2ኛው የተባበሩት መንግሥታት የምግብ ሥርዓት ጉባኤ በ #አዲስ_አበባ መካሄድ ጀመረ

#ኢትዮጵያ እና ጣልያን በጋር ያዘጋጁት 2ኛው የተባበሩት መንግሥታት የምግብ ሥርዓት ጉባኤ በአዲስ አበባ መካሄድ ጀመረ።

በመዲናዋ እየተካሄደ ባለው ጉባኤ ላይ የጣሊያን ሪፐብሊክ ጠቅላይ ሚኒስትር ጂኦርጂያ ሜሎኒ፣ የተባበሩት መንግሥታት ምክትል ዋና ፀሐፊ አሚና መሃመድ፣ የዓለም የምግብ እና የእርሻ ድርጅት (ፋኦ) ዋና ዳይሬክተር ኩ ዶንግዩ፣ የዓለምአቀፍ የግብርና ልማት ፈንድ (IFAD) ፕሬዝዳንት አልቫሮ ላሪዮ እየተሳተፉ ይገኛሉ።

በተጨማሪም የተባበሩት መንግሥታት ረዳት ዋና ፀሐፊና የዩኤንዲፒ የአፍሪካ ቀጠና ዳይሬክተር አሁና ኢዚያኮንዋ፣ የሶማሊያ ፕሬዚዳንት ሀሰን ሼህ መሃሙድ፣ የኬንያ ሪፐብሊክ ፕሬዝዳንት ዊልያም ሩቶን ጨምሮ በርካታ ሚኒስትሮችና ባለድርሻ አካላት የጉባኤው ተሳታፊ ናቸው።

የምግብ ሥርዓት ጉባኤው አጀንዳዎች በዓለም የምግብ ሥርዓት ላይ በተገኙ ለውጦችና ተግዳሮቶች ላይ እንደሚሆን ተገልጿል። ሀገራት የምግብ ስርዓት ትራንስፎርሜሽንን ያገኟቸውን ስኬቶችና ያጋጠሟቸው ተግዳሮቶች ላይ ሪፖርት ያቀርባሉ፤ በሮሙ ጉባኤ የገቧቸው ቃሎች የደረሱበትን ደረጃ ይገመግማል እንዲሁም አቅጣጫዎችንም ያሰቀምጣል ተብሏል።

ለምግብ ስርዓት ሽግግር ስራዎች በአነስተኛ ወለድ የፋይናንስ አቅርቦትን ተደራሽ ማድረግ፣ አማራጭ የፋይናንስ ምንጮችን መጠቀም እና ሀገር በቀል የፋይናንስ መሰብሰብ አቅምን ማጎልበት ላይ ምክክሮች እንደሚደረግ ኢፕድ ዘግቧል።

ከጉባኤው ጎን ለጎን የአረንጓዴ አሻራ መርሐግብሮች፣ የሁለትዮሽ ውይይቶችና ጉብኝቶች ይደረጋሉ ተብሎም ይጠበቃል።

ዕለታዊ ዜና፡ በ #አዳማ ከተማ የ #ህንድ ዜጋ አስክሬን ተገኘ፤ ፖሊስ ምርመራ እያደረገ መሆኑን አስታወቀ

በአዳማ ከተማ ባሳለፍነው ቅዳሜ አስክሬኑ የተገኘው የህንድ ዜጋ አሟሟትን በተመለከተ ምርመራ እየተካሄደ መሆኑን የከተማዋ ፖሊስ መምሪያ ለአዲስ ስታንዳርድ አስታወቀ።

ኤን ቪ ሱባ ራኦ የተባለው የህንድ ዜጋ ለካልፓታሩ ፕሮጀክት የሚሰራ የፈጣን መንገድ ፕሮጀክት ሰራተኛ ሲሆን አስክሬኑ ያለፈው ቅዳሜ ሐምሌ 19፣ 2017 ዓ/ም በአዳማ ከተማ በፖሊስ መገኘቱን በኢትዮጵያ የህንድ ኤምባሲ ባወጣው መግለጫ አስታውቋል።

የአዳማ ከተማ ፖሊስ መምሪያ አዛዥ ኮሚሽነር ሸዋዬ ዳቻሳ የውጭ ሀገር ዜጋው ህይወት ማለፉን ለአዲስ ስታንዳርድ አረጋግጠው፤ የክስተቱን መንስኤና ሁኔታ ለማጣራት ምርመራ እየተካሄደ መሆኑን ገልጸዋል።

ተጨማሪ ያንብቡ፡ https://addisstandard.com/Amharic/?p=8664

#አልሸባብ የ #ኢትዮጵያ ጦር ያስለቀቀውን ከተማ ከሶማሊያ ሠራዊት መልሶ ተቆጣጠረ

የሶማሊያው ታጣቂ ቡድን አልሸባብ ከ11 ዓመት በፊት በኢትዮጵያ ጦር እንዲለቅ የተደረገውን እና በሶማሊያ መንግሥት ሠራዊት ስር የነበረችውን ማሃስ ከተማ ዳግም በቁጥጥሩ ስር ማስገባቱ ተሰማ።

በማዕከላዊ ሶማሊያ ሂራን ክልል ውስጥ የምትገኘው ማሃስ ትናንት እሁድ ከባድ ውጊያ መካሄዱን ቢቢሲ ሶማሊኛ ዛሬ ማለዳ ባወጣው ዘገባ አመላክቷል።

በከተማዋ በመንግሥት ወታደሮች እና ከአልቃኢዳ ጋር ግንኙነት እንዳለው በሚነገርለት በአልሸባብ ታጣቂዎች መካከል በተካሄደው ከባድ ውጊያ በርካቶች መሞታቸው ተሰምቷል።

አልሸባብ በከተማዋ ላይ ጥቃት የፈጸመው ተቀጣጣይ ፈንጂ በጫኑ መኮኖች በመታገዝ መሆኑን የአካባቢው ነዋሪዎች ለቢቢሲ ሶማሊኛ ተናግረዋል።

የሶማሊያ መከላከያ ሚኒስቴር በአካባቢው ስላለው ግጭት ባወጣው አጭር መግለጫ የአካባቢ እና የመንግሥት ኃይሎች በርካታ የአልሸባብ ታጣቂዎችን መግደላቸውን ገልጿል።

ነገር ግን ሚኒስቴሩ ምን ያህል ታጣቂዎች እንደተገደሉ የገለፀው ነገር የለም። የአከካባቢው ነዋሪዎች በአልሸባብ እና በመንግሥት ወታደሮች መካከል በነበረው ውጊያ በርካታ ሰዎች መገደላቸውን ተናግረዋል።

https://www.bbc.com/amharic/articles/c8e1l4874epo

ዜና፡ “በመንግስት ላይ ተገቢውን ጫና ለመፍጠር ለምናደርገው ትግል መራጩ ህዝብ ከጎናችን እንድትቆሙ” ሲል የተቃዋሚ ፖለቲካ ፓርቲዎች ኮክሰ ጠየቀ

የ #ኢትዮጵያ ተቃዋሚ ፓርቲዎች ኮከስ፤ በአገራችን ያንዣበበው አደጋ ለመቀልበስ ዘላቂ ሠላም እንዲሰፍንና መጪው ምርጫ ነጻ፣ ዲሞክራሲያዊና ተዓማኒ ይሆን ዘንድ “በገዢው ፓርቲ/መንግስት/ ላይ ተገቢውን ጫና ለመፍጠር ለምናደርገው ትግል መራጩ ህዝብ የምናቀርበውን ጥሪ እንድትከታተሉና ከጎናችን እንድትቆሙ” ሲል ጠየቀ።

የኦሮሞ ፌዴራሊስት ኮንግረስ (አፌኮ)፣ የኦሮሞ ነፃነት ግንባር (ኦነግ) እና የኢትዮጵያ ህዝቦች አብዮታዊ ፓርቲን (ኢሕአፓ) ጨምሮ ስምንት ፓርቲዎችን ያካተተው ኮክሱ ዛሬ ባወጣው መግለጫ፤ "ጥያቄዎቻችን ከፖለቲካ ጥያቄ ባሻገር የአገር-አድን ፣የህዝብ መድህንነት አጀንዳ ናቸውና፤ የሲቪል ማኅበረሰብ አባላት በሁሉም መድረኮች፣ በሙሉ አቅማችው ከፓርቲዎቹ ጎን እንዲሰለፉ” በማለት ጥሪ አቅቧል።

ፓርቲዎቹ፤ ከመጪው ምርጫ በፊት የቦርዱ “ሀጋዊ የአሰራርና ተቋማዊ ችግር እስካልተፈታ ድረስ ለምርጫ መዘጋጀት የሚለው ሀሳብ ትርጉም አልባ ይሆናል” ሲሉ አስጠንቅቀዋል። በእነዚህ ሁኔታዎቸ “ነጻና ፍትሃዊ ምርጫ ሊኖር አይችልም” ያለው መግለጫው፤ “እውነተኛ ሪፎርም ከሌለ በኢትዮጵያ ተኣማኒ፣ አካታች፣ ነጻና ዲሞክራሲያዊ ምርጫ ሊኖር አይችልም” ብሏል።

ሙሉ ለማንበብ፡ https://addisstandard.com/Amharic/?p=8667

ዜና: በአዲስ አበባ በአልጋ ቤቶች ላይ በተደረገ ድንገተኛ ፍተሻ አራት ክላሽንኮቭ መሳሪያ ከ298 ጥይቶች ጋር መያዙን #ፖሊስ አስታወቀ

የአዲስ ከተማ ክፍለ ከተማ ፖሊስ መምሪያ በአዲስ አበባ ከተማ ወረዳ ሰባት ልዩ ቦታው 32 ቀበሌ ተብሎ በሚጠራው አካባቢ በሚገኙ አልጋ ቤቶች ላይ “በተደረገ ፍተሻ”፣ “አራት ክላሽንኮቭ መሳሪያ ከ298 ጥይቶች” ጋር መያዙን አስታወቀ።

የአዲስ አበባ ፖሊስ ኮሚሽን የህዝብ ግንኙነት ኃላፊ ኮማንደር ማርቆስ ታደሰ፤  “ኦፕሬሽኑ የከተማዋን ሰላምና ፀጥታን ለማስጠበቅ የሚደረገው ጥረት አካል ነው” ያሉ ሲሆን፣  “የመዲናዋን ሠላምና ፀጥታ አስተማማኝ ለማድረግና አጠራጣሪ ጉዳዮች ባጋጠሙበት ወቅት ጭምር ድንገተኛ እና የተጠና ፍተሻና አሰሳ እንደሚደረግ” ገልጸዋል።

የጦር መሳሪያዎቹ “መኝታ ቤቶችን በሚያከራዩ ቤቶች ውስጥ የተያዙ” ሲሆን፣ እነዚህ ቤቶች “ከፍተኛ የሰዎች እንቅስቃሴ ያለባቸው  እና ውስን ቁጥጥር የሚደረግባቸው መሆናቸውን” የከተማዋ ፖሊስ አመልክቷል።

ፖሊስ የወንጀል ድርጊቱ ተሳታፊ ነበሩ ያላቸው ፍቃዱ ማናየ፣ አዳነች ጎበዜ፣ ዮሀንስ ፍቃዱ እና ዮናስ በቀለ የተባሉ ግለሰቦች ላይ ተገቢው ምርመራ እያከናወነ የሚገኝ ሲሆን፣ ሌሎች ተጨማሪ መረጃዎችን በማሰባሰብ በህግ አግባብ ለማስጠየቅ እንደሚሰራ ኮማንደር ማርቆስ ገልጸዋል፡፡

ተጨማሪ ያንብቡ: https://addisstandard.com/Amharic/?p=8674&amp=1