▫️هانسی گون سنه وورولدوم
بیلمیرم
گؤزلرینده دوغولدوغوم آن
اؤزومو سنه پای وئردیییم زامان
سئودالار سوی‌‌قیریمینین
ایل دؤنومودور
بلکه سئوگی‌ اینتیحاری
خاطیرلامیرام
سنه اؤلدویومو
داملا داملا
گؤزومدن قوپدوغونو
سنه کؤلگه‌ کیمین
سوروندویومو
هئچ یادیمدا دئییل
ایلک دفعه
سسینین قولاغیم‌لا اؤپوشمه‌سی
ایتیرمیشم آدرسین
سنه توخوندوغوم خیاوانین

هانسی گولون قوخوسونو سئویردین
هانسی ماسانی نیشانلامیشدین
سئوگیمیزه؟
اوره‌یی دؤیونور پنجره‌میزین
قاییداجاقسان‌می؟!
بیلسه‌یدیم
قیرمیزی خالچا سرردیم
کوچه‌میزدن

قارانلیق یاخامدان آسیلی
آه سئوگیلیم
آخیر گولوشومدن
ویداع ائتدییم ده یادیمدا دئییل
سن گئتدین سه
آلزایمیر سیلدی بئینیمی
هئچ نه یادیمدا دئییل
دوزدنچی!!!
سؤیله هارالی ایدین؟
آدیمی نه چاغیریردین
آدین نه ایدی سنین؟!!!

#دومان_سفراوغلو
@SheirOcagi

▫️آخشاملار

یوخومون آغلی چاشیر آخشاملار،
منه کابوس داراشیر آخشاملار.

آغلادیر اورمانی یالقیز بیر قورد
یاراسین تک یالاشیر آخشاملار.

آه، بو سنسن آسیلی بوینومدان-
یا خیالین سوواشیر آخشاملار؟

یئنه سنسیزلییه هوپموش شعریم،
یئرله-گؤیله ساواشیر آخشاملار.

پنجره‌زده ائکیز آی چیممکده،
یومماسام، گؤز قاماشیر آخشاملار.

بیر مئساژ گلدی اجلدن، یازمیش:
سنه تابوت یاراشیر آخشاملار.

سن آی-اولدوزلا شکیل چکمکده،
منه کابوس داراشیر آخشاملار...

#دومان_سفراوغلو
@SheirOcagi

▫️منی اؤلدورنده باخیردی گؤزوم،
یاغیشلی گون ایدی، یاغیش یاغیردی.
سولانیب دولوردو، آخیردی گؤزوم،
یاغیش تئل‌لریمی تومارلاییردی.

اوزاق بیر یئر ایدی، اوزاق بیر وطن،
دیل‌لری نه‌ییدی، من آنلامیردیم.
شهرین گؤزلرین بوروموشدو چن،
بو قارا طالئعی یامانلامیردیم.

قویماسین سئوگیمی آسیلسین دئیه،
تانری پیلله-پیلله یئره ائنیردی.
بیر اؤلوم گئدیردی تابوتو گئیه،
اجل تیتره‌مه‌دن هئی اوشه‌نیردی.

تانرینین فریادی ائتمه‌دی اثر،
یورودو اوستومه بیر نئچه یاغی.
قارانلیق چکیلدی، آچیلدی سحر،
یئتیشدی اؤلومله اؤپوشمک چاغی.

من نه قول‌لاریمدان، نه بوغازیمدان،
من یازیق دیلیمدن آسیلدیم دارا.
قهرلندیم او دم آلین یازیمدان،
قارانلیق قول آتیب هارادان هارا.

عسگرلر الینده بیر بایراق کیمین،
یئلین نغمه‌سی‌له داردا اسیردیم.
آغاجدان کوسولو بیر یارپاق کیمین،
تورپاغا دوشمه‌یه چوخ تله‌سیردیم.

«نه اوسته بو جاوان چکیلمیش دارا؟»
یول اوسته، سوووشوب کئچن‌لر دئییر.
بعضی‌سی آغلاییر، بعضی‌سی آما-
باخارکن حسرتدن دوداغین یئییر.

اویاندان بیر بئلی بوکولموش آنا،
باغیریر: «آی آلله، نه یارانیشدی؟!»
دئییردی هامییا او یانا-یانا،
گوناهی: «تورک‌ ایدی، تورکجه دانیشدی...»

#دومان_سفراوغلو
@SheirOcagi

▫️داریخمالار، گؤزلریز آیدین!

آهیم پیلله-پیلله گؤی‌لره چیخیر،
اولدوز آلوولانیر، آی آلوولانیر.
گئجه‌نین قوللاری بوینومو سیخیر،
دیلیم لال، اوره‌ییم سئوگیمی دانیر.

هانسی دنیزلرین دالغالیغیندا،
هانسی لیمان‌لاردا بورویوبدو چن؟
بلکه قارانلیغین کور قوجاغیندا،
هانسی دومان‌لارین اَته‌یینده‌سن؟

اولورسا اؤزونو گؤستر بیر تهَر!
قوش‌لار پنجره‌نین گؤزلرین یئییر.
ائله اؤز-اؤزونه دولاشیب شهر،
کوچه‌میز پالتارین دَییشیک گئییر‌‌.

یئنه دیزلرینه تاپداییر یامان،
یئنه‌ ده دفتریم ساچلارین یولوب
دئییرسن آناسی اؤلوبدور گومان،
یئنه‌ ده شعریمین اوره‌یی دولوب.

الیم اللرینده تیتره‌ین، آی قیز!
آدینی سس‌لدیم، سن هئچه سایدین.
منی قوجاغینا چاغیریر پاییز،
ائهئی داریخمالار، گؤزلریز آیدین...!

#دومان_سفراوغلو
@SheirOcagi

▫️سنی اؤپدوم
قارانلیغین سسیزلیینده.
دیکسیندی گئجه،
اونوتموشدوم هر شئیی
آدینی، آدیمی
و هاردا اولدوغومو.
قادینلیغیندان
دوداق-دوداق ایچیردیم،
سینه‌نده هوپوردوم
اؤزومده یوخ اولوردوم.

نه یامان چاپیرسان آتینی یئنه!
دایان آ دینسیز!
دایان آ یولسوز!
دایان آ دوشونجه‌سیز!
بو آندا قالماق ایسته‌ییرم،
بیر حالدا قالان هیکل‌لر کیمی.

باخ ائله بوردا،
هه...
همن بوردا بوراخین بیزی!
بو خیاوان سئوگی‌لر خیاوانی
تاکسی‌لار بیزده دایانسین
پوسترلر بیزده یاشاسین
آیاغیمیزدا شکیل چکیلسین
بیزه آند ایچیلسین؛
ابدیّت
بیزده قالسین...

#دومان_سفراوغلو
@SheirOcagi

▫️سولماز

سولماز گؤزلیم، سنله کئچن خاطیره سولماز.
آغلاتسا، داریخدیرسا دا، بیردن-بیره سولماز.

بیر آستاجا باخسان غزلین پنجره‌سیندن،
شعریمده‌کی قیزلار یاناغی باکیره سولماز.

بیر آیه گؤزوندن اوخوسا میصرده قاری،
تبریزده شافاق پارچالانار، قاهیره سولماز.

خان نغمه‌سی قالخیر شوشا گولدسته‌لریندن،
هؤرموش خاری بولبول ساچینا داغ-دره، سولماز.

قالدیردی ظفر بایراغینی نغمه‌کار عسگر،
های سالدی وطن، دوشدو آدین دیللره، سولماز

اؤزگورلویومون توستوسو قالخیر گئجه‌لرده،
آغلاتسا، داریخدیرسا دا، بیردن-بیره سولماز...

#دومان_سفراوغلو
@SheirOcagi

▫️قارانلیق سوزولور آغاجلاردان،
کیم‌سه گؤیه بیر سیخیم اولدوز سپمیش.
یئرده آنجاق،
تانری لایلاسی یوخلادیب هر شئیی.
هاوا سنی قوخویور
من‌سه دیشاریدایام
سنی دوداق- دوداق سورورام
هاوالانیرام
آیا شعر اوخویورام
اؤز- اؤزومه دانیشیرام
آلیشیرام
یوخلوغوندان آغلاییرام
بیر آن اؤزومه گلیرم
تنها قالیرام
ایچیمدن بایقوش سسی گلیر
یالقیزلیغیملا قوجاقلاشیرام.
گئجه‌دیر... آی ایشیغی... یاشیل بیر کومه...
سن هارداسان...؟!

#دومان_سفراوغلو
@SheirOcagi

▫️یاتان وارسا، یانان دا وار

حیاتین نیسگیل چاغیندا،
یاتان وارسا، یانان‌ دا وار.
بو سونسوز درد اورتاغیندا،
یاتان وارسا، یانان‌ دا وار.

قیشا بورونسه‌ ده یازین،
کیمسه چکمه‌سه ده نازین،
بوغما شعرینین بوغازین!
یاتان وارسا، یانان‌ دا وار.

اؤزگورلوک‌دور منیم آدیم،
وطن آدی منیم دادیم،
گئتمه‌لی‌یم آددیم-آددیم،
یاتان وارسا، یانان‌ دا وار.

آیا باخ! جانیندان کئچیر،
اوراق اولوب اولدوز بیچیر.
قوش وار قفسه آند ایچیر،
یاتان وارسا، یانان‌ دا وار.

کئچمیشم اؤلوم یاشینا
دؤنموشم مزار داشینا.
سئوگیمیزین گؤز یاشینا،
یاتان وارسا، یانان‌دا وار.

آنام آتیر یوخوما قول،
گؤزلرینده یاغیشلی یول،
دئییر: اوغول، آرخایین اول!
یاتان وارسا، یانان‌ دا وار...

#دومان_سفراوغلو
@SheirOcagi

▫️یالقیزلیق

گؤزده چن، باشدا دومان، یالقیزلیق،
یورویوب منده هوپان یالقیزلیق.

چکیلیبدیر دادی سنسیز، کوچه‌نین،
آسیلیب قاپ‌باجادان یالقیزلیق.

داها مین خاطیره کئچمیش‌لردن،
من اوچون یئرده قالان، یالقیزلیق.

قیناما دال با دال آه چکسه‌م ده،
آه دوغور منده هرآن یالقیزلیق.

بوللاسا شنبه‌ده اؤز قویروغونو،
باش چیخاردیر جومادان یالقیزلیق.

گون باتانلاردا غفیلدن سانجیر،
منی بو دیشسیز ایلان، یالقیزلیق.

گئجه‌نی دانسا، بوکردیم من ده،
سالماسایدی بئله قان، یالقیزلیق.

نئجه دوغسون اوره‌ییم کال بیر غزل؟
گؤزده چن، باشدا «دومان»، یالقیزلیق...

#دومان_سفراوغلو
@SheirOcagi

▫️تاریخه گیریشدیم آچیلدی یارام،
دریندن آنلادیم آزربایجانی.
اوخورکن کؤز اولدوم، یاندیم، آلیشدیم،
هر واراقدا آخیب بیر ایگید قانی.

اوره‌یینده دوغوب نئچه یوز یارا،
بؤلونوب تورپاغی هارادان هارا.
«حئیران»ا آغلاسین یا «قاراباغ»ا؟
دردینین تاپیلمیر آجی درمانی.

یاریمچیق شرفین بیزدن قازانان،
ازل یارانیشدان اسکیک یارانان،
اؤزونو قالدیریب بیزلری دانان،
بیر عؤموردو سورور داماردان قانی.

یانان کیتابلاری ایزله‌ییرم من،
سعادت گونلرین اؤزله‌ییرم من،
تبریزین توفانین گؤزله‌ییرم من،
اؤزگورلویوم، سیندیراجاق زیندانی...

#دومان_سفراوغلو
@SheirOcagi

▫️آی، دلیجه‌سینه اولدوز اورلاییر،
فیکری اینتحاردی، اؤزون بوغاجاق.
گئجه‌نین قارنینی سانجی دوغراییر،
بلکه سحر آدلی بیر قیز دوغاجاق.

قونوبدور اوزومه اؤلوم تورپاغی،
گون باتان اوره‌ییم یامان داشلانیر.
یاخامی سنسیزلیک بوشلایان چاغی،
تزه بیر طرفدن پاییز باشلانیر.

داریخما اجلدی، الینده بالتا،
نه دینیر نه گولور نه ده ائشیدیر.
بو آخشام شعریمی قویمارام یاتا،
یوخونون بیر قیچی اؤلومه گئدیر.

سنسیز کوچه‌نی‌ ده دانیشدیرمیرام،
داها دلی‌لییین یوخ قاشی-گؤزو.
اؤزومو سنینله باریشدیرمیرام،
آدینی قویموشام حسرتین اؤزو.

گؤزلریندن آخان اسکی یاغیشام،
قاییت گل، سونوما اؤزونو یئتیر!
کفنه بوکولن آخیر باخیشام،
باشیما سپمه‌یه نانا در، گتیر...

#دومان_سفراوغلو
@SheirOcagi
‌‌

▫️ پاییزین قیزی

آناسی، بطنینده اوخشاییر بویون:
«رئیحانیم، چیچه‌ییم، آلا گؤز قیزیم!
بیر آددیم پاییزا قالیر، تلسمه،
بو گونلر گلرسن، بیر آز دؤز قیزیم!»

دئدییی «بو گونلر» سورعتله کئچدی،
دیلی قارانلیقدان دای هایا گلدی.
دونیانین گؤزلری یولدا دئییلدی،
آغلایا-آغلایا دونیایا گلدی.

«قیز» دئمه! یاناغی آی دوغان یئری،
الینین قوخوسو باهار یارپیزی.
ساری خزل‌لرله دوغولوب دئیه،
آدینی قویدولار «پاییزین قیزی»

نئچه پاییز کئچدی، نئچه قیش اؤتدو،
قووزانیب گوزگوده اؤزون گؤروردو.
ائیوانی سوپوروب، حیطی یویوب،
نارین اللری‌یله ساچین هؤروردو.

اوره‌یی خوش ایدی اوشاقلیغیندا،
گونش‌له چیخیردی، آیلا باتیردی.
آتانی-آنانی قوجاقلایارکن،
گئجه‌یه بورونوب شیرین یاتیردی.

پاییز اؤز قیزینا یییه دورمادی،
بیر گونده دونیانین واراغی چؤندو.
دوستلاری ال ووروب اوخویوردولار،
«پاییزین قیزی»نین چیراغی سؤندو.

هله اوشاقلیغی اوزونده ایدی،
خیردا لئچه‌یینده گوللر اوچوردو.
هله آرزیلارین رنگین بیلمه‌میش،
باشدا قیرمیزی شال، گلین کؤچوردو.

کیم قییار بیر قوشون اوره‌یی دولسون،
یا پاییز، قیزینین ساچینی یولسون؟
بئله بیر قایدایا، بئله قانونا،
بئله انسانلیغا، اوف!... اؤلوم اولسون...

#دومان_سفراوغلو
@SheirOcagi

▫️نه یامان حزیندی یاشام اؤیکوسو!
منده یاشایان من، منه اَییلمیر.
هر یئردن یورویور قیشین اوردوسو،
یئر، پاییز شله‌سین داشییا بیلمیر.

داها ییرتیقلاری گیزلتمیر یاماق،
کیمی دیندیریرسن اوره‌یین آچیر.
دئمه‌یین دئدیییم کیفیردی آنجاق
قابارلی اَللردن چؤرک ده قاچیر.

وورموشام اؤزومو زیر دلی‌لییه،
قیشقیریب قاچیرام، اوزاقلاشیرام.
گؤرنده کؤلگه‌می، «سن کیمسن؟» دئیه،
دوواردا اؤزومله قوجاقلاشیرام.

سانیرام آچیقدی گؤیلرین یولو،
دئییرلر کی «تانری سئوگی پایلاشیر.»
یئنه ده اوره‌ییم دولودور، دولو،
بو حسرت یاشی‌دیر گؤزومدن داشیر.

آی منیم شعیریم، آی اوره‌یی داش!
سنین یوخلوغوندا «دومان» اؤلردی.
کاش کی یارانایدی آیا بیر قارداش،
او دا گئجه‌لری دئییب گولردی...

#دومان_سفراوغلو
@SheirOcagi

▫️قارانلیغین سس‌سیزلییینده،
دیکسیندی گئجه.
اونوتموشدوم هر شئیی،
آدینی، آدیمی،
و هاردا اولدوغومو.
قادینلیغیندان،
دوداق-دوداق ایچیردیم،
سینه‌نده هوپوردوم،
اؤزومده یوخ اولوردوم.

نه یامان چاپیرسان آتینی یئنه،
دایان آ دینسیز!
دایان آ یولسوز!
دایان آ دوشونجه‌سیز!
بو آندا قالماق ایسته‌ییرم،
بیر حالدا قالان هیکل‌لر کیمی.
باخ ائله بوردا،
هه!
همن بوردا بوراخین بیزی!
بو خیاوان، سئوگیلر خیاوانی.
تاکسی‌لار بیزده دایانسین!
پوسترلر بیزده یاشاسین!
آیاغیمیزدا شکیل چکیلسین!
بیزه آند ایچیلسین!
ابدیّت،
بیزده قالسین!...

#دومان_سفراوغلو
@SheirOcagi

▫️قارا چکمه‌لی قادین

گؤزللیگین گؤزودور،
قارا چکمه‌لی قادین.
لاپ حسرتین اؤزودور،
قارا چکمه‌لی قادین.

بویلانیر گیله-گیله،
کوچه‌دن بیزیم ائوه،
پاییزی سئوه-سئوه،
قارا چکمه‌لی قادین.

خزل-خزل جان آتیر،
الی قوینوندا یاتیر.
اورمو گولونده باتیر،
قارا چکمه‌لی قادین.

گونش اولور، قیز دوغور،
باخیشی دنیز دوغور.
ایچیمده اؤزون بوغور،
قارا چکمه‌لی قادین.

بوراندی، سویوق کسیر،
باشیندا آغ شال اسیر،
اؤزگورلویه تله‌سیر،
قارا چکمه‌لی قادین.

«تبریز اوستو ماراغا
تئلی گلمیر داراغا».
شعری چکیب دوستاغا،
قارا چکمه‌لی قادین...

#دومان_سفراوغلو
@SheirOcagi

▫️آلزایمر

هانسی گون سنه وورولدوم،
بیلمیرم.
گؤزلرینده دوغولدوغوم آن،
اؤزومو سنه پای وئردیییم زامان.
سئودالار سوی‌‌قیریمینین ایل دؤنومودور،
بلکه سئوگی‌ اینتحاری.
خاطیرلامیرام
سنه اؤلدویومو،
داملا-داملا گؤزومدن قوپدوغونو،
سنه کؤلگه‌ کیمین سوروندویومو.
هئچ یادیمدا دئییل،
ایلک دفعه،
سسینین قولاغیم‌لا اؤپوشمه‌سی.
ایتیرمیشم آدرسین،
سنه توخوندوغوم خیاوانین.
هانسی گولون قوخوسونو سئویردین؟
هانسی ماسانی نیشانلامیشدین
سئوگیمیزه؟

اوره‌یی دؤیونور پنجره‌میزین،
قاییداجاقسان‌می؟!
بیلسه‌یدیم،
قیرمیزی خالچا سرردیم،
کوچه‌میزدن.
قارانلیق یاخامدان آسیلی.
آه سئوگیلیم!
آخیر گولوشومدن
ویداع ائتدییم ده یادیمدا دئییل.
سن گئتدین‌سه،
آلزایمر سیلدی بئینیمی،
هئچ نه یادیمدا دئییل.

دوزدنچی...
سؤیله هارالی ایدین؟
آدیمی نه چاغیریردین؟
آدین نه ایدی سنین؟!...

#دومان_سفراوغلو
@SheirOcagi

▫️گئجه‌دیر،
قارانلیق سوزولور آغاجلاردان،
کیمسه گؤیه بیر سیخیم اولدوز سپمیش.
یئرده آنجاق،
تانری لایلاسی یوخلادیب هر شئیی.
هاوا سنی قوخویور،
منسه دیشاریدایام،
سنی دوداق- دوداق سورورام،
هاوالانیرام،
آیا شعر اوخویورام،
اؤز-اؤزومه دانیشیرام،
آلیشیرام،
یوخلوغوندان آغلاییرام.
بیر آن اؤزومه گلیرم،
تنها قالیرام،
ایچیمدن بایقوش سسی گلیر،
یالقیزلیغیملا قوجاقلاشیرام.

گئجه‌دیر،
آی ایشیغی، یاشیل بیر کومه.
سن هارداسان؟!...

#دومان_سفراوغلو
@SheirOcagi

▫️گئتمه!

آماندیر، آماندیر اوز توتوب یئنه-
تانینماز یوللارا، گومانا گئتمه!
دوشرسن بورانا، دوشرسن چنه،
بورونوب یاغیشا-دومانا گئتمه!

حسرتیم اوجالیر بوداقلاریندان،
ایسته‌سن آسیلیم آیاقلاریندان.
آیه-آیه یاغیم دوداقلاریندان،
سنی آندا وئریم قرآنا گئتمه!

غوربتین آجیسی دای منه بسدی،
گؤرورسن طالعیم نئجه نَحَسدی.
ایندی کی پاییمیز باغلی قفسدی،
سوزولوب گؤزومدن اویانا گئتمه!...

#دومان_سفراوغلو
@SheirOcagi

▫️گل!

خارلاندی گؤزوم، یوللار اوزاق‌لانمادادیر، گل!
«من» آدلی یاشام بوردا یاساق‌لانمادادیر، گل!

سنسیزلیک اؤلوم کؤینه‌یی‌دیر اَینیمه کئچمیش.
یوم‌یومشاق اسیم‌‌لر ده سازاق‌لانمادادیر، گل!

مین شعر اؤلوسو دفتریمین سول مزاریندا،
آه! باش-گؤزو تورپاقلی دوداق‌لانمادادیر، گل!

اولدوز سیراسین پوزدو ساواش تانریسی بیر آن،
قان-قاندی، آیین کؤکسو اوراق‌لانمادادیر، گل!

ییرتیلدی پاییز نعشی کؤپک‌لر آغیزیندا،
اورلاندی خزل، شاختا یاراق‌لانمادادیر، گل!

آخیر گئدیشینده ترور اولدوم باخیشیندا،
آدسیز جسدیم یئرده آیاق‌لانمادادیر، گل!

گئتدین ده، وئران قالدیم، ائهئی، سوریه گؤزلوم!
مشروطه‌چی تبریز ده عراق‌لانمادادیر، گل!

مین بؤل تیکه‌می، پنجره‌دن قوشلارا پایلاش!
«من» آدلی یاشام بوردا یاساق‌لانمادادیر، گل!...

#دومان_سفراوغلو
@SheirOcagi

▫️اوره‌ییمده بیتن سئوگی ماهنیسی،
پاییز بوداغیندا یازیلی قالدی.
سسین یاییلمادی دار کوچه‌میزدن،
آدین دوداغیمدان آسیلی قالدی.

گئدیردین، گیزلیجه گؤزوندن ایراق،
اوخشادیم آغلادیم سنه بیر اتَک.
اَلیندن یاپیشیب آپاریردیلار،
یایلیغا بۆکولن بایرام پایی تک.

گئدیردین یول‌لاردا باهار سولوردو
بولود گؤزلریمده یاشا دولوردو
شافاق قان قوسوردو چیچک‌لر گۆلوش
بنؤوشه ساچلارین، سازاق یولوردو.

قلبیمده بیر آرزی آه چکیر منیم،
سن‌سیز اوزاقلاردا بیته‌جه‌یم من
داها یوواسیندان کوسن قوش کیمی
تانرینین گؤزوندن ایته‌جه‌یم من.

الوداع هر گئجه یازدیغیم شعر!
سنی بالتالاییب مندن آلدیلار.
من ائله پاییزدا تورپاغا دوشدوم،
کفن‌لنمه‌ییمی قیشا سالدیلار.

#دومان_سفراوغلو
@SheirOcagi