Башҡортостанда 99 меңгә яҡын кеше “Сәләмәтлек поездары”нда һаулығын тикшерткән

Һаулыҡ һаҡлау министрлығынан белдереүҙәренсә, халыҡта йышыраҡ юғары ҡан баҫымы, шәкәр, холестерин һәм артыҡ ауырлыҡ асыҡлана. Табиптар ауыр сирҙәре булғандарға артабан медицина тикшеренеүе үтеү һәм дауаланыу өсөн йүнәлтмәләр бирә. “Сәләмәтлек поездары” алты маршрут буйынса йөрөй.

Өфө үҙәге урамдарында сикләүҙәр индерелә

Баш ҡала хакимиәтенән ошо турала белдерәләр. 17 июлдә Өфөлә Моторҙар эшләү берекмәһенең 100 йыллығына арналған сара үтә. Шуға бәйле, 16 июлдән 17 июлгә тиклем “Торатау” конгресс-холы янындағы парковка ябыла. 17 июлдә Зәки Вәлиди, Мәжит Ғафури, Генерал-Губернатор Перовский һәм Яр буйы урамдарында өлөшләтә автомобиль хәрәкәте сикләнә. Водителдәргә маршрутты алдан билдәләргә кәңәш ителә.

Республикала иң арзан һөт ҡайҙа һатыла?

Федераль статистика хеҙмәтенең Башҡортостан территориаль органы июнь айына мәғлүмәттәр тәҡдим итә. Республикала һөттөң бер литры уртаса 89 һум 14 тин торған. Ғинуар менән сағыштырғанда, 5,5 процентҡа артҡан. Өфөлә һөттөң литры 92-93, Сибайҙа – 85, Стәрлетамаҡта – 83 һум. Иң арзан хаҡ Нефтекамала теркәлгән. Унда һөттөң литры 80 һум 57 тин булған. Рәсәйҙә һөт мөһим стратегик продукт һанала. Уның хаҡы даими контролдә тотола. Быйыл Башҡортостанда 5 яңы ферма асыу ҡарала. Төҙөлөшкә 6 ярым миллиард һум инвестиция һалынған.

Дүртөйлө-Әшит федераль трассаһының Башҡортостандағы участкаһы мобиль элемтә менән тәьмин ителде

Дүртөйлө-Әшит федераль трассаһының Башҡортостандағы участкаһы мобиль элемтә менән тәьмин ителде. Хәҙер автоһәүәҫкәрҙәр сәйәхәт ваҡытында музыка тыңлап ҡына ҡалмай, төрлө ҡушымталар ҡуллана, навигация сервистары һәм карталар менән файҙалана ала. Әйткәндәй бөгөн рәсми рәүештә Борай районында М-12 «Көнсығыш» юлы асыла.

Өфөнөң Дмитрий Сергеев исемендәге 4-се мәктәбен ремонтлауға 90 миллион һум аҡса бүленгән

Өфөнөң Дмитрий Сергеев исемендәге 4-се мәктәбен ремонтлауға 90 миллион һум аҡса бүленгән. Советтар Союзы геройы исемен йөрөткән мәғариф учреждениеһы яңы уҡыу йылы алдынан балалар өсөн уңайлы шарттар булдырыу маҡсатында тәртипкә килтерелә. Ремонт эштәре бина эсендә һәм уның эргә-тирәһендә алып барыла. Төҙөкләндереү саралары спорт майҙансығында ла үтәсәк.

Саҡмағош районы Ҡарайерек ауылында бал ҡорттарының күпләп ҡырылыуы теркәлгән

Саҡмағош районы Ҡарайерек ауылында бал ҡорттарының күпләп ҡырылыуы теркәлгән. Күңелһеҙ хәлгә рапс баҫыуын ағыулы химикаттар менән эшкәртеү сәбәпсе булыуы ихтимал. Һәр хәлдә урындағы халыҡ шундай фекерҙә. Улар әйтеүенсә, бал ҡорттары ҡырҙан ҡайтып, бер тәүлек үткәндән һун һәләк була башлай. Ошондай уҡ хәл төбәктең тағы ла бер нисә ауылында күҙәтелгән. Яҡынса иҫәпләүҙәр буйынса 150-нән ашыу бал ҡорто ғаиләһе юҡҡа сыҡҡан. Зыян күреүсе хужалар Прокуратура менән Ауыл хужалығын күҙәтеү идаралығына ялыуҙар һәм ғаризалар менән мөрәжәғәт иткән.

Өфөлә мотоцикл ҡатнашлығында үлемесле авария теркәлде

Бөгөн иртән Өфөлә мотоцикл ҡатнашлығында үлемесле авария теркәлде. Ҡаланың дәүләт автоинспекцияһы мәғлүмәттәре буйынса, Затон шоссеһы буйлап хәрәкәт иткән «Сузуки» мотоциклы юл ситенә туҡтаған «Лада Гранта» менән бәрелешә. Һөҙөмтәлә 25 йәшлек байкерҙең медицина ярҙамы килгәнгә тиклем ғүмере өҙөлә.

Борай районында «Танып-һыу. Хәтер йылғаһы» Бөтә Рәсәй этно-арт симпозиумы үтте

Борай районында «Танып-һыу. Хәтер йылғаһы» тип исемләнгән Бөтә Рәсәй этно-арт симпозиумы үтте. Бишенсегә уҙғарылған форум Бөйөк Ватан һуғышында Еңеүҙең 80 йыллығына һәм Башҡортостанда иғлан ителгән махсус хәрби операцияла ҡатнашыусыларға һәм уларҙың ғаилә ағзаларына ярҙам йылына арналды.

Өфөнән Алан Хәзиев Сергей Образцов исемендәге Мәскәү ҡурсаҡ театры сәғәтен ремонтлаясаҡ

Йәш сәғәт оҫтаһы Алан Хәзиев менән беҙҙең телеканал тамашасылары яҡшы таныш. Быға тиклем уның тураһында төрлө сюжеттар әҙерләнгәйне. Үҫмерҙең һөнәри үҫешенә өләсәһе бүләк иткән сәғәт-кулон башланғыс һала. Өс йәшенән алып ул ваҡыт күрһәтеүсе ҡоролмалар йыя, эшләмәгәндәрен ремонтлап, уларға яңы ғүмер бүләк итә. Йәш оҫтаны Сергей Образцов исемендәге Мәскәү ҡурсаҡ театры бинаһының алғы яғында торған сәғәтте ремонтларға саҡыралар.

Өфө районы «Огонек» һауыҡтырыу лагерында өсөнсө йәйге смена башланды

Өфө районы «Огонек» һауыҡтырыу лагерында өсөнсө йәйге смена башланды. Бында төрлө төбәктәрҙән 190 бала, шул иҫәптән Беларус Республикаһының Брест районы уҡыусылары ял итә. Күптәр өсөн был форматта ял тәүге тәжрибә. Тулыраҡ мәғлүмәт киләһе репортажда.

Шишмә ағинәйҙәре самауыр сәйенә йыйылды

Шишмә ағинәйҙәре самауыр сәйенә йыйылды. Сара райондың Күсем ауылында үтте. Шишмә районының ағинәйҙәр ойошмаһы 70-кә яҡын кешене берләштерә. Улар боронғо йолаларҙы, кәсептәрҙе тергеҙеү, ғөрөф-ғәҙәттәрҙе һаҡлау, йәш быуынға тапшырыу буйынса ҙур эш алып бара. Ағинәйҙәр махсус хәрби операция башланыу менән алғы һыҙыҡтағы яугирҙарға гуманитар ылау туплау, маскировка селтәрҙәре үреү, блиндаж шәмдәре эшләүҙе лә ойоштора.

“Толпар” хоккейсылары өсөн йәйге ял тамам

Йәш юлаевсылар Өфөлә медицина тикшеренеүе үтә, чемпионатҡа әҙерлек күнекмәләре башлай. Августа баш ҡала клубы Түбәнге Камала “Реактор” һәм үҙ майҙанында Тольяттиҙың “Ладья”һы менән контроль уйындар уҙғара, Ҡазанда һәм Өфөлә Родион Әмиров иҫтәлегенә миҙгел алды турнирҙарында ҡатнаша. Йәштәр хоккей лигаһында даими беренселек сентябрь башында старт ала.

Владимир Путин М-12 «Көнсығыш» автомобиль юлының Дүртөйлө-Әшит участкаһын асыуға старт бирҙе

Рәсәй президенты Владимир Путин М-12 «Көнсығыш» автомобиль юлының Дүртөйлө-Әшит участкаһын асыуға старт бирҙе. Магнитогорск ҡалаһына эш сәфәре менән килгән дәүләт башлығы тарихи ваҡиғаға видеоконференция режимында ҡушылды. Тиҙ йөрөшлө трасса Башҡортостан, Пермь крайы һәм Свердловск өлкәһе биләмәләре аша үтә. Унда йөҙгә яҡын яһалма ҡоролма, шул иҫәптән 50 юл үткәргес, 25 күпер һәм алты транспорт үткәүеле төҙөлгән. М-12 трассаһы Мәскәүҙе Екатеринбург менән тоташтырып, Рәсәйҙең Европа өлөшө менән Урал араһында тиҙ йөрөшлө бәйләнеште тәьмин итеүсе берҙәм магистралдең бер өлөшө буласаҡ.

Радий Хәбиров Үзбәкстандың Сит ил эштәре министры урынбаҫары менән осрашты

Радий Хәбиров Үзбәкстандың Сит ил эштәре министры урынбаҫары Олимжон Абдуллаев етәкселегендәге делегация менән осрашты. Фекер алышыу барышында яҡтар халыҡ-ара хеҙмәттәшлекте нығытыу мәсьәләләрен тикшерҙе.

Мостай Кәрим исемендәге Өфө халыҡ-ара аэропортында заманса ҡунаҡхана асылды

Мостай Кәрим исемендәге Өфө халыҡ-ара аэропортында заманса ҡунаҡхана асылды. «Небоарт» отелен асыу тантанаһында Башҡортостан башлығы Радий Хәбиров ҡатнашты. Ҡеүәтле объект республикала инвестиция проекты нигеҙендә сафҡа индерелде. Уға ярашлы, аэропорт биләмәһендә 110 кешегә яңы эш урыны булдырылды.

Республикала капиталь ремонт программаһына ярашлы күп фатирлы 271 йорттоң ҡыйығы төҙөкләндерелә

Әлегә уларҙың 15-е буйынса эш теүәлләнгән. Подрядсы компаниялар билдәләнгән график буйынса объекттар буйынса планды үтәй. Өфөләге Менделеев урамы, 9/2-cе адрес буйынса ла ремонт саралары тамамланыу алдында.

Өфөнөң «Защитник» үҙәгендә хәрби хеҙмәткә контракт төҙөүселәрҙе ҡабул итеү дауам итә

Өфөнөң «Защитник» үҙәгендә хәрби хеҙмәткә контракт төҙөүселәрҙе ҡабул итеү дауам итә. Бында республика район-ҡалаларынан ғына түгел, Рәсәйҙең башҡа төбәктәренән дә килеүселәр өсөн бөтә шарттар булдырылған. Ул бер тапҡыр түләнә торған аҡсанан алып, яугирҙарға һәм уларҙың ғаиләләре өсөн 54 ярҙам сараларын күҙ уңында тота. «Защитник» үҙәгендә бөтә һорауҙарға ла яуап алырға мөмкин: банк хеҙмәткәрҙәре финанс буйынса аңлатыу эштәре алып бара, табиптар тикшереүҙәр үткәрә, ә инструкторҙар хәрби хеҙмәт буйынса һөйләй.

Башҡортостанда «Зарница 2.0» хәрби-патриотик уйындары йыйыны башланды

Башҡортостанда мөһим ваҡиға- Волга буйы федераль округының «Зарница 2.0» Бөтә Рәсәй хәрби-патриотик уйындары йыйыны башланды. Уның маҡсаты-йәштәр араһында башланғыс хәрби әҙерлек күнекмәләрен нығытыу, илһөйәрлек һәм Ватанға тоғролоҡ, рухи-әхлаҡи бурыстарҙы көсәйтеү,азатлыҡ, бойондороҡһоҙлоҡ ҡиммәттәрен тәрбиәләүгә булышлыҡ итеү. Рәсәй Геройы Максим Серафимов исемендәге «Патриот» хәрби-патриотик паркы биләмәһендә ойошторолған хәрби-патриотик сара хаҡында киләһе сюжетта.

Асҡын районы Ҡубыяҙ ауылында дөйөм белем биреү мәктәбе төҙөлә

Ул балалар баҡсаһы менән бер ҡыйыҡ аҫтында була. Заманса комплекс 200 балаға иҫәпләнә. Төҙөлөш министры Артем Ковшов ошо турала белдерҙе. “Әле эшселәр өсөнсө ҡатты күтәрә башланы. Бинаға пандустар ҡуйыла”, - тине ул. Белем усағын төҙөү киләһе йылда тамамланырға тейеш.

Белоруссия уҡыусылары Башҡортостанда ял итә

Өфө районы хакимиәте башлығы Николай Ельников ошо турала белдергән. “Беҙгә 10 ҡыҙ һәм малай ҡунаҡҡа килде. Улар лагерға урынлаштырылды. Бындай сәфәрҙәр мәҙәни бәйләнештәрҙе нығыта, спорт һәм туризм өлкәһендә уртаҡ проекттарға нигеҙ һала”, - тип яҙған социаль селтәрҙә район етәксеһе. Республика хөкүмәтенән хәбәр итеүҙәренсә, быйыл “Башҡортостан оҙон ғүмерлелеге” программаһы буйынса Белоруссияға 1 мең пенсионер сәфәр ҡыла.