【白石角水質問題跟進】

早排，我哋問過白石角有幾個屋苑有水入面有雜質嘅問題，幾個屋苑都有居民話有出現類似情況，我哋就send咗封email畀水務署希望佢哋會跟進整區水質問題，如果都有居民有類似情況可以先同咗管理處講聲，再同翻水務署講，亦都希望同我講聲，情況仲係持續嘅話就證明係街喉有問題。

#白石角 #社區跟進

【就嚟無2G用啦】

之前我哋收到個街坊同我哋講話，佢太太仲係用緊2G電話同埋手機嘅，但近排喺廣福邨同宏福苑都收唔到電話，本身以為係個電話壞咗，但出去大埔墟再買過另一個電話同電話卡，又試過無問題之後，翻到嚟廣宏就發現又唔得。於是街坊打咗幾個電話去問，發現原來係同「頻譜指配」有關係。但佢又唔係好明，又見無咩宣傳，於是過嚟問我哋。

我哋淨係喺網上面查到啲資料，於是就問通訊局，終於等到啲文件回覆，了解到發生咩事喇：
依家用嘅2G服務就係「900同1800兆赫頻帶內的頻譜」提供
呢兩條頻帶分別會係今年1月同9月屆滿，之後再重新指配
營辦商有機會決定用嚟做2G以上嘅服務，所以有啲地方會收唔到
如果全面停用2G要同通訊局申請，同埋要安排好個啲客戶之後嘅安排
但係如果唔係全面停止，只可以問翻營辦商有無優惠升級，而繼續用2G只能忍受某啲地方無得用
所以通訊局覺得營辦商自己可以搞掂曬所有嘢，唔會提供咩補貼或者支援

所以，某啲地方喺9月之後，仲用緊2G就收唔到嘅，如果大家都有類似情況就最好問翻營辦商，或者搵我哋都得。而個街坊太太最後自己又用多咗一筆錢去「升級」部電話同電話卡，佢話自己都算係受害者，但見唔到政府有啲咩宣傳，所以希望我哋同大家講聲。如果大家就呢件事有查詢，可以問返我哋。

#社區跟進 #2G服務 #廣福 #宏福

大埔墟站行返過廣福邨近大埔河位置有電訊嘅工程，所以封咗行人路，大家路過時要小心，踩單車嘅朋友記得慢駛同留意轉彎位有無行人啊🙏🏼 工程預計整埋聽日。 #大埔 #廣福邨 #社區跟進

更新：今日電檢時出現問題，現時廣仁樓部分單位電力供應、全座供水 升降機、部分公眾位置燈服務暫停 正進行搶修。據管理處經理估計，未必能夠於下晝三點前完成搶修。

#廣福邨 #社區跟進 #停電

【漁船燈光】

之前收到有居民講，喺白石角海面有架船嘅燈，打平咁照向居民方向。我哋問咗海事處，佢哋已經跟進緊，海事處都認為漁船咁近民居，會對居民造成滋擾。佢哋同咗漁業代表開過會，要求佢哋跟翻法例去捕魚，亦都同咗其他部門溝通咗，會繼續跟翻呢件事。如果大家仲見到有類似情況出現，可以通知我。

我都八卦問過點解無啦啦會喺吐露港到咁樣捕魚，海事處就講其實就因為係南海嘅休漁期，所以漁船就要另外搵方法去搵食。

（感謝居民提供圖片）

#白石角 #吐露港 #漁船 #社區跟進

【今明兩晚 緊急刨鋪工程：南運路與廣福道十字路口行車路】

我哋收到通知，南運路與廣福道十字路口行車路今明兩晚會有緊急刨鋪工程，各位街坊請留意，呢兩晚可能都會有啲低沉嘅隆隆聲。

今晚（07/06/2021）封閉大埔道元洲仔段西行眼鏡橋至南運路的一段左一線(慢線) 及 封閉王肇枝中學對出的一段南運路南行 左一線(慢線) 「長度超逾 10 米的車輛將臨時禁止由大埔公路(元洲仔段)(西行)，左轉往南運路(南行)。 」；聽晚（08/06/2021）封閉王肇枝中學對出的一段廣福道東行左一線(慢線) 「長度超逾 10 米的車輛將臨時禁止由大埔公路(元洲仔段)(西行)，左轉往南運路(南行)。 」

#社區跟進 #廣福邨 #大埔 #緊急刨鋪

【不只玻利維亞！大埔都有「天空之鏡」.....咦咪住先？樓下花槽嚟嘅？】

哇！除咗玻利維亞，原來大埔都有「天空之鏡」㗎！想知喺邊度，等我話你知啦！就係喺...... 咪住先，廣福邨啲花槽嚟嘅😨😨😨

之前有街坊見到平台嘅花槽落完雨都有嚴重積水，我哋打完風嘅時候再去睇，都發覺同樣情況，而且過幾日都唔退。我哋向熟悉花槽情況嘅朋友了解，佢哋認為係種種原因導致泥土實曬，令到花槽嘅去水口無法發揮作用，解決方法可能係需要起曬成個花槽。我哋向房署反映過，佢哋一直話會研究點搞，但好耐都未有實質行動。直至近日，終於見到有經理連同花王去平台嘅花槽去跟進，睇下有無機會翻鬆泥土去改善去水。我哋會密切跟進，希望天空之鏡唔好再喺廣福邨出現啦。

#廣福邨 #社區跟進 #差啲以為係池塘 #係咪用嚟養蚊

收到居民反映，創新路近科學園路交界爆糞渠已經幾日，但仍然未維修完畢，以至搭車經過都會有臭味
渠務署回覆：因爆渠位置上橫跨多條行車線，使渠務人員難以在日間維修，需要深夜才能作緊急工程。按照現時進度，需要今晚或明晚才能完成。署方表示緊急工程後應不會再有臭味傳出。

#白石角 #科學園 #社區跟進

【宏福苑有人踩線 請大家警惕！】

年近歲晚，大埔治安都唔係太好，繼大埔之前唔少村屋之前有人爆格，尋日我地收到宏福苑嘅街坊求助。街坊住宏仁，遇到有人撳門鐘，街坊應門後對方神色鬼祟，然後自行離開。街坊向保安反映，但街坊話保安冷待佢，故此非常擔心。另外有街坊都反映近排宏福苑有失竊事件發生，故此我哋都想提提大家，請大家出入小心，鎖好門窗，好似呢位街坊見到可疑人士出入，請你同管理處或者我哋講，唔好覺得自己太多事。另外我哋都已經同管理公司反映呢個問題，要求佢哋加強保安，唔好畀同類時間再發生。

#宏福苑 #社區跟進

【廣福邨停車場外近長凳滴水】

有街坊反映呢個位置已經滴水一段時間而且越來越嚴重，我哋都同咗管理處反映。嗰個位置嘅管理權因為停車場賣咗畀領展，所以有啲複雜，今次管理處去咗睇之後，認為係停車場入面嘅有個水管滲水導致，已經聯絡咗領展方面一齊跟進。但由於師傅放假等原因，工程應該要過年之後先會完成。

#廣福邨 #滴水 #社區跟進

星期一早上，同大家Update下社區內嘅情況：

（1）廣福商場嘅扶手電梯，上星期三做例行檢查嘅時候發現有問題即時停用，依家承辦商仍然等待組件來貨，暫時仍然未知幾時會整好，上惠康嗰層仍然係有上無落，要麻煩大家等𨋢或者行樓梯一段時間。

（2）之前我哋見到廣福邨嘅保安同清潔工都唔係好夠防護，有人話要自己買面罩等等防疫。所以上個星期我哋聯絡咗清潔公司，送咗啲Face Shield俾佢哋；至於保安，管理處話佢哋已經訂購咗Face Shield，並且已經於上星期分發俾保安。喺周圍都係確診嘅時期，前線嘅保安同清潔其實都好高風險，希望大家都多多體諒同支持依家仍然要日日出街返工，維持城市運作嘅人。

（3）自從公佈咗送贈退燒藥計劃之後，都收到唔少街坊求助，呢幾日我哋都將退燒藥送去唔同嘅地方，希望幫到大家。知道好多區都無區議員，如果真係完全搵唔到人幫手，我哋都盡量睇下可以點幫，早兩日助理都有送藥去到寶鄉邨同埋大埔墟唐樓。不過如果住得遠就未必送到，同埋未必即刻幫到手🙏另外都好多謝有個別街坊聽到呢個計劃之後主動聯絡我哋話有多退燒藥可以轉贈，如果有嘅話可以繼續聯絡我哋！

（4）退燒藥以外嘅物資，例如口罩、搓手液、快測套裝等我哋都仲有少量，可以送去隔離者嘅門口。其他物資例如乾糧以及其他藥物等等如果真係好需要，我哋都可以幫手代購，如有需要請聯絡我哋（致電/whatsapp 24322008），我哋買完影返收據俾你，可以用Payme/FPS俾翻錢我哋。

另外社區雪櫃仍然運作當中，繼續歡迎街坊酌量領取物資！

#社區跟進 #社區自救 #大埔扎根 #攜手革新 #大埔 #廣福邨

【三月十一日更新】

到咗星期五上晝，又同大家Update下呢個禮拜嘅社區嘢喇。

（1）廣福商場上落惠康嘅電梯尋日已經整好，大家可以唔使等𨋢或者行樓梯落嚟喇。講起行樓梯，今個禮拜有位婆婆喺廣福麥當勞行樓梯落嚟嘅時候不慎跌倒，佢朋友同商場保安嘗試Call白車，但白車根本Call唔到，非緊急情況隨時要等幾個鐘（都未必有車）。最後要靠朋友抬婆婆去搭的士入醫院。希望大家非緊急嘅情況都唔好Call白車，因為香港嘅醫療負荷已經去到爆曬煲...。

（2）今個禮拜我哋繼續為居家隔離嘅朋友送退燒藥同快速測試套裝等物資。除咗好多區內街坊求助之外，我哋都收到唔少大埔其他區域嘅街坊求助，有啲區嘅議員畀政府DQ咗，又有啲議員拒絕幫助同埋唔開Office，我哋都唔希望佢哋搵唔到人幫手，所以尋日我哋都去到太和同埋太湖花園送上物資，希望幫得就幫。如果住大埔嘅大家真係需要幫手，都可以聯絡我哋；另外我哋都繼續歡迎物資捐贈，特別係快速測試套裝，唔夠快測套裝送去大家屋企我哋都係自費買㗎咋。政府一個仙都無俾過我哋去派防疫物資，呢個情況唯有靠我哋互相支持自救！

（3）某個政黨一直發放錯誤嘅訊息，直至尋日佢哋都仍然貼緊核酸陽性嘅Link同QR Code叫快測陽性嘅人登記，希望大家都唔好俾佢哋嘅錯誤資訊影響到。我哋辦事處都整咗幾張海報，關於居家抗疫嘅物資預備、藥物須知、居家隔離嘅流程、確診後幫到手嘅電話、注意事項，以及初步陽性登記平台嘅資料。

大家保重加油！

#社區跟進 #社區自救 #大埔扎根 #攜手革新 #大埔 #廣福邨

早前我哋收到白石角嘅司機反映，科研路右轉創新路嘅工程水馬擺得好開，令到車身比較低嘅車右轉前完全睇唔到創新路嘅路面情況，影響行車安全。我哋聯絡咗路政署跟住返個問題，但承辦商嗰邊因為太多人確診所以無辦法開工。到今日佢哋終於搬返埋啲水馬，司機都同我哋講好咗好多。

#社區跟進 #白石角 #道路安全

【石屎剝落意外跟進】

尋晚意外發生後，我哋見到現場都即場圍封咗，去到夜晚八點幾，房署工程車到咗現場跟進，檢查附近範圍內有危險嘅石屎，一次過拆除之後再補返底油。期間需要繼續封路，要好似尋晚咁兜入巴士線；工程原本預計今日下晝完成，但我哋都見有危險嘅位都幾多，都拆咗好一段時間，暫時該路段仍然封閉。見到拆走有即時危險嘅石屎後，成個天花都係窿。

根據記錄，成個車路上蓋嘅範圍本身舊年計劃做一次全面檢查，但結果只係做咗兩邊巴士站嘅檢查，因為中間涉及封路，檢查嘅建議俾路政同埋警察Ban咗。今次事件證明揭露咗廣福邨建邨四十年已經有好多日久失修嘅地方，理應盡快做更全面嘅檢查工作。我哋將會持續跟進善後維修工作，同時間都呼籲如果大家見到邨內有咩地方有石屎有剝落危險，請你同管理處（26584430）以及我哋講。

#廣福邨 #石屎剝落 #意外 #社區跟進

【互委會解散後點算？】

年初民政局長突然Send信去畀全港咁多個互委會，話要分階段解散佢哋。但公佈完之後呢，又咁耐都無進一步安排公佈，但今日（3月31日）已經係部分互委會嘅Claim錢截數日喇。除咗關心互助委員會Claim唔切錢嘅問題之外，仲有好多問題仍然被懸擱，好似成個決定無出現過，無須跟進咁。

之後用乜嘢維繫社區連結？用咩渠道俾街坊上達民意？有咩措施要基層組織配合解釋，幫幫手嘅？現有會址會俾邊個用？甚至，決定點樣管條屋邨，有Budget可以批嘅「屋邨管理諮詢委員會」會點樣處理？呢啲問題都有待民政總署以及房屋署解答。因此我哋今日致函民政總署署長以及房屋署署長，希望獲得解答，希望佢哋一解廣大市民疑竇。

#社區跟進 #互助委員會