በማህበራዊ ሚድያዎች እየተሰራጨ የሚገኘውን የስም ማጥፋት ዘመቻ አስመልክቶ ከመሠረተ ክርስቶስ ቤተ ክርስቲያን የተሰጠ የአቋም መግለጫ

የኢትዮጵያ ሙሉ ወንጌል አማኞች ቤተ ክርስቲያን ሀገርዓቀፍ ጾም እና ጸሎትን አወጀች።

የኢትዮጵያ ሙሉ ወንጌል አማኞች ቤተ ክርስቲያን ከጳጉሜ 1 -3 ድረስ በሁሉም የቤተ ክርስቲያኒቷ ክልሎች ፣ አጥቢያዎች እና አዳጊ ቤተ ክርስቲያናት ህብረት ጾም እና ጸሎት አውጃለች።

ጾም እና ጸሎት እንዲደረግባቸው የታሰቡት ርዕሶችም በመላው አገራችን በሁሉም ቦታ ሰላም እና ፍቅር እንዲሰፍን ፣ በሕዝቦች መካከል መፈቃቀርና መግባባት እንዲኖር ፣ በቀጣይ ዓመት ወንጌል ለምድራችን በመንፈስ ቅዱስ ሀይልና ጉልበት እንዲዳረስ ፣ በቤተ እምነት ደረጃ ተዘጋጅቶ ለሁሉም የቤተ ክርስቲያኒቱ መዋቅሮች የተላለፈው የ5 ዓመት ስልታዊ እቅድ ጌታ መከናወንን እንዲሰጥ ፣ በቀጣይ ዓመት በቤተ እምነት ደረጃ ስላለው የመሪዎች ምርጫ በተመለከተ ጸሎት እንዲደረግ እንዲሁም በ2018 ዓ.ም የሚደረገው የመንግስት ምርጫ በሰላም እንዲጠናቀቅና ሰላማዊ እንዲሆን ጸሎት እንዲደረግ የሚሉት ናቸው።

ቤተ ክርስቲያኒቱ ባወጣችው በዚህ አዋጅ መሰረት የቤተ ክርስቲያኒቱ አባላት እና መላው የወንጌል አማኙ ማህበረሰብ በእነዚህ ቀናት በተሰጡት ርዕሶች ላይ በጾም እና በጸሎት በእግዚአብሔር ፊት እንደሚቀርብ ይጠበቃል።

መረጃውን ከቤተ ክርስቲያኒቱ የፌስቡክ ገጽ ላይ አገኘነው።

ለኢቫንጀሊካል ቲቪ ፡ አማኑኤል ዴቢሶ

የምስራቅ ጋምቤላ ቤቴል ሲኖዶስ መካነ ኢየሱስ ቤተክርስቲያን ከGRAND PROJECT ጋር በመተባበር በሰላም ግንባታ ዙሪያ ያተኮረ የምክክር መድረክ በጋምቤላ ከተማ አካሄደ።

የምስራቅ ጋምቤላ ቤቴል ሲኖዶስ መካነ ኢየሱስ ቤተክርስቲያን ዘላቂ ሰላም ማምጣት እንዲቻል የሁሉም ባለድርሻ ካላት ተሳትፎ ሊጠናከር እንደሚገባ አስታውቃለች።

በመድረኩም ከጋምቤላ ከተማ ከአምስቱም ቀበሌ ከአኝዋሃ ዞን እና ጎግ ወረዳ የተወጣጡ የሀይማኖት አባቶች ፣የሀገር ሽማግሌዎች፣ ወጣቶች ባለድርሻ አካላት ተሳትፈዋል።

የምስራቅ ጋምቤላ ቤቴል ሲኖዶስ መካነ ኢየሱስ ፕሬዝዳንት ቄስ ኝጎዎ ኡሞድ በመድረኩ እንደተናገሩት ዘላቂ ሰላም እንዲኖር የሰላም ግንባታ ማዳበር እንዲቻል የሀይማኖት ተቋማት የሀገር ሽማግሌዎች ጨምሮ ሁሉም አካላት ለሰላም ዘብ ሊቆሙ እንደሚገባ ተናግረዋል።

ሰላም ለሰዉ ልጅ ከሚያስፈልጉት እጅግ መሰረታዊ ነገሮች ዉስጥ አንዱና ግንባር ቀደም መሆኑን ገልፀዉ የክልሉን ማህበረሰብ ሰላምና ደህንነት ማስጠበቅ ዋነኛ ተግባር አድርጋ ቤተክርስቲያኗ እየሰራች እንደምትገኝ ተናግረዋል።

የሰላም እጦት በክልሉ ባለፉት ጊዜያት በተፈጠሩ አለመግባባቶች ብዙ የልማት ስራዎች ሳንሰራ የቀረን ሲሆን የሰላምን ዋጋ በመገንዘብ የሰላም ግንባታዉ እንዲዳብር ብዙ መስራት እንደሚያስፈልግ ተናግረዋል።

የእምነት ተቋማቱ በጋራ በመሆን ያለዉን ሰላም ለማስቀጠል የጋራ የሆኑ ጉዳዮች ላይ ልንሰራ ይገባልም ብለዋል።

በክልሉ ሰላምና ፀጥታ ቢሮ የሰላም እሴት ግንባታ ዳይሬክተር አቶ ኡጁሉ ቢሩ እንዳሉት ዘላቂ ሰላም ለማምጣት እንዲቻል በየደረጃዉ ያሉ የማህበረሰብ ክፍሎች በየአከባቢያቸዉ ሰላም እንዳይኖር የሚያደርጉ መንስዔዎችን በመለየት የመፍትሄ አቅጣጫዎች ሊሰሩ እንደሚገባ አስገንዝበዋል።

የሰላም ግንባታ ለማዳበር ትኩረት ተሰጥቶ ከተሰራ ለግጭት መነሻ ናቸዉ ተብለዉ የሚነሱ ጉዳዩች ቀድመን የመከላከል ስራ መስራት ይቻላል ብለዋል።

የግጭት አይነቶችን ቀድሞ በመለየት ያለዉን ሰላም በዘላቂነት ለማስቀጠል ከወጣቶችና፣ ከሴቶች ፣ ከሀይማኖት አባቶች እና ከሀገር ሽማግሌዎች ጋር በጋር መሰራት እንዳለበት አመላክተዋል።

አንዳንድ የመድረኩ ተሳታፊዎች በበኩላቸዉ ዘላቂ ሰላምን ለማምጣት በስነ ምግባር የታነፀ ትዉልድ ማፍራት ከቤተ እምነቶች ፣ ከትምህርት ቤት እንዲሁ ከወላጅ እንደሚጠበቅ ገልፀዉ ኃላፊነት እንዳለባቸዉ በመገንዘብ ጠንከር ያለ ስራ መስራት እንዳለባቸዉ አሳስበዋል።

መረጃው የጋምቤላ ክልል የመንግስት ኮሙኒኬሽን ጉዳዮች ጽህፈት ቤት ነው።

ለኢቫንጀሊካል ቲቪ ፡ ቤተልሔም ደረጄ

በአምፕሊፋይ 2025 በተዘጋጀው የጀማ የወንጌል ስብከት ፕሮግራም አማካኝነት ከ1,200 በላይ ሰዎች ጌታን እንደግል አዳኛቸው አድርገው መቀበላቸው ተገለጸ።

በአሜሪካ ፣ አርካንሳስ ግዛት ፣ ሳሊን አውራጃ በአምፕሊፋይ 2025 የተዘጋጀው የክርስቲያኖች የሙዚቃ ፌስቲቫል ላይ ከ45,000 በላይ ሰዎች ተገኝተዋል። ይህም የአምፕሊፋይ የክርስቲያን የሙዚቃ ፌስቲቫልን በሀገሪቱ ከሚደረጉ መንፈሳዊ የሙዚቃ ፌስቲቫሎች በግዝፈት አቻ የማይገኝለት ያደርገዋል።

በፐልስ ኢቫንጀሊዝም የተዘጋጀው እና በወንጌላዊ ኒክ ሆል የተመራው የሁለት ቀን ፕሮግራም ፤ አምልኮን፣ የእግዚአብሔር ቃል ስብከትን እንዲሁም የወንጌል ስርጭትን ያካተተ ሲሆን በወጣቱ ትውልድ ላይ መንፈሳዊ መነቃቃትን ለመፍጠር ያለመ ነው።

ፕሮግራሙን በቀጥታ ስርጭት በተለያዩ አማራጮች የተከታተሉትን ሰዎች ጨምሮ አጠቃላይ ፕሮግራሙን የተከታተሉ ሰዎች ከ67,000 በላይ እንደሆነ የሚገመት ሲሆን ይህም በአሁኑ ሰዓት በአሜሪካውያን ዘንድ ለመንፈሳዊ ነገር ያለውን ረሃብ የሚያሳይ እንደሆነ ተጠቅሷል።

ያሳደረው መንፈሳዊ ተጽዕኖም የማይካድ እንደሆነ የተነሳ ሲሆን ከ1200 በላይ ሰዎች በሁለቱ ቀን ፕሮግራሞች ኢየሱስን እንደ ግል አዳኛቸው አድርገው ለመቀበል ወስነዋል። የፕሮግራሙ አዘጋጆችም የፕሮግራሙ ዓላማ “ኢየሱስን በብዙዎች ዘንድ ማሳወቅ” እንደሆነ የተናገሩ ሲሆን ወጣቶችን እና መሪዎችን በጸሎት ፣ በእቅበተ እምነት እና በወንጌል ስርጭት ለማስታጠቅ ያለመ እንደሆነም ተናግረዋል።

አምፕሊፋይ 2025 ባዘጋጀው ፕሮግራም ላይ በአብዛኛው የተገኙት ወጣቶች መሆናቸውም የአሜሪካ ወጣቶች ለቤተ ክርስቲያን ያላቸው አመለካከት እየተለወጠ ለመምጣቱ መርሃ ግብሩ አስተዋጽዖ እንዳደረገ ማሳያ ነው ተብሎለታል። የፕሮግራሙ አዘጋጅ ኒክ ሆልም ‘ይሄ ትውልድ ከኢየሱስ የሚሸሽ ሳይሆን ወደ ኢየሱስ የሜሮጥ ነው።” በማለት ተናግረዋል።

መረጃውን ከሲቢኤን ኒውስ አገኘነው

ለኢቫንጀሊካል ቲቪ ፡ አማኑኤል ዴቢሶ