Өфөлә Владислав Дзюба ҡулға алынды

Яза башҡарыу федераль хеҙмәтенең Башҡортсотан буйынса идаралығы етәксеһе Владислав Дзюба ҡулға алынды. Эске хеҙмәт генерал-майоры вәкәләттәрен арттырып үтәүҙә ғәйепләнә. Тәфтишселәр фаразлауынса, етәксе үткән йылдың ноябрендә ведомство подразделениеларына 3 миллион һум аҡса йыйырға ҡуша. Был йыйымдарҙы ул ойошма ихтяжына кәрәк тип аңлата.

Өфө автосалонында клиентҡа 900 мең һумға килешелгән машинаны 4 млн һумға һатҡандар

Инвалид иргә психологик баҫым яһап автосалон хеҙмәткәрҙәре кредиттың суммаһын аңлатмай, килешеү төҙөлгән. Әле билдәле автосалон урынында бушлыҡ ҡына ҡалған - мутлашыусылар салонды бикләп икенсе урынға күскән. Тулыраҡ мәғлүмәт киләһе яҙмала.

Республикала Рәсәйҙәге беренсе һанлы имам эшләй башланы

Башҡортостан мосолмандары Диниә назаратынан хәбәр итеүҙәренсә, мобиль ҡушымта аша яңылыҡтарҙы, намаҙ ваҡытын, ҡибла йүнәлешен белергә мөмкин. Был яңылыҡ Мәрйәм Солтанова исемендәге ислам колледжы менән берлектә ҡулланыуға индерелгән. Бынан тыш, һәр кем үҙенең шәхси кабинеты аша онлайн режимда хәйер һала ала.

Ҡырмыҫҡалы районында республикалағы иң ҙур элеватор төҙөлөшө бөгөн 80 процентҡа теүәлләнгән

Селекция-орлоҡсолоҡ йүнәлешендә махсуслашҡан үҙәк иген һәм майлы культураларҙы таҙартыу һәм киптереүгә йүнәлтелгән. Проектҡа 40 яңы эш урыны булдырыу маҡсатында ике миллиард ярым һумдан ашыу аҡса һалынған.

Өфө Рәсәйҙә беренсе булып «Бөтә донъя кәсепселәр ҡалаһы» исеменә лайыҡ булды

Бындай статусҡа донъяның Иран, Һиндостан, Ҡытай, Ҡаҙағстан кеүек төрлө дәүләттәрендә урынлашҡан ни бары 60-ҡа яҡын ҡалаһы эйә. Баш ҡалабыҙҙа кәсепселек кимәлен Бөтә донъя кәсептәр советы баһалаған. Донъя кимәлендә уңыш ҡаҙаныу - оҫталар, рәссамдар, эшҡыуарҙарҙың фиҙаҡәр хеҙмәте һөҙөмтәһе.

«Ҡаһарманлыҡ моңо»: Еңеүҙең 80 йыллығына арналған концерт үтте

Бөйөк Еңеү байрамына тиклем теүәл бер ай! Мостай Кәрим исемендәге Милли йәштәр театрында Бөйөк Ватан һуғышында еңеүҙең 80 йыллыҡ юбилейына арналған Ҡаһарманлыҡ моңо тип аталған концерт үтте.

Быйыл республиканың күп фатирлы 231 йортонда 620 лифтты яңыртыу планлаштырылған

Уларҙың 162-дә эш тамамланған. Өфөнөң Юрий Гагарин урамы, 28/2 адресы буйынса йорт та капиталь ремонт программаһына эләккән. Һәр подъезда икешәр лифт бер-бер артлы яңыртылған. Подрядсы компанияға ошондай объекттарҙы файҙаланыуға тапшырыуға 80 көн бирелә.

Өфөлә Ватан һаҡсыларын алғы һыҙыҡҡа оҙаттылар

Көс туплап йәнә алғы һыҙыҡҡа. Башҡортостанда бер төркөм яугирҙар ҡыҫҡа ваҡытлы отпуск ялынан һуң махсус хәрби операция биләмәһенә юлланды. Уларҙы оҙатыу «Өфө-арена» спорт һарайы алдындағы майҙанда үтте. Ватан һаҡсыларын юлға оҙатыу тантанаһына ир-егеттәрҙең ғаиләләре, туғандары, дуҫтары килде.

Башҡортостан егеттәре яҙғы саҡырылыш буйынса әрме сафына юлланды

40-ҡа яҡын егет Рәсәйҙең Ҡораллы көстәр сафын тулыландырҙы. Бөгөн яҙғы хәрби саҡырылышҡа ярашлы, егеттәрҙе әрме сафына оҙатыу тантанаһы үтте. Яҡташтарыбыҙ Архангел һәм Волгоград өлкәләренедәге Ҡоро ер ғәскәрҙәрендә хеҙмәт итәсәк. Буласаҡ ил һаҡсыларына Башҡортостан Хөкүмәте премьер-министры урынбаҫары Ирек Сәғитов, республиканың хәрби комиссары полковник Михаил Блажевич, хәрби хеҙмәт ветерандары, дин әһелдәре изге теләктәрен еткерҙе.

Өфөлә Айрат Тереғоловтың күргәҙмәһе асылды

«Мираҫ» галереяһында Рәсәйҙең һәм Башҡортостандың атҡаҙанған рәссамы, Михаил Нестеров исемендәге башҡорт дәүләт художество музейы директоры Айрат Тереғоловтың күргәҙмәһе асылды. Экспозицияла рәссамдың бынан ун йыл элек яҙған картиналары урын алған. Ижади эштәр Түбәнге Новгород ҡалаһында уҙасаҡ күргәҙмәлә ҡатнашыуға һайлау үткән.

Өфөлә Федор Шаляпиндың сәхнә костюмдарын берләштергән күргәҙмә асылды

Өфөлә күренекле опера йырсыһы Федор Шаляпиндың сәхнә костюмдарын берләштергән күргәҙмә асылды. Мәшһүр йырсы исемен йөрөткән музыка музейына кейемдәр, әйберҙәр, афишалар Санкт-Петербург ҡалаһынан килтерелде. Тарихи экспозиция 52 cәғәт юл үткән. Транспартировка ваҡытына ҡиммәтле әйберҙәр масхус ҡағыҙға төрөлөп килтерелә. Федор Шаляпиндың сәхнә костюмдарынан,шәхси әйберҙәренән, фотоһүрәттәренән торған күргәҙмә Өфөлә ярты йыл эшләйәсәк.

Ағиҙел буйы ҡыҙҙары Рәсәй кубогына тағы бер аҙым яһаны

Валерий Дәүләтшин тәрбиәләнеүселәре финалда «Динамо-Нева» клубы менән икенсегә осрашты. Яҡтар араһындағы тәүге уйында Өфө командаһы 5-0 иҫәбе менән еңеү яулағайны.

Өфөлә апрель уртаһында ҡыш ҡабат әйләнеп ҡайтты

Республикаға ҡыш кире килде. Бөгөн күпләп ҡар яуыу сәбәпле, баш ҡала урамдарында тығындар һәм авариялар күҙәтелә. Ғәҙәттән тыш хәлдәр министрлығы водителдәрҙе алыҫ юлға сығыуҙан тыйылып торорға саҡыра.

Республикала газификация программаһы графикҡа ярашлы алып барыла

Башҡортостан башлығы Радий Хәбиров ҡатнашлығында үткән ултырышта республикала газификация һәи догазификация программаларының үтәлеше ҡаралды. Күләмле проект Рәсәй Президенты Владимир Путин ҡарары буйынса республикала 2021 йылдан тормошҡа ашырыла. Ул бюджет аҡсаһына ҡыҫҡа ваҡытта йорттарға газ үткәреүҙе күҙ уңында тота. 2021-2025 йылдарға иҫәпләнгән программаға ярашлы республиканы зәңгәр яғыулыҡ менән тәьмин итеү 85 процентҡа үтелгән. 2030 йылға Башҡортостанды зәңгәр яғыулыҡ менән тәьмин итеү күрһәткесе 88 процентҡа етергә тейеш.

Радий Хәбиров «Динамо» йәмғиәтен 100 йыллыҡ юбилей менән ҡотланы

Радий Хәбиров «Динамо» физик культура-спорт йәмғиәтенең төбәк йәмәғәт ойошмаһын 100 йыллыҡ юбилейы менән тәбрикләне. Башҡортостанда «Динамо» спортсылар хәрәкәте 1925 йылда барлыҡҡа килә. Ул ваҡытта йәмәғәт ойошмаһы 125 кешене берләштерә. Хәҙер иһә «Динамо» - тиҫтәләгән спорт түңәрәктәре, йөҙәрләгән спорт мастерҙары һәм чемпиондар. Тантаналы йыйылышта республика башлығы уларҙың иң-иңдәренә дәүләт наградалары, маҡтау ҡағыҙҙары тапшырҙы.

Баҡалы районы поликлиникаһының яңы корпусы 42 процентҡа әҙер

Һаулыҡ һаҡлау милли проекты сиктәрендә төҙөлгән объект хаҡы 450 млн һәм тәшкил итә. Күләмле төҙөлөш быйыл декабрҙә тамамланыр тип күҙаллана. Ә инде киләһе йылға яңыртылған поликлиникала пациенттар ҡабул ителә башлаясаҡ. Тулыраҡ мәғлүмәт киләһе яҙмала.

«Башҡортостан Геройҙары» программаһында ҡатнашыусы 2 меңдән ашыу кеше тест яҙған

Әле проектта теркәлеүгә ғариза биреүселәрҙең эштәре баһалана. Проекттың киләһе этабы 14 апрелдә башлана һәм 12 майға тиклем дауам итә. Әңгәмә тест кеүек, онлайн режимда үтә. Хәтерегеҙгә төшөрәбеҙ, төбәк программаһы Президент ҡушыуы буйынса «Геройҙар ваҡыты» федераль проектының дауамы булараҡ тормошҡа ашырыла. Уның маҡсаты махсус хәрби операцияла ҡатнашҡан хәрби хеҙмәткәрҙәр араһынан яңы быуын идарасылар әҙерләү.

Герой шәфҡәт туташы – Ерекле ауылынан махсус операцияға тиклемге юл

Геройҙар беҙҙең арала йәшәй. Шаран районы Ерекле ауылында тыуып үҫкән шәфҡәт туташы махсус хәрби операция биләмәһендә медицина батальонында хеҙмәт итә. Уның күкрәген «Махсус хәрби операцияла ҡатнашыусыға» миҙалы биҙәй. «Клинок» ҡушаматлы яугирҙың тыныс эшен хәрби тормошҡа алыштырыуына ике йыл булып килә. Ошо ваҡыт эсендә ул Еңеүҙе яҡынайтыуҙа яҡташлыҡ һәм туғанлыҡ көсөнә күп тапҡырҙар инанған.

Иглин районы халҡы махсус хәрби операциялағы яҡташтарыбыҙға 50-се гуманитар ярҙам оҙатты

Юбилейлы ылауҙы ирекмәндәр Бөйөк Еңеүҙең 80 йыллығына арнаған. Яугирҙарҙың һорауы буйынса конвой составына УАЗ, «Нива» автомобилдәре, техникаға алмаш өлөштәр, квадрокоптер, генератор, инструменттар, оҙаҡ һаҡлана торған аҙыҡ-түлек, шәхси гигиена кәрәк-яраҡтары тупланған.

«Салауат Юлаев» клубы плей-оффтың сирек финалы башланыр алдынан асыҡ күнекмә үткәрҙе

Мәскәүҙең «Спартак» командаһына әҙерлек 40 минут самаһы дауам итте. Нэйтан Тоддтан башҡа бөтә уйынсылар ҙа боҙға сыҡты. Билдәле булыуынса, Канада һөжүмсеһе йәрәхәтләнеүселәр исемлегенә индерелгән һәм был раундта үҙ командаһына ярҙам итә алмаясаҡ. Резерв состав менән бергә Глеб Кузьмин да күнекмәләр үткәрҙе.