ရန်ကုန်၊ သင်္ဃန်းကျွန်းမြို့နယ် ရဲစန်းကို လက်ပစ်ဗုံး ပစ်သွင်း တိုက်ခိုက်မှု ရဲ ၂ ဦးသေဆုံး၊ လူနာတင်ကား ၂ စီး ရဲစခန်းထဲ ဝင်ရောက်သွား

ရန်ကုန်၊ မတ် ၂၅

ရန်ကုန်မြို့၊ သင်္ဃန်းကျွန်းမြို့နယ် ရဲစန်းကို လက်ပစ်ဗုံး ပစ်သွင်း တိုက်ခိုက်ရာ ရဲ ၂ ဦးသေဆုံးပြီး လူနာတင်ကား ၂ စီး ရဲစခန်းထဲ ဝင်ရောက်သွားကြောင်း Urban Justic အဖွဲ့ခေါင်းဆောင် Venom က ရန်ကုန်ခေတ်သစ် မီဒီယာသို့ ပြောဆိုသည်။

ယနေ့ မတ်လ ၂၅ ရက်နေ့ ညပိုင်းတွင် သင်္ဃန်းကျွန်းမြို့နယ် ရဲစခန်းကို Urban Justic အဖွဲ့က လက်ပစ်ဗုံး ၂ လုံး ပစ်သွင်း တိုက်ခိုက်ရာ ရဲ ၂ ဦးသေဆုံးပြီး ၂ ဦး ပြင်းထန် ဒဏ်ရာရရှိခဲ့ကြောင်း သိရသည်။

"ဒီည သင်္ဃန်းကျွန်း ရဲစခန်းကို လက်ပစ်ဗုံး ၂ လုံးနဲ့ ဆော်တာ ရဲခွေး ၂ ကောင် သေတယ်။ ၂ ကောင် ပြင်းထန် ဒဏ်ရာရတယ်" ဟု Urban Justic အဖွဲ့ခေါင်းဆောင် Venom က ပြောဆိုသည်။

အဆိုပါ တိုက်ခိုက်မှု ဖြစ်ပွားပြီးနောက် ရဲစခန်းအနီးရှိ လမ်းမကို ပိတ်ချထားကာ အင်အားအများအပြားဖြင့် စစ်ဆေးမှု ပြုလုပ်နေပြီး ရဲစခန်းအတွင်း လူနာတင်ကား ၂ စီး ရောက်ရှိကြောင်းသိရသည်။

ယင်းမာပင်တွင် သပိတ်စစ်ကြောင်း ၂ ခုပေါင်း၍ 'မတရားတဲ့ စစ်မှုထမ်းဥပဒေကို ဆန့်ကျင်ကြ' စာသားကြွေးကြော်ကာ ချီတက်ဆန္ဒပြ

ရန်ကုန်၊ မတ် ၂၅

စစ်ကိုင်းတိုင်း၊ယင်းမာပင်မြို့နယ်တွင် "တော်လှန်ရေး သွေးမအေး တောင်ပုသွေး ''သပိတ်စစ်ကြောင်းနှင့် '' ပြည်သူ့အားမာန် '' သပိတ်စစ်ကြောင်းတို့ ပူးပေါင်းပြီး 'မတရားတဲ့ စစ်မှုထမ်းဥပဒေကို ဆန့်ကျင်ကြ' စာသားကိုင်စွဲကြွေးကြော်ကာ ကျောင်းသားပြည်သူလူထုသည် စစ်အာဏာရှင်ကို ဆန့်ကျင်ချီတက်ဆန္ဒပြခဲ့ကြသည်။

ကော့ကရိတ်မြို့နယ်၊ ကော့ဘိန်းနယ်မြေရဲစခန်း သိမ်းပိုက်ရရှိမှုတွင် စစ်ကောင်စီတပ်ဖွဲ့ဝင် ၅ ဦးသေဆုံးပြီး ၂၃ ဦး လက်နက်ချ အညံ့ခံ၊ လက်နက် ၂၇ လက်နှင့် ခဲယမ်းအများအပြား သိမ်းဆည်းရရှိ

ရန်ကုန်၊ မတ် ၂၅

ကရင်ပြည်နယ်၊ ကော့ကရိတ်မြို့နယ်၊ ကော့ဘိန်းနယ်မြေရဲစခန်းကို ယနေ့ တိုက်ခိုက် သိမ်းပိုက်ရရှိမှုတွင် စစ်ကောင်စီတပ်ဖွဲ့ဝင် ၅ ဦးသေဆုံးပြီး လက်နက်ချအညံ့ခံသူ ၂၃ ဦး ရှိကာ လက်နက် ၂၇ လက်နှင့် ခဲယမ်းအများအပြား သိမ်းဆည်းရရှိကြောင်း Lion Battalion ဗျုဟာစစ်ကြောင်းမှ သတင်းနှင့်ပြန်ကြားရေးတာဝန်ခံ ရဲဘော် အညာသားက ရန်ကုန်ခေတ်သစ်သတင်းဌာနထံသို့ ပြောဆိုသည်။

မတ်လ ၂၄ ရက်နေ့ နံနက် ၇ နာရီမှ စတင်၍ KNU တပ်မဟာ ၆ နယ်မြေ၊ ကော့ကရိတ်မြို့နယ်၊ ကော့ဘိန်းနယ် မြေ ရဲစခန်းကို စတင်တိုက်ခိုက်ခဲ့ကြောင်း၊ မတ်လ ၂၅ ရက်နေ့ မွန်းလွဲ ၁ နာရီ ၁၀ မိနစ်အချိန်တွင် ကော့ဘိန်း ရဲစခန်းကို အပြီးသတ် တိုက်ခိုက်သိမ်းပိုက်ရရှိခဲ့ကြောင်း သိရှိရသည်။

အဆိုပါ တိုက်ပွဲအတွင်း စစ်ကောင်စီတပ်ဘက်မှ ၅ ဦးသေဆုံးပြီး လက်နက်ချ အညံ့ခံသော စစ်သုံ့ပန်း ၂၃ ဦးကိုလည်း ဖမ်းဆီးရရှိကြောင်း၊ သေနတ် ၂၇ လက်နှင့် လက်နက်ခဲယမ်းအမြောက်အမြားလည်း သိမ်းဆည်းရရှိခဲ့ကြောင်း၊ စစ်တပ်က လေကြာင်းမှ တိုက်ခိုက်မှုများစွာ လုပ်ဆောင်ခဲ့ပြီး ကျေးရွာစာသင်ကျောင်းနှင့် ပြည်သူလူထု၏ နေအိမ်များ ထိခိုက်ပျက်စီး ခဲ့ရကြောင်း သိရှိရသည်။

"တိုက်ပွဲမှာ တော်လှန်ရေးရဲဘော် ၂ ဦး မြင့်မြတ်စွာအသက်ပေးလှူခဲ့ရပါတယ်။ ပြည်သူ ၁ ဦးလည်း အသက်ဆုံးရှုံးခဲ့ရတယ်။ စစ်ကောင်စီတပ်ဘက်မှ လက်နက်ချ အညံခံ သူ ၂၃ဦးနှင့် မိသားစုဝင် ၁၈ ဦးတို့ကို လူအခွင့်ရေးနဲ့အညီထိန်းသိမ်းထားပြီးတော့ NUG ထံသို့ စနစ်တကျ လွှဲပြောင်းပေးလိုက်ပါတယ်" ဟု ရဲဘော်အညာသား က ရှင်းပြသည်။

ကော့ဘိန်းနယ်မြေရဲစခန်းသိမ်းတိုက်ပွဲတွင် Lion Battalion စစ်ကြောင်း၊ ဂဠန်စစ်ကြောင်း၊ KNDOတပ်ရင်း၆၊ မွန်ပြည်လွတ်မြောက်ရေးတပ်တော် MLA၊ မွန်ပြည်သစ်ပါတီ (AD) ၊ ရှားထူးဝေါ်နည်းပညာတပ်ဖွဲ့အယ်ဖာဘတ်ဒရုန်းတပ်ခွဲ အပါအဝင် KNLA နှင့် PDF မဟာမိတ် တော်လှန်ရေးတပ်များ ပူးပေါင်းပါဝင်ကြောင်း သိရှိရသည်။

ကရင်ပြည်နယ်ကော့ကရိတ်ခရိုင်အတွင်းရှိ အုပ်ချုပ်ရေးမှူးများအနေဖြင့်စစ်ကောင်စီအတွက်တပ်သားစုဆောင်းရန်လုပ်ဆောင်ပါက မည်သူ့ကိုမဆို ပြင်းပြင်းထန်ထန်ဖမ်းဆီး အရေးယူသွားမည်ဖြစ်ကြောင်း၊ အကြမ်း ဖက် စစ်ကောင်စီထံ တာဝန်မထမ်း ဆောင်လို၍ လက်နက်ဖြင့် CDM ပြုလုပ်လို သူများအနေဖြင့် MOD ထံ ချိတ်ဆက်ပြီး ပြည်သူလူထုနှင့်အတူ အမြန်ဆုံး ရပ်တည်ကြရန်နှင့် ကရင်ပြည်နယ် ၊ ကော့ ကရိတ်ခရိုင် အတွင်းရှိ အုပ်ချုပ်ရေးမှူးများ အနေဖြင့် စစ်ကောင်စီအတွက် တပ်သားစုဆောင်းရန် လုပ်ဆောင်သူ မည်သူမဆို ပြင်းပြင်းထန်ထန်အရေးယူမည်ဖြစ်ကြောင်း အသိပေးထားသည်။