#እንኳን_ደስ_አላችሁ!!!

ገሊላ ኢንተርናሽናል ሴሚናሪየም ከ100 በላይ የመጀመሪያ ድግሪ እና ሁለተኛ ዲግሪ ያስተማራቸዉን ተማሪዎች በአዲስአበባ ምስራቅ መሰረተ ክርስቶስ ቤተክርስቲያን እያስመረቀ ነዉ።

የክርስቲያን ዜና በስፍራዉ የታደምን ሲሆን ዝርዝር መረጃ ይዘን የምንመለስ ይሆናል።

ከአዲስ አበባ የሃይማኖት ተቋማት ጉባኤ የተላለፈ የእንኳን አደረሳችሁ መልዕክት

የጌታችን የመድኃኒታችን የኢየሱስ ክርስቶስ የትንሳኤ በዓል ዘላለማዊ ፍቅሩና ምህረቱ ለሰው ልጆች ሁሉ የተገለጠበት ታላቅ በዓል ነው።

በመሆኑም መላው ክርስቲያኖች ይህንን በዓል በተለያዩ ሃይማኖታዊ ስነ ሥርዓት በድምቀት ያከብሩታል።

የአዲስ አበባ የሃይማኖት ተቋማት ጉባኤም ለመላው የክርስትና እምነት ተከታዮች መልካም የትንሳኤ በዓል እንዲሆንላቸው እየተመኘ በዓሉ የሰላም ፤ የደስታ ፤ የመከባበር እና የአብሮነት እንዲሁም ለተቸገሩ እና ለታረዙ፣ ወገኖቻችን የምንናካፍልበት የመተሳሰብ በዓል እንዲሆን ይመኛል።

ይህ በዓል ከሌሎች በዓላት የሚለይበት የዓለማት ሁሉ ፈጣሪ ነብሱን ለሰው ልጆች ሁሉ የሰጠበት እና አለምን በአንድ ልጁ ያዳነበት በመሆኑ ምሳሌነቱን ተከትለን አንዳችን ለአንዳችን የምንቆረስበት የመተሳሰብና የመተጋገዝ በዓል ነው።

የዘንድሮው በዓላችን ሀገራችንን ጨምሮ መላው ዓለማችን የተፈጥሮ እና ሰው ሠራሽ አደጋዎች፣ የእርስ በእርስ ግጭት፣ በሽታ የኑሮ ውድነት ፈተና የበዛበት ቢሆንም ዓለማትን በፈጠረው ሞትን በሕይወት ፣ ጨለማን በብርሃን ፍርሃትንና ድንጋጤን ወደ ሙሉ ደስታ በለወጠው በጌታችንና በመድኃኒታችን በኢየሱስ ክርስቶስ ትንሳኤ ተስፋ ተሞልተን በዓሉን በመተሳሰብና በመተጋገዝ እንድናከብር ጥሪያችንን እናቀርባለን።

በተጨማሪም በሀገራችንም ይሁን በመላው አለም የሚታየው፣ መቅሰፍት፤ ሞት የእርስ በእርስ ግጭት ጠፍቶ በወንድማማቾችና በእህትማማቾች ዘንድ ሰላም፣ ፍቅር ፣መተባበርና መከባበር እንዲሰፍን ስናካሂድ የነበረውን የጸሎትና የንስሐ ልመና አምላካችን እንደቸርነቱ ብዛት ይቅር እንዲለን አጠንክረን ልንፀልይ ይገባል።

እኛ ኢትዮጵያውያን ቀድሞ የነበረን እና የምንታወቅበት አብሮ የመኖር ፤ የመተሳሰብ ፤ የመከባበር እና አንዱ ለአንዱ የመድረስ ቀደምት ባህላችንን ከምን ጊዜም በላይ ልናሳድገው እና ልናጎለብትበት የሚገባ ወቅት ላይ እንገኛለን።

ክርስቶስ በምድር በነበረበት ወቅት ለደቀመዛሙርቱ መታዘዝን እና ትህትናን ይቅርታን እንዳስተማረ ሁሉ ዛሬም የሃይማኖት ቤተሰቦች ከሰው ሁሉም ጋር በሰላም ኑሩ የተቸገሩትንም እሩዱአቸው የሚለውን አምላካዊ ቃል በመፈጸም አንዱ ከአንዱ ጋር በሰላም እና በመከባበር ለሀገር ሠላምና አንድነት ከምንጊዜውም በላይ በጋራ ሊንሰራ ይገባል።

በመጨረሻም በዓሉን ሲናከብር በስደት ላይ ያሉትን ኢትዮጵያን ወንድሞች እና እህቶቻችንን የአገርን ድንበር ለማስከበር በየጠረፉ የምገኙ የመከላከያ ሠራዊትና የጸጥታ አባላትን፣ በየማረሚያ ቤቶች በህግ ጥላ ስር የምገኙ የሕግ ታራሚዎች፣ በየሆስፒታሉ የምገኙ ህሙማን፣ በጸሎት እያሰብን ፤ በጦርነት እና በእርስ በእርስ ግጭት ከቀያቸው ተፈናቅለው የሚገኙትን ወገኖቻችንን ሁሉ በምንችለው ሁሉ እያገዝን እና በጸሎታችን ሁሉ እያሰብናቸው እንድናከብር እናሳስባለን።

በድጋሚ የአዲስ አበባ የሃይማኖት ተቋማት ጉባኤ ለመላው የክርስትና እምነት ተከታዮች ለ2014 ዓ.ም እንኳን ለብርሃነ ትንሣኤው በዓል በሰላም አደረሳችሁ፤ በዓሉ የሰላም የደስታ የፍቅር እንዲሆንላችሁ መልካም ምኞቱን ይገልፃል።

ሚያዚያ 12 2014ዓ.ም
አዲስ አበባ