▫️گون اورتامیزدا شهر شعری دانیر آخشاملار،
دوداق-دوداق یازیمیز تاپتالانیر آخشاملار.
سنین سسینده یاغیش سئیو اولوبدور ایللردیر،
قاییت، بو قوشمالارین باغری یانیر آخشاملار...!

#دومان_بختیاری
@SheirOcagi

▫️گونشین باتدیغی یئردن سؤکولور وارلیغیمیز،
قارا قارغیشلارا اویغون چؤکولور وارلیغیمیز.
بیزی سیغمیر بو دووارلار، داغیلیر اللریمیز،
گئجه‌نین قاش-قاباغیندان تؤکولور وارلیغیمیز...

#دومان_بختیاری
@SheirOcagi

▫️دیلیم سئوگیدن توتولور،
کلمه‌لر آغزیمدا سوسور.
سنی چاغیرا-چاغیرا،
بارماقلاریم شعیر قوسور.

یاغیش یاغیر سطیرلره،
کوچه‌نین گؤزو ایسلانیر.
ساچین یولور خاطیره‌لر،
اللرین الیمده یانیر.

بو شهرده گزه-گزه،
آیاق سالیب ایز قویورام.
سنه آغری چکن‌لره،
دووار-دووار گؤز قویورام.

اللرینی اوخشاییرام،
اللریمده آخشام چاغی.
سنسیزلیگیم بورومه‌سین،
یوخودا دا بو اوتاغی...!

#دومان_بختیاری
@SheirOcagi

▫️سن یوخسان

سن یوخسان،
دورنالار دا کؤچون چاتیب،
دومانا بورونوب «خان پری»ده چینار آغاجلاری.

سن یوخسان،
پاییزلاییر گؤزو یاشلی کوچه‌لرده بنؤوشه‌لی بارماقلاریم.
شَوه ساچلاریندا آغ یئل اسیر بو شهرین.
قوشمالاریندا بیر دنیز قیزی تله‌سیر.

سن یوخسان...
یوخسان...
یوخسان...

#دومان_بختیاری
@SheirOcagi

▫️چكیلین، یول وئرین آل بایراغیمیز یئللنسین،
ساوالانسین سینه‌میز، لال سازیمیز دیللنسین،
سینه‌سین توز بوروین تورپاغیمیز گول‌لنسین،
دیله گلسین پاییز اوغروندا سولان یارپاق‌لار،
آیاق آلتیندا قالیب درده دولان یارپاق‌لار!

ائلیمین گول‌لری سولموش قارا یئل قوینوندا،
داغیلیر آغری دوداقدان ساری تئل قوینوندا.
بیزیم ائلده داغا بنزیر سارا، سئل قوینوندا،
نه سارا یوللارا باخدیقجا یانیر آخشام‌لار،
قارا گون‌لرده سینیر، دردی قانیر آخشام‌لار.

اویانین، بذ قالاسیندان ائله بیل های گلدی!
بیزه قیسمت دئیه‌سن، تانریدان آل پای گلدی،
سینه گرمیش ساوالاندان بیر اتك یای گلدی،
چكیلین داغ‌لارا، چیلغین دلی‌لر! گون باتدی،
قارا ظولمت گونشین كؤرپه‌جییین آغلاتدی!

بو نه یاتماقدی؟ قارانلیق چؤكولوب هر یئرده،
گونشین گؤز یاشی دن-دن تؤكولوب هر یئرده،
تانرینین كؤینه‌یی دالدان سؤكولوب هر یئرده،
قالانیب داغ كیمی درد اوستونه خالقین دردی،
نه دورومدور بو، نه دهشت بیزه اوز چؤندردی؟

بیلیرم داغدا «دومان» وار...و یولوم داشلانمیش،
آنامین گوزگوسو باشدان-باشا قارغیشلانمیش،
نه بیلیم، بلكه ده شعریمده كولك باشلانمیش،
گئدیرم چنلی اوزاندان، دئمیرم قوی قالسین،
او سینیق كؤرپوده آخشام چاغی قارمان چالسین...!

#دومان_بختیاری
@SheirOcagi

▫️دلی اوره‌ییم

بیر دلی‌ کیمی‌دیر منیم اوره‌ییم،
هردن اوز گؤتوروب اؤزون آختاریر.
اللری قوینوندا، آه چکه-چکه،
دومانلی یوللاردا گؤزون آختاریر.

بیر دلی کیمی‌دیر منیم اوره‌ییم،
قاچیر کؤلگه‌سیندن، قاچیر سسیندن.
بوینونا دولاییب ساری دردینی،
باغیریر گئجه‌نین حنجره‌سیندن.

بیر دلی کیمی‌دیر منیم اوره‌ییم،
ایسلانیر یاغیشدا، اوشویور قاردا.
الجک‌سیز اللرین باسیر آغزینا،
بیر اولدوز شکیلی چکیر دوواردا.

اولدوزون نفسی دولور جانینا،
دولور یوخوسونا، دولور گؤزونه.
«بیر گئجه قار قیزی گلر گؤروشه»
بئله‌جه سؤز وئریر اؤزو، اؤزونه.

بو اورک، دلیجه یاشادیر منی،
دوداغیم دولوسو، گؤزوم دولوسو.
باخ... دلی کیمی‌دیر منیم اوره‌ییم!
سوورولور باشیما سؤزوم دولوسو...

#دومان_بختیاری
@SheirOcagi

▫️نییه خبر یوخدو سندن؟

دورنالار دا گلیب چاتدی،
نییه خبر یوخدو سندن؟
گونش باشین چکیب یاتدی،
نییه خبر یوخدو سندن؟

یوللار توزا بوروندولر،
دیزین-دیزین سوروندولر،
قاش قاباقلی گؤروندولر،
نییه خبر یوخدو سندن؟

کؤینه‌ییمده سازاق اسیر،
بو حامیله گؤی تله‌سیر،
دلی-دلی آسیب کسیر،
نییه خبر یوخدو سندن؟

گؤی قورشاغی آداقلاندی،
یاغیش شعری دوداقلاندی،
داغ یاریلدی، درد اویاندی،
نییه خبر یوخدو سندن؟

سون باهارا بویانیبسان،
اولمایا سن ده یانیبسان؟
نییه، نییه یوبانیبسان؟
نییه خبر یوخدو سندن؟

یول یورغون‌دور، گؤزله بیر آز!
چیچک سولموش، اؤتمه‌ده یاز،
گؤز یاشیما دؤندو آراز،
نییه خبر یوخدو سندن؟

گاه گونشه بویلانیرام،
گاه دنیزه قویلانیرام،
باخ، دونورام؛ باخ، یانیرام!
نییه خبر یوخدو سندن؟
نییه خبر یوخدو سندن...؟

#دومان_بختیاری
@SheirOcagi

▫️اوزون قوللاریندا یئریم هاردادیر؟

اوزون قوللاريندا يئريم هاردادير؟
نه‌دن‌سه سيغميرام قوينونا سنين.
من ده ايسته‌ييرم بير مونجوق کیمی،
دولاشيب آسيلام بوينونا سنين.

قیيما گؤزلريندن ايراغا دوشم،
يئر ائله، شاختادير، اوشويور جانيم!
من ده دوداغيندا قالان اؤپوشم،
آی بونا شاهيددير، من نه‌جور دانيم؟

سنه يالواريرام سون باهاردا من،
سيخيلير اوره‌ییم، سيخيلير آنجاق.
قارانليق گئجه‌لر سيزلايان كؤنول،
سنين اللرينده اولوب اويونجاق.

وئر منه گؤزونون قاراسين، آغين،
قوی سنه يئر ساليم سینه‌مین اوسته!
سئوک عشقيميزين لاپ كؤرپه چاغين،
بو سئوگی يورغون‌دور، بو سئوگی خسته.

ايزين وئر ياناشيم، گليم يانينا!
بو گئجه ائله بيل سون گئجه‌ميزدير.
بو گئجه قاپیدا قالان گؤزلريم،
اؤزونده بوغولان قانلی دنيزدير.

بو منه درد اولوب، اؤلدورور منی.
نه‌دن‌سه سيغميرام قوينونا سنين.
من ده ايسته‌ييرم بير مونجوق كيمی،
دولاشيب آسيلام بوينونا سنين...

#دومان_بختیاری
@SheirOcagi

▫️سحر،
گؤزلریندن اویانیرام
دؤرد دوواردیر گؤزلرینین چرچیوه‌سی.
گونشی یوخو گؤرورم،
گئجه‌نی دسته چیچک مزار داشیما.
شاعیرلره شعر یازیرام
شعرلریم بولودون گؤزلریندن آسیلیر
دؤرد دووار ایچینده
دؤرد بوجاق دونیامدا.
قارا گون‌لریمی سئویرم،
قارا گؤزلریندن سویونوب
«قاراباغ»دا شهید اولورام هردن
«ارک»ده سؤکولورم
«کریمه‌»ده قانداللانیرام ایسارت کؤرپولرینده
گوله-گوله «چئگوارا» اولورام
چمران، چمران
چیریک،
دؤرد دووار آراسیندا.
یازیق من،
گؤز یاشی‌یلا گونئی اولورام
گؤز یاشی‌یلا قوزئی.

سحر،
گؤزلریندن اویانیرام
همن دؤرد دوواردیر گؤزلرینین چرچیوه‌سی
سانجاقلانمیش «سانجاق درگی»سینه
«تهران بیلیم‌یوردو»ندا کادرا چکیلیرم
قویلانیرام یولداشلاریمین اللری ایله-
«قیزیل اوزن‌»ده.
«اورمو گؤلو»نده دوزلانیر شعریمین بیرینجی اؤدولو.
سن اوزاقداسان،
چوووووخ اوزاقدا، دنیز کیمی
گؤزلرین کیمی.
آغیر لحظه‌لری داشییرام دومانلیغیمدا
یوم گؤزلرینی،
شاعرلیگیم بیتسین دئیه...!

#دومان_بختیاری
@SheirOcagi

‌ ▫️بیزیم اولسون!

عؤمور باغچاسینین سون باهاریندا،
یاغیش بیزیم اولسون، قار بیزیم اولسون!
چیلله گئجه‌سینده بیاض بوقچادا،
هئیوا بیزیم اولسون، نار بیزیم اولسون!

قار قالان قوزئیین قوجاقلاریندا،
یاشیل باغچامیزین بوجاقلاریندا،
بو اوزون گئجه‌نین اوجاقلاریندا،
ماهنی بیزیم اولسون، تار بیزیم اولسون!

ائلیمین امه‌گی دؤنمه‌سین ضایا،
طالئعی یازیلسین اولدوزا، آیا!
سئوگیمیز جالانسین قوجا دونیایا،
دؤولت بیزیم اولسون، وار بیزیم اولسون!

بو قارا گئجه‌ده، بو قار گئجه‌ده،
بو چیلپاق گئجه‌ده، بو دار گئجه‌ده،
بو داغلی، دومانلی، قابار گئجه‌ده،
یارا بیزیم اولسون، یار بیزیم اولسون!...

#دومان_بختیاری
@Dadaminandi
@SheirOcagi

▫️یاشاسین شعریمده سؤزو آتامین!

داغ کیمی اوجادیر، باشیندا قاری،
بورویوب ائلیمی اونون ووقاری،
دئییرم سولماسین باغی، باهاری.
نیگران قالماسین گؤزو آتامین،
یاشاسین شعریمده سؤزو آتامین.

اللری قاباردیر، اوره‌یی یارا،
باخیشی، درمان‌سیز دردیمه چارا.
بویانیب یاغیشا، توش گلیب قارا.
یازیمدا قالاجاق ایزی آتامین،
یاشاسین شعریمده سؤزو آتامین.

دردین اوره‌یینی داغلایا بیلمیر،
دولور بولود کیمی، چاغلایا بیلمیر،
غیرت سیمگه‌سی‌دیر، آغلایا بیلمیر.
یازیرام: «سارسیلماز دیزی آتامین.»
یاشاسین شعریمده سؤزو آتامین.

«دومان»لی چاغیمدا دالیر خیالا،
بویلانیر قوپوزوم دیل‌غم-ی چالا.
سئویرم قوشمامین قوناغی اولا،
یاپیشا الیمدن اؤزو آتامین،
یاشاسین شعریمده سؤزو آتامین.

آیاق ایزلرینده دؤزوم گول آچیر،
گؤزونده یئر سالیر، گؤزوم گول آچیر.
یانیرام عشقینده، کؤزوم گول آچیر.
سؤنمز اوجاغیندا کؤزو آتامین،
یاشاسین شعریمده سؤزو آتامین...

#دومان_بختیاری
@SheirOcagi

▫️سؤزوم داریخسا دا، گؤزوم دولسا دا،
گونئیدن قوزئیه چاغیرما منی!
یازیما قار یاغیب گولوم سولسا دا،
دوزلاما یارامی، باغیرما منی!

دینمه! یارالاریم باش آچیر منیم.
قیناما بیر سسی ساوالانمیشام!
بیر اوووج تورپاقدیر دردیمه قنیم،
گؤینه‌ییر باخیشیم، آخی یانمیشام.

هئی، قارا گونلرین سسلی یاراسی!
ائی پاییز دوداقلی دار آغاجلاری!
اینجیییر قلبیمین سینیق پاراسی،
ائله بیل بورویوب قار، آغاجلاری.

یارپاغی قیریلان گولون دردینی،
ساحیلدن- ساحیله باغلاماق اولمور.
تورپاغین دردینی، ائلین دردینی،
اوتوروب گیزلینجه آغلاماق اولمور.

گونئیدن قوزئیه اوزانیر قولوم،
چکیلیر سینه‌مه داغ یاواش- یاواش.
داغیلیر دوداغیم، باغلانیر یولوم،
هارداسان؟ دردیمی یاغ یاواش- یاواش!

#دومان_بختیاری
@SheirOcagi

▫️قورخورام.

قورخورام گوزلرین آوانقارد اولا،
بیر گئجه منسیزجه دوشه یوللارا.
آپارا، داغیدا آیاق سسیمی،
دمیر یوخولارا، شوشه یوللارا.

قورخورام، قورخورام یازیمیز یانا،
سینیردان سینیرا داشا دردیمیز.
کسیله شعریمین چارا اللری،
چئوریله مین واراق یاشا دردیمیز.

قورخورام گؤزلرین گؤزومدن دوشه،
یاپیشا الیمدن، آپارانمایا.
دوشونه یاشامدا غریب بیر سسی،
منی اؤز کؤکومدن قوپارانمایا.

بو سوسیال قاپیدان، بو‌ دار باجادان،
گؤزله گؤزلرینی، چیخیب قاچماسین!
قاچسا دا، هر گلن یادا-یالتاغا،
اورک باغلاماسین، الین آچماسین!

ساختا دونیامیزین، گؤز گیله‌سینده،
قاراسینی دوشون، آغینی دوشون!
ائلینین دردینی چک شله‌-شله،
دوداغینی دوشون، داغینی دوشون!

#دومان_بختیاری
@SheirOcagi

▫️بئينيمده ساوالان، گؤزومده آراز،
يول آليب گئديرم؛ دوماندا، چن‌ده.
درديمی سيزلايیر بير صدفلی ساز،
نسيگيله بويانیر ماهنی دا، من‌ ده.

ساغیم دا يارادیر، سولوم دا يارا،
باغلانیب آياغیم، كؤچه بيلميرم.
سنه كؤرپولنن قولوم دا يارا،
بو سینیق كؤرپودن كئچه بيلميرم.

اوزومو دؤندريب خزره ساری،
سینیرام ايچيمده آيلی بير گئجه.
گؤزومده سورگوندو دورنا قاطاری،
يايلیم‌لی بير گئجه، يايلی بير گئجه.

حسرتله دايانیب بير آه چكيرم،
آرزیمی گؤزومده سئله دؤندرير.
ساحيلدن-ساحيله گوناه چكيرم،
باغریمی یاندیریب کوله دؤند‌رير.

بير قوشما يازيرام، ياریسی سودا-
ياریسی تورپاقدا اود توتوب يانیر.
بارماغیم آز قالیر سنی اونودا،
بلكه ده وئرديگی ايلقارین دانیر.

بلكه ده يازیمیز یازیلمیش بئله،
بلكه ده ساوالان سیغمايیر منده.
اوره‌ییم توخونور تیکانلی تئله،
«دومان»دا، یاغیشدا، بوراندا، چن‌ده...

#دومان_بختیاری
@SheirOcagi

‍ ▫️ساواش

اوچان قوشلار،
گؤزلرینده سیخیلان اضطراب‌دیر، دوستوم!
قانادی قیریلماسین آرزولارینین!
اوچوقلاماسین دوداقلاریندا سئوگی!
سویونماسین سؤزجوکرینی شیلتاق دوشونجه‌لر!
گون اورتامیز تانکالارین لهله‌ین بوغازی‌دیر،
اوچاقلارین پاتلایان اوره‌یی،
گمیلرین اوزگون دوداقلاری.

یومما گؤزلرینی، دانیش!
اوچوش نه دیر؟ یاز مکتوبلاریندا!
آخشاملاری قاغاییلارلا پایلاش،
«کییئف»ین پوزغون خیاوانلاریندا،
گئجه‌لری اولدوزلارلا!
یوخونا گله بیلیرسم،
قولاغینا آیدان سیرغا تاخارام.
داریخما دوستوم!
یاز مکتوبلاریندا!
قاپینیزدان آسیلان گؤزلر یاشا دولورمو؟
سس بورویورمو کوچه‌نیزی؟
داش توخونورمو پنجره‌نیزه؟
دنیز ساواشچیلارینی گؤردوکده
سنین دوداقلارین می قاچیر،
یوخسا منیم یوخولاریم؟
خولیالاریمدا دانس ائدیر کؤلگه‌ده‌کی سس.
واراقلاییرام گؤزلرینی،
آژیر چکیرم دونیانی؛
باغلانیرام «بوسفور»دا،
دؤیونمه‌ین دنیزین بیلک‌لرینه.
اوچونجو بینانین دؤردونجو قاتیندا،
بیر هئیکل دیکیرم گؤزلریندن بیر عسگرین،
اللرینده بایراق،
قافاسیندا قیزجیغازینین کادرا چکیلمیش اوره‌یی،
گؤزلرینده گؤیرچین.
قورتولسون دئیه، اوچور دونیانین باشینا،
اوچوروملارین دوداغیندان دوشور.
یاز!
ویداعلاشدیغین کیشی، هانسی دووارین،
هانسی خیاوانین،
هانسی کؤرپونون گؤزونده گوللـه‌لندی؟
اوچان قوشلاردان یاز، دوستوم!
گؤزلریندن یاز!...

شعر و سس:
#دومان_بختیاری
@SheirOcagi

▫️اوزاقدان اوزاغا سئویشن گؤزل

اوزاقدان اوزاغا سئویشن گؤزل،
دومانلی گؤزلری بولودا باغلا!
بیر غزل، بیر قوشما، بیر گرایلی یاز،
شعرینین سونوندا منی سوراغلا!

بیر داملا سایاغی قوناق اول بیزه،
قوی بولود آغلاسین، پنجره دولسون!
یاریلسین سینه‌سی قارا تورپاغین،
سئوگیمیز گونشین گؤز یاشی اولسون!

سئویشه-سئویشه، گؤی‌قورشاغیندان،
قوشولاق آغ یئله، ذیروه‌دن آشاق.
گؤز-گوزه، ال-اله، آغری داغیندان،
بو گئجه دومانلی بیر ماهنی قوشاق.

من اولوم دلی داغ، سن ده اول یاغیش!
یاغیشدا جیم‌جیلاق ایسلانام گرک.
گولون قوللارینا شئه سوزن کیمی،
سوزوب کیپریگیندن آسلانام گرک.

اوزاقدان اوزاغا سئویشن گؤزل،
دیله گل، آرزیمیز سئله دونمه‌میش!
بیر یانیق کرمی یارانماقدادیر،
گل، آپار، آلیشیب کوله دونمه‌میش!...

#دومان_بختیاری
@SheirOcagi

▫️دنیزین گؤزلری دولسایدی...

یول-یول اولموش یارالاردان بولودا بویلاندیق،
چارا گزمکده، باتیب دردی دریندن قاندیق،
بیر گئجه اورمولو حسرت‌له آلیشدیق یاندیق.
نه بیله‌یدیک بولودون دردی یانان داغلاردی؟
دنیزین گؤزلری دولسایدی، اؤزون آغلاردی.

ساحیلین ساغ یاراسیندان بو زاوال باشلاندی،
دالغا-دالغا گونشین ساچلاری قارغیشلاندی،
گؤی سوسوب یئل قاناد آچدیقجا، یاشیللیق یاندی.
دؤنه بیلسه‌یدی یاغیش، آغ یاراسین باغلاردی،
دنیزین گؤزلری دولسایدی، اؤزون آغلاردی.

بیر دنیز دردیمیزه دوز قالانیر، آی قارداش!
یارامیزدان آجی حسرت جالانیر، آی قارداش!
بیر ائلین آرزیسی کؤکدن تالانیر، آی قارداش!
شاهیدیم اللری قوینوندا قالان باغلاردی،
دنیزین گؤزلری دولسایدی، اؤزون آغلاردی.

باخ! سهندین یاراسیندان آجی غوربت قالخیر،
بو شورانلیق گئجه‌لردن گؤیه نیفرت قالخیر،
تورپاغین داغلی دؤشوندن دئمه غیرت قالخیر.
آییق اول! دورنا سفردن قاییدان چاغلاردی،
دنیزین گؤزلری دولسایدی، اؤزون آغلاردی.

بیلیرم یوللاری غوربت بورویوب چوخداندیر،
بو ائلی یاتماغا عادت بورویوب چوخداندیر،
دنیزی کؤهنه خیانت بورویوب چوخداندیر،
یوخسا ایللر بویو کؤکسونده بولود چاغلاردی.
دنیزین گؤزلری دولسایدی، اؤزون آغلاردی...

#دومان_بختیاری
@SheirOcagi

▫️آتام منیم

آتامین اللری یاشام گتیریر،
آلنیندا قیریشلار غمله یازیلمیش.
آتام بیر قیبله‌دیر دار گونلریمده،
نامازی پوزولموش، سوزو پوزولموش.

درین دوشوننده ایچیم آلیشیر،
قابارلی اللرین اؤپورم اونون.
اوره‌ییم آسیلیر سئوگی باغیندا،
یانیقلی یازیرام بو عشقین سونون.

داغ کیمی اوجادیر، باشیندا قاری،
آتامین گؤزونده اومودوم قالیب.
آتا سئوگیسینده بوغولمایانی،
تانری بیر یاش کیمی گؤزوندن سالیب.

یاشام دؤیوشونده ووقارلا دوران،
قدّینی اَیمه‌ین آتام‌دیر منیم.
سئوگی باغچاسیندا، گولون عشقینه،
غورورلا دَیمه‌ین آتام‌دیر منیم.

#دومان_بختیاری
@SheirOcagi

▫️بو منیم سون سسیم اولسون، ائشیدین! گون باتدی،
دنیزین دردی داغ اولدو، چوخونو آغلاتدی.
دورنالار دؤنمه‌دی، چایلار قورودو، چؤل قالدی،
چوخو دا آغرینی داندی، چوخو آنجاق یاتدی.

اویانین کال یوخودان، بسدی! دنیز جان وئردی،
قارا کؤلگه دنیزین قتلینه فرمان وئردی.
دوداغی پارچالانیب گؤزلری توودان دوشدو،
او قدر قالدی سوسوز، حنجره‌سی قان وئردی.

اسکی بیر آغ یارادان سؤز آچاجاقسیز بیر گون،
شوملاییب اؤز ایچینیزده اوچاجاقسیز بیر گون.
یارانیز گؤینه‌یه‌رک، دوز بوروین وارلیقدان،
باش آچیق، چیلپاق آیاق‌لا قاچاجاقسیز بیر گون.

#دومان_بختیاری
@SheirOcagi

‍ ▫️گَل

بیر دسته چیچک آغ-قارالی باغلامیشام، گل!
عشقین اوره‌یین شعره چکیب داغلامیشام، گل!

زیل ساچلاریمی گؤز یاشیم ایلا سویا وئردیم،
«اولدوز سایاراق» صوبحه کیمی آغلامیشام، گل!

چوخداندی، سنین گؤزلرینی آیلی چکندن،
اؤز گؤزلریمی پنجره‌یه باغلامیشام، گل!

گل، گؤر نه سایاق سئوگیمیزی غوربت آپارمیش!
بیر آغ بولودون کؤینه‌یینه چاغلامیشام، گل!

سینمیش اوره‌ییم؛ نئیله‌ییرم قوشمانی، شعری؟!
تک بیرجه غزل سن گله‌نه ساخلامیشام، گل!

#دومان_بختیاری
🎙 سالار موغانلی
@SheirOcagi