Бөрйән районында Башҡортостан Һаулыҡ һаҡлау министрлығының күсмә коллегия ултырышы үтте

Бөрйән районында Башҡортостан Һаулыҡ һаҡлау министрлығының күсмә коллегия ултырышы үтте. Сарала тармаҡтың ярты йыллыҡ эшмәкәрлегенә йомғаҡ яһалды, милли һәм федераль проекттарҙың эшмәкәрлеге тикшерелде. Коллегияла ҡатнашыусылар Бөрйән үҙәк район дауаханаһының матди-техник базаһы менән дә танышты.

Өфөлә Борис Миркинға мемориаль таҡтаташ асылды

Өфө геоботаника мәктәбенә нигеҙ һалыусы иҫтәлегенә. Баш ҡалала ғалим Борис Миркинға мемориаль таҡтаташ асылды. Биология фәндәре докторы, профессор, атҡаҙанған фән эшмәкәре үҫемлектәрҙе классификациялау теорияһына ғына түгел, геоботаникала һанлы ысулдар эшләүгә лә ҙур өлөш индерә.

Өфөлә халыҡ сәсәне Мөхәмәтша Буранғоловтың исемен мәңгеләштереүгә арналған түңәрәк өҫтәл уҙғарылды

Рәсәйҙә Берҙәм фольклор көнө уңайынан Өфөлә халыҡ сәсәне Мөхәмәтша Буранғоловтың исемен мәңгеләштереүгә арналған түңәрәк өҫтәл уҙғарылды. Бөтә донъя башҡорттары ҡоролтайының мәғариф, фән, башҡорт телен һәм әҙәбиәтен үҫтереү комиссияһы тарафынан ойошторолған фекер алышыуҙа шәхескә музей асыу мөһимлеге билдәләнде.

Быйыл Башҡортостанда 7 мең ғаилә күп балалы тигән танытма алған

Республикала 70 меңгә яҡын ғаиләнең ошондай документы бар. Ғаилә, хеҙмәт һәм халыҡты социаль яҡлау министры Ленара Иванова улар эйә булған льготаларҙы хәтергә төшөрҙө. Ишле ғаиләләрҙә тәрбиәләнгән мәктәп уҡыусылары ҡала транспортында бушлай йөрөргә хоҡуҡлы. Колледжда белем алыуға компенсация ҡарала. Коммуналь хеҙмәттәрҙе түләгәндә ташламалар бар. Тулы мәғлүмәт менән семьярб нөктә рф сайтында танышырға була. Өс һәм унан күберәк бала үҫтергән ғаилә ишле иҫәпләнә. Танытманы алыуға ғариза күп функциялы үҙәктәрҙә тапшырыла.

“Ауыл мәҙәниәт хеҙмәткәре” программаһында ҡатнашыуға ғаризалар ҡабул ителә

Конкурс 1 авгусҡа тиклем дауам итә. Проектҡа ярашлы, ауылға йәки 50 меңгә тиклем халыҡ йәшәгән ҡалаға эшкә барған белгестәр бер тапҡыр компенсация алырға хоҡуҡлы. Башҡортостан Мәҙәниәт министрлығынан ошо турала белдерәләр. Программала мәҙәниәт йүнәлеше буйынса профессиональ белеме булған Рәсәй граждандары ҡатнаша ала. Еңеүселәрҙе махсус комиссия һайлай. Улар эшләргә тейешле мәҙәниәт ойошмаһы һәм Мәҙәниәт министрлығы менән хеҙмәт килешеүе төҙөргә бурыслы. “Ауыл мәҙәниәт хеҙмәткәре” программаһы 2021 йылдан тормошҡа ашырыла. Ул Башҡортостан етәксеһе Радий Хәбиров башланғысы менән булдырылды.

Өфө моторҙар эшләү производство берекмәһенең 100 йыллыҡ юбилей сараларында юғары ҡунаҡтар ҡатнашты

Башҡортостан башлығы Радий Хәбиров, «Ростех» дәуләт корпорацияһы генераль директоры Сергей Чемезов, «Ростех» дәүләт корпорацияһы авиация комплексы индустриаль директоры Анатолий Сердюков предприятие хеҙмәткәрҙәрен тәбрикләне. Юбилей уңайынан УМПО заводында эшләүсе өс ғаиләгә фатир асҡыстары тапшырылды.

Башҡортостан юлдарын бушатып, автомобиль хәрәкәте хәүефһеҙлеген тәьмин итәсәк

Башҡортостан юлдарын бушатып, автомобиль хәрәкәте хәүефһеҙлеген тәьмин итәсәк. Был аҙнала ил президенты Владимир Путин видеоконференция режимында М-12 «Көнсығыш» федераль трассаһының дүрт һыҙатлы Дүртөйлө-Әшит юлын асыуға старт бирҙе. Яңы транспорт артерияһы төбәктең инвестиция ҡеүәтен арттырып, сауҙа, производство, эске туризм үҫешенә яҡшы йоғонто яһар тип көтөлә. Киләсәк маҡсаттар тураһында киләһе сюжетта.

Былтыр Иглин районында 19 юл буйы сервисы файҙаланыуға тапшырылған

Былтыр Иглин районында 19 юл буйы сервисы файҙаланыуға тапшырылған. Быйыл тағы ла өс объект асыу планлаштырыла. Был аңлашыла, сөнки төбәк аша һалынған М-5 «Урал» трассаһы буйлап тәүленә 10 мең самаһы автомобиль үтә. Шуға күрә бында юл буйы сервисын үҫтереү водителдәрҙең һәм пассажирҙарҙың хәүефһеҙлеген һәм уңайлылығын тәьмин итеү өсөн бик мөһим.

«Русь» аҙыҡ-түлек банкы вәкиле -«Аҙыҡ-түлек» төбәк банкынан 33 меңдән ашыу мохтаж кешегә ризыҡ тапшырылған

«Русь» аҙыҡ-түлек банкы вәкиле -«Аҙыҡ-түлек» төбәк банкынан 33 меңдән ашыу мохтаж кешегә ризыҡ тапшырылған. Социаль йүнәлештәге ярҙам йыл дауамында ауыр тормош хәленә тарыған ғаиләләрҙең балаларына, яңғыҙ ҡалған өлкәндәргә күрһәтелә.

Өфө-Иглин-Ҡыҙыл Яр-Павловка юлы тәртипкә килтерелгән

Ремонт “Тормош өсөн инфраструктура” милли проектына ярашлы башҡарылған. Эшселәр Иглин һәм Нуриман райондарында 4 участкала юл ҡатламын яңыртҡан, уның ситтәрен нығытҡан, һыҙаттар төшөргән. “Ауыл халҡы өсөн хәүефһеҙ һәм уңайлы юл булды. Был трассанан Павловка һыуһаҡлағысына һәм башҡа матур урындарға бик күп туристар йөрөй”, - тип белдерҙе Транспорт һәм юл хужалығы министры Любовь Минакова.

Благовар районында ике инәй 100 йәшен билдәләй

Бер быуатлыҡ юбилярҙар Әҡлимә Ғәниева һәм Сәғиҙә Әхмәтшина тураһында район хакимиәте башлығы Марат Йосопов яҙған. Әҡлимә Әхкәметдин ҡыҙы 40 йылдан ашыу уҡытыусы булып эшләй. Бөгөн мәғариф ветераны балалары менән йәшәй. Сәғиҙә Мәзит ҡыҙы - комбайнсы. Ул 4 бала тәрбиәләп үҫтергән. “Инәйҙәр яҡташтарының хөрмәтен ҡаҙанды. Юбилярҙарға ғаилә бәхете, йылы осрашыуҙар, яҡындар хәстәрлеге теләйем”, - тип яҙған телеграм каналында Марат Йосопов.

Ике ай эсендә Башҡортостанда 50 кеше һыуға батып һәләк булған

Ике ай эсендә Башҡортостанда 50 кеше һыуға батып һәләк булған. Үлемесле осраҡтарҙың сәбәбе һәр ваҡыттағыса хәүефһеҙлек ҡағиҙәләрен иңҡар итеү менән бәйле. Спиртлы эсемлек эсеп һыу төшөү, рөхсәт ителмәгән пляждарға йөрөү, балаларҙы һыуҙа ҡарауһыҙ ҡалдырыу һәм башҡа сәбәптәр йылдағыса фажиғәләргә килтерә. Ҡотҡарыусылар эҫе көндәрҙә даими рейдтар ойоштора. Улар ял итеүселәргә хәүефһеҙлек талаптарын аңлатып һыу ингәндә уяу булырға кәңәш итә.

Тәбиғәт ҡосағында ял иткәндә таҙалыҡ тураһында оноторға ярамай

Шул уҡ ваҡытта тәбиғәт ҡосағында ял иткәндә таҙалыҡ тураһында ла оноторға ярамай. Был хаҡта Тәбиғәттән файҙаланыу һәм экология министрлығы иҫкә төшөрә. Ведомство һыу ятҡылыҡтарында ял итеүселәрҙе таҙалыҡты һаҡларға саҡырып мөрәжәғәт итте. Был үтенес айырыуса ҡырҙа шешлек ҡурыусыларға, балыҡ ҡармаҡлаусыларға, һыу инеүселәргә ҡағыла.

Ишембай районы Һайран ауылында янғын һүндереүселәр ярышты

Ишембай районы Һайран ауылында янғын һүндереүселәр ярышты. Ғәҙәттән тыш хәлдәрҙе иҫкәртеүҙе һәм уның эҙемтәләрен бөтөрөүҙе, янғын хәүефһеҙлеген тәьмин итеүселәрҙең һөнәри кимәлен күтәреүҙе маҡсат итеп ҡуйған һөнәрмәндәр бәйгеһе республиканың төрлө район-ҡалаларынан 100-ҙән ашыу ҡотҡарыусыны берләштерҙе.

Иорданияға урта рус бал ҡорттарының башҡорт популяцияһынан 200 күс экспортҡа оҙатылды

Иорданияға урта рус бал ҡорттарының башҡорт популяцияһынан 200 күс экспортҡа оҙатылды. Ветеринария һәм фитосанитория күҙәтеүе федераль хеҙмәтенең Башҡортостан буйынса идаралығынан хәбәр итеүҙәренсә, барлыҡ лаборатория тикшеренеүҙәре тулы күләмдә уңышлы ойошторолған һәм импортер ил талаптарына яуап бирә.

Ҡырмыҫҡалы районынан Исламовтар төбәктең бәләкәй эшҡыуарлығын күтәреүгә өлгәшкән

Ябай ҡыҙыҡһыныуҙан ҙур компанияға тиклем үҫкән бизнес. Ҡырмыҫҡалы районынан Исламовтар алтаҡталар, картина кеүек тиҫтәләрсә төр әйбер етештереп төбәктең бәләкәй эшҡыуарлығын күтәреүгә өлгәшкән. Шулай уҡ урындағы халыҡты эш урындары менән тәьмин иткән.

«Первушин» аэродромы «Асыҡ күк» Бөтә Рәсәй слетын ҡабул итте

Башҡортостанға авиация һөйөүселәре йыйылды. «Первушин» аэродромы «Асыҡ күк» Бөтә Рәсәй слетын ҡабул итте. Сарала самолеттар күргәҙмәһе, авиашоу, парашютсылар сығышы ойошторолдо.

Башҡортостанда күпләп күперҙәр төҙөлә һәм ремонтлана

Башҡортостанда күпләп күперҙәр төҙөлә һәм ремонтлана. Әле бер нисә тиҫтә ҡоролмала эш алып барыла. Уларҙың дүртәүһе федераль магистралдәрҙә төҙөлә. Тағы ла М-5 «Урал», М-7 «Волга» һәм Р-240 трассаларындағы 14 күперҙә планлы ремонт бара. Башҡортостан башлығы Радий Хәбиров социаль селтәрҙәрҙә яҙыуынса, шулай уҡ төбәк һәм муниципаль юлдарҙа 16 күпер һалына.

Капиталь ремонт башҡарылған барлыҡ мәктәптәр ҙә 15 авгусҡа тиклем әҙер булырға тейеш

Капиталь ремонт башҡарылған барлыҡ мәктәптәр ҙә 15 авгусҡа тиклем әҙер булырға тейеш. Илдә белем усаҡтарын уҡыу йылы башланғансы тиклем сафҡа индереү ҡаралған. Башҡортостан етәкселеге мәғариф учреждениеларын файҙаланыуға тапшырыу ваҡытын ярты айға алға күсерергә ҡарар иткән. Балалар 1 сентябргә тулыһынса әҙер мәктәптәргә килергә тейеш, тине Хөкүмәт Премьер-министрының беренсе урынбаҫары Урал Килсенбаев оператив кәңәшмәлә. Радий Хәбиров капитал ремонт һүлпән алып барылған объекттарҙа эште йәнләндерергә һәм тапшырыу ваҡытын һуҙмаҫҡа ҡушты.

Өфөлә мәктәптәргә һәм балалар баҡсаларына илткән юлдар төҙөкләндерелә

Өфөлә мәктәптәргә һәм балалар баҡсаларына илткән юлдар төҙөкләндерелә. Был ҡала мэры Ратмир Мәүлиев тәҡдиме буйынса «Белемгә юл» проекты сиктәрендә башҡарыла. Ул тротуарҙарҙы төҙөкләндереү программаһының дауамы булып тора. Уға ярашлы 81 объектты ремонтлау планлаштырыла, уларҙың 67-һе мәктәптәр һәм балалар баҡсалары. Өҫтәмә рәүештә проект сиктәрендә яңы светофорҙар ҡуйыу һәм элеккеләрен яңыртыу, биләмәләрҙе яҡтыртыу эштәре планлаштырылған