Башҡортостан егеттәре Читаға хәрби бурыс үтәргә юлланды

Ватанға хеҙмәт итеү - һәр Рәсәй ир-егетенең изге бурысы. Бөгөн Өфөлә яҡташтарыбыҙҙы хәрби хеҙмәт урынына оҙатыу тантанаһы үтте. 150-гә яҡын саҡырылыусы хәрби бурысын Читала үтәсәк. Башҡортостан егеттәрен Хөкүмәт Премьер-министры урынбаҫары Ирек Сәғитов, Хәрби комиссар Михаил Блажевич һәм дини конфессия вәкилдәре сәләмләне.

Өфөлә «Белемгә юл» проекты старт алды

Өфөлә «Белемгә юл» проекты старт алды. Ул тротуарҙарҙы төҙөкләндереү программаһының дауамы булып тора. Уға ярашлы 81 объектты ремонтлау планлаштырыла, уларҙың 67-һе мәктәптәр һәм балалар баҡсалары. Бөгөн 23 участкала эш тамамланған, ә 17 урында дауам итә.

Өфөнөң Сипайлово биҫтәһендә углекислы газ баллоны шартлаған

Өфөнөң Сипайлово биҫтәһендә углекислы газ баллоны шартлаған. Ошо сәбәпле балкондың ишеге һәм быялаһы ватыла. Ваҡиға бөгөн көндөҙ Гагарин урамындағы йорттарҙың береһендә теркәлгән. Дүртенсе ҡаттағы фатирҙа биш литрлыҡ углекислы баллон шартлай. Ҡотҡарыусылар торлаҡты тикшергән, бәхеткә күрә зыян күреүселәр һәм һәләк булыусылар юҡ.

Салауат ҡалаһында етем һәм ата-әсә ҡарауынан мәхрүм балаларға фатир асҡыстары тапшырылды

Быйыл ҡалала етем балаларҙы торлаҡ менән тәьмин итеү өсөн 47 миллион һумдан ашыу субсидия бүленгән. Планлаштырылған 13 йорт урынына 29 фатир һәм 1 сертификат алынған. Әле 164 кеше сират көтә. Улар - 14 йәштән өлкән үҫмерҙәр һәм йәштәр. Фатирға эйә булғандан һуң да балалар яңғыҙ ҡалмай. Еге-ҡыҙҙарға 5 йыл дауамында ҡала хакимиәтенең опека һәм попечителлек бүлеге төрлө яҡлап ярҙам күрһәтә.

Әбйәлил районы үҙәгендә «Салауат» яуаплылығы сикләнгән йәмғиәтенең офисы асылды

Әбйәлил районы үҙәгендә «Салауат» яуаплылығы сикләнгән йәмғиәтенең офисы асылды. Предприятие етәксеһе Таһир Бәхтигәрәев билдәләүенсә, офис эшенең төп маҡсаты - халыҡ өсөн мәғлүмәт һәм ярҙам сығанағы булыу. Был эшмәкәрлек ҙур инвестор менән Әбйәлил районы халҡы араһында мөһим коммуникация майҙансығы барлыҡҡа килеүен аңлата.

Өфөлә Гөлнәзирә Торомтаеваның фотокүргәҙмәһе асылды

Зәйнәб Биишева исемендәге Башҡортостан «Китап» нәшриәте магазинында Гөлнәзирә Торомтаеваның фотокүргәҙмәһе асылды. Ижадсының беренсе шәхси күргәҙмәһе ғаилә портреттарына арналған. Гөлнәзирә Торомтаева - Баймаҡ районының Мерәҫ ауылынан. Уның оҫталығы күптәрҙе һоҡландыра.

Өфөлә яңы тимер юл объекты булдырыла

Дим районында "Ағиҙелдең һул яҡ яры" тигән комплекс төҙөлә. Ул 55 гектар майҙан биләй. Проектҡа ярашлы, бында ике модулле тимер юл вокзалы, йәйәүлеләр өсөн юл, платформа һәм перрондар була. Төҙөлөш тураһында ҡарар Дим районының үҫеүенә бәйле ҡабул ителгән.

Стәрлетамаҡта махсус хәрби операцияла ҡатнашыусылар йылъяҙмаһы булдырыла

Урындағы архив документтар туплай башлаған. Был турала ҡала хакимиәтенән хәбәр итәләр. Тупланған материалдар Ватанды һаҡлаусылар ҡаһарманлығы тураһында хәтерҙе мәңгеләштерергә ярҙам итәсәк. Архивта ҡағыҙ документтар, аудио- һәм видеояҙмалар электрон күсермәләр ҡабул ителә. Уларҙы яугирҙар, хәрбиҙәрҙең ғаилә ағзалары, йәмәғәт ойошмалары һәм хәйриә фондтары вәкилдәре, ирекмәндәр тапшыра ала.

Башҡортостандан өлкән йәштәге туристар Белоруссияға сәфәр ҡыла

"Башҡорт-белорус оҙон ғүмерлелеге. Туризм" тигән программа ғәмәлгә ашырыла. Уға ярашлы, беҙҙең республиканан 500-ҙән ашыу турист Белоруссияға барған. Эшҡыуарлыҡ һәм туризм министры Зөһрә Гордиенко белдереүенсә, был программа өлкәндәрҙең йәшәү сифатын яҡшыртыуҙа мөһим роль уйнай. Ошондай проекттарҙа ҡатнашыу уларҙың социаль әүҙемлеген һаҡлап ҡалырға, сәйәхәт ҡылырға, башҡа халыҡтар мәҙәниәтен өйрәнергә ярҙам итә.

Өфөгә Рәсәйҙең хеҙмәт һәм социаль яҡлау министры килде

Бөгөн Өфөгә Рәсәйҙең хеҙмәт һәм социаль яҡлау министры килде. Республика башлығы Радий Хәбиров Антон Котяков менән осрашты. Көн тәртибендә - мәшғүллек хеҙмәтен һәм дәүләттән тыш социаль хеҙмәтләндереү секторын үҫтереү һорауҙары, шулай уҡ республикала махсус хәрби операцияла ҡатнашыусыларға ярҙам саралары ҡаралды.

Өфөлә Йәш ғалимдар һәм студенттар фәнни ойошмаларының Бөтә Рәсәй съезы дауам итә

Өфөлә Йәш ғалимдар һәм студенттар фәнни ойошмаларының Бөтә Рәсәй съезы дауам итә.Унда илдең төрлө субъекттарынан мең ярымдан ашыу кеше ҡатнаша. Форум уларҙың остаздары - билдәле ғалимдарҙы, академиктарҙы бергә туплауы, фәнни асыштар һәм ғилми ҡорамалдар күргәҙмәһе ойошторолоуы менән дә үҙенсәлекле.

Өфөнән көн һайын мең тоннанан ашыу сүп-сар сығарыла

Ҡалала 110 махсус машина эшләй. Был турала Ҡаланы таҙартыу буйынса автомобиль хужалығы етәксеһе Рәмис Зияҡаев белдерҙе. Уның әйтеүенсә, сүп-сар сығарыуҙа ҡатмарлыҡтар бар. Йыш ҡына контейнерҙар янында машина ҡалдарып китәләр. Улар эшкә ҡамасаулай.

Радий Хәбиров һәм Антон Котяков Сибайҙа мәшғүллек үҙәге менән танышты

Башҡортостан башлығы Радий Хәбиров Рәсәйҙең Хеҙмәт һәм социаль яҡлау министры Антон Котяков менән Сибайҙа модулле мәшғүллек үҙәге эшмәкәрлеге менән танышты. Былтыр йыл аҙағында асылған заманса объект Рәсәйҙә тәүге модулле мәшғүллек үҙәге тәжрибәһе һанала. Эш эҙләгән граждандарға ярҙам итеү маҡсатында сафҡа индерелгән комплекста һөнәри уҡыуҙар үтергә, психологик һәм социаль ярҙам алырға мөмкин.

Радий Хәбиров һәм Антон Котяков Өфө моторҙар заводында кадрҙар әҙерләү үҙәге менән танышты

Башҡортостан башлығы Радий Хәбиров, Рәсәйҙең Хеҙмәт һәм социаль яҡлау министры Антон Котяков Өфө моторҙар эшләү производство беркмәһендә лә булды. Улар сәнәғәт предприятиеһы ҡарамағындағы уҡытыу үҙәгенең эшмәкәрлеге менән танышты. Эшсе һөнәрҙәргә һөйөү тәрбиәләгән, киң мөмкинлектәр асҡан заманса үҙәк тураһында репортаж.

Өфөлә Йәш ғалимдар һәм студенттар фәнни ойошмаларының Бөтә Рәсәй съезы үтә

Өфөлә Йәш ғалимдар һәм студенттар фәнни ойошмаларының Бөтә Рәсәй съезы үтә. Унда илдең төрлө субъекттарынан мең ярымдан ашыу кеше ҡатнаша. Форумдың эшлекле программаһында ҡатнашыуҙан тыш, делегаттар фәнни асыштар, ғилми ҡорамалдар күргәҙмәһе менән дә танышты. «Торатау» Конгресс-Холлында өсөнсө көн дауам иткән Съездан репортаж.

Өфөлә журналистарҙы һәм матбуғат хеҙмәткәрҙәрен бүләкләнеләр

Өфөлә бер төркөм журналистар һәм матбуғат хеҙмәткәрҙәре юғары исемдәр, почет грамоталары һәм рәхмәт хаттары менән бүләкләнде. Тантаналы сара «Күп форматлы дәүерҙә киң мәғлүмәт саралары» конференцияһы сиктәрендә үтте. Юғары наградаларға беҙҙең коллегалар ҙа лайыҡ булды.

Александр Беленов «Өфө» футбол клубына ҡайтты

Александр Беленов «Өфө» футбол клубына ҡайтты. Ҡапҡасы яҡташтарыбыҙ составында 2017 йылдан 2022 йылға тиклем сығыш яһай, көйәрмәндәрҙең ышаныслы уйыны һәм пенальтиҙы кире ҡағыу оҫталығы менән хәтерендә ҡала. Ул көйәрмәндәр версияһы буйынса айҙың һәм миҙгелдең иң яҡшы уйынсыһы тип таныла, 2019/20 миҙгелендә чемпионаттың иң яҡшы голкиперы була, шулай уҡ Лев Яшин клубына инә.

Константин Толкачев Мәскәү дәүләт университеты студенттары менән фекер алышты

Дәүләт Йыйылышы - Ҡоролтай рәйесе Константин Толкачев Бөтә Рәсәй йәш ғалимдар съезында ҡатнашҡан Михаил Ломоносов исемендәге Мәскәү дәүләт университеты студенттары менән осрашты.
Баш ҡала ҡунаҡтары Рәсәйҙең төрлө тәбәкәтәренән. Парламент етәксеһе Өфөгә тәүгә килгән йәштәрҙе республика тураһында мәғлүмәттәр, төбәк иҡтисадының төп үҫеш йүнәлештәре менән таныштырҙы.

Волга буйы федераль округында иң яҡшы иретеп йәбештереүсе - Башҡортостандан

Ринат Изикаев округ этабында беренсе урын алды. Шулай уҡ беҙҙең республиканан Сергей Портнов штукатурҙар конкурсында икенсе урынға лайыҡ булды. - Беҙҙең төҙөүселәр оҫталығын күрһәтте, республикала квалификациялы хеҙмәткәрҙәр эшләй, -тип белдерҙе Башҡортостан төҙөлөш һәм архитектура министры Артем Ковшов.

Башҡортостанда 8 мең 600-ҙән ашыу кеше талпан ҡаҙалғандан һуң табипҡа күренгән

Был турала ҡулланыусылар хоҡуҡтарын күҙәтеү хеҙмәтенән хәбәр итәләр. Зыян күреүселәрҙең өс меңдән күберәге - балалар. Талпан энцефалит һәм боррелиоз һымаҡ хәүефле сиргә сәбәпсе булыуы мөмкин.