ዜና: #በኢትዮጵያ የከተማ ወባ በሽታ ስርጭትን ለመቆጣጠር በሶስት ከተሞች ላይ ያተኮረ የምርምር ፕሮጀክት ተጀመረ

#በጅጅጋ፣ #ሰመራና #ሎጊያ ከተሞች አደገኛ የከተማ ወባ በሽታ ስርጭትን ለመቆጣጠር የሚያስችል፣ በቴክኖሎጂ የታገዘ አዲስ የምርምር ፕሮጀክት ተጀመረ።

የጥናት ፕሮጀክቱ ለሶስት አመታትን እንደሚካሄድ የተጠቆመ ሲሆን ከሰሜን #አሜሪካ ኤምሪ ዩንቨርሲቲ ጋር በመተባበር ምርምሩን በዋናነት የሚያካሂዱት፣ የአዲስ አበባ እና ጅጅጋ ዩንቨርስቲዎች መሆናቸው ተገልጿል።

ፕሮጀክቱ ከጌትስ ፋውንዴሽን በተገኘው የሁለት ነጥብ ስምንት ሚሊዮን ዶላር የገንዘብ ድጋፍ ይካሄዳል የተባለ ሲሆን በኢትዮጵያ አደገኛ የሆኑ የከተማ ወባ አማጪ ትንኞችን ለመቆጣጠር ከፍተኛ ቴክኖሎጂና ርካሽ የሆነ ዘዴን ለመጠቀም የሚያስችል መሆኑ የጀርመን ድምጽ ባስደመጠው ዘገባ ጠቁሟል።

ከጣቢያው ጋር ቆይታ ያደረጉት በጅጅጋ ዩኒቨርሲቲ የዚሁ ፕሮጀክት ተባባሪ ተመራማሪ የሆኑት ዶክተር ሰሎሞን ያሬድ እንደተናገሩት ባለው ነባራዊ የቁጥጥር ዘይቤ፣ የትንኝ ዕጭ ቁጥጥር የነበረው፣ የብዙ የሰው ኃይል የሚያስፈልገው እና ወጭውም ከፍተኛ መሆኑን ገልጸዋል።

አክለውም የትንኝ መራቢያ ቦታዎችን ለመለየት ቀልጣፋና ትክክለኛ የሆነ መረጃን መስጠት የሚችል ቴክኖሎጂን ጥቅም ላይ በማዋል ስርጭቱን ለመቆጣጠር መታሰቡን አመልክተዋል።

ከአዲስ አበባ ዩኒቨርሲቲ፣ የዚህ ፕሮጀክት ሌላኛው ተመራማሪ የሆኑት ዶክተር አርአያ ገብረሥላሴ በበኩላቸው "ኢኖሬሌስ ስቴፌንሲ" የተሰኘችው የወባ ትንኝ በተለይም በምስራቁ የኢትዮጵያ ክፍል በሚገኙ ከተሞች መስፋፋቷን ገልጸዋል።

https://web.facebook.com/AddisstandardAmh/posts/pfbid0C4BPZCwu5CcwsHMHxhf4CyUWnkNmij9NDQQTrzhpkvJWBEa2QSqNzH4ARp9zvzCEl

በፎቶ፤ በ #ጁቡቲ የ #ኢትዮጵያ ኢምባሲ በፍቃደኝነት ወደ ኢትዮጵያ መመለስ የሚሹ ዜጎችን እየመዘገበ መሆኑን ገለጸ

የጂቡቲ መንግስት በህገ-ወጥ መንገድ በጂቡቲ የሚኖሩ የውጭ ሀገር ዜጎች ለቀው እንዲወጡ መመሪያ መስጠቱን ተከትሎ በጁቡቲ የኢትዮጵያ ኢምባሲ በፍቃደኝነት ወደ ኢትዮጵያ መመለስ የሚፈልጉ ዜጎችን እየመዘገበ መሆኑን አስታውቋል።

የሀገሪቱ መንግስት ህጋዊ የመኖሪያ ሰነድ የሌላቸው የውጭ አገር ዜጎች ከመጋቢት 25 እስከ ሚያዚያ 24 2017 ዓ/ም ድረስ በፍቃደኝነት እንዲወጡ፤ ይህን የማይከተሉ ከሆነ በሀይል እንዲወጡ እንደሚደረግ አሳስቧል።

የኢትዮጵያ ኢምባሲ ከጁቡቲ የሀገር ውስጥ ጉዳይ ሚኒስቴር ጋር ባደረገው የከፍተኛ ደረጃ ውይይት ቀነ ገደቡ እንዲራዘም ያቀረበው ጥሪ አለመሳካቱን ገልጿል።

ዜና፡ በአቶ #ጌታቸው ረዳ የሚመራው ህወሓት 'ትግራይ ሊብራል ዴሞክራሲያዊ ፓርቲ' የሚባል አዲስ ፓርቲ ሊያቋቁም መሆኑ ተገለጸ

በአቶ ጌታቸው የሚመራው #ከህወሓት የተከፈለው ቡድን አዲስ የፖለቲካ ፓርቲ ለማቋቋም በሂደት ላይ መሆኑ ተጠቆመ።

ይህ አዲስ በምዝገባ ሂደት ላይ የሚገኘው የፖለቲካ ፓርቲ በሊብራል ዴሞክራሲ ጽንሰ ሃሳብ የሚከተል መሆኑን እና "ትግራይ ሊብራል ዴሞክራሲያዊ ፓርቲ" በማለት ለመጠራት መወሰኑን ከአመራሮቹ መካከል አንዱ እንደገለጹለት ቢቢሲ በዘገባው አስታውቋል።

ስማቸው እንዳይገለጽ የጠየቁት እኚህ የቀድሞ የህወሓት አመራር "ይህ ስም የፖለቲካ ፓርቲውን ለመመሥረት በእንቅስቃሴ ላይ ባሉ ሰዎች የተመረጠ እንጂ ከምርጫ ቦርድ እውቅና ስላላገኘ ጉባዔ ሲካሄድ ሊቀየር ወይንም ሊሻሻል ይችላል" ብለዋል።

የህወሓት መሰረዝ ስጋት የፈጠረባቸው በአቶ ጌታቸው የሚመራው የህወሓት ማዕከላዊ ኮሚቴ አባላት ከሳምንታት በፊት ባወጡት መግለጫ በዶ/ር ደብረፂዮን ለሚመራው ቡድን በጋራ ጉባዔ ለማካሄድ ጥሪ አቅርበው የነበረ ቢሆንም በጎ ምላሽ አለማግኘታቸውን ገልጸዋል።

"የህወሓት ሕጋዊነት ስለሚያበቃ የህወሓት የፖለቲካ ዓላማዎችን ለማሳካት የሚያስችለን አዲስ የፖለቲካ ፓርቲ ለመመሥረት ተገድደናል" ሲሉ ምንጮቼ ገልጸዋል ያለው ቢቢሲ የፓርቲው ሕገ ደንብና ፕሮግራሞቻችን አርቅቀው መጨረሳቸውን ነግረውኛል ብሏል።

ምንጩ አክለውም የደጋፊዎቻቸውን ፊርማ በማሰባሰብ ላይ እንደሚገኙ መናገራቸውን ያመላከተው ዘገባው ምርጫ ቦርድ ያስቀመጣቸውን መስፈርቶች ገና ስላላሟሉ እስካሁን ድረስ ለቦርዱ በይፋ ያቀረቡት ጥያቄ እንደሌለ መናገራቸውን አስታውቋል።

ፓርቲው ክልላዊ መሆኑን ምንጩ እንደነገሩት የጠቆመው ቢቢሲ ከምርጫ ቦርድ በግንቦት የመጀመሪያ ወር ላይ ቅድመ እውቅና እናገኛለን ብለው እንደሚጠብቁ ገልጸውልኛል ብሏል

ዜና፡ “#በአፋርና #በኦሮሚያ ክልል ለአፈር ማዳበሪያ ግብአትነት የሚውል 371 ሚሊየን ቶን የፖታሽ እና ፎስፌት የማዕድን ክምችት መኖሩን ባካሄድኩት ጥናት አረጋግጫለሁ” - ኢንስቲትዩቱ

ኢትዮጵየ ጂኦሎጂካል ኢንስቲትዩት በአፋር እና በኦሮሚያ ክልል አካሄድኩት ባለው ጥናት ለአፈር ማዳበሪያ ግብአትነት የሚውል 371 ሚሊየን ቶን የፖታሽ እና የማዕድን ክምችት መኖሩን አረጋግጫሉ ሲል ገለጸ።

ከዚህ ቀደም በአፋር ክልል በሸከት (አብአላ) ከተማ ዳሎል ላይ ባአካሄድኩት የማዕድን ፍለጋ 191 ሚሊዬን ቶን የፖታሽ ክምችት መኖሩን በጥናት አረጋግጫለሁ ያለው ኢንስቲትዩቱ በኦሮሚያ ክልል በባሌ ዞን መልካ አርባ እና መካና ጎበሌ አካባቢ180 ሚሊዮን ቶን የፎስፌት ማዕድን ክምችት እንዳለ ያካሄድኩት ጥናት አመላክቶኛል ብሏል።

በአሁኑ ወቅት እነዚህ ማዕድናቶች ጋር በተያያዘ በመልካ አርባ እና መካና ጎበሌ አካባቢ ቀጣይነት ያለው ጥናት በስፋት እያካሄድኩ ነው ሲል ጠቁሟል።

የጥናቴ አላማ የግብርና ዘርፉን በማጠናከር ከውጭ በሚገቡ ማዳበሪያዎች ላይ ያለውን ጥገኝነት በመቀነስ ለምግብ ዋስትና እና ለኢኮኖሚ ዕድገት ምቹ ሁኔታን ለመፍጠር ያለመ ነው ሲል ገልጿል።

የሀገር ውስጥ የግብርና ምርታማነትን ለማሳደግ የአፈር ማዳበሪያ ላይ ጥናት እያካሄድኩ ነው ሲል ኢትዮጵየ ጂኦሎጂካል ኢንስቲትዩት ባጋራው መረጃ አስታውቋል።

================
የአዲስ ስታንዳርድ አማርኛ የማኅበራዊ ትስስር ገጾችን ይቀላቀሉ፡
ቴሌግራም: https://rb.gy/rekjr
ፌስቡክ: https://rb.gy/xwxb3
ትዊተር (X)፡ https://rb.gy/34uh4
ዩቲዩብ፡ https://rb.gy/bjcbg
ድረገጽ: https://rb.gy/5td6n
ቲክቶክ፡ https://rb.gy/jgdsjm