የኢትዮጵያ የኃይማኖት ተቋማት ጉባዔ የሰላም ኮንፍረንስ በሐረር ከተማ መካሄደ ጀመረ

አራተኛው ሀገር አቀፍ የኢትዮጵያ የኃይማኖት ተቋማት ጉባዔ የሰላም ኮንፍረንስ በሁለተኛ ቀን ውሎው በሐረር ኢማም አህመድ ስታዲየም በመካሄድ ላይ ይገኛል።

ኮንፍረንሱ "ሃይማኖቶች ለሰላም፣ ለአንድነትና ለአብሮነት'' በሚል መሪ ሃሳብ የተዘጋጀ ሲሆን፤ የሃይማኖት ተቋማት ጉባዔ የበላይ ጠባቂ አባቶች እና ተወካዮች፣ የሐረሪ ክልል ምክትል ርዕሰ መስተዳድር ሮዛ ኡመር፣ የሰላም ሚኒስትር ዴኤታ ከይረዲን ተዘራ(ዶ/ር)፣ የኢትዮጵያ የኃይማኖት ተቋማት ጉባኤ ጠቅላይ ጸሓፊ ሊቀ ትጉኃን ቀሲስ ታጋይ ታደለ ታድመዋል።

እንዲሁም የየክልሎችና ከተማ አስተዳደሮች የሃይማኖት ተቋማትና የሰላምና ፀጥታ ቢሮ ሃላፊዎች፣ የክልሉ ከፍተኛ የመንግስት የስራ ሃላፊዎች፣ የሃይማኖት አባቶች፣ የሀገር ሽማግሌዎች፣ አባገዳዎችና ነዋሪዎች ተገኝተዋል ሲል ኢዜአ ዘግቧል።

ኮንፍረንሱ ህዝቡ ሰላሙን እንዲጠብቅና የሰላም ባለቤት ሆኖ እንዲሰራ፣ ሰላም በሀገሪቱ በዘላቂነት ፀንቶ እንዲቀጥል የሃይማኖት አባቶችና ምዕምናን ይበልጥ እንዲሰሩ የሚያግዝ መሆኑ ተገልጿል።

እንዲሁም ኢትዮጵያ በሰላም በአንድነትና በአብሮነት ፀንታ እንድትቆም ህብረተሰቡን ለማነቃቃት ያለመ መሆኑ ተመላክቷል።
በኮንፍረንሱ የሃይማኖት ተቋማት ጉባዔ የበላይ ጠባቂዎች የሰላም መልዕክትና ጥሪ ያስተላልፋሉ ተብሎ ይጠበቃል።

የሰላም ኮንፍረንሱን የኢትዮጵያ የሃይማኖቶች ተቋማት ጉባኤ ከሐረሪ ክልል የሃይማኖት ተቋማት ጉባኤ ጋር በመተባበር ያዘጋጁት መሆኑ ተመልክቷል።

ከዚህ ቀደም የሰላም ኮንፍረንሱ በድሬ ዳዋ፣ ጅማ እና ባህርዳር ከተሞች መካሄዱ ይታወቃል።

ጊቤ ሦስት የኃይል ማመንጫ ግድብ 3 ሺህ 210 ቶን ዓሣ ተመረተ

በተጠናቀቀው የ2017 በጀት ዓመት የጊቤ ሦስት የኃይል ማመንጫ ግድብ በፈጠረው ሰው ሰራሽ ሐይቅ 3 ሺህ 210 ቶን የዓሣ ምርት ተገኘ።

በደቡብ ምዕራብ ኢትዮጵያ ክልል የዳውሮ ዞን ግብርና መምሪያ የእንስሳትና ዓሣ ሃብት ልማት ዘርፍ ኃላፊ አስፋው ጮራሞ ለፋና ዲጂታል እንዳሉት፤ በዞኑ ከኩሬ እና ከተለያዩ ውሃ አካላት 4 ሺህ 200 ቶን የዓሣ ስጋ ለማምረት ታቅዶ 4 ሺህ 111 ነጥብ 6 ቶን ዓሳ ተመርቷል።

ከዚህ ውስጥ 3 ሺህ 210 ቶን ምርት የተገኘው የጊቤ ሦስት የኃይል ማመንጫ ግድብ ከፈጠረው ሰው ሰራሽ ሐይቅ ነው ብለዋል።

በሐይቁ ላይ 160 ወጣቶች በተለያዩ ማህበራት ተደራጅተው በዓሣ ማምረት ስራ ላይ የተሰማሩ መሆኑን ተናግረዋል።

ለወጣቶቹ ምርታማነታቸው እንዲጨምር የሚያስችል ድጋፍ እየተደረገላቸው እንደሆነ ጠቅሰው የምርት ማከማቻና መሸጫ ሼድ ግንባታ፣ የምርት ማቆያ ፍሪጆች እና ሐይቅ ላይ የምርት ማጓጓዣ የሞተር ጀልባ እንዲያገኙ ተደርጓል ነው ያሉት።

እንዲሁም ምርትን ወደ ተለያዩ የአካባቢ ገበያዎች አጓጉዘው የሚሸጡበት ፍሪጅ የተገጠመለት መኪና እና ሌሎች ድጋፍ መደረጋቸውን ገልጸዋል።

ወጣቶቹ በቀን እስከ አንድ ቶን የሚደርስ ዓሣ እያመረቱ መሆናቸውን ገልጸው ከአካባቢ ገበያ ጀምሮ እስከ ማዕከላዊ ገበያ ድረስ ምርት እያቀረቡ እንደሚገኙ አስረድተዋል።

የጊቤ ሦስት የኃይል ማመንጫ ግድብ 1 ሺህ 870 ሜጋ ዋት ኤሌክትሪክ በማመንጨት ከታላቁ የኢትዮጵያ ሕዳሴ ግድብ ቀጥሎ ግዙፉ የኃይል ማመንጫ ሲሆን÷ ግድቡን ተከትሎ የተገነባው የሀላላ ሎጅም ለአካባቢው የቱሪስት መዳረሻ በመሆን የገቢ ምንጭ ሆኖ እያገለገለ ይገኛል።

(ኤፍ ኤም ሲ)

#ኢትዮጵያና #ተርኪሚኒስታን “ኢ-ፍትሃዊ የሆኑ የባህር በር ተግዳሮቶችን” በጋራ ለመፍታት መስማማታቸው ተገለጸ

ኢትዮጵያና ተርኪሚኒስታን በባህር በር ምክንያት የሚከሰቱ ተግዳሮቶችን በጋራ ለመፍታት እንዲሁም ቀጣናዊ ውህደትንና ንግድን ለማጠናከር ከስምምነት ላይ መደረሳቸው ተገለጸ።

ሦስተኛው የተባበሩት መንግሥታት ባህር በር የሌላቸው በማደግ ላይ ያሉ ሀገራት ጉባኤ (UNLLDC3) "በአጋርነት ለውጥ ማምጣት" በሚል መሪ ሀሳብ በተርኪሚኒስታን አስተናጋጅነት እየተካሄደ ይገኛል።

ከጉባኤው ጎን ለጎን ትራንስፖርትና ሎጂስቲክስ ሚኒስትር አለሙ ስሜ (ዶ/ር) ከተርኪሚኒስታኑ የንግድና የውጭ ኢኮኖሚ ግንኙነት ሚኒስትር ናዛር ሃልናዛሮቪች አጋሃኖቭ ተወያይተዋል።

ሁለቱ ሀገራት ኢ-ፍትሃዊ የሆነውን የባህር በር ተግዳሮት በጋራ ለመፍታት የመከሩ ሲሆን፤ ለንግድና ኢኮኖሚ እድገት መፋጠን አስተዋጽኦ የሚያደርጉ ቀልጣፋና አነስተኛ ወጪ ያላቸውን የትራንስፖርት መፍትሄዎች ለመፍጠር ትብብራቸውን ለማጠናከር ተስማምተዋል ሲል ኢዜአ ከስፍራው ዘግቧል።

ሚኒስትሮቹ ከፍተኛ የትራንስፖርት ወጪ፣ በጎረቤት ሀገራት ወደቦች ላይ ሙሉ ጥገኝነት እና የንግድ መስመሮችን የሚያውኩ የጂኦ ፖለቲካዊ አለመረጋጋት ስጋቶችን ጨምሮ የተለያዩ ተግዳሮቶችን አንስተዋል።

https://web.facebook.com/AddisstandardAmh/posts/pfbid0QPtZ56XDfE3AzubxfRLuCamLn43KG3zqh5sv2ZmUVYZtVi2YUgCV9kQE4owpu2NYl