▫️من ظالیم آدامام، کامانچا!

قارداشیم آغاجلار، باجیم چیچکلر!
بیر ده سؤز توتدو سیزی
سؤز توتدو، سئودا قوروتدو،
اوز توتوب یویورمه‌یین منه ساری،
باغلانیب گؤزومون
یاش قاپاقلاری.

دونیانین بلا قاپیلاری
قالا قاپیلاری، داش قاپیلاری،
یئتیم قاپیلاری، بوش قاپیلاری،
باغلانیب کؤنلومه، باغلانیب
باغلانیب گؤزومون یاش قاپاقلاری
من سؤز بلاسی‌یام،
ظالیم طیفیلی.

سوروشوب آلنیمدان تانرینین الی
داها سن ده،
سن ده آغلادانمازسان منی
من ظالیم آدامام، کامانچا...!

#واقیف_بایاتلی_اودر
#شعر_اوجاغی
@SheirOcagi

▫️اؤلومدن سونرا باشلار شاعیر عؤمرو

نولدو بیردن‌-بیره، «میخاییل یوری‌یه‌ویچ»!
ایندیجه گولوردونوز؟!
ایندی قبیر توفنگ لوله‌سی تک دار،
ائله بیلیردینیز هامینین آللاهی وار؟

دیز چؤکون، جناب «مارتینوو»! دیز چؤکون!
فله‌یین ظولمو چوخ، آللاهین مرحمتی.
دیز چؤکون! بیر شاعیر ده سؤندو-
سئودالار یاشیلی، اوجاق کؤسؤیو،
اوستونده آللاهی، اوستونده گؤیو.
گؤزلر حدقه‌ده، اؤلوم سینه‌ده،
آلین یازیسینا، قارا گونه ده،
بازاردا سوغانین قیمتینه ده،
بیر بهانه گرک، بیر باعیث گرک،
گوللـه‌له‌یین شاعیرلری، سونرا دیز چؤکون!

کیمین گوناهی وار، کیمین آهی وار،
دونیانین نه قدر پیس صاباحی وار،
هامیسینا، هامیسینا شاعیرلر باعیث.
گوللـه‌له‌یین شاعیرلری، سونرا دیز چؤکون!

گوللـه‌له‌یین قولاقلاری، اوخشامایان تزه سؤزو!
گوللـه‌له‌یین دامارلارا سیغمایان تزه قانی!
گوللـه‌له‌یین لیریکانی، «لورکا»نی، «نئرودا»نی!
گوللـه‌له‌ییب، گوللـه‌لنمک عصری‌دی،
گوللـه‌له‌ییب، گوللـه‌لنین!

قبریستانلیقلار اؤلویه حسرت،
دلی‌خانالار دلی‌یه حسرت،
گوللـه‌له‌یین شاعیرلری!

«کوراوغلو» زنجیرده، «قیرات»ی داردا،
دللک‌لر گزیرلر «کارئتا»لاردا.
ایندی آغلایانلار گوله‌جک گوردا،
گوردا آغلایانلار گوله‌جک هاردا؟
گوللـه‌له‌یین شاعیرلری! اونسوز دا،
شاعیرلر اؤلورلر یاز یاغیشیندان،
آرواد قارغیشیندان، قیز باخیشیندان،
دونیانین تله‌سیک ییر-ییغیشیندان،
گوناهلی، گوناهسیز شاعیرلر اؤلور.

گوللـه‌له‌یین شاعیرلری!
آنجاق تؤوبه‌ گئجه‌سی اَینینده سویخا،
قورخا-قورخا،
«پوشکین»ین یاراسینی اؤپمه‌یه یویورسون «دانتئس»،
بیر کیلسه قاپیسیندا سحره‌جن
بؤیورسون «دانتئس»
بیر ده یول وئرین، جناب «مارتینوو»ا
ییخیلان «لئرمونتوو»و قوجاقلاماغا...!

#واقیف_بایاتلی_اودر
کؤچورن:
#ج_محمدنژاد
@SheirOcagi

▫️هئچ کیمین پاخیللیغینی چکمک ایسته‌میرسن‌سه،
دورما، دورما!
هر گون عاغلین‌لا عاغلینی،
گئتدییین یولونلا یولونو اؤت!
اؤتمه‌سن، دویاجاقسان هر آن:
تک بو دونیادان یوخ،
هر ایکی دونیادان دا دالداسان...

📚 بی آتلی شعرلر
#واقیف_بایاتلی_اودر
#شعر_اوجاغی
@SheirOcagi

▫️سنی نییه بئله سئودیم؟
بئله ایسته‌دیم، نییه؟
جانیمداکی مین تیکانا،
بیر گوله ایسته‌دیم، نییه؟

عشقده گیزلَتدیم بو جانی،
گؤرَنمه‌ین وارمی، هانی؟
هم گیزلتدیم، هم ده هامی-.
بیله ایسته‌دیم، نییه؟

مین ایللرچون ده آللاهدان،
گئجه-گوندوز، هر آن، هر آن،
سنی اؤزومه هم سولطان،
هم ده،
هم ده...
کؤله ایسته‌دیم، نییه؟

#واقیف_بایاتلی_اودر
#شعر_اوجاغی
@SheirOcagi

▫️بیر گؤز یاشیندا آزمیشام،
اوزله آخیرام آشاغی،
آنجاق اوزو تانیمیرام.
بو گؤز یاشی مندن آخیر؟
من بو گؤزو تانیمیرام.

#واقیف_بایاتلی_اودر
#شعر_اوجاغی
@SheirOcagi

▫️مین ایلدی، میلیون ایلدی،
گؤیلرده آیاق‌یالین،
سنه ساری قاچیرام،
آیاقلاریم سئوینیر،
یولوم سئوینیر، آللاه!
هر گون سنین گؤیونه،
میسمارلانیر قوللاریم.
میسمارلانیر، دینجه‌لیر،
قولوم سئوینیر، آللاه!

سئوگین... آنجاق سئوگین وار،
بوتون کائینات بویو،
قانریلان*، قانی دامان،
قوللاریمین گؤزونده.
بس نه‌دن عذاب گزیر،
قولومو دلیب کئچن،
میسمارلارین اوزونده؟

مین آغری‌یلا، عذابلا،
نئجه قیوریلیر اونلار!
هئچ آغری یوخدو منه،
قوش کیمی‌یم ایلاهی!
یئنه اوچورام سنه.
قولومداکی میسمارلار،
یالواریرلار آغریدان،
یالواریرلار عذابدان.
خیلاص ائله اونلاری،
خیلاص ائله، ایلاهی!

خیلاص ائله عذابدان،
بوینومداکی کندیری!
آلتیندا دایاندیغیم،
بو دار آغاجینی دا،
خیلاص ائله، ایلاهی!

هر آن بو گؤی‌اوزونه،
هم ده سنه توشلانان،
یئنیدن دؤنه-دؤنه،
مندن کئچن گوللـه‌نی،
آغریلاردان، عذابدان،
خیلاص ائله، ایلاهی!

شوکور، ایلاهی، شوکور!
مین ایلدی، میلیون ایلدی،
باغلاییب یوللاریمی،
بیر-بیرینین اوجونا،
گلیب چاتدیم آخیری،
سنین دار آغاجینا.
کندیرین دارتیلدیقجا،
بوینوم دینجه‌لیر، آللاه!
بوینوم دینجه‌لن گؤروب،
تئز وورورلار بوینومو،
چیینیم دینجه‌لیر، آللاه!

شوکور، شوکور، چوخ شوکور،
سن یئنه گؤی‌اوزوندن،
یئره ائنیرسن، ایلاهی!
دونیا گؤزومده سؤندوکجه،
سن گؤرونورسن، ایلاهی!...

#واقیف_بایاتلی_اودر

*دؤنمک - اوزونو چئویرمک (Qanrılmaq)

#شعر_اوجاغی
@SheirOcagi

▫️اؤلسم، بیر ده مین ایل سونرا دیریلسم،
دونیادا هر شئیین سونونو بیلسم!

بیر چؤلون دوزونده بیر قارا کول‌لا،
غفلتاً تاپیشیب قالسام باش-باشا!
باش-باشا قالدیغیم او قارا کول دا،
کوللوغوندان چیخیب، دؤنسه قارداشا!

نه دئسم، نه سورسام، جاواب یئرینه-
تیکانلی اوزونو سورتسه اوزومه!
هر تیکان اوجوندان، تیکان جانیندان،
بیر داملا گؤز یاشی آخسا گؤزومه!

بیر دنیز ده گلسه، اوزونده گمی،
هئی سورتسم اوزومو دیوارلارینا!
اوزانیب قوللاریم، بیتیب قوللاریم،
دؤنسه او گمینین آوارلارینا!

سولار قوللاریمی یودوقجا یوسا،
ساچلاریم یوسون‌تک آخدیقجا آخسا!
بیر جوت ملَک کیمی، بیر جوت آی کیمی،
بیر قیزلا بیر اوغلان بولوددان چیخسا!

اؤلسم، بیر ده مین ایل سونرا دیریلسم،
دونیادا هر شئیین سونونو بیلسم!...

#واقیف_بایاتلی_اودر
#شعر_اوجاغی
@SheirOcagi

▫️سینیقلار

گؤی اوزونده قاچا-قاچا،
هارا گئدیر بو اوشاق؟!
بو اوشاق هامیدان قوجا،
خبری یوخ، قاچدیقجا،
سینیر گؤیو، سینیر یولو،
خبری یوخ.
اوره‌یی سینیق سئوگی‌یله،
اووجو سینیق گؤیله دولو.
توخونورام سینیقلارا،
سینیقلار قوشلارا دؤنور،
اوره‌ییم بیر اوووج دنه.
قوشلار اوره‌ییمه قونور،
اوره‌ییمی دنله‌مه‌یه...

#واقیف_بایاتلی_اودر
#شعر_اوجاغی
@SheirOcagi