Башҡортостан халҡы мутлашыусыларҙан һаҡлана

Берләштерелгән кредит бюроһы мәғлүмәттәре буйынса беҙҙең республикала 270 меңдән ашыу кеше үҙенә кредит алыуҙы тыйған. Башҡортостан был күрһәткес буйынса иң әүҙем төбәктәрҙең береһе. Рәсәйҙә кредит алыуға тыйыу ҡулланыу мөмкинлеге булдырылды. Бындай аҙым мутлашыу осраҡтарынан һаҡларға тейеш, ти белгестәр.

Төбәктә бизнесҡа ярҙам: Радий Хәбиров Благовещен эшҡыуарҙары менән осрашты

Башҡортостан башлығы Радий Хәбиров Благовещендә күпер төҙөлөшө өсөн тимер конструкциялар етештереү заводы эшмәкәрлеге менән танышты. Республика ярҙамы менән тормошҡа ашырылған инвестиция проекты ярҙамында цех майҙаны киңәйтелгән, йөҙҙән ашыу кешегә эш урыны булдырылған. Бынан тыш төбәк етәксеһе ҙур объекттарҙы биҙәү элементтарын етештереү заводында булды. Көн тәртибендә Радий Хәбиров Благовещен районы эшҡыуарҙары менән осрашып, бизнес вәкилдәрен борсоған һорауҙарға яуап бирҙе.

Ейәнсура районында дәүләт автоинспекцияһы хеҙмәткәрҙәре янған йорттан кешеләрҙе ҡотҡарған

Ленар Ишмөхәмәтов, Илгиз Ҡәйепҡолов һәм Анил Әминев патруль ваҡытында Октябрь Революцияһы урамындағы өйҙәрҙең береһендә ҡуйы төтөн күреп ҡала. Хеҙмәткәрҙәр был хәл тураһында дежур бүлеккә хәбәр итә һәм шунда уҡ ярҙамға ашыға.

Янғын хәүефе арта: Башҡортостанда тәүлектә 20-гә яҡын осраҡ теркәлгән

Ауылдың ут эсендә ҡалыуына юл ҡуйылмай. Кисә Хәйбулла районы Сәғит ауылы эргәһендәге тауҙа янғын сыға. Көслө ел уттың тиҙ таралыуына килтерә. Бөтә көстәр ауылды һаҡлауға йүнәлтелә. Утҡа ҡаршы көрәшкә янғын һүндереүселәрҙән тыш, бар ауыл халҡы һәм ирекмәндәр сыға.

Башҡортостан юлдаш телеканалы яугир әсәләрен тәбрикләне

«Әсәй» хәйриә концерты. Уны Башҡортостан юлдаш телеканалы ойошторҙо. Мәжит Ғафури исемендәге Башҡорт дәүләт академия драма театры сәхнәһендә ысын батырҙарҙы тәрбиләгән әсәләр тәбрикләнде. Сараға телепроекттың 50 геройы саҡырылды. Яугир әсәләренә ихтирам һәм хөрмәт сараһы хаҡында ентекләберәк киләһе яҙмала.

«Айыҡ ауыл» республика конкурсында еңеүсе биләмәләр исемлеген быйыл йәнә 12 ауыл тулыландыра

Был аҙнала бәләкәй, урта, ҙур, эре тораҡ пункттар номинациялары буйынса финалға сығыусылар проект яҡлау этабында ҡатнаша. Уларҙы төрлө министрлыҡ, ведомство вәкилдәренән тупланған абруйлы жюри ағзалары баһалай. Айыҡ һәм сәләмәт йәшәү рәүешен популярлаштырып, халыҡты берләштереү, йәмәғәт эшенә йәлеп итеүҙе маҡсат итеп ҡуйған проект йылдан-йыл нығына ғына. Сираттағы бәйге һөҙөмтәләре апрель аҙағында билдәле буласаҡ.

Әбйәлил районында «Ғилем» олимпиадаһы еңеүселәре тәбрикләнде

«НефтеПолис» инженерҙар әҙерләү фонды, «Салауат» яуаплылығы сикләнгән йәмғиәт һәм Әбйәлил районы хакимиәтенең мәғариф бүлеге ярҙамында ул беренсе тапҡыр тормошҡа ашырыла. Ике этапта үткән олимпиада финалында 315 уҡыусы һынау тотто. Уларҙың иң-иңдәре бөгөн тәбрикләү тантанаһына саҡырылды.

Фирҙәүес Хисамитдинова иҫтәлегенә мемориаль таҡтаташ асылды

Бөгөн Рәсәй фәндәр академияһы Өфө федераль тикшеренеү үҙәгендә Рәсәйҙең һәм Башҡортостандың атҡаҙанған фән эшмәкәре, дәүләт һәм йәмәғәт эшмәкәре, профессор Фирҙәүес Хисамитдинова иҫтәлегенә мемориаль таҡтаташ асылды.
Сараға Тарих, тел һәм әҙәбиәт институты ғалимдары, ғалимәнең хеҙмәттәштәре, уҡыусылары, мәғариф өлкәһе вәкилдәре, уның яҡындары килде.

4 мең гектарҙан ашыу биләмә талпандарға ҡаршы препараттар менән эшкәртелә

Ҡулланыусылар хоҡуҡтарын яҡлау хеҙмәтенән хәбәр итеүҙәренсә, төп иғтибар халыҡ йөрөгән урындарға була. Энцефалит йоҡтороу хәүефе Белорет, Бөрйән, Өфө, Учалы, Ҡыйғы, Дыуан, Йылайыр, Иглин райондары һәм Өфө ҡалаһында ҙур. Уҙған йылда сир йоҡтороусыларҙың күбеһе ошо биләмәләрҙә теркәлгән.

Баймаҡта алты һыйырҙы ток һуҡҡан

Ғәҙәттән тыш хәлдәр министрлығынан хәбәр итеүҙәренсә, Крепостной Йылайыр ауылында теркәлгән фажиғә электр бағанаһы ҡолау сәбәпле булған. Малҡайҙар урында һәләк булған, токтан ҡоро үлән янып киткән.

Иң яҡшы юл яны объекты билдәләнә

Республика конкурсы иғлан ителде. Сауҙа һәм хеҙмәттәр министрлығынан белдереүҙәренсә, төп маҡсат - юл инфраструктураһы үҫешенә инвестиция йәлеп итеү, был өлкәлә тәжрибә уртаҡлашыу. Конкурста күп функциялы комплекс, ҡунаҡхана, яғыулыҡ станцияһы, сауҙа предприятиеһы, ашхана, транспортты хеҙмәтләндереү урындары араһында иң яҡшылар асыҡлана. Башҡортостанда һуңғы өс йыл эсендә 200 юл яны объекты булдырылған.

Өфөлә юғары партия мәктәбе семинары үтте

Бөгөн Өфөлә «Берҙәм Рәсәй» партияһының юғары партия мәктәбе «Төбәк кимәлендә сәйәси көн тәртибен мәғлүмәти оҙатыу» семинары уҙғарҙы.
Сара Башҡортостан башлығы Радий Хәбиров ҡатнашлығында уҙҙы. Республиканың ҡала һәм район хакимиәттәре мәғлүмәт бүлеге етәкселәре, сәйәсмәндәр һәм эксперттар мәғлүмәтте халыҡҡа еткереү технологияларын ҡараны.

Көйөргәҙе аграрийҙары яҙғы баҫыу эштәренә иң беренселәрҙән булып тотондо

Яҙғы баҫыу эштәре ғәҙәттәгенән күпкә алда башланды. Яланға тәүгеләрҙән булып Көйөргәҙе районы аграрийҙары ла сыҡты. Яҙҙың иртә килеүе ауыл хужалығы эшсәндәре графигына төҙәтмәләр индерҙе. Эште башлау өсөн алдан билдәләнгән көндө көтөп ултыраһы түгел, сөнки алтынға бәрәбәр дым китә. Тап дым ҡаплау менән хужалыҡтар әле шөғөлләнә лә инде.

Республикала контракт буйынса хәрби хеҙмәткә ҡабул итеү дауам итә

Башҡортостанға төрлө район-ҡалаларҙан ғына түгел, икенсе төбәктәрҙән дә контракт төҙөргә килеүселәр бар. «Черемушки» шифаханаһында урынлашҡан һайлап алыу пунктында улар өсөн бөтә шарттар булдырылған: өс тапҡыр ашатыу, ял урындары ойошторолған.

«Өфө-Арена» комплексы эргәһендәге майҙанда парад расчеттарының тәүге күнекмәһе үтте

Еңеү көнөн яҡынайтып. «Өфө-Арена» комплексы эргәһендәге майҙанда парад расчеттарының тәүге күнекмәһе үтте. Быйыл күләмле сарала Өфө территориаль гарнизон хәрбирҙәре, Федераль башҡарма власть органдары хеҙмәткәрҙәре, хәрби бәрелеш ветерандары, кадеттар, курсанттар һәм йәш шайморатовсылар, барлығы ике меңдән ашыу кеше ҡатнаша.

Мөмкинлектәре сикләнгән шағирә Мария Ибраһимоваға ярҙам кәрәк

Шишмә районынан мөмкинлектәре сикләнгән шағирә битараф булмаған кешеләр ярҙамы менән тиҙҙән фатирлы буласаҡ. Церебраль фалиждан яфаланған Мария Ибраһимованың йәшәргә урыны юҡ. Киҫкен мәсьәлә тураһында төбәктең Йәмәғәт палатаһы ағзаһы Ынйы Әхмәҙуллина белеп ҡала. Тап уның башланғысы менән йәш шағирәгә ипотека өсөн тәүге иғәнәгә аҡса йыйыу ойошторолған. Ярҙамға тотош район халҡы ҡушыла, әлегә 700 мең һум аҡса йыйылған. 8 961 35 87 557 - Әхмәҙуллина Ынйы телефон номеры аша «Мария»ға тип яҙып, Һаҡлыҡ банкына аҡса күсерергә мөмкин. Фатир һатып алыныу менән, унда йәшәү өсөн уңайлы мөхит булдырыу ҙа ҡаралған.

Башҡортостан пилотһыҙ осоу аппараттарын һынау үҙәге федераль аккредитиция үтте

Рәсәй сәнәғәт һәм сауҙа министрлығы уға тейешле статус бирҙе. Башҡортостан сәнәғәт, энергетика һәм инновациялар министры Александр Шельдяев белдереүенсә, хәҙер резиденттар өсөн берҙәм проекттарҙы ғәмәлгә ашырыу, федераль ярҙам саралары йәлеп итеү, ташлама алыу мөмкинлеге була. Пилотһыҙ осоу аппараттарын һынау үҙәге ауыл һәм урман хужалыҡтары, ғәҙәттән тыш хәлдәр идаралығы, фәнни тикшеренеүҙәр, белгестәрҙе уҡытыу, аппараттарҙы хеҙмәтләндереү йүнәлештәре буйынса эш алып бара. Ул милли проектҡа ярашлы булдырыла.

Өфөнөң «Урал» этно-үҙәгендә рәссам Раушаниә Таһирова-Мусинаның шәхси күргәҙмәһе асылды

Автор үҙенең эштәрендә күбеһенсә тәбиғәт күренештәрен төшөрә, сағыу төҫлө натюрморттар, портреттар ҙа бар. Рәссамдың ижадҡа һөйөүе ғаиләһенән килә - атаһы ағастан йорт йыһаздары эшләһә, әсәһе мәктәп сараларына төрлө тематик костюмдар сигеү менән шөғөлләнгән. Яҡын кешеләре ҡыҙҙың һүрәт төшөрөүгә, ижадҡа ынтылышын тойоп, һәләттәрен үҫтерергә ярҙам итә.

Өфөлә Рима Баталова исемендәге спорт әҙерлеге үҙәгендә коляскала фехтование буйынса беренселек үтте

Баш ҡалала 20-се тапҡыр уҙған Рәсәй паралимпия чемпионаты 18 төбәктән 98 спортсыны йыйҙы. Токиола үткән паралимпия уйындары, шулай уҡ донъя һәм Европа чемпионаттары еңеүселәре һәм призерҙары ҡатнашҡан ярыштың тәүге көнөндә ҡатын-ҡыҙҙар араһынан Эльза Янбаева-чемпион титулына лайыҡ булһа, Альбина Дәүләтова бронза яуланы.

Башҡортостанда талпандан зыян күреүселәр бар

Һаулыҡ һаҡлау министрлығынан белдереүҙәренсә, 23 кеше, шул иҫәптән 9 бала талпан ҡаҙалғандан һуң дауаханаға мөрәжәғәт иткән. Йылы ҡыш һәм иртә көтөлгән яҙ арҡаһында бөжәктәр быйыл ғәҙәттәгенән әүҙемерәк булыуы мөмкин.