Башҡортостанда ике студент егет хәрби хеҙмәткә юлланды

Бөгөн Дәүләт Йыйылышы-Ҡоролтай йорто янында Йәштәр Парламентының ике ағзаһын махсус хәрби операцияға оҙатыуға арналған сара үтте.
Егеттәр Йәштәр парламентының әүҙем ағзалары. Арсений Мангутов «Хәүефһеҙ Республика» проектының авторы ла булып тора. Арсен Хәбибуллин да патриотик сараларҙы ойоштороусы, йәмәғәт эшмәкәре. Егеттәр икеһе лә Башҡортостан кооператив техникумында белем ала, Арсен бөгөн генә һөнәри уҡыу йортонда диплом яҡлаған.

Өфөлә онкоурология форумы сиктәрендә ҡатмарлы операциялар яһалды

Өфөлә «Онкоурология аҙналығы» форумы барышында Башҡорт дәүләт медицина университеты клиникаһында робот-ассистент ярҙамында ҡатмарлы операциялар яһалды. Уны медицина университеты ректоры Валентин Павлов менән Италия белгестәре башҡарҙы. Шулай уҡ форумда Африка, Нигерия, Мысырҙан докторҙар һәм профессорҙар ҡатнаша.

Милли йәштәр театры «Аҡбуҙат» эпосы буйынса премьера тәҡдим итте

Мостай Кәрим исемендәге Милли йәштәр театры легендар әҫәрҙең логик дауамы- «Аҡбуҙат» эпосы буйынса премьера тәҡдим итте. Фантастик пьеса башҡорт халыҡ риүәйәттәренә яңы ҡараш аса, боронғо йолаларҙан рухландырылған заманса сәнғәт әҫәре образын тыуҙыра.

Мәскәүҙә МХО ветерандары көс һынаша

Башҡортостандан махсус хәрби операция ветерандары Мәскәүҙә бөтә Рәсәй ярыштарында ҡатнаша. Волейбол буйынса турнир 22 июнгә тиклем бара. Кубок өсөн 15 команда көрәшә. Беҙҙең ветерандар үҙ төркөмөндә Белгород, Кемеров өлкәләре, Бүрәт, Донецк республикалары вәкилдәре менән көс һынаша.

Башҡортостандың төп турист бренды уның күп төрлөлөгөндә

Башҡортостандың төп турист бренды уның күп төрлөлөгөндә. Радий Хәбиров Петербург халыҡ-ара иҡтисади форумында илдең әйҙәүсе киң мәғлүмәт сараларына биргән интервьюһында шулай тип белдерҙе. Журналистарҙың һорауҙарына яуап биреп республика башлығы эске туризм өсөн уникаль мөмкинлек барлыҡҡа килеүен билдәләне. Сөнки аныҡ сәбәптәр менән сит илдәргә сығыу ҡатмарлашты.

Петербург Халыҡ-ара иҡтисади форумы йәштәр майҙанын йыйҙы

Петербург Халыҡ-ара иҡтисади форумы бөгөн йәштәр майҙанын йыйҙы . Күләмле сара Рәсәйҙең 300-ҙән ашыу юғары уҡыу йорто студенттары араһында үтте. Улар илдең социаль-иҡтисади торошона бәйле сессия ултырыштарында сығыш яһаны, Рәсәй төбәктәре стендтарында ойошторолған оҫталыҡ дәрестәрендә ҡатнашты.

«Айғыр» отряды дрон ярҙамында һөҙөмтәле разведка һәм һөжүм алып бара

Күк һунарсыһы дошман позицияларын ҡыйрата. «Башҡортостан» мотоуҡсылар полкының» Айғыр» пилотһыҙ осоусылар отряды ватан алдындағы бурысын намыҫ менән үтәй. Яҡташтарыбыҙ хәҙер оптик сүстәрҙә FPV-дрондарҙы әүҙем ҡуллана башлаған. Был дошман хәрби техникаһын һәм шәхси составын юҡ итеү мөмкинлеген киңәйтә.

21 июндән 22-һенә ҡараған төндә илдә Хәтер шәмдәре акцияһы үтә

21 июндән 22-һенә ҡараған төндә илдә Хәтер шәмдәре акцияһы үтә. 1941 йылдың нәҡ ошо төнөндә фашист Германияһы Советтар Союзына һөжүм итә. Был көн Рәсәй тарихында иң фажиғәле даталарҙың береһе һанала. Бөйөк Ватан һуғышында 27 миллион совет һалдаты һәләк була. Башҡортостандан иһә фронтҡа 700 меңләп кеше китә, уларҙың 300 меңе яу яланында ятып ҡала. Хәтер һәм ҡайғы көнөндә һәр кем дәһшәтле йылдарҙы иҫкә ала.

Башҡортостанда 200-гә яҡын йорттоң ҡыйығы капиталь ремонтлана

Башҡортостанда капиталь ремонт программаһына ярашлы күп ҡатлы ике йөҙгә яҡын йортта ҡыйыҡтар тәртипкә килтереләсәк. Тәү сиратта айырыуса таушалған торлаҡ йорттарҙың түбәһе төҙөкләндерелә.

Өфөлә Йылҡысылыҡ форумы үтте: төп иғтибар – башҡорт аты һәм ҡымыҙ етештереү

Башҡорт атының генетикаһын тикшереү, уларҙың үҙенсәлектәрен асыҡлаған мәлдә фермерҙар менән ғалимдарҙы берләштереү мөһим. Әммә ул исем өсөн генә түгел, ә эш һөҙөмтәһе иҡтисадҡа ла яҡшы йоғонто яһарға тейеш, тине Илшат Фәзрахманов. Бөгөн Башҡортостан Хөкүмәте премьер-министры урынбаҫары - Ауыл хужалығы министры ҡатнашлығында Йылҡысылыҡ форумы үтте. Эшлекле осрашыуҙа төбәк ведомстволары вәкилдәре, Рәсәй һәм Ҡаҙағстан ғалимдары, йылҡысылыҡ хужалыҡтары етәкселәре һәм белгестәре, йылҡы тотоусылар ҡатнашты.

Баймаҡ районының «Ленин» хужалығы йәйләү осорона күсте

Йәйләү ‐ мул һөт осоро. Хужалыҡтар малдарын фермаларҙан йәйләүҙәргә күсерҙе. Был үҙ сиратында уларҙы иркендә тотоу, тәү сиратта, һөт күләмен арттырыуға килтерә. Баймаҡ районының «Ленин» исемендәге яуаплылығы сикләнгән ойошмала ла малдар йәйге лагерға сыҡты. Был турала киләһе сюжетта.

Владимир Путин Башҡортостанды милли рейтингтағы юғары күрһәткестәре өсөн ҡотланы

Дәүләт етәксеһенән юғары баһа. Владимир Путин Петебург халыҡ-ара иҡтисади форумының пленар ултырышында ҡатнашып, инвестиция торошо милли рейтингында юғары күрһәткестәргә ирешкән төбәктәр, шул иҫәптән Башҡортостанға ҡотлау һүҙҙәрен еткерҙе. Республиканың идара командаһы өсөн аҙна бик ҡыҙыу булды, форум майҙансығында тиҫтәләп рәсми осрашыу уҙғарылды.

Башҡортостан Башлығы кәңәшсеһе Алик Камалетдинов 50 йәшен билдәләй

Бай хәрби тәжрибәле офицер. Башҡортостан башлығының хәрбиҙәр менән үҙ-ара эш итеү мәсьәләләре буйынса кәңәшсеһе Алик Камалетдинов бөгөн 50 йәшен билдәләй. Махсус хәрби операция башланғандан алып Алик Финзир улы яугирҙар янында.

Өфөлә «Башҡортостан геройҙары» кадрҙар проектының ярым финалистары өсөн уҡыуҙар башланды

Өфөлә «Башҡортостан геройҙары» кадрҙар проектының ярым финалистары өсөн уҡыуҙар башланды. Хәрбиҙәр алдында тәжрибәле сәйәсмәндәр лекциялар менән сығыш яһай, тренингтар уҙғара. Иҫегеҙгә төшөрәбеҙ, күләмле проект Радий Хәбиров тәҡдиме менән быйыл февралдә старт алғайны. Ул Рәсәй Президенты башланғысы менән тормошҡа ашырылған «Геройҙар ваҡыты» федераль проектына оҡшаш, төбәк кимәлендә үтә. «Башҡортостан Геройҙары» проекты еңеүселәре дәүләт һәм муниципаль власть органдарына, шулай уҡ төрлө предприятиеларға эшкә урынлаштырыласаҡ. Кадрҙар проектының әһәмиәте, төп маҡсаттары тураһында БЮТ хәбәрсеһе Әлфинә Килдейәрова әҙерләгән әңгәмә.

Урал аръяғында милли проект буйынса мәктәп һәм ике балалар поликлиникаһы төҙөлә

Был турала Төҙөлөш һәм архитектура министры вазифаһын башҡарыусы Артем Ковшов хәбәр итте. Учалыла һәм Асҡарҙа "Оҙайлы һәм әүҙем тормош" милли проектына ярашлы, балалар поликлиникалары булдырыла. Асҡар ауылында 640 уҡыусыға иҫәпләнгән мәктәп төҙөлә. Бында балалар баҡсаһы ла була. Учалы үҙәк дауаханаһының хирургия корпусында ла төҙөлөш бара. Эште быйыл тамамлау бурысы ҡуйылған.

Йомағужа һыуһаҡлағысының гидротехник ҡоролмаларында капиталь ремонт була

Күгәрсен районында ошо мәсьәлә буйынса кәңәшмә үтте. Тәбиғәттән файҙаланыу һәм экология министры Нияз Фазылов белдереүенсә, һыуһаҡлағыс ҡала һәм ауылдарҙы һыу менән тәьмин итеүҙә ҙур әһәмиәткә эйә. - Бөгөнгә эште башҡарыусы компания менән контракт төҙөлгән, ремонтҡа әҙерлек бара, тине ул. Бының өсөн 432 миллион һум тотонола, уның ҙур өлөшө федераль ҡаҙнанан бүленә. Ремонт өс йыл дауам итәсәк.

Башҡортостанда күп функциялы спорт майҙансығы булдырыла

Петербург иҡтисади форумында Республика хөкүмәте һәм "Сәләмәт Ватан" йәмәғәт ойошмаһы араһында хеҙмәттәшлек тураһында килешеү төҙөлдө. Премьер-министр Андрей Назаров белдереүенсә, "Рәсәйҙә 100 спорт майҙансығы" тигән проект ғәмәлгә ашырыла. Уға ярашлы, республика райондарының береһендә күп функциялы биләмә булдырыла. Бының өсөн 10 миллион һумдан ашыу аҡса тотонола.

Киләһе йылдан Рәсәйҙә пенсияны индексациялау ике этапта башҡарыла

1 февралдән түләүҙәр уҙған йылдағы инфляция кимәленә ҡарап арта. 1 апрелдән иһә айлыҡ килемдең артыу кимәлен иҫәпкә алып күтәреләсәк. Был турала Хеҙмәт һәм социаль яҡлау министры Антон Котяков белдерҙе. 2026 йылға бюджетты әҙерләгәндә был үҙгәрештәр иҫәпкә алынасаҡ тине ул.

Башҡортостан көрәшселәре алтын миҙалдар яуланы

Малик Емилов һәм Әнүәр Әхмәтғәлиев үҙ ауырлыҡ үлсәмдәрендә чемпион булды. Рәмзил Кинйәбулатов Рәсәй йыйылма командаһы составында бронза наградаға лайыҡ булды. Көрәш буйынса донъя чемпионаты Ҡазанда үтте.

Өфөлә «Фронтҡа киткән яҡташтарға» һәйкәленә сәскә һалыу тантанаһы үтте

Сара Хәтер һәм ҡайғы көнөнә арналды. Бөйөк Ватан һуғышы йылдарында Өфө тимер юл станцияһынан фронтҡа меңдәрсә яҡташыбыҙ юлланған.
Хәтер сараһында Башҡортостан Хөкүмәте Премьер-министры Андрей Назаров ветерандар, тыл хеҙмәтсәндәре, һалдаттарҙың тол ҡатындары һәм һуғыш балаларына Башҡортостан Башлығы Радий Хәбиров исеменән рәхмәт һүҙҙәре еткерҙе.