▫️یامان توتولوب!

بو داغ باشیندا نه وار بیلمیرم، یامان توتولوب!
بو داغ باشیندا یئنه بیر تالا دومان توتولوب.

نه یازدی؟! قولتوغونا گیرمه‌سم آشیر... قیناما!
چینار-چینار بالاسی هارداسا گومان توتولوب.

باهار توتولدو، اونون اللرینده بیر سله گول
پاییز دا... اوندان آخی بیر سبد سامان توتولوب.

یامان یاغیشلی‌دی بو باش ساری تئلین هاواسی
آه اولما ساز توتولوب، اولمایا کامان توتولوب!

بولاق باشیندا یئنه دیزلرین قوجاقلاییب، آه!
بو داغ باشیندا نه وار بیلمیرم، یامان توتولوب...!

#نادر_الهی
@SheirOcagi

▫️یاغیش یاغدی هئچ قویمادی،
گوز آچیب گؤرَم یوخومو.
ایسلاندی، اوشودو؛ گرک-
گونئی‌یه سرَم یوخومو.

سنسیزلیک سلقه‌می قاتیب،
یوخوم زیر-زیبیله باتیب.
گلسن گرک بیرده یاتیب-
سیلَم-سوپورم یوخومو...

#نادر_الهی
@SheirOcagi

▫️بعضن آغلاماق دا اولمور،
گولور، درددن گولور آدام.
سؤکولور-تؤکولور، آمّا،
ایچری تؤکولور آدام.

اولور بیر یییه‌سیز یییه،
«گؤزوم-گیله‌م!» دئیه-دئیه،
گؤزدن دوشور، دئمیر «نییه؟»
بیلدییینی بیلیر آدام.

چوخ سوسومور، چوخ آجیخمیر.
«اؤلوم» سؤزو جانین سیخمیر.
آدام اؤلوب یاددان چیخمیر،
یاددان چیخیر، اؤلور آدام...

#نادر_الهی
@SheirOcagi

‍ ▫️داغدان گلیر، باشیندا-
بولود لچه‌یی گلیر.
باغدان گلیر، دؤشونده-
گونش چیچه‌یی گلیر.

گؤزونده بولاق کیمی،
بولاق اوتو یوخوسو.
گؤیلونده کهلیک کیمی،
کهلیک اوتو قوخوسو.

باخمیر زمی بیچیلیب،
باخمیر بوستان اورلانیب.
نئچه‌-نئچه شاعیرین،
گؤزوندن اوغورلانیب-

گلیر یوخودان یونگول،
گلیر رؤیادان اینجه.
قورویوب قورتاریرام،
او بو یولو گلینجه.

قاباغینا قویماغا،
چاییم یوخ، چؤره‌ییم یوخ.
اوره‌ییمه باخیر او،
منیم کی اوره‌ییم یوخ.

اوره‌ییم یوخدورسا، بس-
اونون باخدیغی نه‌دیر؟
دئییب اورک‌له‌نیرم،
بس اوره‌ییم کیمده‌دی؟

باخمیر جولاز اَینیمه،
باخمیر قولای حالیما.
قونور ساغ-سول چیینیمه،
یعنی ساغ‌-سول قولوما.

هوسدن، هیجاندان،
قورو جانیم داشلانیر.
ایکی قول، ایکی میصراع،
یعنی شعر باشلانیر.

غم چکمه، درد ائله‌مه،
آی منیم آغاج آنام!
من قوشلار شاعیری‌یم،
کیم دئییر قوش قووانام...؟

سس و شعر:
#نادر_الهی
@SheirOcagi

▫️دارتدیلار
قولاغینی،
بورنونو.
یئریندن قوپارتدیلار
کسدیلر
اته‌یینی،
الینی،
دوداغینی، دیلینی،
بیر آزجا دا ائنینی،
بیر آزجا دا بویونو آلچاتدیلار،
بیر آزجا دا سسینی...

بئله‌سینی قایتاردیلار اوستونه...

یازیق شاعیر
ها باخدی،
تانیمادی اؤز دوغما نغمه‌سینی...

#نادر_الهی
@SheirOcagi

▫️بعضن آغلاماق دا اولمور،
گولور، درددن گولور آدام.
سؤکولور-تؤکولور، آمّا،
ایچری تؤکولور آدام.

اولور بیر یییه‌سیز یییه،
«گؤزوم-گیله‌م!» دئیه-دئیه،
گؤزدن دوشور، دئمیر «نییه؟»
بیلدییینی بیلیر آدام.

چوخ سوسومور، چوخ آجیخمیر.
«اؤلوم» سؤزو جانین سیخمیر.
آدام اؤلوب یاددان چیخمیر،
یاددان چیخیر، اؤلور آدام...

#نادر_الهی
#شعر_اوجاغی
@SheirOcagi

سن آللاه، یوخوما قاییت ...
شعر و سس:#استاد_نادر_الهی
حاضیرلایان : کبری میرحسینی
@naderelahi

▫️سن آللاه یوخوما قاییت!

من سنی یوخودا گؤردوم،
دوم آغ، دادلی-دوزلو قاردین.
بیر تیکه لچک‌لی بولود،
بیر دون چیچکلی باهاردین.

قاردین، آمّا قانی ایستی،
قاردین، آمّا سویو شیرین.
یاغانمازدین یوخوسونا،
یوخسا بو‌ دلی شاعیرین.

یوخومون هاراسینداسا،
قوشلار سس-سسه وئرمیشدی.
بیر بولاق دا سنه باخیب،
آخیب یوخوما گیرمیشدی.

منیم او شیرین رؤیامدا،
سن هله ده اوتانجاقدین.
آخی من یوخو گؤروردوم،
آمّا سن اوردا اویاقدین.

الینی الیمه آلدیم،
اوتاندی الین، اریدی.
بیردن من سنی ایتیردیم،
بیردن قوشلار دا کیریدی.

اویاندیم؛ منی اویادان،
بلکه قوردوغوم ساعاتدی.
سن آللاه یوخوما قاییت!
اللریم چوخ ناراحاتدی...‌

#نادر_الهی
#شعر_اوجاغی
@SheirOcagi

▫️کوچه

سن گلدین، من کوچه اولدوم،
کوچه-کوچه سئودیم سنی.
سن مندن آی عؤمروم-گونوم!،
کئچه-کئچه سئودیم سنی.

آغلامیرام ایچین-ایچین،
یاغیشلی کوچه‌یم، کئچین!
سنین مندن گلین کؤچون-
کؤچه-کؤچه سئودیم سنی.

آی تورشا شیرین چییه‌لک!
آی شیطان...! یوخ، شیطان ملک!
آی جانیمدا اسن کولک!
هئچه-هئچه سئودیم سنی...

#نادر_الهی
@SheirOcagi

▫️بو گون‌لر ده کئچدی بلکه...


موسیقی- آرانژمان: #توحید_نوروزی
اوخویور: #گول‌یاز_محمداووا
سؤز: #نادر_الهی
@SheirOcagi

▫️دلی‌لر چیخدی گئتدی،
بو دلی‌خانا قالدی.
بو خارابا ائو-ائشیک،
خاطایا-قانا قالدی.

یورد قارا یاتاق اولدو،
درد اوتاق-اوتاق اولدو‌.
سؤندو ایگید چیراقلار،
ائو یانا-یانا قالدی.

اوخودولار اذانی،
آسدیلار یاس قازانی.
قازانج اولو یووانا-
قبیرقازانا قالدی.

سوپورگه گؤتوردولر،
هر شئیی سوپوردولر.
بیر سویوق مزار داشی،
بیر دلی آنا قالدی.

سازلاری آسدیردیلار،
قوشلاری سوسدوردولار‌
بوندان بئله بیزیمکی،
کور ایت اوچانا قالدی...

#نادر_الهی
#شعر_اوجاغی
@SheirOcagi

▫️دئدی: قاییت اوشاق اول،
قاییت، بیر ده «تات» ائله!
سونرا بیر آزجا بؤیو،
بیر آغاجی آت ائله!

قوی لاپ باش دا آپارسین!
مینیب آغاج آتینی،
ائله چاپ، تای-توشونون-
آل گؤزونون اوتونو!

قاییتدیم، آمّا گؤردوم،
حیات، او حیات اولمور.
من او اوشاق اولورام،
بو آغاج، او آت اولمور...

#نادر_الهی
#شعر_اوجاغی
@SheirOcagi

▫️یاز قدرینی بیلمه‌دیم، یازیمدان اولدوم،
بیر دسته چیچک کیمی نازیمدان اولدوم.

«چوخ»دان ساری، چوخ جان آتیب اَللشدیم من،
آمّا چوخا چاتماییب «آز»یمدان اولدوم...

#نادر_الهی
@SheirOcagi

▫️یاغیش یاغدی، هئچ قویمادی-
گؤز آچیب گؤرم یوخومو.
ایسلاندی، اوشودو؛ گرک-
گونئیه سرَم یوخومو.

سنسیزلیک سلقه‌می قاتیب،
یوخوم زیر-زیبیلده باتیب.
گلسن، گرک بیر ده یاتیب-
سیلَم، سوپورم یوخومو.

#نادر_الهی
#شعر_اوجاغی
@SheirOcagi

‍ ▫️اؤز دیلیمده اؤلورم.

بو دا منیم سون نفسیم،
ائله بیل داغ آشیرام.
سون بورجوم‌دو، بو دونیایا
وئریب حالال‌لاشیرام.

یانیندا منه یئر ساخلا!
گلیرم، گؤزله آنا!
تورپاق قوجاغینا قوربان!
قوجاغینی آچسانا!

بلکه ده من بو دونیانین،
سینه‌سینده‌کی داغ ایدیم.
چیراق ایتیرن یولچو یوخ،
یول ایتیرن چیراق ایدیم.

یورولدوم داها، یورولدوم؛
اوره‌ییمدن وورولدوم.
گؤز یاشیم قانا قاریشدی،
من ده بئله دورولدوم.

بو دا منیم سون نفسیم،
آنا، گؤزله، گلیرم.
اؤز دیلیمده یاشامادیم،
اؤز دیلیمده اؤلورم.

شعر و سس:
#نادر_الهی
#شعر_اوجاغی
@SheirOcagi

▫️«مملکت قانونسوز دئییل»
دئدیلر، تلَسدیلر.
دونن چؤره‌یینی،
بو گون الینی ده کسدیلر.

چالیب چاپدیغی نه ایدی،
ال بویدا یاوان چؤرک.
قیش‌دی،
داها اللری یوخ،
جیبلری اوشویه‌جک.

بیر ال-آیاق اوغروسونون،
کسدیلر آج الینی.
الینین ایچین قاشیدی،
اونون تزه گلینی.

کسدیلر آرین-آرخایین،
یاتدیلار باش اوغرولار.
داها بو لال مملکتده،
نه آج وار، نه اوغرو وار.

#نادر_الهی
#شعر_اوجاغی
@SheirOcagi

▫️ منه باش قاخینجی اولدو،
قونشوموزون منله یاشید اوغلو.
آنام هی دئیینیردی:
« آی بالا!
باخ اؤیرن،
آللاه ساخلامیشین قورد اوره‌یی وار».

بؤیوکدو منیم آدیم،
آما من،
هئچ وعده قورداورَکلی اولانمادیم،
من قوش‌اورَکلی اولدوم،
آی انا!
قوش‌اورکلی.

سن منه دانیشماق اؤیرتدین،
من اوخوماق ایسته‌دیم.
سن منه یئریمک اؤیرتدین،
من اوچماق.

آخ، آخ!
بیر یول آغاجدان اوچدوم،
ایکی قیچیم سیندی.
بیر یول دامدان،
ایکی قولوم.

آی آنا، قوربانون اولوم!
سن منی قینامازدین،
بیلسه‌یدین کی نه‌دی اوچماغین دادی.

یاریتماز بالانی باغیشلا!
آمّا،
داها اوچماغیما بیر شئی قالمادی.

#نادر_الهی
@SheirOcagi

▫️فیکرین کؤلگه‌سی اولسایدی،
آبیرسیزلیق اولاردی.
بیر مملکت،
تولکو-چاققال کؤلگه‌سی‌یله دولاردی.

#نادر_الهی
@SheirOcagi

▫️گئجه گؤردویوم یوخونو،
سحر-سحر کوچه‌ده،
آددیم-آددیم تامسینیرام.
بیری چیمدیک‌له‌سین منی،
ائله‌بیل یوخوم چین اولور!
ائله‌بیل او منیم طالع قوشوم‌دو...

بس نییه باشیمین
اوستوندن کئچدی گئتدی؟
بس نییه باشیما... گئتدی؟!

#نادر_الهی
@SheirOcagi

‍ ‍ ▫️آغاج آنام

داغدان گلیر، باشیندا-
بولود لچه‌یی گلیر.
باغدان گلیر، دؤشونده-
گونش چیچه‌یی گلیر.

گؤزونده بولاق کیمی،
بولاق اوتو یوخوسو.
گؤیلونده کهلیک کیمی،
کهلیک‌اوتو قوخوسو.

باخمیر زمی بیچیلیب،
باخمیر بوستان اورلانیب.
نئچه‌-نئچه شاعیرین،
گؤزوندن اوغورلانیب-

گلیر یوخودان یونگول،
گلیر رؤیادان اینجه.
قورویوب قورتاریرام،
او بو یولو گلینجه.

قاباغینا قویماغا،
چاییم یوخ، چؤره‌ییم یوخ.
اوره‌ییمه باخیر او،
منیم کی اوره‌ییم یوخ.

«اوره‌ییم یوخدورسا، بس-
اونون باخدیغی نه‌دیر؟»
دئییب اورک‌لنیرم،
بس اوره‌ییم کیمده‌دی؟

باخمیر جولاز اَینیمه،
باخمیر قولای حالیما.
قونور ساغ-سول چیینیمه،
یعنی ساغ‌-سول قولوما.

هوَسدن، هیجاندان،
قورو جانیم داشلانیر.
ایکی قول، ایکی میصراع،
یعنی شعر باشلانیر.

غم چکمه، درد ائله‌مه،
آی منیم آغاج آنام!
من قوشلار شاعیری‌یم،
کیم دئییر قوش قووانام؟!

سس و شعر:
#نادر_الهی
@SheirOcagi

▫️او قاطار آلتینا آتیر اؤزونو،
یازیق اؤله بیلمیر آخی آجیندان.
او توی پالتاریندا آسیر اؤزونو،
اوتانا-اوتانا توت آغاجیندان.

او مهریبان آنا، او ظالیم آنا،
بوغور اؤپه-اؤپه آج بالاسینی.
سونرا دا ییغیلیب ائل یانا-یانا،
بیر تیکه چؤره‌یین توتور یاسینی.

قاتیب شیرین چایا، اونودوروق بیز،
ساکیت آغریلاری، لال آجیلاری.
آمّا هئچ باخمالی دئییل سوفره‌میز،
الیمیزدن دامیر قان دامجیلاری.

#نادر_الهی
@naderelahi
@SheirOcagi