موسى فرج : كيف تكون اسعيّد عراقي بخمسة أيام 2...
#الحوار_المتمدن
#موسى_فرج اليوم الثاني:حتى تكون حركتنا مضبوطه ينراد استحضارات تركز على 3 جوانب مهمه: وضوح الرؤية والاستعداد لأسوأ الاحتمالات ودقة التنفيذ:اولاً: وضوح الرؤيه:1. للحكم رسالة سامية تنطوي على ادارة الشؤون العامة للبلد بما يحقق سيادته وأمنه واستقراره ، وضمان أمن وحياة وكرامة ومعيشة المواطن، وتحقيق الوئام والسلم المجتمعي، وضمان تكافؤ الفرص بين العراقيين باعتماد معيار المواطنة وحده، وادارة مقدرات البلد بكل أمانة وكفاءة بما يحقق الرخاء للمجتمع وتلبية حاجات المواطن ...هذه هي رسالة الحكم وحتى تتأكد من صحة ما أقول أقرأ الدستور.-هل أن الحاصل في العراق حالياً هو هذا...؟ أم ان سيادة البلد باتت نكته واستقراره بات أضحوكه وأمنه 24 ساعه الشوارع والطرق مليانه ارتال مسلحه ما تعرف من هو اللي وياك ومن هو اللي عليك...والهاشمي بعد التقصي سنه ونيف يطلع القاتل ضابط بالداخليه يشتغل أوفرتايم ويا الفصائل المسلحه... بربك هاي داخليه لو ينرادلها إعادة چرخله مو اعادة هيكله...؟ أما عن أمنك وحياتك ...فالكورونا ببشاعته وقسوته بات خطره عند العراقيين زلاطه مقارنة بالإغتيال والخطف لأن الكورونا على الأقل ينطيك عطوه 3 أيام تشبع شوف من مرتك واذا ناموا الجهال احتمال تحصلّك لقاء حميمي تقتات بيه برحلتك الأبديه بين ما تلتقي بالحوريه المخصصة لك في حين الكاتم ما تدري من تطلع ترجع للبيت لو تلتحق بالرفيق الأعلى على طريقة أون لاين...والمواطن تشتبه بيه الشرطه بسبب تشابه الأسماء وأهله يركضون للقاضي يشوفوه المستمسكات ويجيبون قرار الأفراج عنه، الشرطه تسلمهم جثته لأن مات بالتعذيب ومو بس حاله وحده انما حالات...أما عن حقوق الانسان فحدث ولا حرج الثكلى تلطم على ابنها المغدور بالكاتم يثكلوها بالثاني وكل ذنبهم انهم ناشطين مدنيين...وقدر تعلق الأمر بقضية الوئام والسلم المجتمعي فقد بات الخصام بديلاً عن الوئام في هذا البلد وشلون خصام كله بالأعتدة المطلية باليورانيوم المنضب والمسيّرات...أما الخصام بين الساسه ...فهذا يعير خصمه بزوجته اللي كَرصها شيشاني وذاك يعير خصمه بزوجته اللي غمزلها أفغاني ...حتى اننا استبدلنا حياة بحياء وصارت تقرأ ولكن لا حياء لمن تنادي... وعن تكافؤ الفرص والله أمس شفت صورة وليد ما مخلص ابتدائيه ومن تحط اصبعك على أرنبة أنفه تلكَيها ما مفطوره لأن بعده ما بالغ الحلم يكَولون عليه يشتغل نائب محافظ ذي قار عاد البابا من أجا اتشرف بلقائه لو لا...؟ هاي ما أدري بيها...أما عن خدمات المواطن فدونك الكهرباء والمستشفيات وعندها تجد ما يسد نهمك من كوارث...وفيما يتعلق بأمانة الحكام في العراق في التعامل مع مقدراته وأمواله...فأمر لا يتطلب بحثاً....في هذه الحال هل ان التغيير السياسي في العراق بات دردشه صالونات لتمضية الوقت، أم انه فرض عين...؟ 2. التغيير السياسي يتم إما من خلال:-إما الانتخابات: وهذه هي الحالة المثالية ...ولكن صدام ايضاً كان يجري انتخابات وبنسبة مشاركه تصل الى 99%... فإذن القضية ليست مجرد انتخابات ولكن بشروطها...فاغتصاب الأصوات إن بالتخويف أو شراء الذمم أو تزوير الارادة الجمعية للناس أو التزوير في الصناديق ليست من بين الشروط السامية للانتخابات ولن يتحقق التغيير من خلالها...-أو الانقلابات: وهذه نوعين :-أما الاستيلاء على السلطة بانقلاب عسكري يقوده ضباط في الجيش وأقرب مثال لذلك انقلاب مينمار وقبله انقلاب السيسي،وقبلهما انقلاب سوار الذهب ...والسؤال هنا: هل ان الانقلاب العسكري شر مطلق...؟ لا...فالانقلاب في مينمار شر مطلق لكن انقلاب السيسي على الإخوان ان ......
#تكون
#اسعيّد
#عراقي
#بخمسة
#أيام
#2...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=726809

موسى فرج : لا حول ولا قوة الا بالله...
#الحوار_المتمدن
#موسى_فرج هذي الحوقله آنا شخصياً ما چنت ألجأ إلها الا في حالة التوجع من حادث مأساوي غير مطروق كأن يكون حادث مقتل طفل أو الاعتداء على امرأه كبيرة السن...أما أن استخدم الحوقله بقصد التأفف ...فلم يسبق لي فعل ذلك...لكن أمس سمعت احد مشايخ الحمله الايمانيه يقول: "الانتخابات حق والساكت عن الحق شيطان أخرس"...وأحسست بالحاجة للنطق بالحوقله...واليوم سمعت عضو مجلس نواب يقول: والله اذا نريد يصير براسنا خير نضم وزارة الدفاع ووزارة الداخلية والمخابرات للحشد ...فنطقت بالحوقلة تأففاً غصباً عني وللأسباب التاليه:أنتم سامعين بالدستور...؟المادة &#1641-;-/أولا/ أ من الدستور تقول: تتكون القوات المسلحة العراقية والاجهزة الامنية من مكونات الشعب العراقي... والمادة &#1641-;-/أولاً/ ب من الدستور تنص على :ٍ "يحظر تكوين ميليشيات عسكرية خارج اطار القوات المسلحة". والمادة 1/أولاً من قانون هيأة الحشد الشعبي رقم 40 لسنة 2016 تنص على: تكون هيئة الحشد (الشعبي) المعاد تشكيلها بموجب الأمر الديواني المرقم (91) في 24/2/2016 جزءا من القوات المسلحة العراقية, ويرتبط بالقائد العام للقوات المسلحة." وهو ما يعني ان القوات المسلحة والأجهزة الأمنية هي الأساس...اما الحشد فلولا اعتباره جزء من القوات المسلحة بوجب قانون لتم اعتباره من قبيل المليشيات العسكرية المحظورة طبقاً للدستور... فكيف تريد الغاء ما هو اصل لتحل محله ما هو فرع ...؟ ثم أليست القوات المسلحة بجيشها وشرطتها وبمشاركة فعالة من الحشد هي من حررت الموصل ...؟ أليس منتسبي الجيش والشرطة أبناء العراق...؟ فلماذا تريد الغاء دورهما...؟ ولماذا تعتبرهم ابناء سفاح...؟ أليس الجيش والقوات المسلحة من بين أهم اركان الدولة العراقية وإن توجيه الاهانة له يعاقب عليه القانون ...؟ فلأي مصلحة يجري التنكيل بالجيش والقوات المسلحة لحساب الحشد وكأن منتسبيهما ابناء سفاح وابناء الحشد هم فقط الأبناء الشرعيين ...؟ أليست أمهم هي ذاتها وأبوهم هو نفسه...؟وثم ثالثه مهمة جداً: هل تعلم ان حكومتك لو كانت قادرة على النهوض بواجبها تجاه الدستور لما بقيت مجموعة مسلحة خارج القوات المسلحة بتشكيلاتها الثلاثة الجيش والشرطة والحشد وقامت بالتعامل معها بوصفها ميليشيا خارجة على القانون...؟اما عما يقوله ذاك السنهوري بأن الانتخابات حق والساكت عن الحق شيطان أخرس فأقول:أما علمت ان المشاركة في الانتخابات حق لـ...وليس واجباً على...بنص الدستور ...؟ ومادامت حق لـ وليست واجباً على فإن عدم مشاركة المواطن فيها لا يحوله الى شيطان أخرس... ثم ان المواطن يقول أنا مع الانتخابات قلباً وقالباً لكني اريدها وفق احكام الدستور ...وأوضح مظهر يثبت انها مخالفة للدستور نص المادة م9/أولاً/أ: والتي تنص على: "تتكون القوات المسلحة العراقية والاجهزة الامنية من.... ولا تتدخل في الشؤون السياسية ولا دور لها في تداول السلطة "... والمادة 9/أولاً/ ج التي تنص على: "لا يجوز للقوات المسلحة العراقية وافرادها، وبضمنهم العسكريون العاملون في وزارة الدفاع أو اية دوائر أو منظمات تابعة لها، الترشيح في انتخابات لإشغال مراكز سياسية، ولا يجوز لهم القيام بحملات انتخابية لصالح مرشحين فيها ولا المشاركة في غير ذلك من الاعمال التي تمنعها انظمة وزارة الدفاع ويشمل عدم الجواز هذا انشطة اولئك الافراد المذكورين انفاً التي يقومون بها بصفتهم الشخصية أو الوظيفية دون ان يشمل ذلك حقهم بالتصويت في الانتخابات"، وبعد إن بات الحشد جزء من القوات المسلحة ويرتبط بالقائد العام للقوات المسلحة... فإنه يتعين على مفوضية الانتخابات ......
#بالله...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=727344

موسى فرج : محاولة اغتيال الكاظمي ..الشيء بالشيء يذكر...
#الحوار_المتمدن
#موسى_فرج في منتصف الثمانينيات وكانت الحرب العراقية الإيرانية في أوجها والطرفين يسعيان للتعجيل بتركيع الآخر، بدأت حرب الصورايخ على المدن بين صدام والخميني...و24 ساعه هذا يهف قم وطهران بصاروخ وذاك يهف بغداد والبصره بصاروخ وكلها بلاستيه وكلاهما ينطلق من حسن ظن خاطئ بالآخر هذا يظن أن خصمه يوجعه كَلبه على المدنيين والبنى التحتيه في مدنه أو يخرج الشعب الإيراني برمته يطالب بإيقاف الحرب فيوقفها وذاك ينطلق من نفس التصور لكن هذا تفرحه زيادة الضحايا ولو كان سقوط الصاروخ على روضة أطفال فيقيم لهم نصباً في نفس الروضة على هيئة أطفال مجنحين يصعدون الى السماء باعتبارهم ملائكه للمبالغة بتأليب الناس ضد خصمه المجوسي الغادر وذاك كل شوارع المدن الإيرانية تنلظم بمسيرات اللطم وشق الجيوب ولطم الخدود طلباً للانتقام من العدو الكافر وعلى هالرنه طحينچ ناعم ...بوكتها صادف عندي خفارة دفاع مدني بدائرتي في بغداد وفلتت ورحت للبيت لكني قبل ذلك تناوشت سجل الخفارات وكتبت عبارتي المعتادة وبخط جميل "لا شيء يستحق الذكر"...من أجيت الصبح للدوام لكَيت سيارات الإطفاء والنجده والعالم مكَلوبه على دائرتي أثاري بالليل جايه طياره ايرانيه وأبو الرباعيه المنصوبه على مستشفى الطب الذري المقابلة لدائرتي هافها للطياره بصليه "السوريين يسموها رشئه" الطيار لايف وخابنه بصاروخ ومثني على دائرتي المقابلة للمستشفى بمثله ومفلشها وآنا كاتب بسجل الخفارة مسبقاً لا شيء يستحق الذكر...! 1بوكَتها اللي يظنون به خيانه او تعاون مع العدو الإيراني المجوسي يربطوه على صاروخ ويطلقوه للصاروخ على المدن الإيرانيه حتى أن أحد الولائيين الغشمه عندما سقط صاروخ ايراني قريباً من وزارة التخطيط ذهب في نفس اليوم المغرب الى دائرة الاتصالات في السنك وخابر صاحبه بلندن "لأن بوكتها نستخدم التلفون الاعتيادي ماكو موبايل" وقال له: يابه اليوم وكَع صاروخ قريب من بيتي والله ستر يعني لو رايح الصاروخ ميه وخمسين متر باتجاه الشرق چان سقط على القصر الجمهوري وصارت مشكله بس الله دفع ما كان...طبعاً لكَفوه المخابرات وربطوه على صاروخ بلاستي وكَبل على قم لأن مبينه جاي ينطي احداثيات لصاحبه بلندن وذاك يعبرها لإيران...آنا من شفت دائرتي مفلشه بصاروخ كَلت هاي هيه هسا يفتحون سجل الخفارات ويقرون عبارة لا شيء يستحق الذكر ويعتبروني ولائي عميل ويربطوني بصاروخ بلاستي واحتمال حظي يوديني على مشهد لو قم حتى مو على أصفهان الجميله أو شمال ايران الخلاب واذا أكَلب عائلتي كلها تنسكَم...على ذكر هذا الولائي الغشيم أبو الإحداثيات عندي واحد من كَرايبي أخذوه جندي احتياط للجبهه بوكَتها والولد غشيم يمتهن رعي الغنم في بادية السماوه بس يسوق سياره فتم اختياره ليكون سائق الآمر يكَول في أحد الأيام چان جاي مسؤول حزبي كبير من بغداد للجبهه وسوا اجتماع للضباط وصلته للآمر فكَللي يابه عليش باقي بالسياره مصلوب انزل وياي وادخل للإجتماع هسا منو يعرف فطيمه بسوكَ الغزل وهمين تتثقف...يكَول دخلت ليش ما يفاجأنا الزائر الحزبي الچبير الجاي من بغداد ويطلب من الحضور بالسرا كل واحد يكَوم ويذكر اسمه ومركزه الحزبي وانا موحزبي... يافشلة الفشله، كَام أول واحد صاح فلان بن فلان عضو فرقه سيدي ، الثاني فلان بن فلان عضو عامل سيدي وهكذا يكَول وصل السرا لليمي وچان نائب ضابط درجه أولى وسمين هوايه صاح فلان بن فلان نصير متقدم سيدي كَرابتي يكَول كَلت هسا هذا نائب ضابط درجه أولى وأخَبَّن وكَال نصير متقدم معقوله أحط راسي براسه كَمت وصحت: آنا علي عبد الحسين نصير متأخر سيدي...وچان تكَب الضحكه من الموجودين لأن درجة نصير م ......
#محاولة
#اغتيال
#الكاظمي
#..الشيء
#بالشيء
#يذكر...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=737225

موسى فرج : الله يذكرك بالخير يا كاكا شوان...
#الحوار_المتمدن
#موسى_فرج كاكا شوان صديقي وزميلي في الدائرة خلال عقدي السبعينيات والثمانينيات وكان قبل ذلك ضابط مهندس في معمل تجهيزات وزارة الدفاع الكائن في باب المعظم...وكاكا شوان لأنه متفوق دراسياً ويروح بدربه ويجي بدربه بعثته الحكومه الى القاهرة للحصول على شهادة الماجستير في الهندسه...كاكا شوان يكَول من چنت بالقاهره ما عندي قارش وارش ومن الجامعه للشقه ومن الشقه للجامعه بس ما أحب أكل المصريين فاذهب كل يوم جمعه لسوكَ الخضره اتسوكَ هالقاسمه الله... وبذاك اليوم آنا بسوكَ الخضره ومحمل بيذنجان وطماطه وخيار وعمبه وچان تجي لوريات عسكريه زيل وتقتحم السوكَ يكَول كل لوري بيه جنود أثنين واكَفين بالبدي وجنود أثنين يحضنون الواحد من أباطه ويناوشوه لزملاءهم البلبدي...يكَول والله حطوا اديهم تحت أباطي وناوشوني لجماعتهم الفوك ماطولت الشغله دقائق معدودات تحركت اللوريات بينا واتجهت على طريق المطار يكَول آنا أحسّب مع نفسي ليش ...؟ وشنو السبب يجوز لأن لابس دشداشه وستره وهم يلبسون جلابيات ...؟ لكن هذا السبب غير كافي للإبعاد من أرض العروبه، احتمال الحكومتين العراقيه والمصريه خربانه العلاقه بينهم على حين غره فقررت الحكومه المصريه ابعادنا بس اللوريات مصريين همين بيها...يكَول والله صرنا قريبين من المطار وكَفت اللوريات ونزلونا وكل واحد ينزل ينطوه علم ورقي ما اعرف أليادوله ويكَولوله هفي بالعلم من يمر الموكب اثاري بذاك اليوم جاي احمد سيكتوري ضيفاً على جمال عبد الناصر...كَول مر الموكب واحنا نهفي حيل وورا ما مر الموكب سربتونا واللوريات الجابتنا ما أجت حتى ترجعنا ونرجع كَحف وما وصلنا الا المغرب وطماطاتي راحن ووياهن الخيار والبيذنجان وكل مسواكَي للأسبوع...هسا اليوم شفت فديو للناطق باسم احد فصائل المقاومه يكَول ما ألك محط رجل من الناس التطوعت لإجبار الأمريكان على مغادرة العراق ومن بين المتطوعين وعلى حد قوله شرائح المدنيين ومن يسمون أنفسهم أحزاب تشرين وطبعاً المدنيين والتشرينيين ما منخيين هذا بلدهم لكن اللي نسمعه أن الأمريكان مزهبين حالهم لرحيل قواتهم القتاليه من العراق والإبقاء على مستشارين وفنيين فقط...بهاي الحاله اليتطوعون مطلوب منهم المكاون لو يهفون بالعلم لتوديع الأمريكان مثل كاكا شوان ...؟؟؟ ......
#الله
#يذكرك
#بالخير
#كاكا
#شوان...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=739446

موسى فرج : شيوخ العشائر بين الأمس واليوم...
#الحوار_المتمدن
#موسى_فرج أمس كان عندي خلفة بناء للقيام ببعض التصليحات بالبيت وفي فترة الغداء تجاذبنا أطراف الحديث فعلمت أنه خزعلي والخزاعل مثلما هو معروف هم النسخة العراقية من خزاعه...تطرق الرجل لشيوخ العشائر أيام زمان فقلت له: شيوخ العشائر ثلاثة أصناف منهم اللي ما تعرفه إلا تسأله أنت منين، ومنهم الشايل نفسه، ومنهم الاستثنائي وهذا الصنف الأخير هو عنوان عشيرته وفي الغالب معروف أكثر من عشيرته مثلاً: حمد آل حمود وبدر الرميض وشعلان ابو الچون...وما دام انت خزعلي سأحكي لك واحده من نوادر حمد آل حمود وطبعاً مصدري سماعي مما ينقل عنه فلم أعاصر الرجل ولم اقرأ ما سأذكره في كتاب...بفترة حمد آل حمود كان من الشائع أن يهدي الرجال بناتهم للمرموقين فيقول المهدي للمهدى له: أجتك فلانه "بنته" هدية ما من وراها جزيه... يعني بدون مقابل فيشكره المهدى له وهاي هيه...حمد آل حمود أهدى له أحد الأشخاص بنته فقبلها شاكراً وكان عمرها وقت ذاك بين 14 و15 سنه في حين حمد آل حمود في برج السبعين وبذاك الوكت ماكو فياغرا فالرجل حمد يشعر انه من هذه الناحية لا يجاري جموح فلانه، في نفس الوقت هو يريد ان تكون يده هي العليا فابتدع طريقه يأخذ بيها بوش فلانه فكان كل يوم الصبح يطلب منها ان تتمدد على ظهرها في باحة الدار ويضع على سرتها بيضة دجاج ويبتعد حوالي 30 متر وينيشن بالتفكَه ويطلق رصاصه على البيضه فيشيلها من على سرّة فلانه ولك أن تتخيل كم الرعب الذي تشعر به فلانه لأن الملمترات حاسمة في ان تخرق الرصاصة معدتها...حمد آل حمود ما يكتفي بهاي وانما يقف على رأس المسكينه ويقول لها: أكو أحسن مني...؟؟؟ تكَله لا يمحفوظ..."طبعاً هسا مو عضوة مجلس نواب لو عضوة مجلس بلدي چان كَالتله: أي نعم بالتفكَه ماكو أحسن منك بس بذيچ الشغله ماكو أبرد منك"...شغلة البيضه والسرّه صارت طقس يمارسه حمد آل حمود ويا فلانه وهي كان الله في عونها تعيش حالة رعب يومي، وبيوم من الأيام راحت فلانه تشوف أهلها فحكت الشغله لأمها ترجوها مساعدتها فقالت الأم والله كَطعت نياط كَلبي يبنيتي وعساها بذمة أبوچ هسا منو يصدكَنا من نكَول حمد آل حمود بيه لوله...يمه أحچي لحبوبتچ أكيد تلكَين عدها حل...فلانه حچت القصه لحبوبتها كَالتلها عندي الحل وآنا أم أبوچ...يمه من يوكَف على راسچ ويكَلچ أكو أحسن مني...؟ كَوليله أي أكو احسن منك چا أنت حد للعالم وكَوليلهياه بنتر يبنيتي ومن يكَول منو الأحسن مني كَوليله حسن النجار... رجعت فلانه لبيت الشيخ وثاني يوم الصبح أخونا مارس طقسه اليومي وشالها للبيضه بطلقه من على سرتها ووكَف على راسها وكَال: أكو أحسن مني ...؟ كَالتله أي أكو چا قابل أبو ليلى المهلهل أنته لو عنتره بن زبيبه ...؟ أخونا من سمع ردها طار أبيضه وسألها منو الأحسن مني ...؟ كَالتله بنتر: حسن النجار ...منو حسن النجار ...؟ كَالتله إسأل عليه وتعرفه، ركب فرسه وطلع من البيت مغضب صادفوه جماعه سألهم أكو واحد بالمنطقه اسمه حسن النجار ...؟؟ كَالوله أي يمحفوظ هذا تلكَيه على الشط يصنع كعود "قوارب صغيره" يبعد حوالي ساعه على الفرس راح عليه حمد آل حمود شافه، وهوه بظهر الفرس على جرف الشط سأله: انته حسن النجار ...؟ كَال له نعم ، كَال له: تعرفني...؟ رد عليه حسن منهو ما يعرف حمد آل حمود أي أعرفك يمحفوظ...كَال له أنته أحسن مني...؟! النجار حس أكو بالشغله إنَّ...صار موقفه قوي كَال له انزل وتعال أكَعد يمي وأحچيلي السالفه بحذافيرها ، نزل وكَعد يمه على حافة الكعد وحچاله الشغله كلها ، النجار بيده طبر من كثر استعماله بالخشب صايره حافته مثل موس الناسيت ضبط كمشته للطبر باليمنى وأيده اليسرى غمسها بالما ......
#شيوخ
#العشائر
#الأمس
#واليوم...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=740186

موسى فرج : كَوّام الخضر وكَوّام العراق...
#الحوار_المتمدن
#موسى_فرج أمس أجوني شباب أثنين... ها عمي تفضلوا...كَالوا دزنا أبو حسين يكَول عندك حديقه تريد تنظفها وتنظمها واحنا على باب الله...أهلا وسهلاً بيكم وبأبو حسين أنتم منين عمي...؟كَالوا من الخضر...من الخضر من الخضر ما غيره...؟ كَالوا نعم كَلتلهم الخضر النشف أرياكَ النبي موسى...؟ كَالوا شلون نشف أرياكَه كَلتلهم أي تورط النبي موسى راح سفره بحريه ويا الخضر وطبعا مو بس وحدهم بالسفينه وياهم وادم، بنص البحر كَام الخضر زرف السفينه كَال له النبي موسى اشسويت مو راح تغركَ الوادم البيها كَال له " ألم أقل لك إنك لا تستطيع معي صبرا" كَال له النبي موسى بطّلت بعد ما أعترض...من نزلوا شاف طفل يلعب كَام كتله للطفل شاغت روح النبي موسى وكَال له ليش عمي كتلت نفس بريئه من دون حق...؟ كَال له مو كلتلك "إنك لا تستطيع معي صبرا..." كَال له التوبه اذا أحچي بعد ...يمشون بالشارع شافوا حايط الخضر كَام وكَعه للحايط كَال له النبي موسى ليش عمي تعتدي على المال العام ...؟ كَال له أشكَلنا مو كَتلك إنك لا تستطيع معي صبرا...؟ كَال له يا چلمه ردي لمكانچ روح بفالك عمي بطلنا...ويعبرها وياه كلما يعترض يكَله هاه مو كَتلك إنك لا تستطيع معي صبرا...وبعدين عافه وما قبل يمشي وياه وكَال له "هذا فراق بيني وبينك" كَال له ليش ...؟ كَال له لأن كل السويته بيه حكمه وانت تعترض عليه... السفينه من غركَتها بوادمها لأن أدري أكو أعداء جايين بالبحر وياخذون السفينه ، والطفل من كتلته لأن أدري من يكبر راح يأذي أهله ، والحايط من وكَعته لأن أدري تحته كنز واحد تاركه لأبنائه اليتامى وما يندلوه اذا ما أوكَع الحايط ...كَال له النبي موسى چا اذا عدك هيچي قدره وتحكم بالأشياء ما رفعت السفينه فوكَ السحاب وما يوصلوها الأعداء أو على الأقل تحرف رويس السفينه ويتيهوهه الأعداء...؟ والطفل اللي يأذي أهله ما أصلحته يالعبد الصالح چا أنت مو من دعاة الإصلاح...؟ والكنز التحت الحايط ما دام تعرف مكانه ليش ما بحشت تحته وتطلعه وتسلمه للأيتام ...؟ صدكَ ما عندك سالفه وچماله تكمم الأفواه ...مثل ربعكم هسا... تكَلّه كهرباء ماكو يكَلّك موكَلنالك إنك لا تستطيع معي صبرا...؟ عمي الدوا مغشوش وغالي والبطاله صاعده لبو موزه والدينار صار بنص قيمه والفقر بالسماوه والخضر 54% يكَلك الفقير بالدنيا غني بالآخره بس انت ما عندك غيره على المذهب ويوميه جاي أكَلك يطلع المهدي ويعدل الأمور بس انت عجول ولن تستطيع معي صبرا...شفتوا يهل الخضر.... هسا بالله عوفونا من الخضر ردت اسألكم على كَوّامه تعرفون كَوّام الخضر...؟ كَالوا نعم ...كَلتلهم أحچيلكم شغله على كَوّام الخضر...طبعاً الكَوّام جمع كَيم وجايه من قيّم على الضريح يستلم الوارد من نذور وهدايا ويصرف على متطلبات الضريح أو المقام...بعدنا بأول أسبوع بعد سقوط نظام صدام عام 2003 وهبة الفرهود خفّت وبدأت شغلة الثارات وهاي تتراوح بين القتل غيله وبين التقارير وبين الشكاوى، آنا چنت بمثابة الرجل الثاني في ادارة المحافظه وقت ذاك، أكو الحاكم الإداري وانا المستشار الاداري، الحاكم الاداري عينوه الامريكان وانا عيني الحاكم الاداري وطبعاً بلّوشي بدون راتب ،دوائر الحكومه معظمها معزله وانا بالطابق الثاني بالبنايه دخل عليَّ رجل كبير بالسن وينفت فحطان من صعدة الدرج بادرته بالترحيب قائلاً: أهلاً بك في العراق الديمقراطي ...كَال ان شاء الله... تفضل معالي المواطن كَال: أحنا چنا عائلتين كَوّام بالخضر وبيننا اتفاقيات مصدقه بالمحاكم من زمان "وبالفعل شوفني أوراق عليها طابع فيصل الثاني ملك العراق قبل عام 1958" وأردف قائلاً الاتفاقيات تنص على المناصفه بين ......
#كَوّام
#الخضر
#وكَوّام
#العراق...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=740604

موسى فرج : ما تطير زنبرانه الا من النجف...
#الحوار_المتمدن
#موسى_فرج من بواكير مراهقتي اسمع إن الأبن اللي يشاكس أبوه، الأب رأساً يلتفت عليه بنتر ويكَله انت شوعي...وكل الما تعجبهم تحولوا الى مكارثيه براسك ، قبل سنتين راجعت طبيب بعيادته شفته يتعامل بجفوه مع مراجع ومن سألته ليش تسوي هيچي مو الرجال جاي لعيادتك ويدفعلك فلوس كشفيه ...؟ كَال انت تعرف شنو هذا...؟ كَلتله لا...كَال هذا علماني ويقصد بها شيوعي ويقولها بطريقة من اكتشف جني او شيطان...بوكَتها الصدكَ غير آنا عفطت حشاكم مع أني عمري ما مسويها الا بيني وبين نفسي وبالشديد القوي...كَلتله يحظي هو أولاً: يدفع لك أجره مو مراجعك بالمستشفى وبهاي الحاله ليش أخذت فلوسه وليش ما كاتب على القطعه مالتك عبارة لا نعالج العلمانيين ...؟ثانياً: قسم أبوقراط يحتم عليك تقديم العلاج لمن يحتاجه ولو كان عبداً حبشيا وحتى لو قاتل وتطارده الشرطه ويحتاج علاج عليك تقديمه والفصل في الجريمه من اختصاص القانون والقضاء مو من اختصاصك...بالعراق ليش هذا الموقف من شريحه من الناس ...؟ لأن احد مراجع الشيعه وصم الشيوعية قبل 60 سنه بانها كفر وإلحاد...ليش ...؟ لأن ماركس ذاكر في كتاب له ان الدين أفيون الشعوب وطبعاً لا ماركس كَايلها بهاي الصيغه ولا كلامه غلط لأن النص الذي وردت فيه كان التالي " أن للدين بعض الوظائف العملية في المجتمع تشبه وظيفة الأفيون بالنسبة للمريض أو المصاب: فهو يقلل من معاناة الناس المباشرة ويزودهم بأوهام طيبة, ولكنه يقلل أيضا من طاقتهم واستعدادهم لمواجهة الحياة الجائرة, عديمة القلب والروح التي أجبرتهم الرأسمالية أن يعيشوها " ...وهذا المعنى سامعه حتى في خطب ممثل المرجعية عندنا عندما قال: "الناس فقراء في الدنيا لا يهم ...لكن عندما يكون الانسان فقيراً في الآخرة هي هذه الخساره...والسبيل لمواجهة الفقر هو الدعاء لله تعالى..." ،فرد عليه سيد مقتدى الصدر قائلاً: "حبيبي اليعيش بالدسم ينسى الفقر...".تورطت قبل أشچم يوم شفت مقطع للأخوين السماحتين النجفيتين كَبنچي صدر الدين واحمد فوجدتهما في عمامة واحده وعقيدتين مختلفتين ، سماحة صدر الدين خطيب جمعة النجف يكَول: "لن نصل الى انسداد سياسي مادام صاحب الزمان يقود المسيره ، أصلاً قلق ليصير عدكم ترا تشوفوها تمشي تمشي تمشي شو بعدين صار خير..." وهي مقولة لم يسبقه اليها في الثقة والثبات واليقينية غير الحجي هادي العامري عندما خاطب أهل الكوت قائلاً: صحيح فشلنا لكن السبب هو انهم يحاربونا لأننا مع الامام الحسين "، وارجو صادقاً أن يهدي الله سيد مقتدى ويصر على حكومة الأغلبيه لا شرقيه ولا غربيه ويخلي الانسداد السياسي حقيقه واقعه مو حچي جرايد ويخيب ظن صدر الدين ومريديه وتطلع ثقته فاشوشي...أما الكَبنچي احمد أخوه للكَبنچي صدر الدين فقد تخطى الأولين والآخرين في محاضراته وطروحاته فهو تارة يقول: " يابه مو هو جبرائيل چان خوش رجال وكَلبه طيب وشاف العرب في تخلف فضيع يعبدون الأصنام وطايحين بالربا ووأد البنات للهامه فراد يصلحهم بس كَلك اذا أكَول هذا كلام النبي محمد ميطيعوه خل أكَول هذا كلام الله فيخافون منه ويصيرون أوادم ..." وهو قول لم يسبقه اليه أحد باستثناء يزيد بن معاويه الذي قال: "لعبت هاشم بالملك فلا خبر جاء ولا وحى نزل..."وتارة يقول:"يابه اذا الله أقرب لعبده من حبل الوريد ليش ما كَال اللي يريد يكَولهن للنبي مباشرة...؟ شايفيلكم ملك صاحبه كَاعد بصفه ويكَول لخادمه روح كَول لصاحبي كذأ وكذا...خوب يكَوللهياه أون لاين...وتارة أخرى يقول: "هوه النبي محمد شلون أتأكد ان هذا اليجيه هو جبرائيل بالذات ، طلب جنسيته...؟ ، بطاقته التموينيه ...؟ حتى يعرف...! وتارات ......
#تطير
#زنبرانه
#النجف...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=742426

موسى فرج : الى اسرة الحوار المتمدن
#الحوار_المتمدن
#موسى_فرج عام سعيد وجميل لكم أصدقائي اسرة الحوار المتمدن وكل عام وانتم بخير...منذ ما يزيد على 10 سنوات وأنا احاول تغيير صورتي على موقعي الفرعي في الحوار المتمدن ودائماً أواجه بجواب يقول:" خطأ, لا يوجد موقع فرعي في الحوار المتمدن بهذا الاسم والبريد الكتروني , نرجو التدقيق وإعادة المحاولة"...تلك السنوات كافية لتلبية طلبي ولو كان الانضمام الى مجلس الأمن الدولي ولكن مع الحوار المتمدن لم ينجح الأمر لغاية تاريخه... ارفق مع طلبي ثلاثة نماذج من الصور الشخصية صوره رقم 1 و2 و3 وحتى لو رغبتم فارفق صوره من ايام الزمن الجميل صوره رقم 4 أقبل بأي منها ولكن ليس من الانصاف ان تختاروا انتم صورة لي من سنوات العجاف صوره رقم صفر الظاهرة عندكم ...أرجو ان يحظى عامي الجديد بصورة اجمل وبخلافه اتوقف عن النشر في الحوار المتمدن واحرم قرائي من مقالاتي الساخره واخرها الظاهر امامكم بالأمس ...تحياتي وتقديري – موسى فرج 31/ 12/ 2021 ص:1 ص:2 ص:3 ص:4 ......
#اسرة
#الحوار
#المتمدن

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=742485

موسى فرج : الانسداد العراقي...
#الحوار_المتمدن
#موسى_فرج العراقي بطبعه مغرم وشغوف باستخدام المصطلحات في المجالات كافه بدأً من العلاقات الشخصية الى العلاقات الدوليه فعلى صعيد العلاقات الشخصية العراقي اذا جامل أحداً لا يكتفي بقول أنت تروقني بل يذهب الى ابعد من ذلك من قبيل: فدوه لكَلبك وفدوه لهالطول، وهلمجرا... وهو منفتح على الأشقاء فاستعار من السودانيين مفردة الزول أو هو وهبها لهم فهو إن أحب قال فدوه لهالزول وإن امتعض قال عابت هالزول...وفي المجال السياسي فإن العراقي إن وصف شيوعياً صميمي في مبدئيته قال عنه شيوعي قُرّص وإن أراد وصف صدرياً بنفس المبدئية قال عنه صدري قِح...وان اراد السخرية من آخر ملغلغ قال عنه هذا وجهك لو راس خس ...وان رأى شخصاً نحيفاً قال هذا ياكل بالدين...؟ ومئات بل آلاف المفردات والتعابير يبتكرها حسب الحاله من قبيل: ضربه بوري يعني استغفله، ولغفه يعني سرقه، وعلسه يعني خطفه وقتله، حتى اني ذهلت من تعبير استخدمه ريسزچي في أواسط السبعينيات حيث كان بعض فقراء البغادة مغرمين بالرهان في الريسز "مضمار سباق الخيل في المنصور والذي احتل مكانه لاحقاً جامع الرحمن الذي بناه صدام ليكون جامع الدولة الكبير ولكن الجامع لم ينجز وبقي هيكلاً لحين حوسمته من قبل حزب الفضيله الإسلامي بعد عام 2003 ويقال انهم استغلوا أرضه لتحويلها الى كراج لإيواء السيارات يدر مبالغ كبيره الى جانب تأجير بعض مرفقاته كصالونات تجميل ومساج "، فكان احد الريسزچيه قد باع بطانية البيت وغامر بالرهان بكامل ثمنها على حصان ظن به خير حتى لم يبقى معه ثمن تذكرة الدخول للمضمار وبقي يراقب من خارج السياج وعندما انطلقت الخيول وبات كل يدعم حصانه بالتهليل وبركة الأولياء لم يدخر صاحبنا ولياً إلا وندبه والغوث به فبدأ بربه الأعلى ثم عرج على الأنبياء يستنهضهم واحداً تلو الآخر ثم استغاث بالأئمه من الصوبين لا يفرق بين إمام وآخر وحشرجة صوته تشق عنان السماء مصحوبة بقفزات متناغمة مع حوافر حصانه المغير وهو يصرخ علي علي علي ابو حنيفه ابو حنيفه ابو حنيفه ومن ثم تذكر أبشطهم في هذا المضمار وعافهم كلهم وارسل نداء استغاثته أخيراً الى عبد القادر الكَيلاني وهو يصرخ الباز الأشهب الباز الباز الباز...لكن صوته بدأ يتهدج ويخفت شيئاً فشيئاً فحصانه بدأ يتخلف عن الركب وقبل ان تترك يداه قضبان السياج الحديدي للمضمار صاح بما تبقى من صوته: كَونيه أرضه بأساس الكعبه...! فكانت تلك العبارة أغرب تعبير عن حنقه على حظه العاثر... هذا هو الحال قبل عام 2003 في العراق ولكن بعد عام 2003 اكتظ القاموس السياسي في العراق بمفردات سياسية شتى من بينها المكوناتية وحكم البطانة وحكم العوائل والمحاصصة والجنبة والتوافق والكتله الأكبر والنظام الرئاسي والنظام البرلماني وحكومة الأغلبيه وحكومة التوافق ولا شرقيه ولا غربيه وحكومة خلطة العطار والفخامه والزعامه والمعالي والفساد واللغف والنهب والفرهود والتحوسم والطائفيه والمناطقيه والغربيه والإقليم وبيضة الكَبان والذيول وابناء السفارة والولائيين والانبطاحيين والاطار التنسيقي والبيت السني والبيت الشيعي والبيت الكردي وصخرة عبعوب وعينك وما تشوف وأذنك وما تسمع...وقبل انقضاء عام 2021 نزل الى التداول مصطلح الانسداد السياسي ومعناه عدم بلوغ الطبقة السياسية مرحلة تشكيل حكومه في حومة التصارع بين معسكرين كبيرين احدهما ينادي بحكومة التوافق المحصصاتيه والآخر يصر على حكومة الأغلبيه اللا شرقيه ولا غربيه، وبرز من جديد اسم محمود المشهداني لرئاسة البرلمان عن "عزم" وهو صاحب الرقم القياسي في اطلاق المفردات والتعابير الصريحة والغريبه فهو الذي صرخ بوجه عضوة مجلس النواب ......
#الانسداد
#العراقي...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=742819

موسى فرج : كل الانسداد مكروه إلا الانسداد السياسي في العراق فهو حالة صحيه...
#الحوار_المتمدن
#موسى_فرج انسداد الشرايين ينجم عنه تضخم عضلة القلب، وانسداد المجاري البولية ينجم عنه صعود منسوب اليوريا والتسمم، وانسداد الشهية ينجم عنه النحول وفقر الدم، وانسداد الرزق ينجم عنه الفقر والحرمان، وانسداد الكارون ينجم عنه ارتفاع منسوب التلوث والعفونة في شط العرب، واحتباس المطر والذي هو انسداد أيضاً ينجم عنه جفاف الأرض والضرع ، والانسداد العاطفي ينجم عنه الخواء الروحي والكآبة...الا الانسداد في الوضع السياسي في العراق فهو حالة صحية بامتياز ...ليش...؟ان كنتم تريدونها بكلام مختصر ومعتادين على أكل الرغيف من حلكَ التنور وهو حار فالجواب ببساطة شديدة هو : يا أزمه اشتدي تنفرجي...وإن كنتم تريدونها بالتفصيل فإليكم ما ترغبون: نسمع كثيراً عن اهمية أن ترى الضوء في نهاية النفق المظلم ولكن هذا شيء وأن تحشر في نفق مسدودة نهايته ولكن يوجد فيه بعض الضوء ربما من جراء تشقق في بنائه فينفذ الضوء من خلال تلك الشقوق التي لا يعبر منها العصفور شيء آخر...سنوات من التململ والتوجع والمعاناة الذي تحول الى تذمر فاحتجاج فمظاهرات فشهداء وجرحى ومغيبين واغتيالات توجت باحتجاجات تشرين التي كان ضحيتها مئات الشهداء ومعظمهم يافعين بعمر الورود وآلاف الجرحى والمعاقين تحت شعار "نريد وطن" واستقالت حكومة عادل عبد المهدي واجريت انتخابات مبكره وقلنا بأعلى الأصوات إن التغيير يتطلب انتخابات من نوع آخر تقوم على التعامل مع العراق كمنطقة انتخابية واحده لمغادرة مهزلة المكوناتية والطائفية وتقسيم البلد، ويتطلب الالتزام بأحكام الدستور القائل بمنع مشاركة الميلشيات والجهات التي تمتلك اجنحة مسلحه في الانتخابات ويمنع استغلال القوات المسلحة بما فيها الحشد الشعبي في الانتخابات، ويمنع من تلوثت أيديهم بالفساد ونهب المال العام من الترشح فيها ، ويتطلب السيطرة على السلاح المنفلت، ويتطلب معاقبة قتلة المتظاهرين لوقف مسلسل الاغتيالات والتغييب واللادولة ... لكن كل ذلك لم يحصل فعادت الوجوه ذاتها بفسادها وفشلها ومحاصصتها ومغانمها وما ينجم عنه من فشل حكومي واستشراء الفساد والإيغال في سحق سيادة البلد وارتهان قراره الوطني ... ومثلما كان اللهاث خلف اجراء الانتخابات كغاية بحد ذاتها وليست وسيلة للتغيير بات اللهاث خلف تشكيل الحكومة كغاية لاعادة توزيع المغانم بين المتسلطين وليست أداة للبناء ومعالجة أدران الماضي وكأن الوقت لم يكن فيه متسع لحسم الموقف وقبل الانتخابات من قضية الكتلة الأكبر هل هي الفائزة بأعلى الأصوات أم انها تلك التي يتم تشكيلها باصطفافات لاحقه... نوري المالكي يفخر بمنجزاته ويريد السلطة لنفسه او لدمية يصطنعها، ومسعود يريد اكبر المغانم من ضلع الشعب العراقي والحلبوسي يريد رئاسة البرلمان ومحمود المشهداني يريد مالاته وكلهم يفيدهم المالكي المستعد للتنازل حتى عن العراق وحزب الدعوة ومؤسسها عربوناً لكرسي الحكم ... قلناها سابقاً ونعيد الكلام: إن كان إلحافكم على التوافقية وإصراركم على المحاصصة ينطلق من أهمية إشراك كل المكونات العرقية والطائفية في الحكم فلا مانع من إخضاع الرئاسات الثلاث لهذا المنطق فيكون رئيس الجمهورية من المنتمين لمكون ورئيس البرلمان من المكون الآخر ورئيس الوزراء من القائمة التي حصلت على أعلى الأصوات لكنهم لا يريدون ذلك ويرفعون قميص المكوناتية مثل قميص عثمان هم يريدون أمر آخر مختلف وقد عبر عنه محمود المشهداني رئيس البرلمان السابق بقوله: يمعود أحنا اشعلينا رئيس الوزراء نزيه فاسد ، كفوء فاشل، تكنوقراط معمم، وسخ نظيف مالنا شغل...أحنا ينطونا مالاتنا وهاي هيه، ومالاتنا مبينات: 6 مناصب وزاريه و9 م ......
#الانسداد
#مكروه
#الانسداد
#السياسي
#العراق
#حالة
#صحيه...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=743247

موسى فرج : قرار المحكمة الإتحاديه وعبرة أم الدشيش...
#الحوار_المتمدن
#موسى_فرج قبل أشچم سنه ألتقيت بصديقي سيد كاظم أبو غنيمه الله يرحمه باحدى المناسبات وسألته عن أحواله وما يشغله هذه الأيام كَال والله يخوي قبل اشچم يوم چانت مناسبة التشابيه مالت الطف واختاروني أمثل وياهم ولأن آنا مثل ما تشوف اسمر طويل قوي الشكيمه ضخم البنيه أنطوني دور جون...كَلتله بس جون مسيحي وانت اسمر عنابي شلون رهمت...؟ كَال چا يخوي قابل جون جاي من ايرلندا أشو هو من بقايا حملة ابرهه الحبشي وبقى بالجزيره...المهم يكَول انطوني حصان زين ومكَوار طويل وكَالوا أهجم على بني أميه يكَول وچان أغير عليهم شردوا من كَدامي وانا وراهم أبعدنا عن المسرح وآنا وراهم ، فحطت الخيل وآنا وراهم ...ومثلما تعرف يخوي –والكلام مازال لسماحة جون - منطقتنا جزيره يحيطها الفرات من 3 جوانب والجانب الرابع شط العطشان المالح يكَول أشو بني أميه من وصلوا للعطشان داروا خيلهم عليَّ ووكَفوا وآنا أصيح عليهم منّاك منّاك على أم الدشيش، يمعودين خل نستثاب...كَالوا انت صدكَ تحجي عمي يا عبرة أم الدشيش... الخيل هلكت...يكَول وانا ألوّح بالمكَوار واصيح مثل ابو عزرائيل الا طحين...بس همه رفعوا اديهم وكَالوا استسلمنا... يمعودين ...كَالوا عمي بطلنا ما نريد ثواب يمعود هذا أنت جون ووصلتنا للشط المالح زين ما تورطنا ويا العباس چان وصلّنا للرياض...هسا نجي على عبرة أم الدشيش الراد السيد يحشر بني أميه بيها...احنا كَلنا منطقتهم يحيطها الفرات من 3 جوانب والرابع شط العطشان وشط العطشان بيه منطقه ضحله تنعبر اسمها عبرة أم الدشيش النسوان من تعبرها تخب بهدومها والزلم ترفع هدومها للثدايا وجرى العرف أن يستخدموها مثل فيقولون : ابو كَريوه بعبرة أم الدشيش يبين... وانتشر المثل من جغرافيته المحليه الى الاتحادية فيقال أبو كَريوه يبين بالعبره...قبل يومين كاكا هوشيار وفي معرض رفضه لقرار المحكمة الاتحادية بحرمانه من الترشيح لمنصب فخامة الرئيس وقف في مؤتمره الصحفي وهو يشير بيده الكريمه الى بيت قريب منه قائلاً: بهذا البيت أنكتب الدستور...ولذلك همه مطمأنين من الدستور وكلما يعترضون على الحكومه المركزيه يكَولون الدستور هو الحكم بيننا، ونطالب بتنفيذ احكام الدستور...هسا الدستور يكَول كل تصرف قمتوا بيه بالنفط من 2003 لليوم باطل لأن قانون النفط اللي سنيتوه للأقليم مخالف للدستور...فالإتفاقيات مع الجهات الأجنبيه من صلاحية المركز والنفط ملك الشعب العراقي برمته وتسويقه تختص بيه سومو مالت المركز مو انتم وتخصيصاتكم تاخذوها من موازنة المركز...وهذا يعني انكم ملزمون وفق احكام الدستور بتسديد أقيام النفوط المباعة من قبلكم والمهربه والتي وصلت من سنوات حتى لميناء حيفا الإسرائيلي...وعقود الاستثمار كلها مخالفه للدستور وتعتبر بحكم الملغاة...هاي عبرة أم الدشيش اليبين بيها أبو كَريوه...الحزب اللي يكَول آنا مصلح ويسعى لتشكيل حكومه عليه أن ينفذ حكم المحكمه الاتحاديه ورئيس الوزراء الطامح بتجديد الولايه عليه أن ينفذ حكم المحكمه الاتحاديه والمرشح لمنصب رئيس الجمهوريه وباعتباره حامي الدستور عليه ان تكون باكورة أعماله تنفيذ حكم المحكمه الاتحاديه ...واحنا معشر الفقراء من عباد الله نركَصلها بچفيه ...بس العنده مصيلحه راح تبين كَريواته واليمهن...قرار المحكمة الاتحادية صدر وهو بات وملزم لكافة السلطات ولا تمييز ولا استئناف فليطبقوه وعود يبدلوه للدستور ونخلص من دستور المكونات والمحاصصه لكن ساسة المحاصصه مال يطبقوه ...لا...لأن مو كَدها بس من اليوم ورايح خل يكون شعارنا :الصالح والمصلح يطبق الدستور وحكم المحكمه الاتحاديه واللي ما يطبقه لا صالح ولا مصلح ولا من ا ......
#قرار
#المحكمة
#الإتحاديه
#وعبرة
#الدشيش...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=747193

موسى فرج : زعل معدان...
#الحوار_المتمدن
#موسى_فرج جرت العادة عندنا ان يوصف الحزن العميق والقاسي بـ حزن معدان والأمر نفسه ينطبق على الزعل فالزعل العميق والقاسي يسمى زعل معدان...الأمريكان والأوربيين زعلهم هذه المره على روسيا أضبط من زعل معدان موسيقى تشايكوفسكي منعوها، مسرحية البولشوي الروسيه منعوها ، عروض باليه البولشوي الروسيه منعوها ، عقد قائد الأوركسترا الروسي الشهير غيرغييف أنهوه، حتى المحاضرات عن الروائي الروسي الكبير فيودور دستوفسكي حظروها، كتاب الحرب والسلام لتولستوي سحبوه من المكتبات وصلوا لحد الفودكا الروسيه فرغوا القناني مالتها بالشوارع... بس شغله وحده ما حظروها ...الحظر الجوي على أوكرانيا فزيلينسكي يصيح ويستريح محد يغيثه بهاي... مو مثل كل مره واحدهم من يصفن بالحمام يطلع يعلن حظر طيران على بلد من بلدان العالم الثالث الظاهر محرمه عدهم مثل لحم الخنزير عدنا ...تبين الأمريكان والأوربيين هم يزعلون زعل معدان مثلنا...مع بعض الاختلاف فأنا مثلاً كلش زعلان على الإيرانيين وحتى على ربعنا الولائيين لكن من توصل الشغله يم الموسيقى الفارسيه أصفن ألها وأحط كَدامي الحكمه القائله: الخلاف لا يفسد في الود قضيه، وهم زين شغلتي بس تتعلق بالموسيقى ...الله يساعد ابو الترياك والشاهنامه...هذولا شلون يقاومون الحظر...طبعاً هذا الكلام ليس له علاقه بقضية التبني المطلق لشجب الحرب أياً كان من يشنها أو يتسبب فيها ، وقضية التعاطف المطلق مع ضحاياها من الشعوب أيا كان لون شعرهم أو لون عيونهم.... ......
#معدان...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=749046

موسى فرج : وجدانيات...
#الحوار_المتمدن
#موسى_فرج ح1: الشجرة القتيله...حوالي منتصف السبعينيات أصدرت وزارة الثقافة العراقية سلسلة من المطبوعات من بينها كتاب "جواد سليم" للراحل جبرا ابراهيم جبرا...اقتنيت الكتاب في حينه لكني وأنا اتصفح الكتاب بشغف تسمرت عيني على لوحة "الشجرة القتيله"...موضوع قطع الأشجار كممارسة وحرفه مارسها الانسان منذ بدأ الخليقه ومجرياتها لا تحرك في النفوس ساكناً لكن جواد في تلك اللوحة أفرغ خزينه العاطفي والاخلاقي بأعمق ما يكون عليه الشعور المرهف فصور الشخصين الذين يقومان بقطع وتكسير أغصان الشجرة بملامحهما الحادة القاسية ورداءهما الأبيض الموحي بالموت وكأنهما يفترسان إمرأه لا حول لها ولا قوة ولم ترتكب إثماً بكل قسوة ونذاله بل وأضاف للشجرة إمرأة منحية تجمع أوصال الشجرة القتيلة وهي بحالة استسلام وكأنها تقوم بحفر قبرها بيديها لتُقبر فيه مقطعة الأوصال أيضاً بعد فراغ الرجلين من تقطيع الضحية الأولى ...منذ اقتنائي لكتاب جبرا في منتصف السبعينيات عن جواد سليم وشجرته القتيله وأنا ورغم شغفي بالنبات والأشجار واهتمامي بالحديقة اكثر من اهتمامي بالبيت وبالرغم من أنهم يقولون أن تقليم الأشجار وبما فيه التقليم الجائر يفيدها لكني أشيح بنظري عن أية ممارسة من هذا النوع وأغضب عندما يقوم الفلاح أو "الحدقچي" بقطع أغصان احدى الشجرات في حديقة بيتي وحتى لو تم ذلك بغفلة مني أو غصباً عني فقد احتفظت بالأوصال المقطعة وقمت بغرسها في التربة ميته لكنها واقفه.... ......
#وجدانيات...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=749901

موسى فرج : وجدانيات...ح 2:المكتبة المهانه...
#الحوار_المتمدن
#موسى_فرج قبل ثلاثة أيام نشر صديقي الفاضل نضال موسى جعفر هذه الصورة وكتب تحتها الآتي: "تم تقسيم الأموال والعقارات على الورثة ، وبقيت المكتبة في البيت القديم ، لا يهتم بها أحد .. فقام المالك الجديد بالتخلّص منها بإلقائها في الشارع !!رحم الله مالكها الأصلي وهذا قدرها من بعدك..." ! لحظتها عجزت أصابعي عن كتابة أي تعليق واكتفيت بوضع علامة "حزين" تحت المنشور فقد اجتاحني مزيج من الشعور بالغضب والحزن والخيبة والاشمئزاز ...عدت للمرة الرابعة للمنشور فوجدت أن معظم إن لم يكن كل السادة الذي علقوا عليه انما ينصب أسفهم وتوجعهم على الكتب واهراقها بهذا الشكل باعتبار ان ذلك يشكل هدراً للأموال وكان من الممكن قيام الورثة ببيعها بنصف الثمن لأية مكتبه، وباعتبار إن هذا الفعل يشكل هدراً لثروة معرفية واهانة للفكر والعلم وكان من الممكن التبرع بها الى أية جهة معرفية أو المنظمات والناشطين في مجال "أنا أقرأ..."،وطبعاً مع احترامي لكل التعليقات واصحابها إلا ان اهتمامي كان في وادٍ آخر...أحد المعلقين كتب يقول: "يعني المرحوم كل هاااي الكتب وطلّع هاااي الخلفة...؟، العتب على المرحوم مو على الاولاد...!". فأزاد طيني بلّه...بعدها بسويعات خابرت صديقي القاضي المتقاعد ابو أحمد وهو من أفضل قضاة العراق في حقبة ما بعد 2003...ذكرت له موضوع المنشور والمكتبه والهجمة الأخلاقية المرتدة في زماننا ودار الحوار التالي بيننا:أنا: أبو أحمد آنا موضوع الكتب كقيمه ماليه مليونين ثلاثه مو مشكله وحتى القيمه المعرفيه للكتب مو مهم بالنسبة لي فالسوق حالياً مليان كتب واذا كتب أبوهم متعجبهم المكتبات تغص بالكتب وحتى من خلال التسوق الإلكتروني متوفره واذا هم اصلاً ميهتمون بالمعرفه فهذا شأنهم ولا اعتراض على ذلك، لكن آنا سامع إن بعض الأقوام اعتقدوا انهم وجدوا حافر الحمار الذي كان يركبه السيد المسيح فابتنوا على الحافر كنيسة وباتت مزاراً... ليش هذولا الأبناء ما اعتبروا كتب ومقتنيات ابوهم حافر زمال للأبوّه ويحترموها ما لازم يقدسونها... أشو الأب بعده ينشّغ يلفوه ببطانيه وكَبل للطب العدلي يطلعون شهادة وفاة ما يخلوه ولا ليله وحده لإلقاء النظره الأخيرة عليه تحت شعار: اكرام الميت دفنه...!وبمجرد ما يرجعون من الدفن يتوجهون لإنجاز شغلتين على وجه السرعه الأولى: التخلص من مقتنياته الما تجيب فلوس بالسوكَ خصوصاً الملابس والمقتنيات الشخصيه لشطب ذكراه وليس لما يدعونه زوراً طلباً للثواب للميت والا لو كانوا صادقين بطلب الثواب لأبيهم حقيقة لتبرعوا بفلوسه، بسيارته ، ببيته... حتى يكون الثواب أكبر وفقاً لقاعدة الثواب على قدر المشقه ليش يروحون لملابسه وصوره...؟ والثانيه: ينتظرون الصبح شوكت يصبّح حتى تلكَيهم يتلبكَون بالمحكمه يسوون القسام الشرعي...! حتى ان أحد اصدقائي يكَول حطيت صورة العباس ووكَفتهم بالسرا وحلفتهم بالعباس ابو راس الحار كون ما يوقعون على بيع البيت بحياتهم أما أبناءهم فبراحتهم يبيعوه يخلوه... وفعلاً حلفوا لكنهم والكلام ما زال لصديقي لا شأن لهم بالقيم الأخلاقية التي تحترم مكانة الأب وتلزمهم بما قطعوه على انفسهم له من وعد وانما يدينون بالمنظومة الدينية وهذه أمر التجاوز عليها سهل فمجرد كفاره بدراهم معدودات يتنصلون مما ألزموا به انفسهم... أبو احمد: مع ان الصورة مؤلمه لكنها غيض من فيض فقد صادفت بعض الممارسات التي أثناء عملي في المحكمة مما لا يشيب لها الرأس فحسب ولكن يندى لها الجبين...وأضاف: أنت ترى انه لا يمر أسبوع دون قراءة خبر في وسائل الأعلام عن شخص قتل والده أو زوجة قتلت زوجها إن بالسم أو تقطيع أوصاله عد ......
#وجدانيات...ح
#2:المكتبة
#المهانه...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=750028

موسى فرج : وجدانيات...ح 6 -نعم انا يساري...
#الحوار_المتمدن
#موسى_فرج وجدانيات...ح/6 ح 6/ ...في ذكرى تأسيس الحزب الشيوعي العراقي:نعم أنا يساري...*في عام 2007 كنت في زيارة رسمية لمجلس النواب واثناء دخولي صادفت بالصدفة صديقي العزيز مفيد الجزائري خارجاً من احدى قاعات المجلس باتجاه القاعة الرئيسية فلحقت به وتأبطته من خلاف وعندما التفت إليَّ قلت له: عندما تدخل الى القاعة لا تذهب الى مكان جلوسك المخصص مباشرة بل اتجه قبل ذلك الى منصة الرئاسة في المجلس وقف خلف كرسي محمود المشهداني قبالة الجالسين وهم أمامك ينتظمون في مجموعات كل مجموعة تنتمي الى حزب أو كتله ... ستجد أن مجموعتكم هي الفئة الأقل بغياً والأقل فسادا...وفي مساء نفس اليوم كنت في لقاء مع احدى الفضائيات وقلت إني وبحكم عملي في مكافحة الفساد لم اصادف ملف فساد يتعلق بأحد الذين شغلوا منصباً في الحكومة من الشيوعيين أو أصدقاءهم، وقد تكررت مقولتي تلك في وسائل الاعلام وربما لعبت دوراً في الانتباه الى هذه الصفة عند الشيوعيين العراقيين ليتبنوها وتشكل أساساً في مقولة "أصحاب الأيادي البيضاء" التي باتوا يعرفون بها لاحقاً لكني لا أقول بملائكية الشيوعيين وهذه ليست ذماً وفي نفس الوقت كنت أأخذ عليهم دائما ممالأتهم أكثر من اللزوم للراحل جلال الطالباني رغم دوره في مذبحة بشتاشان...*في عام 1973 سمعت أن الشاعر النجفي المعروف عبد الأمير الحصيري وقف على منصة اتحاد الأدباء في بغداد ثملاً وقال محتداً: إن كنت قد انتهيت سياسياً فإني لم انته وطنياً... في اشارة منه الى تمكن السلطة القمعية البعثية من تحييده تنظيمياً...* مصطلح اليسار واليمين وطبقاً لـ "ويكيبيديا-الموسوعة الحرة" تعود تسميته الى أماكن جلوس أعضاء البرلمان في فترة الثورة الفرنسية عام 1789 حيث كان يجلس في الجانب الأيمن المؤيدون للملكية ولإقطاع ورجال الدين في حين كان يجلس ممثلو الطبقة العامة او الشعب على اليسار..."طبعاً ليس موضع الجلوس هو الذي صنع متبنيات كل منهما إنما المتبنيات هي الأصل في ذلك الاستقطاب" فاليمين موالي للملكية واليسار يقول بسلطة الشعب، اليمين يؤمن بالتفاوت الطبقي بين البشر ويتمسك بوجوب وجود اغنياء وفقراء ويقول ان الأديان تؤيد ذلك ويستخدم سلطة الدولة لدعم المجموعة الإثنية أو الدينية المهيمنة، في حين أن اليسار على النقيض من ذلك فهو يتبنى العدالة الاجتماعية وتقليل التفاوت الطبقي ويدعم العلمانية "فصل الدين عن السياسة"، واليمين تقوم سياسته على النتيجة بينما يصر اليسار على إتباع الوسائل العادلة لتحقيق الغايات العادلة...*هذا على المستوى العام بالنسبة لليسار واليمين أما على المستوى الفردي: فاليميني متعالي متعصب منغلق استغلالي نفعي فاسد ...واليساري غير ذلك بالمرّه فهو صحيح يعشق الجمال ويحب الحياة ومغرم بالثقافة ويعشق المرأه واحياناً يتعاطى المزّه ...لكنه مجبول على سجايا مهمه ومميزه فهو بالضد من السلطان الجائر على طول الخط وهو وطني وانساني وخصاله على النقيض تماماً من الفساد والاستغلال ليس لأنه منتسب الى اليسار ولكن لأن اليساري الحقيقي طابع الإباء يتلبسه من قمة رأسه الى أخمص قدميه والإباء بطبيعة الحال يجعل من المرء عفيفاً عن الدنيئه فالعفة كما يقول الإمام علي صفة النزيهين...هذه الخصال والسجايا دفعت عراقياً معمماً مثل جعفر أبو التمن لأن يرد على متهميه بتأييد الشيوعية قائلاً: "إذا كانت الشيوعية تسعى لترفيه الفقير ومساعدة المحتاج وتنظيم المجتمع بشكل مفيد أؤيدها، وهذه هي شيوعيتي"...وطبعاً سجايا ابو التمن لم تقف عند حد اصطفافه مع فقراء شعبه بل كان مثالاً حياً لمقت الطائفية والتعصب الديني حتى ان حنا بطاطو أشار ......
#وجدانيات...ح
#-نعم
#يساري...

لقراءة المزيد من الموضوع انقر على الرابط ادناه:
https://ahewar.org/debat/show.art.asp?aid=751658