【我今日正式入獄，有少少說話想同大家分享】

各位香港人，或者我哋來到依加呢刻，都會覺得徬徨失措。但我懇請你哋相信身邊嘅人、相信幾十萬曾經喺街頭上生死與共嘅手足，係唔會輕易忘記光復嘅願景。目前的確係潛龍勿用嘅時刻，但仍然係有好多人默默耕耘，從自己嘅朋友、社區、喜好、專業出發，用各式各樣嘅方法建立民間社會，對抗極權。懇請各位發揮香港民族嘅堅韌，喺低潮嘅時候組織好力量，等待機會來臨，無論以乜嘢形式，只要有人仍然係朝住我哋共同嘅目標前進，咁我所有嘅苦難都係值得。

各位隊友，我哋合作嘅時間可能唔長，但經歷好多。過程中，有啲人我哋到依加都未救到，我亦都知道仲喺度嘅人，每日起身都係同恐懼搏鬥。老實講，今夕吾軀歸故土，他朝君體也相同，但希望嗰日來到之前，大家多多保重。等閒變卻故人心，我唔能夠為將來嘅自己作承諾，但我衷心希望監獄唔會磨滅我嘅鬥志同力量，等我他日重新歸隊，會係一個更好嘅人。

團隊成員
白熊上

Source: 鄒家成 Owen Chow
#對抗極權 #香港民族 #毋忘手足 #在囚手足 #打氣