Сурхондарёда «Damas» поездга урилди. Бир киши вафот этди

16 январь куни Сурхондарё вилояти Тангимуш ва Оқжар станциялари оралиғидаги темир йўл кесишмасида «Damas» автомобили ва ҳаракатланиб келаётган поезд иштирокида тўқнашув юз берди. Бу ҳақда ИИВ матбуот хизмати хабар бермоқда.

Хабарга кўра, «Damas» светофорнинг қизил чироғига қарамай, темир йўл кесишмасидан ўтмоқчи бўлган ва «Тошкент-Термиз» йўналиши бўйлаб ҳаракатланиб келаётган йўловчи поездининг ён томонига урилган. 

ЙТҲ натижасида автомашина ҳайдовчиси С.Х. (1995 й.т.) олган жароҳатлари туфайли касалхонага етказилган, бироқ у тиббий муолажаларга қарамай вафот этган.

Поезд воқеа жойида 13 дақиқа туриб, ҳаракатини давом эттирган.

Поезд йўловчилари орасида қурбонлар ва жароҳат олганлар йўқ, дейилади хабарда.

Каналга обуна бўлинг
👉 @gazetauz_uzb

Долларнинг расмий курси 18 сўмга қимматлади ва жами 10 519 сўм этиб белгиланди. Шунингдек, евро курси ҳам бироз кўтарилди, рубль эса арзонлади.

Каналга обуна бўлинг
👉 @gazetauz_uzb

SpaceX рекорд сондаги сунъий йўлдошларига эга ракетани орбитага чиқарди

SpaceX компаниясининг Falcon 9 ракетаси Ер орбитасига 143 та йўлдошни олиб чиқди ва битта ракета олиб чиққан йўлдошлар сони бўйича 2017 йилда қўйилган рекордни янгилади. Бу ҳақда CNN хабар берди.

2017 йилда Ҳиндистон космик агентлиги орбитага 104 та йўлдошни олиб чиққан эди.

SpaceX олиб чиққан сунъий йўлдошларнинг ўнтаси Starlink глобал тармоғи учун мўлжалланган. Компания ушбу йўлдошларни Ер юзидаги алоқа тармоқлари етиб бориши қийин бўлган ҳудудларни интернет билан таъминлашда қўлламоқчи.

Компаниянинг режаларига кўра, Starlink йўлдошлар тизими келажакда бутун Ер юзини интернет билан таъминлаши кўзда тутилган.

Шунингдек, чиқарилган бошқа турдаги йўлдошлар сайёрадаги табиат ўзгаришларини кузатиш учун қўлланилади.

Каналга обуна бўлинг
👉 @gazetauz_uzb

Навоийда ногирон шахсни арқонга боғлаб, масхара қилган шахс ушланди

Ижтимоий тармоқларда Навоий вилоятида истиқомат қиладиган 2-гуруҳ ногирони Ш. У. нинг ақли заифлигидан фойдаланиб, бўйнига арқон боғлагани акс этган видеолавҳа тарқалди. Ушбу ҳолат юзасидан вилоят ИИБ матбуот хизмати муносабат билдирди.

Унга кўра, ўрганиш жараёнида видеодаги шахс ҳақиқатдан ҳам Навоий вилояти Навбаҳор тумани Янги йўл махалласида яшовчи, 2-гуруҳ ногирони Ш. У. эканлиги аниқланган.

Ҳолат 22 январь куни соат 14:00 да фуқаро П. К. томонидан ўзининг яшаш хонадонидаги молхонасида «шунчаки ҳазил учун олингани» ва дўстларига ташлангани айтилади. П. К. ушбу видео ижтимоий тармоқларга қандай чиқиб кетганлигидан хабари йўқлигини айтган.

Ушбу ҳолат юзасидан Навбаҳор туман ИИБ ходимлари томонидан суриштирув ишлари олиб борилмоқда.  

Каналга обуна бўлинг
👉 @gazetauz_uzb

Қурилиш вазирлиги маълум қилишича, Жиззах вилоятидаги бино тадбиркорнинг ўз ҳисобидан бузилмоқда.

«Жиззахда қулаган 6 қаватли бинонинг қолган қисми ҳам талабга жавоб бермаслиги ҳамда яқин орада қулаб, одамлар соғлиғига хавф туғдириши мумкинлиги инобатга олиниб, ҳозирда атрофи тупроқ билан тўлдирилган ҳолда тадбиркорнинг ўз ҳисобидан бузиб ташланмоқда», — дейилади хабарда.

Каналга обуна бўлинг
👉 @gazetauz_uzb

Антикоррупция агентлиги Coca-Cola корхонасини хусусийлаштириш бўйича тендерни тўхтатишни сўради

Коррупцияга қарши курашиш агентлигининг ўрганишларига кўра, «Coca-Cola Ichimligi Uzbekiston, Ltd» МЧЖнинг давлатга тегишли улушини сотиш бўйича тендер шартларига киритилган мезонлар ўта юқори ва унга асослантирилмаган талаблар қўйилган.

Бу савдоларда қатнаша оладиган эҳтимолий иштирокчилар сонини сунъий чеклашга олиб келади ҳамда коррупцион омилларни келтириб чиқаришга шароит яратади, дейилади агентлик хабарида.

Агентлик давлат мулкини сотишда етарли рақобатга имконият мавжуд эмаслиги сабабли мазкур тендер жараёнларини тўхтатишни сўраб, тегишли идораларга тақдимнома киритган.

Батафсил: https://www.gazeta.uz/uz/2021/01/25/coca-cola/?utm_source=push&utm_medium=telegram

Каналга обуна бўлинг
👉 @gazetauz_uzb

Сурхондарёда ЙТҲ оқибатида 20 ёшли велосипедчи вафот этди

Сурхондарё вилояти Жарқўрғон тумани Бешбулоқ маҳалласида 25 ёшли ҳайдовчи бошқарувидаги «Nexia» 20 ёшли велосипедчини уриб юборди. Бу ҳақда «Янги давр» телекўрсатувида хабар берилди.

ЙТҲ оқибатида велосипедчи туртиб юборилишдан оғир тан жароҳати олиб, Жарқўрғон туман тиббиёт бирлашмасининг жонлантириш бўлимида вафот этган.

Мазкур ҳолат юзасидан Жарқўрғон туман ИИБ Тергов бўлинмаси томонидан билан жиноят иши қўзғатилиб, дастлабки тергов ҳаракатлари олиб борилмоқда. 

Каналга обуна бўлинг
👉 @gazetauz_uzb

Ҳафта давомида ҳаво қизиши кутилмоқда

Ўтган ҳафта охирида, совуқ об-ҳавони вужудга келтирган антициклоннинг совуқ переферияси таъсири пасая бошлади. Бугун ва эртага республиканинг барча ҳудудларида кам булутли об-ҳаво бўлиши кутилмоқда, дея хабар берди Ўзгидромет.

Кундуз кунлари қуёш ҳаво ҳароратини 3-8 даража илиқгача кўтаради, кечалари эса 3-6 даража совуқ атрофида, баъзи жойларда 8 даражагача совуқ бўлиши кутилмоқда.

Кейинги кунларда республика ҳудудларига Эрондан илиқ ҳаво массалари кириб келиши бошланади.

Барча ҳудудларда асосан кам булутли об-ҳаво бўлиши кутилмоқда. Ҳарорат аста-секин кўтарилади ва ҳафтанинг охирига келиб кечалари 0-3 даража илиқ, кундуз кунлари 12-15 даража илиқ бўлади, бу иқлим меъёрларидан 4-6 даражага юқоридир.

25-27 январда республиканинг тоғли ҳудудларида қор кўчиши хавфи сақланиб туради.

Каналга обуна бўлинг
👉 @gazetauz_uzb

Бухоролик дастурчи президентдан давлат лойиҳаларини беришни сўради

Шавкат Мирзиёев Бухоро вилоятидаги сафари доирасида IT-парк филиалига ташриф буюриб, 25 ёшли дастурчи, Monday Labs компанияси асосчиси Саидравшан Шокиров билан суҳбатлашди.

Президент ундан ўз компаниясини ривожлантириш учун нима зарурлигини сўради. IT-тадбиркор давлат раҳбаридан унга давлат лойиҳаларини ишониб топширишни илтимос қилди. Бунга жавобан Шавкат Мирзиёев давлат лойиҳаларини амалга оширишнинг учта устувор йўналишни таклиф этди.

«Қишлоқ хўжалигида қишлоқни ободонлаштириш жиддий давлат лойиҳаси. Сув, ер, ўғитлар. Соғлиқни сақлаш соҳасида пул билан катта давлат лойиҳасини тақдим этаман. Халқ таълими ҳам жиддий лойиҳа. Дастурий таъминот маҳсулотлари, фанларни қандай қилиб пухта ўзлаштириши, мактабдан кейин ўқитиш, билим бериш. Мен пул тўлайман. Қила оласанми?» — деб сўради президент.

Дастурчи ўз жамоаси билан лойиҳаларни бирма-бир амалга ошириши мумкинлигини айтган.

Каналга обуна бўлинг
👉 @gazetauz_uzb

⚡️ Президент сайловлари октябрь ойига кўчирилиши мумкин. Бунда 2021 йилги сайловлар 24 октябрга тўғри келади

Ўзбекистонда президент сайловлари октябрь ойи учинчи ўн кунлигининг биринчи якшанбасида ўтказилиши мумкин. Бу ҳақда «Газета.uz»га Олий Мажлис Қонунчилик палатаси матбуот хизмати маълум қилди.

Таъкидланишича, президент сайловлари санасини ўзгартириш бўйича Конституцияга ўзгартиш киритиш масаласи қуйи палата депутатлари томонидан сиёсий партиялар фракциялари йиғилишларида муҳокама қилинган.

Эндиликда ушбу масалани Қонунчилик палатасининг навбатдаги мажлисида кўриб чиқилиши кутилмоқда.

Агар янги тартиб қабул қилинса, 2021 йилга президент сайловлари 24 октябрга тўғри келиши мумкин.

Эслатиб ўтамиз, Конституциянинг 117-моддасига мувофиқ, ҳозирда президент сайловлари декабрь ойи учинчи ўн кунлигининг биринчи якшанбасида ўтказилиши белгиланган.

Каналга обуна бўлинг
👉 @gazetauz_uzb

80 мингга яқин ишсиз фуқарога нафақа тайинланади

Бандлик ва меҳнат муносабатлари вазири Нозим Ҳусановнинг матбуот анжуманида маълум қилишича, янги таҳрирдаги «Аҳоли бандлиги тўғрисида»ги қонун кучга кириши билан ишсизлик нафақаси ҳам ўзгаради.

«Аввал ишсизлик нафақаси илгари ишламаган ва биринчи бор иш қидираётганларга 12 ойлик давр мобайнида фақат 13 ҳафта тўланган бўлса, эндиликда ишсизлик нафақаси барча тоифадаги ишсизларга 12 ойлик давр ичида 26 календарь ҳафта давомида тўланиши белгиланмоқда», — деди вазир.

Нафақалар миқдорлари:

🔹 ишдан сўнгги 12 ой ичида маҳрум бўлганларга — аввалги ишидаги ўртача ойлик маошининг 50 фоизи, лекин МҲТЭКМдан оз бўлмаган ва ўртача иш ҳақидан ортиқ бўлмаган миқдорда;
🔹 иш ва маошдан маҳрум бўлган, 1 йилдан ортиқ танаффусдан кейин меҳнат фаолиятини қайта бошлаётганларга — МҲТЭКМнингнинг 1 баравари — 1 февралдан 747 300 сўм;
🔹 илгари ишламаган ва биринчи марта иш қидираётган шахсларга — белгиланган МҲТЭКМнинг камида 75 % миқдорида.

Каналга обуна бўлинг
👉 @gazetauz_uzb

Асли қозоғистонлик аёл АҚШ президенти протоколи раҳбари этиб тайинланди

Асель Робертс 20 январь куни АҚШнинг янги президенти Жо Байден Оқ уйга келиши билан янги лавозимда иш бошлади.

Қозоғистонда туғилган Асель Робертс (қизлик фамилияси Тўленова) АҚШ президентининг протоколи раҳбари вазифасини бажарувчиси этиб тайинланди, дея хабар бермоқда АҚШ Давлат департаменти сайти.

Асель 1976 йилда Олмаотада туғилган. 1993 йилда Жоржтаун университетининг Эдмунд А. Уолш номидаги дипломатик хизматлар мактабига ўқишга кириб, халқаро ҳуқуқ ва ташкилотлар йўналиши бўйича бакалавр даражасини тугатган.

У Барак Обама давридан бери Оқ уй протоколида 15 йил давомида ишлаб келмоқда. У қозоқ, рус, инглиз ва япон тилларини билади.

Каналга обуна бўлинг
👉 @gazetauz_uzb

«Бухоро вилоятида инглиз тилини ўргатиш бўйича раҳбар Нозима бўлади» — президент

Шавкат Мирзиёев Бухоро вилоятида ўтган йиғилишда ёшлар билан ҳам суҳбат қилди.

«Мен 15 январда муддатидан олдин инглиз тили бўйича муваффақиятли ўз докторлик диссертациямни ҳимоя қилдим. АҚШнинг Аризона штатида онлайн таҳсил олиб, халқаро ўқитувчи даражасини қўлга киритдим. Ўз ўқув инновацион марказимни таъсис этдим. Ёшларни қўшимча иш ўрни билан таъминладим» — деди Нозима Ҳолиқова.

Давлат раҳбари уни «ой молодец» деб мақтаб, бош вазир ўринбосари Беҳзод Мусаев ва вилоят ҳокими Ботир Зариповга топшириқ берди.

«Бухоро вилоятида инглиз тилини ўргатиш бўйича раҳбар буёқ [Нозима] бўлади. Беҳзод бу бўйича қарор қабул қиласан, ойлик, тагига мошина берасан. Ҳамма кўрсин ёшларга эътиборимизни. Бошқа вилоятда катта одамни қўйганинг билан Нозимахон қилган иши йил якуни бўйича ҳаммага ўрнак бўлади. Мен бунга ишонаман», — деди президент.

Каналга обуна бўлинг
👉 @gazetauz_uzb

❗️Сайловга оид қонун лойиҳаси яқин соатларда жамоатчилик муҳокамаси учун эълон қилинади

Бу ҳақда «Газета.uz»га Қонунчилик паталаси матбуот хизмати маълум қилди. 25 январда ўтказилган мажлисда депутатлар сайловга оид қонун ҳужжатлари, жумладан, Конституцияга ўзгартириш киритиш масаласини биринчи ўқишда кўриб чиққан.

Қуйидагилар таклиф этилмоқда:
🔹 Сайлов кунини — декабрдан октябрь ойига кўчириш. Бунга Давлат дастурини қабул қилиш кечикаётгани сабаб қилиб кўрсатилган.
🔹 Хориждаги ўзбекистонликларни дипкорпус ҳисобида бўлиш ёки бўлмаслигидан қатъий назар сайловчилар рўйхатига киритиш;
🔹 Парламент ва маҳаллий вакиллик органларига сайловлар билан тенг равишда президентлик сайловларини ҳам давлат томонидан молиялаштириш;
🔹 Сайловолди ташвиқоти даврида давлат ресурсларидан фойдаланишни тақиқлаш;
🔹 Сайлов комиссиялари қарорлари устидан шикоят муддатини 10 кундан 5 кунгача қисқартириш;
🔹 Ҳисоб палатасининг партиялар фаолиятини текшириш натижаларини эълон қилиш.

Каналга обуна бўлинг
👉 @gazetauz_uzb

Ўзбекистонда «Атлетико Мадрид» футбол клубининг академияси ташкил қилиниши мумкин

Бош вазир ўринбосари, Туризмни ривожлантириш давлат қўмитаси раиси Азиз Абдухакимов бошчилигидаги делегация Мадрид шаҳрига хизмат сафарида «Атлетико Мадрид» футбол клуби раҳбарияти ва мутасаддилари билан учрашди. 

«Атлетико Мадрид» футбол клуби вице-президенти Иньиго Азнар Ўзбекистон билан ҳамкорлик катта натижалар олиб келишини мумкинлигини таъкидлаган.

Учрашув якунига кўра, «Атлетико Мадрид» клуби вакиллари Ўзбекистонда футбол академиясини ташкил қилишни таклиф қилган. Клуб раҳбарияти тез орада Ўзбекистон томонига тижорий таклиф юборишини, томонлар ўзаро келишувга эришган тақдирда, клуб мутасаддилари Ўзбекистонга ташриф буюришини маълум қилди.

Каналга обуна бўлинг
👉 @gazetauz_uzb