#قصص_الأنبياء(٢)
#السيرة_النبوية
#الحلقة_الرابعة_والسبعون
#الهزيمة_في_أحد

كنا واقفين المرة إللي فاتت عند نصر المسلمين في غزوة أحد، وقلنا إن المشركين هربوا من أرض المعركة وبدأ المسلمون بجمع الغنائم،
هرب المشركون ما عدا كتيبة خالد بن الوليد إللي كانت بتحاول تلف من حول جبل الرماة عشان تهجم على المسلمين فجأة، وكانوا كل ما يتقدموا يردهم سهام المسلمين من على جبل الرماة،
انتظر خالد بن الوليد بالكتيبة بتاعته بعيد يراقب المعركة عشان ينتهز أي فرصة تخليه يتقدم ويهجم على المسلمين،
الرماة على الجبل شافوا إن المعركة خلاص خلصت لدرجة إن المسلمين بيلموا الغنائم،
فقاموا إلا قليلا منهم عشان ينزلوا من على الجبل يلموا الغنائم عشان يضمنوا نصيبهم،
ماهم قاعدين فوق الجبل من الصبح يدافعوا عن المسلمين،
فعايزين يأخذوا نصيبهم في جمع الغنائم🤷‍♀️
فعبد الله بن جبير قائدهم قال لهم:
إنتم رايحين فين😳
فقالوا : خلاص المعركة خلصت والناس بتلم الغنائم ،هنقعد هنا نعمل إيه هنروح نلم الغنائم احنا كمان😕
فقال لهم عبد الله بن جبير:
بس رسول الله ﷺ كلامه كان واضح، قال منتحركش من مكاننا مهما حصل لحد ما هو يرسل حد يقول لنا سواء انتصر المسلمون أو انهزموا😟
معظمهم مسمعوش كلام عبد الله بن جبير على أساس إنهم شايفين إن خلاص المعركة انتهت هنستنى إيه تاني،
وممكن رسول الله ﷺ يكون انشغل أصلا بحاجات تانية فعشان كده لم يرسل إلينا، فخلاص بقى مهمتنا انتهت🤷‍♂️
عبد الله بن جبير صمّم على موقفه وقام وخطب فيهم وقال لهم :
هتعملوا إيه في كلام رسول الله ﷺ، لازم تطيعوا أوامر رسول الله ﷺ، مينفعش تخالفوا أمره😥
فقاموا وتركوه ونزلوا من على الجبل، وقعد مع عبد الله بن جبير عدد قليل جدا يُقال إنهم عشرة أو أقل من العشرة،
كان مراقب الأحداث دي من بعيد خالد بن الوليد وكان قائد عسكري عظيم، لدرجة إنه لم يخسر معركة واحدة في حياته أبدا😮
فأول ما شاف الرماة نزلوا من على الجبل انطلق بسرعة ناحية الجبل وكان معاه عكرمة بن أبي جهل،
وصلوا للجبل، الرماة الباقيين رموهم بالسهام إللي معاهم وأصابوا بعضهم لكن جيش خالد قدر إنه يوصل للرماة وقتلوهم، عبد الله بن جبير رماهم بالسهام إللي معاه لحد ما خلصت،
وقاتل بالرمح بتاعه لحد مانكسر، وكسر جفن السيف، يعني الجراب إللي بيتحط فيه السيف وقعد يقاتل به لحد ما قُتل رضي الله عنه، وكان الذي قتله عكرمةُ بن أبي جهل،
وكأن عبد الله بن جبير بيحاول إنه ينفذ وصية وأمر رسول الله ﷺ إنه لا يُؤْتَى المسلمون من قِبَلِك،
يعني إوعى إنت تكون الباب إللي يدخل منه المشركون ويهزموا المسلمين👌
مات عبد الله بن جبير في سبيل الدفاع عن أمر رسول الله ﷺ للنهاية،
ومع إنه كان لوحده مع عدد قليل إلا إنه صمم على موقفه، مقلش : يعني أنا لوحدي إللي صح وهم كلهم غلط، مش يمكن معاهم حق🤔
هو ثبت على على موقفه لحد آخر لحظة في حياته، فنتعلم من عبد الله بن جبير إن أصحاب الحق ناس قليلة،
وإن مهما الناس مشيوا في طريق الخطأ فاحنا لازم نثبت على موقفنا مهما كنا قليلين ولوحدنا مادام معانا نص كلام رسول الله ﷺ 👌

☆ احنا شايفين إن الرماة أخطأوا وكانوا سبب في قتل صاحبهم عبد الله بن جبير ومتضايقين من إللي عملوه ،صح؟
تخيلوا إن احنا بنعمل نفس الخطأ إللي الرماة عملوه وزعلانين منهم واحنا مش واخدين بالنا😔
الرماة اجتهدوا وأفتوا نفسهم بفتوى غلط ومشيوا وراء الدنيا، مع إن في نص واااضح من رسول الله ﷺ :
محدش يسيب مكانه مهما حصل 👌
بسبب اتباعهم لرغباتهم الدنيوية وهي إنهم يجمعوا الغنائم قُتل أصحابهم،
ودلوقتي في واقعنا ناس كتيييير جدا بتفتي نفسها مع إن قصادها النص الواضح من رسول الله ﷺ،
وتتبع هواها ورغباتها في الدنيا سواء مال حرام من ربا، أو تتنمص عشان شكلها يبقى حلو،
أو تسمع الأغاني بحجة إنها غذاء الروح، أو تلبس المجسم والمقطع والقصير والحجاب إللي مش حجاب عشان شكلها يبقى حلو وخايفة من كلام الناس،
مع إن كل الحاجات دي وغيرها كتييير فيها نص من رسول الله ﷺ😓
تعتقدوا إن الرماة لو كانوا يعرفوا إن بسبب اجتهادهم الخاطئ ده وتركهم أمر رسول الله ﷺ أصحابهم هيموتوا كان هيسيبوا مكانهم؟
طبعا لأ👌
طيب هم مكنوش يعرفوا إن عاقبة عصيانهم لأمر رسول الله ﷺ الواضح الصريح هتكون كارثية،
لكن احنا عرفنا وشفنا، فهل هنتعظ ونعتبر ونتعلم من خطأهم ولا هنستمر في عصيان أوامر رسول الله ﷺ الصريحة الواضحة وتحصل لنا الكوارث المستمرة إللي احنا بنستغرب منها وبنقول ليه يارب كده،
واحنا أصلا السبب فيها :
"وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ"
"أَوَلَمَّا أَصَابَتْكُمْ مُصِيبَةٌ قَدْ أَصَبْتُمْ مِثْلَيْهَا قُلْتُمْ أَنَّى هَذَا قُلْ هُوَ مِنْ عِنْدِ أَنْفُسِكُمْ "

بعد ما سقط عبد الله بن جبير ميتا، مثّل المشركون بجثته، يعني قعدوا يقطعوا في جسمه، ويضربوه بالرماح والسيوف،
لدرجة إن أحشاء بطنه خرجت😥
وياريت المأساة وقفت لحد هنا😔

بعد ما ك

#قصص_الأنبياء(٢)
#السيرة_النبوية
#الحلقة_الخامسة_والسبعون
#حماية_المسلمين_لرسول_الله_في_أحد

اتكلمنا المرة إللي فاتت عن هزيمة المسلمين وتعرض رسول الله ﷺ للأذى الشديد وحتى قيل إنه مات وكان السبب في الهزيمة هو عصيان الرماة لأمر رسول الله ﷺ،
أكيد في ناس بتسأل :
هو ليه رسول الله ﷺ والمسلمين إللي معاه يتحملوا نتيجة خطأ مجموعة منهم، يعني هل من العدل إن السبعمائة إلا قليل يتحملوا نتيجة خطأ أربعين شخص😓
يعني كان ربنا ينصر رسول الله ﷺ والمسلمين وبعدين يبقى يعاقب الرماة على عصيانهم 🤷‍♀️

يجاوبنا على السؤال ده حديث رسول الله ﷺ :
"مثل المؤمنين في توَادّهم وتراحُمهم وتعاطفهم مثل الجسد إذا اشتكى منه عُضو تداعى له سائر الجسد بالسهر والحمى"

المسلمين كلهم زي الجسم، هو لو الإنسان ضرسه وجعه ولا إيده وجعته بيقدر ينام؟
طبعا مبيقدرش، هل العين تقول طب أنا ذنبي إيه إني لا أنام عشان في ألم في الضرس ولا في اليد، ولا بتسهر وبتتألم هي كمان؟
في الإسلام مفيش حاجة اسمها أهم حاجة نفسي وبس، في الإسلام الفرد ممكن يضحي بمصلحته الشخصية عشان مصلحة الجميع،
فلما واحد من المسلمين يعمل خطأ يتحمل نتيجته كووول المسلمين👌
وهنا ييجي ضرورة الأمر بالمعروف والنهي عن المنكر👌
تعالوا كده نشوف حديث السفينة، رسول الله ﷺ يقول :
"مَثَلُ القَائِمِ في حُدودِ اللَّه، والْوَاقِعِ فِيهَا كَمَثَلِ قَومٍ اسْتَهَمُوا عَلَى سفينةٍ،
فصارَ بعضُهم أعلاهَا، وبعضُهم أسفلَها، وكانَ الذينَ في أَسْفَلِهَا إِذَا اسْتَقَوْا مِنَ الماءِ مَرُّوا عَلَى مَنْ فَوْقَهُمْ،
فَقَالُوا: لَوْ أَنَّا خَرَقْنَا في نَصيبِنا خَرْقًا وَلَمْ نُؤْذِ مَنْ فَوْقَنَا.
فَإِنْ تَرَكُوهُمْ وَمَا أَرادُوا هَلكُوا جَمِيعًا، وإِنْ أَخَذُوا عَلَى أَيْدِيهِم نَجَوْا ونَجَوْا جَمِيعًا "
يعني مَثل الشخص إللي بيراعي حدود ربنا وبينفذ أوامره ويتجنب نواهيه والشخص إللي واقع في المنكرات والخطأ زي ناس ركبوا سفينة🛳 فعملوا قرعة عشان يشوفوا مين هيقعد على ظهر السفينة ومين هيقعد أسفل السفينة،
فناس قعدوا على ظهر السفينة وناس قعدت أسفل السفينة،
وكان الناس إللي أسفل السفينة كل ما يكونوا عايزين مية لازم يعدوا على الناس إللي على ظهر السفينة ،
فقالوا:
احنا نعمل خرق في السفينة نخرمها يعني وناخد المية إللي احنا عايزينها وبكده مش هنؤذي الناس إللي فوقنا🤔
فلو هم تركوهم يعملوا خرق في السفينة كل الناس إللي في السفينة فوق وتحت هيهلكوا جميعا😶
ولو منعوهم من خرق السفينة كل الناس في السفينة هتنجو،
فاللي بيعمل معصية وخطأ وبيجاهر بها وسط الناس والناس مأنكرتش عليه وسابته يعمل إللي هو عايزه بحجة كل واحد حر واحنا ملناش دعوة🤷‍♀️
العقاب هينزل على الجميع، وكل المسلمين إللي حوالين الشخص ده هيتحملوا نتيجة خطأه،
لأن المعصية طول ماهي في السر لن تضر إلا صاحبها، لكن أول ما الناس تجهر بها هتضر كل المجتمع،
شوفوا ربنا بيقول إيه:
" وَاتَّقُوا فِتْنَةً لا تُصِيبَنَّ الَّذِينَ ظَلَمُوا مِنْكُمْ خَاصَّةً "
وراجعوا قصة أصحاب السبت إللي قلناها في قصص الأنبياء👌
وربنا قال للمسلمين إنه أعطاهم النصر إللي وعدهم به في البداية، لكن أول ما حصل النزاع بين الرماة وقائدهم عبد الله بن جبير وعصوا أمر رسول الله ﷺ ونظروا إلى الدنيا حصلت الهزيمة👌
"وَلَقَدْ صَدَقَكُمُ اللَّهُ وَعْدَهُ إِذْ تَحُسُّونَهُم بِإِذْنِهِ ۖ حَتَّىٰ إِذَا فَشِلْتُمْ وَتَنَازَعْتُمْ فِي الْأَمْرِ وَعَصَيْتُم مِّن بَعْدِ مَا أَرَاكُم مَّا تُحِبُّونَ ۚ مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ ۚ "

"وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ "

فربنا بيقول لنا بطريقة عملية : مفيش مُحابَاة لأحد، حتى رسول الله ﷺ إللي هو أحب الخلق إلى الله،
في سنن كونية هتمشي على الكل، أطعتم الله ورسوله وتركتم النزاع والفرقة هيبقى في نصر،
هتعصوا أوامر ربنا ورسوله وهتتخانقوا على الدنيا وكله عايز ياخد حتة من التورتة هتشوفوا هزيمة وخذلان مكنتوش تتخيلوها👌
"ذَٰلِكَ بِأَنَّ اللَّهَ لَمْ يَكُ مُغَيِّرًا نِّعْمَةً أَنْعَمَهَا عَلَىٰ قَوْمٍ حَتَّىٰ يُغَيِّرُوا مَا بِأَنفُسِهِمْ"
يعني بالبلدي كده طول ما الناس ماشية عالصراط المستقيم ربنا هيحفظ لهم النعم إللي عندهم،
أول ما يغيروا حالهم من الطاعة إلى المعصية ربنا هيسلب منهم نعمه، ومن النعم دي النصر على الأعداء،

☆ممكن حد يسأل طب والناس إللي في النص دي ذنبها إيه،
يعني الناس إللي ماتت بسبب《 خطأ الرماة》 ذنبهم إيه😓

يجاوبنا على السؤال ده ربنا عز وجل😊
"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ "
مش إنتم كنت بتقولوا احنا نفسنا في الشهادة احنا نفسنا نموت في سبيل الله ، أهه الشهادة جت لكم أهه،
ومع ربنا مفيش خسارة يا جماعة😁
"وَلَقَدْ كُنتُمْ تَمَنَّوْنَ ال

#قصص_الأنبياء(٢)
#السيرة_النبوية
#الحلقة_السادسة_والسبعون
#هل_فعلا_انتصر_المشركون_في_غزوة_أحد

وقفنا المرة إللي فاتت عند أبو سفيان لما أخذ جيش المشركين بعد انتصارهم في غزوة أحد على المسلمين واتجهوا راجعين لمكة،
السؤال هنا، هل فعلا جيش المشركين انتصر على جيش المسلمين في معركة أحد🤔
تعالوا كده نشوف:
◇قريش لم تأخذ أسيرا واحدا من المسلمين في غزوة أحد،
في حين إن المسلمين أسروا في غزوة بدر من قريش سبعين أسير💁‍♀️
◇قريش لم تأخذ غنائم من المسلمين، في حين إن المسلمين أخذوا غنائم كثيرة من المشركين في غزوة بدر👌

◇قريش لم تدخل المدينة المنورة مع إنها كانت قريبة جدا منها ومكنش في المدينة جيش يحميها، وكمان لم تسيطر على مكان المعركة، ده حتى مقعدوش في مكان المعركة عشان يعلنوا للناس إنهم انتصروا😏
فاكرين لما في بدر قالوا إننا هنقعد في بدر لحد ما كل العرب يسمعوا بنا، أهه المفروض كانوا عملوا كده في المعركة دي على أساس انهم انتصروا🤷‍♀️
لكن دول ما صدقوا، أول ما المعركة خلصت وقتلوا بعض المسلمين راحوا ماشيين على طول🙄
في حين إن رسول الله ﷺ زي ما شفنا أكثر من مرة إنه لما كان بيخرج في غزوة كان بيقعد في مكانها بعد نهايتها ثلاثة أيام على الأقل عشان الخبر يوصل للناس ويعرفوا قوة المسلمين👌
◇المشركين لم يقتلوا قائد الجيش إللي هو رسول الله ﷺ ولا الوزيرين بتوعه، يعني دولة الإسلام زي ما هي🤓

فين بقى هزيمة المسلمين وانتصار المشركين عليهم🤔

غزوة أحد مكنتش هزيمة، لكن كانت زي ما سماها القرآن : قَرْح، يعني جراح شديدة، مقتل أكثر من سبعين رجل من المسلمين👌
"إِن يَمْسَسْكُمْ قَرْحٌ"

☆طيب هو مش مقتل المسلمين في سبيل الله ده حاجة كويسة، ليه بقى ربنا قال إنها جراح، وفي آية تانية سماها مصيبة 🤔
"أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا ۖ قُلْ هُوَ مِنْ عِندِ أَنفُسِكُمْ ۗ إِنَّ اللَّهَ عَلَىٰ كُلِّ شَيْءٍ قَدِيرٌ"
مقتل المسلمين في سبيل الله حاجة جميلة جدا وهي اصطفاء من الله عز وجل ونعمة زي ما قال:
"وَيَتَّخِذَ مِنكُمْ شُهَدَاءَ"
لكن المصيبة إنهم قُتلوا بسبب خطأ بعض المسلمين، إللي كان سببه حب الدنيا إللي دخل في قلوب بعضهم وهم الرماة وأدّى إنهم يخالفوا أمر رسول الله ﷺ،
لكن لو كانوا قُتلوا وهم بيعملوا إللي عليهم وبيحاربوا زي ما كانوا بيحاربوا في بدر وأخذوا بكل أسباب النصر ومع ذلك ماتوا شهداء فهنا مفيش مشكلة،
فالقرآن كان بيتكلم عن عن مصيبة حب الدنيا إللي دخلت في قلوب بعضهم وأدت لمقتل السبعين من المسلمين👌
وربنا قال:
"مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ ۚ"
عبد الله بن مسعود فاكرينه🤔
إللي طلع فوق صدر أبو جهل وقتله، لما نزلت آية :
"مِنكُم مَّن يُرِيدُ الدُّنْيَا وَمِنكُم مَّن يُرِيدُ الْآخِرَةَ ۚ"
قال : والله متخيلتش إن في حد فينا يريد الدنيا لحد ما نزلت هذه الآية 😓
كان مفكر إن الناس كلها زيه همها الآخرة،
ودي من الحكم العظيمة إللي استفادها المسلمون بعد مصيبة أحد، إنهم يعرفوا خطورة حب الدنيا 👌
احنا دلوقتي مع رسول الله ﷺ بقالنا حوالي سبعة عشرة سنة، ثلاثة عشر سنة في مكة وثلاثة في المدينة،
خلال السنين دي كلها كان رسول الله ﷺ بيحذر الصحابة من الدنيا،
وكان يقول لهم:
" إنَّ الدُّنْيا حُلْوَةٌ خضِرَةٌ، وإنَّ اللَّهَ مُسْتَخْلِفُكُمْ فِيهَا. فينْظُر كَيْفَ تَعْمَلُونَ. فَاتَّقوا الدُّنْيَا"
يعني الدنيا جميلة وحلوة وربنا هيجعلكم خلفاء فيها يعني هيمكّن لكم في الأرض ويشوف هتعملوا إيه بعد التمكين ده،
فخافوا من الدنيا وابعدوا عنها👌
وحتى القرآن نفسه قليل جدا لو عدى منه صفحة أو صفحتين ومنشفش فيه تحذير من الدنيا،
فلما تحصل مصيبة زي مصيبة أُحد كده والقرآن يتكلم عنها وكل ما يقرأوا القرآن يتذكروا إللي حصل في أحد،
تعتقدوا إنهم ممكن ينسوا في يوم من الأيام إن حب الدنيا كان سبب في مقتل أصحابهم وسبب في الآلام إللي حصلت لرسول الله ﷺ إللي كانوا بيحبوه أكثر من أي حاجة في حياتهم💁‍♀️
فكل ما كان الأمر شديد على النفس ومؤلم لها كان الدرس إللي الإنسان بيتعلمه منها أكبر وميتنساش أبدا👌
ولو نظرنا لحياتنا هنلاقي إن كل ما كانت المشاكل إللي بنمُر بيها شديدة على نفوسنا كل ما كان أثرها أكبر في حياتنا،
طبعا للي يفهم المعنى ويأخذ العبرة👌
لأن في ناس عايشين في كوارث ومش عارفين السبب وبيرموا اللوم على ربنا وخلاص، والمشكلة من عندهم أصلا🤓

بعد ما انتهت معركة أحد كان المسلمون إللي فروا من أرض المعركة في البداية بعد إشاعة مقتل رسول الله ﷺ وصلوا المدينة وأخبروا أهل المدينة باللي حصل لجيش المسلمين وإن رسول الله ﷺ قُتل،
فالنساء قعدت تبكي وتصرخ واتقلبت المدينة، مكنش لسه اتحرم الصراخ على الموتى ساعتها😅
فاطمة بنت رسول الله ﷺ لما وصل لها الخبر، خرجت مع مجموعة من النساء واتجهوا لموقع المعركة،
عشان يساعدوا المسلمين المصابين ويتأكدوا من الخب

#قصص_الأنبياء(٢)
#السيرة_النبوية
#الحلقة_السابعة_والسبعون
#الخروج_من_مصيبة_أحد

اتكلمنا المرة إللي فاتت عن إللي حصل مع رسول الله ﷺ من أذى جسدي وأذى نفسي لما شاف أصحابه مقتولين وجثثهم قد مَثّل بها المشركون،
وبدأ يدفن شهداء أحد، وقلنا إنه كان بيضع في القبر الواحد كل اثنين مع بعض، وكان بيُقدم في القبر إللي حافظ قرآن أكثر، وبيضع كل اثنين كانوا متحابين في الله قبل ما يموتوا مع بعض،
وكان يقول عن الشهداء ﷺ:
"أشهد على هؤلاء، ما من مجروح جُرح في الله عز وجل إلا بعثه الله يوم القيامة وجرحه يَدمي، اللون لون دم، والريح ريح مِسك"
يعني الشهيد ربنا هيبعثه زي ماهو بجراحه والدم بينزف منه، والناس كلها هتبقى شايفة دمه سائل لكن ريحة الدم هتكون زي ريحة المسك👌
من ضمن الشهداء إللي رسول الله ﷺ دفنهم كان خَيْثَمة بن الحارث، وخيثمة ده له قصة،
في غزوة بدر كان عايز يخرج مع رسول الله ﷺ وابنه سعد كان عايز يخرج هو كمان، فخيثمة قال لابنه :
آثرني بالخروج، وخليك انت مع النساء😥
يعني خليني أنا إللي أخرج مع رسول الله ﷺ وانت اقعد ارعى النساء من بعدي، فابنه قال له :
لو كانت حاجة غير الجنة كنت آثرتك بها👌
فاستهموا، يعني عملوا قُرعة بينهم فخرج سهم سعد بن خيثمة، وقُتل في بدر شهيدا رضي الله عنه،
أبوه خيثمة شافه في المنام قبل غزوة أحد بيوم وقال له:
الْحَق بنا يا أبتِ، يعني تعال لنا في الجنة، فخرج مع رسول الله ﷺ في غزوة أحد وقتل شهيدا رضي الله عنه،
ودفنه رسول الله ﷺ،
بعد ما رسول الله ﷺ انتهى من دفن الموتى، قال لأصحابه إنهم يصطفوا وراءه عشان يدعو ويثني على الله، قال :
"اللهم لك الحمد كله، اللهم لا قابض لما بسطت، ولا باسط لما قبضت، ولا هادي لمن أضللت،
ولا مُضل لمن هديت، ولا معطي لما منعت، ولا مانع لما أعطيت، ولا مُقرب لما باعدت، ولا مُبعد لما قربت ، اللهم ابسط علينا من بركاتك ورحمتك وفضلك ورزقك،
اللهم إني أسألك النعيم المقيم الذي لا يحول ولا يزول، اللهم إني أسألك العون يوم العيلة، والأمن يوم الخوف، اللهم إني عائذ بك من شر ما أعطيتنا وشر ما منعتنا،
اللهم حبب إلينا الإيمان وزينه في قلوبنا، وكره إلينا الكفر والفسوق والعصيان، واجعلنا من الراشدين،
اللهم توفنا مسلمين وأحيِنا مسلمين، وألحقنا بالصالحين غير خزايا ولا مفتونين، اللهم قاتل الكفرة الذين يكذبون رسلك ، ويصدون عن سبيلك، واجعل عليهم رجزك وعذابك ، اللهم قاتل الكفرة الذين أوتوا الكتاب إله الحق"

رسول الله ﷺ بيعلم الصحابة وبيعلمنا من خلال دعائه:

◇ الشكر الدائم لرب العالمين في كل الظروف، حتى لو بعد ما تحصل مصيبة لأن حتى مع المصيبة بيكون في خير بس الإنسان ميعرفش، وبيكتشفه بعدين،
زي مصيبة أُحد، رسول الله ﷺ لسه ميعرفش الأحداث إللي هتحصل لأنه لا يعلم الغيب، لكن هو قدم الشكر لله لأنه عارف إن قدر ربنا كله خير حتى لو كان في ظاهره شر👌

◇النظر إلى نعم الله، يعني الإنسان مهما حصل له من المصائب أو الابتلاءات، فربنا أعطى له نِعم أكثر من البلاء،
فلما يقارن نِعم الله التي لا تُعد ولا تُحصى بالبلاء، يهون البلاء في عين الإنسان👌

◇تعظيم الآخرة في عيوننا وعيون الصحابة، يعني مهما ضاقت علينا الدنيا وحصلت لنا مصائب وابتلاءات شديدة لو في المقابل هيكون جزاءنا 《النعيم المُقيم》 إذا صبرنا،
فأكيد احنا الكسبانين،
يساوي إيه صبر على البلاء مقابل غمسة واحدة في الجنة تُنسي أبأس أهل الأرض بُؤسه،
يعني واحد مشفش ساعة حلوة في حياته وهو من أهل الجنة، هيتغمس في الجنة غمسة واحدة بس وهينسى كل تعبه وشقاؤه، أمال لما يدخلها ويقعد فيها ويأكل من ثمارها ويشرب من أنهارها،
ويقعد في قصورها ويشوف ما لا عين رأت ولا أذن سمعت ولا خطر على قلب بشر ...غمسة واحدة فقط👌
الجنة تستاهل إننا نصبر عشانها، نصبر على البلاء...نصبر على الطاعة...نصبر عن المعصية👌

رسول الله ﷺ والصحابة تعبانين جسديا ونفسيا، أحداث كثيرة في يوم واحد، فالمفروض إنهم هيريحوا شوية عشان يستعيدوا طاقتهم قبل ما يرجعوا للمدينة لكنهم مغمومين من إللي حصل وكمان كانوا خايفين من إن المشركين يرجعوا ويهجموا عليهم🙊
فربنا اللطيف بعباده أرسل عليهم النُّعاس،
عارفين الواحد لما بيكون خايف ومهموم وحاصل معاه مشكلة بيبقى مش عارف ينام ولا عارف يأكل وقلقان🤔
هو ده كان حال الصحابة في الوقت ده👌
لكن ربنا أراد إنه يهون عليهم، وخصوصا إنهم عرفوا الخطأ فين وفعلا صلحوه 💁‍♀️
فأول حاجة ربنا عملها معاهم عشان يهون عليهم، إنه خلاهم يناموا، لدرجة إن أبا طلحة قال إن سيفه كان كل شوية بيسقط من إيده وهو واقف في الحراسة،
يعني يغلبه النوم ويسقط السيف وينتبه وبعدين يأخذه، ويغلبه النوم ويسقط السيف وهكذا😅
والنوم دليل على الأمان ، لأن الإنسان عمره ما هيقدر ينام وفي قلبه خوف🤷‍♀️
"ثُمَّ أَنزَلَ عَلَيْكُم مِّن بَعْدِ الْغَمِّ أَمَنَةً نُّعَاسًا يَغْشَىٰ طَائِفَةً مِّنكُمْ"
وده كان لكل إللي في الجيش من المؤمنين،
لكن كان في طائفة تان

#قصص_الأنبياء(٢)
#السيرة_النبوية
#الحلقة_الثامنة_والسبعون
#الشهداء_ومنازلهم
#رجوع_رسول_الله_إلى_المدينة

وقفنا المرة إللي فاتت عند بداية تحرك جيش المسلمين عشان يرجعوا للمدينة بعد غزوة حمراء الأسد،
احنا بقى هنسيب جيش المسلمين يرجع للمدينة ونروح لعالم البَرْزخ😁

☆ الصحابة إللي قُتلوا في غزوة أحد دول إيه إللي حصل لهم بعد موتهم🤔
الصحابة الذين قُتلوا في سبيل الله في غزوة أحد هم شهداء ... أحياء عند ربهم يُرزقون في الجنة،
يعني هم في الدنيا بالنسبة لنا احنا أموات ويجري عليهم أحكام الأموات، يعني لو واحد منهم ترك ميراث، يرثه أهله وزوجته مثلا يتزوجها غيره بعد عدتها، وتُدفن جثته في القبر وهكذا 👌
أما في القبر فربنا جعلهم أحياء 《بأرواحهم فقط》حياة برزخية غير الحياة إللي احنا عارفينها،
حياة مختلفة تماما عن حياتنا، مهما حاولنا نتخيلها مش هنعرف لأنها ملهاش شبه ومنعرفش أصلا هي عاملة إزاي🤷‍♀️

لكن عندنا بعض الوصف لأرواح الشهداء موجودة فين،
في الحديث الصحيح إن أرواح الشهداء في:
جَوْفِ طَيْرٍ خُضْرٍ لَهَا قَنَادِيلُ مُعَلَّقَةٌ بِالْعَرْشِ تَسْرَحُ مِنْ الْجَنَّةِ حَيْثُ شَاءَتْ ثُمَّ تَأْوِي إِلَى تِلْكَ الْقَنَادِيلِ .

معنى الكلام إن :
◇أرواح الشهداء ربنا جعلها هي نفسها تتشكل على هيئة الطير الخُضر دي وتسرح في الجنة زي ما هي عايزة وتأكل من الجنة، زي ما ربنا بيجعل المَلك يتشكل بصورة بشر💁‍♀️

◇أو إن أرواح الشهداء ربنا جعلها في جسد جديد وهو الطير الخُضْر بدل الجسد إللي أتلفه العدو في المعركة كنوع من العوض أو المكافأة للشهيد،
بحيث تقدر الروح من خلال الطير ده إنها تروح لأي مكان في الجنة وتأكل منه، كأنها وسيلة نقل يعني😊

وبعد كده الطير الخُضر تأوي للقناديل المعلقة تحت العرش، زي ما الطيور بتأوي لبيوتها على آخر النهار،
وطبعا القناديل دي مش هي بيوت وقصور الشهداء إللي هيستقروا فيها للأبد😅
دي حاجة مؤقتة لحد ما يدخلوا الجنة دخولا كاملا يوم القيامة بالروح والجسد مع بعض،
وهم يرون قصورهم ومقاعدهم من الجنة، لكن النعيم التام يوم القيامة 👌

ربنا سأل شهداء الصحابة بعد غزوة أحد وهم في جوف الطير الخُضر :
هل تشتهون شيئا، يعني هل نفسكم في شيء،
فقالوا :
هنشتهي إيه أكثر من إننا نسرح في الجنة حيث شئنا 😍
فسألهم ربنا ثلاثة مرات هل تشتهوا شيء؟
فلما شافوا إنهم لن يُتركوا غير لما يتمنوا، قالوا:
يارب رجّع أرواحنا في أجسادنا في الدنيا عشان نُقتل مرة ثانية في سبيلك 😍
وكلّم الله عبد الله بن حرام إللي كان عنده تسع بنات وهو والد جابر، بدون حجاب، ودي ميزة لم تحصل مع أي أحد غير عبد الله بن حرام،
فربنا لم يكلم بشر أبدا إلا من وراء حجاب ما عدا عبد الله بن حرام، وده كان بسبب شدة إيمانه وتقواه وعمله الصالح والمسارعة في الخيرات وجهاده في سبيل الله،
قال له الله:
يا عبدي تَمَنّ علي أعطيك.
فقال عبد الله بن حرام:
أتمنى يارب تُحيِيني فأُقتل فيك مرة ثانية،
ودي حاجة محدش بيتمناها غير الشهيد، يعني الشهيد بعد ما يُقتل ويشوف منزلته وكرامته عند ربنا يتمنى إنه يرجع للدنيا عشان يُقتل في سبيل الله مرة ثانية وثالثة لحد عشر مرات زي ما رسول الله ﷺ قال في الحديث😊
لكن ربنا عز وجل قال لهم إنه لن يُرجع إلى الدنيا أي أحد مات👌
ودي هي القاعدة العامة للبشر، في بعض الحالات إللي بتشذ عن القاعدة، زي إللي اتكلمنا عنهم في قصص الأنبياء😁
فاكرين عُزير و الجماعة إللي ربنا قال لهم موتوا ثم أحياهم وغيرها من القصص عن إحياء الموتى،
دول كان في حكمة من إحيائهم وهي بيان قدرة ربنا على إحياء الموتى،
لكن القاعدة الأساسية إن محدش هيرجع بعد موته للدنيا👌

والشهداء أقسام،
في منهم إللي بيسرح في الجنة حيث شاء زي ما قلنا، وفي قسم في قُبَّةٍ خَضْرَاءَ على نهر بباب الجنة يخرج لهم رزقهم من الجنة الصبح وبالليل،
وفي احتمال إن أرواح الشهداء بتجتمع عند النهر إللي على باب الجنة ده ويأتيهم رزقهم من الجنة مع بعض😊
ومش معنى إنهم بياكلوا ويشربوا إن الأكل والشرب مهم لهم عشان يفضلوا عايشين زينا😅
يعني احنا بناكل ونشرب عشان نفضل على قيد الحياة صح؟
هم بقى حياتهم مش محتاجة أكل وشرب عشان يفضلوا عايشين، هم بياكلوا وبيشربوا من الجنة كنوع من أنواع النعيم😁
والشهداء في الجنة مش كلهم في نفس الدرجة ،
يعني ربنا جعل الجنة درجات، الشهداء لوحدهم لهم في الجنة مائة درجة،
أعلى درجة للشهيد زي ما رسول الله ﷺ قال:
"رَجُلٌ مُؤْمِنٌ قَاتَلَ بِنَفْسِهِ وَمَالِهِ فِي سَبِيلِ اللَّهِ حَتَّى إِذَا لَقِيَ الْعَدُوَّ قَاتَلَهُمْ حَتَّى يُقْتَلَ،
فَذَلِكَ الشَّهِيدُ الْمُفْتَخِرُ فِي خَيْمَةِ اللَّهِ تَحْتَ عَرْشِهِ ، لا يَفْضُلُهُ النَّبِيُّونَ إِلا بِدَرَجَةِ النُّبُوَّةِ"
وسيد الشهداء كلهم حمزة بن عبد المطلب عم رسول الله ﷺ 😊

☆طيب هو ليه الشهيد اسمه الشهيد 🤔

◇لأن ربنا والملائكة يشهدون له بالجنة.
◇أو لأنه حي فكأن روحه شاهدة، يعني حاضرة.
◇أو لأن

#قصص_الأنبياء(٢)
#السيرة_النبوية
#الحلقة_التاسعة_والسبعون
#الشورى
#قصة_تحريم_الخمر

اتكلمنا المرة إللي فاتت عن رجوع جيش المسلمين للمدينة بعد غزوة أُحد وشوفنا رد فعل أهل المدينة من المؤمنين ومن المنافقين واليهود كان عامل إزاي،
وشوفنا تعليق القرآن على أحداث غزوة أحد وفَضْحه للمنافقين،
وهنا يظهر عندنا نقطة مهمة جدا👌
لو رجعنا بالأحداث لقبل غزوة أُحد لما كان رسول الله ﷺ بيشاور الصحابة نطلع نقاتل المشركين خارج المدينة ولا نقاتلهم داخل المدينة،
لو فكرنا بالعقل هنلاقي إن الرأي الصحيح كان إن المسلمين يقاتلوا المشركين داخل المدينة زي ما رسول الله ﷺ قال في البداية،
ولكنه خالف رأيه ونزل على رأي الصحابة لأن رأيهم كان الأغلب وطبعا دي كانت أراء اجتهادية منزلش بها وحي قاطع 😅
يعني من الآخر كده الشورى كانت سبب من أسباب الهزيمة من البداية خالص، والمفروض كان رسول الله ﷺ خلى رأيه هو إللي يمشي وكان يُلزم به المسلمين،
فبعد ما شفنا الأثر السلبي للشورى في الموقف ده الطبيعي بالعقل إننا نلغي الشورى🤷‍♀️
لكن ربنا سبحانه وتعالى قال لرسول الله ﷺ إنه يستمر في مشاورة أصحابه والأخذ برأيهم👌
مش معنى إن رأي الشورى كان خطأ مرة يبقى الشورى نفسها سيئة على طول الخط بالعكس،
ده استشارة 《أصحاب الرأي السديد الموثوق فيهم》
بتخلق أفكار كثيرة وبتُنتج أراء صحيحة، والمُشاور لا يكاد يُخطئ وحتى لو أخطأ فمش هيبقى عليه اللوم زي واحد لم يشاور أحد من البداية💁‍♀️
وكمان من أهم الصفات إللي تخلي القائد محبوب بين جنوده وإنهم يطيعوا أوامره هي المشاورة،
لأنه لما ياخد رأيهم في الأمور الخاصة بالدولة إللي محتاجة مشورة، ده هيخلي الجنود يشعروا إنهم جزء من الدولة دي وإن قائدهم حريص على المصلحة العامة للجميع وهيثقوا فيه ،وبالتالي هيكونوا حريصين جدا على طاعته وهيبذلوا جهدهم وطاقتهم في مساعدته 👌
بعكس لو القائد كان مستبد برأيه، وبيتعامل مع الجنود على إنهم مجرد أدوات يجب عليهم تنفيذ الأمر وبس😑
هنلاقيهم بيبعدوا عن القائد وكارهينه وحتى لو أطاعوا أمره فهيطيعوه وهم مضطرين ومن غير ما يكون في حرص منهم على مصلحة دولتهم أو حتى دينهم،
وده إللي ربنا قاله لرسوله ﷺ في القرآن:
"فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ"
ربنا قال لرسول الله ﷺ إنه يعفو عن الخطأ إللي حصل في غزوة أحد، وبيأمروا إنه يستمر في مشاورة أصحابه،
وإنه لو كان سيء الخُلق وقاسي القلب معاهم كان زمانهم انفضوا من حوله👌

☆طيب خلونا نستفيد في حياتنا العملية من قصة الشورى دي، ماهو احنا مش مجرد بنحكي قصة وخلاص احنا عايزين نتربى على أخلاق رسول الله ﷺ وأخلاق القرآن😁
المشاورة مش بتكون بس بين القائد وجنوده،
المشاورة بتكون بين الرجل وزوجته، بين الأم والأب وأبنائهم،
بين الأصحاب وبعض،
مينفعش الزوج ياخد قرار خاص بالأسرة كلها وهيأثر على أهل بيته كلهم من غير ما ياخد رأيهم ويشاورهم،
مينفعش الأم مثلا تاخد قرار خاص بأبنائها من غير ما تاخد رأيهم،
《طبعا في الحاجات إللي محتاجة مشورة فقط 👌》

¤ممكن حد يقول طيب ماهم عقلهم ميستوعبش أو تفكيرهم بسيط لا يرقى لمستوى تفكيري = الزوجة أو الأبناء مثلا= 😕
حلو أوي😁
احنا متفقين إن رسول الله ﷺ هو أكمل الناس وأفضلهم رأيا وعقلا وأكثرهم علما،
ربنا بقى أمر أكمل الناس وأفضلهم رأيا وعقلا وأكثرهم علما إنه يشاور من هُم أقل منه في العقل والحكمة والرأي والعلم،
فمن باب أَوْلى إن إللي أقل من رسول الله ﷺ محتاج يشاور ويشوف آراء إللي حواليه🤷‍♀️
وعلى فكرة هي دائرة 🤓
الزوجة إللي مش بتشاور أبنائها وبتأخذ برأيهم وعلى طول مستبدة برأيها ،هتلاقي ربنا مسلط عليها زوج مستبد مش بياخد برأيها ولا بيشاورها في حاجة،
والزوج إللي مستبد برأيه ومش بيشاور زوجته وعياله هتلاقي ربنا مسلط عليه مدير قارفه في الشغل مثلا💁‍♀️

◇《طبعا أنا بتكلم في القاعدة العامة، مش بنقيس على شواذ القاعدة ، يعني ممكن تكون واحدة مثلا بتشاور أبنائها وربنا مسلط عليها زوج مُستبد كنوع من أنواع الابتلاء، دي حاجة تانية مش موضوعنا خالص😅》

فقاعدة الشورى من صفات الجيش إللي ربنا بينصره، وكذلك قاعدة الشورى 《صفة》 من صفات الأسرة المستقرة نفسيا👌
من الحاجات إللي ربنا علمها للصحابة في القرآن هو الاستغفار لما يقابلوا العدو،
خلونا نشوف الآيات ربنا بيقول:
"وَكَأَيِّن مِّن نَّبِيٍّ قَاتَلَ مَعَهُ رِبِّيُّونَ كَثِيرٌ فَمَا وَهَنُوا لِمَا أَصَابَهُمْ فِي سَبِيلِ اللَّهِ وَمَا ضَعُفُوا وَمَا اسْتَكَانُوا ۗ وَاللَّهُ يُحِبُّ الصَّابِرِينَ "
يعني كم من نبي قاتل معه ربانيون =ناس صالحين= كثير ومحدش فيهم ضِعف ولا استكان لما نبيهم اتقتل، بالعكس ده استمروا في القتال على منهج نبيهم ودافعوا عن دين الله👌
فكان الأَوْلى إنكم تعملوا زي أتباع الأنبياء السابقين،
مش إن

#قصص_الأنبياء(٢)
#السيرة_النبوية
#الحلقة_الثمانون
#الإخلاص_وقصة_أصحاب_الغار(١)

اتكلمنا المرة إللي فاتت عن الأحداث بعد غزوة أحد وشفنا آيات القرآن إللي نزلت وصنّفت المجتمع لمؤمنين ومنافقين وشهداء،
خلصت غزوة أحد ورجع المسلمون لممارسة حياتهم اليومية، إللي عنده جراح محتاجة تخف، وإللي رجع لشغله في زراعة البساتين و....و...
وطبعا المسلمون بيتقابلوا مع رسول الله ﷺ في الصلوات الخمس كل يوم،
قلنا قبل كده إن رسول الله ﷺ كان بيربي الصحابة تربية إيمانية وكان بينوع في طريقة تربيته لهم، مرة عن طريق القصة ومرة عن طريق مواعظ مباشرة، ومرة كان يقرأ عليهم القرآن فقط،
رسول الله ﷺ كان عايز يعلم الصحابة معنى الإخلاص، فهيحكي لهم قصة عشان يوريهم الإخلاص ممكن يعمل إيه وبالتالي هم نفسهم هيكونوا حريصين إنهم يحققوا الإخلاص ده👌
☆طيب هو رسول الله ﷺ ليه عايز يعلم الصحابة الإخلاص أصلا🤔

لو تفتكروا لما كنا بنتكلم عن رحلة المعراج واتكلمنا عن حوض رسول الله ﷺ ومين الناس إللي هتشرب منه، قلنا إن عشان ربنا يتقبل مننا العمل الصالح لازم نكون محققين شرطين:
الإخلاص والمتابعة،
المتابعة هي اتباع رسول الله ﷺ في كل شيء واتكلمنا بالتفصيل عن النقطة في الجزء الرابع والثلاثين عشان لو حبيتم ترجعوا لها تاني😊
"فَمَن كَانَ يَرْجُو لِقَاءَ رَبِّهِ فَلْيَعْمَلْ عَمَلًا صَالِحًا وَلَا يُشْرِكْ بِعِبَادَةِ رَبِّهِ أَحَدًا "
فليعمل عملا صالحا يعني موافق للسنة، زي ما رسول الله ﷺ كان بيعمل بالضبط من غير ما نبتدع،
وشرط المتابعة لرسول الله ﷺ يعتبر سهل لو قارناه بالشرط الأول وهو الإخلاص،
"وَلَا يُشْرِكْ بِعِبَادَةِ رَبِّهِ أَحَدًا "
لأن الرياء أو خلينا نقول الشرك زي ما رسول الله ﷺ سمّاه إللي هو عكس الإخلاص أخفى من دبيب النمل،
يعني لو إنتي قاعدة في البيت هتحسي بدبة النملة 🐜وهي ماشية في الشقة🤔
طبعا لأ، محدش فينا هيعرف إن في نملة في البيت غير لما نشوفها بعنينا، تخيلوا بقى لما تبقى حاجة أخفى من دبة النملة هل ممكن إننا نحس بيها😶
مستحيل طبعا😅
طيب وإيه المشكلة يعني من الرياء🤨
الرياء سبب لحبوط العمل، وإن ربنا لا يتقبله من الإنسان،
ربنا بنفسه بيقول في الحديث القدسي:
" أَنَا أَغْنَى الشُّرَكَاءِ عَنِ الشِّرْكِ، مَنْ عَمِلَ عَمَلًا أَشْرَكَ فِيهِ مَعِي غَيْرِي، تَرَكْتُهُ وَشِرْكَهُ "
❌واحد بيحفظ قرآن عشان الأجر 《و》عشان يأخذ إجازة ويقول للناس أنا معايا إجازة في القرآن وبالتالي الناس تحترمه وتقدره وينظروا له نظرة إعجاب،

❌واحدة بتتعلم العلم الشرعي عشان تعبد ربنا 《و》 عشان الناس تقول عليها أه فلانة العالمة وتبقى مشهورة بين الناس،
واحد بيعمل خير عشان الأجر 《و》عشان الناس متجبش سيرته إلا بالخير ويبقى محبوب وسط الناس،

❌واحدة بتتصدق عشان أجر الصدقة 《و》عشان الناس تقول عليها ده فلانة دي كريمة وبتساعد الفقراء والناس تمدحها،
الأمثلة دي وغيرها كثير، مثال على إللي بيعمل عمل لله عشان الأجر وعشان حاجة تانية،
والنتيجة للأسف هتكون زي ما ربنا قال:
"تَرَكْتُهُ وَشِرْكَهُ"
يعني مفيش عمل أصلا، ربنا لم يتقبل العمل من أساسه،
لو واحد عمل عمل لله بنسبة ٩٩% لله و ١% بس لغير الله، ربنا لن يتقبل منه😞

☆خلونا نقرب المعنى ونشوف مثال😊
لو واحدة قالت لزوجها شوف أنا بحبك بنسبة ٩٠ % لكن ١٠ % الباقيين بحب ابن الجيران،
هل هو هيقبل ويرضى بالتسعين ويقول أهه أحسن من ما فيش😕
ولاّ هيقلب الدنيا كلها عشان العشرة % دول ولن يقبل بإن زوجته تحب واحد تاني ولو بنسبة بسيطة 🤷‍♀️
أهه ولله المثل الأعلى في السماوات والأرض الوضع كده في أعمالنا الصالحة مع ربنا فهو أغنى الشركاء عن الشرك👌
عشان كده رسول الله ﷺ كان حريص إنه يعلم الصحابة معنى الإخلاص وإزاي يجتهدوا عشان يحققوه😊

خلونا نشوف رسول الله ﷺ حكى إيه للصحابة😁
قال رسول الله ﷺ للصحابة:
هل تعرفون قصة أصحاب الرّقِيم؟
" أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَبًا"
فالصحابة قالوا :
لا يا رسول الله😕
فقال لهم رسول الله ﷺ :
خرج ثلاثة ممّن كانوا قبلكم، يعني ثلاثة أشخاص خرجوا من بيوتهم رايحين مشوار....مسافرين....بيتمشوا ...فنزل عليهم المطر فآواهم المبيت إلى غار،
يعني دخلوا الغار عشان يحتموا من المطر، والغار عبارة عن فتحة داخل الجبل، فقالوا نروح نقعد فيه لحد ما المطر يخلص، دخلوا فعلا الغار وبعدها سقط حجر من الجبل وسد فتحة الغار،
عارفين لما بيكون في أمطار بتحصل انهيارات والأمطار بتحرك الصخور، فحصل إن الصخرة اتحركت ووقعت على باب الغار قفلته خالص، حاولوا يحركوها متحركتش😶

طبعا أي حد في مكانهم هيخاف ويترعب، متخيلين ناس داخل جبل اتقفل عليهم المخرج الوحيد ومش معاهم أكل ولا مية، وحتى لو معاهم هيكفيهم كم يوم يعني😕
إللي يشوف الموقف يقول إن الثلاثة دول هيهلكوا أكيد، هيموتوا موت بطيء👌

وهم نفسهم كانوا عارفين الوضع الخطير إللي كانوا فيه، فقالوا :
محدش هينجينا

#قصص_الأنبياء(٢)
#السيرة_النبوية
#الحلقة_الواحدة_والثمانون
#الإخلاص_وقصة_أصحاب_الغار(٢)
#قصة_صاحبة_الوشاح_الأحمر

اتكلمنا المرة إللي فاتت عن الثلاثة رجال إللي دخلوا غار ونزلت صخرة سدت عليهم باب الغار،
وشوفنا إن كل واحد فيهم دعا ربنا بأكثر عمل صالح كانوا محققين فيه الإخلاص عشان ربنا ينجيهم من الموت المُحقّق،
الأول كان عمله هو بِرّه بأبويه، والثاني كان إنه استعفف عن الزنا،
الثالث بقى هو إللي هنتكلم عنه النهاردة إن شاء الله 😊
خلونا نشوف الثالث دعى بإيه😁
قال:
يارب إنت عارف إن كان عندي أُجراء، يعني ناس فواعْلية، بيشتغلوا باليومية،
استأجرتهم على مكيال من أَرُز أو ذرة، فلما أعطيتهم أجورهم واحد منهم قال :
أنا اشتغلت شغل رجلين مش واحد، فعايز أجر رجلين مش أجر واحد 😤
فقلت له: احنا متفقناش على كده وأنا مظلمتكش في حاجة😕
فمرضيش وترك نصيبه وانصرف،
فثمّرته له《يعني شغّل له نصيبه، زي ما واحد بيعطي فلوس لواحد يشغلها له》
حتى اشتريت بها بقر وغنم وإبل وبقى عندي وادي مليان بهم، فجاءني الرجل بعد زمان وكانت حصلت له مشكلة ومحتاج فلوس فتذكر إن كان له مال عندي فجاءني وقال لي:
يا عبد الله رجّع لي حقي ولا تجْحَدني، فقلت له :
شايف إللي قصادك ده كله من البقر والغنم والإبل، ده كله مالك وحقك👌

فقال لي: يا عبد الله اتق الله ولا تستهزئ بي😓
فقلت: أنا لا أستهزئ بك، كل ده فعلا بتاعك 😅
فالرجل أخذ كل حاجة ومشي،
فاللهم إن كنت تعلم أني فعلت هذا ابتغاء مرضاتك ففرّج عنا ما نحن فيه 🤲
فتحركت الصخرة وخرجوا هم الثلاثة من الغار😊

☆الرجل الثالث ده حكاية😮
ليه🤔
الإنسان بطبيعة خلقه بيحب المال، وإنه لحب الخير...." الخير هنا معناها المال،
حتى رسول الله ﷺ بيقول:
" لو أن لابن آدم واديٍا من ذهب لابتغى إليه ثانيا ولو أُعطى ثانيا لابتغى إليه ثالثا ولا يملأ جوف ابن آدم إلا التراب، ويتوب الله على من تاب"
والوادي يعني منتهى البصر، يعني هنا مفيش أرقام، تخيلوا مليارات من الأموال،
فالإنسان لما يشوف الوادي ده، يقول يا سلام لو واحد كمان جنبه😅
فدي حاجة في أصل خلقة البشر، فالإنسان لا يشبع أبدا من حب المال،
ولو لاحظتم هتلاقوا إن معظم العداوات بين الناس بسبب المال، فتخيلوا بقى واحد بيحب المال بالطريقة دي وقعد يتاجر في كيلو ولا اتنين كيلو رز ويبيع ويشتري لحد ما ملأ وادي كامل بالبقر والأغنام من تجارة الكيلو رز ده😳
متصورين الوقت والجهد إللي عمله عشان يكوّن الثروة دي🙊
والتاني جاء أخذ كل حاجة على الجاهز كده وحتى من غير ما يقول له طب خذ نص الوادي على أد تعبك إللي تعبته،
ولاّ خُذ لك بقرة ولا اثنين...مفيش😅
أخذ كل حاجة وصاحبنا حتى معترضتش عليه، ولا قال له طيب فين حق السنين إللي تعبتها دي، تركه يأخذ كل شيء ومشي👌
فهو استطاع إنه يتغلب على شهوة حب المال المُركبة في أصل خلقته ويرقى بنفسه لقمة الإيمان ده😮

مع العلم إن الشخص ده مش نبي، يعني ربنا لم يعطه قدرات خاصة فهنقول أه ما هو ربنا ساعده وشال من قلبه حب المال،
لأ...ده بشر عادي زيه زينا بالضبط 👌
وهنا نتعلم إن نقدر نتغلب حتى على الشهوات إللي في أصل خلقتنا،
زي ما قلنا المرة إللي فاتت عن حب النساء للزينة، وإنها لازم تقاوم ميلها الفطري للزينة قصاد الناس من غير محارمها، وحب الرجل للنساء، وقيسوا بقى على كده👌

عارفين، احنا ممكن لما نحط نفسنا مكان الرجل نحس بضيق لأن هو عمل مجهود كبير جدا عشان يُنمي الفلوس دي وفي الآخر مأخدش أي جزاء على مجهوده،
وكل إللي تعب فيه سنين نقدر نقول إنه راح في لحظة،
تخيلوا إن ده بالضبط إللي بيحصل لما بنغتاب حد😶
يعني الواحد يقعد يتعب ويجتهد في العبادة، ويجاهد نفسه عشان يحقق الإخلاص ويعالج الرياء والعُجب،
ويدرب نفسه على الخشوع ويجاهد نفسه في قراءة القرآن وقيام الليل في البرد والحر،
وفي الآخر بكل سهولة واحد تاني يأخذ كوووول ده بسبب إني اتكلمت عليه بسوء، أو ذكرت عيوبه أو...أو...😑
الموضوع مرعب بجد، لأن الشخص إللي بنغتابه مش هياخد أي حسنات عملناها😞
ده هياخد من الحسنات إللي ربنا تقَبلها واتكتبت في الصحيفة بتاعتنا،
فأنا عايزاكم تتخيلوا كده واحد بيشتغل طول النهار وتعبان جدا وأول يوم أخذ فيه المرتب جه واحد وأخذه منه كده بكل بساطة وهو ملوش أي حق إنه يتكلم أو يحاول يسترجع المال ده، إحساسه هيبقى عامل إزاي😳
طبعا قمة القهر والزعل، لكن الإنسان ممكن يشتغل ويعوض الفلوس دي تاني،
لكن يوم القيامة بقى هتبقى حسرة ما بعدها حسرة لما الواحد يشوف حسناته وهي بتتاخد منه وتروح لفلان وهو بيشوف درجته في الجنة عمالة بتنزل ..بتنزل..ومفيش أي مجال إنه يعوض الحسنات دي خلاص الدنيا انتهت ومفيش رجوع لها تاني😓
ومش بعيد حسناته تخلص وياخد من سيئات الناس إللي اغتبها ويبقى في صحيفته زنا وسرقة وكذب ومشاهدة حرام مع إنه معملش كل ده، وكان بعيد كل البعد عن المعاصي😥
لكنها الغيبة👌
رسول الله ﷺ يقول:
"أَتَدْرُونَ مَا الْمُفْلِسُ ؟ قَالُوا : الْمُفْلِسُ فِينَا

#قصص_الأنبياء(٢)
#السيرة_النبوية
#الحلقة_الثانية_والثمانون
#قصة_المقداد_ولبن_رسول_الله
#رسول_الله_مع_سودة_وعائشة

هنتكلم النهاردة عن بعض مواقف رسول الله ﷺ مع أصحابه وبعض زوجاته،
واحد من الصحابة اسمه المقداد بن الأسود، أو خلينا نقول اسمه إللي هو مشهور به المقداد بن عمرو،
فاكرينه😊
إللي قال لرسول الله ﷺ في غزوة بدر لما كان بيستشير الصحابة يقاتلوا ولا يرجعوا للمدينة فقال المقداد بن عمرو:
يا رسول الله! اعمل إللي إنت شايفه صح، فوالله مش هنقول لك كما قال بنو إسرائيل لموسى اذهب أنت وربك فقاتلا فإنا هاهنا قاعدون،
ولكن هنقول لك : اذهب أنت وربك فقاتلا إنا معكما مقاتلون وكان رسول الله ﷺ فرح بكلامه جدا👌
حصل موقف بين رسول الله ﷺ والمقداد بن عمرو هيحكيه لنا المقداد، يقول:
أنا واثنين من أصحابي كنا جعانين جدا لدرجة إن تركيزنا راح، لا شايفين ولا سامعين حاجة،
فعرضنا أنفسنا على أصحاب النبي ﷺ عشان يضيفونا ويأكلونا فمحدش منهم قَبِلَنا😓

☆قلنا قبل كده إن الصحابة كانوا فقراء جدا، كان ممكن الواحد يقعد بالأيام مياكلش وكانوا بيربطوا الحجر على بطونهم من شدة الجوع،
فكل إللي عرضوا نفسهم عليهم كانوا فقراء زيهم ومعندهمش إللي يكفي الثلاثة دول.

فالثلاثة راحوا لرسول الله ﷺ، فأخذهم رسول الله ﷺ وذهب لأهله ،فلقى عندهم ثلاثة أَعْنُز، ماعز يعني،
فقال لهم احلبوا الماعز الثلاثة واقسموا اللبن بيننا احنا الأربعة،
فكانوا بيحلبوا اللبن ويشربوا ويتركوا نصيب رسول الله ﷺ متغطي في جنب لحد ما ييجي ويشربه،
استمر الوضع كده كام يوم، وكان رسول الله ﷺ بيذهب للأنصار ولما يخلّص مشواره يرجع بالليل ويقعد يصلي في المسجد وبعدها ييجي يشرب اللبن بتاعه،
في يوم من الأيام بعد ما شربوا نام الاثنان ولم ينم المقداد كان لسه جعان ومفيش غير نصيب رسول الله ﷺ بس هو إللي فاضل، فيقول:
وأنا نايم على الأرض كده جاءني الشيطان يوسوس لي وقال لي:
محمد بيروح للأنصار، فأكيد يعني مش هيسيبوه من غير أكل وهيضيفوه، فأكيد مش هيبقى محتاج لشوية اللبن دول،
قوم اشرب قوم😈
فلما أغراه الشيطان وأقنعه إن رسول الله ﷺ مش محتاج شوية لبن قام المقداد بن عمرو وشرب نصيب رسول الله ﷺ من اللبن،
وأول ما دخل اللبن جوفه وعرف إن خلاص مفيش مجال إنه يرجع اللبن ده تاني، الشيطان مسابوش وقعد يندّمه😶
قال له: إنت عملت إيه😱
شربت اللبن بتاع محمد😳
دلوقتي ييجي عشان يشرب اللبن بتاعه وميلاقيهوش، فيدعو عليك وتضيع عليك دنياك وآخرتك😤
فطار النوم من عين المقداد وقعد قلقان وغطى نفسه بشَمْلة،
غطاء زي لحاف صغير كده، كان لما يغطي رأسه رجل تبان،
لو غطى رجله رأسه تبان،
وهو على الحالة دي جاء رسول الله ﷺ 🙊
وكان من عادته لما ييجي إنه يسلم سلام ميصحيش النائم وإللي صاحي يسمع سلامه،
فسلم رسول الله ﷺ كعادته وصلى في المسجد، وراح يكشف عن الطبق إللي فيه اللبن بتاعه عشان يشربه، فلما كشفه ملقاش فيه حاجة، فرفع إيده يدعي،
وكل ده والمقداد باصص على رسول الله ﷺ من تحت الشملة بتاعته ورسول الله ﷺ ميعرفش حاجة😅
فلما شافه المقداد بيرفع إيده للسماء عشان يدعي قال في نفسه:
بس كده أنا خلاص هلكت...روحت في داهية😶
فقعد يسمع رسول الله ﷺ هيدعي بإيه،
فسمعه يقول : اللهم أطعم من أطعمني واسقِ من سقاني🤲
فقام المقداد وأخذ سكينة وذهب إلى الأَعْنز عشان يذبح منهم واحدة ويُطعم رسول الله ﷺ ويبقى الدعاء إللي رسول الله ﷺ دعاه من نصيبه،
فلقى المقداد الضرع بتاع الأعنز كلهم مليان لبن، فأتى بطبق كبير عميق لا يتصور آل محمد ﷺ إنهم يحلبوا فيه ولا حتى يملوه زي ماهو بيحكي،
فحلب الأعنز وملأ الطبق باللبن لدرجة إن رغوة اللبن عِليت عن الطبق😮
فأخذ اللبن وراح لرسول الله ﷺ، فرآه رسول الله ﷺ وأكيد استغرب إن المقداد لسه صاحي 🤨
فقال له المقداد وهو بيعطيه اللبن:
اشرب يارسول الله 😊
فرسول الله ﷺ سأله: هل شربتم؟
فقال له المقداد: اشرب 😊
طبعا مجاوبهوش😅
هو مش عايز رسول الله ﷺ يعرف حاجة لحد ما يخلص عشان يأخذ بركة دعاء رسول الله ﷺ 😁

يقول المقداد: لما شرب رسول الله ﷺ اللبن وعرفت إنه خلاص ارتوى وبكده يبقى الدعوة إللي رسول الله ﷺ دعاها بقت من نصيبي قعدت أضحك لدرجة إني وقعت على الأرض من كثرة الضحك😄
طبعا كل ده رسول الله ﷺ ميعرفش إللي حصل مع المقداد وصراعه من نفسه وإزاي إنه كان حزين جدا عشان خايف من دعوة رسول الله ﷺ عليه، وفجأة اتحولت الدعوة وبقت في مصلحته،
فرسول الله ﷺ قال له:
إحدى سَوْءاتك يا مقداد👌
يعني إنت عملت عَملة يا مقداد😁
فحكى له المقداد كل إللي حصل معاه، فقال له رسول الله ﷺ:
دي رحمة من الله، مش كنت تقول عشان نصحي الاتنين النايمين دول عشان يشربوا معانا!

☆شوفتم إزاي الشيطان ممكن يوقع الإنسان في الخطأ، ومش بس كده، ده بعد الخطأ يندمه وممكن يوصله لمرحلة اليأس من رحمة الله،
يقول إنت عملت المعصية الفلانية خلاص كده، ربنا مش هيقبلك تاني، ويزين له باقي المعاصي عشان يوقعه أكثر وأكثر وبالتالي يضيعه،
كل واح

#قصص_الأنبياء(٢)
#السيرة_النبوية
#الحلقة_الثالثة_والثمانون
#أحداث_السنة_الرابعة_من_الهجرة
#اغتيال_خالد_الهذلي
#حادثة_ماء_الرّجيع

اتكلمنا في الأجزاء الأخيرة إللي فاتت عن مصيبة المسلمين في أحد وتعليق ربنا في القرآن على أحداث غزوة أحد،
وشوفنا آثار غزوة أحد على المسلمين وعلى المشركين في مكة وعلى اليهود والمنافقين في المدينة،
وشوفنا إزاي رسول الله ﷺ استطاع إنه يخرج بالصحابة من أزمتهم النفسية إللي حصلت لهم بسبب خطأ الرماة، وانتقل بهم لمرحلة الهجوم على جيش المشركين في غزوة حمراء الأسد،
ومن خلال غزوة حمراء الأسد استطاع رسول الله ﷺ إنه يسترجع شيء من هيبة الدولة الإسلامية،
لكن صورة الدولة الإسلامية قصاد قبائل العرب اتهزت كتير جدا بعد ما كانت قبائل العرب بيعملوا للمسلمين حساب وخصوصا بعد غزوة بدر،
ففكروا إن المسلمين دلوقتي صيد سهل وبقوا مستنيين الفرص عشان يهجموا على المسلمين😕
خلونا نقسم كده أعداء المسلمين في المنطقة ونشوف وضعهم إيه:

◇أولا :
قريش العدو الأكبر للإسلام وإللي بتحاربه بقالها أكثر من أربعة عشر عام، وهي دلوقتي هدأت هدوء نسبي بعد انتصارها في أحد، وكانوا بعد غزوة أحد أعلنوا للمسلمين إنهم السنة الجاية هيتقابلوا في حرب تانية عشان يحددوا المنتصر منهم،
يعني هم بينهم دلوقتي تعادل من وجهة نظر جيش المشركين، فطلبوا من رسول الله ﷺ إنهم يتقابلوا في بدر مرة ثانية عشان تبقى الحرب دي هي الفَيْصل بينهم،
ووافق رسول الله ﷺ على طلبهم، فغزوة أحد كانت في شوال من السنة الثالثة من الهجرة،
والميعاد إللي اتفق عليه المشركون والمسلمون كان في شوال من السنة الرابعة من الهجرة عند ماء بدر، فكده نقدر نقول إن المسلمين أَمِنوا جانب قريش لمدة سنة🤔

◇العدو الثاني من أعداء المسلمين هم : المنافقين بقيادة عبد الله بن أبي بن سلول، ودول بقوا ظاهرين للمسلمين وبقوا يعرفوهم من تصرفاتهم،
طبعا كان في منافقين غير معروفين لا للمسلمين ولا حتى لرسول الله ﷺ زي ما ربنا قال له:
"وَمِمَّنْ حَوْلَكُمْ مِنَ الأَعْرَابِ مُنَافِقُونَ وَمِنْ أَهْلِ الْمَدِينَةِ مَرَدُوا عَلَى النِّفَاقِ لا تَعْلَمُهُمْ نَحْنُ نَعْلَمُهُمْ"
والمنافقين كانوا أشد السهام المُوَجهة إلى صدر الأمة الإسلامية بسبب إثارتهم للفتن والوقيعة بين المسلمين👌

◇القسم الثالث كانوا اليهود إللي عايشين في المدينة، واحنا قلنا قبل كده إن يهود بني قينقاع خرجوا من المدينة، واتبقى داخل المدينة يهود بني قُرَيْظة، ويهود بني النُّضِير وفي بينهم وبين المسلمين عهد،
لكن اليهود مشهورين بالغدر وكان رسول الله ﷺ بيتعامل معاهم بحذر،
واحنا شوفنا إللي كعب بن الأشرف اليهودي عمله وبعدين تم قتله وهو من يهود بني النُّضير،
وعلى الرغم من إن اليهود أكدوا على عهدهم مع رسول الله ﷺ بعد مقتل كعب بن الأشرف إلا إنهم ممكن يرجعوا في كلامهم وينتهزوا فرصة إصابة المسلمين في أحد وينقضوا العهد معاهم وينتقموا منهم 🤷‍♀️

◇أما القسم الرابع: فهم قبائل العرب إللي عايشين في البادية حول المدينة، والقبائل دي كانت عايشة على السّلْب والنّهب والأعمال الإجرامية، وقيام الدولة الإسلامية منعها من ثروات كثيرة كان ممكن تحصلها،
فأكيد لما يسمعوا باللي حصل للمسلمين في أحد مش هيضيعوا فرصة زي دي عشان يقضوا على دولة الإسلام،
وفعلا ده إللي حصل👌
قبيلة اسمها بني أسد بقيادة طُلَيْحة بن خُوَيْلد الأَسْدي بدأوا يجمعوا الناس للهجوم على المدينة،
وصل الخبر لرسول الله ﷺ فجهّز سَرِية في شهر محرم من السنة الرابعة للهجرة بقيادة أبو سلمة رضي الله عنه وبعثه عشان يفرق القوة دي قبل ما يتجمعوا ويهجموا على المدينة،
وفعلا اتفرق شمل بني أسد وحبطت محاولة الهجوم على المدينة،
في نفس الوقت ده وصل الخبر لرسول الله ﷺ إن واحد اسمه خالد بن سفيان الهُذَلي بيجمع بعض قبائل العرب عشان يهجموا على المدينة،
وخالد بن سفيان ده من أعظم وأشرس المقاتلين العرب وكان رجل ضخم وعنده قدرات قيادية هائلة😮
ولو الرجل ده قدر إنه يروح للمدينة بالقبائل إللي جمعها هيبقى خطر كبير جدا على المسلمين🙊
عشان كده رسول الله ﷺ اهتم جدا بموضوع الرجل ده، وبدأ يشوف طريقة إزاي يتخلص منه، لأن هو الرأس المُدبّر، ولو خلصنا منه تجمُّع القبائل هينتهي ومش هيقدروا يجمعوا نفسهم تاني👌
أرسل رسول الله ﷺ لواحد من الصحابة اسمه عبد الله بن أُنَيس، وهو كان من حلفاء الأنصار وحضر بيعة العقبة الأولى والثانية وحضر غزوة أحد،
فلما جاء لرسول الله ﷺ أخبره رسول الله ﷺ بقصة خالد بن سفيان الهذلي، وقال له رسول الله ﷺ إنه يروح ويقتل خالد بن سفيان،
لكن المشكلة إن عبد الله بن أنيس ميعرفش شكل خالد بن سفيان ده، فإزاي هيقتل واحد ميعرفوش🤔
فطلب عبد الله بن أنيس من رسول الله ﷺ إنه يوصف له شكل خالد بن سفيان،
مع إنه كان ممكن يأخذ الموضوع حجة عشان مينفذش أمر رسول الله ﷺ، وخصوصا إن المهمة خطيرة مش بسيطة،
هيقتل رجل بالضخامة والقوة دي إزاي😳
لكن أمر رسول الله ﷺ عند الصحا