APS Channel 全民自發加零－

醫言憤怒

香港人最擅長就係忘記，今日就同大家重現吓現時所謂「抗疫措施」。

親愛嘅特首今日又再宣佈收緊限聚令，飲食業、酒吧業又首當其衝。599 章惡法依然存在，而且龍門任搬、選擇性執法更係家常便飯。

其實，有唔少讀者都問我：吓？你作為醫學生，唔係應該知道戴口罩、社交距離，係一定要執行嘅「抗疫良方」嚟咩？

筆者依家一次過答大家：係，但係唔係喺依家呢個 setting。

如果大家睇返第一至第四輪疫情，唔免發現疫情出現嘅原因，係因為邊境嘅種種漏洞：死唔封某啲地區嘅關、白痴嘅檢疫隔離措施，種種都係使外來病毒株滲入社區、繼而造成傳播同爆發嘅原因。正如之前提及，你就算真係人人自律，戴好哂口罩、做好哂手衞生、留意住社交距離，你不斷引入病毒，咁你要病毒喺香港呢個人口咁密集嘅地方傳播，就實在太簡單。

所以，喺你選擇限制 constitutional freedom，進行限聚、強罩之前，麻煩你堵塞問題嘅根源：封關。係啊，好容易㗎咋，你睇吓台灣、你睇吓澳門。人哋都有口罩令之類嘅規例，但係人哋並冇將法例本末倒置。而你哋唔對症下藥，而強推 599 章，其實只係再一次證明你係想箝制你眼中嘅「叛民」，而唔係有心抗疫。

香港人，明未？

我一路都冇反對或者提倡人哋唔好戴口罩、唔好洗手、唔好 practise social distancing。但係咁樣並唔係我 endorse 緊 599 章。只不過，599 章嘅內容雖然都係呢哋措施，但係佢嘅執行同原意上有違邏輯，呢樣先係值得我哋思考、發聲同埋不滿嘅原因。

雪上加霜嘅係，縱使的確係有文獻記載話美國本土 SARS-CoV-2 傳播嘅案例，有大部分都係由聚餐而嚟，但係事實就係呢啲結果就只係有參考價值、而唔能夠完全套用落香港身上。香港人本身就驚死 (雖然都仲係有人唔驚死，明知 COVID-19 專殺老人家仲走去除罩跳老舞，當中仲不乏醫生)，所以有常識嘅香港人本身就知道要主動抗疫、減少群聚。明知如此，你仲專向飲食業開刀，你嘅 standpoint 又係咩呢？

而政權又以呢個為原因，喺第四輪疫情初初爆發之時就強推「安心抗疫」，背後原因叫人匪夷所思，而且居心叵測。

香港人，明未？

明白大家都已經抗疫疲勞，見到呢個咁嘅所謂「抗疫政策」，亦難免一肚怨氣。但係，我哋千萬唔可以放鬆。因為事實就係：每一個中招嘅 COVID 病人，都要入醫院或者社區中心醫治，而 COVID 雖然喺年輕群組入面真係唔高殺傷力，但係老人家、體弱人士一旦中招，佢哋仍然係 bear higher morbidity and mortality。呢個就係「公共」衞生嘅概念：我哋吊住條命抗疫，係為咗呢啲人嘅安全，亦都係為免香港醫療系統爆煲。

文長還望見諒；見字飲水，多多保重。

#醫言憤怒
#武漢肺炎 #COVID #SARSCoV2
#抗疫 #政策 #限聚令 #口罩令
#隨筆 #自行解讀 #自行解毒

47 views11:32