ወለጋ በአስደማሚ የሠላም አየር ላይ ትገኛለች ሚስጥሩ ምን ይሆን ? ... የቀጠለ
   
የኢፌዴሪ መከላከያ ሠራዊት ነሃሴ 17 ቀን 2017 ዓ.ም

አቶ ጉዲና ገመዳ የሻምቡ ከተማ ምክትል ከንቲባ እና የንግድ ፤ የስራ እድል ፈጠራና ኢንቨስትመንት ፅህፈት ቤት ሃላፊ ናቸው።  የሆሮጉድሩ ወለጋ ዞን አስተዳደር መቀመጫ የሆነችው ሻምቡ ከተማ ከዛሬ  ሦስትና አራት ዓመታት በፊት የነበረችበትን የሠላም እጦትና በዚሁ ምክንያት በከተማዋ ነዋሪዎች ላይ ተፈጥሮ የነበረውን ሠብዓዊ ፤ ኢኮኖሚያዊ ፤ ማህበራዊ እና ስነ - ልቦናዊ ቀውሶች ለአፍታ አስታውሠው ሲያበቁ ዛሬ ለተጎናፀፈችው ሠላም እና የመልማት ተስፋ የምዕራብ ዕዝን በተለይም ደግሞ የቴዎድሮስ ኮርን መስዋዕትነት ፤ ፅናት እና ቁርጠኝነት አብዝተው ያደንቃሉ።

ምክትል ከንቲባ አቶ  ጉዲና ገመዳ የቴዎድሮስ ኮር አመራርና የሠራዊት አባላትን የሚገልፁበት ቃል አጥሯቸው በብዙ ሲቸገሩ በመታዘባችን የሚስጥሩ ቋጠሮ ፍቺ እዚህ ጋር ስለ መኖሩ አልተጠራጠርንም።

የሆሮጉድሩ ወለጋ ዞን አስተዳደር መቀመጫ የሆነችው ሻምቡ ከተማ ያንን ክፉ ዘመን እንድትሻገርና ዛሬ ለምትተነፍሰው የሠላም አየር ትበቃ ዘንድ ሁለንተናዊ መስዋዕትነትን ለከፈለው የቴዎድሮስ ኮር ከልብ የመነጨ ምስጋናን ቸረውታል።

ዛሬ ይላሉ ምክትል ከንቲባ ጉዲና ገመዳ በጀግናው ቴዎድሮስ ኮር አባላት ክቡር መስዋዕትነት ብሎም ጀግንነትና ፅናት ህዝባችን ሠቅዞ ከያዘው መከራ እና ስቃይ  እፎይ ብሏል። ቴዎድሮስ ኮር በቀጠናው ከተሠማራ ጊዜ ጀምሮ በአካባቢው እንደፈለገ ሲፈነጭና ንፁሃንን የግፍ ፅዋ ሲግት የነበረውን የአሸባሪውን ሸኔ ቡድን አይቀጡ ቅጣት ቀጥቷል።

የሽብር ቡድኑን አከርካሪ ሠብሮ እንዲበታተንና በየጥሻው የሚሽሎከሎክ ተራ ሽፍታነት ደረጃ እንዲወርድ አድርጎታል። ለዚህም ቴዎድሮስ ኮር ቀን ከሌት ተልዕኮውን በአስገራሚ ፅናትና ቁርጠኝነት እየተወጣ ሃገራዊና ህዝባዊ ፍቅሩን በመስዋዕትነቱ ስለማስመስከሩ ምክትል ከንቲባ ጉዲና ገመዳ ነግረውናል።

የሀገር ሽማግሌዎች በበኩላቸው በአሸባሪው ሸኔ የጥፋት ተግባራት ምክንያት የደበዘዘ የትላንት ትዝታቸውን በቁጭትና በሀዘን አስታውሠው ዛሬያቸው ብሩህ ይሆን ዘንድ ውድ ህይወቱን ሳይሰስት ለሠጣቸው ጀግናው ሠራዊት ምርቃትና ምስጋናን ሲያሽጎደጉዱለት መመልከት በመንፈሳዊ ቅናት ያቃጥላል። ምነው እኔም የዚህ ጀግና ሠራዊት አባል በሆንኩ እና እንዲህ ያለ የህዝብ ፍቅርና አክብሮትን በተጎናፀፍኩ ያሠኛል።
      
ከቅርብ ዓመታት በፊት ይላሉ የአካባቢው ተወላጅ የሀገር ሽማግሌዎች " ሆሮጉድሩ ወለጋን ጨምሮ አራቱም የወለጋ ዞኖች ለሠው ልጆች አደገኛ የሆኑ ምድራዊ ሲኦሎች ነበሩ። ንፁሃን በዘፈቀደና በአሰቃቂ ሁኔታ የሚገደሉበት፤ እድሜልክ ያፈሩት ሃብት ንብረት በማንአለብኝነት የሚዘረፍበትና የሚወድምበት፤ ተወልደው ካደጉበት ቀዬ የሚፈናቀሉበትና የሚሠደዱበት ብቻ በጥቅሉ ሠዎች መፈጠራቸውን እንዲጠሉ የሚያደርግ ነውር የሚፈፀምበት በጣም አስቸጋሪ ስፍራ ነበር " ሲሉ ይገልፁታል።
  
ዛሬ ግን ታሪክ ተቀይሮ ያ ፀረ-ህዝብና አረመኔ ቡድን አይቀጡ ቅጣት ተቀጥቶ እና አከርካሪው ተሠብሮ ትርጉም የለሽ ቡድን ሆኖ ማየት ለእኛ ወደር የማይገኝለት ድል ነው ሲሉ ይገልፃሉ። ለዚህ ድል እና ትልቅ እፎይታ እንድንበቃ አንድ ህይወቱን ለሸለመን ጀግናው ሠራዊታችንም ልባዊ ክብርና ምስጋናችን ዘለዓለማዊ ነው ባዮች ናቸው የሀገር ሽማግሌዎቹ።

በቀጠናው የተሠማራው ቴዎድሮስ ኮር ለሆሮጉድሩ ወለጋ ዞን አንፃራዊ ሠላም መስፈን ሁለንተናውን ሳይሰስት የለገሠ ጀግና አሃድ ነው። በወለጋ ምድር ላይ እየነፈሠ ለሚገኘው አስደማሚ የሠላም አየር ሚስጥርም የቴዎድሮስ ኮር እጅን በአፍ ላይ የሚያስጭን ጀግንነትና ተጋድሎ ውጤት ሆኖ አግኝተነዋል።
  
ለመሆኑ የቴዎድሮስ ኮር ማነው የት? ፤ እንዴት? መቼና በማን ተመሠረተ?  በሆሮ ጉድሩ ወለጋ ዞን ከመሠማራቱ በፊትስ ምን ምን ግዳጆችን ፈፅሟል? እነዚህን እና ሌሎች ጉዳዮችን ይዘን እንመለሳለን...

በሲሳይ ደመቀ
ፎቶግራፍ ፉራ አብደላ

የኢፌዴሪ መከላከያ ሠራዊት ድረ-ገፅ
https://dfmc.mod.gov.et/

የኢፌዴሪ መከላከያ ሠራዊት ዩቲዩብ
https://youtube.com/@fdredefenseforce-9629?si=Av-sDKCopw1FfTW2

የኢፌዴሪ መከላከያ ሠራዊት  ቴሌግራም 
https://t.me/+E_EOiTY9eq85ODI0

የኢፌዴሪ መከላከያ ሠራዊት ፌስቡክ
https://www.facebook.com/fdredefense.official

የምዕራብ ዕዝ ቴዎድሮስ ኮር የምስረታ በዓሉን እያከበረ ነው።

የኢፌዴሪ መከላከያ ሠራዊት ነሃሴ 17 ቀን 2017 ዓ.ም

"የጀግኖች መፍለቂያ ፤ የድል ምልክት " በሚል መሪ ቃል የሚከበረውን 4ኛ ዓመት የኮሩ ምስረታ በዓልን ይፋዊ ማስጀመሪያ ስነ-ስርዓትን በእንኳን ደህና መጣችሁ ንግግር ያስጀመሩት የቴዎድሮስ ኮር አዛዥ ኮሎኔል ረሺድ ኢብራሂም እንዳሉት ቴዎድሮስ ኮር የተመሠረተበትን 4ኛ ዓመት ሲያከብር ተቋሙ የጣለበትን ሃላፊነት በጀግኖች አባላቱ ክቡር መስዋዕትነት በድል እየፈፀመ ነው።

የኮሩ አዛዥ በንግግራቸው እንደገለፁት ቴዎድሮስ ኮር በጦርነት ውስጥ ተወልዶ ያደገና በእሳት ተፈትኖ እንደ ወርቅ ነጥሮ የወጣ ፈተናን የሚፈትን እንጅ በፈተናዎች የማይዝል ፤ የጀግኖች መፍለቂያ እና የምዕራብ ዕዝ መተማመኛ ክንድ ነው።

እኛ የቴዎድሮስ ኮር አባላት በፈፀምናቸው ስኬታማ ተልዕኮዎችና ባስመዘገብናቸው አንፀባራቂ ድሎች የምንረካ አሊያም የምንዘናጋ አይደለንም ያሉት አዛዡ ኮሎኔል ረሺድ ኢብራሂም በተለዋዋጭና ተቀያያሪ የተልዕኳችን ባህሪ ውስጥ ከዕለት ወደ ዕለት የሚጎመራና የሚያብብ የድል ፍሬን ለሀገር እና ለህዝባችን ማበርከታችንን አጠናክረን እንቀጥላለን ብለዋል።
  
የምስረታ በዓሉ በተለያዩ ኩነቶች ለሚቀጥሉት ሁለት ቀናት እንደሚከበር መሆኑን የገለፁት ኮሎኔል ረሺድ ኢብራሂም ፓናል ውይይት ፤ የፎቶ አውደ ርዕይ ፤ የእውቅና አሠጣጥ ስነ- ስርዓትን ጨምሮ የተለያዩ መርሃ- ግብሮች እንደሚከናወኑ ገልፀዋል። የሆሮ ጉድሩ ዞን አባገዳዎችና ሃደ ሲንቄዎች መድረኩን  በባህላዊ ምርቃትና ምስጋና አስጀምረዋል።

"የጀግኖች መፍለቂያ ፤ የድል ምልክት " በሚል መሪ ቃል እየተከበረ በሚገኘው የቴዎድሮስ ኮር 4ኛ ዓመት የምስረታ በዓል ላይ  የምዕራብ ዕዝ ምክትል አዛዥ ለውጊያ ድጋፍ አገልግሎት ሜጄር ጄኔራል ሙላት ጀልዱ ፤ የመከላከያ ህዝብ ግንኙነት ዳይሬክተር ኮሎኔል ጌትነት አዳነ ፤ የሆሮ ጉድሩ ወለጋ ዞን ዋና አስተዳዳሪ አቶ ምሬሳ ፍጤ ፤ የሻምቡ ከተማ አስተዳደር ምክትል ከንቲባን ጨምሮ የወረዳ አስተዳዳሪዎችና እና የሃገር ሽማግሌዎች፤ አባገዳዎችና ሃደ ስንቄዎች ፤ የሃይማኖት አባቶች እንዲሁም የሻምቡ ከተማ ነዋሪዎችና በየደረጃው የሚገኙ የኮሩ አመራሮችና አባላት ታድመዋል።

ዘጋቢ ሲሳይ ደመቀ
ፎቶግራፍ ፉራ አብደላ

የኢፌዴሪ መከላከያ ሠራዊት ድረ-ገፅ
https://dfmc.mod.gov.et/

የኢፌዴሪ መከላከያ ሠራዊት ዩቲዩብ
https://youtube.com/@fdredefenseforce-9629?si=Av-sDKCopw1FfTW2

የኢፌዴሪ መከላከያ ሠራዊት  ቴሌግራም 
https://t.me/+E_EOiTY9eq85ODI0

የኢፌዴሪ መከላከያ ሠራዊት ፌስቡክ
https://www.facebook.com/fdredefense.official

የማዕከላዊ አፍሪካ ሪፐብሊክ መከላከያ ሚኒስትር ሪምአውክስ ክላውድ የአየር ወለድ ማሰልጠኛን ጎበኙ፡፡

የኢፌዴሪ መከላከያ ሠራዊት ነሃሴ 17 ቀን 2017 ዓ.ም

በማዕከላዊ አፍሪካ ሪፐብሊክ መከላከያ ሚኒስቴር ሚኒስትር ሪምአውክስ ክላውድ የተመራው ልዑክ ከልዩ ዘመቻዎች ዕዝ አዛዥ ሌተናል ጄኔራል ሹማ አብደታ እና ከክፍሉ ከፍተኛ አመራሮች ጋር በመሆን በቢሾፍቱ የሚገኘውን የአየር ወለድ ማሰልጠኛ ትምህርት ቤት ጎብኝተዋል፡፡

በጉብኝታቸውም አጠቃላይ የልዩ ዘመቻዎች ማሰልጠኛ ማዕከልን እና በስሩ የሚገኙትን አራት ትምህርት ቤቶች በተመለከተ የዕዙ አዛዥ ሌተናል ጄኔራል ሹማ አብደታ ለቡድኑ ማብራሪያና ገለፃ የሰጡ ሲሆን የልዩ ሀይሎች ስልጠናን የሚያሳይ አጠር ያለ ዶክመንተሪ ፊልምም ቀርቧል፡፡

በሀገራዊ ለውጡ ተቋሙ ባደረገው ሪፎርም የልዩ ሀይሎች ማሰልጠኛ ማዕከል የማሰልጠን አቅሙን ወደ ላቀ ደረጃ በማሳደግ በሀገር ደረጃ የውጊያ ማሪሽ ቀያሪ የምድር ድሮን የሚል ስያሜ የተሰጣቸውን የኮማንዶ፣ አየር ወለድና ልዩ ሀይል ፀረ-ሽብር ሀይል መፍጠር መቻሉን አብራርተዋል፡፡

ሌተናል ጄኔራል ሹማ አብደታ የልዩ ዘመቻዎች ዕዝ ተልዕኮ እና አሁናዊ ብቃቱን ለልዑካን ቡድኑ የገለፁ ከመሆኑም በላይ ማሰልጠኛ ማዕከሉ የራሱን ብቁ አሰልጣኞች በማፍራት ለኢትዮጵያ የሚመጥናትን ሀይል እያሰለጠነ ከመሆኑም በላይ ለአንዳንድ የአፍሪካ ሀገሮችም በስልጠና መስክ ከፍተኛ ድጋፍ ሲያደርግ መቆየቱን አውስተዋል፡፡

የማዕከላዊ አፍሪካ ሪፐብሊክ መከላከያ ሚኒስትር ሪምአውክስ ክላውድ በበኩላቸው ዕዙ ባደረገላቸው አቀባበል መደሰታቸውን ገልፀው የኢትዮጵያ የኮማንዶ፣ አየር ወለድና ልዩ ሀይል ፀረ-ሽብር የስልጠና ሂደት መደነቃቸውን በመግለፅ ስልጠናው የኢትዮጵያ ሠራዊት ጥንካሬ ያሳዬ ነው ብለዋል፡፡

የማዕከላዊ አፍሪካ ሪፐብሊክ ወጣቶች በዚህ ደረጃ እዚህ ሰልጥነው ሀገራቸውን እንዲያገለግሉ ከፍተኛ ፍላጎት እንዳላቸውና ይህም በሁለቱ ሀገሮች ወታደራዊ ትብብር ስምምነት መሰረት እንደሚፈፀም ተስፋ እንዳላቸው ገልፀዋል። ዘጋቢ አብዱራህማን ሀሰን ነው

የኢፌዴሪ መከላከያ ሠራዊት ድረ-ገፅ
https://dfmc.mod.gov.et/

የኢፌዴሪ መከላከያ ሠራዊት ዩቲዩብ
https://youtube.com/@fdredefenseforce-9629?si=Av-sDKCopw1FfTW2

የኢፌዴሪ መከላከያ ሠራዊት  ቴሌግራም 
https://t.me/+E_EOiTY9eq85ODI0

የኢፌዴሪ መከላከያ ሠራዊት ፌስቡክ
https://www.facebook.com/fdredefense.official