Мәләүез районында халыҡ йырҙарына арналған фестиваль үтте

«Нөгөш буйҡайҙары аҡ томан». Мәләүез районында уҙған халыҡ йырҙарын башҡарыусылар фестивале шулай тип аталды. Мәҙәни сара республика район-ҡалаларынан биш тиҫтәләп ижади коллективты бергә йыйҙы. Йәмәғәт эшмәкәре Инсаф Сәлихов башланғысында ойошторолған конкурс быйыл өсөнсө тапҡыр ойошторолдо.

Өфөлә Миҙхәт Шакиров исемендәге сквер төҙөкләндерелә

Бының өсөн 85 миллион һум аҡса йүнәлтелә. Бордюрҙар һәм асфальт яңыртыла, күп йыллыҡ сәскәләр ултыртыла, яҡтыртҡыстар ҡуйыла. Эштәрҙе йыл аҙағына тамамлау планлаштырыла. Баш ҡала хакимиәте биләмәне төҙөкләндереү өсөн подрятсы ойошма һайлай. Аукцион 22 июлгә билдәләнгән.

Башҡортостан һөт продукцияһы экспортын арттырҙы

Ауыл хужалығын күҙәтеү хеҙмәтенән ошо турала белдерәләр. Йыл башынан сит илдәргә 7 мең тоннаға яҡын һөт ризығы сығарылған. Исемлектә төп урында ҡоро һөт, ҡымыҙ һәм эркет тора. Ҡаҙағстан һәм Ҡырғыҙстанға 5 мең ярым тоннанан ашыу ҡымыҙ оҙатылған. Был эсемлек Үзбәкстан, Беларусь һәм Әрмәнстанға ла йыш ебәрелә. Шулай уҡ Ҡытай һәм Сербия беҙҙең рспубликаның һөт продукцияһын ала. Башҡортостан 2030 йылға тиклем экспортты 70 процентҡа арттырырға ниәтләй.

Ҡыйғыла фельдшер-акушер пункттары арта

Тиҙҙән унда дүрт яңы бина асыу ҡарала. Район хакимиәтенән хәбәр итеүҙәренсә, улар “Оҙон һәм әүҙем ғүмер” милли проектына ярашлы төҙөлә. Заманса медицина пункттары Сағыр, Абзай, Иҙрис һәм Аҫылғужа ауылдарында була. Волга буйы федераль округында ҡуйылған модулле пункттарҙың яртыһы Башҡортостанға тура килә. Һаулыҡ һаҡлау министры Айрат Рәхмәтуллин ошо турала белдерҙе. Һуңғы биш йылда округта 1 мең 500 медицина пункты яңыртылған. Уларҙың 700-е Башҡортостанда асылған.

Белгестәр Өфөлә мөмкинлектәре сикләнгән балалар менән эшләү тәжрибәһе менән уртаҡлашты

Өфөлә мөмкинлектәре сикләнгән балаларҙың телмәр һәм һөйләшеү һәләтен үҫтереүгә арналған ғилми-ғәмәли конференция үтте. Үҙенсәлекле малай-ҡыҙҙар менән эшләүсе белгестәрҙе «Ҡатын-ҡыҙҙың бәхет биләмәһе» һәм Өфө хосписы хәйриә фондтарының попечитилдәр советы рәйесе Каринэ Хәбирова сәләмләне.

Республика район-ҡалалары Ғаилә, мөхәббәт һәм тоғролоҡ көнөн билдәләне

Республика район-ҡалалары Ғаилә, мөхәббәт һәм тоғролоҡ көнөн билдәләне. Баймаҡта был көндө алтын туйҙарын туйлаусы юбиляр парҙар, өлгөлө ғаиләләр тәбрикләнде. Тулыраҡ киләһе сюжетта.

Иглин районы аша үткән М-5 «Урал» федераль трассаһында яңы юл буйы сервисы объекты барлыҡҡа киләсәк

Инвестор уны төҙөүгә 58 миллион һум аҡса йүнәлткән. Был турала социаль селтәрҙә Радий Хәбиров хәбәр итте. Төбәк етәксеһе белдереүенсә, әле был өлкәлә дөйөм күләме 12 миллиард һумлыҡ 200-гә яҡын инвестиция проекты эшкә алынған. Уларҙың 59-ы өҫтөнлөклө статусына эйә булған.

Өфөлә түләүле парковкалар буйынса белешмә алырға була

Бының өсөн колл-үҙәк ойошторолған. Ул 1 майҙа асылды. Көн һайын 100-гә яҡын шылтыратыу ҡабул ителә. Баш ҡала хакимиәтенән белдереүҙәренсә, водителдәр түләүле парковканы уртаса 1-2 сәғәт ҡуллана. Эш көндәрендә автомобилде бында ҡалдырыуҙың бер сәғәте 40 һум тора. Парковкалар 27 июндә асылды. Бөгөнгә 1 миллион һум аҡса күсерелгән. Ҡағиҙә боҙған водителдәрҙең техникаһы штраф туҡталҡаһына оҙатылған. Түләүле парковка урындарының исемлеге менән баш ҡала хакимиәте сайтында танышырға мөмкин.

Салауат районының Мөрсәлим ауылында яңы янғын һүндереү часы сафҡа индерелде

Салауат районының Мөрсәлим ауылында яңы янғын һүндереү часы сафҡа индерелде. Ул Башҡортостан башлығының ҡушыуы буйынса барлыҡҡа килгән. Был объектты асыуҙы һорап Радий Хәбировҡа төнъяҡ-көнсығыш районы халҡы мөрәжәғәт иткән. Ошоға тиклем тораҡ пунктта янғын хәүефһеҙлеген ауыл кешеләренән төҙөлгән халыҡ дружинаһы тәьмин иткән.

Бөрө ҡалаһында инвалид бала әсәһе инклюзив балалар өсөн ғаилә һәм балалыҡ үҙәге асты

Бөрө ҡалаһында инвалид бала әсәһе инклюзив балалар өсөн ғаилә һәм балалыҡ үҙәге асты. «Алға атла» үҙәге үҙенсәлекле балаларға сифатлы реабилитация һәм социалләштереү үтергә ярҙам итә. Был районда шундай берҙән-бер учреждение.

Башҡортостанда креатив индустрияны үҫтереүгә 25 миллион һумлыҡ грант бүленде

Башҡортостан башлығы креатив индустрияны үҫтереүгә 25 миллион һум грант бүлеү тураһындағы Указға ҡул ҡуйҙы. Дәүләт ярҙамы, үҫеш юлдары, көнүҙәк проблемалар хаҡында һүҙ бөгөн креатив индустриялар сәғәтендә барҙы. Республика башлығы уҙғарған осрашыу йәмәғәт туҡланыуы учреждениеларына- кафе-ресторандар эшмәкәрлеген үҫтереүгә арналды.

Башҡортостанда GSM-модулле янғын иҫкәртеү ҡоролмаларын таратыу буйынса пилот проект тормошҡа ашырыла

Башҡортостанда GSM-модулле янғын иҫкәртеү ҡоролмаларын таратыу буйынса пилот проект тормошҡа ашырыла. Заманса ҡоролма янғын сыҡҡан осраҡта хәүеф сигналын бер нисә ведомство ҡотҡарыусыларына һәм йорттоң хужаларына ебәрә. Ҡариҙел районында белгестәр GSM-модулле янғын иҫкәртеү ҡоролмаларын 12 ғаиләнең йортона ҡуйған. 2016 йылдан алып республикала 675 мең янғын иҫкәртеү ҡоролмаһы таратылған, уларҙың байтаҡ өлөшө мөмкинлектәре сикләнгән граждандар өсөн бүленгән. Янғын иҫкәртеү ҡоролмалары ярҙамында төбәктә 8 йыл эсендә меңдән кеше ғүмере ҡотҡарылған.

Өфөлә яраланып ҡайтҡан яугирҙар өсөн протездар эшләнә

Ватан һаҡсыларын хәстәрләп. Өфөлә Мәскәү протез етештереү предпритяиеһы филиалында алғы һыҙыҡтан ҡаты яраланып ҡайтҡан ир-егеттәр өсөн протездар эшләнә. Ҡеүәтле предприятие йылына 8 мең пар юғары сифатлы протез-ортопедик аяҡ кейеме, 1200 аяҡ протезы, 400 ҡул протезы һәм йөҙләгән корсет-бандаждар сығара. Мөмкинлектәре сикләнгән инвалидтарға реабилитация үтеү өсөн ойошмала стационар ойошторолған.

Исмаҡайҙа Яныбай Хамматовтың 100 йыллығына арналған саралар үтте

Күренекле яҙыусы Яныбай Хамматовтың 100 йыллығына арналған байрам саралары әҙиптең тыуған төйәге Белорет районы Исмаҡай ауылында үтте. Яҡташтары тарихты үҙ әҫәрҙәрендә мәңгеләштергән яҙыусының исемен онотмай. Юбилей сараларынан исмаҡайҙар ситтә ҡалмай оло ҡор йыйҙы.

Башҡортостанда «Бисура» тулы метражлы фильмы өҫтөндә эш дауам итә

Башҡортостанда «Бисура» тип исемләнгән тулы метражлы фильм өҫтөндә эш дауам итә. Сюжетҡа ярашлы, Мәскәүҙә эшләгән бизнесмен тыуған яғына ҡайтып, авиазавод төҙөргә теләгән. Әммә урман эйәләре-Бисура менән Шүрәлегә тап була. Кинокартинаның бер өлөшө илдең баш ҡалаһында төшөрөлһә, иң төп эпизодтар өсөн республиканың тәбиғәт ҡомартҡылары, иҫтәлекле урындары һайлап алынған. Әйтәйек, Ишембай районындағы Ғүмәр тарлауығы биләмәһендә һабантуй байрамына ҡағылған күренештәр төшөрөлдө.

Башҡортостанда быйыл заманса 5 һөт фермаһы эш башлай

Улар республикала һөт продукцияһын етештереү күләмен 15 мең тоннаға арттырырға булышлыҡ бирәсәк. Вице-премьер-ауыл хужалығы министры Илшат Фәзрахманов белдереүенсә, Стәрлетамаҡ районында төҙөлгән “Калинин” һөт комплексы илдә иң ҙуры була. Унда 3 мең ярым һауын һыйыр аҫрау ҡарала.

Ауырлы студент ҡыҙҙарға дәүләт ярҙамы арттырылды

Дәүләт Думаһы көндөҙгө бүлектә уҡыған ҡатын-ҡыҙҙарға пособие түләү тураһында закон ҡабул итте. Башҡортостанда уның суммаһы 90 мең һум самаһы була. Ҡанун 1 сентябрҙән көсөнә инә. “Буласаҡ әсәләрҙең һәм йәш ғаиләләрҙең хәлен яҡшыртыу төп бурыстарҙың береһе. Был ярҙам илдә балалы ғаиләләрҙең һанын күбәйтергә тейеш”, - тип белдерҙе федераль парламент рәйесе Вячеслав Володин.

«Халыҡ фронты» яугирҙарға 54 миллиард һумлыҡ ярҙам йүнәлткән

Махсус хәрби операция башланғандан алып «Халыҡ фронты» тарафынан яугирҙарға ярҙамға 54 миллиард һумдан ашыу аҡса йыйылған. Был турала ил президенты Владимир Путин «Бөтәһе лә еңеү өсөн!» форумында белдерҙе.

Өфөнөң Нижегородка биҫтәһендә юл яҡшыра

Өфөнөң Нижегородка биҫтәһендә юл яҡшыра. Үткән йылдарҙа «Хәүефһеҙ сифатлы юлдар» милли проекты буйынса Дзержинский, Благовар, Рига, Нехаев һәм Ауыл кисеүе урамдары комплекслы ремонтланһа, быйыл юлдарҙы төҙөкләндереү буйынса муниципаль контрактта ярашлы, Силикат урамында асфальт япмаһын яңыртыу планлаштырылған. Объекттың дөйөм оҙонлоғо 650 метр. Әле подрядсы ойошма асфальт-бетон япманың аҫҡы ҡатламын һала башлаған. Артабан тротуарҙарҙың өҫкө ҡатламын ҡороу һәм юл ситен нығытыу бурысы тора.

Башҡортостанда 1 сентябргә тиклем 35 мәктәптә капиталь ремонт эштәре теүәлләнәсәк

Башҡортостанда 1 сентябргә тиклем 35 мәктәптә капиталь ремонт эштәре теүәлләнәсәк. Был белем усаҡтары федераль программа буйынса 2024 йылда уҡ төҙөкләндерелә башлағайны. Ремонт эштәре күп башҡарылған төбәк иҫәбенә Бөрө районы инә. Бында 11 уҡыу йорто яңыртыла. Шуларҙың өсәүһе-ҡалала, ҡалғандары ауылда. Бер муниципалитетта ғына шул тиклем күп мәктәп тәүге тапҡыр ремонтлана. Был эштәргә яҡынса ярты миллиард һум аҡса йүнәлтелгән.