2021 йил бюджетини тасдиқлаш масаласида депутат Кушербаев ва Молия вазирининг ўринбосари Аҳадбек Ҳайдаров ўртасида баҳс бўлган. Кушербаев кўтарган масала жуда асосли. Ўтган вақт давомида жойларда аксар ҳокимлар тепадан буйруқ деб, "снос" бўйича қонунларга тупуриб, компенсацияни қопламасдан қанчадан қанча кўчмас мулкларни бузиб ташлади.

Депутат айтганидек, ажратилган 150 миллиард сўм (Ўзбекистонда 170 атрофида туман, 30 дан ортиқ шаҳар мавжуд) ҳеч нарса бўлмайди. Мулки бузилган ва 2021 йилда компенсация оламан деб ўйлаганлар реал қарайдиган бўлсак, менимча яна бу муддат чўзилади. Ўйланмай қилинган сиёсат доим салбий натижасини берган. Ачинарлиси, ислоҳотларнинг биринчи-иккинчи йили қилинган хатолар 4-5 йилга бориб, биринчи муддатнинг ўзида "мевасини бермоқда". Ҳайдаров депутатнинг ногиронлар масаласидаги саволини очиқ қолдирди. Актам Ҳайитов чиройли усул билан модераторлик қилди, иқтисоддан яхшигина хабари борлигини кўрсатди.

Каналга уланинг:👉@Zafarbek_Solijonov

Дўстим Баҳодир Аҳмедов жуда тўғри масалани кўтарган. Бизда аксар депутатлар доимгидек ухлашда давом этяпти десам тўғри бўлса керак. Сукутларидан ўзлари ҳам зерикиб кетишмаганига ҳайронман. "Гапираётганлари", курашаётганлари саноқли. Аслида тепадаги ҳужжатнинг тескариси - "снос" масаласида жабрланувчи тараф бўлган жисмоний ва юридик шахсларни бождан озод қилиш лойиҳаси ташаббусини улар илгари суриши керак эди.

Хоразм ва яна бир-икки вилоятда тадбиркор танишларим бор, объекти бузилган - зарар бир неча миллиардга етади. Судга мурожаат қилай деса, бир неча миллион давлат божи тўлаши керак бўлади. Эринади. Кел дейди. Ҳаракат қилинг, ҳужжатларингиз жойида, судда бемалол ютасиз десам, "шунча пул тўлашни айтинг ва яна камига суддаку ютарман, МИБ ҳокимлик балансига арест солиши ва пулимни қайтариб беришларини тасаввур қилолмайман. Бир зумда ўша ижрочининг тақдирини Тошкентдан ҳал қилишса керак, ҳокимларнинг орқасида турганлар", дейди.

Айнан Тошкент ҳокимлиги бу ташаббус билан чиқишининг ҳам бир нечта сабаблари бўлса керак. Мендаги маълумотларга кўра, аввалги ҳокимлар (биттаси ҳозир Юнусобод туманида ҳоким - Раҳмонбек Усмонов) даврида жуда кўп жойлар ноқонуний тарзда юридик ва жисмоний шахсларга бериб юборилган. Уларни жой-жойига келтириш учун эса албатта суд ҳужжати керак бўлади. Бугун бепул қилинди дейлик, эртага Ортиқхўжаевнинг командаси ўрнига бошқа команда келса, исталган вақтда бу " бепул имкондан" фойдаланмаслигига ким кафолат беради? Асосий масала шу ерда.

Каналга уланинг:👉@Zafarbek_Solijonov

Жорий йилнинг май ойида (айни қизиган пандемия даврида) Қишлоқ хўжалиги вазирлиги ҳузуридаги Узумчилик ва виночиликни ривожлантириш агентлиги 398 миллион сўмга TRAILBLAZER сотиб олган экан. Агентлик ундан кўра, узум плантацияларида томчилатиб суғориш технологиясини кенгроқ жорий қилса, жамиятга иқтисодий жиҳатдан анча фойдаси тегарди. Айнан узумчилик бўйича президентнинг бир нечта алоҳида топшириқлари ҳам бисёр.

2020 йилнинг февралида эса Олий ва ўрта-махсус 311 миллион сўмдан 2 та MALIBU сотиб олганмиш. 2017 йилнинг августь ойида Олий ва ўрта-махсус таълим вазири Ином Мажидов "Ўзбекистонда абитуриентлар сони ўсганига қарамай, ОТМга қабул квоталари ўзгармаган" деганди. Ўтган вақтда ҳам бу эҳтиёж деярли ўзгармади. Ўшанда ҳам бир жойга ўнталаб абитуриент даъвогар эди, ҳозир ҳам аҳвол шу. Бунақа қиммат машиналар минаверсангиз ҳеч нарса ўзгармайди.

Ўзи бирор соҳада марказий ташкилотни тузишдан мақсад ўша соҳани ҳар томонлама (айниқса иқтисодий) қўллаб-қувватлаш ҳисобланади. Бизда эса айрим вазирликларнинг моддий-техник тарафларини кўрсанг аъло, соҳа вакиллари қуйи вакилларига қарасак расвода. Яна "нега ривожланмаяпмизикин" деб ўйланиб юреришади. Сизлар ортиқча юксиз, шунга.

Каналга уланинг:👉@Zafarbek_Solijonov

Бугун Халқаро пресс-клубда нима бўлди? (1-қисм)

Бугун Халқаро пресс-клубнинг навбатдаги сонида “Ўзбекистон Республикасининг Конституцияси ва қонунчилигида сўз ҳамда матбуот эркинлиги ва Ўзбекистонда ОАВни ривожлантириш жараёнлари” мавзусида суҳбатлашилди. Учрашувга ҳуқуқшунос-блогер сифатида таклиф қилиндим. Учрашувнинг асосий вақти қилиниши керак бўлган ишлар эмас, қилинган ишлар ҳисоботини тинглаш билан ўтди. Охирроғида ҳамкасбим ва УзА директори ўринбосари Хушнуд Худойбердиев сўз олиб, журналист-блогерларда бир нечта саволлар борлиги ва муҳокамага озроқ вақт қолаётганига нутқи давомида алоҳида урғу бериб кетди.

Кейинроқ залдаги журналист ва блогерларга сўз навбати келгач, эфирни узиб қўйишганидан хабар топдик. Бу ўзаро муҳокама қилина бошлади. Залда чет эл ваколатхоналари вакиллари ҳам бор эди. Улар кузатиб туришганди. Халқаро пресс-клуб раҳбари Шерзод Қудратхўжаев журналист, блогерлардан ҳиссиётга берилмаслигини сўради, эфир учун 2 соат вақт ажратилгани ва бошқа кўрсатувларга ҳам ҳалал бермаслик лозимлигини айтди. Бироқ кўрсатув YOUTUBE'дан ҳам не сабабдан узиб қўйилганига ҳозирча изоҳ бермади. Ҳамкасбимга ҳам осон тутмаган ҳолда давом этаман.

Кейин журналист ва блогерлар саволларини бера бошлади. Мен ҳам ҳозирги ҳокимият аввалги зулм даврининг ҳосиласини қабул қилиб олгани, ислоҳотлар ижросини осон бўлмаётганини айтиб, журналистларга босим ўтказганлик учун жиноий жавобгарлик масаласи киритилаётган қонун лойиҳасини тайёрлаш кечикаётгани ва хусусий ОАВларга нега давлат тарафидан иқтисодий қўллов (солиқ имтиёзи ва бошқалар) бўлмаётгани юзасидан саволлар ташладим. Саволимга АОКА раҳбари Ходжаев ва Сенат раисининг биринчи ўринбосари Содиқ Сафоев жавоб беришга ҳаракат қилди. Аммо мен умумий - яъни ҳаммаси назоратда тарзидаги жавоблар билан кифояландим холос.

Давоми бор...

Каналга уланинг:👉@Zafarbek_Solijonov

Бугун Халқаро пресс-клубда нима бўлди? (2-қисм)

Мажлисда Инсон ҳуқуқлари бўйича миллий марказ раҳбари Акмал Саидов ҳам қатнашди. Унга вақт берилганда бир гапи пичоққа илинди. Яъни Саидов давлат ОАВлари хусусий ОАВларда ортда қолаётганини алоҳида таъкидлади. Қолган вақтини у ҳам сўз эркинлигини таъминлаш бўйича қилинган ишлар ҳисоботини санаш билан ўтказди.

ЎзА журналисти Анора Содиқова халқаро амалиётдан хабардор Саидовга "хориж тажрибасида ҳам биздагидек ОАВни назорат қилувчи АОКАдек ташкилотлар бор-йўқлиги"ни сўради. Акмал Саидов умумий гаплар билан олиб қочишга ҳаракат қилди. Регулятор вазифасини ўтайдиган ташкилотлар учрашини айтди. Анора босиқлик билан саволга аниқлик киритиб қайси давлатларда АОКАдек ташкилотлар бор-йўқлигини айтишини қайта сўради.

Бироқ Саидов овозини баландлатиб, норози оҳангда "менга четда бунақа ташкилот йўқ деманг" деб жавоб қайтарди. Бу билан Саидов чет эл дипломатлари олдида доим ўзи байроқ қиладиган ва кўп ҳолларда амал қилмайдиган журналист билан муомала маданиятидан бироз четга чиққандек туюлди менга. Журналистни ёқтирмаслик унинг иши, аммо жамоатчилик олдида ўзини бундай тутиши камида кулгули туюлди. Акмал ака анча "меҳнат қилди", Жаслиқ мавжуд вақтларида ҳам озми-кўпми "катта"ларига хизмат қилди, энди у Шоҳимардон каби дам олиш жойларига бориб қирғиз хотинларнинг қурутидан баҳраманд бўлгани, тоза ҳавода қарилик гаштини сургани ва бирор ким ўқиса, тажрибалари акс этган китобларни ёзиб қолдиргани дуруст, фикримча.

Давоми бор...

Каналга уланинг:👉@Zafarbek_Solijonov

Бугун Халқаро пресс-клубда нима бўлди? (3-қисм)

Мажлисда яна "Адабиёт" газетаси бош муҳаррири Бахтиёр Карим шу йилнинг июль ойида газетанинг сохта нусхалари чоп этилгани ва бу ҳолат етарлича ўрганилмагани масаласини кўтарди. Унга кўра, икки нафар (номлари ёдимда қолмади) шахс, унинг номидан сохта газета сонини чиқаришган.

Яна газета ходимлари АОКА биносига олиб борилиб қўрқитилган, улардан газета билан ҳамкорлик қилмаслиги ҳақида тушунтириш хатлари олинган. Бу ҳолатни Сенат раиси биринчи ўринбосари Содиқ Сафоев диққат билан тинглади ва Бахтиёр Карим эса Сафоевдан ҳолатга алоҳида эътибор қаратишини сўради. Шу ўринда ҳамкасбимнинг бу ҳолатига аввал унчалик жиддий қарамаганим учун узр сўрайман ва бу ишни шахсан президент Мирзиёев назоратига олишини истаб қоламан.

Тамом

P.S. Конференция сўнггида масъуллар кўрсатув форматини кейинги гал қизиқроқ қилишга ваъда берди

Каналга уланинг:👉@Zafarbek_Solijonov

Адлия вазири Русланбек Давлетовнинг айтишича, яшаш ҳуқуқидан бошқа ҳуқуқларда айрим чегаралар бўлиши керак. Лекин бу чегара демократик жамиятда керак бўладиган таомилда оқилона бўлиши лозим.

Ўзи умуман бугунги Ўзбекистон шароитида чекловлар ҳақида камроқ гапиришимиз керак. Чеклашга жуда устамиз. Шу пайтгача буни яхши уддалаб келганмиз.

Оммавий ахборот воситалари ва қонунчилик ўртасидаги қандайдир муаммоли масала туғилса, судга борилиши керак. Афсуски, бизда судга берибди дейилса, жуда катта воқеликка айланиб кетаяпти. Аслида биз бунга кўникишимиз керак, бу нормал жараён.

Каналга уланинг:👉@Zafarbek_Solijonov

Журналист акам Баҳодир Элибоев анчайин тўпланиб қолган халқ дардларини кўтарибди. Ростан ҳам давлат институти ўз аҳолисининг муаммоларини ечиш, оғирини енгил қилиш билан шуғулланиши керак. Фуқароларимизнинг ҳуқуқий онгги кундан кунга шаклланяпти. Адолатли жамиятни истаяпти.

Бу ҳаёт эса фақат ва фақат яхши яшашга муносиб. Муаммоларни хоҳласак давлатнинг кўмагисиз ўзимиз ҳам пайдо қилиб олаверамиз. Лекин давлат аҳолисига муаммо туғдирмаслиги керак. Инсонларнинг ҳаётини яхшилаш, бу йўлда тинмай ҳаракат қилиши унинг бирламчи функцияси бўлиши даркор.

Каналга уланинг:👉@Zafarbek_Solijonov

⚡️«UzAuto Motors» ва Монополияга қарши курашиш қўмитаси - суд куни аниқ бўлди

Kun.uz'га кўра, жорий йилнинг 11 декабрь куни Тошкент шаҳар маъмурий суди «UzAuto Motors» ишини қайта кўриб чиқади. «UzAuto Motors»нинг Монополияга қарши курашиш қўмитаси махсус комиссияси қарорини ҳақиқий эмас, деб топиш тўғрисидаги шикоят аризаси бўйича шу йилнинг 30 октябрь куни суднинг ҳал қилув қарори қабул қилинганди.

Қўмита вакиллари суднинг қароридан норози бўлиб, юқори инстанцияга мурожаат этишини билдирганди. Монополияга қарши курашиш қўмитаси апелляция шикоятини келтириб, «UzAuto Motors» аризасини қаноатлантиришни рад этиши ва янги ҳал қилув қарори қабул қилишини сўраган.

Каналга уланинг:👉@Zafarbek_Solijonov

❗️Ўтказилган таҳлилга кўра, ҳокимларнинг бошқа давлат органлари функцияларини такрорловчи 70 та функцияси аниқланди. Буларни бекор қилиш таклифи юқори турувчи ташкилотларга тақдим этилди", — Аъзам Мадаминов, Адлия вазирлиги ҳузуридаги Ҳуқуқий сиёсат тадқиқот институти директори.

АОКА матбуот анжумани

Каналга уланинг:👉@Zafarbek_Solijonov

Айтганча, журналист-блогер Мадина Баҳодировнадан амалдорларга эслатма:

" -Сўнгги 3 йилда- деган гап бугун расман эскирди. Президентлик сайловларига 4 йил бўлди".

Энди сизлардан илтимос, сўнгги 4 йилда деб бошланглар гапларингизни.

Каналга уланинг:👉@Zafarbek_Solijonov

Сирдарё вилоятининг Гулистон шаҳридаги бозор ёни тунда кавлаб ташланяпти экан. Сабабини сўрашса аниқ жавоб йўқмиш. Вилоят масъулларидан изоҳ кутиб қоламиз.

Каналга уланинг:👉@Zafarbek_Solijonov

Ўзбек халқи жуда зукко халқ. Миллатимни жуда яхши кўраман. Бечора ҳар қанақасига бўлса ҳам фикрларини етказади. Каналини ёпинг, аноним бўлади, топиб жазоланг, барибир бошқа платформаларда гапираверади. Бу шундай миллат. Ҳақни севадиган ва курашувчан миллат. Ўткан кунлар асарини эсланг. Хонни ҳажвга олиб қандай ҳақиқатни гапиради халқи. Уни фақат севиш ва ҳақиқатни гапирадиганларини эшитиш, ардоқлаш керак. Ҳақиқатни ичкаридан эшитиш ёқимли бўлиши зарур.

Каналга уланинг:👉@Zafarbek_Solijonov

Нега доим курашишимиз керак?

Ижозатингиз билан бугун содда тилда гапираман. Майли узоқ ўтмишга бормайман. Совет босқинидан аввал хорижга ватандошларимизни юбордик. Дунё кўрсин ва келиб, бизни ривожлантиради дедик. Ўзгариб қайтишди. Юксалиб қайтишди. Тобланиб қайтишди. Бизчи? Уларга душман назари ила қарай бошладик. Қўлимизга китоб олайлик, курашайлик деганларни менсимадик. Сотдик, ўлдирдик, ўлдиришларини томоша қилдик. Улар бир-биримизга қарши чиқишимизни мароқ билан кузатишарди. Орада қирғинлар қилиб, минглаб зиёлиларимиздан айиришди. Сибир ўрмонларида совуқда музлаб ўлганлари қанча бўлди экан?! Ғоялари, авлодлари қолди, шукр. Бироқ ўшандан бери ўзимизга ўзимиз қарши курашиб келяпмиз. Ҳозирги кундаги энг катта душманимиз - ЎЗИМИЗ.

Нима бўлган тақдирда ҳам мунтазам курашишни ёқлайман. Агар ҳақ бўлсангиз, сиз ҳар қандай майдонда ютаверасиз. Тўғри баъзан мағлуб бўлишингиз ҳам мумкин. Лекин курашишга нима етсин. Э қўйинге, бўлмайди барибир, адолат йўқ деб умидсизликка берилиш билан ўзингизни ўзингиз тугатасиз. Тугашингиз, курашмаслигингиздан эса адолатни суймайдиганлар ва унга рози бўлмайдиганлар манфаатдор. Ёдингизда бўлса, каналимизда Навоий шаҳрида “Zarafshon Golden Group” МЧЖ борлиги, у Навоий шаҳар давлат солиқ инспекциясини судда ютгани ва МЧЖнинг банк ҳисоб рақамига қўйилган 6 млрд сўмлик инкассо қайтариб олиниши таъминлангани ҳақида пост қўйгандик.

Аниқланишича, курашга тўймаган Навоий шаҳар давлат солиқ инспекцияси юқори судга аппеляция шикояти киритган экан. Навоий шаҳар маъмурий судининг 2020 йил 24 сентябрдаги ҳал қилув қарори Навоий вилоят маъмурий суди апелляция судлов ҳайъатининг қарори билан ўзгаришсиз қолдирилибди. Навоий шаҳар давлат солиқ инспекциясининг апелляция шикояти қаноатлантирилмабди. Тадбиркор курашда унга беғараз ёрдамини берган Бизнес-омбудсман, Адлия бошқармаси ва тегишли Суд органларига алоҳида ташаккурини айтган. Яшасин охиригача курашган тадбиркор, яшасин Бизнес-омбудсман, яшасин Адлия бошқармаси, яшасин тегишли Суд органлари!

Каналга уланинг:👉@Zafarbek_Solijonov

Инсайдерларга кўра, Тошкент шаҳар ҳокими Жаҳонгир Ортиқхўжаевнинг ўринбосари, ҳокимликнинг Маҳалла ва оилани қўллаб-қувватлаш бошқармаси бошлиғи Зуфаров Дада-Али Нигматович ўз аризасига кўра лавозимидан озод этилибди. Ҳозирча расмий маълумот йўқ.

Каналга уланинг:👉@Zafarbek_Solijonov

4 декабрь куни Президент Шавкат Мирзиёев саноат каннабиси (наша) етиштириш ва қайта ишлаш учун лицензия олишда давлат божи ставкаларини тасдиқловчи қонунни имзолабди. Лицензия Қишлоқ хўжалиги вазирлиги томонидан берилади. Бож миқдори:

🔹етиштириш учун — БҲМнинг 3000 баравари (669 миллион сўм);
🔹импорт, қайта ишлаш, сақлаш, сотиш, сотиб олиш, ташиш учун 200 баравари (44,6 миллион сўм) миқдорида белгиланган.

Шу билан бирга, нашанинг рухсат берилган навлари, уларни етиштириш ва айланиши учун шартлар, лицензиялаш тартиби Вазирлар Маҳкамаси томонидан тасдиқланиши керакмиш.

Каналга уланинг:👉@Zafarbek_Solijonov

Чилим чекаётган боғча опалар

Мазкур видео Қашқадарё вилоятининг Миришкор туманидаги 8-сонли мактабгача таълим ташкилотида олингани айтилмоқда.

Daryo.uz ўқувчисининг маълумот беришича, видео 2020-йил декабр ойи бошида тасвирга олинган. Видеодаги чилим чекаётган аёллар боғча тарбиячилари, ошпазлари дейилмоқда.

Каналга уланинг:👉@Zafarbek_Solijonov

Ички ишлар вазири Пўлат Бобожоновга: бу йил конституция байрамини нишонламанглар, илтимос

Маълумотларга кўра, кеча (6 декабрь) куни соат 10:00 да Самарқанд вилоят ИИБ ЖТСБ мажлислар залида вилоят ИИБ бошлиғининг ўринбосари полковник Ашрапов ва вилоят прокуратурасининг масъул ходимлари иштирокида йиғилиш ўтказиш режалаштирилган. Вилоят матбуот хизматига кўра, уларга хизмат текшируви тайинланганмиш. ИИВ ташаббуси билан хизмат текшируви ўтказилаётгани яхши, аммо бу иш биринчиси эмас. Бундай ҳолатлар ИИВ тизимида охирги вақтлар кўпаймоқда. Айрим ҳолларда марказий аппаратнинг ўзида ҳам бу каби вазиятлар учраб турибди экан.

Инсайдерларга кўра, 30 ноябрь (ўтган якшанба) куни Ички ишлар вазирлигининг Ҳуқуқбузарликларни олдини олиш бош бошқармаси ўз ходимлари учун мажлис ўтказган. Эрка-аёл ходимлар сўкина-сўкина йиғилишда қатнашган. Улар ўз-ўзидан йиғилган деб ўйлайсизми? Асло ундай эмас. Мендаги маълумотларга қарасак, улар вазир ўринбосари Азизбек Икрамов кўрсатмаси асосида йиғилишганмиш. Хўш, бу ҳолатда вазир ўринбосари Икрамовга нисбатан ҳам хизмат текшируви ўтказиладими? Қонун ҳаммага тенгми ёки истисно ҳолатлар мавжудми? Вазир Бобожонов бу қонун бузилишига қандай муносабат билдиради?

Ундан кўра келинглар, эртага Конституция байрамини ҳам ўтказмаймиз. Шундай йиғилишиларни давом эттираверамиз. Ахир унинг 38 моддасида ёзилган дам олиш ҳуқуқларини бузяпмизку. Ҳам унинг моддаларини бузиб, ҳам байрам қилиб нишонлашимиз жуда кулгули, сизга айтсам. Меҳнат кодексида белгиланган иш вақти режимигаку амал қилмасдик. Кечалари ишда қолиб, ҳам энергия ресурсларини исроф қилаётганимиз, ҳам ходимларимизни қийнаётганимиз, бунинг натижасида уларнинг оилавий ҳаётида муаммолар пайдо бўлаётганига эса кўз юмиб келяпмиз. Буюк келажак қандай қурилади, билмайман. Бироқ у қонунларга риоя қилиш руҳида қурилишини яхши биламан.

Каналга уланинг:👉@Zafarbek_Solijonov