#android限定
之前因為WhatsApp新增嘅私隱條款，惹來全世界對資料安全嘅擔憂，大家紛紛轉用Signal，多咗成1000萬人，其中香港區估計都多咗幾十萬人用。隨住香港用戶數量大增，Signal亦都相當「識做」，最近更新就喺界面語言加入香港人嘅母語——廣東話！
 
呢個模式只有Android機先可以用。電話預設都係繁體中文，但只要你喺程式右上角嘅功能列揀「設定」->「介面設定」->「語言選項」揀「Cantonese（traditional）粵語」就得㗎喇。轉咗之後嘅語言相當地道，例如寫住「開個新谷」、「冚唪唥剔低話睇咗」，十分有親切感！
 
Signal除咗貼心之外，其他嘢表現都唔差嘅。消委會喺上個月將佢同其他apps比較，都大讚「介面設計簡潔易用，傳送訊息時強制使用雙重認證，私隱度較高」，而且程式提供較多保障私隱嘅功能，包括傳送一次性照片、模糊照片面部功能、訊息閱後即焚同埋「唔俾cap圖」，好適合注重網絡安全嘅香港人！
 
#signal #熄爐 #廣東話 #粵語 #網絡安全 #私隱 #私隱安全

Post by @gongjyuhok #港語學

Credit: @gongjyuhok #港語學

近日有用家發現，當通訊軟件Signal更新到最新版本，原有廣東話同維吾爾語嘅界面消失，而官方網站未有交代刪除廣東話界面嘅原因。

隨住喺香港越嚟越多人用通訊軟件Signal，佢喺上年起開始加入廣東話界面，令到佢成為香港地區嘅一大賣點。然而，近日有眼利嘅讀者發現，近日Signal更新至6.5.6版時，「粵語」版本就會消失，取而代之嘅係「中文（香港）」。當中嘅用語甚有不同，例如「是日花生」會變做華人圈常用嘅「限時動態」，「傾偈」變成「聊天」。

雖然有啲人都會批評Signal嘅廣東話譯法唔正經、奇怪，但無可否認佢嘅鬼馬翻譯都吸引咗唔少用家使用。今次更新相信都令好多人大失所望。有港語學讀者更指出，Signal都刪除咗「維吾爾話」選項，但今次更新同樣未有交代原因。

Signal對讀者去信查詢嘅最新回覆就話：「因為香港報紙用廣東話，係官方語言，所以就集中精力擺喺呢隻（書面語）。」 #signal #熄爐 #廣東話