▫️سنی سئومه‌مک

سنی سئومه‌‏مک اوچون،
اؤلوم گرکدیر؛
تورپاقلارا دؤنمک،
یئلده سوورولماق،
اودلار قوینوندا یانماق،
کول اولماق گرکدیر.

آمّا من اؤلسم ده،
تورپاقلارا دؤنسم ده،
یئلده سوورولسام دا،
اودلار قوینوندا یانسام دا،
کول اولسام دا،
توْرپاقلاریمدان چیخان گول، سنین قوخونو وئره‌‏جک
آتشیم سنی سسله‌‏یه‌جک
و کولوم سنی-
تکجه سنی آختاراجاق، گولوم!

سنی سئومه‌‏مک اوچون،
بو دونیادان کؤچمک گرکدیر؛
وار اولماقدان کئچمک،
گئدیب گلمه‌‏مک،
یوخ اولماق گرکدیر.

آمّا من بو دونیادان کؤچسم ده،
وار اولماقدان کئچسم ده،
گئدیب گلمه‌‏سم ده،
یوخ اولسام دا،
سنی سئوه‏‌جه‌یم؛
سنی آختاراجاغام.
یوخلوقداکی ووجودوم، سنی-
تکجه سنی آختاراجاق، گولوم!

سنی سئومه‌‏مک اوچون
هئچ بیر یول تانیمیرام...

#یاسر_فاتحی
@SheirOcagi

▫️یانیرام، اوستومدن کؤزو گؤتورون،
یارامین اوستوندن دوزو گؤتورون!

بو داغلی اوره‌یه سو سپین، داغلار!
بو یانغین دوداغی سوسوزلوق داغلار.
آغلاردیر گؤزلریم، چاتلاق دوداقلار،
یانیرام، اوستومدن کؤزو گؤتورون،
یارامین اوستوندن دوزو گؤتورون!

«آسلان‌»دیم؛ آسلاندیم، چکیلدیم دارا،
آخاردیم، ییخیلدیم من دورا-دورا.
دئدیلر: اؤلورسن، آی بختی قارا!
دئدیلر: «ایللردن یازی گؤتورون!»
یارامین اوستوندن دوزو گؤتورون!

من گئتسم، بو ائله خزان دؤنه‌جک،
ائللره شوم دستان یازان دؤنه‌جک،
بو ائلدن، اوبادان اوْزان دؤنه‌جک،
سؤزلرین ایچیندن سؤزو گؤتورون،
یارامین اوستوندن دوزو گؤتورون!

#یاسر_فاتحی
@SheirOcagi

▫️تاریخین ان شیرین، دوزلو اومودو

عصیرلر بوْیونون حیاتی بو گۆن،
توْرپاغین اۆستونده دوزلو یارادیر.
اوْ بو گۆن اؤز آجی طالعی تکین،
شنلیگی آپاریر، غمی یارادیر.

تاریخین ان شیرین، دوزلو اومودو-
بس نئجه تاریخده قوروسون ایندی؟!
اوْ بیزی عصیرلر بوْیو قوْرودو،
کیم اوْنو بو درددن قوْروسون ایندی؟

اورمودان سس گلیر، قاپینی آچین!
قولاغا دَییر بیر غریب گؤل اۆنو:
«اؤزوزو تاریخده ساخلاماق اۆچون
ساخلایین، ساخلایین اورمو گؤلونو!».

#یاسر_فاتحی
#Save_Urmu_Lake

@abcmedrese
@SheirOcagi

▫️بیلمم نئجه ذلّت یئر آلیب ملّت ایچینده،
ملّت نئجه بس یاتدی بئله ذلّت ایچینده.

بیر عدّه جهنّم تؤرَدیر لعنته گلمیش،
بیر عدّه ایسه جان چۆرودور لعنت ایچینده.

باخ گؤر نئجه حئیوانلیق ائدیر ییرتیجی انسان!
حئیوان باخیر انسانا، قالیر حئیرت ایچینده.

بیر عدّه یئتیم مالینا بۆکموش اؤزون اؤیله،
ات یاغدا ایتیبدیر، یاغ ایتیبدیر ات ایچینده.

بیر عدّه اؤپوب غئیرتی بیر یانا قوْیوبدور،
بیر عدّه شیشیر گۆنده یالان غئیرت ایچینده.

دۆزدور کی، اسارتده یوْخ هئچ انسانا راحت،
امّا قان اوْلور، یوْخ چؤرک حۆرّیّت ایچینده.

شاعر سیغا بیلمیر بو جهاندا، نئجه سیغسین؟
بیر باشقا جهانداندی، قالیب غۆربت ایچینده.

شاعر، سسینی کس، باشینی گؤزله، دانیشما!
دالدان دلی بیر اوْغرو گلیر حؤرمت ایچینده.

#یاسر_فاتحی
@abcmedrese
@SheirOcagi

▫️...سئوَن البته اؤزون سئومه‌لی‌دیر ایلک اؤنجه،
یاد دیلینده دانیشان سئومیر اؤزون هئچ- منجه.

سن کی تۆرک اوْغلوسان اوّلجه دانیش اؤز دیلینی،
اؤنجه سئو اؤز آتانی، اؤز آنانی، اؤز ائلینی!

یادلارین «کؤهنه چیراغینداکی یاغ»سان، آ داداش!
نه اوْلار، اؤز ائلینه بیر پارا یاغسان، آ داداش؟!

#یاسر_فاتحی 
@SheirOcagi

▫️منم

«قوْرقود»ون سازینی دئمه توْز باسیب!
سازی دا اؤزومم؛ توْزو دا منم.
«دۆمرول»و ایزله‌دیم من دیار-دیار،
گؤرورم دۆمرولون اؤزو ده منم.

«کوْراوْغلو» دالی‌یجا گزدیم، دوْلاندیم،
تاپمادیم؛ غم‌لرین ایچینده یاندیم.
بو غمین ایچینده بیر ده یاراندیم،
«چنلی‌بئل»ده اوْنون ایزی ده منم.

بو یوردون باهاری هاردا ایتیبدیر؟
بلکه‌ ده پاییزین آلتدا یاتیبدیر.
یوْخ؛ دئمه! اۆرگیم گوپ-گوپ آتیبدیر،
قیشی دا اؤزومم، یازی دا منم.

گؤز یاشی تؤکمرم «اورمو گؤلو»نه،
گؤزومو تیکمرم اؤزگه الینه.
دؤنرم اورمونون داشقین سئلینه،
گؤلو ده اؤزومم، دوزو دا منم.

هئچ زامان اؤلمه‌ین «آراز»ام بو گۆن،
دۆشمنی گۆلمه‌ین آرازام بو گۆن،
وطنی بؤلمه‌ین آرازام بو گۆن،
لیل'ی ده اؤزومم، اۆزو ده منم.

مرد اوْغلو چؤرگی، دوزو ایتیرمز،
وطنی نامرده وئریب اؤتورمز.
بو یوردون ان ایگید، ظۆلمو گؤتورمز-
«بابک»ی اؤزومم، «بَز»ی ده منم.

وطندن پای اوْلماز، بیر قاریش اوْلسون.
قوْیمارام بیرجه گۆل وطنده سوْلسون.
وطنیم آنام‌دیر، بیر وطن قالسین،
اوْغلو دا اؤزومم، قیزی دا منم.

#یاسر_فاتحی
@abcmedrese
@SheirOcagi