南區有班地盤佬因為受不住資方羞辱，臨時停工之餘仲要扔哂佢地啲嘢出街。佢地走上街佔路抗議。眼見好多人，見地盤佬抗爭就出來冷嘲熱諷。我實在想問一句：乜地盤佬冇手足？

777編按：大家仲記唔記得工程巴？

// 事實上三角鐵馬嘅其中一個來源係14年雨傘啲防區手足得閒無聊鑽研出來。//

抽水唔只可能抽到「手足」，更大嘅問題係將香港人「失敗主義」嘅醜態表露無遺。就係因為呢種失敗主義，每逢有人話我要喺香港堅持落去，總有班人出來話：「走啦留喺度冇用架。」「唔好傻啦走得快好世界。」

今日呢班地盤佬，可能有黃有藍，我地唔會知。但既然佢地因為唔甘心被羞辱，走上條路set roadblock佔路。今日佢地可以為尊嚴抗爭，呢種習慣點解第日唔可以變成向政府抗爭？有乜撚嘢好笑？

如果我哋抱有進攻型嘅心態，我地應該為佢地敢於抗爭而覺得開心至係，就應該盡可能連結唔同受壓迫嘅人。個個人受壓迫嘅原因都唔同，表面睇上去可能都同民主、反獨裁呢啲訴求唔同。但如果我地係想進攻，就會連結呢啲人，同呢啲人一齊抗爭。呢啲人入面有黃有藍。通過共同抗爭，黃嘅人就會更加有抗爭經驗。藍嘅人就可以慢慢習慣反抗，同時通過抗爭經驗引導到去理解政治不公義係點樣打爛所有人嘅飯碗，返工生活同政治係不可分割。

但失敗主義嘅觀點就係好似今日嘅輿論噉。至緊要好笑，至緊要搵到個人畀我串。失敗主義之下，每個人唔再諗點樣繼續打場仗落去，甚至要盡力笑鳩有潛質抗爭同堅持嘅人同事。只有笑鳩佢地，先可以合理化自己唔再堅持。

當然，睇到呢度大家一定會問：依家仲點進攻？冇錯，我地而家嘅政治環境每日惡化緊。但至少我地仍然可以通過進攻型心態，喺民間保持力量。譬如話香港支持民主嘅新舊工會逐個解散。但每個業界內部，多數支持民主嘅人都未死哂架嘛。噉呢個時候要堅持做嘅，就係用非組織嘅形式，保持人同人嘅關係。

我哋繼續以人傳人嘅方法，互相支持。同時keep住等大家明白，個政治係唔公平，個社會係唔公平。呢啲民間教育可能好簡單，譬如一班信得過嘅人可以聚埋一齊屌下政府屌下狗，可以幽默取笑一啲唔公義嘅政策。保持大家嘅關係有時就已經可以支持到彼此好多。呢種關係可以成為信任基礎，喺往後時機成熟時再度發展成組織同抗爭力量。

據原文略作刪減
BY IG @the_exiled_rebel_indomitable

#地盤佬 #瑪麗醫院 #擴大抗爭力量 #香港人團結 #進攻心態 #失敗主義 #全民抗暴