【#助理T手記：自肥的Banner？】

如果大家呢幾日有經過廣福邨行去火車站條橋，或者都會見到有幾塊手畫嘅Banner。見到有人Share咗入前夫反擊戰嗰啲應援Group，亦有人笑言話係公器私用（自肥）。呢個掛Banner嘅活動以至Banner上面係咪可以應援，作為「搞手」我都想同大家分享一下睇法。

［Banner位可以點用？］
區議員作為政府承認嘅民意代表，係會獲分配一啲Banner位嘅，一般區議員都會有十個八個位置，用作「為促進公眾關注或參與地方行政和社區建設事務而與選民溝通所展示的宣傳」，至於點樣先為之以上用途，其實都係無特別嘅定義，大部分議員都會用嚟做議員服務嘅宣傳或者一啲政策措施嘅爭取或要求。而大家用下用下，就好似慣咗Banner位一定要係成功爭取，或者要求政府乜乜乜咁。

但去到2022年，其實大家都知道區議員基本上都無乜權力去爭取到啲咩（自身都難保），Banner掛任何政策措施嘅內容，喺咁「完善」嘅香港其實都顯得好蒼白無力。我自己會諗，或者我哋唔應該再諗咁多議事嘅政治，呢一套2019年前或者仲有得講，宜家繼續配合呢套遊戲嘅方式，只會令自己更加迷失。

［其實好多嘢都係社區建設］
社區建設（Community Building）其實根本就唔只一啲好正經嘅議題，而係關乎大家點樣一齊生活。既然大家平時嘅生活都唔係得紅綠燈有幾多秒，咁點解Banner唔可以容納多啲有關平時大家鍾意啲咩嘅話題呢？當大家見慣議員好正經咁祝大家新年快樂，我就覺得祝大家Day Day平安、福至芯駖、Ivy屋潤、瑤瑤領先仲開心喇～

當區議員仍然有少少空間立足社區，或者開放Banner嘅空間畀大家發表下，祝福下唔同嘅人，本身就係一件推動緊社區建設嘅事。

［2022年的公民參與］


還記得立場最後一個Series係講「我哋有歌」，就係講Mirror以至整個樂壇嘅發展原由，好多人無得再放心力落政治，或者已經灰到無心機，尋求娛樂嘅慰藉之餘，歌同埋追星反過來可以鼓勵到大家。到底喺社會運動被迫偃旗息鼓、紅線以至社會監控處處嘅時候，仲可以點樣講公民參與呢？我認為答案係我哋如何重新看待我哋香港人嘅共同生活，點樣喺細小嘅空間去到盡力好好生活，實踐民主自由嘅生活方式。

一齊畫新年嘅祝賀Banner係好自由嘅一件事，只要你想畫咩都可以畫，結果有街坊寫準時收工有好多共鳴，之後有街坊畫女團嘅祝賀語，又有更多街坊開心，甚至特登夜晚再去多一次，呢啲咪其實就係社區嘅連結囉～當我哋重視返社區嘅小地方，或者會容易少少重拾喺呢個年代生存嘅勇氣。

* * * * * * * * * * * * * * *
礙於特首選舉地政話要收返啲Banner位，大家如果要同街坊畫嘅Banner見面就要爭取時間喇～大年初二或之前大家經過路過，都不妨同佢哋影返幅相呀！

T

#助理手記 #Banner #應援Banner #Collar #其實係街坊畫 #不過我都幾鍾意 #有無蘇蝦揮個手 #廣福邨 #社區建設