Өфөлә бер ҡатын-ҡыҙ һәм ике бала һәләк булған янғын буйынса енәйәт эше ҡуҙғатылған

Тәфтиш комитеты «Ике һәм күберәк кешенең һаҡһыҙлыҡ буйынса ғүмерен өҙөү» статьяһы буйынса тикшереү алып бара. Октябрҙең 50 йыллығы урамы буйынса йортта бәхетһеҙ осраҡ кисә кис теркәлгән. Торлаҡтан 77 йәшлек ҡатын, 8 һәм 4 йәшлек ике бала эвакуацияланған. Реаниматологтар уларға тәүге ярҙам күрһәтә, тик өсәүһен дә ҡотҡарып булмай. Янғын сәбәптәре асыҡлана. Өфө хакимиәте башлығы Ратмир Мәүлиев һәләк булыусыларҙың туғандарының һәм яҡындарының ҡайғыһын уртаҡлашҡан.

Башҡортостанда ҡатын-ҡыҙҙарҙың репродуктив һаулығы яңы кимәлгә күтәрелә

Был буласаҡ әсәйҙәр өсөн генә түгел, тотош йәмғиәт өсөн дә мөһим. 2024 йылдан алып республикала репродуктив системаны тикшереү диспансеризация программаһына индерелде. Тап ошо проект ярҙамында 8-се ҡала клиник дауаханаһының бала табыу бүлеге пациенттары өсөн уңайлы шарттар булдырған. Күп профилле учреждениела буласаҡ ата-әсәләр өсөн бар кәрәкле анализдарҙы тапшырып, бала табыуға ентекле әҙерләнеү мөмкинлеге тыуҙырылған.

Республика һайлап алыу пунктында контракт хеҙмәте өсөн бөтә шарттар булдырылған

Республикала контракт буйынса хәрби хеҙмәткә ҡабул итеү дауам итә. Башҡортостанға төрлө район-ҡалаларҙан ғына түгел, икенсе төбәктәрҙән дә контракт төҙөргә килеүселәр бар. «Черемушки» шифаханаһында урынлашҡан һайлап алыу пунктында улар өсөн бөтә шарттар булдырылған: өс тапҡыр ашатыу, ял урындары ойошторолған. Хәтерегеҙгә төшөрәбеҙ, Рәсәй Оборона министрлығы менән килешеүгә ҡул ҡуйған ир-егеттәр бер тапҡыр 2 миллион һум, ә унан һуң - ай һайын кәмендә 210 мең һум аласаҡ. Шулай уҡ яугирҙар һәм уларҙың ғаиләләре өсөн 40-тан ашыу ярҙам саралары ҡаралған. Контрактты Хәрби комиссариатта йәки «Һаҡлаусы» берҙәм үҙәгендә төҙөргә мөмкин.

Бөйөк Еңеүҙең 80 йыллығы уңайынан түләү апрель пенсияһы менән тапшырыла

Банк картаһына аҡса 10 апрелдә күсә. Почта менән 24 апрелгә тиклем бирелергә тейеш. Ветерандарға Бөйөк Еңеү байрамы уңайынан 80 һәм 55 мең һумлыҡ федераль түләүҙәр ҡаралған.

Бөйөк Еңеүҙең 80 йыллығы уңайынан пассажирҙарҙы брендланған автобус хеҙмәтләндерәсә

Еңеү менән ғорурланабыҙ! Бөйөк Еңеүҙең 80 йыллығы уңайынан пассажирҙарҙы брендланған автобус хеҙмәтләндерәсәк. «Башавтотранс» предприятиеһынан хәбәр итеүенсә, 110-сы маршрутты биҙәүҙә Башҡортостандың милли музейы ла ҡатнашҡан. Был сағыу һәм иҫтә ҡалырлыҡ автобус һәр кемгә илебеҙҙең бөйөк тарихы хаҡында иҫкәртеп торасаҡ. Шулай уҡ яҡын көндәрҙә ҡала маршруттары буйынса тематик яҡтан биҙәлгән троллейбустар һәм трамвайҙар ҙа йөрөй башлаясаҡ.

Баймаҡта Кәрим Дияров иҫтәлегенә тәүгә республика ҡурай бәйгеһе үтте

Баймаҡ районында билдәле педагог һәм ҡурайсы, Бөйөк Ватан һуғышында ҡатнашыусы, Башҡорт АССР-ының атҡаҙанған мәҙәниәт хеҙмәткәре Кәрим Дияров иҫтәлегенә тәүгә республика ҡурай бәйгеһе үтте. Сара шәхестең тыуыуына 115 йыл тулыу уңайынан ойошторолдо. Тулыраҡ Баймаҡ телевидениеһы әҙерләгән яҙмала.

Башҡортостанда тәңкәләрҙе ҡағыҙ аҡсаға алмаштырырға мөмкин

"Тәңкәләр аҙналығы" тигән акция башланды, ул 19 апрелгә тиклем бара. Ошо ваҡытҡа тиклем банктарҙа тәңкәне алмаштырған өсөн комиссия алынмай, тип хәбәр итәләр Милли банктан. Тәңкәләр күләме сикләнмәгән. Төп шарт - улар 1997 йылдан алып сығарылған булырға тейеш. Уҙған йылда был акция ике тапҡыр үтте. Башҡортостан халҡы 3 миллион 700 мең һумлыҡ 840 мең тәңкә тапшырған.

Башҡортостан юлдарында соҡорҙарҙы ямау эше 15 июнгә тамамланырға тейеш

Ошо маҡсатта муниципалитеттарҙа участкалағы етешһеҙлектәрҙе һанлаштырыу эше лә йәнләндерелгән. Әлегә төбәк һәм урындағы кимәлдәге юлдарҙың 70 процентына инспекция уҙғарылған. Стәрлетамаҡ юл ремонт-төҙөлөш идаралығы алты район өсөн яуаплы. Ҡалалағы асфальт-бетон заводы эшмәкәрлеге менән БЮТ ижади төркөмө лә танышты.

Башҡортостанда 15 гектар майҙанда ағас ултыртыу күҙаллана

Яҙ көнө урманды тергеҙеү эштәре республиканың бөтә район-ҡалаларында ойоштороласаҡ. Экологик акция сиктәрендә башлыса ике йыллыҡ шыршы һәм ҡарағайҙар ултыртыла. Нуриман районы Исаев урман хужалығында хеҙмәткәрҙәр питомникта үҫтерелгән ҡарағай үҫентеләрен ҡаҙып алды. Көндәр йылытҡас ағастар урманға күсереп ултыртыласаҡ.

Башҡортостанда йыл башынан 60 кеше сысҡан биҙгәген йоҡторған

Был үткән йылдарға ҡарағанда, дүрт тапҡырға кәмерәк. Әммә табиптар уяулыҡты юғалтмаҫҡа кәңәш итә. Ауырыусылар башлыса Октябрьский, Туймазы, Өфө райондарында һәм Өфөлә теркәлгән. Сысҡан биҙгәгенең тәүге билдәләре булараҡ температура күтәрелеүе, баш ауыртыуы, быуындар һыҙлауы, хәлһеҙлек иҫәпләнә. Был осорҙа табипҡа күренеп, мөмкин тиклем дауалауҙы тиҙерәк башлау мөһим.

Өфөлә Талха Ғиниәтуллин ижадына арналған ғилми-ғәмәли конференция уҙҙы

«Торатау» конгресс-холында фронтовик-яҙыусы Талха Ғиниәтуллин ижадына арналған ғилми- ғәмәли конференция уҙҙы. Башҡортостандың Милли әҙәбиәт музейы тарафынан ойошторолған мәғрифәтселек сараһы «Бөйөк Ватан һуғышында еңеүсе һалдат образын һүрәтләүҙә халыҡ яҙыусыһы Талха Ғиниәтуллин әҫәрҙәренең роле» тип аталды.

Быйыл «Башҡортостан» медиа-холдингының телерадиосәнғәт мәктәп-студияһына 20 йыл тула

Юбилей йылында «Киң мәғлүмәт саралары хәбәрсеһе» программаһы буйынса яңы уҡыу курсы старт алды. Тыңлаусылар араһында - студенттар, республика уҡыу йорттарының медиаүҙәктәре етәкселәре, хәбәрселәр һәм күптән журналист һөнәрен үҙләштерергә теләгәндәр бар . Улар алдында тәжрибәле алып барыусылар, телевидение белгестәре эфир продукцияһын булдырыу, темаларҙы эҙләү һәм һайлау, төрлө жанрҙарҙа эшләү серҙәренә, заман медиаһы трендтарына өйрәтәсәк.

Баш ҡалала волейбол буйынса Әхәт Мортазин иҫтәлегенә арналған турнир үтте

Республиканың «Алтын тауышы» йәнә майҙанға йыйҙы. Баш ҡалала волейбол буйынса Әхәт Мортазин иҫтәлегенә арналған турнир үтте. Алтынсы тапҡыр уҙғарылған спорт байрамында киң мәғлүмәт саралары хеҙмәткәрҙәре, сәхнә йондоҙҙары көс һынашты.

Ҡайғылы хәбәр

Башҡортостандың атҡаҙанған мәҙәниәт хеҙмәткәре, Өфөнөң Ә. Исҡужин исемендәге туғыҙынсы музыка мәктәбе директоры Әхиәт Ғәйетбаев вафат.

Ағиҙелдә яр буйы биләмәһен төҙөкләндереү проекты Рәсәйҙә иң яҡшылар рәтенә инде

Бында эштәр "Уңайлы ҡала мөхитен булырыу" проектына ярашлы алып барылды. Төҙөлөш һәм торлаҡ-коммуналь хужалыҡ министрлығынан хәбәр итеүҙәренсә, проекттарҙы баһалғанда эш сифаты, социаль һәм иҡтисади һөҙөмтәлелек иҫәпкә алынған. - Был тәжрибәне башҡа ҡалаларҙа ла уңышлы ҡулланыу мөмкинлеге бар, тип хәбәр итәләр Республика торлаҡ-коммуналь хужалыҡ минисрлығынан.

Башҡорт дәүләт академия опера һәм балет театры артистары Мәскәүҙең Ҙур театрында сығыш яһаны

Башҡорт дәүләт академия опера һәм балет театры артистары Мәскәүҙең Ҙур театрында сығыш яһаны. Тарихи сәхнәлә «Рахманинов. Ғүмерлек симфония» балеты премьераһы үтте. Бөйөк рус композиторының тормош юлы һәм ижадына арналған спектаклде БЮТ ижади төркөмө лә ҡараны. Илдең баш ҡалаһынан киләһе яҙма.

Президент фонды тәбиғәтте һаҡлау проекттарын ғәмәлгә ашырыуҙы хуплай

Президент фонды Тәбиғәтте һаҡлауға йүнәлтелгән проекттарҙы әҙерләү һәм тормошҡа ашырыу менән шөғөлләнәсәк. Был эшкә әүҙем граждандар, коммерция булмаған ойошмалар һәм айырыуса һаҡланған тәбиғәт биләмәләре менән идара итеүсе учреждениелар йәлеп ителә. Ошо уңайҙан бөгөн Башҡортостан йәмәғәт палатаһы аппаратының йәмәғәт проекттары ресурс үҙәгендә тәүге семинар үтте.

Башҡортостанда ҡыҙылса менән ауырыу осрағы асыҡланған

Сир Октябрьский ҡалаһында йәшәүсе 10 йәшлек малайҙа табылған. Әле ул дауаханала һәм табиптар йоғошло ауырыу таралмаһын өсөн бар һаҡланыу саралары күргән. Шулай уҡ малай уҡыған мәктәптә вакцинациялау башланған.Ҡыҙылсанан берҙән-бер һаҡланыу сараһы-прививка.

Бөйөк Еңеүҙең 80 йыллығына арналған түләүҙәрҙе ветерандар апрель пенсияһы менән бергә аласаҡ

Банк иҫәбенә аҡсалар 10 апрелдә күсереләсәк. Почта аша графикка ярашлы өсөнсө апрелдән алып 24 апрелгә тиклем таратыласаҡ. 80 мең күләмендәге түләүҙәрҙе Бөйөк Ватан һуғышы ветерандары һәм инвалидтар, уларҙың тол ҡатындары, ҡамауҙа ҡалған Ленинград, Севастополь, Сталинград ҡалаларында йәшәүселәр, бәлиғ булмаған концлагерь тотҡондары аласаҡ.

«Веселинка» ансамбле халыҡ-ара конкурста Гран-при яуланы

Комаров исемендәге пионерҙар һарйының «Веселинка» өлгөлө балалар хореографик ансамбле 32 йыл эсендә меңәрләгән йәш бейеүселәрҙе үҫтереп ҙур сәхнәгә сығарған. Бынан тыш, билдәле хореограф Оксана Щуканың бейеү мәктәбен үтеп, үҙҙәре лә остаз булып киткәндәр бар. Улар араһынан иң билдәлеһе Юлия Долгполова. Быйыл ул етәкләгән коллектив үҙенең 15 йыллығын туйланы.Әйткәндәй, ансамбль 1 апрелдә Сочи ҡалаһында балалар бейеү коллектвтары араһынд үткән халыҡ-ара конкурста 20 коллектив араһында иң юғары баһа - Гран-приға лайыҡ булды