Юл-патруль хеҙмәте инспекторҙары Ғафури районында питбайкта йөрөгән 8 йәшлек малайҙы туҡтатҡан

Юл-патруль хеҙмәте инспекторҙары Ғафури районында питбайкта йөрөгән 8 йәшлек малайҙы туҡтатҡан. Ваҡиға урынына малайҙың әсәһе саҡыртылған. Тикшереү барышында асыҡланыуынса, хәүефле уйынсыҡты балаға атай кеше алып биргән булған. Закон буйынса ғаиләгә 30 мең һум күләмендә штраф һалынған, транспорт сараһы махсус туҡталҡаға оҙатылған.

Өфө районынан Рима Мусина 70 йәштә ҙур күләмдә гөл-сәскә үҫтерә башлаған

Хаҡлы ялдағы тынғыһыҙ эш. Өфө районынан Рима Мусина 70 йәштә ҙур күләмдә гөл-сәскә үҫтерә башлаған. Бер йыл дауамында ул сәскәләрҙе тәрбиәләү буйынса уҡыуҙар үтә, яйлап коллекцияһын тулыландыра. Тәүҙә уларҙы ихата алдына ултыртһа, хәҙер ҡайһы бер сорттар теплицала урын алған.

Өфөнән 70 йәшлек Александр Коренецкий Ҡаҙағстанға юл тотто

Ул күрше дәүләткә велосипедта бара. Сәйәхәт Яңы Балтас-Балкашино маршруты буйынса башланды. Спорт ветераны көн һайын 150 километр юл үтергә ниәтләй. Ул сатырҙа йәки урындағы кешеләрҙең йортонда йоҡларға планлаштыра. “Велосәфәр сәләмәт тормош рәүешен пропагандалау, Башҡортостан һәм Ҡаҙағстан халыҡтарының дуҫлығын нығытыу маҡсатында ойошторола”, - тип белдерҙе Александр Коренецкий.

Башҡортостанда 100-гә яҡын таксист танытмаһыҙ йөрөй

Уларҙың тейешле өлгөләге водитель документы юҡ. 20-гә яҡын кешенең пассажир ташыуға рөхсәте булмаған. Республикала такси хеҙмәткәрҙәре араһында йыл башынан 112 ҡағиҙә боҙоу осрағы асыҡланған. Транспорт һәм юл хужалығы министрлығынан ошо турала белдерәләр. Тейешле талаптарҙы үтәмәгән водителдәрҙең аккаунты ябыла. Улар йөрөткән автомобиль штраф туҡталҡаһына ебәрелә.

Республикала бер миллиондан ашыу “Алға” картаһы һатылған

Берҙәм транспорт картаһы 2019 йылда әйләнешкә индерелде. Юл йөрөүселәрҙең яртыһы уның менән иҫәпләшә. Быйыл Башҡортостанда йәшәүселәр 44 мең карта һатып алған. Ай һайын 7 мең самаһы “Алға” һатылған. “Бәхетле сәғәт” акцияһына ярашлы, пассажирҙар 28 миллион тапҡыр бер транспорттан икенсеһенә бушлай күсеп ултырған. Быйыл “Алға” картаһы менән электричкаларҙа иҫәпләшеү 1 ярым тапҡырға артҡан.

Республика урмандарында янғын сығыу хәүефе арта

Урман хужалығы минисрлығынан ошо турала иҫкәртәләр. Әбйәлил, Баймаҡ һәм Бөрйән урмансылыҡтарында туристар һәм һунарсылар өсөн сикләүҙәр индерелгән. 27 июлгә тиклем урман биләмәләренә барыу тыйыла. Башҡортостанда янғынға ҡаршы махсус тәртип ғәмәлдә. Режим боҙоусыларға штраф һалына. Ябай кешеләргә 40 меңдән 50, вазифалы кешеләргә 60 меңдән 90 меңгә тиклем, ойошмаларға 1 миллион һум штраф һалыныуы ихтимал.

Тиҙҙән «Ватанды һаҡлаусылар» дәүләт фонды филиалының яңы бүлексәһе асыла

Тиҙҙән «Ватанды һаҡлаусылар» дәүләт фонды филиалының яңы бүлексәһе асыла. Бинаны ремонтлауҙы августа тамамларға планлаштыралар. Был хаҡта үҙенең социаль селтәрҙәрендә Радий Хәбиров хәбәр итте. Бүлексәнең Генерал Шайморатов һәйкәле эргәһендә урынлашыуы осраҡлы түгел, сөнки Совет майҙанынан яугирҙар Ватан һағына оҙатыла һәм уларҙы еңеү менән ҡаршылауыбыҙға ышанабыҙ, тип яҙған Башҡортостан башлығы.

«Өфө» аэропортында Франциянан оло еңеү менән ҡайтҡан Башҡортостан вәкилдәрен ҡаршы алдылар

Делегацияны Республиканың Мәҙәниәт министры Әминә Шафиҡова, Бөтә донъя башҡорттары ҡоролтайы ағзалары, Күсемһеҙ мәҙәни мираҫ объекттарын һаҡлау һәм файҙаланыу буйынса ғилми-етештереү үҙәге белгестәре ҡаршыланы. Башҡортостандың күсемһеҙ мәҙәни мираҫ объекттарын һаҡлау һәм файҙаланыу буйынса ғилми-етештереү үҙәге директоры Данир Ғәйнуллин етәкселегендәге төркөм Парижда Юнесконың 47-сессияһында ҡатнашып «Шүлгәнташ» мәмерйәһенә халыҡ-ара статус алды.

Башҡортостанда Мәрйәмә, Сафи, Мохнура тыуған

сабыйҙарға ҡушылған үҙенсәлекле исемдәр аталды. Мәғлүмәттәр ЗАГС реестрының мәғлүмәт-аналитика порталында баҫылған. Уның буйынса, ҡыҙҙар араһында – Мәрйәмә, Сафи, Гүзәлиә, Эстель һәм Мохнура, малайҙарҙа Рәхәт, Мурадхан, Юлай, Эмиль һәм Хайдарали исемдәре осрай. Әминә, Амелия ,Эмилия, Ева һәм София -иң популяр ҡыҙҙар исеме. Малайҙарға йышыраҡ Әмир , Эмир , Марк, Тимур һәм Мирон тип ҡушҡандар.

Әбйәлил районында инвестор ярҙамында ике социаль объект төҙөкләндерелә

Әбйәлил районында инвестор ярҙамында ике социаль объект төҙөкләндерелә. «Салауат» яуаплылығы сикләнгән йәмғиәте тарафынан Буранғол ауылы мәктәбенең интернатында һәм «Ирәндек» балалар һауыҡтырыу лагерында алып барылған төҙөлөш эштәре менән йәмәғәт күҙәтеү советы ағзалары танышты. Тулыраҡ киләһе яҙмала.

Салауатта мотоциклсы менән бәйле үлемесле юл-транспорт ваҡиғаһы сәбәптәре тикшерелә

Салауатта мотоциклсы менән бәйле үлемесле юл-транспорт ваҡиғаһы сәбәптәре тикшерелә. Дәүләт автоинспекцияһы мәғлүмәте буйынса, авария бөгөн иртән Островский һәм Космонавтар урамдары киҫелешендә теркәлә. Унда 27 йәшлек «Ямаха» мотоциклы водителе светофорҙың ҡыҙыл утына сыға һәм «Форд Максус» автомобиле менән бәрелешә. Асыҡланыуынса, байкерҙың тейешле категорияһы булмай.

Башҡортостанда үҫмерҙәр араһында авариялар арта

Сағыу эмоциялар, тиҙлек һәм моторҙар геүләүе. Үҫмерҙәр араһында питбайктарға ҡыҙыҡһыныу көсәйә. Улар ҡатнашлығында авариялар һаны ла арта. Дәүләт автоинспекцияһы хеҙмәткәрҙәре йыл башынан алып меңдән ашыу баланы туҡтатҡан. Уларҙың ата-әсәләренә ҡарата протоколдар төҙөлгән, штраф һалынған. Ә тупланған материалдар баланы тейешенсә тәрбиәләмәгән өсөн бәлиғ булмағандар эштәре буйынса комиссияға ебәрелгән. Һәләк булыусылар, төрлө тән йәрәхәттәре алыусылар ҙа юҡ түгел. Тулыраҡ киләһе яҙмала.

Башҡортостанда 56 мең тонна бесән әҙерләнгән

Башҡортостанда 56 мең тонна бесән әҙерләнгән. Төбәктең ауыл хужалығы министрлығы мәғлүмәттәренә ярашлы, мал аҙығы культуралары 23 мең гектарҙа сабылған, был дөйөм майҙандың 40 проценты. Республика хужалыҡтары 607 мең тонна сенаж да һалған. Дүртөйлө районында ла йәшел масса йыйыу эше әүҙем бара.

Республикала һабантуйҙар сылбырын Благовар районы дауам итә

Республикала һабантуйҙар сылбырын Благовар районы дауам итә. Төбәктең Яныш ауылында Һабантуй байрамы «Айыҡ ауыл» конкурсында ҡатнашып еңеү яулауына арналды. Икенсе урынға лайыҡ булған ауыл халҡына 3 миллион һум күләмендәге приз тапшырылғайны.

Юрий Яковлев – ябай тимерҙән мөғжизә тыуҙырыусы халыҡ оҫтаһы

Үҙ ҡулдары менән тыуған йортон һәм ауылын мөғжизәле әкиәт иленә әйләндерә. Ябай ҡәләм менән төшөрөлгән һындар һәм фигураларға тимер ҡырҡа торған ҡайсы ярҙамында йән өрә. Йәрмәкәй районы Түбәнге Олойылға ауылында йәшәүсе «Ваҡыттарҙың тере сылбыры» республика конкурсында «Халыҡ оҫтаһы» номинацияһы еңеүсеһе тураһында киләһе сюжет.

Континенталь хоккей лигаһында яңы миҙгелдең уйындар теҙмәһе билдәле булды

“Салауат Юлаев” чемпионатты 6 сентябрҙә Түбәнге Новгородта “Торпедо” клубы менән башлай. Артабан юлаевсылар Магнитогорскиҙа “Металлург” менән көс һынаша. “Өфө-Арена”ла тәүге осрашыу 12 сентябрҙә көтөлә. Был көндө баш ҡалаға Екатеринбургтан “Автомобилист” килә. Даими беренселек март аҙағына тиклем дауам итә.

Картуф етештереүсе аграрийҙар продукцияны күмәртәләп һатыу өсөн оҙайлы килешеү төҙөргә тәҡдим итә

Картуф етештереүсе аграрийҙар продукцияны күмәртәләп һатыу өсөн оҙайлы килешеү төҙөргә тәҡдим итә. Ҙур күләмдә бәрәңге етештереүсе эшҡыуарҙар сауҙа нөктәләре менән килешеү төҙөү баҙар шарттарында хаҡтарҙы көйләргә ярҙам итәсәк тигән фекерҙә. Әле республикала картуфтың төрлө төрҙәре һатыла.

Көйөргәҙеләр «Тылсымлы моңдар» фестивалендә Гран-при яуланы

Бишбүләк районында «Бишбалыҡ» ҡунаҡсыллыҡ фестивале сиктәрендә үткән «Тылсымлы моңдар» фестивалендә Көйөргәҙеләр еңеү яуланы. Төбәктең Яҡут ауылынан «Ынйылар» башҡорт халыҡ фольклор ансамбле «Килен төшөрөү» йолаһы менән сығыш яһаны. Гран-при хужалары 20 мең һумлыҡ сертификатҡа эйә булды.

Өфө эшҡыуары Муса Мәзитов яугирҙарға 17 километр оҙонлоғонда балыҡ тотоу селтәрҙәре тапшырҙы

Баш ҡала хакимиәте башлығы Ратмир Мәүлиев гуманитар ярҙам йыйыу хаҡында иғлан иткәйне. Был юлы махсус операцияла ҡатнашыусылар балыҡ тотоу селтәрҙәрен дә килтереүҙе һорай. Улар ярҙамында хәрби позицияларҙы пилотһыҙ осоу аппараттарынан һаҡларғаа мөмкин. Муса Мәзитов даими рәүештә яугирҙарға гуманитар ылау ебәреүҙә ҡатнаша. Һәр бер тапшырылған ылау ватан һаҡсыларының еңеүгә ышанысын арттырһын тигән теләктә ул.

Башҡортостан аграрийҙары уңыш йыйыуҙы башланы

Тәүгеләрҙән баҫыуға Илеш, Йәрмәкәй, Туймазы игенселәре сыҡты. Илеш хужалыҡтарына быйыл 94 меңдән ашыу гектар майҙанда урып-йыйыу бурысы тора. Республика баҫыуҙарында шипкән өлгөрә. Туймазыла был культура 365 гектар майҙанда сабылған, 300 тонна уңыш йыйып алынған. Гектар кеүәте 11 центнер. Йәрмәкәйҙә шипкән 120 гектар майҙанда сабылған, тип белдерәләр район хакимиәтенән. Республикала майлы культура 6 меңдән ашыу гектар майҙанда 12 районда үҫтерелә.