#手足投稿

全文: www.instagram.com/p/CUeT1aLrkxZ

1.10.2021 記錄
.
// 仲喺香港嘅朋友話已經好少人覺得要幫手足，事隔咁耐，每個人都應該可以生活到。其實不然，好多 2019 年已去咗外國，有身份嘅當然已開始慢慢適應生活。但 2020 年啱啱走甩嘅，面對變幻國際局勢，身份未定真係唔能夠太大安旨意。而仲留喺香港嘅，有朋友啱啱出嚟做嘢，因為被捕過隨時要上庭無咗份工；有繼續返工嘅受政治打壓而隨時失業，經濟亦未必能夠完全自立；有啲未畢業嘅，因為抗爭無得再返學，面臨上庭壓力同家庭壓力，情緒仍未能平伏；有啲坐緊；有啲因為要上庭，除咗律師費仲需要好多錢去揼靚 case。
.
錢嘅問題當然易講，但佢哋更大面對嘅係心理壓力。有位同我講，喺香港再搵唔到人傾計，因為身邊嘅人，即使係同路人，有啲事無面對過嘅話係唔會明白，甚至講咗好多難聽說話。仲喺香港嘅佢哋，唔可以再好似以前咁易搵到信得過嘅心理支援，即使有都無財力可以負擔，加上移民潮同被捕潮，好多都喺失去應有心理支援下承受巨大壓力。口可以好輕鬆講去坐吓，但唔多唔少對於長時間審訊及進進出出監獄都感到好攰。
.
寫出嚟，唔係要大家捐款或者去搵手足傾計，而係想大家知道確實發生緊嘅事。有時坐監唔係最折磨，反而係生活上離唔開抗爭影子，未來亦離唔開，先係一種折磨。有人叫我朋友「睇開啲，走出個圈啦，人始終要生活。」，可惜審訊未完，或者身份未定，甚至你親友坐緊，或者自己將要去坐，一切都唔能夠輕易話「離開個圈抖吓咪得」。//

#在囚手足 #在囚 #手足 #移民 #香港獨立唯一出路 #hk #hongkong #hkprotest #前線 #流亡 #exile #心理 #心理支援 #上庭