▪️یا آغلاما، یا دا حامامدا آغلا
اوزونده‌کی دردی، دومان گیزله‌یر
سولغون دوداغینلا، تیترک کؤکسونو
آنجاق، گؤزو یاشلی گوزگو ایزله‌یر

دردی تزه‌له‌یر، اونون باخیشی
ایلانی آندیرار، بوروق ناخیشی
یاناغینا دوشن زهر یاغیشی
افشاندان ساچیلان سو تمیزله‌ير

بیلمزسن نه یاتیب، گؤز دالیسیندا؛
بلکه گوزگو گولور، اؤز دالیسیندا.
درد دورار دووارین دوز دالیسیندا؛
الینده بیر حوله، سنی گؤزله‌یر.

#سئور_شهابى
@SheirOcagi

▪️ياخين‌ايكن اللريميز
اوزاقلاردان سئويشديك بيز
آيريليغا يئنيلمه‌ديك
من آى اولدوم، سنسه دنيز

گوندوزلر اؤزله‌ديم سنى
گئجه‌لر گؤزله‌ديم سنى
اؤيله بير ايزله‌ديم سنى_
ايزيم ساحيله سالدى ايز

بو دا بؤيله بير ايلقاردير
گئجه م، گوندوزه زوماردير
سؤيله منيم كيميم واردير-
سندن ياخين، سندن عزيز؟!...

#سئور_شهابى
@SheirOcagi

▪️بوز دولابيميز بوشالير
سئوگيليمين گؤزلرى دولور
اللريم دونور جيبلريمده
بوشقابلار اوتانير
قيزارير سوفراميزين ياشيل ياپراقلارى
"برزيل يئددى قول يئدى" دئييب_
قونويو دَييشير اوغلوم
سؤزو بيتمه دن
قيزيم آرايا گيرير
دوداقلارى برزيل-برزيل تيتره‌ييب
ياناقلارى هلند- هلند گول آچير
آغ بالاجا اللرى-
ريكا قابيندان دوزلتديیى دخيلى
اوره‌ييمه بوشالدير
آتا!
برزيل اتى آل!
آتا!
برزيل اتى آل...!

#سئور_شهابى
@SheirOcagi

🔸آيريلان گوندن بو يانا
گونو_گوندن گؤزلله شير
دئييرلركى؛ شاعير اولوب
شهريارلا غزلله شير

بللى اولمايير هارادا!
گاه بورادا، گاه اورادا!
ائشيتميشم آنكارادا_
ويلا آلماغا اَلله شير

بو درديله هارا قاچيم؟
اوره ييمى كيمه آچيم؟
بو شانسين ايچينه...
كيمله كوسسم؛ اؤزلله شير...

#سئور_شهابى
@SheirOcagi

🔸كيم دردينى "سانتر" ائله دى
كات گؤتوردو چاتدى منه
بئليم سيندى، دوشدوم يئره
داور، كارت چيخارتدى منه

داورين الين ايزله ديم
ايكينجى كارتى گؤزله ديم
من داليمى تميزله ديم
ميللت خيار آتدى منه

آغلاما! دونيا بئله دير
داور چوخلارين مله دير
يئديیيم هرگون چيله دير
بونلار شوكولاتدى منه...

#سئور_شهابى
@SheirOcagi

🔸بولود-بولود گؤزلريمي
بير سوسوز بولاق چاغيرير
قوش قوخويان اوره ييمي
بير غريب بوداق چاغيرير

سينديريرام قفسيمي
سؤندورورم هوسيمي
بوز باغلاميش نفسيمي،
ايسينميش سازاق چاغيرير

پارچا-پارچا ايتمه لييم
من يئنيدن بيتمه لييم
باغيشلايين، گئتمه لييم
روحومو توپراق چاغيرير...

#سئور_شهابى
@SheirOcagi

▫️اووچو آج اولسادا، كؤرپه‌دى جئيران
قارنينا داش باسير، دايانير آسلان
بعضى صحنه لرى ايزله‌ين زامان،
انسان اولماغيندان اوتانير انسان...

#سئور_شهابى
@SheirOcagi

▫️قصابين توْتوق پيشيگى
ياغلى بيغلارين يالايير
ويترينده كى قارا جيگر
اوره‌ييمه قان جالايير

گؤزلريمى قاماشديريب
دوْداغيمى ديشله‌ييرم
خياليمدا مانقال قوروب
جيگرلرى شيشله‌ييرم

جيگرلريم پيشمه‌ميشدن
آتام منه «گل_گل!» دئيير
اوزون توتور بولودلارا
بيغلارينين اوجون يئيير

ساغ الين چكير باشيما
گؤزون تيكير سوْل الينه
آغزيمى باغلايان سؤزو
يئنه گتيرير ديلينه

دئيير كى: «اوْخو دكتر اوْل
سوْل اليمى درمان ائيله
ائله كى، من ايشه گئتديم
نه ايسترسن راحات سؤيله...»

#سئور_شهابى
@SheirOcagi

▫️آيريلان گوندن بو يانا،
گونو-گوندن گؤزل‌له‌شير.
دئييرلركى شاعير اولوب،
شهريارلا غزل‌له‌شير.

بللى اولمايير هارادا،
گاه بورادا، گاه اورادا،
ائشيتميشم آنكارادا،
ويلا آلماغا ال‌له‌شير.

بو درديله هارا قاچيم؟
اوره‌ييمى كيمه آچيم؟
بو شانسين ايچينه ...
كيم‌له كوسسم، اؤزل‌له‌شير...

#سئور_شهابى
@SheirOcagi

▫️سئوگيميزين جنازه‌سين،
آدديم-آدديم بويلاما ها!
بو جنازه شيشه‌جكدير،
اوره‌يينده قويلاما ها!

بللى ائتمه كدرينى!
گيزلى ساخلا قهرينى!
خاطيره‌لر دفترينى،
حالوا كيمى پايلاما ها!

تانرى سئوگينى سئويرسه،
سئوگيميزه جان وئريرسه،
بو اؤلو بيردن ديريلسه،
سئوينجيندن خايلاما ها...!

#سئور_شهابى
@SheirOcagi

▫️نه بير ويلاميز اولدو،
خزرين قيراغيندا.
نه ده گمی گؤزله‌ديک،
بندرين قيراغيندا.

طالع بيزی بولمادی،
جيبلريميز دولمادی.
باغيميز دا اولمادی،
شهرين قيراغيندا.

هانسی گولو قوخلاياق؟
هانسی واری يوخلاياق؟
گلین گئدک يوخلاياق-
منبرين قيراغيندا...

#سئور_شهابى
@SheirOcagi

▫️دیل-دوداقدا ذیكير دئییب،
واراقلاری قاتیر کیشی.
دوشوندوکجه «ام-اس» قیزین،
بانكایا پول آتیر کیشی.

حریف باشدا نقشه چکیر،
گیزلیجه بیر واراق اکیر.
سککیزينه دوققوز چکیر،
باتاقلیغا باتیر کیشی.

جان شوشه‌سین سونور دئوه،
اوتانجیندان دؤنمور ائوه.
عاییله‌سین سئوه-سئوه،
خیاباندا یاتیر کیشی.

سحر-سحر دوشور یولا،
باخیر ساغا، باخیر سولا،
باخیشلاری دولا-دولا،
بؤیره‌یینی ساتیر کیشی...

#سئور_شهابى
@SheirOcagi

▫️آداملارین آراسیندا،
بو آدام یالقیز یاشاییر.
گوندوزلری اوغلان کیمی،
گئجه‌لری قیز یاشاییر.

یورغانینا ساریلمامیش،
دوداقلارین ماتیک‌له‌ییر.
یاستیغینی قوجاقلاییب،
یاتاغینی تپیک‌له‌ییر.

آچیق-ساچیق گئیینمه‌سی،
آتاسینین باغرین دلیر.
دوغما-دوغما دویغولاری،
آناسینا اؤگئی گلیر.

سحر گؤزونو آچمامیش،
گیزلیجه ائودن یوخ اولور.
آخی بیزیم کوچه‌میزده،
اونا سؤز آتان چوخ اولور.

آخشام قاییدارکن ائوه،
اؤزون اؤزوندن گیزله‌ییر.
کوچه‌میزین آداملاری،
اونون گلیشین ایزله‌ییر.

یالقیز آدام، باخیشلاری-
قانلا قاریشدیریب اودور.
او طبیعت قوربانی‌دیر،
نه گونش‌دیر، نه ده سودور...

#سئور_شهابى
@SheirOcagi

▫️بو حیات چوخ غریبه‌دیر،
گاه آغلادیر، گاه گولدورور.
اینک ایته کؤمک ائدیر،
اینسان اینسانی اؤلدورور...

#سئور_شهابى
@SheirOcagi

▫️وارلیغین بئینیمی سیخیر،
یوخلوغون اوره‌ییمی...

#سئور_شهابى
@SheirOcagi

‍ ▫️قيزيم

اللرین اوره‌ییمدن یوموشاق،
دیرناقلارین...
اوف.‌‌..، دیرناقلارین!
بونلارا اوفله‌یه-اوفله‌یه لاک ووراجاقدیم؛
قیرمیزی،
قیز قیرمیزی.

گؤستر قارا گؤزلرينى!
بير حسرتليک توخون باخيشلاريما!
سن كى سون گونلرده تپیکله‌ییردین اوزونتومو-
آنانین قارنیندان اؤپرکن آیاق ایزلرینی.
سن کی نازلانیردین سونوقرافیده،
سون قرافیده؛
نه اولدو بیردن،
«گؤبه‌یین بوینونا دولاشیب» دئدیلر دوکتورلار؟
قوی ائله بیلسینلر...

بو سیر آرامیزدا قالاجاق، قیزیم!
بیلیرم، سن-
هارادا دوغولاجاغینی آنلایینجا،
اؤزونو بوغدون...

سؤز و سس:
#سئور_شهابى
@SheirOcagi

▫️ایل‌لردیر کی،
بئینیم‌له قلبیمین آراسیندا قان داعواسی وار؛
بیری وورولار،
بيرى زیندانا دوشر.

#سئور_شهابى
@SheirOcagi

▫️اودلو باخيشینی سؤندور، حئييف‌دير!
بو اورک کول اولوب، یانماغا گلمز.
سیندیرماغی بوشلا، غرورومو از!
او قدر سینیب کی، سينماغا گلمز.

#سئور_شهابى
@SheirOcagi

▫️گؤز ياشيم آخديقجا، بئلیم بوکولور،
عاشیق آغلاماسا، باشی اوجالماز.
دوزدو قوجالیریق، آنجاق بونو بیل
انسان قوجالسا دا، سئوگی قوجالماز!

#سئور_شهابى
@sever_shahabi
@SheirOcagi

▫️چکیب اوستومه غم قمه، یولداشیم!
سن منیم غمیمی یئمه، یولداشیم!
«اركک‌لر آغلاماز» دئمه، یولداشیم!
ارکک قادیندان دا بئتر آغلایار.

#سئور_شهابى
@sever_shahabi
@SheirOcagi