▫️بو گون موغایات اول گؤزللیگیندن!
صاباح تئز قوجالیب قاریدی بلکه.
اوره‌یین چیخسا دا، قانین ایچیندن،
گؤزلرین، اؤزونو آریدی بلکه.

تنهالیق اوسانیب، یاراسین قاپار،
دویغولار قایناشیب، یئرینی تاپار.
تئز قاییت، بیر دفعه منی ده آپار!
بو من او سئوگینین کاری‌دی بلکه.

نیسگیل‌لر دولان‌سا آجی ناخیشلا،
اولفت باغلاییب‌سا پاییزلا، قیشلا،
باهار کلمه-کلمه هورکک باخیشلا،
سینان‌ سؤزلرینی ساریدی بلکه.

واخت‌سیز لای‌لایا یئنه یاتما، ها!
هر گؤزون دوشَنه ال اوزاتما، ها!
دوغما حسرتینی چؤله آتما، ها!
یئنی‌ بیر یارایا یاریدی بلکه...

#یعقوب_نیکزاد
@SheirOcagi

▫️آخی بو قارا یئل هایاندان اسدی؟
بیردن اودا قالدیق، اویونا قالدیق.
بو نه تئز دیکَلدی، نه تئز تلسدی؟
بار-بهَر دادمامیش داها، قوجالدیق.

بیز درین کؤکلو مین چیناریدیق‌سا،
بالتانین سسیندن یئره سریلدیک.
داغلارین قوینوندا ووقاریدیق‌سا،
دوشوب دره‌لرین قانینی سیلدیک.

گؤزوموز چیخایدی، بیز گؤرن یئرده-
باهار یئتیشمه‌میش آجی پاییزی!
هاچان دوداغیمیز قاچدی عؤمورده؟
تورمه‌لیک ائله‌دی سون سئوگیمیزی.

آه، کیمین گولوشون اوغورلامیشدیق؟
تورپاق آدیمیزا مین قارا یاخدی.
هانسی بیر اؤلومه یاخشی یاراشدیق؟-
«تاق-تاراق، تاق-تاراق» تتییی چاخدی...

#یعقوب_نیکزاد
@SheirOcagi

▫️گئتمه، قونشوم دیسکینر!

دام-دووار جان اوسته‌دیر؛ قال، گئتمه! قونشوم دیسکینر،
سئودالانمیش هر نه وار، آل، گئتمه! قونشوم دیسکینر.

جان سنین جان رؤیالاردا چیرپینان چیلقین سسین،
بو هارایلا لال گلیب لال گئتمه! قونشوم دیسکینر.

بوردا قورخوشلوق آت اویناتماقدا، یوکسَلمکده داغ،
سن بو گرگینلیک‌له چوخ یول گئتمه! قونشوم دیسکینر.

قان ساغیلمیش‌دیر شهر، قارتال الیندن قورتاریب،
گل دوراقلاردا للک سال، گئتمه! قونشوم دیسکینر.

من یئتیشمیش دویغولاردان مین سوتول سؤز درمیشم،
سن گؤز آلتی کال گلیب کال گئتمه! قونشوم دیسکینر.

باغلانیب یوللار، دولاشدیقجا کوچه، های سالمادان،
دام-دووار جان اوسته‌دیر؛ قال، گئتمه! قونشوم دیسکینر...

#یعقوب_نیکزاد
@SheirOcagi

▫️منی بیر یوردو تالانمیش کیمی گؤر،
وارلیغین ظولم‌له دانمیش کیمی گؤر!

هله چوخ شعریم اؤپولمور؛ گؤزومو-
گوزگولر اوسته جالانمیش کیمی گؤر!

من قیزیل دیللی آلوولار کانی‌یام،
آغریلی سئوگی‌یه یانمیش کیمی گؤر!

من دییرمان داشی اولسام دا بو گون،
باشیما دونیا دولانمیش کیمی گؤر!

منده تاریخ دوغولوب دوغراناراق،
قارا قانلارلا بویانمیش کیمی گؤر!

سیرغایام‌سا سسینه اؤلکه‌میزین،
ساتقین اللرده اوسانمیش کیمی گؤر!

یاشاماق بوینوما دوشدوکجه، یئنه-
آلا گؤز عشقی قازانمیش کیمی گؤر!

گؤز باسیر دونیا منه؛ تئز اکیلم،
قارا یوللاردا دایانمیش کیمی گؤر!

وطنین چوخ دا سویوقدور قانی، آه!
ایچدیگیم آندا اینانمیش کیمی گؤر!

گودازا گئتدی گوجوم، گؤزگؤره‌کی،
منی بیر یوردو تالانمیش کیمی گؤر!...

#یعقوب_نیکزاد
@SheirOcagi

▫️یئنه همن داریخمادیر،
آغریسی توتور باشیمی.
لاپ‌ دا آجیغین چیخاریر،
ایت‌لره آتیر باشیمی.

یئنه همن آغری-آجی،
داریخماغین یوخ علاجی.
دهته‌له‌دیکجه، قیقاجی
آرزوما چاتیر باشیمی.

بو من، او گؤردوگون دئییل،
کؤلگه‌یه سردیگین دئییل،
دوستونا وئردیگین دئییل،
تورپاغا ساتیر باشیمی.

من -باشی‌داشلی-نی چکیر،
باشیمدا یئنه تورپ اکیر.
هله‌ کی، آللاها شوکور-
اؤلونجه قاتیر باشیمی...

#یعقوب_نیکزاد
@SheirOcagi

▫️بللی‌دیر اوره‌یین اوچوب بو یئردن
سن آللاه، گؤزومدن گئتمه گیلئی‌لی!
آغری‌دان، آجی‌دان اینجیسن بیردن-
سن آللاه، گؤزومدن گئتمه گیلئی‌لی!

گؤررسن آرزوموز حسرت‌له دولار،
دئییب-گولمه‌ییمیز غوربتی چالار.
سسیمیز سئوگی‌یه تامارزی قالار،
سن آللاه، گؤزومدن گئتمه گیلئی‌لی!

مین باهار گلسه‌ ده، یئنه گولمه‌رم،
بولاق خیالینی گؤزدن سیلمه‌رم.
بیلیرسن، بیر گیله دؤزه بیلمه‌رم،
سن آللاه، گؤزومدن گئتمه گیلئی‌لی!

کئچمیشی چیرپیرام ائشیگه جاندان،
بوی آتسین گولوشوم بلکه تیکاندان.
آرخایین کئچسن ده بو آند-آماندان،
سن آللاه، گؤزومدن گئتمه گیلئی‌لی!

سنه هؤوور سالیب دامیم، دوواریم؛
یالواریب، سیتقاییر تام دویغولاریم.
آخی بوندان شیرین نئجه یالواریم؟:
«سن آللاه، گؤزومدن گئتمه گیلئی‌لی!»

#یعقوب_نیکزاد
@SheirOcagi

▫️بو یئرین،
بیر یوللوق داشین آتیرام.
بورا، آدیمی دا دیله گتیرمیر.
اؤگئی‌له‌شیر دوغما گولوشلریمه،
قارانلیق تؤره‌دیر،
نیسگیل پایلاشیر،
اوز وئرمیر حسرتلی باخیشلاریما.
بوردا،
آغریم آغیرلاشیر،
یارام قات-قات آجیلاشیر،
بوی آتیر آینادا قارتیمیش‌لاریم.

هله واخت ائرته‌دیر،
هله ایشیق‌دیر،
دوروم تئز بیر یولو آلیم الیمه،
گئدیم آیدین بولاق قوناقلیغینا،
اوردا کئچینه‌رم،
اوردا قالارام.
اوردا ...
پئندیر-چؤرک تاپماغا نه وار؟!

#یعقوب_نیکزاد
@SheirOcagi

▫️اولمادیق.

اوجاق-اوجاق یانیب کئچدیک،
بیر دیلیم ایشیق اولمادیق.
داغلار آشیب دره کؤچدوک،
یاغیب یاراشیق اولمادیق.

قیزیشدیق قیش نفسینه،
ایناندیق یای کؤلگه‌سینه.
قوشلارین شیرین سسینه،
قوشولوب آشیق اولمادیق.

خاطیره‌لر قالدی یئرده،
سسلریمیز دوشدو درده.
ایپک دادلی نغمه‌لرده،
یاتیب دولاشیق اولمادیق.

امه‌ییمیز گئتدی بادا،
یئنه سیر وئرمه‌دیک یادا.
باشیمیزا کول یاغسا دا،
بیز کی بولاشیق اولمادیق...

#یعقوب_نیکزاد
@SheirOcagi

▫️گئجه‌لنمیش باخیشیندان گون امک‌لنمه‌ده‌دیر،
زیل قارانلیق ساچینا سئوگی هؤروک‌لنمه‌ده‌دیر.

بوینوما دوشدو آچیق قوللارینین حسرتی، آه!
گؤزلریم اودلو یاناقدان کپنک‌لنمه‌ده‌دیر.

قارا تورپاق‌لارا تاپشیرمالی‌یام سؤزلریمی،
آجی گونلرده قوجاقلاردا چیچک‌لنمه‌ده‌دیر.

آهلاریم‌دیر یئنه چرشنبه‌له‌شر‌کن سسینی،
یاشماق آلتیندا گولوشلرله بزک‌لنمه‌ده‌دیر.

سئوگییه آند اولا، قویدوم‌سا گیروو ایلقاریمی،
سنسیز اهنزله‌مک آرتدیقجا نزیک‌لنمه‌ده‌دیر.

سونبولوندن سو دامیر، یاز همی دورماقلا سنه،
نار گولوشلوم! اوره‌ییم سنله بؤلوک‌لنمه‌ده‌دیر...

#یعقوب_نیکزاد
@SheirOcagi

▫️اوجاق-اوجاق یانیب کئچدیک،
بیر دیلیم ایشیق اولمادیق.
داغلار آشیب دره کؤچدوک،
یاغیب یاراشیق اولمادیق.

قیزیشدیق قیش نفسینه،
ایناندیق یای کؤلگه‌سینه.
قوشلارین شیرین سسینه،
قوشولوب آشیق اولمادیق.

خاطیره‌لر قالدی یئرده،
سسلریمیز دوشدو درده.
ایپک دادلی نغمه‌لرده،
یاتیب دولاشیق اولمادیق.

امه‌ییمیز گئتدی بادا،
یئنه سیر وئرمه‌دیک یادا.
باشیمیزا کول یاغسا دا،
بیز کی بولاشیق اولمادیق...

#یعقوب_نیکزاد
@SheirOcagi

▫️اسارتده قالان اؤزگورلوک

بو منم،
بیر ده بو من.
کوپود اللرده دیدیلمیش،
و قالین نیفرته دؤنموش دلی داغ پارچاسییام.
یئنی قاسناقلی یارا،
یئددی مین ایل داشا سؤیکنمیش اینانج،
یئددی مین تاریخین آلنیندا گونش سیمگه‌لری،
یئددی مین‌لیک مدنیّت اوجاغی،
قایالیقلاردا قیلینجین داماغیندان سوووشان مین هئیکل،
و «شهَر یئر»‌لی اسارتده قالان اؤزگورلوک،
ساوالان قوینوندا.

توت الیمدن!
منی قورتار قارا قیشدان،
یاز قوناقلیقلارینا چک آدیمی!
من یاشیللیقلارا تای، بیرجه گولوش حسرتی‌یم.
گل سئوینج اک دوداغیمدا!
بابالاردان سیزه دستان گتیریم.
اونودولماز و اوغور کؤلگه‌لی بایراقلاردان،
یول چکیم کؤنلونوزه،
ایلک سئودالی ایزه...

  #یعقوب_نیکزاد
@SheirOcagi

▫️بالتالاردان آمان ایسته!
نارین اوره‌یی دوغرانیر.
اؤلکه‌میزین اوسته-اوسته،
گؤزل‌لیگی اوغورلانیر.

بوردا قاناد آچان کؤچور،
دونیایا اینسان یوکوموش.
هامی بیر-بیریندن قاچیر،
بوردا آللاه دا تکیمیش.

هر گون آغیرلاشیر یاشام،
کیمین داشیندان آسلانیر؟
نه پیس گونه قالیب آدام،
گؤز گؤره‌کی آدین دانیر!

بوردا هر شئی ایچین یئییر،
چوخ اوستونو وورما، اوغول!
یئتن «منم-منم» دئییر،
سن اؤزونو یورما، اوغول!...

#یعقوب_نیکزاد
@SheirOcagi

‍ ▫️بو نه واختین یوخوسودو-
گؤزلریمده یووالانیر؟
بو نه آجی قوجالیقدی-
دیزلریمده یووالانیر؟

ائلین قاداغان قلمی،
دیلیمیزین کسری، کمی،
گله‌جه‌یین دردی، غمی،
سؤزلریمده یووالانیر.

یولا سالدیم عؤمرو هئچه،
آغریلاری ایچه-ایچه.
بو شهَر لاپ کوچه-کوچه،
ایزلریمده یووالانیر...

#یعقوب_نیکزاد
@SheirOcagi

▫️یئنی سئوگینه باغیشلا! بو گونو کاریخمیشام‌سا،
بئله‌لیکله کلمه‌-کلمه سؤزون اوسته چیخمیشام‌سا.

گولوشوندن اینجیمیشدیم، یوخومو تیکانلی گؤردوم،
باش آلیب باهار آدی‌یلا ایزینی بوراخمیشام‌سا.

قارا یوللو درده دوشدوم، یاشامین دادین قاچیرتدیم،
قاییدیب آرینماق ایستر بئله‌سی کیریخمیشام‌سا.

اوره‌ییمده دوزگون ایستک سنه باغلامیشدیم آرتیق،
گوناهی گؤزومده گؤردوم یئنه اَیری باخمیشام‌سا.

سوواشیب یاوان دیلک‌لر یاخامی سؤکور آمانسیز،
گؤزون اولسون آغریم اوسته، بئله‌سی یولوخموشام‌سا!

دورو فلسفه گؤزوندن توتولوب دانیلماز اولموش،
قارا گونلو کؤلگه‌لرده بو قدر دونوخموشام‌سا.

من اؤلوم، دالیمجا باخما! یاخالا نه نیسگیلین وار!
گئجه‌لر یاغیب کوچه‌ندن سئل اولوب هئی آخمیشام‌سا.

سینه‌م اوسته سینسیدین‌سه، سؤزونه سینیشمیشم‌سه،
سسینه سینانمیشام‌سا، سازینا سینیخمیشام‌سا.

اؤتن آغریمی یازیردیم، دلی قان داریخدیغیم تک،
یئنی سئوگینه باغیشلا! بو گونو کاریخمیشام‌سا...

#یعقوب_نیکزاد
@SheirOcagi

▫️دوروم بو شهرین هاراسین گزیم؟
اویاق کوچه‌لری سولَنمیشم ده.
او گوندن اؤزومو آلمیشام اله-
نه قاپی-باجا وار دیلَنمیشم ده.

ائله للـه گیریان آختاریرام کی،
بوغولموش خاطیره قارشیما چیخیر.
ائله باختیم اولوب اۆزۆ کؤلگه‌لی،
سنسیزلیک قورخوسو جانیمی سیخیر.

یئر-گؤیو گزمک‌له اوره‌ییم قیزمیر،
داشین آلتینی دا گؤزدن قویمورام.
سنسیز بیر شهَر یوخ، مین شهَر اولا،
بیر ائوجیک بیلمیرم، تانیش سایمیرام.

دیل اولوب دیل‌له‌نیب منه دام-دووار،
کیمسه سوراغینی وئرن اولماییب.
بیر سۆرۆ جماعات دۆشۆب بازارا،
قورو کؤلگه‌نی ده گؤرن اولماییب.

بوتون اوتانماغی قویوب قیراغا،
دیلی سؤز توتانا آغیز آچمیشام.
باغلانیب اوزومه قاپی‌لار، یئنه،
بیر اؤگئی سسه‌ ده چؤله قاچمیشام.

منله ایکی کلمه کسمه‌دین کی سن،
هارانین داشینی باشیما سالیم؟!
جانینی گؤتوروب چیخدین آرادان،
من هانسی بوجاقدا قیسیلی قالیم؟

گؤزلرین هایاندا ایچدی قارانلیق؟
شهر بیر-بیرینین جانینا دوشدو.
شیرین یوخوما دا گله بیلمه‌دین،
دَییشدی آلنیمدا یازی، دَییشدی.

یاندیم یامان کؤکده پاییز اودونا،
یئنیدن قول آچیب یارپاقلامایام.
«تووبا!» کله‌یینی قوردوم کی، بیر ده،
قوندارما سئوگی‌یه بئل باغلامایام...

#یعقوب_نیکزاد
@SheirOcagi

▫️قالدیق، شوکورلر آللاها، قالدیق اؤلوم-ظولوم،
آلدیق تیکاندان اینتقام، آلدیق اؤلوم-ظولوم.

چوخ سؤزلرین‌ ده اوستونو بیز وورمادیق نه‌سه،
حسرت گیزیلتیسین یولا سالدیق اؤلوم-ظولوم.

یونگول آییلمادیق یوخودان، چیرتلادی گونش،
آنلاق یاساقلیغین داشا چالدیق اؤلوم-ظولوم.

داغلار دومانلی گؤزله‌یه‌سی اولدو سئوگینی،
چؤندوک نامازلا ترسینه قیلدیق اؤلوم-ظولوم.

اوجقاردا ایتدی آد-سانیمیز، هئچ چکینمه‌دن،
باش-گؤز آغاردی، ائرته قوجالدیق اؤلوم-ظولوم.

دؤزدوک یاشامدا گؤز داغینا ایستر-ایسته‌مز،
فال چؤندو بلکه بیر ده اوجالدیق اؤلوم-ظولوم.

چیرپیلمیشیق‌سا داغ-دره‌یه مین بولاق کیمی،
قان‌یاشلارین ایچینده دورولدوق اؤلوم-ظولوم.

#یعقوب_نیکزاد
@SheirOcagi

▫️آغلادیق

هاوا اؤگئی‌لشدی دوغما باخیشلا،
تورپاغا آغلادیق، داشا آغلادیق.
یئتمه‌دی هاییمیز بیر یئره، داغلا-
باش-باشا وئرَرکن، قوشا آغلادیق.

ایلیگه کئچسه ده آه، کئچینمه‌دی،
آینالار مات قالدی، کیمسه دینمه‌دی.
ایندی کی آزادلیق جانا سینمه‌دی،
چیرپینان قفسه، قوشا آغلادیق.

اوچور اینانجلار، عؤمور-گون گئدیر،
شله‌سین باغلاییب ایمان-دین گئدیر.
گؤروب گولراوزلو یاز سورگون گئدیر-
دایانیب پاییزا-قیشا آغلادیق.

یوخدو اوزو یولا داها بیز کیمی،
گؤینه‌دی سسیمیز یارامیز کیمی.
دؤیدوک دیزیمیزه بیر لال قیز کیمی،
اوتوردوق، بیر دیلسیز باشا آغلادیق...

#یعقوب_نیکزاد
@SheirOcagi

▫️شکیل چکدی گولوشوندن،
گؤزلریم یول چکه-چکه.
آپاردیم شیرین یوخویا،
کئچن گونو تؤکه-تؤکه.

قالمادیم گؤزو کؤلگه‌لی،
تئلیم اونلا دنه دولدو.
اوسته‌لیک بیر نئچه دفعه،
یاوان باخیش بورجوم اولدو.

اووچو گیردی اوره‌یینه،
آراییب یوخلادی اونو.
چکینمه‌دی ایسته‌ییندن،
سوزدو قوزو قوروغونو.

سسی چالدی قارانلیغا،
دردینی بوغا بیلمه‌دی.
منده قالدی ایزی، توزو،
اوزومه گؤزو گولمه‌دی...

عؤمروموزه عاییب اولسون!
بیر آددیملیق هاماری یوخ.
کلمه‌لر قالیب آسیلی،
سؤزوموزون توتاری یوخ.

#یعقوب_نیکزاد
@SheirOcagi

▫️من تئللرین اوستونده آغیر قیش یئری گؤردوم،
سولموش گؤروشونده یئنی قارغیش یئری گؤردوم.

چوخ خینجیلیب آرزوم، دیدیلیب قانلی گونئیده،
ماهنیمدا، سسیمده آجی مین دیش یئری گؤردوم.

سئوگیمده تیکان رمکه‌لنیب، گؤیدن آسیلمیش،
شعریمده یارام‌دیر آغیز آچمیش یئری گؤردوم.

کؤنلومده «گونش» اوخشاییرام‌سا سنی گیزلین،
چیسگین باخیش آلتیندا قارانقوش یئری گؤردوم.

قالماق یئری یوخ، گل لاچینا سن ده قوشول، اوچ!
بو دام-دوواری مۆرگولو بایقوش یئری گؤردوم.

شیطان دونو گئیمیشدی‌سه لعنت قوجاغیندا،
منله یاناشان عشقینه آلقیش یئری گؤردوم.

#یعقوب_نیکزاد
@SheirOcagi

▫️بو یولدا آرخایین‌ ایدیم، جان آتماسایدیم‌ دا.
دیلیم دولوردو سسه، قان یالاتماسایدیم‌ دا.

ها گؤزله‌دیم داریخام گلمه‌یه، آچیق گؤردوم
درین‌له‌شیب یارامیز، آغری قاتماسایدیم‌ دا.

دیدرگین ایسته‌یه سئوگی دادیزدیران آزدیر،
سئویب، سئویلمه‌یه قووخا یاراتماسایدیم‌ دا.

هله بیر آز کئچینردیم جانی سولو، یالنیز
قازاندیغیم دلی‌خای عؤمرو ساتماسایدیم‌ دا.

شیرین خیال‌لا گومان کؤنلونو آلاردیم تئز،
ایلان ووران کیمی بیر داملا یاتماسایدیم‌ دا.

اونو تاپاردی گؤزللیک‌لرین دوغان گونشی،
بورا یئتن یولو هر گون اویاتماسایدیم‌ دا

قالارغی دویغوم اولاردی یاشیللیغا باغلی،
تیکان‌لی آنلاری بیر-بیر اونوتماسایدیم‌ دا.

سؤزومده دیل هوَسی بویلاناردی داغلاردان،
قانادلی رؤیالاریمدا یاشاتماسایدیم‌ دا.

#یعقوب_نیکزاد
@SheirOcagi