّلُ الأَرضُ غَيرَ الأَرضِ وَالسَّماواتُ"
《سورة إبراهيم آية(48)》
وده التبديل الأول إللي هيحصل للسماوات والأرض، وهو تبديل في صفات الأرض والسماوات.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة_والثلاثون
#المرحلة_الثالثة_اليوم_الآخر
#الأحداث_في_أرض_المحشر_الجزء_الثامن
#حساب_الكافر_وحساب_المؤمن

اتكلمنا المرة إللي فاتت عن أول ثلاثة أصناف هيتحاسبوا يوم القيامة وهم: الشهيد والعالم القارئ للقرآن والمتصدق وشوفنا جزاءهم كان إيه👌

وقلنا إن كل واحد هيأتي إلى الله تعالى للحساب وهو معه سائق وشهيد،
وقلنا إن السائق هو مَلك يقود العبد للعرض على الله والحساب،
والشهيد هو كمان مَلك لكنه بيشهد على أعمال العبد،
قال تعالى:
"وَجَاءَتْ كُلُّ نَفْسٍ مَعَهَا سَائِقٌ وَشَهِيدٌ"
《سورة ق آية(21)》

فاللي هيكون والعياذ بالله من الكافرين أو المكذبين المُعرِضين المُعاندين هيُقال له:
"لَّقَدْ كُنتَ فِي غَفْلَةٍ مِّنْ هَٰذَا فَكَشَفْنَا عَنكَ غِطَاءَكَ فَبَصَرُكَ الْيَوْمَ حَدِيدٌ"《سورة ق آية(22)》
يعني هيتوبخ ويُلام على كفره وتكذيبه وإعراضه و عِناده وتركه للعمل الصالح إللي كان هينفعه في اليوم ده،
فهو كان عايش في الدنيا في غفلة، أما يوم القيامة فالغفلة دي اتزالت من عليه وبقى شايف أمامه الواقع إللي كان بينكره في الدنيا من البعث والحساب والثواب والعقاب،
فكده خلاص مفيش مجال للرجوع واستدراك ما فات، فتخيل حسرته ساعتها هتبقى عاملة إزاي😞
وده نهايته إنه هيترمى في نار جهنم زي ما قلنا المرة إللي فاتت👌
قال تعالى:
"أَلْقِيَا فِي جَهَنَّمَ كُلَّ كَفَّارٍ عَنِيدٍ"《سورة ق آية(24)》

يعني ربنا هيأمر السائق والشهيد إللي جاءوا معاه إنهم يرموه في جهنم وملائكة العذاب هيتولوا تعذيبه،
فهو كان كثير الكفر والتكذيب بالحق و مُعاند للحق ومعارض له بالباطل مع علمه بكده👌
وقبل ما يتكلم حتى ويقول يارب ده الشيطان هو إللي أغواني و أضلني؛ هيلاقي الشيطان بيتبرأ منه😬
قال تعالى:
"قَالَ قَرِينُهُ رَبَّنَا مَا أَطْغَيْتُهُ وَلَٰكِن كَانَ فِي ضَلَالٍ بَعِيدٍ"
《سورة ق آية(27)》

¤القرين هو شيطان يقترن بابن آدم، يعني بيكون معاه طول حياته لحد ما يموت ابن آدم، وبيكون هَم القرين وهدفه إنه يضل الإنسان عن طريق الحق،
ولا يمكن للمسلم أن يُسيطر على قرينه ويدخله في الإسلام؛ لأن الله عز وجل جعل وجود القرين ابتلاءً للعبد، ليُعلَم المؤمن من غيره.

فالقرين ده هييجي يوم القيامة مع العبد ويقول لربنا يارب أنا مليش دعوة ده هو إللي كان ضال لوحده، ده أنا كنت بتعلم منه الفساد، ده أنا كنت بتفاجئ من الضلال بتاعه😳

فالكافر المكذب ده بقى مُحَاصر،
عنده مَلك يشهد عليه وشيطان بيتبرأ منه، وصحيفة أعمال مكتوب فيها كل حاجة، هيعمل إيه بقى😬
هو حاول إنه يدافع عن نفسه ويقول إن الشيطان هو إللي أضله، لكن خلاص مفيش فايدة، الخناقة إللي حاصلة دي مفيش منها أي فايدة، فهيرد عليهم ربنا ويقول لهما:
"قَالَ لَا تَخْتَصِمُوا لَدَيَّ وَقَدْ قَدَّمْتُ إِلَيْكُم بِالْوَعِيدِ"
《سورة ق آية( 28)》
يعني متتخانقوش هنا، انت كنت عارف وجاء لك رسول وجاء لك قرآن وشوفت البراهين والأدلة وفي الآخر انت أنكرت👌
فخلاص كده أنا قضيت بينكم ومظلمتش حد فيكم، فلا أعذب أحدًا بذنب أحد، ولكن أعذبه بذنبه بعد قيام الحُجة عليه👌
قال تعالى:
"مَا يُبَدَّلُ الْقَوْلُ لَدَيَّ وَمَا أَنَا بِظَلَّامٍ لِّلْعَبِيدِ"
《سورة ق آية(29)》

¤انت ممكن تستغرب وتقول: هو إزاي ربنا هيكلم الكفار🤔
وهو سبحانه قال:
"إِنَّ ٱلَّذِينَ يَشْتَرُونَ بِعَهْدِ ٱللَّهِ وَأَيْمَٰنِهِمْ ثَمَنًا قَلِيلًا أُوْلَٰٓئِكَ لَا خَلَٰقَ لَهُمْ فِى ٱلآخِرَةِ وَلَا يُكَلِّمُهُمُ ٱللَّهُ وَلَا يَنظُرُ إِلَيْهِمْ يَوْمَ ٱلْقِيَٰمَةِ وَلَا يُزَكِّيهِمْ وَلَهُمْ عَذَابٌ أَلِيمٌ"
《سورة آل عمران آية( 77)》

◇المقصود هنا إن ربنا لن يكلمهم كلام فيه رحمة أو كلام يَسُرُّهم ويفرّحهم، لكن كلامه لهم كلام توبيخ وتعذيب،
فربنا عز وجل هيسأل الكافر عن النعم إللي أنعم بها عليه سؤال توبيخ وتقريع، زي ما ربنا قال في القرآن:
"ثُمَّ لَتُسْأَلُنَّ يَوْمَئِذٍ عَنِ النَّعِيمِ" 《سورة التكاثر آية(8)》

فيقول الله عز وجل للكافر يوم القيامة:
"أيْ فُلُ ألَمْ أخلُقْكَ ؟ ألَمْ أجعَلْكَ سميعًا بصيرًا ؟ ألَمْ أُزوِّجْكَ ؟ ألَمْ أُكرِمْكَ ؟ ألَمْ أُسخِّرْ لكَ الخيلَ والإبلَ ؟ ألَمْ أُسوِّدْكَ وأذَرْكَ ترأَسُ وتربَعُ ؟" 《صحيح ابن حبان》

يعني: يا فلان، مش أنا خلقتك، وأعطيتك السمع والبصر ورزقتك بزوجة، وسخّرت لك الخيل والإبل يكونوا تحت خدمتك، وتركتك تكون سيدًا وتأخذ الغنائم وتستريح؟

فيقول العبد: بلى أيْ ربِّ.
يعني هو بيُقِر بكل النعم إللي ربنا أنعمها عليه،
فيقولُ له الله: فظنَنْتَ أنَّكَ مُلاقِيَّ؟

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة_والأربعون
#المرحلة_الثالثة_اليوم_الآخر
#الأحداث_في_أرض_المحشر_الجزء_السابع_عشر
#حساب_المجنون_وأهل_الفترة_والشيخ_الهَرِم

اتكلمنا الحلقة إللي فاتت عن الميزان واتكلمنا عن أعمال العباد بصفة عامة على مدار الحلقات إللي فاتت،
وبكده نكون خلصنا مرحلة《الميزان》، ونقدر نلخّص أعمال العباد إللي عملوها في حياتهم الدنيا وإللي هتتحط في الميزان لأربعة أنواع:

1️⃣أولا: الأعمال الصالحة المُتَقَبّلة إللي العبد حقق فيها شرط الإخلاص والاتباع، فدي تتحول لحسنات تُوضع في كفة الحسنات، ودي تشمل ثلاثة أمور:
¤الأعمال إللي انت عملتها فعلا،
¤والأعمال إللي هَمَمت بعملها ولم تعملها، يعني كنت ناوي فعلا تعمل العمل الصالح ده بس حصل شيء خلاك متعرفش تعمله،
زي مثلا إنك تكون ناوي تصوم يوم الإثنين لكن حصل ظرف طارئ منعك من الصيام زي مرض مثلا، فهنا تاخد الأجر بالنية كأنك عملته👌
ومن رحمة ربنا إن الحسنات مضاعفة،
يعني العمل الواحد تأخذ عليه أكثر من حسنة، وأقل عمل يساوي عشر حسنات، ثم يزيد الله لمن يشاء بحسب قوة الإخلاص،
ممكن الزيادة توصل لسبعمائة ضعف وممكن أكثر، وكله بتقدير من الله عز وجل العالم بالقلوب👌

¤والحاجة الثالثة هي الأعمال السيئة إللي كنت هتعملها لكن معملتهاش خوفا من الله👌
فكل ده كده ههيتحط في ميزان الحسنات يوم القيامة👆👌

2️⃣النوع الثاني من الأعمال:
حسنات غير مُتَقَبّلة أو مُختفية، والمثال على الغير مُتقبّل: أول ثلاثة اتحاسبوا ثم أُخذوا إلى النار وإللي اتكلمنا عنهم في الحلقة الخامسة والثلاثين،
والحسنات إللي اختفت مثال عليهم: أصحاب الهباء المنثور واتكلمنا عنهم في الحلقة الثالثة والأربعين.

3️⃣النوع الثالث: سيئات مكتوبة غير مغفورة وأخطرها الكبائر، ومثال على النوع ده: المُجادل إللي رفض الاعتراف بذنوبه وقال أنا مش هقبل شهادة احد غير نفسي، واتكلمنا عنه في الحلقة الثامنة والثلاثين.

4️⃣النوع الرابع: سيئات مغفورة، وده زي المؤمن إللي ربنا يقرره بذنوبه ويغفرها له، واتكلمنا عنه في الحلقة السابعة والثلاثين.

قبل ما نعرف الأحداث إللي بعد الميزان، في سؤال محتاجين نجاوب عليه، وهو عن حساب المجنون وحساب أهل الفترة وإللي زيهم👌

💠 إزاي هيتحاسب المجنون، وكمان إزاي الناس إللي موصلهمش الدين هيتحاسبوا؟!
هل يكون حسابهم حساب المؤمنين ولّا حساب الكافرين🤔

🔅لأ، هم هيكون لهم حساب خاص😅
وهو ده القول الراجح من أقوال العلماء👌

شوف حديث رسول الله ﷺ بيقول فيه إيه، قال رسول الله ﷺ:
"أَرْبَعَةٌ يَوْمَ الْقِيَامَةِ :
رَجُلٌ أَصَمُّ لَا يَسْمَعُ شَيْئًا، وَرَجُلٌ أَحْمَقُ ، وَرَجُلٌ هَرَمٌ ، وَرَجُلٌ مَاتَ فِي فَتْرَةٍ ،
1️⃣فَأَمَّا الْأَصَمُّ فَيَقُولُ: رَبِّ، لَقَدْ جَاءَ الْإِسْلَامُ وَمَا أَسْمَعُ شَيْئًا،
2️⃣وَأَمَّا الْأَحْمَقُ فَيَقُولُ: رَبِّ ، لَقَدْ جَاءَ الْإِسْلَامُ وَالصِّبْيَانُ يَحْذِفُونِي بِالْبَعْرِ،
3️⃣وَأَمَّا الْهَرَمُ فَيَقُولُ: رَبِّ، لَقَدْ جَاءَ الْإِسْلَامُ وَمَا أَعْقِلُ شَيْئًا،
4️⃣وَأَمَّا الَّذِي مَاتَ فِي الْفَتْرَةِ فَيَقُولُ: رَبِّ، مَا أَتَانِي لَكَ رَسُولٌ، فَيَأْخُذُ مَوَاثِيقَهُمْ لَيُطِيعُنَّهُ، فَيُرْسِلُ إِلَيْهِمْ أَنْ ادْخُلُوا النَّارَ،
قَالَ: فَوَالَّذِي نَفْسُ مُحَمَّدٍ بِيَدِهِ، لَوْ دَخَلُوهَا لَكَانَتْ عَلَيْهِمْ بَرْدًا وَسَلَامًا"
وفي رواية أخرى للحديث:
"فَمَنْ دَخَلَهَا كَانَتْ عَلَيْهِ بَرْدًا وَسَلامًا وَمَنْ لَمْ يَدْخُلْهَا يُسْحَبُ إِلَيْهَا"
《صححه الألباني في السلسلة الصحيحة》

يعني يوم القيامة في أربعة أصناف من الناس هيحتجوا عند ربنا،
النوع الأول الشخص الأصم إللي مبيسمعش، فهيقول لربنا أنا مسمعتش حاجة عن الإسلام فأنا عندي عذر،
والمجنون أو الأحمق هيقول إنه هو كمان مكنش عنده عقل يميّز بيه أي شيء لدرجة إن الأطفال كانوا بيقذفوه بفضلات الحيوانات،
والثالث هو الرجل الكبير في السن إللي وصل لدرجة الخَرَف ومبقاش عارف حاجة، هيقول إن الإسلام جاء وهو مش واعي لنفسه،
والرابع إللي مات في زمن الفترة وهي مرحلة زمنية عاش فيها الناس من غير ما يأتيهم رسول ولم يتبعوا دين فهيقولوا لربنا إنهم لم يأتِهم رسول،
الشاهد إن كلهم بيحتجوا إنهم مكنش عندهم القدرة إنهم يتبعوا الإسلام، بمعنى إنهم لو كانوا عندهم القدرة مكنوش هيرفضوا الإسلام ولا هيتأخروا أبدا عن اتباع الدين😀
بس انت عارف إن الكل وقت الكلام حلو أوي، لكن وقت الجد متلاقيش حد التزم بكلامه غير قلة قليلة😬

المهم،
ربنا هيأخذ منهم المواثيق، يعني يعاهدوه إنهم يطيعونه، فيرسل الله لهم رسول في أرض المحشر يأمرهم إنهم يدخلوا النار، أو إنه هيأمرهم بنفسه سبحانه إنهم يدخلوها،

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السادسة_والخمسون
#المرحلة_الثالثة_اليوم_الآخر
#معنى_لم_يعملوا_خيرا_قط

اتكلمنا المرة إللي فاتت عن سعة رحمة ربنا وقلنا إن ربنا هيخرج من النار ناس لم يعملوا خيرا قط👌
فده معناه إيه بقى🤔

الأول كده خلينا نسأل، هي الناس دي دخلت النار ليه؟
شوف،
ربنا عز وجل هيُدخل عباده الجنة أو النار《بالأفعال والتُّرُك》،
يعني مثلا:
¤ناس تركت كل المحرمات والمُوبقات لله و مكنوش بيعملوا منها حاجة،
وفي نفس الوقت أفعالهم الصالحة كانت قليلة، فكان التَّرك عندهم أكبر وأعظم والفعل أقل، فدول كده ربنا عز وجل يُدخلهم الجنة.

¤وناس ممكن يدخلوا النار بترك الطاعات والأعمال الصالحة، مع إنهم لم يفعلوا المحرمات، فيكون لديهم ترك الطاعات كثيراً وفعل المحرمات قليلاً، فيدخلوا النار.

¤ناس تانية تركوا الأعمال الصالحة وفعلوا المحرمات، فدول ربنا يدخلهم النار.
وده الصنف إللي بنتكلم عنه، ناس لم يعملوا الصالحات وعملوا المحرمات فدخلوا النار👌

عشان تفهم المعنى بطريقة بسيطة وسهلة خلينا نفتكر مع بعض قصة قاتل المائة نفس💁
قاتل المائة نفس ده كان رجل قتل الأول تسعة وتسعين إنسان، ومعروف في فطرة وطبع كل إنسان إن القتل مُحرم وإنه حاجة غلط حتى لو مكنش عنده علم من دين أو رسول مثلا،
فهو كان عايز يتوب فسأل الناس عن أعلم أهل الأرض فدلوه على عابد،
فراح للعابد وقال له إنه قتل تسعة وتسعين نفس، فهل له توبة؟
فالعابد قال له: لا، فالرجل قتل العابد وأكمل به المائة،
وبعد كده كان لسه عايز يتوب فسأل عن أعلم أهل الأرض فدلوه على عالم، فذهب للعالم وسأله إذا كان له توبة،
فالعالم قال له إن له توبة، لكن بشرط إنه يترك بلده إللي هي أرض سوء ويذهب لبلد تاني فيها قوم صالحين بيعبدوا الله فيعبد الله معهم،
فالرجل فعلا خرج واتجه ناحية البلد إللي العالم قال له عليها، وفي نص الطريق جاءه الموت،
فملائكة العذاب وملائكة الرحمة إللي اتكلمنا عنهم في بداية الحلقات إنهم إللي بيأخذوا أرواح المؤمنين وأرواح غير المؤمنين؛ اختصموا مين يأخذ روحه،
ملائكة العذاب تقول إنه《لم يعمل خيرا قط》وملائكة الرحمة تقول إنه خرج تائبا لله،
فأرسل الله عز وجل مَلك وقال لهم يقيسوا المسافة، فلو كان هو أقرب إلى أرض الصلاح تأخذه ملائكة الرحمة، ولو كان أقرب إلى أرض السوء تأخذه ملائكة العذاب،
فلما قاسوا المسافة لقوه إنه كان أقرب إلى أرض الصلاح بشبر؛ فأخذته ملائكة الرحمة👌

الشاهد من القصة هو إن ملائكة العذاب قالت عن الرجل إنه لم يعمل خيرا قط،
لكن في الواقع إن الرجل تاب وكان صادق في توبته وكمان تحرك وتوجه فعلا لأرض الصلاح وده كله يعتبر عمل صالح لكنه في نفس الوقت عمل غير مكتمل،
يعني هو لسه معملش أي أعمال صالحة بعد التوبة توزاي أو تعادل المائة نفس إللي قتلهم،
عشان كده قالوا إنه لم يعمل خيرا قط👌

☆ممكن تقول بس التوبة بتمسح إللي قبلها وكمان ربنا بيبدل الحسنات للسيئات للتائب، فإزاي بقى معندوش حسنات توازي أفعاله السيئة🤔

ماهو عشان التوبة تمسح إللي قبلها من الذنوب لازم لها شروط، ومن الشروط دي إن العبد يعمل أعمال صالحة بعد التوبة ويكون حاله بعد التوبة أفضل من حاله قبلها💁
وساعتها بس ربنا يبدل سيئاته لحسنات، زي قصة الرجل إللي اتكلمنا عنه المرة إللي فاتت إللي كان عمل كل المعاصي ورسول الله ﷺ قال له إنه يترك السيئات ويعمل الحسنات ساعتها ربنا هيبدل له سيئاته لحسنات،
لكن قاتل المائة نفس لسه أصلا معملش أي حاجة نهائي🙅
هو فقط تاب وتوجه للبلد الصالح، فلأنه كان صادق في توبته ربنا تقبله بدون ما يعمل أعمال صالحة👌

نرجع بقى لكلامنا الأول وهو إن ربنا هيخرج ناس من النار لم يعملوا خيرا قط،
احنا نفهم من الكلام إن الناس إللي ربنا هيخرجهم من النار نوعين:
1️⃣الأول:
إما إنهم لم يعملوا شيئًا من أعمال الجوارح؛ لأنهم ماتوا مثلا ولم يتمكنوا من العمل زي قاتل المائة نفس،
أو مثلا واحد تاب وجاله مرض فجأة ودخل في غيبوبة ومات بعدها، ده برده لم يتمكن من العمل👌

أو ناس مثلا لم يَصل إليهم من الإسلام غير لا إله إلا الله فقط،
زي في آخر الزمان هيحصل إن الإسلام يندثر ويُمْحَى ولا يبقى منه غير كلمة التوحيد"لا إله إلا الله"
وفي ناس هيفضلوا يقولوها لأنهم سمعوا آبائهم وأجدادهم يقولوها، يعني هم بيقلدوهم بس،
وهم في نفس الوقت لا بيصلوا ولا بيزكوا ولا بيصوموا ولا بيحجوا لأن معندهمش العلم بالشرائع دي،
فقط هم يقولوا لا إله إلا الله، فدول هتنفعهم لا إله إلا الله يوم القيامة وتنجيهم من النار؛
مع إنهم لم يعملوا خيرا قط غير بس كلمة التوحيد إللي قالوها، والدليل على كده الحديث إللي رواه حُذَيْفَةَ بْنِ الْيَمَانِ رضي الله عنه عن رسول الله ﷺ: