المجاراة عن جدية موقف #الشعب_اليمني مع كل خيارات التصدي لأي تحالف دولي بحري أو بري حتى أنسحاب الأحتلال من #غزة

البداية #سامي_عبيد

بيان جيش اليمن  للكل تحذيري
يراجعوا كلمة القايد وتحذيره

من يدخل البحر الاحمر يخلس الميري
كلام مفهوم ما يحتاج تكريره

ياذي حشدتوا تحالفكم.!! على غيري
جيش اليمن بايخلي  حلفكم طيره

#أبورواسي_أرحب

جو بايدن والنتن ياهو وجون كيري
مكتب تحالف والأعراب السكرتيره 

بايصبحوا كلهم عنوان تقريري
عن السفن ذي تجي من دون تأشيره

هي حرب ماهي علم سيري علم سيري
وموقف الشعب هذا صعب تغييره

#عبدالباري_عبيد

‎دوى فـ البحر الأحمر صوت تكبيري
الأمـــر لله والـتــدبـيـــر تـدبـيــــرة

لـو شكلوا حلف كوني لجل تدميري
من (مثليين) الدول منزوعة الغيرة

بـ اواجه الكل(صهيوني)و(تكفيري)
واقطع وتين(اليهودي) قبل تدميرة

بلبل النصر #حسن_المهدي

قـل للمريك اختبار اليوم تحريري
والمندب اول وريقه واخره صيره

والاسئله اجباريه والحل تفجيري
مـا بـه خيارات والا عد لهم خيره

والـبحر يقدح شرر ذري وتدميري
وتـخـرج اثـقـالها حـنـة مـواصيره

#فارس_المعزبي

قل للمغيرات ياشعب اليمن غيري
احنا هل الحرب والفزعات والغيره

ماهمَّنا(تُوم)(واشنطن)ولا(جيري)
فينا عزيمه من القرآن والسيرة

والبحر مسجور وامواجه بتقديري
نيران حمرا ومخلوقات شرِّيره

#ابوالمازن_الشريف

شعب اليمن جيش كله حسب تقديري
للنعركه محتزم جهّز تدابيره

لو جت جيوش الاعادي في طوابيري
ما حاد عن نصر غزه او وهن سيره

والجيش في البحر واقف بالمغاويري
قاطع موارد عدو الله وتصديره

#أحمد_عطا

يابو المسير على ايلاتهم طيري
الوقت وقت التحرك مالنا غيره

والكل بايلمسو في البحر تأثيري
والسيد اللي لمس ذا الكون تأثيره

وله ولائي وله حبي وتقديري
افديه وافديه وافدي كل تفكيره

#ابوقصي_العويري

لا ما نسفنا قواهم ما كُن عويري
ونخلي الحلف عبره نافع لغيره

اليوم لا داعشي يبقى وتكفيري
با نغرق اربابهم فالبحر ونديره

ويعرف الكون معنا اسلامنا الخيري
ويشتهر ديننا ويبين تاثيره

#ابومالك_الكوماني

ملامح النصر بانت حسب تقديري
ل عودت المسجد الأقصى وتحريره

موقف قوي يسنده موقف جماهيري
ظهر ف الأعداء مدى فعله وتأثيره

لا تحسبوها مسلسل توم معْ جيري
ذا وعدكم حان لا فرصة لتأخيره

#ابوهادي_عقاب

نقل للامريك وبريطان ودويري
سيادة البحر ماهي في تقاريره

مابا تمر السفن من غير تأشيري
واللي لصهيون ترجع دون تأشيره

ولمن تحدى يجي صاروخ تدميري
وسط البوارج يتم دعسه وتدميره

#الشاعر_ابو_صقر_شعلان

برسل الى شعبنا شكري وتقديري
ذي بالبطوله دخل في الفقه والسيره

والقايد الحيدري ذي فاق تصويري
بيحارب الكون كله ديرة(ن) ديره

الحرب ماهو مسلسل تومي وجيري
وخيرة الله عليكم يايهود خيره

#الشاعر_عبدالحكيم_ابوهاشم

خبر قوى الشر ذو مشروع تدميري
ما همنا حلف واشنطن ولا غيره

لو يحتشد كله العالم مع كيري
والدعم بالمال بالدولار واليره

لن يخضعوا شعبنا بااسلوب تنفـيري
محال تخضع قيادتنا بتنفيره

#مقبل_جرام

مشروعنا نهضوي علمي وتنويري
وكل شي عندنا قدره لتطويره

وطموحنا عالمي ثوري وتحريري
عنوانه القدس فرض العين تحريره

قرارنا جِد جِد الجِد يا كيري
يصعب على دولتك خرقه وتكسيره

#محمد_ابوالعز

عقدين مرت على صرخات تكبيري
و كلما يمكــــــــــروا يـزداد تكبيره

جمعهم ابليـس في حلفه لتدميري
ما يـــدري الحلف انه حان تدميره

ارســلني الله اعـــذّب كل تكفيري
و احرر النـاس من فكره و تكفيره

#محمد_الاخرم

وإن مافهم خصمنا ياطائرة طيري
وياصورايخ لا تبقي لهم ديرة

صاروخ راسة ثلاثة طن تفجيري
نحرق بها وارد الغازي وتصديرة

بقصف على المعتدي واخط تقريري
وإعلامنا يحفظ الموقف بتصويرة

#ابوالكرار_المجنحي

سيري إلا الحتف يا مال السعر سيري
سبحان ذي امره النافذ وتدبيره

ذي قال الاول على أمسيري على امسيري
وبايدن كم قد اجتزنا على غيره

انا معا الله متحزم وكم غيري
مليون واكثر إذا شب النكف كيره

#الشاعر_جلال_السكري

ياطايرات المسير فوقهم طيري
قطي عروق التحالف من مناحيرة

والكذب والدجل والصابون والفيري
والببس والكيك والبسكوت والبيرة

لامايوقف علينا حرب هستيري
لانخرج الكبر حقه من مناخيره

#الكرار_المشراقي

الى فلسطين سيري يايمن سيري
دوسي قوا الكفر وحلافه وتكفيره

في البحر طوفان متفجر وتدميري
يحرق سفنهم ويقطع كل تصديره

لاعد يبقى بوجه الارض تكفري
وكل من خان الاقصى حان تطهيره

#ابوكنعان_الروس

صبن ابايب ابتهم دعس باالفيري
وخلي المعتدي يقحط لا أضافيره

والمرتزق من وراه يرقص علم سيري
يابيعن الوطن والعرض والديره

بوذي يهودي ونصراني وتكفيري
يامدمنين الحشيش والخمر والبيره

#ابـومـازن_الـرازحـي

تحذير شعب اليمن جِدِّي وتعذيري
مافيه،رجعـه لتفعيله وتمـريره

لو تجتمـع قـوة العالم مع الـذِّرِّي
لابد لكيانهم يمحى من الديره

بايمـاننا والقيادة نجعل الهوري
يغرق سفنهم،ويوقفها عن السَيره

المجاراة بعنوان #لستم_وحدكم

البداية #الشاعر_ابوكنن

يافلسطين لستم وحدكم
من معا الله ماهوشي وحيد

واصلوا يدنا في يدكم
ياالواالعزم والباس الشديد

#ضيف_الله_سلمان

الكيان انتهاء في حدكم
جسدوا وعد ربي والوعيد

شعب الايمان كله بعدكم
شعب ما غيره الناجي الوحيد

#عابد_المدم

ردنا لليهودي ردكم..
والغنايم والاسرى والعديد..

فاوضوا وأشرطوا ذي ودكم..
وابدعوا وأختموا في ظهر جيد..

#محمد_الجرف

مدنا الله ذي ما مدّكم
يالمريكان واعطانا المزيد

عندنا كل ذي ماعندكم
بيد الامريك يالقهّار بيد

#أبويوسف_القاري

كل ساكت وواقف ضدكم
يلعنه من لعن قبله يزيد

واليمن في مسيرة رفدكم
قادها صاحب القول السديد

#الشاعر_جبر_المهدمي

كلـــنا يافلسطـــين جندكم
لاتراجع ولايــــمكن نحيد

ومجدناذي يحيي مجدكم
عز" والنصر ماعاده بعيد

#ضيف_الله_هجوان

يافلسطين افــــــدي جدكم
اصمدو واثبتو مثل الحديد

وانعتــــــونا متـى ما ودكم
بانجي نعصد الدنياء عصيد

#ابوبدر_ذيبان

ياشويقاه من هو عندكم
داخل انفاق والا وسط بيد

اقتحم تل ابيب من حدكم
فوقهم فوقهم واصعد شهيد

بلبل النصر #حسن_المهدي

عـيـدوا يــا صـهـاين عـيدكم
وارقصوا فوق جثمان الوليد

واعـمـلوا فـالجرايم جـهدكم
قـبلما الـبحر يـجرفكم بـعيد

#الشاعر_فرحان_السلامي

يا فلسطيـن يبقـى عهـدكُـم
و اليمن جنبكُم ما هو بعيـد

نحـرق الامـركـة و نمـدكُــم
بالسلام المصمم و الشـديـد

#ياسين_الفروي

با تجو او نجي لا عندكم
لو حدود اليمن منكم بعيد

وين ما رحتو احنا بعدكم
حربنا حرب لا يوم الوعيد

#محمد_ابوالعز

يا فـلسـ.ـطيـن لستم وحـدكم
قدمعاكم اولي الباس الشديد

شعب الايـمــان كله جـنــدكم
اضربوا كل شـ.ـيطان ٍ مـريـد

#الشاعر_ابوجهاد_صبر

سعدنا يا اهل غزه سعدكم
والغثا من غثا الشعب السعيد

قـبـلـكـم في الوغاء او بعدكم
كلنا دم يـجـري فـي وريد

#أحمد_محمد_الضمدي.

عندنا غزة وصنعاء عندكم..
والشهيد اللي بغزة من زبيد..

جُند الانصار ياهل غزة جُندكم..
والشهيد في بحرنا نفس الشهيد.

#أبوالكرار_المجنحي

يا فلسطين ماهم قدكم
القرود الخسيسه والعبيد

اضربوهم وسوو جهدكم
معكم الله والشعب السعيد

#شداد_حُميد

سدد المقتدر تسديدكم
وانحنى كل جبارا عنيد

ليت والله واحنا عندكم 
نفدي القدس انا وابني شديد

# علي_ محمد_ المحاقري

انـتـصـرتـوا وما احد قـدكـم
ياكتايب بأسها يرعـد رعـيـد

ذاق الاعــداء صـلابـة ردكـم
وانكسر سيف صهيون البليد

#ابوهادي_عقاب

يا اهل غزه وشدوا حيلكم
الوهن فاليهودي شي اكيد

شعب الايمان كله جنبكم
يعصد البحر وامريكا يبيد

#الشاعر_عبدالحكيم_ابوهاشم

جندنا يا فلسطين جندكم
لو وقع مننا مليون شهيد..!!

نقطع اليد ذي تمتدكم
حسب قول القياده والعميد..!!

#ابوبحر_علي_احمد_مطر

اصمدوا وابشروا يا شدكم
قد دمانا بتغلي فالوريد

علمنا ذي وصل لا عندكم
علم واضح ونسعى للمزيد

#الشاعر_عبدالقدوس_الصباحي

حريتكم طلبنا وامنكم
غير هذا القظيه مانريد

من هنا بايجيكم نصركم
لو بقي شعبنا كله شهيد

#محمد_الصايدي

بـ الـيـمـانـيـن ربـي مـدكـم
شعب راوي من القول السديد

والله انـا عـلـىٰ مـاودكـم
لـو تميـد الرواسـي مانـميـد

#جلال_الغولي

يافلسطين كنّا عندكم
حربكم حربنا والله شهيد

كله الكون لو قام ضدكم
اليمن جنبكم مابايحيد

#ابو_مجاهد_الغمري

لا قد اشّر نجي لا عندكم
سيدي صاحب القول السديد

تصبح حدودنا عن حدكم
مثلما بين صنعاء لا زبيد

#أبورماح_شداد

جاهدوا حلف الأعـــداء جهدكم
وإضربوا الغزو ضربه من حديد

سبحـــوا مـــن بجنده مـــــدّكم
واليمــن ترعـد امريكــــــا رعيد

#وديع_داعر

شعب الإيمان كله يفدكم
يشهد الله والـواقـع شهيد

كلنا ضد من هــــو ضدكم
عهد نفنى ولا عنكم نحيد

#امين_الراجحي

ابن حيدر وشعبه نصركم
يافلسطين بعد الصوم عيد

واليهودي يغادر ارضكم
قبل ما نعصد الدنيا عصيد

#صالح_حسين

ذي مع الله ماهمه بكم
لا، ولااهتز من حشد العبيد

يافلسطين لستم وحدكم
دام عبدالملك قايد وسيد

#ابـومـازن_الـرازحـي

حن سندكم وحنَّا زندكم
يافلسطين والله الشهيد

لو بِعدنا فلستم وحـدكم
قالها صاحب القول السديد

#ابو_نواف_العرجلي

سَيل الأنصار يتبع رعدكم
يكتسح كل شيطانٍ مريد

قوّة الكفر ماهي نِدّكم
دام معْكم قِوى الله المجيد

#ابوفتح_الجرادي

نلــعن ابـأكـــم ونـلعــن جـــــدكم
لعنت الباري على اصحاب الوعيد

يــايهـود انتـو وكامــل حشـــدكم
باتــــــذوقو مننـا البأس الشــديد

#الشاعر_ابوحرب_الموكر

السفن والبوراج حقكم
ساقها الله للانصار صيد

ان قربتو لعنا جدكم
وان حشدتو نقل هل من مزيد

#حرب_مشحم_صعده

خابت اظنون منهو ضدكم
والفرج لآح يا الشعب الفريد

من يبى الموت يقرب حدكم
ياجيوش الردى هل من مزيد

#عبدالله_حسين_مسعود

يا فلسطين حيا جهدكم
ذوّقوا الخصم في الدنيا صديد

من قوى الله قوة جندكم
واليمن جاء بوعده والوعيد

#أبوصياد_الغمري