對香港人嚟講，廣東話絕對無可取代。而最近喺美國史丹福大學嘅本科生評議會通過咗一項決議，就係要求史丹福大學恢復粵語課程。

事源要講返上年12月，史丹福大學當時以「削減開支」為由，拒絕向校內唯一廣東話課程教師張錫莉續約，令呢個由97年起設立嘅廣東話課程面臨「殺科」危機。於是，一班舊生同教職員就成立「Save Cantonese」游說校方保留廣東話課程，並且成功收集到超過4000個嚟自香港同海外嘅校友聯署支持。最終，喺師生嘅壓力下，校方先至同意改用兼職講師、開辦兩個廣東話課程。

Save Cantonese嘅成員Shawn Lee批評校方決定係忽略廣東話喺加州當地嘅重要，而且無視早年來自廣東嘅鐵路工人協助學校創辦人利蘭史丹福興建橫跨美國東西岸嘅太平洋鐵路，校方有道德責任保留廣東話，以紀念呢一班廣東鐵路工人嘅貢獻。

廣東話嘅美妙，其實世界仲有好多人都知，英國就有人因為覺得廣東話係「好靚」嘅語言所以自學廣東話、而家美國都有人為咗守護校內嘅廣東話課程而努力，所以我哋香港人都要加把勁、繼續捍衛屬於我哋嘅母語。

報導: #100毛
#廣東話 #捍衛廣東話 #史丹福大學 #粵語課程

舊年三藩市城市大學（CCSF）董事會縮減預算同裁員，當地學生憂慮會刪減廣東話課程，因此發起「Save Cantonese at CCSF」 @savecantonese_ccsf 運動，多次遊行請願爭取保留廣東話課程。近日城大董事會董事會一致投票，贊成通過「支持大學營辦廣東話課程」嘅決議。

#舊金山 #三藩市 #廣東話 #廣東話課程 #粵語課程 #粵語
Posted by #港語學 @gongjyuhok